Sena Lusyomo Lwini-Lwini Lucikonzyeka Kujana?

MARTIN LUTHER MUMWAKA WA 1522 WAKAAMBA KUTI: “Lusyomo caamba kusinizya kwini-kwini alimwi ikutazungaani muluzyalo lwa Leza, musyomi kasinizide kapati cakuti ulakonzya kubikka buumi bwakwe muntenda akaambo kandulo ziindi zili cuulu.”

KWEELANAA KWAAMBA KWA LUDOVIC KENNEDY MU 1999, “Muzintu zili zyoonse twaba kale muciinga mwalo lusyomo lwa Bunakristo alimwi aziyanza moziyaabumana kapati.”

MIZEEZO kujatikizya lusyomo ilakonzya kucinca munzila igambya. Ikaindi, lusyomo muli Leza lwakalidumide. Imazubaano akaambo kakuba munyika eeyi yakudooneka alimwi yamapenzi, ilusyomo lwini-lwini muli Leza alimwi amu Bbaibbele luyaabumana cakufwambaana.

Lusyomo Lwini-Lwini

“Ilusyomo” kubantu banji caamba buyo kusyoma munjiisyo yabukombi naa kutobela bukombi bumwi. Nokuba boobo, kweelanaa mbolibelesyedwe bbala eeli mu Bbaibbele, “lusyomo” caamba kusyoma kuzwide—cakumaninina, cakutazungaana muli Leza alimwi amuzisyomezyo zyakwe. Oobu mbube bumuzibya kuti ngusikwiiya wa Jesu Kristo.

Iciindi cimwi, Jesu Kristo wakaamba kujatikizya mbokuyandika kupaila alimwi ‘akutalengaana.’ Kwiinda mukucita boobo, wakabuzya naa lusyomo lwini-lwini lwakali kukonzya kuyoojanika ncobeni muciindi cesu. Wakabuzya kuti: “Mwana a-Muntu aakuboola, sena uzoojana lusyomo [oolu] ansi?” Nkaambo nzi ncaakabuzya mubuzyo uuli boobo?—Luka 18:1, 8.

Lusyomo Lusweekede

Zinji zintu zilakonzya kupa bantu kuti basweekelwe lusyomo kufwumbwa ndobakonzya kubaandulo. Eezi zintu zibikkilizya kutyompwa alimwi amasunko aabuumi bwabuzubaa buzuba. Mucikonzyanyo, Professor Michael Goulder wakali mupaizi mudolopo lya Manchester ku England aciindi lyakacitika ntenda yandeke yakajaya basibbola banji ba Manchester United mu 1958 mudolopo lya Munich. Mupulogilamu yaacipekupeku ku BBC, sikwaambilizya Joan Bakewell wakapandulula kuti, Goulder “wakeetezegwa naakabona bantu banji kabatyopedwe.” Cimwi cazintu zyakatobela ncakuti, “wakabula lusyomo muli Leza walo ngwaakali kuyeeyela kuti nguujatikizidwe muzintu zicitikila  bantu.” Goulder wakaamba kuti, “Ibbaibbele talili bbuku . . . lyajwi liluzi kuzwa kuli Leza,” pele muciindi caboobo “ndijwi lyakubeja lizwa kumuntu, ambweni lyakasololelwa muzibeela-beela.”

Zimwi ziindi lusyomo inga lwaile kumana buyo. Eeco ncicakacitika kumulembi alimwi asikumwaya makani Ludovic Kennedy. Waamba kuti, ikuzwa kacili mwana “kudooneka [kujatikizya Leza] kwakali kucitika muziindi aziindi alimwi kutasyoma [kwakwe] kwakakomena.” Kulibonya kuti kunyina wakali kukonzya kumupa bwiinguzi bukkazika moyo kujatikizya mibuzyo yakwe. Lufwu lwabawisi mulwizi cakali cintu cipati cakacitikaa ciindi citayeeyelwi icakamukatazya kapati cakuti lusyomo lwakwe lwamanina limwi. Mipailo yakali kupegwa kuli Leza kuti “atukwabilile kuntenda zyamulwizi alimwi akuli basinkondoma” tiiyakayingulwa, mbwaanga bwaato mobakabede bawisi bwakanyonyoonwaa maato aankondo aabana Germany lya Nkondo Yanyika Yabili.—Ikweelanaa kwaamba kwabbuku lyakuti All in the Mind—A Farewell to God.

Izintu zili boobo zilidumide kapati. Imwaapostolo Paulo waamba kuti, “teensi boonse abali alusyomo pe.” (2 Ba-Tesalonika 3:2) Ino mbuti mbomuyeeya? Sena lusyomo lwini-lwini muli Leza alimwi amu Jwi lyakwe lucikonzyeka kujana munyika mwalo muyaabuvwula kudooneka? Amulange-lange ncocaamba cibalo citobela kujatikizya makani aaya.