Nguni Uukonzya Kutwaandaanya Kuluyando Lwa Leza?
Nguni Uukonzya Kutwaandaanya Kuluyando Lwa Leza?
“Swebo tulamuyanda nkaambo nguwakasaanguna kuyanda ndiswe.”—1 JOHANE 4:19.
1, 2. (a) Ino nkaambo nzi ikuziba kuti tulayandwa ncociyandika kapati? (b) Ino nduyando lwani ndotuyandisya?
INO ncintu cipati buti kulindinywe ikuziba kuti mulayandwa? Ikuzwa kubwana kusikila kubupati, ibantu balazwidilila akaambo kaluyando. Sena mwakabona kale mwana muvwanda mbwafwukatilwa caluyando mumaanzaa banyina? Ikanjikanji, kufwumbwa naa ncinzi citola busena aciindi eeco, imwana mbwaalangila buyo busyu bwabanyina bukkomane, ulalikwaya akukkalikila mumaanzaa banyina bamuyanda. Antela, sena mulayeeya mbuli mbomwakabede myaka eeyo yakubwana iikatazya kapati? (1 Ba-Tesalonika 2:7) Ziindi zimwi, mulakonzya kuti tiimwakalizyi ncomwakali kuyanda antela mbuli mbomwakalikumvwa, pele elo cilayandika kapati kaka ikuziba kuti bauso alimwi abanyoko bakali kumuyanda! Sena tiicakali kugwasya ikuziba kuti mwakali kukonzya kubaambila mapenzi aanu akubabuzya mibuzyo? Ncobeni, mubuumi boonse cimwi cazintu ziyandika kapati nkuyandwa. Iluyando luli boobo lusinizya kuti andiswe tuli bantu.
2 Iluyando lwabazyali luzumanana, lulagwasya kapati mukukomena kabotu alimwi amukuzilanga kabotu zintu. Pele ikusyoma kuti Taateesu wakujulu Jehova ulatuyanda, kulayandika kapati kutegwa tululame munzila yakumuuya alimwi amumizeezo. Ibabali bamagazini eeyi balakonzya kuti tiibakajisi bazyali ibakali kubalanganya kabotu. Ikuti naa oobu mbocibede akulindinywe, kamukkazika buyo moyo. Nokuba kuti bazyali tiibakajisi luyando antela tiilwakazulide, iluyando lwa Leza lulacita oobo.
3. Ino mbuti Jehova mbwaakasyomezya luyando lwakwe kubantu?
3 Kwiinda mumusinsimi wakwe Isaya, Jehova wakatondezya kuti mwanakazi ulakonzya ‘kuluba’ mwanaakwe uucinyonka, pele walo takonzyi kuluba bantu bakwe pe. (Isaya 49:15) Mbubwenya buyo, calusyomo Davida wakaamba kuti: “Taata ab[a]ama nebandisi[y]a, Jehova ulandibamba.” (Intembauzyo 27:10) Elo kaka cilaumbulizya! Kufwumbwa naa muli mubukkale buli buti, ikuti kamulyaabide kuli Jehova Leza, lyoonse mweelede kuyeeya kuti luyando ndwajisi kulindinywe lulaindaa luyando muntu woonse ndwakonzya kutondezya!
Amuzumanane Aluyando lwa Leza
4. Ino mbuti luyando lwa Leza mbolwakasyomezyegwa ku Banakristo bamumwaanda wamyaka wakusaanguna?
4 Ino ndilili nomwakaluziba luyando lwa Jehova? Kulibonya kuti zintu zyakamucitikila zilikozyenyi aasyoonto azyakacitikila Banakristo bamumwaanda wamyaka wakusaanguna. Mucaandaano 5 calugwalo lwa Paulo ndwaakalembela bana Roma, cilapandulula kabotu-kabotu mbuli basizibi ibakazandukide kuli Leza, mbobakaluziba luyando lwa Jehova. Mukapango 5 tubala kuti: “Luyandisyo lwa-Leza lulapaya mumyoyo yesu kuzwa ku-Muuya Uusalala ngutwapegwa.” Mukapango 8, Paulo wakayungizya kuti: “Leza, walo ulatondezya luyandisyo lwakwe kulindiswe boobo, nkaambo nitwakacili basizibi Kristo wakatufwida.”
5. Ino mbuti mbomwakamvwisya akulumba luyando lwa Leza?
5 Munzila iikozyenyi, ciindi kasimpe kazwa mu Jwi lya Leza nokakaletwa kulindinywe, mwakatalika kusyoma, imuuya uusalala wa Jehova wakatalika kubeleka mumoyo wanu. Kwiinda munzila eeyi mwakatalika kumvwisya alimwi akulumba bupati bwacintu Jehova ncaakamucitila icakutuma Mwanaakwe uuyandwa kuti azoomufwide. Aboobo, Jehova wakamugwasya kuti muzibe kabotu-kabotu mbuli mbwayandisya bantu. Ciindi nomwakayeeya kujatikizya makani aaya, nokuba kuti mwakazyalwa kamuli basizibi ibazandukide kulinguwe, Jehova wapa nzila kubantu yakuti bakonzye kwaambwa kuti baliluleme kabajisi bulangizi bwabuumi butamani. Sena eeco tiicakamuyasa mumoyo? Sena tiimwakalubona luyando lwa Jehova?—Ba-Roma 5:10.
6. Nkaambo nzi ziindi zimwi ncotukonzya kulimvwa kuti kubaanga tulitantamukide kuli Jehova?
6 Akaambo kakuti mwakakwelelezyegwaa luyando lwa Wisi wanu wakujulu akucinca buumi bwanu kutegwa amutambule, mwakabwaaba buumi bwanu kuli Leza. Lino muli muluumuno Leza. Pele sena kuli ziindi zimwi nomulimvwa kuti kubaanga mwatantamuka kapati kuli Jehova? Eeci cilakonzya kucitika kulindiswe toonse. Pele kamuyeeya lyoonse kuti Leza tacinci pe. Luyando lwakwe nkoluli lyoonse mbubwenya mbuli zuba mbolitaleki kubala kutegwa kukasaale anyika. (Malaki 3:6; Jakobo 1:17) Kubbazu limwi tulakonzya kucinca—nokuba kuti nkwaciindi buyo cisyoonto. Mbubwenya mbuli nyika mboizunguluka, cisela cimwi canyika cilaba mumudima. Mbubwenya buyo, ikuti twatantamuka kuli Leza asyoonto buyo, tulakonzya kulimvwa kuti cilongwe cesu anguwe ciyaabuyaansi. Ino ncinzi ncotukonzya kucita kutegwa tululamike bukkale buli boobo?
7. Ino mbuti kulilingula mbokukonzya kutugwasya kuzumanana muluyando lwa Leza?
7 Ikuti twaziba kuti luyando lwa Leza taluciko kulindiswe, tweelede kulibuzya kuti: ‘Sena ndili mukuubya-bya luyando lwa Leza? Sena ndili mukutantamuka aniini-niini kuzwa kuli Leza uupona alimwi siluyando, ikutondezya munzila ziindene-indene kuti lusyomo luyacimana? Sena ndili mukubikkila maano ‘kumakani aanyama’ muciindi cakubikkila maano ‘kumakani aakumuuya’?’ (Ba-Roma 8:5-8; Ba-Hebrayo 3:12) Ikuti naa twakatantamuka kuzwa kuli Jehova, tulakonzya kubweza ntaamo kutegwa tululamike zintu, tukamantane mubulongwe bwesu anguwe. Jakobo utukulwaizya kuti: “Amuswenenene kuli-Leza, elyo alakwe ulamuswenenena.” (Jakobo 4:8) Amutobele majwi aa Jakobo aakuti: “Nomuyandwa, amuliyake mulusyomo lwanu lusalala cakwiinda, akukomba mu-Muuya Uusalala, akuliyobola muluyando lwa-Leza.”—Juda 20, 21.
Ikucinca Kwabukkale Takukonzyi Kunyonganya Luyando lwa Leza
8. Ino nkucinca kuli buti kukonzya kucitika mukaindi kasyoonto buyo mubuumi bwesu?
8 Ibuumi bwesu bulacinca-cinca kapati mubweende oobu bwazintu. Imwami Solomoni wakabona kuti: ‘Tubantu toonse buyo tulasikilwa ziindi zyalufwu azyamapenzi.’ (Mukambausi 9:11) Mukaindi kasyoonto buyo, buumi bwesu bulakonzya kucincilalyo. Buzuba bumwi tulakonzya kupona buyo kabotu, pele buzuba butobela tulakonzya kuciswa cakwiitilanwa buya. Buzuba bumwi mulimo wesu wakumubili ulakonzya kulibonya kuti uli kabotu buyo, pele buzuba butobela tuya kujana kuti tatucibeleki pe. Katutayeeyeli, lufwu lulakonzya kumusikila muntu ngotuyanda. Ibanakristo mucisi cimwi balakonzya kuti kabakkede buyo muluumuno kwaciindi cilimbocibede, pele mukaindi buyo kasyoonto, ikupenzyegwa calunya kulakonzya kutalika. Ambweni tulakonzya kutamikizyigwa, eelyo tulakonzya kucitilwa munzila iitali yabululami. Masimpe, buumi tabusitikide pe naa tabukwabilidwe cakumaniina.—Jakobo 4:13-15.
9. Ino nkaambo nzi ncocikonzya kuba kabotu ikulanga-langa cibeela calugwalo lwa Ba-Roma candaano 8?
9 Ciindi zintu nzyotutayeeyeli nozitucitikila, tulakonzya kulimvwa mbuli kuti twalekelezyegwa, nokuba kutalika kuyeeyela kuti luyando lwa Leza luyaabumana kulindiswe. Mbwaanga toonse tulacitikilwa zintu zili boobu, inga cainda kubota kwaalanga-langa kabotu majwi amwaapostolo Paulo aawumbulizya alembedwe kubbuku lya Ba-Roma caandaano 8. Imajwi aaya akali kwaambilwa Banakristo bananikidwe amuuya. Pele munjiisyo alabeleka akulibaabo bambelele zimwi, balo ibakaambwa kuti mbalulami kabali balongwe ba Leza mbuli bwakali Abrahamu Bunakristo kabutanatalika.—Ba-Roma 4:20-22; Jakobo 2:21-23.
10, 11. (a) Ino milandu nzi basinkondo njobapa bantu ba Leza ziindi zimwi? (b) Ino nkaambo nzi kutamikizyigwa ooku ncokatali kaambo kapati ku Banakristo?
10 Amubale Ba-Roma 8:31-34. Paulo ubuzya kuti: “Anooli Leza kali aswe, ino nguni uukonzya kutulwisya?” Masimpe, Saatani anyika yakwe mbyaabi bali mukutulwisya. Basinkondoma balakonzya kutubejelezya, nomuba munkuta zyamucisi. Ibazyali Banakristo batamikizyigwa ikuti tababayandi bana babo akaambo kakutabazumizya nzila zyabusilisi zityola mulawo wa Leza antela akaambo kakutabazumizya kutola lubazu muzisobano zyabantu batali bana Leza. (Incito 15:28, 29; 2 Ba-Korinto 6:14-16) Banakristo bamwi basyomeka baambwa kuti batyola mulawo akaambo kakukaka kujaya bantunyina munkondo naa akaambo kakukaka kutola lubazu mumapolitikisi. (Johane 17:16) Basikukazya bamwi bamwaya makani aakubeja kwiinda mukubelesya zibelesyo zyakumwaila makani zinji, nokuba kutamikizya Bakamboni ba Jehova buya kuti nkakamu kamaseseke kabyaabi kapati.
11 Pele mutalubi kuti muciindi cabaapostolo, kwakaambwa kuti: “Nkaambo tulizi kuti anooli aankamu eyi, alakazyigwa kumasena oonse.” (Incito 28:22) Sena kutamikizyigwa kulaa makani? Leza nguwaamba Banakristo kuti mbalulami, akaambo kalusyomo ndobajisi mucipaizyo ca Kristo. Mbuti Jehova mbwakonzya kuleka kuyanda bakombi bakwe kakuli wakabapa cipego ciyandisi kapati—Imwanaakwe uyandwa? (1 Johane 4:10) Mbwaanga lino Kristo wakabusyigwa kuzwa kubafwu alimwi wakabikkwa kujanza lyalulyo lya Leza, ulabakombeleda Banakristo. Ino nguni uukonzya kukazya ikukwabilila Kristo nkwacita kuli basikumutobela naa uukonzya kuzwidilila kukazya mbuli Leza mbwabalanga aaba bantu basyomeka? Kunyina pe!—Isaya 50:8, 9; Ba-Hebrayo 4:15, 16.
12, 13. (a) Ino mapenzi nzi naa mbukkale buli buti butakonzyi kutwaandaanya kuluyando lwa Leza? (b) Ino ncinzi Diabolosi ncasola kucita ciindi naleta buyumuyumu kulindiswe? (c) Nkaambo nzi Banakristo ncobazwidilila?
12 Amubale Ba-Roma 8:35-37. Ikutugama lwesu, sena kuli muntu umwi naa cintu cili coonse cikonzya kutwaandaanya kuzwa kuluyando lwa Jehova alimwi a Mwanaakwe Kristo Jesu? Saatani ulakonzya kubelesya bantu bakwe kuleta mapenzi ku Banakristo. Mumwaanda wamyaka wainda, bunji bwabakwesu abacizi Banakristo baba mbabantu baide kupenzyegwa calunya muzisi zinji. Mumasena aamwi sunu, bakwesu balapenga akaambo kabukkale bubyaabi mbobasikilwaa buzuba. Bamwi balakolwa nzala naa ikubula zyakusama. Ino ncinzi Diabolosi ncasola kucita kwiinda mukuleta mapenzi mayumu nta aali boobu? Munzila imwi, makanzaakwe ngakusola kutyompya bukombi bwa Jehova bwakasimpe. Saatani uyanda kuti tusyome kuti luyando lwa Leza lwamana. Nokuba boobo, sena oobu mbocibede?
13 Mbubwenya mbuli Paulo wakazubulula bbuku lya Intembauzyo 44:22, twaliiya Jwi lya Leza lilembedwe. Tulizi kuti nkaambo kazina lya Leza izintu eezyi ncozitucitikila “[to]mbelele” zyakwe. Ikusalazyigwa kwazina lya Leza alimwi akuzibisyigwa kwabweendelezi bwa Jehova bwakoonse-koonse kulijatikizyidwe mukaambo aaka. Akaambo katwaambo tupati tuli mbuli tootu, Leza ncaazumizyila masukusyo ikutali kuti nkaambo kakuti luyando lwakwe kulindiswe lwakamana buya pe. Kufwumbwa bukkale buyume buti, tulisinizyide kuti luyando lwa Leza kubantu kubikkilizyaa kuli umwi aumwi wesu, talucincide pe. Ikuzundwa kuli koonse kukonzya kutucitikila, tulakonzya kuyookuzunda ikuti naa twazumanana kusyomeka. Tulayumizyigwa akukulwaizyigwa akaambo kakusyomezya kwa Leza kuluyando lwakwe luteeli.
14. Ino nkaambo nzi Paulo ncaakasyoma luyando lwa Leza nokuba kuti Banakristo balakonzya kusikilwa buyumuyumu?
14 Amubale Ba-Roma 8:38, 39. Ino ncinzi cakapa kuti Paulo asinizye kuti kunyina cikonzya kwaandaanya Banakristo kuluyando lwa Leza? Kakunyinaa kudooneka, zintu zyakamucitikila kali mumulimo zyakamukulwaizya kusinizya kuti buyumuyumu tabukonzyi kunyonganya luyando Leza ndwajisi kulindiswe. (2 Ba-Korinto 11:23-27; Ba-Filipi 4:13) Alimwi Paulo wakalijisi luzibo kujatikizya makanze aa Jehova aatamani alimwi ambwaakacitila bantu Bakwe kaindi. Sena lufwu kulugama lulakonzya kuzunda luyando lwa Leza kulibaabo bakamubelekela cakusyomeka? Peepe! Ibantu bali boobo kuti bafwa kabasyomeka banoopona mumizeezo ya Leza iilondokede, eelyo uyoobabusya muciindi ceelede.—Luka 20:37, 38; 1 Ba-Korinto 15:22-26.
15, 16. Amwaambe zintu zimwi zitakonzyi kumana luyando lwa Leza kubalanda bakwe basyomeka.
15 Kufwumbwa naa mukubula coolwe twacitikilwa cimwi cintu mubuumi sunu—intenda mpati, ibulwazi bupati naa mapenzi aamubukkale—kunyina cikonzya kumana luyando lwa Leza kubantu bakwe. Ibangelo bajisi nguzu naba mungelo wakazanga buya akuba Saatani takonzyi kumuyunga Jehova kuti aleke kuyanda balanda bakwe balyaabide. (Jobu 2:3) Imfwulumende zilakonzya kukasya, kwaanga alimwi akutabalanganya kabotu balanda ba Leza alimwi akubaamba kuti mbantu ‘batayandiki amobainda moonse.’ (1 Ba-Korinto 4:13) Ikusulaika kuli boobo anyika kulakonzya kusungilizya bantu kuti batubukile, pele eeci tacikonzyi kupa Mweendelezi mupati wakoonse-koonse kuti atulekelezye pe.
16 Mbotuli Banakristo, tatweelede kuyoowa kufwumbwa cintu Paulo ncaakaamba kuti “makani aasunu”—zintu zicitika alimwi abukkale mubweende bwazintu oobu naa muzintu ziciboola kumbele kuti ambweni inga zyaandaanya Leza kubantu bakwe. Nokuba kuti basinguzu baanyika naa myuuya mibi yamujulu yatulwana, luyando lwa Leza lusyomeka lunakutuyumya-yumya. Niziba “zintu zyakujulu niziba zyakunsi” tazikonzyi kusinkila luyando lwa Leza mbubwenya mbuli Paulo mbwaakakankaizya. Masimpe, kunyina cikonzya kusola kututyompya pe naa kutuyunga kapati akutwaandaanya kuluyando lwa Leza; naa cilenge cimwi cikonzya kunyonganya cilongwe ca Mulengi abalanda bakwe basyomeka. Luyando lwa Leza talumani; nkoluli lyoonse.—1 Ba-Korinto 13:8.
Amukkomanine Luzyalo lwa Leza Kukabe Kutamani
17. (a) Nkaambo nzi ikubaa luyando lwa Leza ncocili “[ci]botu kwiinda buumi”? (b) Ino mbuti mbotutondezya kuti tulalukkomanina luzyalo lwa Leza?
17 Ino luyando lwa Leza luyandika buti kulindinywe? Sena mulimvwa mbuli bwakali kulimvwa Davida iwakalemba kuti: “Luzyalo lwako ndubotu kwiinda buumi, aboobo milomo yangu ilakutembaula. Njookutembaula nencili muumi, njootambika maanza aangu muzina lyako”? (Intembauzyo 63:3, 4) Sena mmasimpe kuli cintu buumi oobu bwakunyika eeyi ncobukonzya kupa icibotu kwiinda kukkomanina luyando lwa Leza acilongwe cakwe cibotu? Mucikozyanyo, sena kuyandisya mulimo wakumubili uusumpukide ncibotu kwiinda kuliiba mumizeezo alimwi alukkomano luboola kwiinda mucilongwe cibotu a Leza? (Luka 12:15) Banakristo bamwi bakasikilwa ciindi cakusala kukaka Jehova naa kusala lufwu. Cintu cili boobo cakacitika kuli Bakamboni ba Jehova munkambi zyakupenzyenzya zyaba Nazi mu Nkondo Yanyika Yabili. Kunze lyabasyoonto buyo, ibakwesu Banakristo banji bakasala kuzumanana muluyando lwa Leza kabalisungude kufwa ikuti naa kwayandika. Aabo bazumanana muluyando lwakwe balakonzya kusyoma kuti bayakutambula buumi butamani kumbele kuzwa kuli Leza bwalo nyika mbwiitakonzyi kupa. (Marko 8:34-36) Tabuli buumi butamani buyo pe, pele nzinji zijatikizyidwe.
18. Nkaambo nzi buumi butamani ncobuyandika kapati?
18 Nokuba kuti inga tacikonzyeki kupona kukabe kutamani kakunyina Jehova, amusoleke kuyeeyela mbuli mbocikonzya kuba ikoongola kakunyina Mulengi. Kunyina ncobunga bwagwasya pe, inga kabunyinaa mpindu. Jehova wapa bantu bakwe mulimo mubotu wakuti bacite mumazubaano aakumamanino. Aboobo tulakonzya kusyoma kuti ciindi Jehova, Sikuzuzikizya Makanze Mupati aakupa buumi butamani, bunoojisi zintu zikkomanisya kapati, zintu izitweelede zyakuti twiiye akuzicita. (Mukambausi 3:11) Kufwumbwa twaiya buti muzyuulu-zyuulu zyamyaka zili kumbele, kunyina notuyookonzya kumvwisya cakumaniina “bulondo buteeli mubusongo bwa-Leza amuluzibo lwakwe.”—Ba-Roma 11:33.
Taata Ulamuyanda
19. Ino nkusyomezya kuli buti kwakulayana Jesu Kristo nkwaakaamba kuli basikwiiya bakwe?
19 Mu Nisani 14, 33 C.E., bwakali buzuba bwamamanino imangolezya Jesu kali abasikwiiya bakwe basyomeka ibali 11, wakaamba makani manji aakubayumya-yumya akaambo kazintu zyakali kumbele. Bakamwiiminina Jesu mumapenzi aakwe alimwi umwi aumwi wabo wakalubona luyando ndwaakajisi kulimbabo. (Luka 22:28, 30; Johane 1:16; 13:1) Eelyo Jesu wakabasyomezya kuti: “Taata mwini ulamuyanda.” (Johane 16:27) Elo kaka majwi ayo akabagwasya basikwiiya ikuziba mbuli Wisi wabo wakujulu mbwalimvwa kujatikizya mbabo!
20. Ino ncinzi ncomukanzide kucita, alimwi ino mmuunzi momukonzya kusyoma?
20 Bantu banji bapona lino bamubelekela Jehova cakusyomeka kwamakumi aamyaka aali mbwaabede. Kakunyinaa kudooneka, bweende oobu bwazintu bubyaabi kabutanamana, tuyoosikilwa masukusyo manji kapati. Mutazumizyi masukusyo naa mapenzi aali boobo kumupa kudooneka luyando Leza ndwajisi cakusyomeka kulindinywe. Kunyina ciindaa kukankaizya ooku kwakuti: Jehova ulamuyanda. (Jakobo 5:11) Umwi aumwi wesu aazumanane kucita cibeela cakwe, katobela milawo ya Leza cakusyomeka. (Johane 15:8-10) Atucibelesye ciindi coonse ncotwajana kutembaula zina lyakwe. Tweelede kuyumya makanzeesu aakuzumanana kuswenena kuli Jehova mumupailo alimwi akwiiya Jwi lyakwe. Kufwumbwa cikonzya kutusikila njuunzaajilo, ikuti katucita kusikila mpotugolela ikukkomanisya Jehova, lyoonse tunooli muluumuno katusinizyide muluyando lwakwe lutaalilwi.—2 Petro 3:14.
Ino Inga Mwaingula Buti?
• Ikutegwa tuzilange kabotu zintu munzila yakumuuya alimwi amumizeezo, ino nduyando lwani ndotuyandika kapati?
• Ino nzintu nzi zitakonzyi kupa kuti Jehova aleke kuyanda balanda bakwe?
• Ino nkaambo nzi ikubaa luyando lwa Jehova ncokuli “[ku]botu kwiinda buumi”?
[Mibuzyo yaciiyo]
[Cifwanikiso icili apeeji 8]
Ikuti twalimvwa kuti twaandaana kuzwa kuluyando lwa Leza, tweelede kubelekela kululamika zintu
[Cifwanikiso icili apeeji 9]
Paulo wakalicizyi ncaakali kupenzyelwa