Amumuyoowe Jehova Akubamba Milazyo Yakwe
Amumuyoowe Jehova Akubamba Milazyo Yakwe
“Lemeka Leza akubamba milazyo yakwe, nkaambo kucita obo nceelelo coonse camuntu.”—MUKAMBAUSI 12:13.
1, 2. (a) Ino mbuti kuyoowa mbokukonzya kutukwabilila kumubili? (b) Ino nkaambo nzi ibazyali babikkila maano ncobabaambilida bana babo zintu nzyobeelede kuyoowa?
LEONARDO da Vinci wakabona kuti, “Mbubwenya mbuli busicamba mbobukonzya kubikka buumi muntenda, kuyoowa kulabucingilila buumi.” Ikuciindilizya kuba sicamba kulakonzya kupa kuti muntu ataiboni ntenda, kakuli kuyoowa kulakonzya kumupa kuti acenjele. Mucikozyanyo, ikuti naa twaswena munsi ajeleele akubona mbuli mbolili lilamfwu ikuti twawida mumo, ibunji bwesu tulafwambaana kuzwa abusena aawo. Mbubwenya buyo, ikweelanaa mbuli mbotwaiya mucibalo camana, ikuyoowa ncobeni takukulwaizyi buyo kubaa cilongwe cibotu a Leza pe, pele alimwi kulatugwasya kulikwabilila kumapenzi.
2 Nokuba boobo, zintu zinyonyoona zyamazubaano ziyandika kwiiya buya. Mbwaanga bana tabaizyi ntenda iikonzya kuletwaa magesi naa myootokala iitalivwulili iili mudolopo, balakonzya kunjila muntenda mpati. * Ibazyali babikkila maano balasoleka kwaambila bana babo zintu nzyobeelede kuyoowa, ikubacenjezya cakwiinduluka-induluka kujatikizya ntenda zili mubusena mobakkede. Ibazyali balizyi kuti ikuyoowa kuli boobu kulakonzya kubakwabilila bana babo.
3. Ino mmuunzila nzi Jehova mbwatucenjezya kujatikizya ntenda zikonzya kujanika munzila yakumuuya?
3 Mbubwenya oobu awalo Jehova mbwatubikkila maano. Mbwali Taata siluyando, ulatuyiisya kwiinda mu Jwi lyakwe alimwi amumbunga yakwe kutegwa tugwasyigwe. (Isaya 48:17) Cibeela cimwi cakuyiisya kwa Leza ooku cilabikkilizyaa kucenjezya kucitwa “ciindi aciindi” kujatikizya zintu zinyonyoona munzila yakumuuya ikutegwa tukonzye kulikwabilila kuntenda iili boobo. (2 Makani 36:15, BT; 2 Petro 3:1) Kuzwa kaindi, bunji bwamapenzi akali kukonzya kweelebwa ‘bantu nibakalijisi moyo uuli boobu lyoonse, moyo wakuyoowa Leza akubamba milazyo yakwe.’ (Deuteronomo 5:29) Ino mbuti mbotukonzya kubamba moyo wesu kuti kuuyoowa Leza alimwi akutantamuka ntenda munzila yakumuuya ‘mumazuba aaya akataazya’?—2 Timoteo 3:1.
Amuleke Bubi
4. (a) Ino nkusulaika kuli buti Banakristo nkobeelede kuba ankuko? (b) Ino Jehova ulimvwa buti kujatikizya kulilemeka kubyaabi? (Amubone majwi aakunsi.)
4 Ibbaibbele lipandulula kuti “kuyoowa Jehova nkokuti kusula bubi.” (Tusimpi 8:13) Ibbuku lipandulula mabala aali mu Bbaibbele, ikusulaika bubi ooku likupandulula kuti “nciimo camizeezo yamuntu alimwi zintu zitayandiki, zisesemya, zisulaikidwe alimwi azyeezyo muntu nzyatayandililyo kubona.” Aboobo, kuyoowa Leza kulabikkilizyaa kusesemwa zintu zibi mumeso aa Jehova. * (Intembauzyo 97:10) Kulatukulwaizya kutantamuka zintu zibi, mbubwenya mbuli mbotukonzya kutantamuka jeleele ciindi notwayoowa kuwida mumo. Ibbaibbele lyaamba kuti: “Kuyoowa Jehova nkokugwisya muntu mububi.”—Tusimpi 16:6.
5. (a) Ino mbuti mbotukonzya kuzumanana akuyoowa Leza kwesu alimwi akusulaika cintu cibi? (b) Ino makani aajatikizya musyobo wa Israyeli atuyiisya nzi mukaambo aaka?
5 Tulakonzya kutalika kuyoowa kapati alimwi akusulaika cintu cibi kwiinda mukulanga-langa zintu zikonzya kutobela akaambo kakubisya. Ibbaibbele litusyomezya kuti tuyootebula kufwumbwa ncotubyala—kufwumbwa naa tubyala munzila yakunyama naa kumuuya. (Ba-Galatiya 6:7, 8) Akaambo kaceeci, Jehova ulacisalazya kupandulula zintu zikonzya kutobela akaambo kakutatobela milazyo yakwe alimwi akukaka bukombi bwakasimpe. Kautakwabilidwe a Leza, imusyobo wa Israyeli musyoonto wakali kulangilwa kweendelezyegwaa basimukobonyina basilunya alimwi bajisi nguzu kapati. (Deuteronomo 28:15, 45-48) Icakacitikila bana Israyeli cuusisya nsoni akaambo kakutaswiilila kwabo cililembedwe kabotu-kabotu mu Bbaibbele kuti ‘citucenjezye’ kutegwa twiiye ciiyo cakuyandisya kuyoowa Leza.—1 Ba-Korinto 10:11.
6. Ino nzikozyanyo nzi zyamu Magwalo nzyotukonzya kulanga-langa notwiiya kuyoowa Leza? (Amubone majwi aakunsi.)
6 Kunze lyazintu zyakacitikila musyobo wa Israyeli woonse, Ibbaibbele lilijisi makani aakacitika ncobeni ajatikizya bantu bamwi bakajisi munyono, batalilemeki, balyatu abasikulisumpula. * Bamwi akati kabantu aaba bakabelekela Jehova kwamyaka minji kapati, pele aciindi cimwi cikatazya mubuumi, ikuyoowa Leza kwabo tiikwakali kuyumu kapati pe, aboobo bakasikilwa mapenzi ayoosya. Ikuzinzibala kuyeeya zikozyanyo zyamu Magwalo zili boobo kulakonzya kuyumya makanze eesu aakutacita zibi zili boobo. Elo kaka cilausisya ikuti twalindila buya mane limwi twanjila mumapenzi kakunyina kuzumina lulayo lwa Leza mumoyo wesu! Tatweelede kubelesya kaambyo kazyibidwe kapati kakuti haankalibonene kubuzya cilakatazya.—Intembauzyo 19:7.
7. Ino nguni Jehova ngwatamba mutente lyakwe lyacikozyanyo?
7 Akamwi kaambo kapati katondenzya ncotweelede kumuyoowela Leza nkulombozya kubamba cilongwe cesu a Leza. Tulayoowa kumubisizya Jehova nkaambo kakuti tulacibikkila maano cilongwe cesu. Ino nguni Leza ngwakonzya kubona kuba mulongwe wakwe, walo ngwakonzya kutamba mutente lyakwe lyacikozyanyo? Ngooyo alikke “uuenda cakulondoka akucita bululami.” (Intembauzyo 15:1, 2) Ikuti naa tulacibikkila maano coolwe cesu cakubaa cilongwe a Mulengi wesu, tuyookubikkila maano kweenda cabululami mumeso aakwe.
8. Ino mmuunzila nzi bana Israyeli bamwi mumazubaa Malaki mbobakaubya-ubya cilongwe cabo a Leza?
8 Cilausisya kuti bamwi bana Israyeli mumazubaa Malaki bakaubya-ubya cilongwe cabo a Leza. Muciindi cakuyoowa alimwi akulemeka Jehova, bakali kutuula banyama baciswa alimwi abalema acipaililo. Ikutayoowa Leza alimwi kwakatondezyegwa munzila mbobakali kululanga lukwatano. Kutegwa bakwate bamakaintu bacili bana, bakabaleka bamakaintu babusankwa bwabo. Malaki wakabaambila kuti Jehova wakali kusulaikide “kulekana” alimwi akuti bumpelenge bwabo bwakali kubaandaanya kuzwa kuli Leza wabo. Mbuti Leza mbwaakali kukonzya kutambula zipaizyo zyabo kakuli zipaililo zyabo zyakalijisi misozi munzila yacikozyanyo—imisozi yabamakaintu bakali kulekwa? Ikutalemeka zyeelelo zyakwe kuli boobu kucisizya moyo kwakapa kuti Jehova abuzye kuti: “Kuyoowegwa kwangu kuli kuli?”—Malaki 1:6-8; 2:13-16.
9, 10. Ino mbuti mbotukonzya kutondezya kuti tulacibikkila maano cilongwe cesu a Jehova?
9 Mbubwenya buyo asunu, Jehova ulabona kutyompwa kwabaabo balekwa alimwi abana batakwe mulandu ibapenga akaambo kakuliyanda kwabaalumi abamausyi batalilemeki kabotu naa bamakaintu alimwi abamatumbu. Masimpe kulamuusisya nsoni. Imulongwe wa Leza ulabona zintu munzila Leza mbwazibona akubeleka canguzu kuyumya lukwatano lwakwe, ulaleka kuyeeya mbuli buyeeya bantu bakunyika baubya-ubya bulemu bwalukwatano alimwi ‘ulaccija bwaamu.’—1 Ba-Korinto 6:18.
10 Mulukwatano alimwi amumbazu zimwi zyabuumi, kusulaika cintu cibi mumeso aa Jehova kubikkilizyaa kulumba cilongwe cesu anguwe, kuyootupa kuyandwa akuzuminwaa Jehova. Imwaapostolo Petro cakusinizya wakaamba kuti: “Nkasimpe ndabona kuti Leza talangi ciimo camuntu, pele mumasi oonse uumuyoowa akucita bululami ulatambulwa kulinguwe.” (Incito 10:34, 35) Tulijisi zikozyanyo zinji zyamu Magwalo zyalo zitondezya mbuli kuyoowa Leza mbokwakakulwaizya bantu bamwi kucita zintu ziluzi mubukkale bukatazya kapati.
Bantu Botatwe Bakayoowa Leza
11. Nkwiinda mubukkale buli buti Abrahamu mwaakaambilwa kuti “ulamuyoowa Leza”?
11 Kuli mwaalumi umwi mu Bbaibbele walo Jehova ngwaakagama buya kumwaamba kuti mulongwe wakwe—Abrahamu wansiku. (Isaya 41:8) Ikuyoowa Leza kwa Abrahamu kwakasunkwa ciindi Leza naakamulomba kuti atuule mwanaakwe omwe buyo Izaka, walo Leza mwaakasyomezya kuti kwiinda mulinguwe lunyungu lwa Abrahamu luyooba musyobo mupati. (Matalikilo 12:2, 3; 17:19) Sena ‘mulongwe wa Jehova’ wakeelede kwiinda mumusunko ooyu uutaliyumini? (Jakobo 2:23) Muciindi eeco Abrahamu naakatandabika panga lyakwe kuti ajaye Izaka, mungelo wa Jehova wakaamba kuti: “Utatandabiki ijanza lyako kumwana nikuba kumucitila cintu, nkaambo lino ndaziba ncobeni kuti ulamuyoowa Leza, nkaambo tokwe nowandikakila mwanaako simuzyalwa alike.”—Matalikilo 22:10-12.
12. Ino ncinzi cakakulwaizya Abrahamu kuyoowa Leza, alimwi ino mbuti mbotukozya kutondezya bukkale bukozyenyi?
12 Nokuba kuti kuzwa kaindi Abrahamu wakali kutondezya kuti ulamuyoowa Jehova, muciindi eeco wakakutondezya kuyoowa Leza munzila mpati kapati. Ikulisungula kupaizya Izaka kwakali kutondezya bulemu kwiinda mukumvwida. Abrahamu wakakulwaizyigwaa lusyomo lunji lwakuti Wisi wakujulu wakali kuzoozuzikizya cisyomezyo cakwe kwiinda mukumubusya Izaka kuzwa kulufwu ikuti kwayandika. Kweelanaa mbuli Paulo mbwaakalemba, Abrahamu “[wakasyom]a kuti eco ncaakasyomezya [Leza] ulakonzya kucicita ncobeni.” (Ba-Roma 4:16-21) Sena tulilibambilide kucita kuyanda kwa Leza nokuba kuti kulakonzya kuyandika kulyaaba kapati? Sena tulisinizyide ikuti ikumvwida kuli boobo kulakonzya kuleta mpindu zitamani, katuzyi kuti Jehova “nguupa cilumbo kulibaabo bamuyandaula”? (Ba-Hebrayo 11:6) Ooko nkokuyoowa Leza ncobeni.—Intembauzyo 115:11.
13. Nkaambo nzi Josefa ncaakali kukonzya kulyaamba kuti wakali mwaalumi ‘uuyoowa Leza’?
13 Lino atulange-lange cikozyanyo acimbi cakuyoowa Leza kwiinda mumilimo—icikozyanyo ca Josefa. Kali muzike mumukwasyi wa Potifara, Josefa abuzuba wakali kusinikizyigwa kutegwa acite bumambi. Kulibonya kuti kunyina mbwaakali kukonzya kuleka kubonanaa mukaintu waasimalelo wakwe, walo lyoonse wakali kuzumanana kuti acite zyakutalilemeka anguwe. Mane limwi ciindi ‘naakajata cikobela, Josefa wakaccija waya anze.’ Ino ncinzi cakamukulwaizya kuccija cintu cibi cakufwambaana? Kakunyinaa kudooneka, kaambo kapati nkakuti wakali kuyoowa Leza, wakalombozya kutacita “bubi bupati buli boobu akubisizya Leza.” (Matalikilo 39:7-12) Ncobeni Josefa wakali kukonzya kulyaamba kuti wakali mwaalumi ‘uuyoowa Leza.’—Matalikilo 42:18.
14. Ino mbuti luzyalo lwa Josefa mbolutondezya kuyoowa Leza?
14 Nokwakainda myaka iili mbwiibede, Josefa wakaswaangana abanabokwabo balo bakamusambala mubuzike cakubula luzyalo. Wakali kukonzya kucibelesya ciindi eeci nobakali kuyandaula cakulya kutegwa ajole cibi ncobakamucitila. Pele kweendelezya bantu munzila yalunya tacitondezyi kuyoowa Leza pe. (Levitiko 25:43) Aboobo, Josefa naakabona kuti myoyo yabanabokwabo yakali cincide ncobeni, wakabalekelela. Mbubwenya mbuli Josefa, ikuyoowa Leza kwesu kuyootupa kuti tuzunde bubi mukucita cintu cibotu alimwi akutukwabilila kuzwa kumusunko.—Matalikilo 45:1-11; Intembauzyo 130:3, 4; Ba-Roma 12:17-21.
15. Ino nkaambo nzi kulilemeka kwa Jobu ncokwakali kukkomanisya moyo wa Jehova?
15 Jobu ncikozyanyo acimbi camuntu wakali kuyoowa Leza. Jehova wakaamba kuti kuli Diabolosi: “Sena wakabona kuti taakwe muntu munyika uuli mbuli muntu wangu Jobu, muntu uutakwe mulandu, uululeme, uulemeka Leza akuyoowa cibi?” (Jobu 1:8) Kwamyaka iili mbwiibede, ikulilemeka kabotu kwa Jobu kwakali kukkomanisya moyo wa Wisi wakujulu. Jobu wakali kuyoowa Leza nkaambo wakalizyi kuti cakaliluzi kucita boobo alimwi njeyakali nzila mbotu yakupona. Jobu wakaamba kuti: “Kulemeka Leza mboobu busongo; kweenguluka bubi nduzibo.” (Jobu 28:28) Mbwaakali muntu uukwete, Jobu kwiina naakali kunyomenena bamakaintu bakacili bana nokuba kuyeeya kucita bumambi mumoyo wakwe. Nokuba kuti wakalivwubide kapati, tanaakabikka lusyomo lwakwe kubuvwubi pe alimwi kunyina naakali kukuyanda kukomba mituni pe.—Jobu 31:1, 9-11, 24-28.
16. (a) Mmuunzila nzi Jobu mwaakatondezya luse? (b) Mmuunzila nzi Jobu mbwaakali kutondezya kulekelela?
16 Nokuba boobo, kuyoowa Leza caamba kucita cintu ciluzi akuleka kucita cintu cibi. Nkakaambo kaako Jobu wakababikkila maano bantu boofwu, balema alimwi abacete. (Levitiko 19:14; Jobu 29:15, 16) Jobu wakalizyi kuti “[balongwe] bakwe baleelede kumufwida luse muntu uutyompekeledwe, kuti atene ulaleka kusyoma amuli-Singuzuzyoonse.” (Jobu 6:14) Ikubula luse kulabikkilizyaa kutalekelela naa kufwungilila. Kwiinda mukwaambilwaa Leza, Jobu wakabapailila beenzinyina botatwe balo bakayungizya kuusa kwakwe. (Jobu 42:7-10) Sena tulakonzya kumulekelela munzila iili boobo mukombima wakatubisizya ciindi cimwi? Ikupailila baabo ibakatubisizya kulakonzya kutugwasya kuleka kubafwungilila. Izintu zibotu Jobu nzyaakajana akaambo kakuyoowa Leza zilakonzya kutugwasya kubona ‘bunji bwabubotu Jehova mbwayobweda baabo bamuyoowa.’—Intembauzyo 31:19; Jakobo 5:11.
Ikuyoowa Kukkomanisya Leza naa Bantu
17. Ino ncinzi kuyoowa bantu ncokukonzya kutuletela, pele ino nkaambo nzi kuyoowa bantu ncokutagwasyi?
17 Ikuyoowa Leza kulakonzya kutukulwaizya kucita zintu zibotu kakuli kuyoowa muntu kulakonzya kunyonyoona buyo lusyomo lwesu. Akaambo kaceeci, ciindi naakali kukulwaizya baapostolo kuti beelede kuba bakambausi bamakani mabotu basungu, Jesu wakabaambila kuti: “Mutabayoowi bajaya mubili pele tabakonzyi kujaya muuya, amuyoowe nguwe uukonzya kujaya mubili antoomwe amuuya mu-Gehena.” (Matayo 10:28) Jesu wakapandulula kuti, kuyoowa bantu takugwasyi pe, nkaambo bantu tabakonzyi kubunyonyoona bulangizi bwesu bwakumbele. Kunze lyaboobo, tulamuyoowa Leza nkaambo tulizyi kuti ulijisi nguzu ziyoosya twazikozyanyisya anguzu zyamunyika yoonse zice kapati. (Isaya 40:15) Mbubwenya mbuli Abrahamu, tulijisi lusyomo munguzu zya Jehova zyakukonzya kubusya balanda Bakwe basyomeka. (Ciyubunuzyo 2:10) Aboobo, tulakonzya kwaamba cakusinizya ikuti: “Anooli Leza kali aswe, ino nguni uukonzya kutulwisya?”—Ba-Roma 8:31.
18. Ino mmuunzila nzi Jehova mwapa bulumbu kulibaabo bamuyoowa?
18 Kufwumbwa naa sikutukazya ngwamumukwasyi antela ngusilukomo kucikolo, tuyoojana kuti “Mukuyoowa Jehova muntu ulajana inguzu zisyomeka.” (Tusimpi 14:26) Tulakonzya kupaila kuli Leza kutegwa atupe nguzu, katuzyi kuti uyootuswiilila. (Intembauzyo 145:19) Jehova tabalubi pe aabo bamuyoowa. Kwiinda mumusinsimi wakwe Malaki, utusyomezya kuti: “Mpawo abo ibakali kuyoowa Jehova bakali kwaambaula umwi aumwi kumweenzinyina, nkabela Jehova wakaswiilila, wakamvwa, nkabela ibbuku lyakwiibalusya lyakalembwa kulinguwe nkaambo kabaabo ibakali kuyoowa Jehova akuyeeya izina lyakwe.”—Malaki 3:16.
19. Ino nkuyoowa kuli buti kuyoolobelalyo, pele ino nkuyoowa kuli buti kunooliko lyoonse?
19 Iciindi cilaafwaafwi ibantu boonse nibayookomba Jehova alimwi ikuyoowa bantu nikuyoomaninalyo. (Isaya 11:9) Ikuyoowa nzala, malwazi, milandu alimwi ankondo akwalo kuyoolobelalyo. Pele kuyoowa Leza kunooliko lyoonse ibalanda bakwe basyomeka ibali kujulu alimwi aanyika mbobaya buzumanana kumulemeka alimwi akumuswiilila. (Ciyubunuzyo 15:4) Kwaciindi cino, toonse atulubikke mumoyo lulayo lwa Solomoni lwakasololelwaa muuya lwakuti: “Moyo wako utafwidi basizibi ibbivwe, pele kakatila kukuyoowa Jehova buzuba boonse, nkabela mamanino ayooboneka, nkabela bulangizi bwako tabukooyooloba.”—Tusimpi 23:17, 18.
Bupanduluzi buyungizidwe
^ munc. 2 Ibantu bamwi bapati buya bakacileka kuyoowa ntenda zikonzya kucitika ciindi nobabelekela mubusena bujisi zintu zikonzya kuleta ntenda. Nokubuzyigwa kaambo babezi banji ncobatajisi minwe iikwene, mubezi uucibwene kumutwe wiingula buyo kuti: “Bakacileka kuyoowa muncini uuzunguluka kapati uupandula mapulanga uubelekaa magesi.”
^ munc. 4 Jehova lwakwe ulasesemwa. Mucikozyanyo, ilugwalo lwa Ba-Efeso 4:29 mu New World Translation ikwaambaula kwacisapi lukupandulula kuti “majwi aabolede.” Ibbala lya Cigiliki lyakabelesyegwa kwaamba kuti “kubola” mubwini lyaamba mucelo wabola, inswi naa nyama. Ibbala eeli lilatondezya caantangalala mbuli kwaambaula kwacisapi mbotweelede kukutantamuka. Mbubwenya buyo, mituni kanjikanji mu Magwalo ipandululwa kuti ili mbuli “bufwumba.” (Deuteronomo 29:17; Ezekieli 6:9, NW) Mbubwenya mbotusesemwa bufwumba naa tubi, cilatugwasya kumvwisya mbuli Leza mbwasesemwa kukomba mituni kuli koonse.
^ munc. 6 Mucikozyanyo, amulange-lange cibalo cijatikizya Kaini (Matalikilo 4:3-12); Davida (2 Samuele 11:2–12:14); Gehazi (2 Bami 5:20-27); alimwi a Uziya (2 Makani 26:16-21).
Sena Inga Mwayeeya
• Ino mmuunzila nzi motukonzya kwiiya kusulaika cintu cibi?
• Ino mbuti bana Israyeli bamwi mumazubaa Malaki mbobakaubya-ubya cilongwe cabo a Jehova?
• Ino ncinzi ncotukonzya kwiiya kuli Abrahamu, Josefa alimwi a Jobu kujatikizya kuyoowa Leza?
• Ino nkuyoowa kuli buti kutakamani, alimwi nkaambo nzi?
[Mibuzyo yaciiyo]
[Cifwanikiso icili apeeji 25]
Ibazyali babikkila maano balaamba zintu bana babo nzyobeelede kuyoowa
[Cifwanikiso icili apeeji 26]
Mbubwenya mbuli kuyoowa mbokututantamuna kuntenda, kuyoowa Leza kulatugwasya kutantamuka zintu zibi
[Cifwanikiso icili apeeji 28]
Jobu wakazumanana kuyoowa Leza nociba ciindi naakanyonganyizyigwaa balongwe bakwe botatwe batakali bamasimpe
[Kulumba]
Kuzwa mu mubusanduluzi bwa Bbaibbele bwa Vulgata Latina, 1795