Inguzu Nzyomujisi Zyakusyoma

Ambweni mulazikkomanina inguzu nzyomujisi zyakusyoma kufwumbwa ncomuyanda kusyoma. Ibunji bwabantu abalo balazikkomanina inguzu eezi zyakusyoma kufwumbwa nzyobayanda. Kwiinda mukubelesya nguzu eezi, ibantu bali 6,000,000,000 (6 billion) ibakkala munyika cakugambya batalisya lusyomo lwiindene-indene. Mbubwenya mbuli kwiindana-indana kwamisyobo, bubambe, bupange bwazintu, kubota, kununka alimwi amakani ngotujana muzilenge, ikwiindana-indana kwalusyomo kanjikanji kutupa kubikkila maanu, kukkomana alimwi akubotelwaa buumi. Ikwiindana-indana kuli boobu mubwini kulakonzya kupa buumi kuti kabukkomanisya.—Intembauzyo 104:24.

PELE kulayandika kucenjela. Izisyomwa zimwi taziindene buyo pe, pele ziletela ntenda. Mucikozyanyo, kumatalikilo amwaanda wamyaka wa 20, bamwi bantu bakatalika kusyoma kuti, iba Juda alimwi atubunga twamaseseke itwakali kwiitwa kuti Freemasons bakajisi makanze “aakunyongana lusumpuko lwa Bunakristo akutalisya bulelo bwanyika kwiinda mukukamantana antoomwe.” Imatalikilo amwi akusyoma kuli boobu akazwa mukatulakiti kakali kukazya ba Juda kamutwe wakuti, Protocols of the Learned Elders of Zion (Zizuminano zya Balupati-Pati Bayiide Baku Zioni). Katulakiti aaka kakajisi makani aatali amasimpe akuti, imakanze akali akuyungizya mutelo, kutolaambele mulimo wakupanga zilwanyo zyankondo, kukulwaizya kutola bweendelezi boonse bwamakwebo kutegwa ‘lubono lwa Bamasi lunyoonganizigwe aciindi citayeeyelwi alimwi cakufwaambana.’ Alimwi kutamikizya kwakali kubikkilizya kweendelezya bweende bwalwiiyo kutegwa ‘basandule Bamasi kutalika kuyeeya mbuli banyama,’ alimwi nokuba kubamba njanji yakunsi aanyika kuswaanganya madolopo aayo aajisi zintu zyamakwebo kutegwa balupati-pati bana Juda kabakonzya ‘kuzunda kufwumbwa basikukazya kwiinda mukubanyonyoona.’

Mubwini, zyoonse eezi zyakali buyo zyakubeja—izyakacitwa kutegwa basulayikwe ba Juda. Mark Jones waku British Museum wakaamba kuti, ‘ikatulakiti aka kakali kukazya bama Juda kakasakana amumasi aambi kuzwa kucisi ca Russia’ ooko nkukakasaanguna kulibonya mucibalo camumuteende mu 1903. Kakalibonyaa mumuteende waku London utegwa The Times mubuzuba bwa May 8, 1920. Nokwainda mwaka omwe, imuteende wa The Times wakayubununa kuti, ikatulakiti aka kakali kakubeja. Muciindi eeco, lunyonyooko lwakacitikide kale. Jones waamba kuti, ‘ibubeji buli boobu bulakatazya kusisa.’ Kufwumbwa buyo kuti bantu babuzumina, bubeji bulakonzya kubusya nkondo, intenda mbyaabi alimwi alusyomo lutali kabotu—ikanjikanji kuletela mapenzi mapati, mbubwenya mbuli makani aamumwaanda wamyaka wa 20 mbwaatondezya.—Tusimpi 6:16-19.

Lusyomo Alimwi Akasimpe

Masimpe, lusyomo lulubide lulakonzya kutalika noliba leelyo nokutakwe bubeji. Zimwi ziindi inga tatuziteelelesyi buyo kabotu zintu. Mbangaye bantu  bafwa aciindi mpobatayeeyeli akaambo buyo kakucita zintu nzibakali kusyoma kuti zililuzi? Alimwi ikanjikanji tulacisyoma cintu akaambo buyo kakuti tulaciyanda kucisyoma. Umwi muntu ulaa luzyibo lunji kumakani azintu zyamunyika (professor) waamba kuti, nobaba basayaansi “kwaziindi zinji balazibikkila maanu kapati njiisyo zyabo alimwi anzyobajana bamana kuvwuntauzya.” Lusyomo lwabo lubapa kwaalilwa kusala kabotu mutwaambo kakunyina kunyasya naa kukazya. Bamana balakonzya kupona buumi bwakutazwidilila kabasola buyo kusumpula mizeezo iilubide.—Jeremiya 17:9.

Izintu zili boobo zyacitika amulusyomo lwabukombi—oomo muli kukazyanya kutaambiki. (1 Timoteo 4:1; 2 Timoteo 4:3, 4) Umwi muntu ulakozya kajisi lusyomo lutazungaani muli Leza. Aumwi waamba kuti bantu tabajisi bumboni bwini-bwini bukonzya kubakulwaizya kubikka lusyomo muli Leza. Umwi uzumanana kuti mulijisi muuya uutafwiki walo uuzumanana kupona liya mwafwa. Aumwi usyoma kuti nomwafwa mulamaniina akulekelalyo kubawo. Masimpe, lusyomo lukazyanya mbuli loolu talukonzyi loonse kuba lwamasimpe pe. Aboobo, sena tacili camaanu kubona kuti ncomusyoma ncamasimpe kutali buyo akaambo kakuti nkaambo ncomuyanda kuti kamusyoma? (Tusimpi 1:5) Ino mbubuti mbomukonzya kucita boobu? Icibalo citobela cilakalanga-langa kaambo aaka.

[Cifwanikiso icili apeeji 3]

Icibalo camu 1921 cayubununa makani aa “Protocols of the Learned Elders of Zion” (Zizuminano zya Balupati-Pati Bayiide Baku Zioni)