Bakaliyumya Kubumvwa Mumubili
Bakaliyumya Kubumvwa Mumubili
“Ndakabikkwa bumvwa mumubili, oobu mutumwa wa Saatani kuti andipenzye.”—2 BAKOLINTI 12:7, Ci.
1. Ino mmapenzi nzi amwi aasikila bantu sunu?
SENA muli mukulwana amusunko uuyaabuzumanana? Ikuti naa mboobo, tamuli mulikke pe. “[Mu]ziindi zikataazya” eezyi Banakristo basyomeka bali mukuliyumya mukukazyigwa kapati, mumapenzi aamumukwasyi, malwazi, penzi lyakubula mali, kukopana mumizeezo, kufwidwa bayandwa babo alimwi abuyumuyumu bumbi buyo. (2 Timoteo 3:1-5) Mumanyika aamwi, bunji bwabantu bali mukupenga akaambo kakubula zyakulya alimwi ankondo.
2, 3. Ino mizeezo nzi iilubide iikonzya kubuka akaambo kamapenzi ngotusikilwa aali mbuli bumvwa, alimwi ino nkaambo nzi ncaali ntenda mpati?
2 Imapenzi aali boobu alakonzya kupa kuti muntu umwi alimvwe kuti wazundwa, ikapati ikuti naa mapenzi aayo acitikilaa ciindi comwe. Amubone mbuli ibbuku lya Tusimpi 24:10 ncolyaamba: “Na wawizuka mubuzuba bwamapenzi, inguzu zyako [zil]aceya.” Inzya, kutyompwa akaambo kamasukusyo kulakonzya kutumana nguzu alimwi akutupa kutyompwa mumakanze eesu aakuliyumya kusikila kumamanino. Munzila nzi?
3 Inzya, kutyompwa kulakonzya kupa kuti tucince makanzeesu aajatikizya mbotuzibona zintu. Mucikozyanyo, ziindi zimwi ncuuba-uba ikukomezya mapenzi eesu ibutali mbwaabede ncobeni akutalika kulyeetezya. Bamwi balakonzya kutongookela Leza akwaamba kuti: “Ino nkaambo nzi ncolekeleda cintu cili boobu ikuti cindicitikile?” Ikuti muzeezo ooyu uutaluzi wakomena mumoyo wamuntu, cilakonzya kumumanina lukkomano alimwi alusyomo. Imubelesi wa Leza ulakonzya kutyompwa cakunga inga waleka buya kulwana “lumamba lubotu lwalusyomo.”—1 Timoteo 6:12.
4, 5. Muziindi zimwi, ino mbuti Saatani mbwajatikizyidwe mumapenzi eesu, pele ino ndusyomo luli buti ndotweelede kubaandulo?
4 Masimpe Jehova Leza tali nguutuletela masukusyo pe. (Jakobo 1:13) Masunko amwi alaboola akaambo kakuti tuyanda kuba bantu basyomeka kulinguwe. Bwini mbwakuti, boonse aabo babelekela Jehova balaba basinkondonyina asinkondonyina mupati, Saatani Diabolosi. Muciindi buyo cisyoonto camucaalila ooyu ‘leza mubi wabweende oobu,’ uli mukusola kulesya baabo bacita kuyanda kwa Jehova. (2 Ba-Korinto 4:4) Saatani uli mukusola kupenzya bakwesu nyika yoonse mbwiizulwa azipenzyo zinji mbuli mbwakonzya. (1 Petro 5:9) Pele Saatani tatuleteli mapenzi cakutugama buya pe, pele ulaabelesya mapenzi aayo aatusikila kutegwa atumane nguzu.
5 Nokuba boobo, kufwumbwa naa Saatani ujisi nguzu zinji buti naa zilwanyo, tulakonzya kumuzunda! Ino mbuti mbotukonzya kuba masimpe kujatikizya makani aaya? Tulakonzya kuba masimpe akaambo kakuti Jehova Leza nguutulwanina. Wabona kwaamba kuti babelesi bakwe tabali mumudima kujatikizya nzila Saatani nzyabelesya. (2 Ba-Korinto 2:11) Mubwini, Ijwi lya Leza lilatwaambila kujatikizya masukusyo aasikila Banakristo bakasimpe. Ikujatikizya masukusyo aamwaapostolo Paulo, Ibbaibbele lyakabelesya mabala aakuti “bumvwa mumubili.” Nkaambo nzi? Lino atubone mbuli Jwi lya Leza mbolipandulula mabala aayo. Eelyo tulabona kuti tatuli tolikke notuyanda lugwasyo lwa Jehova kutegwa tuzunde masukusyo.
Masukusyo Ncaali Mbuli Bumvwa
6. Ino ncinzi Paulo ncaakali kupandulula naakaamba kuti “bumvwa mumubili,” alimwi ino kweelede kuti ibumvwa oobo cakali cinzi?
6 Paulo mbwaanga wakapenzyegwa citaambiki, wakasololelwa kulemba kuti: “Ndakabikkwa bumvwa mumubili, oobu mutumwa wa Saatani kuti andipenzye, kuti intakaindi kulisumpula.” (2 Bakolinti 12:7, Ci) Ino oobu bumvwa mumubili wa Paulo cakali cinzi? Ibumvwa kuti bwayasa mulukanda, masimpe bulacisa kapati. Aboobo, kaambyo aaka katondezya cintu cakali kupa kuti Paulo amvwe kucisa—kufwumbwa naa nkuumubili, mumizeezo naa muli zyoonse zyobilo. Cilakonzya kuti ambweni Paulo wakali kuciswa liso naa malwazi aambi buyo mumubili. Ambweni bumvwa bwakali kubikkilizya bantu aabo ibakali kukazya Paulo kuti tanaakali mwaapostolo akudooneka mulimo wakwe wakukambauka alimwi akuyiisya. (2 Ba-Korinto 10:10-12; 11:5, 6, 13) Kufwumbwa naa cakali cinzi, ibumvwa oobo bwakazumanana kuli Paulo alimwi tiibwakali kukonzya kusongolwa pe.
7, 8. (a) Ino bbala lyakuti “kupenzya” litondezya nzi? (b) Ino nkaambo nzi ncociyandika ikuliyumya kubumvwa ibuli boonse butupenzya lino?
7 Amubone kuti ibumvwa oobu bwakazumanana kumupenzya Paulo. Icciti lya Cigiliki Paulo ndyaakabelesya lizwa kubbala lyakuti “ntuku.” Ibbala eeli lyakabelesyegwa cigaminina ku Matayo 26:67 (NW) alimwi amucikozyanyo kulugwalo lwa 1 Ba-Korinto 4:11. Mutupango ootu, tupa muzeezo wakuumwa amfwaindi. Nitubona Saatani mbwamusulide Jehova alimwi ababelesi Bakwe, tulakonzya kuba masimpe kuti Diabolosi wakakondwa kubona kuti bumvwa bwakazumanana kupenzya Paulo. Mubwenya buyo, asunu Saatani ulakondwa ciindi notupenzyegwaa bumvwa mumubili.
8 Aboobo mbubwenya bwakacita Paulo, tweelede kuzyiba mbotukonzya kuliyumya kubumvwa buli boobo. Ikucita boobo kulakonzya kutuletela buumi! Katuyeeya kuti Jehova uyanda kuti tukazumanane kupona kumbele munyika yakwe mpya, oomo mwalo mapenzi aali mbuli bumvwa mwaatakatupenzyi alimwi pe. Ikutugwasya kujana bulumbu oobu, Leza watupa zikozyanyo zinji mu Jwi lyakwe lisalala Ibbaibbele, zitondezya kuti babelesi bakwe basyomeka bakazwidilila kuliyumya kabajisi bumvwa mumubili. Bakali bantu balya maila alimwi batalondokede mbubwenya mbulindiswe. Ikulanga-langa bamwi akati ‘kamakamu-makamu aaya aabakamboni,’ kulakonzya kutugwasya ‘mukusiyana lubilo nkotwabikilwa kumbele lyesu.’ (Ba-Hebrayo 12:1) Ikunzinzibala kuyeeya kujatikizya mbuli mbobakaliyumya kulakonzya kuyumya lusyomo lwesu lwakuti andiswe tulakonzya kuliyumya mubumvwa ibuli boonse Saatani mbwakonzya kutuyasa.
Ibumvwa Bwakapenzya Mefiboseti
9, 10. (a) Ino mbuti Mefiboseti mbwaakazooba aabumvwa mumubili? (b) Ino nduzyalo luli buti Mwami Davida ndwaakatondezya kuli Mefiboseti, alimwi ino mbuti mbotukonzya kwiiya Davida?
9 Amulange-langa kujatikizya Mefiboseti imwanaa mulongwe wa Davida, Jonatani. Ciindi Mefiboseti naakakkwanya myaka yakuzyalwa iili yosanwe, wakasikilwa makani aakuti Jonatani bawisi alimwi abasyaanyinakulu, nkokuti Mwami Saulo bajaigwa. Imusimbi wakali kumulela wakanyongana. “Muleli wakwe wakamubweza . . . mbwaakabindeene kucija, mwana wakawida ansi, aboobo wakalemana.” (2 Samuele 4:4) Ikulemana ooku kweelede kuti kwakaba bumvwa bukatazya kuliyumya Mefiboseti naakakomena.
10 Nokwakainda myaka iili mbwiibede, Mwami Davida akaambo kaluyando lwakwe, wakatondezya luzyalo kuli Mefiboseti. Davida wakapilusya zintu zyoonse izyakali zya Saulo akuzipa nguwe, mpoonya wakabikka Ziba kuti abe nguwe uunoolanganya nyika yakwe. Alimwi Davida wakaambila Mefiboseti kuti: “Uyoolya insima kulindime mazuba oonse.” (2 Samuele 9:6-10) Kakunyinaa kudooneka, luzyalo lwa Davida lwakamuumbulizya kapati Mefiboseti akumugwasya kucesya penzi lyakwe lyakulemana. Elo nkubota ciiyo eeci basa! Andiswe mbubwenya tweelede kutondezya luzyalo kulibaabo ibali mukupenzyegwa abumvwa mumubili.
11. Ino mbuti Ziba mbwaakabejelezya Mefiboseti, pele ino mbuti mbotuzyi kuti nzyaakaamba zyakali zyakubeja? (Amubone bupanduluzi buyungizyidwe)
11 Kumbele aamazuba, Mefiboseti wakazoosikilwa bumvwa abumwi mumubili. Mubelesi wakwe Ziba wakamubejelezya ku Mwami Davida walo wakali kuccija mwanaakwe Abisalomu wakazanga ku Jerusalemu. Ziba wakaamba kuti Mefiboseti wakacaala ku Jerusalemu akaambo kakutasyomeka alimwi akuti wakali kuyanda kulibikkaa cuuno cabwami. * Davida wakaamvwida makani aaya aakubeja ngaakamba Ziba, eelyo wakamunyanga lubono loonse Mefiboseti akulupa sikubeja ooyo!—2 Samuele 16:1-4.
12. Ino Mefiboseti wakacita buti mubukkale buli boobu, alimwi ino mbuti mbwali cikozyanyo cibotu kulindiswe?
12 Nokuba boobo, ciindi Mefiboseti naakazikuswaanganaa Davida, wakamwaambila mwami icini cakacitika. Wakali libambilide kuunkaa Davida ciindi Ziba naakamuunina, mpoonya walo wakalisungula kuunka mucibaka cakwe. Sena kulubizya ooku Davida wakakululamika? Wakakululamika asyoonto buyo. Lubono wakalwaabanya kubaalumi aaba bobilo. Eeci alimwi cakaba cintu cakali kukonzya kuletela Mefiboseti bumvwa mumubili. Sena wakatyompwa cakuzwa munzila? Sena wakakukazya kukosola makani kwa Davida akutalika kutongooka kuti taceelede kuba boobo? Peepe, cakulibombya, wakauzumina muzeezo wamwami. Wakabikkila maano kulubazu lugwasya akukkomana kubona kuti mwami weelede wa Israyeli wapiluka buyo kabotu. Masimpe, Mefiboseti wakapa cikozyanyo cibotu kwiinda mukuliyumya mubulema bwakwe, mukubejelezyegwa alimwi amukutyompwa.—2 Samuele 19:24-30.
Nehemiya Wakaliyumya Mumasukusyo
13, 14. Ino mbumvwa buli buti Nehemiya mbwaakeelede kuliyumya ciindi naakapilukila kuya kukuyaka bulambo bwa Jerusalemu?
13 Amuyeeyele buyo kujatikizya bumvwa bwacikozyanyo Nehemiya mbwaakaliyumya ciindi naakapiluka kumunzi wa Jerusalemu uutajisi bulambo mumwaanda wamyaka wasanu B.C.E. Wakajana kuti munzi tiiwakali kwabilidwe naaceya alimwi bama Juda bakapilusigwa tiibakakamantenyi pe, bakali tyompedwe alimwi tiibakali kusalala mumeso aa Jehova. Nokuba kuti bakapegwa nguzu a Mwami Aritasasta zyakuti bayake bulambo bwa Jerusalemu, Nehemiya wakabona kuti imulimo ooyo tiiwakali kuyandwa pe abeendelezi bamuzisi zilaafwaafwi. “Bakabijilwa loko kuswiilila kuti kwasika muntu uuyanda kugwasya bana ba-Israyeli.”—Nehemiya 2:10.
14 Ibasikukazya beenzu bakasola mbuli mbobakonzya kubelesya nguzu zyabo kutegwa balesye mulimo wa Nehemiya. Ikulikongela kwabo, bubeji, kulengelela alimwi akudyaaminina—ikubikkilizya akubelesya basikutwela ibakali kutumwa kutegwa bamutyomye, beelede kuti bakali buyo mbuli bumvwa buzumanana kuyasa mumubili wakwe. Sena wakazundwa abucenjezu bwabasinkondonyina aabo? Peepe! Wakabikka lusyomo lwakwe kuli Leza muciindi cakutolwaala. Nkakaambo kaako, ciindi bulambo bwa Jerusalemu nobwakamana kuyakwa, bakazumanana kulumbaizya Jehova akaambo kakukulwaizya Nehemiya.—Nehemiya 4:1-12; 6:1-19.
15. Ino mmapenzi nzi abama Juda akamupenzya kapati Nehemiya?
15 Mbwaakali mweendelezi, Nehemiya alimwi wakasikilwa mapenzi manji akati kabantu ba Leza. Ibuyumuyumu oobu bwakali mbuli bumvwa bwakamupenzya kapati akaambo kakuti bwakabujatikizya bulongwe bwabantu a Jehova. Ibavwubi bakali kujana mpindu iinji kapati alimwi ibanyina bacete kapati kutegwa babbadale zikwelete alimwi akupa mutelo kubana Persia, bakeelede kupa nyika yabo nokuba kuuzya bana babo buya mubuzike. (Nehemiya 5:1-10) Bana Juda banji bakali kutyola mulawo wa Sabata alimwi bakaalilwa kukulwaizya bana Levi alimwi akutempele. Alimwi bamwi mane bakakwata “banakazi baku-Asidodi, ba-Amoni, aba-Moabu.” Elo kaka eeci cakamukopa Nehemiya! Pele kunyina nobwakamutyompya pe ibumvwa buli boobu. Ciindi aciindi wakazumanana muciindi eeco kali muntu uukutobela milawo ya Leza iiluleme imusungu. Mbubwenya mbuli Nehemiya, tutazuminini imicito yakutalilemeka yabantu bamwi kuti itupe kufwutatila mulimo wesu ngotucita cakusyomeka kuli Jehova.—Nehemiya 13:10-13, 23-27.
Basyomeka Abamwi Banji Bakaliyumya Kubumvwa Mumubili
16-18. Ino mbuti mazwanga aamumukwasyi mbwaakapenzya Izaka alimwi a Rebeka, Hana, Davida alimwi a Hosea?
16 Ibbaibbele lilijisi zikozyanyo azimbi zyabantu bakaliyumya mubukkale bukatazya kapati ibuli mbuli bumvwa. Icakali kuleta kapati bumvwa ibuli boobo akali mapenzi aamumukwasyi. Bamakaintu bobilo ba Esau “bakakataazya myoyo ya-Izaka a-Rebeka,” ibazyali ba Esau. Mane limwi Rebeka wakaamba kuti wakabusula buumi bwakwe akaambo kabamakaintu aabo. (Matalikilo 26:34, 35; 27:46) Alimwi amuyeeye kujatikizya Hana alimwi amukwatwanyina Penina, walo “wakali kumupenzya” akaambo kakuti Hana tanaakali kuzyala. Ambweni Hana wakali kuliyumya buya kukufwubaazyigwa ooku ziindi zinji kabali balikke muŋanda. Alimwi Penina wakali kumupenzya bantu kabalangilila aabantu buya—kakunyinaa kudooneka basazinyina alimwi abeenzyinyina kabaliko, ciindi mukwasyi nowakali kuunka kupobwe ku Silo. Ooku kwakali mbuli kuyasa abumvwa mumubili lwa Hana.—1 Samuele 1:4-7.
17 Amuyeeye mbuli Davida mbwaakaliyumya akaambo kamunyono wabausyizyala, Mwami Saulo. Kutegwa alikwabilile, Davida cakamupa kulonga akuyookkalila mumampangala aamabwe munkanda yaku Enge-di, kwalo nkwaakali kutanta majeleele alimwi akweendela munzila zyamumabwe. Ikutalulama ooku kweelede kuti kwakamupenzya kapati nkaambo kakuti kunyina cibi ncaakacitila Saulo. Nokuba boobo, kwamyaka iili mbwiibede, Davida wakaba simutuntuli—zyoonse eezyi zyakaba boobu akaambo kamunyono wa Saulo.—1 Samuele 24:14, 15; Tusimpi 27:4.
18 Amuyeeye buyo kujatikizya mazwanga aakasikila musinsimi Hosea. Imukaintu wakwe wakaba simamambe. Ikutalilemeka kwakwe kwakaba mbuli bumvwa ibuyaside mumubili wakwe. Elo kaka cakaindilila kumusulula ikapati ciindi naakazyala bana bobilo bamusokwe!—Hosea 1:2-9.
19. Ino mmapenzi nzi aakacitikila musinsimi Mikaya?
19 Ibumvwa abumwi mumubili bulaboola akaambo kakupenzyegwa. Amulange-lange cakacitikila musinsimi Mikaya. Ikubona Mwami Ahabu kazingulukidwe abasinsimi bakubeja alimwi Mikaya uululeme cakamukatazya ncakuti Ahabu wakali kusyoma makani aakubeja ngobakali kwaamba. Kumane boobo, ciindi Mikaya naakaambila Ahabu kuti boonse basinsimi aabo bakali kwaambaa “muuya wabubeji,” ino ncinzi aabo basololi basilweeno ncobakacita? ‘Wakamuuma Mikaya kusaya!’ Cakainda kulubila nkubona mbuli Ahabu mbwaakacita kukucenjezya kwa Jehova kwakuti imuzeezo ngobakajisi wakuti Ramoti-Gileadi upilusyigwe tiiwakali kukonzya kuzwidilila pe. Ahabu wakalailila kuti Mikaya abikkwe muntolongo akupegwa cakulya cisyoonto buyo. (1 Bami 22:6, 9, 15-17, 23-28) Alimwi amuyeeye mbuli Jeremiya mbwaakapenzyegwa abasikupenzya bajayi.—Jeremiya 20:1-9.
20. Ino mbumvwa ibuli buti Naomi mbwaakaliyumya, alimwi ino wakapegwa buti bulumbu?
20 Ikufwidwa bamukowa mbukkale abumwi bukatazya kapati ibuli mbuli bumvwa mumubili. Naomi wakaliyumya kulufwu lwamulumaakwe alimwi abana bakwe basankwa bobilo. Nokuba kuti wakacinyongenyi akaambo kamapenzi aayo, wakapilukila ku Betelehemu. Wakaambila beenzyinyina kuti kabatacinoomwiiti kuti Naomi, pele kuti Mara, izina litondezya bubi bwazintu zyakamucitikila. Nokuba boobo, kumamanino Jehova wakamupa bulumbu akaambo kakuliyumya kwakwe kwiinda mukumupa muzyukulu walo iwakazikuba mumulongo wamazyalani aa Mesiya.—Rute 1:3-5, 19-21; 4:13-17; Matayo 1:1, 5.
21, 22. Ino mbuti Jobu mbwaakasowekelwa zintu, alimwi ino wakacita buti?
21 Amuyeeye buyo mbuli Jobu mbwaakanyongana ciindi naakamvwa kujatikizya lufwu lwabana bakwe ibali kkumi kubikkilizyaa kunyonyookelwa zivwubwa zyakwe zyoonse alimwi ababelesi bakwe. Mukaindi buyo kasyoonto, wakanyongana cakunga wakabula acakucita buya. Mpoonya Jobu kacinyongenyi akaambo kazintu zyakamucitikila, Saatani wakamuletela bulwazi. Jobu weelede kuti wakayeeya kuti ibulwazi oobu bubyaabi kapati bulamujaya. Bulwazi bwakwe bwakali kucisa kapati cakunga wakayeeya kuti lufwu lulikke ndolwakali kukonzya kumana mapenzi aakwe.—Jobu 1:13-20; 2:7, 8.
22 Mbuli kuti zyoonse eezyi zyakali mutobode buya, imukaintu wakwe akaambo kakuusa akupenga kapati, wakaboola katongooka akwaamba kuti: “Mutukile Leza kuti ufwe!” Elo kaka wakakuyungizya kucisa kwabumvwa mumubili uucisa akale basa! Icakatobela, ibalongwe ba Jobu botatwe bakasika, muciindi cakumuumbulizya buya, bakatalika kumutongooka kabamuyeeyela zintu zitako, kabamutamikizya kuti kuli zibi nzyaakacita cakusisikizya, nkakaambo kakapa kuti abe mumapenzi aayo. Ikukazyanya ooku kwakali mbuli kuyaabuyasa buya abumvwa mumubili. Alimwi kamuyeeya kuti Jobu kunyina naakazyi ikaambo zintu zibi boobu ncozyakali kumucitikila; nokuba kuziba kuti wakali kuzoocingililwa. Pele, “mulizyoonse ezi Jobu takwaakabija, takwaaka[tongookela] Leza.” (Jobu 1:22; 2:9, 10; 3:3; 14:13; 30:17) Nokuba kuti wakayaswa bumvwa bunji aciindi comwe, kunyina naakaleka kusyomeka pe. Elo kaka cilakulwaizya eeco!
23. Ino nkaambo nzi bantu basyomeka mbotwabandika mbobakakonzya kuzunda bumvwa bwiindenyi-indenyi mumubili?
23 Nkozicili buya azimbi zikozyanyo zili mbuli ceeci caambwa. Ibbaibbele lilijisi azimbi buya zikozyanyo. Boonse babelesi aaba basyomeka bakalijisi bumvwa oobu bwacikozyanyo. Elo nkuvwula mapenzi ngobakasikilwa! Pele kwakali cintu comwe ncobakajisi boonse. Kunyina naba omwe wabo iwakaleka kubelekela Jehova. Nokuba kuti bakasikilwa masunko aakatazya, bakamuzunda Saatani kwiinda munguzu Jehova nzyaakabapa. Munzila nzi? Icibalo citobela cilawiingula mubuzyo ooyu alimwi akutondezya mbuli andiswe mbotukonzya kuliyumya kucintu cili coonse icili mbuli bumvwa mumubili.
Bupanduluzi buyungizidwe
^ munc. 11 Imizeezo iili boobo yabumpelenge tiiyakali kukonzya kuba mumizeezo yamuntu uulumba nzyaakacitilwa alimwi uulibombya, Mefiboseti. Kakunyinaa kudooneka, wakalaazyi makani aajatikizya kusyomeka kwabausyi ba Jonatani. Nokuba kuti wakali mwanaa Mwami Saulo, Jonatani cakulibombya wakamuziba Davida kuti ngonguwe Jehova ngwaakasala kutegwa abe mwami wa Israyeli. (1 Samuele 20:12-17) Mbwaakali muzyali wa Mefiboseti uuyoowa Leza alimwi imulongwe wa Davida, Jonatani talangilwi kuti wakali kukonzya kuyiisya mwanaakwe kuyandisya bweendelezi.
Ino Inga Mwaingula Buti?
• Ino nkaambo nzi imapenzi aatusikila ncaakonzya kukozyanyisyigwa kubumvwa ibuli mumubili?
• Ino mbumvwa ibuli buti Mefiboseti alimwi Nehemiya mbobakaliyumya?
• Aakati kazikozyanyo izili mu Magwalo zyabaalumi alimwi abamakaintu ibakaliyumya kubumvwa mumubili, ino ncikozyanyo nzi cakamuswiimya mubili, alimwi nkaambo nzi?
[Mibuzyo yaciiyo]
[Zifwanikiso izili apeeji 9]
Mefiboseti wakaliyumya kubulema bwakwe, kubejelezyegwa alimwi akukutyompwa
[Cifwanikiso icili apeeji 11]
Nehemiya wakaliyumya nokuba kuti wakali kukazyigwa