Amube Amoyo Uuzuminwaa Jehova

“Undipe moyo uusalala, O Leza; ulengulule muuya uululeme mukati kangu.”—INTEMBAUZYO 51:10.

1, 2. Nkaambo nzi ncotweelede kubikkila maanu kumoyo wesu?

WAKALI mulamfwu alimwi uuno uujisi ciwa cibotu. Musinsimi Samuele naakamubona, wakabotelwa kapati akuyeeya kuti ooyo mwana mutaanzi wa Jese ngonguwe Leza ngwaakalisalide kuti abe mwami Saulo aakuleka bwami. Pele Jehova wakaamba kuti: “Utalangi ciwa cakwe [mwana ulya] nibuba bulamf[w]u bwac[i]imo cakwe, nkaambo ndamukaka. . . . Muntu ulabona busyu buyo, pele Jehova ulabona moyo.” Jehova wakasala mwanaa Jese muniini wazina lya Davida—‘muntu uuzuminwaa moyo wakwe.’—1 Samuele 13:14; 16:7.

² Leza ulakonzya kubona moyo wamuntu, mbubwenya mbuli mbwaakazyikusalazya kuti: “Mebo nde-Jehova ndilalingula moyo, ndilasunka-sunka insa, kuti mbweedezye muntu bulumbu bweelede inzila zyakwe, bweelede micelo yamilimo yakwe.” (Jeremiya 17:10) Masimpe, “Jehova ulasunka myoyo.” (Tusimpi 17:3) Pele ino ncinzi citegwa moyo wamuntu Jehova ncasunka? Alimwi ncinzi ncotukonzya kucita kutegwa tube amoyo uuzuminwa anguwe?

“Buntu Bwamaseseke Buli Mumoyo”

3, 4. Mmuunzila nzi ibbala lyakuti “moyo” mbolibelesyegwa mu Bbaibbele? Amupe zikozyanyo.

³ Ibbala lyakuti “moyo” lilajanika ziindi zitandila kucuulu mu Magwalo Aasalala. Kanjikanji libelesyegwa munzila yacikozyanyo. Mucikozyanyo, Jehova wakaambila musinsimi Musa kuti: “Ambila bana ba-Israyeli kuti bandiletele mulumbo. Amutambule mulumbo kubantu boonse bazumina mumyoyo yabo.” Eelyo aabo ibakali kupa mulumbo ‘bakaboola umwi aumwi naa moyo wakwe wakamubusya.’ (Kulonga 25:2; 35:21) Cilasalala kuti cibeela cimwi camoyo wacikozyanyo mbusungu—inguzu zili mukati kamuntu zimusungilizya kuti acite cintu. Imoyo wesu wacikozyanyo ulatondezya mbotulimvwa, nzyotulombozya alimwi anzyotuyanda. Moyo ulakonzya kuzula bukali naa kuyoowa, kuusa kapati naa kukkomana kapati. (Intembauzyo 27:3; 39:3; Johane 16:22; Ba-Roma 9:2) Moyo ulakonzya kulisumpula naa kulibombya, kuyanda naa kusulaika.—Tusimpi 16:5; Matayo 11:29; 1 Petro 1:22.

 ⁴ Cakweendelanya, “moyo” kanjikanji ujatikizya busungu alimwi amuntu mbwalimvwa, kakuli “miyeeyo” kwiigama ijatikizya mizeezo alimwi akumvwisya. Oobu mbobupanduluzi bwamabala aaya ciindi naajanika mucibalo comwe mu Magwalo. (Matayo 22:37; Ba-Filipi 4:7) Pele moyo alimwi amiyeeyo taziindene kapati pe. Mucikozyanyo, Musa wakakulwaizya bana Israyeli kuti: ‘Amubikke makani mumyoyo [naa mumiyeeyo] yanu, muzibe kuti Jehova ngu Leza wakasimpe.’ (Deuteronomo 4:39) Mboobu Jesu mbwaakabaambila balembi ibakali kumubendelela: “Ino nkaambonzi mulayeeya bubi mumyoyo yanu?” (Matayo 9:4) “Kumvwisya zintu,” kubaa “luzibo” alimwi ‘akulibuzya-buzya mumoyo’ kulakonzya kujatikizigwa notwaamba moyo. (1 Bami 3:12, BT; Tusimpi 15:14; Maako 2:6, Ci) Aboobo, imoyo wacikozyanyo alimwi ulakonzya kujatikizya miyeeyo akumvwisya kwesu.

5. Ino moyo wacikozyanyo wiiminina nzi?

⁵ Kweelanaa bupanduluzi bumwi, moyo wacikozyanyo wiiminina “musemo wazyoonse, mukati mwini, eelyo moyo wacikozyanyo caamba muntu mwali mukati mbuli mbwatondezya milimo yakwe iindene-indene, muzintu zyalombozya, mbwalimvwa, zimukatazya, makanze, miyeeyo yakwe, nzyayeeyela, busongo, luzibo, zyakonzya kucita, nzyasyoma anzyalibuzya-buzya mumoyo, nzyaibaluka alimwi azili mucamba.” Moyo wiiminina mbotubede ncobeni mukati, “buntu bwamaseseke buli mumoyo.” (1 Petro 3:4, NW) Jehova ncencico ncalingula. Aboobo, Davida wakapaila kuti: “Undipe moyo uusalala, O Leza; ulengulule muuya uululeme mukati kangu.” (Intembauzyo 51:10) Ino mbuti mbotukonzya kubaa moyo uusalade?

“Amubike Myoyo Yanu” ku Jwi lya Leza

6. Ino nkukulwaizya kuli buti Musa nkwaakacita kubana Israyeli nobakali yakide zivwuka mu Cibanda ca Moabu?

⁶ Ciindi naakali kulaya bana Israyeli ibakabungene mu Cibanda ca Moabu kabatananjila mu Nyika Yakasyomezyegwa, Musa wakaamba kuti: “Amubike myoyo yanu kumajwi oonse ngendamucenjezya buzuba obuno, kuti mukalailile bana banu mbubonya, kuti bacenjele kubamba majwi oonse aayooyu Mulao.” (Deuteronomo 32:46) Bana Israyeli bakeelede kwaabikka majwi aaya mumyoyo yabo. Bakali kukonzya kwaayiisya bana babo ikuti balo lwabo baazyiba kabotu malailile aa Leza.—Deuteronomo 6:6-8.

7. Ino ncinzi cijatikizyidwe ‘mukubikka moyo wesu’ ku Jwi lya Leza?

⁷ Icintu ciyandika kapati kutegwa tube amoyo uusalala nkujana luzibo lwini-lwini lwakuyanda kwa Leza alimwi amakanze aakwe. Iluzibo luli boobo luzwa buyo kuntu komwe, ku Jwi lya Leza lyakasololelwaa muuya. (2 Timoteo 3:16, 17) Nokuba boobo, ikubaa mizeezo buyo takukatugwasyi kubaa moyo uukomanisya Jehova pe. Ikutegwa tube aluzibo, tweelede ‘kuzibikka mumoyo’ nzyotwiiya. (Deuteronomo 32:46) Ino eeci cicitwa buti? Sintembauzyo Davida wakapandulula kuti: “Ndayeeya mazuba aakale, ndaibaluka milimo yako yoonse, ndatweluka nzyaakacita maanza aako.”—Intembauzyo 143:5.

8. Ino mmibuzyo nzi njotweelede kuyeeyesya ciindi notucita ciiyo?

⁸ Andiswe tweelede kuzinzibala kuyeeya akulumba milimo ya Jehova. Ciindi notubala Bbaibbele naa mabbuku aamba zya Bbaibbele, tweelede kuyeeyesya mibuzyo mbuli yeeyi: ‘Ino eeci cindiyiisya nzi kujatikizya Jehova? Ino mbube nzi bwa Jehova mbundajana mumakani aaya? Ino cibalo eeci cindiyiisya nzi kujatikizya zintu Jehova nzyayanda alimwi anzyatayandi? Ncinzi cikonzya kutobela akaambo kakutobela nzila Jehova njayanda twaikozyanyisyaa kutobela yeeyo njatayandi? Ino makani aaya aswaangene buti ayaayo ngondizi kale?’

9. Ino ciiyo cesu tobeni alimwi akuzinzibala kuyeeya ziyandika buti?

⁹ Lisa * uujisi myaka yakuzyalwa iili 32 ulapandulula mbuli mbwaakatalika kukkomanina ciiyo cilaampindu alimwi akuzinzibala kuyeeya naakati: “Nindakamana kubbapatizyigwa mu 1994, ndakali muyumu kapati mukasimpe kwamyaka iitandila kuli yobilo. Ndakali kujanika kumiswaangano yoonse ya Bunakristo, mumulimo wamumuunda ndakali kubeleka mawoola  aali 30 kusikila ku 40 amwezi alimwi ndakali kuyanzanaa Banakristoma. Kumane ndakatolwaala. Ndakacilekela limwi buya cakunga mane ndakasotoka mulawo wa Leza. Pele ndakazi kuliyeeya, eelyo ndakatalika alimwi akutobela ncolyaamba Bbaibbele. Ndilikkomenyi kaka ikuziba kuti Jehova wakakubona kweempwa kwangu akunditambula nindakapiluka kulinguwe! Kanjikanji ndilalibuzya kuti: ‘Ino ncinzi cakandipede kuti ndizwe munzila ya Leza?’ Ibwiinguzi mbondijana lyoonse mbwakuti nkaambo tiindakali kubikkila maano kuciiyo cilaampindu kapati alimwi akuzinzibala kuyeeya. Kasimpe ka Bbaibbele tiikakaininga njila mumoyo wangu. Kuzwa sunu, ciiyo cangu alimwi akuzinzibala kuyeeya lyoonse ziyooba zintu zipati mubuumi bwangu.” Iluzibo lwesu kuli Jehova, Mwanaakwe alimwi amu Jwi lyakwe mboluyaabuvwula, elo cilayandika kaka kubikka ciindi ambali cakwaalanga-langa makani aaya!

10. Nkaambo nzi ncokuyandika kufwambaana kujana ciindi caciiyo cesu tobeni alimwi acakuzinzibala kuyeeya?

¹⁰ Munyika ino bantu mobajisi bubi, ikujana ciindi caciiyo alimwi akuzinzibala kuyeeya, masimpe ncintu ciyumu. Nokuba boobo, Banakristo sunu baimvwi amunyinza eeni buya aa Nyika mbotu kapati Yakasyomezyegwa—inyika ya Leza mpya iiluleme. (2 Petro 3:13) Zintu ziyootalika mbuli kunyonyoonwa kwa “BABULONI MUPATI,” ikulwana bantu ba Jehova kwa “Gogo wakunyika ya-Magogo” ziide kweeleela mbuli bwamomuya. (Ciyubunuzyo 17:1, 2, 5, 15-17; Ezekieli 38:1-4, 14-16; 39:2) Izili kumbele zilakonzya kubikka luyando lwesu kuli Jehova mumusunko. Kuyandika kufwambaana lino kujatisya ciindi cesu alimwi akubikka moyo wesu ku Jwi lya Leza!—Ba-Efeso 5:15, 16.

‘Amubambe Moyo Wanu Nomuvwuntauzya Ijwi lya Leza’

11. Ino muunzila nzi moyo wesu mboukozyanyisyigwa kubulongo?

¹¹ Moyo wacikozyanyo ulakonzya kukozyanyisyigwa kubulongo bukonzya kusyangwa mbuto yakasimpe. (Matayo 13:18-23) Ibulongo bwini bulabambwa kutegwa cisyango cikakonzye kutunda. Mbubwenya buyo, moyo wesu weelede kubambwa kutegwa ukonzye kutambula Jwi lya Leza. Imupaizi Ezara “wakapangika moyo wakwe kukuyandaula mulao wa-Jehova, akuucita.” (Ezara 7:10) Ino mbuti mbotukonzya kubamba moyo wesu?

12. Ino ncinzi cikonzya kugwasya kubamba moyo nomuyanda kucita ciiyo?

¹² Ikuubamba kabotu moyo ciindi notuyandaula mu Jwi lya Leza kulacitwa kwiinda mumupailo uucitwa amoyo oonse. Miswaangano ya Bunakristo yabakombi bakasimpe ilatalikwa akujalwaa mupailo. Elo kaka cilayandika ikutalika cibeela cili coonse caciiyo cesu tobeni ca Bbaibbele amupailo wakusinizya alimwi akuzumanana kulyaaba kweelanaa mupailo wesu notuli mukwiiya!

13. Ikutegwa tube amoyo uuzuminwaa Jehova, ino ncinzi ncotweelede kucita?

¹³ Imoyo wacikozyanyo weelede kubamba kutegwa mubikke ambali nzyomwali kuyeeya. Basololi babukombi mumazubaa Jesu tiibakalisungude kucicita ceeci pe. (Matayo 13:15) Kubbazu limwi, Mariya banyina Jesu bakeezyeezya “mumoyo” kabaimvwi mukasimpe kuzintu nzyibakamvwa. (Luka 2:19, 51) Bakaba basikwiiya ba Jesu basyomeka. Lidiya waku Tiyatira wakaswiilila kuli Paulo, aboobo “[Jehova] wakajula moyo wakwe kuti aswiililisye.” Awalo wakaba musyomi. (Incito 16:14, 15) Tutakakatili kumizeezo yesu naa mizeezo yanjiisyo zikkomaninwa kapati abantu. Muciindi caboobo, “Leza abe musyomesi, nikuba kuti bantu boonse mbabeji.”—Ba-Roma 3:4.

14. Ino mbuti mbotukonzya kubamba moyo kutegwa tuswiilile kumiswaangano ya Bunakristo?

¹⁴ Ikubamba moyo kuti umvwisye kumiswaangano ya Bunakristo cilayandika kapati. Izintu zinyonganya zilakonzya kutupa kutabikkila maanu kumakani aali mukwaambwa. Imajwi aali mukwaambwa inga taatunjili ikuti mizeezo yesu kiili kuzintu zyacitika mubuzuba oobo antela kubikkila maano kuzintu nzyotuyanda kuyoocita juunza. Tweelede kuti katukanzide kuswiilila alimwi akwiiya ikuti katuyanda kuti tugwasyigwe azintu zili mukwaambwa. Elo kaka inga twagwasyigwa kapati ikuti katukanzide kumvwisya  ciindi magwalo naali mukubalwa alimwi abupanduluzi nobuli mukucitwa!—Nehemiya 8:5-8, 12.

15. Ino mbuti kulibombya mbokutugwasya kuba bantu bakonzya kuyiisyigwa?

¹⁵ Mbubwenya mbuli kubikka mbolezi kubulongo bwini mbokukonzya kububotezya, akwalo kulibombya, ikubaa nzala yakumuuya, lusyomo, kuyoowa Leza alimwi akuyanda Leza, kulakonzya kupa busani bubotu kumoyo wesu wacikozyanyo. Kulibombya kulapa kubaa moyo mubombe, kulatugwasya kuba bantu bakonzya kuyiisyigwa. Jehova wakaamba boobu ku Mwami waku Juda, Josiya: “Moyo wako wakabomba, alimwi wakalifwiinsya kubusyu bwa-Jehova nowakamvwa makani ngendakaamba . . . akulila kubusyu bwangu. Nkaambo kako ambebo ndaswiilila.” (2 Bami 22:19) Moyo wa Josiya wakali mubombe alimwi wakali kukonzya kuswiilila. Ikulibombya kwakapa basikwiiya ba Jesu, ‘ibantu buyo abatakaiya’ ikumvwisya alimwi akubikka kasimpe kakumuuya kakaalila baalumi “basongo abaabo abaziba” ikukamvwa. (Incito 4:13; Luka 10:21) Aboobo, “[a]tulibombye kubusyu bwa-Leza wesu” mbotuyaabusoleka kubaa moyo uuzuminwaa Jehova.—Ezara 8:21.

16. Ino nkaambo nzi ncokuyandika kusolekesya ikubaa nzala yacakulya cakumuuya?

¹⁶ Jesu wakati: “Bali acoolwe babikkila maano kuzintu zyakumuuya.” (Matayo 5:3, NW) Nokuba kuti twakapegwa zintu zinji munzila yakumuuya, kuyungwa kuzwa kunyika eeyi mbyaabi naa mbazu zili mbuli butolo zilakonzya kutolaansi mukubikkila maano kwesu kuzintu nzyotuyanda zyakumuuya. (Matayo 4:4) Tweelede kubaa cilengwa cakunyomenena cilyo cakumuuya. Nokuba kuti kumatalikilo inga kubala Bbaibbele alimwi aciiyo cesu tobeni inga tatuzikkomanini, ikuti naa twazumanana tulakonzya kujana kuti luzibo ‘lulatubotezya,’ cakunga inga twatalika kuciyandisya ciindi ncotucita ciiyo.—Tusimpi 2:10, 11.

17. (a) Nkaambo nzi Jehova nceelela kusyomwa andiswe cakumaniina? (b) Ino mbuti mbotukonzya kuyandaula lusyomo muli Leza?

¹⁷ Mwami Solomoni wakakulwaizya kuti: “Syoma Jehova amoyo wako woonse; utalifunkizyi kumaanu aako omwini.” (Tusimpi 3:5) Imoyo uujisi lusyomo muli Jehova ulizyi kuti kufwumbwa Ncayanda naa ncalailila kwiinda mu Jwi lyakwe lyoonse cililuzi. (Isaya 48:17) Masimpe, Jehova uleelela kusyomwa andiswe cakumaniina. Ulakonzya kucita zyoonse nzyaakakanza. (Isaya 40:26, 29) Anu nkakaambo kaako izina lyakwe kuligama ncolipandulula kuti “Uupa Kuti Kube,” iciyungizya lusyomo lwesu munguzu zyakwe zyakuzuzikizya zintu nzyaakasyomezya! “Uliluleme munzila zyakwe zyoonse.” (Intembauzyo 145:17) Pele kutegwa tubaa lusyomo mulinguwe, tweelede ‘kulabila kuti tubone ikuti Jehova mubotu’ kwiinda mukuzibelesya mubuumi bwesu eezyo nzyotwiiya mu Bbaibbele alimwi akulutondezya lugwasyo olo ndotujana.—Intembauzyo 34:8.

18. Ino mbuti kuyoowa Leza mbokutugwasya kuzumina busolozi bwa Leza?

¹⁸ Naakali kuyungizya bube ibukonzya kubamba moyo wesu kuti uswiilile lulayo lwa Leza, Solomoni wakaamba kuti: “Syoma Jehova akuleka bubi.” (Tusimpi 3:7) Jehova wakaamba boobu kubana Israyeli bansiku: “Necili cibotu nebalijisi moyo uuli boobu lyoonse, moyo wakundiyoowa awakubamba milazyo yangu yoonse, kuti kube kabotu kulimbabo akubana babo lyoonse.” (Deuteronomo 5:29) Masimpe, aabo bayoowa Leza balamumvwida. Jehova ulijisi nguzu ‘zyakugwasya baabo baluleme mumoyo kumeso aakwe’ akusubula baabo batamumvwidi. (2 Makani 16:9) Kuyoowa kutamukkomanisya Leza akaambo kakumulemeka kweelede kweendelezya micito yesu, mizeezo alimwi ambotulimvwa.

‘Yanda Jehova Amoyo Wako Woonse’

19. Ino luyando lujisi mulimo nzi mukubamba moyo wesu kuti uzumine busolozi bwa Jehova?

¹⁹ Kwiinda bube boonse, luyando masimpe lulapa moyo wesu kuzumina busolozi bwa Jehova. Imoyo uuyanda Leza ulakonzya kupa kuti muntu alisungule kwiiya zintu Leza nzyakkomanina alimwi anzyatakkomanini. (1 Johane 5:3) Jesu wakaamba kuti: “Yanda Leza Jehova wako amoyo wako woonse, amoya wako woonse, amumiyeeyo yako yoonse.”  (Matayo 22:37) Aboobo atukomezye luyando kuli Leza kwiinda mukuyeeya kujatikizya bubotu bwakwe lyoonse, mukwaambaula lyoonse kulinguwe kali mbuli mulongwe wesu alimwi akwiinda mukulisungula kwaambila bantu bambi kujatikizya nguwe.

20. Ino mbuti mbotukonzya kubaa moyo uukonzya kuzuminwaa Jehova?

²⁰ Ikwiinduluka buyo kwaamba tulati: Ikubaa moyo uukonza kuzuminwaa Jehova kulabikkilizya kuzumizya Jwi lya Leza kweendelezya mbuli mbotubede mukati kesu, ibuntu bwamaseseke buli mumoyo. Ikwiiya Magwalo nobeni alimwi akuzinzibala kuyeeya cakulumba kulaampindu ziyandika kapati. Mulakonzya kucita oobu ikuti moyo wanu kaubambidwe kabotu—moyo uunyina mizeezo iimbi, pele uuzwide bube ibukonzya kupa kuti tube bantu bakonzya kuyiisyigwa! Ee, tulakonzya kubaa moyo uukonzya kuzuminwaa Leza kwiinda mulugwasyo lwa Jehova. Nokuba boobo, ino nintaamo nzi nzyotweelede kubweza kutegwa tuukwabilile moyo wesu?

Bupanduluzi buyungizidwe

Ino Inga Mwaingula Buti?

• Ino moyo wacikozyanyo Jehova ngwalingula ncinzi?

• Ino mbuti mbotukonzya ‘kubikka moyo wesu’ ku Jwi lya Leza?

• Ino mbuti mbotukonzya kubamba moyo wesu notuyanda kulanga-langa Jwi lya Leza?

• Nomwamana kulanga-langa makani aaya, ino ncinzi ncomwamvwa kuti ncomukulwaizigwa kucita?

[Mibuzyo yaciiyo]

[Cifwanikiso icili apeeji 12]

Davida cakulumba wakazinzibala kuyeeya kujatikizya zintu zyakumuuya. Sena mulacita oobo?

[Zifwanikiso izili apeeji 16]

Amuubambe moyo wanu kamutanatalika kwiiya Jwi lya Leza