“Kuyasa Kwamuzwalani”

IMWAAPOSTOLO Paulo wakacibona kuti cakali kweelela kululamika Banakristo bamumwaanda wamyaka wakusaanguna ku Galatiya. Kulangilwa kuti akaambo kakutayanda kubanyemya, wakabuzya kuti: “Lino sunu sa ndaba sinkondonyokwe nkaambo kakumukananina lusinizyo?”—Ba-Galatiya 4:16.

Kwiinda ‘mukubakananina lusinizyo,’ Paulo kunyina naakaba sinkondonyina wabo pe. Pele mubwini wakali kucita kweelanaa njiisyo ya Bbaibbele yaamba kuti: “Kuyasa kwamuzwalani kulasyomeka.” (Tusimpi 27:6) Paulo wakalizyi kuti basikulubizya bakali kukonzya kuyaswa kujatikizya bulemu bwabo. Nokuba boobo, wakalizyi kuti, ikutamulaya sizibi eelyo neelede kulaigwa cakali kukonzya kupa kuti luyando lwa Jehova Leza lutatondezyegwi kuli sizibi. (Ba-Hebrayo 12:5-7) Aboobo mbwaakali muzwalani uusyomeka alimwi iwakajisi mpuwo mbotu yakubikkila maanu kapati kumbungano, Paulo kunyina naakapiluka musule ikupa lulayo lwakululamika.

Bakamboni ba Jehova sunu bali mukuzuzikizya mulimo wabo ‘wakuyiisya bantu bamisyobo yoonse, . . . kubayiisya kuti bajatisye makani oonse Jesu Kristo ngaakalailila.’ Ikwiinda mukucita boobo, aaba Banakristo basinizizye kunyina nobajokoloka buya pe mukwaamba kasimpe kamu Bbaibbele ikayubununa akukazya bulubizyi bwabukombi alimwi abukkale butali bwabunakristo. (Matayo 15:9; 23:9; 28:19, 20; 1 Ba-Korinto 6:9, 10) Muciindi cakuba basinkondo beelede kukazigwa, mbantu ibatondezya kubikkila maanu ikucitwaa balongwe beni-beni.

Sintembauzyo walo wakajisi busongo bwakasololelwaa muuya wa Leza uusalala, wakalemba kuti: “Muntu uululeme anduume akunditapatila—nduzyalo. Pele mafuta aabasizibi atananikwi mutwe wangu, nkaambo lyoonse ndakomba cakulwisya milimo yabo mibi.”—Intembauzyo 141:5.