Jehova Ulatutondezya Mbotweelede Kubala Mazubeesu
Jehova Ulatutondezya Mbotweelede Kubala Mazubeesu
“Utwiiyisye kubala mazuba esu, kuti tujane moyo wabusongo.”—INTEMBAUZYO 90:12.
1. Nkaambo nzi ncociyandika kulomba Jehova kuti atutondezye mbotweelede “kubala mazuba esu”?
JEHOVA LEZA ngo Mulengi wesu alimwi Nguupa Buumi. (Intembauzyo 36:9; Ciyubunuzyo 4:11) Eelyo kunyina muntu uumbi pe uukonzya kututondezya mbuli mbotweelede kwiibelesya myaka yesu yabuumi munzila yeelede. Nkakaambo kaako majwi aasintembauzyo ncaayelela akulomba Leza kuti: “Utwiiyisye kubala mazuba esu, kuti tujane moyo wabusongo.” (Intembauzyo 90:12) Ku Intembauzyo 90 kwalo nkotujana kulomba ooku, masimpe ileelede kubikkilwa maano kapati. Kusaanguna, atululange-lange mubufwaafwi lwiimbo oolu lwakasololelwaa Leza.
2. (a) Ino nguni ubandidwe kuti ngowakalemba bbuku lya Intembauzyo 90, alimwi ino ndilili noliyeeyelwa kuti nolyakalembwa? (b) Ino mbuti ibbuku lya Intembauzyo 90 mbolipandulula kujatikizya mbotweelede kubulanga buumi?
2 Ikatwe kalaatalaa bbuku lya Intembauzyo 90 kaamba kuti, “cikombyo ca-Musa muntu wa-Leza.” Mbwaanga intembauzyo eeyi ikankaizya zyakufwiimpa kwabuumi bwamuntu, kulibonya kuti yakalembwa iciindi bana Israyeli nobakamana kulonzyegwa kuzwa mubuzike ku Egepita alimwi amulweendo lwabo lwamunkanda lwamyaka iili 40, ciindi zyuulu zyabantu zili mbozibede nozyakafwa akumanizya zyalani litasyomeki. (Myeelwe 32:9-13) Kufwumbwa naa lyakalembelwa ku Midyani naa mulweendo lwamyaka iili 40 lwamunkanda, ibbuku lya Intembauzyo 90 litondezya kuti buumi bwabantu batalondokede mbufwaafwi kapati. Aboobo, lino kalasalala ikaambo ncotweelede kwaabelesya kabotu mazubeesu.
3. Ino ntwaambo nzi ituli kumatalikilo kwabbuku lya Intembauzyo 90?
3 Mubbuku lya Intembauzyo 90, tupango 1 kusikila ku 6, Jehova waambwa kuti ncecikkalilo cesu citamani. Tupango 7 kusikila ku 12 tulatondezya ncotuyandika kucita kutegwa twiibelesye kabotu myaka miisyonto njotujisi yabuumi bwesu munzila iitambulika kulinguwe. Alimwi kweelanaa mbuli mbokutondezyedwe mutupango 13 kusikila ku 17, tuliyandide kutambula luzyalo lwa Jehova alimwi acilongezyo. Pele intembauzyo eeyi taisinsimi cakutugama buya akaambo kakuti tuli balanda ba Jehova pe. Pele tweelede kubikkila maano akwiiya nzila yakukomba Leza iitondezyedwe mubbuku lyantembauzyo eeyi kwiinda mumupailo. Aboobo, atulilangisye ibbuku lya Intembauzyo 90 kwiinda mukubelesya bantu aabo balyaabide kuli Leza.
Jehova—“Cikalilo Cesu”
4-6. Ino mbuti Jehova mbwali “cikalilo cesu”?
4 Sintembauzyo wakatalika amajwi aakuti: “O mwami [Jehova], nduwe cikalilo cesu, mumazyalani oonse. Zilundu kazitana kwaanzwa [kuzyalwa, NW], kotana kubumba nyika aluwa, kuzwa kuciindi eco akusikila kuziindi zyoonse nduwe Leza.”—Intembauzyo 90:1, 2.
5 Kulindiswe “Leza uutamani” “[nce]cikalilo cesu”—iciyubilo cakumuuya. (Baloma 16:26, Ci) Tuli bantu bakwabilidwe akaambo kakuti lyoonse ulilibambilide kutugwasya kali ‘sikuswiilila zikombyo.’ (Intembauzyo 65:2) Akaambo kakuti tulabikka mapenzi eesu oonse kuli Taateesu wakujulu kwiinda mu Mwanakwe uuyandwa, ‘luumuno lwa Leza lwiinda miyeeyo yoonse yabantu luyooyamininaa myoyo yesu alimwi aamiyeeyo yesu muli-Kristo Jesu.’—Ba-Filipi 4:6, 7; Matayo 6:9; Johane 14:6, 14.
6 Tulakwabililwa munzila yakumuuya nkaambo kakuti Jehova ‘ncikkalilo cesu’ mumaambilambali. Alimwi ulaabila ‘maanda aamukati’—alo ayelede kuti aliswaangenyi kapati ambungano zyabantu bakwe—kaali masena aakuyubila aakumuuya mwalo beembezi mobagwasya kapati kumakani aakukwabilila. (Isaya 26:20; 32:1, 2; Incito 20:28, 29) Kunze lyaboobo, tobamwi tuzwa mumikwasyi yakabelekela Leza kwaciindi cilamfwu alimwi lwesu kutugama twakajana kuti ‘ncikkalilo ncobeni mumazyalani oonse.’
7. Mmuunzila nzi malundu ‘mbwaakazyalwa’ buya alimwi anyika mboyakaboola kwiinda mu “kutumbukwa” buya?
7 Jehova wakaliko imalundu kaatanaa [“kuzyalwa,” NW] anyika kaitanaa [“kutumbukwa,” NW]. Kweelanaa kulanga kwamuntu, kubamba nyika alimwi azintu zyoonse izili mulinjiyo, bweende bwamisamu-samu iimwi alimwi anzila zikatazyide kwakali kuyandika kusolekesya. Alimwi ikwaamba kuti malundu ‘akazyalwa’ alimwi akuti nyika yakaboola kwiinda mu “kutumbukwa,” aawa sintembauzyo wakali kutondezya bulemu kumulimo mupati wakacitwa ciindi Jehova naakali kulenga zintu eezi. Sena andiswe tatweelede kuulemeka mulimo wamaanzaa Mulengi?
Lyoonse Jehova Ulilibambilide Kutugwasya
8. Ino kaambo kakuti Jehova ngu Leza “kuzwa kuciindi eco akusikila kuziindi zyoonse” kapandulula nzi?
8 Sintembauzyo wakaimba kuti: “Kuzwa kuciindi eco akusikila kuziindi zyoonse nduwe Leza.” Ibbala lyakuti “kuziindi zyoonse” aawa lilakonzya kupandulula zintu zikonzya kugola, pele bulamfwu bwaciindi eeco inga tabuzyibidwe pe. (Kulonga 31:16, 17; Ba-Hebrayo 9:15) Nokuba boobo, mubbuku lya Intembauzyo 90:2 alimwi amumbazu zimwi mu Magwalo aa Cihebrayo, ikwaamba kuti “kuziindi zyoonse” cipandulula kuti kukabe “kutamani.” (Mukambausi 1:4) Mumaano eesu, tatukonzyi kumvwisya mbuli mbocikonzyeka ikuti Leza lyoonse wakaliko. Pele Jehova tajisi matalikilo alimwi kwiina nayakubaa mamanino pe. (Habakuku 1:12) Lyoonse unooli muumi alimwi unoolilibambilide kutugwasya.
9. Ino nkuunzi sintembauzyo nkwakozyanyisya myaka yabuumi bwabantu iili cuulu?
9 Sintembauzyo wakasololelwaa muuya kukozyanyisya cuulu camyaka cabuumi bwabantu kuciindi cifwaafwi kapati kubuumi bwa Mulengi uupona lyoonse. Kaambila Leza, wakalemba kuti: “Ulapilusya bantu kubulongo, ulaamba kuti, Amupiluke nobana ba-Adamu. Nkaambo myaka iili mbuli cuulu mumeso aako ili mbuli buzuba bwajilo bwakainda, ambuli kaindi kamasiku kakulindila.”—Intembauzyo 90:3, 4.
10. Ino mmuunzila nzi Leza ‘mbwapilusya bantu kubulongo’?
10 Bantu balafwa, aboobo Leza ‘ulabapilusya kubulongo.’ Icipandulula kuti, ibantu ‘balapiluka kubulongo’ akuba mbuli bulongo bupwaidwe naa bukandidwe bwanyika. Aboobo Jehova waamba kuti: ‘Piluka kubulongo, nkaambo kubulongo nkowakazwa.’ (Matalikilo 2:7; 3:19) Eeci cilabajatikizya bantu boonse nobaba basinguzu naa batajisi nguzu, bavwubi naa bacete—nkaambo kunyina muntu uutalondokede ‘uukonzya kunununa mweenzinyina munzila iili yoonse naa kupa Leza cilubuzyo cabuumi bwakwe kuti apone lyoonse.’ (Intembauzyo 49:6-9) Elo tulalumba kaka ikujana kuti ‘Leza wakapa Mwanaakwe simuzyalwaalikke, ikutegwa muntu umwi aumwi uumusyoma abe abuumi butamani’!—Johane 3:16; Ba-Roma 6:23.
11. Nkaambo nzi ncotukonzya kwaamba kuti ciindi swebo ncotubona kuti ncilamfwu Leza ucibona kuti nkaindi buyo kafwaafwi?
11 Kweelanaa mbuli Jehova mbwazilanga zintu, naba Metusela iwakapona myaka iili 969, tanaakakkwanya buzuba bomwe pe. (Matalikilo 5:27) Kuli Leza myaka iili cuulu ili buyo mbuli jilo mabala—ikaindi kali buyo mbuli mawoola aali 24 ainda. Awalo sintembauzyo waamba kuti, kuli Leza myaka iili cuulu ili buyo mbuli mawoola aakulindila zivwuka aali one ciindi camasiku. (Babetesi 7:19) Lino cilasalala ikwaamba kuti, ciindi swebo ncotubona kuti ncilamfwu, kuli Leza uupona lyoonse Jehova ucibona kuti nkaindi buyo kafwaafwi.
12. Ino mmunzila nzi bantu ‘mbobakukulwaa’ Leza?
12 Kwiindanaa buumi bwa Leza butamani, buumi bwabantu bapona sunu mbufwaafwi kapati. Sintembauzyo waamba kuti: “Ulabakukulula mbuli lwizi; boona muŋonzi; cifumo bali mbuli bwizu bumena. Cifumo bulamena, bulakula; igoko b[alabalwa zuba], bulapusama.” (Intembauzyo 90:5, 6) Musa wakabona zyuulu-zyuulu zyabana Israyeli kabafwa munkanda, ‘kabakukulwaa’ Leza mbuli bucita lwizi. Eeci cibeela cantembauzyo cisanduludwe boobu: “Ulabakukula bantu baloona muŋonzi zyalufwu.”(New International Version) Kulubazu lumwi, buumi bwabantu batalondokede buli mbuli ‘koona ŋonzi’ kwaciindi cifwaafwi buyo—ikukozyanyaa koona busiku bomwe buyo.
13. Mmuunzila nzi mbotuli “mbuli bwizu,” alimwi ino mbuti eeci mboceelede kukujatikizya kuyeeya kwesu?
13 Tuli buyo ‘mbuli bwizu bumena ciindi camafwumofwumo,’ pele kumazuba bulapusama naa kuneta akaambo kakubalwaa zuba. Masimpe, buumi bwesu mbufwaafwi mbuli bwabwizu bupusama mubuzuba bomwe buyo. Aboobo, tatweelede kucinyonyoona cintu eeci ciyandika kapati. Muciindi caboobo, tweelede kuyandaula busolozi bwa Leza kujatikizya mbuli mbotweelede kwiibelesya myaka yesu yacaala mubweende bwazintu oobu.
Jehova Ulatugwasya “Kubala Mazuba esu”
14, 15. Ino Intembauzyo 90:7-9 yakazuzikizyigwa buti kubana Israyeli?
14 Kujatikizya Leza, sintembauzyo wakayungizya ategwa: “Nkaambo twasyukuta kubukali bwako, amulunyemo lwako twapenzegwa. Wabika milandu yesu kunembo lyako, azibi zyesu zisisidwe mumumuni wabusyu bwako. Nkaambo mazuba esu oonse amaninina mubukali bwako, tulamanizya myaka yesu mbuli kusintimuka.”—Intembauzyo 90:7-9.
15 Bana Israyeli bakanyina lusyomo ‘bakamaninina kubukali bwa Leza.’ ‘Bakapenzyegwaa lunyemo lwakwe’ naa kusubulwa abukali bwakwe. Bamwi “bakafwida munkanda” mulubeta lwa Leza. (1 Bakolinti 10:5, Ci) Jehova ‘wakabikka milandu yabo kumeso aakwe.’ Wakabapa mulandu akaambo kakucita zibi kubuleya, kubikkilizya ‘azibi zyabo zisisidwe’ wakazibikka ‘mumumuni wabusyu bwakwe.’ (Tusimpi 15:3) Kabalindila kunyonyoonwaa Leza, ibana Israyeli batakeempwa ‘bakamanizya myaka yabo mbuli kupetekezya buyo kwaamba.’ Kujatikizya kaambo aaka, buumi bwesu bufwaafwi bukozyenyi buyo akuyoya kucitwa kumulomo ciindi muntu napetekezya kwaamba.
16. Ikuti kakuli bamwi bacita zibi cakusisikizya, ino ncinzi ncobeelede kucita?
16 Ikuti muntu umwi kacita cibi cimwi cakusisikizya, ulakonzya kucisisa kubantunyina kwakaindi buyo kali mbokabede. Pele cibi cesu ncotusisa cinooli ‘mumumuni kubusyu bwa Jehova’ alimwi micito yesu ilakonzya kunyonganya cilongwe cesu anguwe. Kutegwa tutalisye cilongwe cesu anguwe alimwi, tuyooyandika kupailila kulekelelwa, kuleka zibi zyesu alimwi cakulumba ikuzumina lugwasyo lwakumuuya lwabaalu Banakristo. (Tusimpi 28:13; Jakobo 5:14, 15) Elo kaka eco inga cabota kwiinda ‘kumanizya buumi bwesu mbuli kupetekezya buyo,’ ikupona buumi butamani kakutakonzyeki!
17. Ino bulamfwu bwabuumi bwabantu boonse ibuzyibidwe bugolelaali, alimwi ino myaka yesu izwide nzi?
17 Kujatikizya buumi bwabantu batalondokede, sintembauzyo waamba kuti: “Myaka yabuumi bwesu ili makumi aali musanu aabili, na tuli basinguzu ambweni ilasika kumakumi aali musanu aatatu; pele bunji bwayo makatazyo buyo amapenzi, nkaambo ilafwamba kumana, nkabela tulauluka.” (Intembauzyo 90:10) Bantu banji bapona buyo myaka iili 70, pele Kalebe kajisi myaka iili 85, wakatondezya kuti wakacilijisi nguzu izitamweeleli. Kwakali lwiindano kuli bamwi mbuli Aroni (123), Musa (120) alimwi a Joshua (110). (Myeelwe 33:39; Deuteronomo 34:7; Joshua 14:6, 10, 11; 24:29) Pele kujatikizya zyalani litasyomeki lyakazwa ku Egepita lyabaabo bakalililembesyede kutalikila kulibaabo ibakajisi myaka yakuzyalwa iisika ku 20 kuyaambele, bakafwa kabajisi myaka iili 40. (Myeelwe 14:29-34) Mazubaano, mumasi manji buumi bwabantu boonse busika buyo kumyaka yakaambwaa sintembauzyo. Myaka yesu ilijisi “makatazyo buyo amapenzi.” Ileenda mbuli kulaba kwaliso, eelyo “tulauluka.”—Jobu 14:1, 2.
18, 19. (a) Ino cipandulula nzi “kubala mazuba esu, kuti tujane moyo wabusongo”? (b) Ino Ikuba basongo kwesu kuyootukulwaizya kuti tucite nzi?
18 Kumane boobo sintembauzyo wakaimba kuti: “Ngwani uuzi inguzu zyabukali bwako, abulemu bwako mboelede kuyoowegwa? Utwiiyisye kubala mazuba esu, kuti tujane moyo wabusongo.” (Intembauzyo 90:11, 12) Kunyina wesu uuzyi cakumaninina inguzu zyabukali bwa Leza naa mpozigolela, aboobo eeci ceelede kutupa kuti tumuyoowe kapati Jehova. Eeci ceelede kutupa kuti tumubuzye mbuli mbotweelede “kubala mazuba esu, kuti tujane moyo wabusongo.”
19 Imajwi aasintembauzyo mmupailo walo Jehova ngwayiisya bantu bakwe mbuli mbobakonzya kutondezya busongo kwiinda mukubikkila maano alimwi akubelesya mazuba aabo aaceede munzila Leza njazumina. Ikupona myaka iili 70 kujisi buyo bulangizi bwakupona mazuba aali 25,500. Kufwumbwa musela ngotubede, ‘tatucizi ciyooba juunza pe. Ino buumi bwesu ninzi? Ningubi buyo iibonwa kaindi kaniini, ndilyonya yamana.’ (Jakobo 4:13-15) Mbwaanga ‘tulasikilwa ziindi zyalufwu,’ tatukonzyi kuzyiba bulamfwu bwabuumi bwesu. Aboobo atupailile busongo kutegwa tucikonzye kumana masukusyo, ikubalanganya kabotu bantu bamwi alimwi akubeleka kusikila mpotugolela mumulimo wa Jehova lino—sunu buya! (Mukambausi 9:11; Jakobo 1:5-8) Jehova ulatusololela kwiinda mukubelesya Jwi lyakwe, muuya wakwe alimwi ambunga yakwe. (Matayo 24:45-47; 1 Ba-Korinto 2:10; 2 Timoteo 3:16, 17) Ikuba bantu basongo kutupa kuti ‘tuyandaule Bwami bwa Leza kusaanguna’ akwaabelesya mazubeesu munzila iikonzya kuleta bulemu kuli Jehova alimwi akupa kuti moyo wakwe ukkomane. (Matayo 6:25-33; Tusimpi 27:11) Pele kumukomba cakumaniina tacaambi kuti ciyoomana mapenzi eesu woonse pe, pele masimpe ciyootuletela lukkomano lupati.
Cilongezyo ca Jehova Cilatupa Lukkomano
20. (a) Mmuunzila nzi Leza ‘mbwalijata’? (b) Ino mbuti Jehova mbwayootweendelezya kuti twacita cibi cipati, pele kumane twatondezya kweempwa ncobeni?
20 Elo kaka inga caba cintu cibotu ikukkomana mubuumi bwesu boonse! Kujatikizya kaambo aaka, Musa wakakomba kuti: “Boola, O Jehova. Ino bukamane lili? Kofwida balanda bako buuya. Cifumo utukusye luzyalo lwako, kuti twiimbe cakukondwa mazuba esu oonse.” (Intembauzyo 90:13, 14) Leza talubizyi pe. Pele, ‘ulausa’ alimwi ‘akujata’ bukali bwakwe akuleka kupa cisubulo ikuti ciindi basimucita zibi nibacenjezyegwa beempwa akuleka milimo abukkale bwabo bubi. (Deuteronomo 13:17) Aboobo nokuba kuti twacita cibi cipati, kumane twatondezya kweempwa ncobeni, Jehova ‘uyootukkutizya aluzyalo lwakwe’ alimwi tunoojisi kaambo ‘kakumwiimbila cakukondwa.’ (Intembauzyo 32:1-5) Kwiinda mukupona buumi bululeme, tuyoolubona luyando Leza ndwajisi kulindiswe alimwi tuyookonzya ‘kwiimba cakukondwa’—ee, mubuumi bwesu boonse buya.
21. Mumajwi aa Musa aalembedwe kubbuku lya Intembauzyo 90:15, 16, ino kweelede kuti Musa wakali kulomba nzi?
21 Sintembauzyo wakapaila boobu cakusinizya: “Utubotezye mbubonya mbuli mazuba ngowatupenzya, amyaka njetwakali kweenda mumafwabi. Milimo yako ibonwe kubalanda bako, abulemu bwako kubana babo.” (Intembauzyo 90:15, 16) Musa weelede kuti wakali kulomba Leza kuti alongezye bana Israyeli alukkomano lweelanaa mazubaa myaka njobakali mumapenzi. Wakalomba “milimo” ya Leza yakulongezya bana Israyeli kuti iboneke kubantu Bakwe alimwi abulemu Bwakwe kuti buboneke kubana babo. Tulakonzya kupaila munzila yeelede kuti zilongezyo zikabe kubantu aabo bamvwa munyika ya Leza mpya.—2 Petro 3:13.
22. Kweelanaa Intembauzyo 90:17, ncinzi ncotweelede kupailila?
22 Intembauzyo 90 ilamana akukomba ooku: “Lino lubotezyo lwa-Jehova Leza wesu alube alindiswe; milimo yamaanza esu ilondolwe kulinduwe, ii, londola milimo yamaanza esu.” (Intembauzyo 90:17) Imajwi aaya atondezya kuti cililuzi ikupailila kusoleka kwesu kuli Leza mumulimo wakwe. Katuli Banakristo bananike naa beenzinyina, iba “mbelele zimwi,” toonse tulakkomana akaambo kakuti “lubotezyo lwa Jehova” lunooli alindiswe. (Johane 10:16) Elo tulikkomenyi kaka akaambo kakuti ‘milimo yamaanza esu ilalondolwaa’ Leza katuli baambilizyi ba Bwami amunzila zimwi!
Atuzumanane Kubala Mazubeesu
23, 24. Ino mbuti mbotukonzya kugwasyigwa kwiinda mukuzinzibala kuyeeya bbuku lya Intembauzyo 90?
23 Ikunzinzibala kuyeeya bbuku lya Intembauzyo 90 kweelede kukomezya kulipeekezya kwesu kuli Jehova, ‘icikkalilo cesu.’ Notuyeeya majwi aali mulindilyo aajatikizya kufwiimpa kwabuumi bwesu, tweelede kuyeeya kapati mbuli mbokuyandika kusololelwaa Leza mukubala mazubeesu. Ikuti naa twaliyumya mukuyandaula alimwi akutobela busongo buzwa kuli Leza, tuyoosinizya kuba baabo ibayootambula luzyalo lwa Jehova alimwi akulongezyegwa.
24 Jehova uyoozumanana kututondezya mbuli mbotweelede kubala mazubeesu. Ikuti twakuzumina kulailila kwakwe, tuyoozumanana kubala mazubeesu kukabe kutamani. (Johane 17:3) Ikuti buumi butamani katubuyanda masimpe, Jehova weelede kuba maccijilo eesu. (Juda 20, 21) Mbubwenya mbuli mbotutiibone mucibalo citobela, kaambo aaka kalisalazyidwe mumajwi aali mubbuku lya Intembauzyo 91.
Ino Inga Mwaingula Buti?
• Ino mmuunzila nzi Jehova mbwali “cikalilo” cesu?
• Nkaambo nzi ncotukonzya kwaamba kuti Jehova lyoonse ulilibambilide kutugwasya?
• Ino mbuti Jehova mbwatugwasya “kubala mazuba esu”?
• Ino ncinzi citupa ‘kukondwa mumazuba eesu woonse’?
[Mibuzyo yaciiyo]
[Cifwanikiso icili apeeji 9]
Jehova ngu Leza uuliko “zilundu kazitana kwaanzwa”
[Cifwanikiso icili apeeji 10]
Kweelanaa mbuli Jehova mbwabala myaka, Metusela wakapona myaka ili 969 tanaakakkwanya buzuba bomwe
[Zifwanikiso izili apeeji 12]
Jehova ‘walondola milimo yamaanza esu’