Amubambe Moyo Wanu
Amubambe Moyo Wanu
“Bamba moyo wako cakucenjela loko, nkaambo mulinguwo mobuzwa buumi.”—TUSIMPI 4:23.
1, 2. Ino nkaambo nzi ncotuyandika kubamba moyo wesu?
IMUDAALA umwi kunsumbu ya Caribbean wakazwa muŋanda yakwe niyakamana kuwa mvwula yaguwo, izuma alimwi akulaba kapati. Naakali kulanga mbuli kunyonyoona nkoyakacita mvwula, wakabona kuti musamu mupati wakaimvwi kumbele kwamulyango walubaya kwamakumi aamyaka aalimbwaabede wakawa. Wakagambwa kapati akwaamba kuti: ‘Ino inga caba buti obu, kayi zisamu ziniini-iini zili mubusena oobu tiizyawa?’ Naakalanga cisiko camusamu wakawa, wakabujana bwiinguzi. Imusamu ooyu wakali kulibonya kuti tuukonzyi kuzungaanizyigwa, wakalibolede muuli mukati, eelyo guwo eeli lyakakuyubununa ikubola ooko kwatakali kulibonya anze.
2 Ncintu cuusisya kapati ikuti mukombi wakasimpe uboneka kuti uliimvwi cakutazungaana mubuumi bwa Bunakristo wazundwa mulusyomo lwakwe naasunkwa. Ibbaibbele cakululama lyaamba kuti, “Miyeeyo yamoyo wamuntu mibi lyoonse kuzwa kubwanike bwakwe.” (Matalikilo 8:21) Eeci cipandulula kuti, ikuti naa tiitwacenjela, noyiba myoyo mibotu ilakonzya kucengwa akuzumina kucita cintu cibi. Mbwaanga moyo wamuntu oonse uutalondokede ulakonzya kweenwa, tweelede kukubikkila maano kulaya ooku kwakuti: “Bamba moyo wako cakucenjela loko.” (Tusimpi 4:23) Aboobo, ino mbuti mbotukonzya kubamba moyo wesu wacikozyanyo?
Kuulingula Lyoonse Ncintu Ciyandika Kapati
3, 4. (a) Ino mmibuzyo nzi iikonzya kubuzyigwa kujatikizya moyo wini kuugama? (b) Ino ncinzi ciyootugwasya kulingula moyo wesu wacikozyanyo?
3 Ikuti mwaunka kumusilisi kuti mukapimwe, musilisi ulalangilwa kuti uyoopima moyo wanu. Sena mubili wanu woonse kubikkilizyaa moyo, utondezya kuti ulajana busani buyandika? Ino bulowa bulunduka kapati buti mumubili? Sena kuduntaana kwamoyo wanu kulikkalikene alimwi akubaa nguzu? Sena mucita zisobano ziyumya-yumya mubili? Sena moyo wanu ulafwambaana kutyompwa?
4 Ikuti moyo wini kuuyandika kupima lyoonse, ino mbuti kujatikizya moyo wacikozyanyo? Jehova ulaulingula. (1 Makani 29:17) Andiswe tweelede kucita mbubwenya. Munzila nzi? Nkwiinda mukubuzya mibuzyo mbuli yeeyi: Sena moyo wangu ulajana cakulya cakumuuya ceelede kwiinda mukubaa ciiyo cangu ndemwini alimwi akujanika kumiswaangano? (Intembauzyo 1:1, 2; Ba-Hebrayo 10:24, 25) Sena mulumbe wa Jehova nkouli kumoyo kauli mbuli “mulilo uuyakisya uujalilidwe mukati kazifuwa zyangu,” akundipa kutola lubazu mumulimo wakukambauka Bwami amukugwasya bamwi kuba basikwiiya? (Jeremiya 20:9; Matayo 28:19, 20; Ba-Roma 1:15, 16) Sena ndilakulwaizyigwa kutola lubazu muzibeela zimwi zyamumulimo waciindi coonse ciindi nondikonzya kucita boobo? (Luka 13:24) Ino nkuubukkale buli buti nkondigamika moyo wangu wacikozyanyo? Sena ndiyanzanaa bantu bajisi myoyo iiyandisya kubukombi bwakasimpe? (Tusimpi 13:20; 1 Ba-Korinto 15:33) Atufwambaane kubweza ntaamo kutegwa tululamike zintu.
5. Ino kusunkwa kwalusyomo inga kubeleka mulimo nzi mubotu?
5 Kanjikanji lusyomo lwesu lulasunkwa. Eezi zitupa ciindi cakubona mbuli moyo wesu mbuubede. Musa wakabaambila boobu bana Israyeli ibakali amunyinza wa Nyika Yakasyomezyegwa: “Jehova Leza wanu [wa]kamweenzya, myaka eyi iili makumi one, munkanda, kuti amubombye, amusunke, azibe makani aali mumyoyo yanu, na inga mulakonzya kubamba malailile aakwe na pe.” (Deuteronomo 8:2) Sena kanjikanji tatugambwi mbotulimvwa ciindi notulombozya naa kucita ciindi notusikilwa masunko ngotutayeeyeli? Imasukusyo Jehova ngazumizya kuti atucitikile, masimpe alakonzya kutupa kubona mpotutaciti kabotu, akutupa ciindi cakuti tubelekele mpawo. (Jakobo 1:2-4) Aboobo, tutaleki kaka kupailila kuziba mbuli mbotweelede kwaayendelezya masukusyo!
Ino Majwi Eesu Ayubununa Nzi?
6. Ino makani ngotuyandisya kubandika ayubununa nzi kujatikizya moyo wesu?
6 Ino mbuti mbotukonzya kuzyiba nzyotuyobwede mumoyo wesu? Jesu wakaamba kuti: “[I]muntu mubotu ulagwisya zintu zibotu muciyobwedo cibotu camoyo wakwe, awalo muntu mubi muciyobwedo cibi, ugwisya zintu zibi, nkaambo mulomo wakwe uamba oko ukuzywide kumoyo.” (Luka 6:45) Zintu nzyotwaambaula ncitondezyo cazintu nzyoukanzide kucita moyo wesu. Sena kanjikanji twaambaula buyo kujatikizya lubono lwakumubili alimwi akuzwidilila muzintu zimwi zyakumubili? Ambweni mibandi yesu lyoonse iiyeeme buyo azintu zyakumuuya alimwi ambaakani zyateokrasi? Muciindi cakwiide kwaamba kujatikizya mbuli bamwi mbobalubizya, sena tulilibambide kuumuna buyo? (Tusimpi 10:11, 12) Sena tubandika kapati kujatikizya bantu bambi azintu zibacitikila mubuumi bwabo akubandika buyo asyoonto kujatikizya makani akumuuya alimwi amakani aakulilemeka? Sena eeco cilakonzya kuba citondezyo cakuti tulaciindilizya kapati kuyandisya kuziba makani aageme bantu bamwi?—1 Petro 4:15.
7. Ino nciiyo nzi ncotukonzya kwiiya kujatikizya kubamba moyo wesu kuzwa kubanabokwabo Josefa ibali kkumi baambwa mucibalo?
7 Amulange-lange cakacitika mumukwasyi umwi mupati. Ibana basankwa ba Jakobo bali kkumi “kabataamb[i] caluumuno” kumusyoonto wabo Josefa. Nkaambo nzi? Bakabaa munyono nkaambo wakali kalungu kaamoyo kuli bausyi. Mukuya kwaciindi, Josefa naakalongezyegwa kwiinda muziloto kuzwa kuli Leza, ikutondezya kuti wakali kuyandwa kapati a Jehova, “bakaindilila kumusula.” (Matalikilo 37:4, 5, 11) Mulunya lwabo, bakamusambala munyina mubuzike. Kumane, mukusola kusisa cibi ncobakacita, bakeena bausyi kuti bayeeye kuti Josefa wakalumwaa munyama. Ibanabokwabo Josefa boonse ibali kkumi bakaalilwa kubamba myoyo yabo aciindi eeco. Ikuti katufwambaana kutongooka bamwi, sena eeco tacitondezyi kunyomenena naa kunyonokela mumoyo wesu? Tweelede kucenjela akulingula zizwa kumulomo wesu alimwi akugwisya miyeeyo iitayandiki yoonse.
8. Ino ncinzi cikonzya kutugwasya kulingula moyo ikuti twaamba zyakubeja?
8 Nokuba kuti “takonzya kubeja Leza,” bantu batalondokede balakonzya kuba babeji. (Ba-Hebrayo 6:18) Sintembauzyo wakeema kuti: “Bantu boonse buyo mbabeji.” (Intembauzyo 116:11) Awalo mwaapostolo Petro wakaamba makani aakubeja kwaziindi zyotatwe kuti tamuzyi Jesu. (Matayo 26:69-75) Aawa cilasalala kwaamba kuti tweelede kucenjela kutegwa tucileke kubeja, nkaambo Jehova ulalusulaika “lulimi lwakubeja.” (Tusimpi 6:16-19) Ikuti katwaamba kaambo kakubeja, ncamaanu kulanga-langa capa kuti tucite boobo. Sena nkaambo kakuti tulamuyoowa muntu ooyo? Sena nkuyoowa cisubulo? Ambweni nkuyoowa kusampuka akaambo kampuwo yanu mbotu naa nkaambo kakuliyanda ncolaboolela penzi eelo? Kufwumbwa naa ncinzi caleta penzi, kulayandika kuti tukalange-lange kaambo, cakulibombya tukuzumine kulezya kwesu alimwi akulomba kulekelelwaa Jehova akuyandaula lugwasyo kuti tuzunde kukompama ooko! “Baalu bambungano” mbabakonzya kuba bantu beelede kupa lugwasyo oolo.—Jakobo 5:14.
9. Ino ncinzi mipailo ncoiyubununa kujatikizya moyo wesu?
9 Jehova naakali kwiingula Mwami uucili mwana Solomoni nakali kulomba kubaa busongo alimwi aluzibo, wakaamba kuti: “Makani aya mbwaakali mumoyo wako, alimwi tona kukumbila buvubi na imbono na bulemu . . . ndakupa ncobeni busongo amaanu. Alimwi ndakupa buvubi ambono abulemu.” (2 Makani 1:11, 12) Kuzwa kuzintu Solomoni nzyaakalomba anzyaatakalomba, Jehova wakalizi zintu Solomoni nzyaakali kuyandisya. Ino mipailo iyubununa nzi kuli Leza kujatikizya moyo wesu? Sena mipailo yesu itondezya kuti tulijisi nyota yakubaa luzibo, busongo alimwi abupampu? (Tusimpi 2:1-6; Matayo 5:3) Sena zintu zya Bwami nkozili mumoyo wesu? (Matayo 6:9, 10) Ikuti mipailo yesu yaba yakwiide kwiinzya buyo mulawo, eeci cilakonzya kutondezya kuti tuyandika kujana ciindi cakuzinzibala kuyeeya kumilimo ya Jehova. (Intembauzyo 103:2) Banakristo boonse beelede kupakamana kubelesya bupampu akubona mbuli mipailo yabo ncoiyubununa.
Ino Micito Yesu Itondezya Nzi?
10, 11. (a) Ino bumambi alimwi abwaamu zitalikila kuli? (b) Ino ncinzi ciyootugwasya kutacita ‘bumambi mumoyo’?
10 Kwaambwa kuti imicito ilaanguzu kwiinda majwi. Imasimpe ngakuti micito ilatupandulula kapati mbuli mbotubede mukati. Mucikozyanyo, kumakani aakulilemeka, kubamba moyo tacaambi buyo kwiide kweeleba kucita bwaamu naa bumambi pe. Mu Mulumbe wakwe waa Mulundu, Jesu wakaamba kuti: “Umwi aumwi uulangilila mwanakazi cakumusukama ulimucitide kale bumambi mumoyo wakwe.” (Matayo 5:28) Ino mbuti mbotukonzya kweeleba kucita bumambi nomuba mumoyo wesu?
11 Sinsiku umwi usyomeka wazina lya Jobu wakatondezya cikozyanyo cibotu ku Banakristo bakwetene. Kakunyina kudooneka, Jobu wakali kubeendelezya bamakaintu bacili bana alimwi nokuba kubagwasya bayanda kugwasyigwa. Pele muzeezo wakulombozya kucita bumambi tiiwakalijisi busena kumwaalumi ooyu uusyomeka. Nkaambo nzi? Nkaambo wakalikanzide kutalangisya mwanakazi cakumunyomenena buya. Wakaamba kuti: “Ndakacita kale cizuminano ameso aangu, ino kayi mbubuti mbwenga ndamekela musimbi?” (Jobo 31:1, BT) Eelyo andiswe atubambe cizuminano ameso eesu alimwi akubamba moyo wesu.
12. Ino mbuti mbomunga mwalibelesya bbuku lya Luka 16:10 kutegwa mukwabilile moyo wanu?
12 Mwanaa Leza wakaamba kuti: “Uusyomekede kuciniini ulisyomekede akucipati, uutaluleme kuciniini taluleme akucipati.” (Luka 16:10) Inzya, tweelede kulingula micito yesu mumakani abonekaanga masyoonto buyo acitika mubuumi bwabuzubaa buzuba, kubikkilizya ayeeyo njotucita cakusisikizya mumaanda eesu. (Intembauzyo 101:2) Ciindi notukkede muŋanda yesu katulangilila cipekupeku naa zisobano zyaa Internet zyalo zitondezyegwa mumuncini wakkompyuta, sena tulabikkila maano kululayo lwamu Magwalo lwakuti: “Pele bwaamu amisyobo yoonse yabusofwaazi akulikumbuzya, zintu ezi tazyeelede nikuba kwaambwa akati kanu, nkaambo mbuboobo mbubeelede basalali. Azyalo zisapi akwaamba bufubafuba akucapa, zyoonse tazili zibotu pe.” (Ba-Efeso 5:3, 4) Ino mbuti kujatikizya nkondo zijanika acipekupeku naa muzisobano zyamumavidiyo? Sintembauzyo wakaamba kuti: “Jehova ulalingula baluleme abasizibi. Moyo wakwe ulisulide [bazangi].”—Intembauzyo 11:5.
13. Ino nkucenjezya kuli buti kuyandika ciindi notuyeeya kujatikizya zintu zizwa mumoyo wesu?
13 Jeremiya wakacenjezya kuti: “Moyo wamuntu uleena kwiinda zintu zyoonse, ulijisi bulwazi bukaka kupona.” (Jeremiya 17:9) Ooku kweena kwamoyo kulakonzya kulitondezya ciindi notwaamba cipa kuti katulubizya, notuubya-ubya kukompama kwesu, mukusola kubotya-botya micito yesu mibi kapati naa notuliyungizyila kwaamba zintu nzyotukonzya kucita. Moyo mubi alimwi ulakonzya kuba muziimo zyobilo—milomo myuuba-uba yaamba cintu cimwi, pele micito itondezya cimbi. (Intembauzyo 12:2; Tusimpi 23:7) Elo kaka cilayandika kapati kusyomeka ciindi notulingula izizwa mumoyo!
Sena Liso Lyesu Lili Kabotu?
14, 15. (a) Ino liso ‘libotu’ ncinzi? (b) Ino kubaa liso libotu inga catugwasya buti kubamba moyo?
14 Jesu wakaamba kuti: “Ilampi lyamubili ndiliso.” Wakayungizya kuti: “Nkaambo kaako liso lyako kuti kalili sibuuya, mubili wako woonse ulazula mumuni.” (Matayo 6:22) Ilisyo lili kabotu lilanga buyo abusena bomwe naa makanze kalitanyonganyizigwi pe kumbaakani eeyo. Ee, liso lyesu lyeelede kulanga buyo akuyandaula “Bwami bwa-Leza abululami bwakwe.” (Matayo 6:33) Ino ncinzi cinga cacitika kumoyo wesu wacikozyanyo ikuti liso lyesu kalitali kabotu?
15 Amulange-lange makani aamba zyabuumi. Ikujanina mukwasyi zintu zyiyandika ncintu cibotu kapati ku Munakristo. (1 Timoteo 5:8) Pele ino mbuti kuti mwatalika kulombozya zintu zipya, izyakulya zyinona kapati, pele zidula, zyakusama, ŋanda alimwi azintu zimbi buyo? Sena masimpe kuti eeco tacikonzyi kupenzya moyo akutupa kuti tutalike kukomba katujisi myoyo yobilo? (Intembauzyo 119:113; Ba-Roma 16:18) Nkaambo nzi ncotweelede kubikkila maano cakumaniina mukulanganya zintu zyakumubili cakunga buumi bwesu bwatalika kuyandisya buyo zintu ziyanda mukwasyi, makwebo alimwi alubono lwakumubili? Amuyeeye kujatikizya lulayo lwakasololelwa amuuya wa Leza lwakuti: “Amukalilangisye, kuti ambweni myoyo yanu ilalengaala nkaambo kabulyatu, abukolwi, amakataazyo aabuumi buno, abuzuba obuya nobuyoomutilimuna mbuli kooze. Nkaambo buyoobasikila boonse abakala ansi.”—Luka 21:34, 35.
16. Ino ndulayo nzi Jesu ndwaakapa kujatikizya liso, alimwi nkaambo nzi?
16 Liso nenzila iyandika kapati kukutola makani mumizeezo alimwi amumoyo. Liso ncolibona cilakonzya kwiiyunga kapati mizeezo, mbotulimvwa alimwi amicito yesu. Kabelesya mwaambo wacikozyanyo, Jesu wakakozyanyisya nguzu zyamusunko uboola kuzwa kukubona akwaamba kuti: “Nkabela kuti liso lyako lyalulyo lyakulebya, uligwisye, ulisowe, nkaambo kulakubotela kuti ufwidwe cipanzi comwe kwiinda kusowelwa mu-Gehena mubili wako woonse.” (Matayo 5:29) Liso lyeelede kukasyigwa kulangisya kapati acintu cibi. Mucikozyanyo, talyeelede kulanzigwa zintu zibambilidwe kubusya mizeezo mibyaabi alimwi azyakulombozya zibyaabi.
17. Ino mbuti kubelesya lugwalo lwa Bakolose 3:5 mbokutugwasya kubamba moyo?
17 Pele kubona taali ngamaano alikke abelesyegwa kuleta makani kuzwa anze amubili pe. Maano amwi mbuli kwaampa, kumvwa aalo alijisi mulimo wangawo alimwi tweelede kubweza ntaamo ziyandika akuzibeela zimwi zyamubili zyeendelana anzizyo. Imwaapostolo Paulo wakalaya kuti: “Amujaye zyoonse zyabuntunsi zili mulindinywe, mbuli bwaamu, busofwaazi, zisusi, kunyomenena, abusyacivulemwangu. Kuyandisisya ooku kulikozyenye akukomba baleza bapange.”—Bakolose 3:5, Ci.
18. Ino nintaamo nzi nzyotweelede kubweza kujatikizya mizeezo mibyaabi?
18 Ikulombozya kuteelede kulakonzya kutalikila mumizeezo yesu mwini buya. Ikuzumanana kuyeeyela mizeezo iili boobo kulakonzya kukomezya kulombozya zintu zibyaabi. “Eno zisusi zyamita buyo, zilazyala zibi.” (Jakobo 1:14, 15) Ibanji balazumina kuti eeyi njenzila kanjikanji iipa kutalika kulisobanya kubusankwa naa kubukaintu. Elo cilayandika kaka kuzumanana kuyeeya zintu zyakumuuya! (Ba-Filipi 4:8) Alimwi ikuti naa muzeezo mubyaabi watalika, tweelede kusoleka kuugwisya.
‘Amumanine Jehova Milimo Camoyo Woonse’
19, 20. Ino mbuti mbotukonzya kuzwidilila mukubelekela Jehova amoyo woonse?
19 Kacembeede kale, Mwami Davida wakaambila mwanaakwe musankwa kuti: “Solomoni mwanaangu, koziba Leza wauso, akumumanina milimo camoyo woonse acamiyeeyo iizuminisya, nkaambo Jehova ulalingula myoyo yoonse, ulazibisya makanze oonse amiyeeyo yoonse.” (1 Makani 28:9) Solomoni lwakwe wakapailila “moyo wakumvwa.” (1 Bami 3:9) Nokuba boobo, wakajana buyumuyumu bwakuzumanana kubaa moyo uuli boobo mubuumi bwakwe boonse.
20 Kutegwa tuzwidilile mumakani aaya, tatweelede buyo kubaa moyo uuzuminwaa Jehova, pele alimwi tweelede kuubamba. Kutegwa tucicite eeci, tweelede kuzumanana kuyeeya ziibalusyo zya Jwi lya Leza lyoonse mumoyo wesu—“mukati kamoyo.” (Tusimpi 4:20-22) Alimwi tweelede kwiiya kulingula moyo, katulanga-langa cakupaila mbuli majwi eesu alimwi amicito ncoziyubununa. Ikulanga-langa kuli boobo inga kwabaa bulemu kulikke kuti twayandaula Jehova camoyo woonse kutegwa atugwasye kululamika kulezya kuli koonse nkotukonzya kubona? Elo kaka cilayandika kucenjela kujatikizya zintu nzyotubikka mumaano eesu! Mukucita boobu, tusyomezyegwa kuti “luumuno lwa-Leza lwiinda miyeeyo yoonse yabantu luyooyaminina myoyo yanu amiyeeyo yanu muli-Kristo Jesu.” (Ba-Filipi 4:6, 7) Ee, atukanze kubamba moyo wesu kwiinda zintu zimwi ziyandika kubamba akubelekela Jehova camoyo woonse.
Sena Mulayeeya?
• Ino nkaambo nzi ncociyandika kubamba moyo?
• Ino kulanga-langa zintu nzyotwaamba inga kwatugwasya buti kubamba moyo wesu?
• Nkaambo nzi ncotweelede kubaa liso ‘libotu’?
[Mibuzyo yaciiyo]
[Zifwanikiso izili apeeji 18]
Ino nzintu nzi nzyotwaamba mumulimo wamumuunda, kumiswaangano alimwi akuŋanda?
[Zifwanikiso izili apeeji 20]
Iliso libotu talinyonganyizyigwi pe