Cilongezyo ca Jehova Cilatuvwubya

“Lulongezyo lwa-Jehova lulavubya, alimwi tayungizyi mause kulindulo.”—TUSIMPI 10:22.

1, 2. Nkaambo nzi lukkomano ncolutabooli kwiinda mubuvwubi bwakumubili?

KUYANDISYA lubono lwakumubili kuli mukweendelezya tuulunzuma twabantu tuli mbotubede. Pele sena lubono lwakumubili lulabaletela lukkomano? Imagazini itegwa The Australian Women’s Weekly yakaamba kuti, “Tandikonzyi kuyeeya naa kuli bantu nobakasikide aciimo mbuli mpobataana sunu mubukkale bwabo.” Alimwi yakayungizya kuti: “Kuli lwiindano. Twaambilwa kuti cisi ca Australia cikkede kabotu kumakani aamakwebo, akuti buumi kunyina nobwakali bubotu kwiinda mbobubede sunu. . . . Nokuba boobo, kutyompwa nkokuli mucisi coonse. Baalumi alimwi abamakaintu boonse buyo balimvwa kuti kuli ncobabulide mubuumi bwabo, pele tabakonzyi kucaamba kuti nceeci pe.” Elo kaka Magwalo aamba masimpe kuti lukkomano alimwi abuumi bubotu tazizwi muzintu nzyotujisi!—Mukambausi 5:10; Luka 12:15.

² Ibbaibbele liyiisya kuti lukkomano lwini-lwini luzwa kululongezyo lwa Leza. Kujatikizya kaambo aaka, ibbuku lya Tusimpi 10:22 lyaamba kuti: “Lulongezyo lwa-Jehova lulavubya, alimwi tayungizyi mause kulindulo.” Macise alaboola akaambo kakuyandisya kujana lubono. Cakweelela, imwaapostolo Paulo wakacenjezya kuti: “Abo bayandisya kuvuba balawida mukutepaulwa amukuteegwa amuzisusi zibi zinji zyabufubafuba zibisizya buumi akubbizya bantu  mukunyonyauka amukusweeka. Nkaambo kuyandisya lubono ngomuyanda wabubi boonse, eno nkaambo kakuluyandisya bamwi ncobaleela kulusyomo, elyo zyabajaya insoni zinjizinji.”—1 Timoteo 6:9, 10.

3. Nkaambo nzi balanda ba Leza ncobasikilwa masukusyo?

³ Kulubazu lumwi, izilongezyo zyakutapengelela zilabasikila boonse aabo bazumanana ‘kuswiilila ijwi lya Jehova.’ (Deuteronomo 28:2) Nokuba boobo, bamwi balakonzya kubuzya kuti, ‘ikuti naa lulongezyo lwa Jehova tayungizyi macise kulindulo, ino nkaambo nzi balanda banji ba Leza ncobapenga?’ Ibbaibbele liyubununa kuti, masukusyo azumizigwa buyo a Leza, pele azwida kuli Saatani, kubweende bwazintu bwakwe bubi alimwi akubukkale bwesu bwakutalondoka. (Matalikilo 6:5; Deuteronomo 32:4, 5; Johane 15:19; Jakobo 1:14, 15) Kuli Jehova nkokuzwida “zipego zibotu zyoonse azyoolwe zyoonse zilondokede.” (Jakobo 1:17) Aboobo, zilongezyo zyakwe tazileteli macise pe. Aboobo lino atulange-lange zyoolwe zimwi zya Leza zilondokede.

Ijwi lya Leza—Cipego Citakwe Muulo

4. Ino ncilongezyo nzi acipego bantu ba Jehova ncobajana “kumamanino aaciindi” okuno?

⁴ Kujatikizya “kumamanino aaciindi,” businsimi bwa Daniele bwaamba kuti: “Luzibo luyooyungizizigwa.” Nokuba boobo, makani aaya akalulamikwaa majwi aakuti: “Taakwe naba omwe wabasizibi uuyoomvwisya pe; basongo mbebayoomvwisya.” (Daniele 12:4, 10) Amuciyeeye buyo eeco! Ijwi lya Leza—businsimi kubugama—bulilembedwe abusongo bwa Leza cakunga sizibi takonzyi kumvwisya, nokuba kuti bantu ba Jehova balakonzya kumvwisya. Imwanaa Leza wakapaila kuti: “Ndakulumba, Taata, Omwami wejulu enyika, nkaambo makani aya wakabasisa basongo abaabo abaziba, waayubulwida bana.” (Luka 10:21) Elo ncilongezyo kaka icakubaa cipego cinyina muulo ca Jwi lya Leza lilembedwe, Ibbaibbele alimwi akuba akati kabaabo Jehova mbaapa luzibo lwakumuuya!—1 Ba-Korinto 1:21, 27, 28; 2:14, 15.

5. Ino busongo ncinzi, alimwi mbuti mbotukonzya kubujana?

⁵ Nitwatalijisi luzibo lwakumuuya nikwali kutegwa tatujisi “busongo buzwa kujulu.” (Jakobo 3:17) Busongo ninguzu zyakubelesya luzibo alimwi akumvwisya kutegwa mumane penzi, mweelebe ntenda, musike ambaakani naa kutegwa mukonzye kupa lulayo lweelede. Ino mbuti mbotukonzya kujana busongo bwa Leza? Ibbuku lya Tusimpi 2:6 lyaamba kuti: “Jehova ulaabila busongo; mumulomo wakwe mulazwa luzibo abusongo.” Inzya, Jehova uyootulongezya abusongo ikuti twazumanana kubupailila, mbubwenya mbuli mbwaakapa Mwami Solomoni “moyo wabusongo uucenjede.” (1 Bami 3:11, 12; Jakobo 1:5-8) Ikutegwa tujane busongo, tweelede kuzumanana kuswiilila Jehova kwiinda mukwiiya alimwi akubelesya Jwi lyakwe lyoonse.

6. Ino nkaambo nzi ncocili camaano kubelesya milawo ya Leza alimwi anjiisyo mubuumi bwesu?

⁶ Izikozyanyo zipati zyabusongo bwa Leza zilajanwa mumilawo alimwi amunjiisyo zya Bbaibbele. Eezi zilatugwasya munzila zyoonse—kumubili, mumizeezo alimwi amunzila yakumuuya. Cakweelela, sintembauzyo wakaimba kuti: “Mulawo wa-Jehova ulilondokede, ulabusya muuya; bukamboni bwa-Jehova bulasyomeka, bulasongwaazya batezi. Milao ya-Jehova ililuleme, ilatangaazya moyo; milumbe ya-Jehova ilasalala, ilamunikila meso. Kuyoowa  Jehova kulasalala, takumani. Imbeta zya-Jehova nzyakasimpe, zililuleme zyoonse. Zilayandika kwiinda ingolida, kwiinda ingolida zinji loko.”—Intembauzyo 19:7-10; 119:72.

7. Ino ncinzi citobela akaambo kakukaka zyeelelo zya Leza ziluleme?

⁷ Kulubazu lumwi, aabo batatobeli zyeelelo zya Leza ziluleme tabalujani lukkomano alimwi aluumuno ndobayandaula. Mukuya kwaciindi, balabona kuti anu Leza tacapwi pe, nkaambo muntu ulatebula ncicona eeco ncabyala. (Ba-Galatiya 6:7) Ituulunzuma twabantu tuli mbotubede tukaka kutobela njiisyo zya Bbaibbele bali mukutebula mapenzi mbuli kumitila musokwe, malwazi aakatazya naa icizibilizi cinyonganya kapati. Ccita kuti bacince nzila zyabo zyabuumi, nkaambo inzila zyabo zisololela kulufwu naa kukunyonyoonwaa Leza.—Matayo 7:13, 14.

8. Ino nkaambo nzi aabo bayanda Jwi lya Leza ncobakkomenyi?

⁸ Nokuba boobo, aabo bayanda Jwi lya Leza alimwi akulibelesya bayoosikilwa zilongezyo lino alimwi akumbele. Balijisi kaambo ncobalimvwida kuti bakalubulwaa mulawo wa Leza, balikkomenyi kapati alimwi balalindila cakukkazika moyo ciindi eeco baakunununwa kucibi akunguzu zyaco zileta lufwu. (Ba-Roma 8:20, 21; Jakobo 1:25) Ibulangizi oobu mbwakasimpe nkaambo buyeeme acipo ca Leza caluyando kubantu—icinunuzyo cacipaizyo ca Mwanaakwe simuzyalwaalikke, Jesu Kristo. (Matayo 20:28; Johane 3:16; Ba-Roma 6:23) Eeci cipego ciinda kubota cisinizya kukomena kwaluyando lwa Leza kubantu alimwi akubikka zilongezyo zitamani kulibaabo boonse ibazumanana kuswiilila Jehova.—Ba-Roma 8:32.

Tulalumba Cipego Camuuya Uusalala

9, 10. Ino mbuti mbotugwasyigwaa cipego ca Jehova camuuya uusalala? Amupe cikozyanyo.

⁹ Acimwi cipego caluyando ca Leza ncotweelede kulumba mmuuya uusalala. Mubuzuba bwa Pentekoste mu 33 C.E., imwaapostolo Petro wakakulwaizya zyuulu-zyuulu zyabantu ibakali ku Jerusalemu kuti: “Amusanduke, mubapatizigwe umwi [a]umwi muzina lya-Jesu Kristo, mujatilwe zibi zyanu, nom[u]ti tambule cipego ca-Muuya Uusalala.” (Incito 2:38) Sunu, Jehova ulapa muuya uusalala kubalanda bakwe balyaabide ibaupailila alimwi ibayanda kucita kuyanda kwakwe. (Luka 11:9-13) Mumazubaa nsiku, eezi nguzu zipati zyakoonse-koonse—muuya uusalala wa Leza naa inguzu zibeleka zyakabanjila baalumi alimwi abamakaintu basilusyomo kubikkilizyaa Banakristo bakusaanguna. (Zekariya 4:6; Incito 4:31) Zilakonzya kucita mbubwenya akulindiswe nokuba kuti tulakonzya kusikilwa zilebyo zipati naa buyumuyumu katuli bantu ba Jehova.—Joeli 2:28, 29.

¹⁰ Amulange-lange cikozyanyo ca Laurel iwakali kuciswa bulwazi bwa polio akumupa kuti kayoya kwiinda mukugwasyilizyigwaa muncini kwamyaka iili 37. * Nokuba kuti wakali mubukkale bukatazyide kapati, mukaintu ooyu wakamubelekela Leza cabusungu kusikila kulufwu. Kwamyaka iili mbwiibede, cilongezyo ca Jehova cakali kumusikila Laurel. Mucikozyanyo, wakakonzya kugwasya bantu ibasika ku 17 kuti bajane luzibo lwini-lwini lwamu Bbaibbele, nokuba kuti wakali kubelesya muncini kwamawoola aali 24 abuzuba! Ibukkale bwakwe buyeezya majwi amwi aamwaapostolo Paulo aakuti: “Ciindi ncinkompeme nciconya ncindi singuzu.” (2 Ba-Korinto 12:10) Masimpe, kufwumbwa kuzwidilila nkotukonzya kubaankuko mukukambauka makani mabotu, takucitiki munguzu zyesu tobeni pe, pele kwiinda mulugwasyo lwa Leza lwamuuya uusalala ngwapa kulibaabo bazumanana kuswiilila jwi lyakwe.—Isaya 40:29-31.

11. Ino mbube buli buti muuya wa Leza mbouzyala muli baabo basama “buntu bupya”?

 ¹¹ Ikuti twamuswiilila Leza, imuuya wakwe ulazyala mulindiswe bube mbuli luyandano, lukondo, luumuno, busicamba, buuya, bubotu, lusyomo, lubombo, alimwi akulyeendelezya. (Ba-Galatiya 5:22, 23) “Micelo yamuuya” ncibeela ca “buntu bupya” Banakristo ncobasama mucibaka cakuba alunya, ciimo cabunyama ncobakali kutondezya kaindi. (Ba-Efeso 4:20-24; Isaya 11:6-9) Icintu cipati mumicelo eeyi nduyando ‘icaanzyo cabuumi bulondokede.’—Ba-Kolose 3:14.

Luyando lwa Bunakristo—Cipego Ciyandika [Kulumba]

12. Ino mbuti Tabita alimwi a Banakristo bamwi bamumwaanda wamyaka wakusaanguna mbobakatondezya luyando?

¹² Luyando lwa Bunakristo ncipego cakulongezyegwaa Jehova—calo ncotweelede kulumba. Ceendelezyegwaa njiisyo, pele cilakondelezya kapati nkaambo cilabikkilizyaa basyomi alimwi cilaindaa lukamantano lwamumukowa. (Johane 15:12, 13; 1 Petro 1:22) Mucikozyanyo, amulange-lange kujatikizya Tabita imukaintu Munakristo uulomenyi wamumwaanda wamyaka wakusaanguna. “Oyo mukaintu wakalizywide milimo mibotu, aluzyalo ndwaakali kucita,” ikapati kulubazu lwabamukabafwu mumbungano. (Incito 9:36) Aaba bamakaintu balakonzya kuti bakalijisi basazinyina, pele Tabita wakali kuyandisya kucita mbuli mbwakonzya kutegwa abagwasye alimwi akubakulwaizya. (1 Johane 3:18) Elo kaka Tabita wakasiya cikozyanyo cibotu! Iluyando lwabunyina lwakapa kuti Priska alimwi a Akula ‘balibambile kujaigwa’ kutegwa Paulo atafwi. Alimwi luyando lwakakulwaizya ba Epafra, Luka, Onesforo alimwi abamwi buyo kuti bagwasye mwaapostolo ciindi naakali muntolongo ku Roma. (Ba-Roma 16:3, 4; 2 Timoteo 1:16; 4:11; Filimona 23, 24) Inzya, Banakristo ibali boobo sunu ‘balayandana,’ icipego cakulongezyegwaa Leza icibatondezya kuti masimpe mbaasikwiiya ba Jesu.—Johane 13:34, 35.

13. Ino mbuti mbotukonzya kutondezya kuti tulalumba kapati kubunyina bwa Bunakristo?

¹³ Sena mulalukkomanina luyando lutondezyegwa mumbungano ya Bunakristo? Sena mulalumba kubunyina bwakumuuya, ibuli munyika yoonse mbwiizulwa? Eezi azyalo zilakkazika moyo alimwi nzilongezyo zizwa kuli Jehova zivwubya. Ino mbuti mbotutondezya kuti tulazibikkila  maano? Nkwiinda mukubelekela Leza milimo iisetekene, kujanika kumiswaangano, akutondezya luyando alimwi amicelo yamuuya wa Leza.—Ba-Filipi 1:9; Ba-Hebrayo 10:24, 25.

‘Zipego Kubantu’

14. Ino ncinzi ciyandika ku Munakristo ikutegwa ayelele kubeleka kali mwaalu naa mukutausi?

¹⁴ Ibaalumi Banakristo ibalombozya kubelekela bakombinyina kabali baalu naa bakutausi bajisi mbaakani mbotu kapati. (1 Timoteo 3:1, 8) Ikutegwa mukwesu ayelele muzyoolwe eezyi, weelede kuti kajisi ciimo cibotu kumuuya, waazyi kabotu Magwalo alimwi uusungweede mumulimo wamumuunda. (Incito 18:24; 1 Timoteo 4:15; 2 Timoteo 4:5) Weelede kuba muntu uulibombya, alimwi uubateme kutegwa zilongezyo zya Leza zimusikile ikutali uulisumpula naa uujisi zyakucita zimbi. (Tusimpi 11:2; Ba-Hebrayo 6:15; 3 Johane 9, 10) Ikuti kakwete, weelede kuba silutwe siluyando alimwi uukonzya kubamba kabotu mukwasyi wakwe woonse. (1 Timoteo 3:4, 5, 12) Akaambo kakuti ulabikkila maano kuzintu zyakumuuya, imuntu ooyo ulakonzya kulongezyegwaa Jehova.—Matayo 6:19-21.

15, 16. Ino mbaani ibalitondezya kuti ‘nzipego kubantu’? Amupe zikozyanyo.

¹⁵ Ciindi aabo ibabeleka kabali baalu mumbungano nobalyaaba kabali bakambausi, beembezi alimwi abamayi, citupa kaambo kakulumba ‘zipego izili boobo kubantu.’ (Baefeso 4:8, 11, Ci) Aabo ibagwasyigwaa milimo yabo yaluyando tabakonzyi buya mane kukutondezya kulumba kwabo lyoonse pe, pele Jehova ulabona zyoonse baalu basyomeka nzyobacita. Takalubi luyando ndobatondezya kuzina lwakwe kwiinda mukubelekela bantu.—1 Timoteo 5:17; Ba-Hebrayo 6:10.

¹⁶ Amulange-lange kujatikizya mwaalu umwi munkutwe iwakaswaya musimbi umwi Munakristo iwakali kuyanda kuti apandulwe kubongo. Imulongwe wamukwasyi ooyo wakaamba kuti, “wakali siluzyalo, ukulwaizya akulanganya. Wakalomba kuti azumizigwe kuti apaile kuli Jehova andiswe. Naakali kupaila bausyi [ibatakali Bakamboni ba Jehova] bakafwinkila kulila alimwi misozi yakayibayiba kubantu boonse ibakali mukaandaako kacibbadela. Elo kaka mupailo wamwaalu ulya wakali wakulibombya alimwi elo kaka Jehova ulijisi luyando kwiinda mukumutuma aciindi ceelede!” Aumwi mulwazi Munakristo wakaamba boobu kujatikizya baalu bakamuswaya: “Ciindi nobakaboola kubulo nkondakabede mucibeela cabantu bacisidwe kapati, ndakalimvwa kuti kufwumbwa cikonzya kutobelaa ciindi eeco, ndakalilibambide kuliyumya. Ndakayuma kapati akuba muluumuno.” Sena kuli muntu uukonzya kukuula kubikkilwa maano kuli boobo? Peepe! Ncipego kuzwa kuli Leza, icijanika buyo mumbungano ya Banakristo.—Isaya 32:1, 2.

Icipego Camulimo Wamumuunda

17, 18. (a) Ino ncoolwe nzi camulimo Jehova ncaapa kubantu bakwe boonse? (b) Ino ndugwasyo luli buti Jehova ndwaapa kutegwa tucikonzye kumanizya mulimo wesu?

¹⁷ Kwiina bulemu bupati bukonzya kupegwa  kumuntu uli woonse kwiinda boobo bwakubelekela Jehova, Mupatikampatila. (Isaya 43:10; 2 Ba-Korinto 4:7; 1 Petro 2:9) Pele, icoolwe cakutola lubazu mumulimo wakubuleya nkocili kubantu boonse—kubana-bana alimwi abapati, baalumi alimwi abamakaintu—ibalombozya ncobeni kubelekela Leza. Sena mulacibelesya cipego eeci ciyandika kapati? Bamwi tabakambauki kabayeeya kuti tabeeleli pe, pele amuyeeye kuti Jehova ulapa muuya uusalala kulibaabo bamubelekela alimwi ulazuzikizya eezyo nzyotutajisi.—Jeremiya 1:6-8; 20:11.

¹⁸ Jehova wapa mulimo wakwe wakukambauka Bwami kubalanda bakwe balibombya, ikutali kubantu ibalisumpula akusyoma munguzu zyabo. (1 Ba-Korinto 1:20, 26-29) Ibantu balibombya balaziba kulezya kwabo alimwi basyoma Leza kuti abagwasye ciindi nobatola lubazu mumulimo wamumuunda. Alimwi balalumba lugwasyo ndwapa kwiinda “[mu]mubanzi uuzi uusyomekede.”—Luka 12:42-44; Tusimpi 22:4.

Buumi Bwamumukwasyi Bukondelezya—Ncipego Cibotu

19. Ino ntwaambo nzi tupa kuzwidilila mukukomezya bana?

¹⁹ Lukwatano abuumi bwamumukwasyi bukondelezya ncipego kuli Leza. (Rute 1:9; Ba-Efeso 3:14, 15) Ibana abalo “ndukono luzwa kuli-Jehova” luyandika kapati iluleta kukondwa kubazyali ibazwidilila mukuyiisya bube bukonda Leza. (Intembauzyo 127:3) Ikuti kamuli bazyali, kamuzumanana kuswiilila jwi lya Jehova kwiinda mukubayiisya bana banu kweelanaa Jwi lyakwe. Aabo ibacita boobo masimpe balajana lugwasyo kuli Jehova alimwi azyoolwe zinji kapati.—Tusimpi 3:5, 6; 22:6; Ba-Efeso 6:1-4.

20. Ino ncinzi cikonzya kugwasya bazyali ibajisi bana baleya kuzwa mubukombi bwakasimpe?

²⁰ Nokuba kuti bazyali banaleza balasolekesya, ziindi zimwi bamwi bana babo nobakomena balalisalila kuleya kuzwa mubukombi bwakasimpe. (Matalikilo 26:34, 35) Eeci cilakonzya kubanyonganya mumizeezo bazyali. (Tusimpi 17:21, 25) Nokuba boobo, muciindi cakusowa bulangizi, cilakonzya kubagwasya ikuyeeya cikozyanyo ca Jesu camwana mutaka. Nokuba kuti wakazwa amunzi akutobela nzila zyabuzangi, wakazyikujokela kumunzi wabausyi, balo bakamutambula cakukondwa alimwi caluyando. (Luka 15:11-32) Kufwumbwa cikonzya kucitika, bazyali Banakristo basyomeka balakonzya kusyomezyegwa kuti Jehova ulabamvwida, kubabikkila maano caluyando alimwi alugwasyo lwakwe lutaleli.—Intembauzyo 145:14.

21. Ino nguni ngotweelede kuswiilila, alimwi nkaambo nzi?

²¹ Lino umwi aumwi wesu aakanze kucita icintu ciyandika kapati mubuumi bwesu. Sena tulombozya kujana zintu zyakumubili zinji, calo cikonzya kutuletela macise alimwi akumikwasyi yesu? Antela tuyandisya ‘zipego zibotu alimwi azyoolwe zilondokede’ izizwa “kuli-Wisi wamimuni.” (Jakobo 1:17) Saatani “wisi wababeja” uyanda kuti tulijaye kubelekela lubono lwakumubili akusowekelwa lukkomano alimwi abuumi. (Johane 8:44; Luka 12:15) Aboobo, Jehova ulatulanganya kapati alimwi uyanda kuti katuli kabotu. (Isaya 48:17, 18) Aboobo, atuzumanane kuswiilila kuli Taateesu wakujulu lyoonse ‘cakulibotezya’ mulinguwe. (Intembauzyo 37:4) Ikuti twatobela nzila ili boobo, icipego ca Leza citaulwi mali alimwi akulongezyegwa kapati kuyootuvwubya kakunyina macise.

Bupanduluzi buyungizidwe

Sena Mulayeeya?

• Ino lukkomano lunji nkuli nkolukonzya kujanika?

• Ino nzipego nzi zimwi Jehova nzyapa kubantu bakwe?

• Nkaambo nzi mulimo wamumuunda ncouli cipego?

• Ino ncinzi bazyali ncobeelede kucita kutegwa bajane cilongezyo ca Leza ciindi nobakomezya bana babo?

[Mibuzyo yaciiyo]

[Cifwanikiso icili apeeji 14]

Sena mulalumba cipego ca Leza ca Jwi lyakwe lilembedwe?

[Cifwanikiso icili apeeji 15]

Nokuba kuti wakali mubukkale bukatazyide, Laurel Nisbet wakamubelekela Leza cabusungu

[Zifwanikiso izili apeeji 16]

Mbubwenya mbuli Tabita, Banakristo bamazubaano balizibidwe akaambo kamilimo yabo yaluyando

[Cifwanikiso icili apeeji 17]

Baalu Banakristo balabikkila maano kapati kubasyominyina