Amukakatile Mbuli Kuti Mulimubwene Ooyo Uutabonwa!
Amukakatile Mbuli Kuti Mulimubwene Ooyo Uutabonwa!
“[Musa wakakakatila] mbuli kuti wakabona yooyo uutaboneki.”—BAHIBULU 11:27, Ci.
1. Ino makani nzi mapati Jesu ngaakaamba mu Mulumbe wakwe waa Cilundu kujatikizya Leza?
JEHOVA ngu Leza uutaboneki. Ciindi Musa naakalomba kuti abone bulemu bwa Jehova, Jehova wakamwiingula kuti: “Tokonzyi kubona busyu bwangu pe, nkaambo taakwe muntu uukonzya kubona busyu bwangu akupona.” (Kulonga 33:20) Alimwi imwaapostolo Johane wakalemba kuti: “Takukwe muntu uwakabona Leza neciba ciindi comwe.” (Johane 1:18) Ciindi Jesu Kristo naakali anyika, awalo taakali kukonzya kumubona Leza pe. Nokuba boobo, mu Mulumbe wakwe waa Cilundu, Jesu wakaamba kuti: “Bali acoolwe abo basalala mumyoyo, nkaambo bazoobona Leza.” (Matayo 5:8) Ino Jesu wakali kupandulula nzi?
2. Ino nkaambo nzi ncotutakonzyi kumubona Leza ameso eesu?
2 Imagwalo atondezya kuti Jehova Muuya uutalibonyi. (Johane 4:24; Ba-Kolose 1:15; 1 Timoteo 1:17) Aboobo, Jesu tanaakali kwaamba kuti swebo tobantu tulakonzya kumubona Jehova ameso eesu pe. Masimpe, Banakristo bananike bayoomubona Jehova Leza kujulu baakumana kubusyigwa kabali zilenge zyamuuya. Pele bantu “basalala mumyoyo” alimwi ibajisi bulangizi bwakupona kukabe kutamani anyika, abalo balakonzya ‘kubona’ Leza. Ino eeci cikonzyeka buti?
3. Ino muunzila nzi bantu mobakonzya kubona bube bwa Leza?
3 Tulayiya kujatikizya Jehova kwiinda mukulangisya zintu nzyaakalenga. Tulakonzya kubotelwaa nguzu zyakwe alimwi akukulwaizigwa kuzumina kuti ngo Leza, Imulengi. (Ba-Hebrayo 11:3; Ciyubunuzyo 4:11) Kujatikizya kaambo aaka, imwaapostolo Paulo wakalemba kuti: “Makani [aa Leza] aatabonwi alaboneka kukumvwigwa kuncito zyakwe, nkukuti inguzu zyakwe abu-Leza bwakwe zitamani.” (Ba-Roma 1:20) Aboobo, majwi aa Jesu ajatikizya kubona Leza alabikkilizyaa nguzu zyakukonzya kubona bube bumwi bwa Jehova. Ikubona ooku kuyeeme aluzibo lwini-lwini alimwi akubona munzila yakumuuya ‘ameso aamumoyo.’ (Ba-Efeso 1:18) Imajwi alimwi amicito ya Jesu azyalo zilayubununa zintu zinji kujatikizya Leza. Aboobo, Jesu wakaamba kuti: “Oyo uwandibona, wamubona awalo Taata.” (Johane 14:9) Jesu wakatondezya bube bwa Jehova munzila iilondokede. Aboobo ikuziba buumi bwa Jesu alimwi akuyiisya kwakwe zilakonzya kutugwasya kubona bube bumwi bwa Leza.
Ikumvwisya Alimwi Akulumba Zintu Zyakumuuya Kulayandika Kapati
4. Ino bantu banji mazubaano bakutondezya buti kutalumba kuzintu zyakumuuya?
4 Mazubaano, ilusyomo alimwi akulumba zintu zyakumuuya takujaniki-janiki buyo pe. Paulo wakaamba kuti: “Teensi boonse abali alusyomo pe.” (2 Ba-Tesalonika 3:2) Bantu banji babikkila buyo maano muzintu nzyobayanda lwabo beni alimwi tabasyomi muli Leza pe. Imicito yabo mibi alimwi ikutalumba zintu zyakumuuya kulabasinkila kubonaa meso aakumvwisya, nkaambo imwaapostolo Johane wakalemba kuti: “Oyo uucita bubi tabwene Leza.” (3 Johane 11) Akaambo kakuti bantu aaba tabamuboni Leza ameso aabo, balacita zintu kabayeeya kuti Leza takonzyi kubona zintu nzyobacita. (Ezekieli 9:9) Tabazibikkili maanu zintu zyakumuuya, aboobo tabakonzyi kujana “luzibo lwa-Leza.” (Tusimpi 2:5) Imajwi aakalemba Paulo aleelela aakuti: “Muntunsi tatambuli makani aa-Muuya wa-Leza, pe, nkaambo kumeso aakwe mbufubafuba buyo. Takonzyi kwaaziba pe, nkaambo ncamuuya ncaatwelukwa.”—1 Ba-Korinto 2:14.
5. Ino nkaambo nzi kamasimpe nkobazi bantu balumba zintu zyakumuuya?
5 Ikuti katubikkilia maanu lyoonse kuzintu zyakumuuya, tunoozi kuti nokuba kuti Jehova tali Leza sikujanina milandu, ulizyi ciindi notuyeeya akulombozya zintu zibi. Masimpe, “Inzila zyamuntu zili mumeso aa-Jehova, ngonguwe uulingula migwagwa yakwe yoonse.” (Tusimpi 5:21) Ciindi notwacita cibi, cilatukulwaizya kweempwa alimwi akuyandaula kulekelelwa kuli Jehova akaambo kakuti tulamuyanda alimwi tatuyandi kuti tumunyemye pe.—Intembauzyo 78:41; 130:3.
Ino Ncinzi Citugwasya Kukakatila?
6. Ino kukakatila caamba nzi?
6 Nokuba kuti Jehova tatumuboni ameso, lyoonse tweelede kuyeeya kuti walo ulatubona. Ikuziba kuti nkwali alimwi akusinizya kuti ulaafwaafwi kuli baabo bamwiita kuyootugwasya kukakatila—ikwiima cakutazungaana mulusyomo lwesu kulinguwe. (Intembauzyo 145:18) Tulakonzya kuba mbuli Musa walo Paulo ngwaakalemba kuti: “Alusyomo Mozesi wakazwa mu Ijipiti, taakwe naakayoowa bukali bwamuleli wamumo pe, Taakapiluka nkaambo mbuli kuti wakabona yooyo uutaboneki.”—Bahibulu 11:27, Ci.
7, 8. Ino ncinzi cakakulwaizya Musa kuti akonzye kwiima kumbele lya Farao?
7 Kazuzikizya mulimo ngwaakapegwaa Leza wakugwisya bana Israyeli mubuzike ku Egepita, Musa cakwiinduluka-induluka wakalibonya kumweendelezi mupati Farao munkuta yabwami kaizwide nkumekume zyabukombi alimwi azyankondo. Kulangilwa kuti bwaanda boonse bwakazekaudwe mituni. Nokuba kuti Jehova talibonyi, pele musa wakalizyi kuti nkwali ncobeni mukwiindanaa mituni yoonse yitaponi yakali kwiiminina baleza babana Egepita. Anu nkakaambo kaako Musa ncaatakakongwaa Farao!
8 Ino ncinzi cakakulwaizya Musa kwiima kumbele lya Farao cakwiinduluka-induluka? Imagwalo atwaambila kuti, ‘oyu muntu Musa wakali mubombemoyo kwiinda bantu boonse baansi.’ (Myeelwe 12:3) Cilasalala kwaamba kuti kuyuma kwakwe munzila yakumuuya alimwi alusinizyo lwakuti Leza wakali anguwe, zyakapa Musa nguzu zyakali kuyandika kutegwa akaiminine yooyo ‘utalibonyi’ kumwami waku Egepita silunya. Ino munzila nzi aabo ‘babona’ Leza uutaboneki mbobatondezya lusyomo mulinguwe mazubaano?
9. Ino ninzila nzi yomwe motukonzya kukakatila lyoonse?
9 Inzila imwi motukonzya kutondezya lusyomo akukakatila mbuli kuti tulimubwene Ooyo uutaboneki nkwiinda mukukambauka cabusungu nokuba kuti kuli kupenzyegwa. Jesu wakacenjezya basikwiiya bakwe kuti: “Muyoosulwa bantu boonse nkaambo kazina lyangu.” (Luka 21:17) Alimwi wakabaambila kuti: “Muzike tali mupati kwiinda simalelaakwe. Kuti bakandipenzya mebo, bayoomupenzya anywebo.” (Johane 15:20) Majwi aa Jesu tanaakawidaansi pe, mbwaakafwida buyo, basikumutobela bakapenzyegwa kapati munzila yakukongwa, kwaangwa alimwi akuumwa. (Incito 4:1-3, 18-21; 5:17, 18, 40) Nokuba kuti bakali kupenzyegwa, baapostolo ba Jesu alimwi abasikwiiya bambi bakazumanana kukambauka makani mabotu cabusicamba—Incito 4:29-31.
10. Ino lusyomo ndotujisi lwakuti Jehova ulatukwabilila lutugwasya buti mumulimo wesu?
10 Mbubwenya mbuli Musa, basikutobela Jesu bakusaanguna kunyina nobakakongwaa basinkondonyina banji balibonyaa meso pe. Basikwiiya ba Jesu bakalijisi lusyomo muli Leza, aboobo bakali kukonzya kuliyumya muzipenzyo zipati zyakabacitikila. Camasimpe, bakazumanana kukakatila mbuli kuti bali mubwene Ooyo uutaboneki. Sunu, ikuziba kuti Jehova ulatukwabilila kulatuyumya kapati akutukulwaizya alimwi akutupa kutayoowa mumulimo wesu wakukambauka Bwami. Ijwi lya Leza lyaamba kuti “kuyoowa muntu kulateya kakole, pele uusyoma Jehova ulakala kabotu.” (Tusimpi 29:25) Akaambo kaceeci, tatupilukili musyule akaambo kabukandu bwakupenzyegwa pe; antela kufwa bweemya kumulimo wesu. Ilusyomo lwesu lutukulwaizya kupa bumboni cabusungu kuli basimukoboma, mbotubeleka limwi, mbotwiiya limwi alimwi abambi buyo—Ba-Roma 1:14-16.
Ooyo Uutaboneki Ulabasololela Bantu Bakwe
11. Kweelanaa Petro alimwi a Juda, mbuti bamwi ibakali kuyanzanaa mbungano ya Bunakristo mbobakatondezya kutalulama munzila yakumuuya?
11 Ilusyomo lulatugwasya kubona Jehova kuba nguwe uusololela mbunga yakwe yaanyika. Aboobo tweelede kukweeleba kutongooka baabo ibajisi mukuli mumbungano. Baapostolo bobile Petro alimwi amunyina Jesu uutegwa Juda bakacenjezya kujatikizya bantu bamwi ibatakaluzi munzila yakumuuya ibakaamba cakusampaula baalumi ibakali kusololela akati ka Banakristo. (2 Petro 2:9-12; Juda 8) Sena aaba basikujanina bamwi milandu nobakaamba boobo kuli Jehova nokwali kutegwa ulalibonyaa meso? Peepe! Pele akaambo kakuti Leza taboneki, aaba baalumi bakakakilwa kuyeeya kuti bayoolyaambila beni.
12. Ino nciimo nzi ncotweelede kutondezya kuli baabo basololela mumbungano?
12 Masimpe kuti imbungano ya Bunakristo ilijisi bantu batalondokede. Aabo babeleka kabali baalu ziindi zimwi balakonzya kulubizya munzila ikonzya kutucisizya moyo. Pele, Jehova uli mukubabelesya baalumi aaba kabali beembezi babutanga bwakwe. (1 Petro 5:1, 2) Ibaalumi alimwi abamakaintu bajisi mizeezo yakumuuya, balizyi kuti eeyi njenzila Jehova njabelesya kusololela bantu bakwe. Aboobo swebo mbotuli Banakristo, tweelede kubweeleba bukkale bwakubatongooka, akulemeka bubambe bwa Leza bwateokrasi. Kwiinda mukubaswiilila aabo basololela akati kesu, tutondezya kuti tulamubona Ooyo uutaboneki—Ba-Hebrayo 13:17.
Kubona Leza Kuba Mwiiyi Mupati
13, 14. Ino kubona Jehova kuba Mwiiyi Mupati cipandulula nzi kulindinywe?
13 Kuli lubazu alumwi luyandika kulanganya munzila yakumuuya. Isaya wakasinsima kuti: “Meso aanu ayoobona Mwiiyi wanu.” (Isaya 30:20) Kuyandika kubaa lusyomo kutegwa muzibe kuti Jehova nguutuyiisya kwiinda mumbunga yakwe yaanyika. (Matayo 24:45-47) Ikubona Leza kuba Mwiiyi Mupati tacaambi buyo ikubaa zilengwa zibotu zyakwiiya alimwi akujanika lyoonse kumiswaangano ya Bunakristo pe. Cipandulula kuzibelesya kabotu zintu eezyo Leza nzyapa kutegwa tugwasigwe munzila yakumuuya. Mucikozyanyo, tuyandika kubikkila maanu kapati kubusolozi Jehova mbwapa kwiinda muli Jesu kutegwa tutasweeki munzila yakumuuya.—Ba-Hebrayo 2:1.
14 Ziindi zimwi ciyandika kusolekesya kutegwa tujane mpindu kuzwa kucakulya cakumuuya. Mucikozyanyo, tulakonzya kutalika kubala katutabikkili maanu muzibalo zimwi zya Bbaibbele nzyotujana kuti zilatuyumina kumvwa caambwa. Ciindi notubala mamagazini aa Ngazi Yamulindizi alimwi a Awake!, ambweni tulasotoka zibalo zimwi zijatikizya makani atatukondelezyi. Antela mizeezo yesu inga ili koocindyoli ciindi notuli kumiswaangano. Nokuba boobo, tulakonzya kuzumanana kupakamana ikuti twayeeyesya kutwaambo tuli mukubandikwa. Ikulumba malailile aakumuuya ngotupegwa citondezya kuti tulizyi kuti Jehova ngo Mwiiyi wesu Mupati.
Tweelede Kulyaambilila
15. Ino bamwi bacita buti kutegwa balibonye mbuli kuti Jehova tababwenyi?
15 Ikapati akaambo kakuti bubi buli koonse-koonse kuno “kumamanino aaciindi,” lusyomo muli Ooyo uutaboneki lulayandika kapati. (Daniele 12:4) Ikutasyomeka alimwi akutalilemeka mumakani aakoonana kwavwula kapati. Pele cilayandika kapati kuyeeya kuti Jehova ulabona micito yesu nokuba kuti bantu tabakonzyi kutubona. Bamwi baaluba makani aaya amasimpe. Ciindi bantu bambi nobatakonzyi kubabona, balalilemeka munzila itali yamumagwalo. Mucikozyanyo, bamwi tiibacikonzya kuleka kweebelela zyakulikondelezya zibi alimwi akweebelela zintu ziletela muzeezo wakoonana a Internet, acipekupeku alimwi amuzibelesyo zimwi zyamazubaano zisumpukide. Akaambo kakuti zintu zili boobu zilacitwa cakusisikizya, ibamwi bacita mbuli kuti micito yabo Jehova taiboni.
16. Ino ncinzi cikonzya kutugwasya kutegwa tupone kweelanaa zyeelelo zya Jehova zisumpukide?
16 Cilayandika kapati kubikkila maanu kumajwi amwaapostolo Paulo aakuti: “Toonse buyo tuleelede kulyaambilila makani esu kubusyu bwa-Leza.” (Ba-Roma 14:12) Tweelede kuyeeya kuti kufwumbwa ciindi notubisya, tubisyila Jehova. Ikuziba makani aaya kweelede kutugwasya kupona kweelanaa zyeelelo zyakwe zisumpukide alimwi akweeleba micito iitasalali. Ibbaibbele lituyeezya kuti: “Takukwe cintu cakalengwa icitabwenekede mumeso aakwe, pele zyoonse zilivumbulwidwe, zili antangalala, kulinguwe oyo ngutujisizi makani.” (Ba-Hebrayo 4:13) Masimpe, tweelede kulyaambilila kuli Leza, pele bwini mbwakuti akaambo kakuti tulamuyanda kapati Jehova, nkakaambo kaako ncotucitila kuyanda kwakwe alimwi akutobela zyeelelo zyakwe ziluleme. Aboobo atucenjele mumakani ajatikizya kusala zyakulikondelezya alimwi ambotulilemeka ciindi notutali amusimbima naa musankwama.
17. Ino Jehova ulatulanga kajisi luyandisyo luli buti?
17 Jehova ulatuyandisya, pele eeci tacipandululi kuti ulalindila kuti tulubizye kutegwa atusubule kabotu pe. Muciindi caboobo, ulatulanga caluyando mbubwenya mbuli usyi uyanda kupa bulumbu kubana bakwe bamvwa. Elo kaka cilaumbulizya ikuziba kuti Taateesu wakujulu ulakondwaa lusyomo lwesu alimwi akuti “nguupa cilumbo kulibaabo bamuyandaula”! (Ba-Hebrayo 11:6) Atubaa lusyomo luzwide muli Jehova “akumumanina milimo camoyo woonse.”—1 Makani 28:9.
18. Akaambo kakuti Jehova ulatulanga alimwi ulakubikkila maanu kusyomeka kwesu, ino nzisyomezyo nzi nzyotujana mu Magwalo?
18 Ibbuku lya Tusimpi 15:3 lyaamba kuti: “Meso aa-Jehova ali koonse koonse, alalanga basizibi ababotu boonse.” Camasimpe, Leza ulalanga bantu basizibi alimwi akubacitila mbubwenya mbuli imilimo yabo. Nokuba boobo, ikuti katuli akati kabantu ‘babotu,’ tulakonzya kusinizya kuti Jehova ulabikkila maanu kumilimo yesu yalusyomo. Elo kaka cilayumya lusyomo ikuziba kuti ‘milimo yesu yamu Mwami tiikonzyi kuba yabuyo pe,’ alimwi akuti ooyo uutaboneki ‘takonzya kuluba milimo yesu akuyanda nkotwaakatondezya nkaambo kazina lyakwe’!—1 Ba-Korinto 15:58; Ba-Hebrayo 6:10.
Ikulomba Jehova Kuti Atulingule
19. Ino nimpindu nzi zijanika akaambo kalusyomo luyumu kuli Jehova?
19 Mbotuli balanda basyomeka kuli Jehova, tulayandika kapati kulinguwe. (Matayo 10:29-31) Nokuba kuti taboneki ameso, ulakonzya kuba mwini-mwini kulindiswe alimwi tulakonzya kulumba cilongwe cesu anguwe. Ikubaa ciimo cili boobu kuli Taateesu wakujulu kutuletela mpindu zinji kapati. Ilusyomo lwesu luyumu lulatugwasya ikubaa moyo uusalala alimwi amanjezeezya aasalala kuli Jehova. Ilusyomo lutajisi muzeezo wakuupaupa ameso, lulatucingilila kubuumi bwakucita zintu zyakunyika kakuli tuli Banakristo. (1 Timoteo 1:5, 18, 19) Ilusyomo lwesu lutazungaani kuli Leza lulakonzya kupa cikozyanyo cibotu akukulwaizya baabo mbotukkede limwi. (1 Timoteo 4:12) Aboobo, lusyomo luli boobo lusumpula kulilemeka kwabunaleza kupa kuti moyo wa Jehova ubotelwe.—Tusimpi 27:11.
20, 21. (a) Ino nkaambo nzi ncotulombozya kulangwaa liso lya Jehova? (b) Ino Intembauzyo 139:23, 24 inga twaibelesya buti mubuumi bwesu?
20 Ikuti katuli basongo, tulikkomenyi akaambo kakubaa Jehova uutulanga. Tatuyandi buyo kuti katubona pe, pele alimwi tulombozya kuti katulingula kabotu-kabotu mumizeezo alimwi amumicito yesu. Mumupailo, tulakonzya kumulomba Jehova kuti avwuntaule mulindiswe akubona naa kuli mizeezo imwi iitaluzi. Camasimpe, ulakonzya kutugwasya kuliyumya mumapenzi alimwi akucinca nkotuyandika. Icakweelela, sintembauzyo Davida wakaimba kuti: “Undilingule, O Leza, uzibe moyo wangu. Undisunke, uzibe miyeeyo yangu. Bona na muli inzila imbi mulindime; Undeenzye munzila iitamani.”—Intembauzyo 139:23, 24.
21 Davida wakakombelezya Jehova kuti amulingule akubona naa kuli “inzila imbi” mulinguwe. Mbubwenya mbuli sintembauzyo, sena tatulombozyi kuti Leza atulingule mumoyo akubona naa kuli mizeezo mibi? Aboobo, calusyomo atumulombe Jehova kuti atulingule. Pele ino mbuti kuti kulibilika kwatukatazya akaambo kakulubizya antela cintu cimwi buyo kacitukatazyide? Lino atuzumanane kupaila cakusinizya kuli Leza siluyando Jehova, alimwi akulibombya kubusolozi bwakwe bwamuuya uusalala alimwi akululayo lwa Jwi lyakwe. Tulakonzya kusyoma mulugwasyo lwakwe alimwi akutugwasya kutobela nzila iisololela kubuumi butamani.—Intembauzyo 40:11-13.
22. Ino tweelede kubaa makanze ali buti kujatikizya Ooyo uutaboneki?
22 Masimpe, Jehova uyootulongezyaa buumi butamani ikuti twacita eezyo nzyayanda. Ee, tuyandika kuzuminizya nguzu zyakwe alimwi abweendelezi mbubwenya bwakacita mwaapostolo Paulo wakalemba kuti: ‘Ku-Mwami mupati uutamani walyoonse, uutabonwa, Leza alikke, akube bulemu akwaalaala lyoonse alyoonse kukabe kutamani Ameni.’ (1 Timoteo 1:17) Lyoonse atutondezye bulemu bwini-bwini buzwa mumoyo wesu kuli Jehova. Ziyume zitete, tutazungaani mumakanze eesu aakukakatila mbuli kuti tulimubwenyi Ooyo uutaboneki.
Ino Inga Mwaingula Buti?
• Ino inga cakonzyeka buti kubantu ikuti bamubone Leza?
• Ikuti Jehova kali mwini-mwini kulindiswe, ino inga twacita buti ciindi notupenzyegwa?
• Ino cipandulula nzi ikubona Jehova kuba Mwiiyi wesu Mupati?
• Ino nkaambo nzi ncotuyandila kuti Jehova atulingule?
[Mibuzyo yaciiyo]
[Cifwanikiso icili apeeji 14]
Musa tanaakakongwaa Farao, wakacita mbuli kuti uli mubwenyi Jehova, Leza uutaboneki
[Cifwanikiso icili apeeji 17]
Tutaciti mbuli kuti Jehova takonzyi kubona nzyotucita
[Cifwanikiso icili apeeji 19]
Tulazumanana kuyandaula luzibo lwa Leza nkaambo tumubona kuba Mwiiyi wesu Mupati