Mibuzyo Yabasikubala

‘Nkulyookezya’ kuli buti ikwaambwa ku Ba-Hebrayo 4:9-11 alimwi mbuti muntu mbwanga ‘wanjila mukulyookezya ooko’?

Kubanakristo bana Hebrayo bamumwaanda wamyaka wakusaanguna, imwaapostolo Paulo wakalemba kuti: “Kucizida bantu ba-Leza kulyo[o]kezya kwa-Sabata. Nkaambo woonse uutambulwa mukulyo[o]kezya kwakwe, walyo[o]kezya kumilimo yakwe, mbubonya mbwaakalyo[o]kezya Leza kumilimo yakwe. Nkaambo kaako, atusungwaale kunjila mukulyo[o]kezya oko.”—Ba-Hebrayo 4:9-11.

Ciindi Paulo naakaamba kulyookezya kwa Leza kumilimo Yakwe, kulibonya kuti aawa wakali kwaamba caambidwe kubbuku lya Matalikilo 2:2, ooko nkotubala kuti: “Nkabela mubuzuba bwamusanu aabili Leza wakaleka milimo yakwe njaakacitide. Mubuzuba obo bwamusanu aabili wakalyo[o]kezya kuzwa kumilimo yakwe yoonse njaakacita.” Nkaambo nzi Jehova “mubuzuba obo bwamusanu aabili wakalyo[o]kezya”? Camasimpe, eeci tacaambi kuti wakali kuyanda kuti ajane nguzu pe naa kuti zyakamana ciindi naakali kubeleka “milimo yakwe yoonse njaakacita.” Kapango kaccilila kalapa bwiinguzi: “Leza wakakondezya buzuba bwamusanu aabili akubusalazya, nkaambo mulimbubo wakalyo[o]kezya kuzwa kumilimo yakwe yoonse Leza njaakalenga akucita.”—Matalikilo 2:3; Isaya 40:26, 28.

Ibuzuba “bwamusanu aabili” bwakaliindenyi amazuba aamwi aali cisambomwi akaambo kakuti bwakali mbobuzuba Leza mbwaakaleleka akubusalazya, nkokuti ibuzuba bubikkidwe ambali naa bwaabidwe kucita cintu naa makanze aalubazu. Ino akali makanze amusyobo nzi? Ikaindi, Leza wakaayubununa makanzaakwe kujatikizya bantu alimwi anyika kwiigama. Kumuntu mutaanzi alimwi amukaintu wakwe, Leza wakati: “Amuzyalisye, muvule, muzuzye nyika akwiibombya. Amweendelezye inswi zyamulwizi abayuni bakujulu abanyama boonse baputauka ansi.” (Matalikilo 1:28) Nokuba kuti Leza wakalengede bantu bakali londokede alimwi anyika yakali aantalisyo mbotu, nicakatola ciindi cili mbocibede ikuti nyika yoonse ibombe akwiicinculula kuba paradaiso iizwide mukwasyi uulondokede kweelanaa mbuli Leza mbwaakakanzide. Eelyo mubuzuba “bwamusanu aabili” Leza wakalyookezya kumilimo yakwe yakulenga ikutegwa eezyo zyaakalengede zitalike kubeleka kweelanaa luyando lwakwe. Kumamanino aa “buzuba” oobo zyoonse Leza nzyaakakanzide zyakali kukonzya kuba zyancobeni. Ino kulyookezya ooko kwakali kukonzya kutola ciindi cilamfwu buti?

Ikujokela kukaambo ka Paulo kubana Hebrayo, tubona mbuli mbwaakaamba eelyo naakati “kucizida bantu ba-Leza kulyo[o]kezya kwa-Sabata” alimwi wakabaambila Banakristonyina kuti atusungwaale “kunjila mukulyo[o]kezya oko.” Eeci citondezya kwaamba kuti, iciindi Paulo naakalemba majwi aayo aajatikizya “buzuba bwamusanu aabili” kulyookezya kwa Leza kwakacili kuzumanana kwalo kwakatalika myaka iili 4,000 musyule. Takukamani pe kusikila makanze aa Leza akazuzikizyigwe kujatikizya bantu alimwi anyika, caakumana Cuulu Camyaka ca Bulelo bwa Jesu Kristo walo uli “ngumwami wa-Sabata.”—Matayo 12:8; Ciyubunuzyo 20:1-6; 21:1-4.

Akaambo kabulangizi oobu butaliboteli, Paulo wakapandulula mbuli muntu mbwakonzya kutalika kulyookezya kwa Leza. Wakalemba kuti: “Woonse uutambulwa mukulyo[o]kezya kwakwe, walyo[o]kezya kumilimo yakwe, mbubonya mbwaakalyo[o]kezya Leza kumilimo yakwe.” Eeci citwaambila kuti, nokuba kuti muntu wakatalikaa buumi bulondokede, taaku muntu naba omwe wakanjila kale mukulyookezya kwa Leza. Eeci cakali boobu akaambo kuti Adamu a Eva tiibaakubikkila maano kwaciindi cilamfwu kulyookezya kwa Leza kwabuzuba oobo “bwamusanu aabili” kwiinda mukuzumina mububambe bwakwe mbwaakababambilide. Muciindi caboobo, bakazanga akuyanda lwaanguluko kuli Leza. Muciindi cakumvwida malailile aa Leza, balo bakavwanaa Saatani mumakanzaakwe woonse. (Matalikilo 2:15-17) Akaambo kaceeci, bakabula coolwe cakupona kukabe kutamani muparadaiso anyika. Kuzwa ciindi eeco, bantu boonse bakanjila mubuzike bwacibi alimwi alufwu.—Ba-Roma 5:12, 14.

Kuzanga kwabantu tiikwakali kukonzya kusinkila makanze aa Leza. Buzuba bwakwe bwakulyookezya bucizumanana. Nokuba boobo, Jehova wakacita bubambe bwaluyando—icinunuzyo—ikwiinda mu Mwanaakwe Jesu Kristo kutegwa aabo boonse bazumina kwiinda mulusyomo, bakakonzye kululangila lwaanguluko lwacibi alimwi alufwu. (Ba-Roma 6:23) Nkakaambo kaako, Paulo ncaakabaambila Banakristonyina kuti ‘balyookezye kumilimo yabo.’ Bakeelede kubuzumina bubambe bwa Leza bwalufwutuko ikutali kulibambila mbobaya kupona kumbele mbuli  mbwaakacita Adamu a Eva. Alimwi bakeelede kuzileka eezyo nzila zyabo zitaluzi zyakusola kubambulula zintu.

Ikutazibikkila maano zintu zitako nkoye ikutegwa muntu acite luyando lwa Leza, mmasimpe cilalemununa. Jesu wakabatamba kati: “Amuboole kulindime, nyoonse nomukatede nomulemedwe, ndime eenti mulemunune. Amulivoleke joko lyangu, mundiiye. Amubone mebo ndili bombede alimwi ndimutete moyo, nkaako muyoojana kulyookezya kwa mumoyo. Nkaambo joko lyangu lilamweelela awalo mukuli wangu ulamuubaubila.”—Mateyo 11:28-30, Ci.

Mubandi wa Paulo wakulyookezya kwa Leza alimwi amuntu mbwanga wacita oobo, mmasimpe aaya akali makani aakulwaizya ku Banakristo bana Hebrayo baku Jerusalemu ibakaliyumya kumapenzi alimwi akukusekwa akaambo kakasimpe. (Incito 8:1, 12:1-5) Mbubweena buyo, majwi aa Paulo alakonzya kuba majwi ayumya-yumya ku Banakristo mazubaano. Mbotuzyi kale kuti kuzuzizyigwa kwacisyomezyo ca Leza kujatikizya kuleta paradaiso anyika kwiinda mu Bwami bwabululami—bwalondelela, eelyo andiswe tweelede kupumuna kumilimo yesu akuti tusungwaale kukunjila mukulyookezya ooko.—Matayo 6:10, 33; 2 Petro 3:13.

[Zifwanikiso izili apeeji 31]

Cisyomezyo ca Leza canyika yaparadaiso ciyoocitika kumamanino aabuzuba bwakwe bwakulyookezya