Twakali Baumpe—Lino Tuli Mbelele!

Notwakacili basimbi baniini, Sakina wakali simukoboma. Sakina wakali mupati alimwi zyukutila lyamusimbi, pele mebo ndakali musyoonto alimwi ndakali fwulukide. Bunji bwaziindi twakali kubwentelana, pele bumwi buzuba twakalwana cibyaabi. Kuzwa buzuba oobo, kunyina notwakali kwaambauzyanya nokuba kwaanzyanya. Mukuya kwaciindi, toonse twakalongela kumbi kakunyina kuzyiba nkwaakagama aumwi.

Mumwaka wa 1994, ndakatalika kwiiya Bbaibbele a Bakamboni ba Jehova, alimwi bucebuce ibube bwangu bwakacinca. Kakwiindide myaka yone, kandili kumuswaangano waalubazu wabuzuba bomwe ku Bujumbura mucisi ca Burundi, ndakagambwa neekaswaanganaa Sakina cakutayeeyela. Ndakakkomana kuti wakajanika, pele kwaanzyanya kwesu tiikwakali kwabulongwe ncobeni pe. Mubuzuba oobo mbubonya, ndakagambwa kapati neekamubona kali akati kabasikubbapatizigwa! Awalo wakalicincide kapati. Tanaakacili sinkazi ngondakali kuzwangana anguwe lyoonse. Cakali kukkomanisya kapati kaka ikumubona kalitondezya kubuleya kuti wakalyaaba kuli Leza kwiinda mukubbapatizigwa!

Naakazwa mumaanzi, ndakafwambaana ndaakumukumbatila akuvwiya-vwiya mukutwi kwakwe ndati: “Sena ulayeeya mbotwakalwana buzuba buya?” Wakaingula ulaamba: “Inzya ndilayeeya, pele nkaindi nocakacitika eeco. Ndimuntu mupya lino.”

Toonse tobile tulikkomene kapati kuti twakakajana kasimpe kamu Bbaibbele ikakamantanya alimwi akuti twakacinca bube bwesu bwakali mbuli bwabaumpe akubaa boobo bwambelele zya Mweembeli Mupati, Jehova Leza. Masimpe, ikasimpe kamu Bbaibbele kalabasandula bantu.