Amubambe Moyo Wanu Kuti Kuuyoowa Jehova

“Necili cibotu nebalijisi moyo uuli boobu lyoonse, moyo wakundiyoowa awakubamba milazyo yangu yoonse.”—DEUTERONOMO 5:29.

1. Mbuti mbotukonzya kuba masimpe kuti bumwi buzuba kuyoowa kuyoomana?

IKUYOOWA kwabakatazya bantu kwamyaanda yamyaka iili mbwiibede. Kuyoowa nzala, malwazi, milandu, naa nkondo kupa kuti bantu banji kabalibilika lyoonse. Akaambo kamakani aaya, imajwi aantalisyo aali mu Universal Declaration of Human Rights (Ikwaambilizya Munyika Yoonse Kujatikizya Zyeelelo Zyamuntu) alatondezya mbuli mbobalombozya kubamba nyika yalo bantu boonse mobanoojisi lwaanguluko kuzwa kukuyoowa. * Cilakkomanisya ikuziba kuti Leza lwakwe utusyomezya kuti nyika eeyo iili boobo iyooboola—nokuba boobo, ikutali kwiinda mukusoleka kwabantu. Kwiinda mumusinsimi wakwe Mika, Jehova utusyomezya kuti munyika yakwe mpya yabululami, ‘taakwe muntu naba muntu omwe uuyooyoosya bantu bakwe.’—Mika 4:4.

2. (a) Mmuunzila nzi Magwalo mbwaatukulwaizya kuyoowa Leza? (b) Ino mibuzyo nzi iibuka ciindi notulanga-langa ceelelo cesu cakuyoowa Leza?

² Kulubazu lumwi, kuyoowa kulakonzya kugwasya. Mu Magwalo, ibantu ba Leza cakwiinduluka-induluka bakulwaizyigwa kumuyoowa Jehova. Musa wakaambila bana Israyeli kuti: “Amuyoowe Jehova Leza wanu, amumumanine milimo.” (Deuteronomo 6:13) Nokwakainda myaanda yamyaka iili mbwiibede, Solomoni wakazoolemba kuti: “Lemeka Leza akubamba milazyo yakwe, nkaambo kucita obo nceelelo coonse camuntu.” (Mukambausi 12:13) Kwiinda mumulimo wesu wakukambauka walo uucitwa kwiinda mukusololelwaa bangelo, andiswe tuli mukukulwaizya bantu ‘kuyoowa Leza akumupa bulemu.’ (Ciyubunuzyo 14:6, 7) Kunze lyakumuyoowa buyo Jehova, Ibanakristo beelede kumuyanda amoyo wabo woonse. (Matayo 22:37, 38) Mbuti mbotukonzya kuyanda Leza kumwi katumuyoowa? Nkaambo nzi ncociyandika kuyoowa Leza siluyando? Ino nimpindu nzi njotujana kwiinda mukuyoowa Leza? Ikutegwa twiingule mibuzyo eeyi, cakusaanguna tweelede kukumvwisya kuyoowa Leza ncocipandulula alimwi ambuli kumuyoowa ooku mbokuli musemu wabulongwe bwesu a Jehova.

Kulemeka Alimwi Akuyoowa

3. Ino kuyoowa Leza cipandulula nzi?

³ Banakristo beelede kulimvwa kuti balamuyoowa Leza Wakabalenga. Ibupanduluzi bumwi bwabbala lyakuti kumuyoowa caamba “kumulemeka ncobeni Mulengi alimwi akubaa bukandu bwakutamukkomanisya.” Aboobo, kuyoowa Leza kuleendelezya mbazu zyobilo: ciimo cesu kuli Leza alimwi akulilemeka kwesu kuzintu nzyatayandi. Mubwini, mbazu zyoonse zyobilo zilayandika kapati alimwi ziyandika kuzilanga kabotu-kabotu. Ibbuku lyakalembwaa Vine litegwa Expository Dictionary of New Testament Words lyaamba kuti, ku Banakristo kuyoowa cakumaniina ooku ‘nkokweendelezya buumi mutwaambo twakumuuya alimwi amukulilemeka.’

4. Ino mbuti mbotukonzya kumulemeka kapati alimwi akumuyoowa Mulengi wesu?

⁴ Ino mbuti mbotukonzya kumulemeka kapati alimwi akumuyoowa Mulengi wesu? Tulamulemeka ciindi notulanga buyale bwanyika bubotu, notulanga mavwuumina ameenda akondelezya naa notulangilila mabbililo azuba.  Ikulimvwa boobu kulakonzya kukomena ciindi notubona ameso aalusyomo kujatikizya milimo ya Leza yakulenga. Kunze lyaboobo, mbubwenya mbuli Mwami Davida, tulabona mbuli mbotuli basyoonto twalyeelanyaa zintu zyaankamika Jehova nzyaakalenga. “Nembona majulu aako, milimo yaminwe yako, mwezi anyenyeezi nzowakalenga! Ino muntu ncinzi nowamwiibaluka?” (Intembauzyo 8:3, 4) Ikulemeka kuli boobu kupa kumuyoowa, kwalo kutupa kuti tumulumbe alimwi akumutembaula Jehova akaambo kazintu zyoonse nzyatucitila. Alimwi Davida wakalemba kuti: “Njookulumba nkaambo kakugambya kwakulengwa kwangu. Milimo yako ilagambya; moyo wangu ulizi loko.”—Intembauzyo 139:14.

5. Ino nkaambo nzi ncotumuyoowela Jehova, alimwi ino ncikozyanyo nzi cibotu ncotujisi kujatikizya kaambo aaka?

⁵ Ikumulemeka alimwi akumuyoowa kapati Leza, kupa kuti tulemeke nguzu zyakwe mbwali Mulengi alimwi akaambo kabweendelezi bwakwe mbwali ngo Muleli weelede wakoonse-koonse. Mucilengano mwaapostolo Johane ncaakabona, “Abo ibakazundide cinyama acikozyano caco”—basikutobela Kristo bananike mubusena bwabo kujulu—bakaamba kuti: “Milimo yako mipati, ilagambya, Mwami Leza Singuzuzyoonse. Ziyanza zyako nzyalusinizyo, zililuleme. Nduwe Mwami waciindi coonse. Nguni uutakuyoowi, Mwami, akulemeka izina lyako?” (Ciyubunuzyo 15:2-4) Ikuyoowa Leza cakumaninina akaambo kabupati bwakwe, kwakapa kuti basikulelanyina Kristo mu Bwami bwakujulu bamupe bulemu Leza kali mweendelezi mupati. Ciindi notulanga-langa zintu Jehova nzyaakacita alimwi ambweendelezya zintu zili koonse-koonse munzila yeelede, sena tacitupi twaambo twakumuyoowela?—Intembauzyo 2:11; Jeremiya 10:7.

6. Ino nkaambo nzi ncotweelede kubaa bukandu bwakutamukkomanisya Jehova?

⁶ Nokuba boobo, kunze lyakumulemeka alimwi akumuyoowa Leza, tweelede kubikkilizyaa kubaa bukandu bwakutamukkomanisya naa kutamuswiilila. Nkaambo nzi? Nkaambo kakuti nokuba kuti Jehova “tafwambi kukalala, uuzwide luse,” tweelede kuyeeya kuti ‘taleki kusubula bateempwi.’ (Kulonga 34:6, 7) Nokuba kuti Jehova ngusiluyando alimwi ulafwida luzyalo,  pele takuyandi kutalulama alimwi akubisya acaali. (Intembauzyo 5:4, 5; Habakuku 1:13) Aabo babisya caali alimwi abaabo bazumanana kucita zibi cakuteempwa mumeso aa Jehova kubikkilizya abaabo bamukazya takabaleki buyo pe kakunyina kubasubula. Imwaapostolo Paulo wakaamba kuti: “Cilayoosya kuwida mumaanza aa-Leza muumi.” Ibukandu bwakuwida mubukkale buli boobo ncikwabililo cesu ncobeni.—Ba-Hebrayo 10:31.

‘Amukakatile Kulinguwe’

7. Ino ntwaambo nzi ntotujisi twakusyomena munguzu zya Jehova nzyabelesya kufwutula?

⁷ Ikutondezya kuyoowa Leza alimwi akumulemeka ncobeni akaambo kanguzu zyakwe zinji, ngamatalikilo aakusyoma muli Jehova. Mbubwenya mbuli mwana mbwalimvwa kuti ulikwabilidwe ciindi bausyi nobali afwaafwi, andiswe tulimvwa kukwabililwa mubusolozi bwa Jehova. Amubone mbuli bana Israyeli mbobakacita Jehova naakazwaa kubagusya mu Egepita: “Elyo ba-Israyeli nebakabona milimo mipati Jehova njaakacitila ba-Egepita, bantu bakayoowa Jehova akusyoma Jehova amulanda wakwe Musa.” (Kulonga 14:31) Icakacitikila Elisha mubwini citondezya kuti, “baangelo ba-Jehova balibazyungulukide bamuyoowa, kuti babavune.” (Intembauzyo 34:7; 2 Bami 6:15-17) Makani aasunu ajatikizya bantu ba Jehova alimwi azibacitikila bantu zisinizya kuti Leza ulapa nguzu zyakwe kulibaabo bamubelekela. (2 Makani 16:9) Eelyo tulabona kuti, “mukuyoowa Jehova muntu ulajana inguzu zisyomeka.”—Tusimpi 14:26.

8. (a) Nkaambo nzi kuyoowa Leza ncokutupa kweenda munzila zyakwe? (b) Amupandulule mbuli mbotukonzya “kukakatila” kuli Jehova.

⁸ Ikuyoowa Leza cakumaniina takutupi buyo kumusyoma pe, pele alimwi kulatukulwaizya kweenda munzila zyakwe. Iciindi Solomoni naakali kwaaba tempele, wakapaila kuli Jehova ategwa: “Kuti [bana Israyeli] bakuyoowe akweenda munzila zyako mazuba oonse nibacipona munyika njowakabapa bamatata besu.” (2 Makani 6:31) Kumatalikilo, Musa wakakulwaizyide bana Israyeli kuti: “Jehova Leza wanu ngomweelede kutobela, ngomweelede kuyoowa; milazyo yakwe muleelede kwiibamba, ijwi lyakwe muleelede kulilemeka; muleelede kumumanina milimo akukakatila kulinguwe.” (Deuteronomo 13:4) Kweelanaa mbuli tupango ootu mbotutondezya caantangalala, ikulombozya kweenda munzila zya Jehova alimwi “akukakatila” kulinguwe kuzwa mulusyomo lwesu kuli Leza. Masimpe, kuyoowa Leza kutupa kuti tumulemeke Jehova, tumubelekele alimwi akukakatila kulinguwe mbubwenya mbuli mwana mbwakonzya kukakatila kuli bausyi balo mbasyoma cakumaniina.—Intembauzyo 63:8; Isaya 41:13.

Kuyanda Leza Nkumuyoowa

9. Ino kuyanda Leza alimwi akumuyoowa ziswaangenyi buti?

⁹ Kweelanaa Magwalo, ikuyoowa Leza kunyina nocipandulula kuti tatweelede kumuyanda pe. Muciindi caboobo, bana Israyeli bakalaililwa ‘kuyoowa Jehova munzila zyakwe zyoonse . . . akumuyandisya.’ (Deuteronomo 10:12) Aboobo, kuyoowa Leza alimwi akumuyandisya kuliswaangenyi kapati. Kuyoowa Leza kutupa kweenda munzila zyakwe alimwi kutupa kusinizya luyando ndotujisi kulinguwe. (1 Johane 5:3) Aaka kaambo kalamvwika nkaambo kuti naa muntu tulamuyanda, tulayoowa kumubisizya. Bana Israyeli bakamubisizya Jehova munkanda akaambo kanzila yabo yabuzangi. Masimpe tatuyandi kucita kufwumbwa cintu cikonzya kupa kuti Taateesu wakujulu ause. (Intembauzyo 78:40, 41) Kulubazu lumwi, mbwaanga “Jehova ulabotelwa kulibaabo bamulemeka,” ikumumvwida kwesu alimwi akusyomeka kupa kuti moyo wakwe ukondwe. (Intembauzyo 147:11; Tusimpi 27:11) Ikuyanda Leza kutupa kuti katumukkomanisya alimwi akumuyoowa Leza kutupa kuti tuleke kumubisizya. Mbube bubelekelaamwi kutali bukazyanya pe.

10. Ino mmuunzila nzi Jesu mbwaakatondezya kuti wakali kukukkomanina kuyoowa Jehova?

¹⁰ Ibuumi Jesu Kristo mbwaakapona bulatondezya cakusalazya mbuli mbotweelede kuyoowa Leza kumwi katumuyanda. Kujatikizya Jesu, Isaya wakalemba kuti: “Uyookalwa Muuya wa-Jehova, Muuya wabusongo awakuswiililisya, Muuya walulayo awanguzu, Muuya waluzibo awakulemeka Jehova. Uyookondwa kulemeka Jehova.” (Isaya 11:2, 3) Kweelanaa businsimi oobu,  muuya wa Leza wakapa kuti Jesu ayoowe Wisi wakujulu. Kunze lyaboobo, tubona kuti kuyoowa kwakwe muciindi cakumuminya buya, kwakali kumukkazika moyo. Jesu wakakondwa kucita kuyanda kwa Leza akumukkomanisya nomuba mubukkale bukatazyide kapati. Iciindi naakali kulindila kupenzyegwa acisamu cakupenzyenzya, wakaambila Jehova kuti: “Kutabi kuyanda kwangu pe, akube kuyanda kwako.” (Matayo 26:39) Akaambo kakuyoowa Leza kuli boobu, Jehova wakaswiilila kukumbila kwamwanaakwe, wakamuyumya alimwi akumunununa kuzwa kulufwu.—Ba-Hebrayo 5:7.

Ikwiiya Kuyoowa Jehova

11, 12. (a) Nkaambo nzi ncotweelede kwiiya kuyoowa Leza? (b) Ino mbuti Jesu mbwatuyiisya kuyoowa Jehova?

¹¹ Kwiindanaa kulemeka nkotucita akaambo kanguzu zyakwe alimwi akubona bupati bwazintu zyacilengwa Leza, kuyoowa Leza takulibooleli buyo kulikke. Nkakaambo kaako Davida Mupati, Jesu Kristo kwiinda mukusinsima ulatutamba ulaamba: “Amuboole, nobana, mundiswiilile, mwiiye kulemeka Jehova mbukubede.” (Intembauzyo 34:11) Ino mbuti mbotukonzya kwiiya kulemeka Jehova kuzwa kuli Jesu?

¹² Jesu ulatuyiisya kuyoowa Jehova kwiinda mukutugwasya kumvwisya bube bubotu bwa Taateesu wakujulu. (Johane 1:18) Icikozyanyo ca Jesu cilayubununa mbuli Leza mbwayeeya alimwi ambwayendelezya bantu bamwi nkaambo Jesu ulatondezya bube bwa Wisi munzila iilondokede. (Johane 14:9, 10) Kunze lyaboobo, kwiinda mucipaizyo ca Jesu, tulajana nzila yakusikila Jehova ciindi notupailila kulekelelwa zibi zyesu. Ikutondezya luzyalo kwa Leza kukugama kulatupa kaambo kaya komoonga kakumuyoowela. Sintembauzyo wakalemba kuti: “Pele kulinduwe kuli lulekelelo, kuti uyoowegwe.”—Intembauzyo 130:4.

13. Ino nintaamo nzi zijanika kubbuku lya Tusimpi zikonzya kutugwasya kuyoowa Jehova?

¹³ Ibbuku lya Tusimpi lilazyaamba intaamo ziyandika kubweza kutegwa tucikonzye kumuyoowa Leza. “Mwanaangu, na watambula majwi aangu, akubamba kabotu malailile aangu, na wacenjeka kutwi kwako kubusongo, akubika moyo wako kukumvwisya makani, na walilila kumvwa, akoongolola kuti ube amaanu, . . . ncobeni uyoomvwa kuyoowa Jehova, akujana luzibo lwa-Leza.” (Tusimpi 2:1-5) Aboobo, ikutegwa tumuyoowe Leza, tweelede kwiiya Jwi lyakwe, ikwaamvwisya kapati malailile alimwi akubikkila maano kapati kululayo lwalyo.

14. Ino mbuti mbotukonzya kutobela lulayo lwakapedwe kubami bana Israyeli?

¹⁴ Mwami umwi aumwi wa Israyeli yansiku wakalilailidwe kulemba bbuku lya Mulawo alimwi ‘akubala majwi aalyo mazuba oonse aabuumi bwakwe, kuti aiye kulemeka Jehova Leza wakwe kukubamba majwi oonse aamulawo.’ (Deuteronomo 17:18, 19) Ikubala Bbaibbele akuliiya kulayandika kapati kulindiswe ikuti katuyanda kuti twiiye kuyoowa Jehova. Mbotuyaabubelesya njiisyo zyamu Bbaibbele mubuumi bwesu, bucebuce tunooyaabujana busongo alimwi aluzibo luzwa kuli Leza. Tuyootalika ‘kuyoowa Jehova’ nkaambo tulabona bubotu bujanika mubuumi bwesu alimwi tulacilemeka cilongwe cesu a Leza. Kunze lyaboobo, kwiinda mukuswaangana lyoonse abasyomima, ibana abapati boonse balakonzya  kuswiilila Leza nzyayiisya, ikwiiya kuyoowa Leza alimwi akweenda munzila zyakwe.—Deuteronomo 31:12.

Ulaacoolwe Kufwumbwa Muntu Uuyoowa Jehova

15. Ino mmuunzila nzi ikuyoowa Leza mbokuswaangenyi akumukomba?

¹⁵ Kuzwa kumakani ngotwabandika atalaawa, tulakonzya kubona kuti kuyoowa Leza nciimo cimwi cibotu toonse ncotweelede kuyandaula mbwaanga ncibeela camusemo wabukombi bwesu kuli Jehova. Citupa kuti katusyoma muli nguwe cakumaninina, kweenda munzila zyakwe alimwi akukakatila kulinguwe. Mbubwenya mbuli mbocakabede akuli Jesu Kristo, ikuyoowa Leza alimwi kulakonzya kutupa kuti tuzuzikizye kukonkezya kwesu kwakulyaaba lino mane kukabe kutamani.

16. Nkaambo nzi Jehova ncatukulwaizya kuti katumuyoowa?

¹⁶ Ikuyoowa Leza takuminyi cakuzwa munzila pe. Ibbaibbele litusyomezya kuti: “Ngusicoolwe uuyoowa Jehova, uuenda muzila zyakwe.” (Intembauzyo 128:1) Jehova utukulwaizya kuti katumuyoowa nkaambo ulizi kuti bube oobu bulatukwabilila. Tulabona mbuli mbwabikkila maano kwiinda mumajwi aakwe kuli Musa aakuti: “Necili cibotu [bana Israyeli] nebalijisi moyo uuli boobu lyoonse, moyo wakundiyoowa awakubamba milazyo yangu yoonse, kuti kube kabotu kulimbabo akubana babo lyoonse.”—Deuteronomo 5:29.

17. (a) Ino ndugwasyo nzi ndotujana kwiinda mukuyoowa Leza? (b) Ino nkuyoowa Leza kuli buti kutiikalangwe-langwe mucibalo citobela?

¹⁷ Mbubwenya buyo, ikuti twabamba moyo wesu kuti kuuyoowa Leza, zintu ziyootweendela kabotu. Munzila nzi? Cakusaanguna, iciimo cili boobu ciyoomukkomanisya Leza alimwi ciyootupa kuti tuswenene kulinguwe. Kwiinda muzintu zyakamucitikila Davida, wakaziba kuti “bamuyoowa, ulabacitila mbobayanda; ulaswiilila cililo cabo akubafutula.” (Intembauzyo 145:19) Icabili, kuyoowa Leza kuyootugwasya nkaambo kuyoocijatikizya ciimo cesu kucintu cikonzya kutunyonyoona. (Tusimpi 3:7) Icibalo citobela ciyoolanga-langa mbuli kuyoowa ooku mbokutukwabilila kuzwa kuntenda zyakumuuya alimwi ciyakwaamba zikozyanyo zimwi zyabantu baambwa mu Magwalo ibakayoowa Leza akuleka kucita zintu zibi.

Bupanduluzi buyungizidwe

Sena Inga Mwaingula Mibuzyo Eeyi Iitobela?

• Ino kuyoowa Leza cipandulula nzi, alimwi mbuti mbokutujatikizya?

• Ino kuyoowa Leza alimwi akweenda a Leza kuswaangenyi buti?

• Ino cikozyanyo ca Jesu citondezya buti kuti kuyoowa Leza kuliswaangenyi akumuyanda?

• Ino mmuunzila nzi mbotukonzya kubamba moyo wesu kuti kuuyoowa Jehova?

[Mibuzyo yaciiyo]

[Cifwanikiso icili apeeji 22]

Bami bana Israyeli bakaambilwa kulemba bbuku lya Mulawo akulibala abuzuba

[Cifwanikiso icili apeeji 23]

Ikuyoowa Jehova kutupa kuti katumusyoma mbubwenya mbuli mwana mbwasyoma bawisi

Nkotwakajana cifwanikiso icili apeeji 20]

Inyenyeezi: Cifoto cakafotolwa ba Malin, © IAC/RGO 1991