Ikulwana “Bumvwa Mumubili”

“Lulakuzulila luzyalo lwangu.”—2 BA-KORINTO 12:9.

1, 2. (a) Ino nkaambo nzi ncotuteelede kunyongana akaambo kakusikilwa masunko alimwi amapenzi? (b) Ino nkaambo nzi ncotuteelede kutyompwa ciindi notwasikilwa masunko?

“NCOBENI boonse abo bayanda kupona cakululama muli-Kristo Jesu mbobayoopenzegwa.” (2 Timoteo 3:12) Ino nkaambo nzi ncocili boobo? Nkaambo kakuti Saatani waamba kuti, bantu balamubelekela Leza akaambo kakuliyanda, aboobo uyanda kuti kaambo aaka kalibonye mbuli kuti nkamasimpe. Jesu wakabacenjezya baapostolo bakwe basyomeka kuti: “Saatani wazumizigwa kuti akuyunge mbuli maila.” (Luka 22:31) Jesu wakalizyi kuti Leza ulamuzumizya Saatani kuti atusunke kwiinda mukubelesya mapenzi aakatazyide. Pele eeci tacaambi kuti kufwumbwa penzi ndyotwajana lizwa kuli Saatani naa kumadaimonaakwe pe. (Mukambausi 9:11) Pele Saatani ulilibambilide kubelesya kufwumbwa cintu ncakonzya kutegwa tucileke kusyomeka.

² Ibbaibbele litwaambila kuti, tatweelede kunyongana pe akaambo kamasunko aatusikila. Kufwumbwa cintu catusikila tacili ceenzu kulindiswe pe naa kuti ambweni inga twati tatucilangili. (1 Petro 4:12) Mubwini, “mapenzi aya ngaonya alasikila kubunyina [bwesu] bwakumasi oonse.” (1 Petro 5:9) Sunu, Saatani uli mukupenzya kapati kufwumbwa mubelesi wa Leza. Diabolosi umvwa kabotu notuli mumapenzi aali mbuli bumvwa. Ikutegwa acite oobu, ubelesya bweende bwakwe bwazintu kutegwa buyungizye kucisa ‘kwabumvwa ibuli mumubili wesu.’ (2 Ba-Korinto 12:7) Pele, ikulwana kwa Saatani takweelede kunyonyoona lusyomo lwesu pe. Mbubwenya mbuli Jehova ‘mbwayootupa nzila yamaccijilo’ kutegwa tuliyumye, uyoocita mbubwenya ciindi notwasikilwa makatazyo aali mbuli bumvwa mumubili.—1 Ba-Korinto 10:13.

Mbotukonzya Kulwana Bumvwa

3. Ino mbuti Jehova mbwaakamwiingula Paulo ciindi naakalomba kuti amugusye bumvwa mumubili?

³ Imwaapostolo Paulo wakalomba Leza kuti agusye bumvwa mumubili wakwe. “Nkabela ndakakumbila kotatwe ku-Mwami nkaambo kacintu eci, kuti cindizwide.” Ino Jehova wakaingula buti kukulomba kwa Paulo kwakusinizya? “Lulakuzulila luzyalo lwangu, nkaambo inguzu zyangu zilaswiililika loko mukati kabukompami.” (2 Ba-Korinto 12:8, 9) Lino atubulange-lange bwiinguzi oobu akubona mbuli mbobukonzya kutugwasya mukulwana mapenzi aali mbuli bumvwa aatusikila.

4. Ino mmuunzila nzi Paulo mbwaakagwasyigwa aluzyalo lwa Jehova?

 ⁴ Amubone kuti Leza wakakulwaizya Paulo kulumba luzyalo ilwakapedwe kale kulinguwe kwiinda muli Kristo. Ee, Paulo wakalilongezyedwe kale munzila zinji. Jehova caluyando wakamuzumizya kuti abe acoolwe cakuzyikuba sikwiiya wa Jesu, nokuba kuti wakali ciindilizyide kukazya batobeli ba Jesu. (Incito 7:58; 8:3; 9:1-4) Kumane boobo, Jehova calubomba wakapa Paulo milimo alimwi azyoolwe zyamumulimo zikkomanisya. Iciiyo kulindiswe cilalibonya kabotu aawa. Nomuba muziindi zikatazya ncobeni, tucijisi zilongezyo nzyotweelede kulumba. Imasunko ngotusikilwa taatupi kuluba bubotu bunji Jehova mbwatondezya kulindiswe.—Intembauzyo 31:19.

5, 6. (a) Ino mbuti Jehova mbwaakayiisya Paulo kuti inguzu zya Leza ‘zilalondoka mubukompami’? (b) Ino mbuti cikozyanyo ca Paulo mbocitondezya kuti Saatani mmubeji?

⁵ Iluzyalo lwa Jehova lulalibonya kuti ndunji munzila aimbi. Inguzu zya Leza nzinji kapati cakunga zilakonzya kutugwasya mbuli mbokuyandika kutegwa tuzwidilile mukulwana mapenzi. (Ba-Efeso 3:20) Jehova wakayiisya Paulo kuti nguzu zya Leza ‘zilalondoka mubukompami.’ Munzila nzi? Caluyando, wakapa Paulo inguzu nzyaakali kuyandika kutegwa alwane masunko. Kumane boobo, ikuliyumya kwa Paulo alimwi akusyoma Jehova cakumaniina kwakatondezya kuti inguzu zya Leza zyakali kuyaa buzunda mumuntu ooyu wakakompeme alimwi sizibi. Lino amuyeeye buyo eeci mbuli mbocakamucima Diabolosi, kayi walo waamba kuti bantu balakonzya kumubelekela Leza ikuti naa kabakkede kabotu alimwi kabatasikilwi mapenzi. Lusyomo lwa Paulo lwakakozyenyi buyo akuuma sikubejelezya lubayi kumeso!

⁶ Lino ngooyu Paulo iwakali mulongwe wa Saatani ciindi nobakali kulwana Leza, iwakacizwida nzunzu buya kupenzya Banakristo, imu Farisi musungu, kakunyina kudooneka iwakakkede kabotu akaambo kakuti wakazyalilwa mumukwasyi uuvwubide. Lino Paulo wakali kubelekela Jehova alimwi Kristo kali “muniini wabo baapostolo boonse.” (1 Ba-Korinto 15:9) Akaambo kakuba boobo, wakalibombya kubweendelezi bwa Kabunga Keendelezya ka Banakristo bamumwaanda wamyaka wakusaanguna. Alimwi wakali kuliyumya cakusyomeka nokuba kuti wakajisi bumvwa mumubili. Nokuba kuti Saatani wakamupenzya, imasunko aakamusikila kunyina naakapa kuti busungu bwa Paulo bumane pe. Paulo kunyina naakaluba bulangizi mbwaakali kuzoojana ibwakutola lubazu a Kristo mu Bwami bwakujulu. (2 Timoteo 2:12; 4:18) Kwakanyina bumvwa nibucisa buti bwakakonzya kucesya busungu bwakwe. Ibusungu bwesu abwalo abuzumanane kuyuma mbuli bbwe luuma! Kwiinda mukutuyumya mumasunko, Jehova ulatupa coolwe caalubazu icakugwasya kutondezya kuti Saatani mmubeji ncobeni.—Tusimpi 27:11.

Ibubambe bwa Jehova Bulayandika Kapati

7, 8. (a) Ino nkwiinda munzila nzi Jehova mbwapa nguzu kubabelesi bakwe sunu? (b) Ino nkaambo nzi kubala Bbaibbele alimwi akwiiya ncoziyandika kapati kutegwa tukonzye kulwana bumvwa ibuli mumubili?

⁷ Sunu Jehova ulabapa nguzu Banakristo basyomeka kwiinda mumuuya uusalala, mu Jwi lyakwe alimwi amubunyina bwa Bunakristo. Mbubwenya mbuli bwakacita Paulo, tulakonzya kubikka makani eesu oonse mumaanzaa Jehova. (Intembauzyo 55:22) Nokuba kuti Leza takonzyi kwaagusya masukusyo lino, ulakonzya kutupa busongo kutegwa tukonzye kwaalwana, naaba yaayo buya aakatazya kuliyumya mulingawo. Alimwi Jehova ulakonzya kutupa nguzu—“inguzu zigambya” ikutegwa atugwasye.—2 Ba-Korinto 4:7.

⁸ Ino lugwasyo luli boobo tulutambula munzila nzi? Tweelede kubala Jwi lya Leza lyoonse nkaambo mulindilo tuyoojana luumbulizyo lwini-lwini. (Intembauzyo 94:19) Mu Bbaibbele, tulabala majwi aayetezya aababelesi ba Leza ibakali kulomba lugwasyo kuzwa kuli Leza. Ikwiingula kwa Jehova, ikanjikanji kulabikkilizyaa majwi aakuumbulizya, aaya ayelede kuba ngamakani ngotuzinzibala kuyeeya. Ikwiiya kuyootupa nguzu nkaambo, “inguzu zigambya zilazwa kuli-Leza, tazizwi kulindiswe tubeni pe.” Mbubwenya mbuli mbotulya cakulya cakumubili abuzuba kutegwa tujane busani alimwi anguzu, mbotweelede kulya zili mu Jwi lya Leza lyoonse. Sena tulacicita eeci? Ikuti naa tulacita oobo, eelyo tuyoobona kuti ikutambula “inguzu zigambya”  kulatugwasya kuliyumya kubumvwa bwacikozyanyo ibukonzya kutuyasa lino.

9. Ino mbuti ibaalu mbobakonzya kukulwaizya baabo ibali mumapenzi?

⁹ Ibaalu Banakristo bayoowa Leza bali “mbuli macijilo aakulivuna kumuuwo” alimwi “aciyubilo cakucijila ciindi cakuwidwa imvula yamu[w]o” wamapenzi. Ibaalu bayanda kuzuzikizya ibupanduluzi oobu bwakasololelwaa muuya, cakulibombya balamulomba Jehova kuti abape “lulimi lwabayiide” kutegwa bazyibe mbobeelede kwiingula baabo bapengede amajwi aali kabotu. Imajwi aabaalu ali mbuli imvwula iiwa kabotu-kabotu akutontozya alimwi akuumbulizya mizeezo yesu ciindi notuli mumapenzi mapati. Kwiinda mukwaambaula ‘cakuumbulizya baabo batyompedwe,’ ibaalu masimpe balabakulwaizya banyina alimwi abacizi bakumuuya balo ibali mukukatala naa kutyompwa akaambo kabumvwa mumibili yabo.—Isaya 32:2; 50:4; 1 Ba-Tesalonika 5:14.

10, 11. Ino mbuti babelesi ba Leza mbobakulwaizya baabo ibali mukupenzyegwa amasunko aakatazya?

¹⁰ Babelesi ba Jehova boonse bali mucibeela camukwasyi uukamantenyi wa Bunakristo. Inzya, “tuli mubili omwe” buyo alimwi “tuleelede kuyandana umwi aumwi.” (Ba-Roma 12:5; 1 Johane 4:11) Ino mbuti mbotuzuzikizya mulawo ooyu? Kweelana alugwalo lwa 1 Petro 3:8, tulacita oobo kwiinda ‘mukuba amoyo omwe, kweetelelana akuyandana kwabunyina alimwi aluzyalo’ kulibaabo boonse mbotuswaangenyi limwi mulusyomo. Kujatikizya baabo ibali mukupenzyegwa abumvwa bumwi mumubili, kufwumbwa naa mbana naa mbapati, toonse tulakonzya kubalanganya munzila yeelede. Munzila nzi?

¹¹ Tweelede kusola kububikkila maano mbobalimvwa kujatikizya penzi ndyobajisi. Ikuti naa katutali basibuuya, batabikkili maano naa batayanzani ambabo, tulakonzya kubayungizyila mapenzi aabo cakutazyiba. Ikwaazyiba masukusyo ngobajisi, kweelede kutupa kucenjela kujatikizya zintu nzyotwaamba, mbotuzyaamba alimwi ambotucita. Ikucita zintu zyeelede alimwi zikulwaizya kulakonzya kutugwasya kucesya kucisa kwabumvwa ibuli mukubakatazya. Tulakonzya kuba bantu babayumya-yumya kapati.—Ba-Kolose 4:11.

Ibantu Basyomeka Mbobakaliyumya Akuzwidilila

12-14. (a) Ino Munakristo umwi wakacita buti kutegwa alwane bulwazi bwakkansa? (b) Ino mbuti banyina abacizi bakumuuya mbobakamugwasya alimwi akumukulwaizya?

¹² Mbotuyaabuswena kumamanino kwamazuba aamamanino, ‘imapenzi’ aya buyungizyigwa buya abuzuba. (Matayo 24:8) Aboobo, masukusyo alalangilwa kusikila umwi aumwi uukkala anyika, ikapati babelesi ba Jehova basyomeka balo ibasola kucita kuyanda kwakwe. Mucikozyanyo, amulange-lange kujatikizya Munakristo umwi uubeleka mulimo waciindi coonse. Wakajanwa kuti ulijisi bulwazi bwakkansa,  aboobo kwakayandika kuti tubeela tubamba mate alimwi atukoto twamitoke yamunkumbwi zigusyigwe kwiinda mukupandulwa. Walo alimwi amulumaakwe nobakazyiba kuti ulijisi bulwazi oobu, cakufwambaana bakapaila mupailo wakulomba kuli Jehova kwaciindi cilamfwu. Mukaintu wakwe wakaamba kuti, ikukkalikana nkobatakali kuyeeyela kwakabasikila. Nokuba boobo, wakaliyumya muziindi zimwi zibotu azikatazya, ikapati kupenzi lyakatobela naakamana kusilikwa.

¹³ Ikutegwa acikonzye kupona mubukkale ibuli boobu, mucizi ooyu wakasola kwiiya mbuli mbwakonzya kujatikizya bulwazi oobu bwakkansa. Wakali kubabuzya bamadokotela bakwe. Mu Ngazi Yamulindizi, Galamukani! alimwi amabbuku aambi aa Bunakristo, wakajana zibalo zitondezya mbuli bantu bamwi mbobakaliyumya kubulwazi oobu. Alimwi wakabala zibalo zimwi zya Bbaibbele izitondezya mbuli inguzu Jehova nzyajisi zyakukonzya kuyumya bantu bakwe nobali mumapenzi alimwi amakani aambi buyo aagwasya.

¹⁴ Icibalo cimwi cijatikizya kulwana mapenzi cakatondezya majwi aabusongo aakuti: “Uulipambukanya ulayandaula zisusi zyakwe mwini.” (Tusimpi 18:1) Aboobo, cibalo eeci cipa lulayo lwakuti: “Mutani kulipambukanyi.” * Imucizi ooyu uluula kuti: “Ibanji bakali kundaambila kuti balandipailila; bamwi bakali kunduumina luwaile. Ibaalu bobilo bakali kuumya luwaile lyoonse kutegwa bazyibe mbondilimvwide. Ndakali kutambula maluba alimwi amakkaadi manji kapati. Mane bamwi bakali kundijikila azyakulya. Alimwi banji bakalisungula kunditola kukusilikwa.”

15-17. (a) Ino mbuti Munakristo umwi mbwaakakonzya kuliyumya kubuyumuyumu bwakaboola akaambo kantenda yamumugwagwa? (b) Ino aabo ibali mumbungano bakamugwasya buti?

¹⁵ Mubelesi umwi wa Jehova wakabeleka kwaciindi cilamfwu ku Mexico mu U.S.A., wakajanika muntenda yamumugwagwa kwaziindi zyobilo. Mukaintu ooyu wakalicisa munsingo alimwi amumakuko, ikuyungizya apenzi ndyaakajisi kale lyabulwazi bwa arthritic (ibulwazi bwamumanungu aazifwuwa) bwakali kumukatazya kwamyaka iinda ku 25. Uluula kuti: “Ndijisi penzi lyakwiimikizya kabotu mutwe nokuba kunyamuna cintu cilema makilogilamu obilo. Pele kupaila lyoonse kuli Jehova kwandiyumya kapati. Azyalo zibalo zya Ngazi Yamulindizi nzyotwakaiya. Cibalo cimwi cakaamba kujatikizya bbuku lya Mika 6:8 kuti, ikweenda a Leza cakulibombya caamba kuzyiba aumwi mpagolela muzintu zyakonzya kucita. Eeci cakandigwasya kapati ikuzyiba kuti nokuba kuti ndili mubukkale bukatazyide, tandeelede kutyompwa pe, nokuba ciindi ncondakali kumanina mumulimo cakali cisyoonto kweelana ambundakali kuyanda. Ikumubelekela katujisi makanze aali kabotu ncecintu ciyandika kapati.”

¹⁶ Alimwi wakaamba kuti: “Ibaalu bakali kundilumbaizya akaambo kakusoleka nkundakali kucita kwakujanika kumiswaangano alimwi akuunka mumulimo wamumuunda. Bana-bana bakali kundaanzya kwiinda mukundigwambatila. Ibabelesi bapainiya bakali kubikkila maano kapati alimwi bakali kubamba ciindi cabo kabotu muziindi nondakali kuciswa kapati akutakonzya kuunka mumuunda. Ikuti naa tiikwaca kabotu, bakali kunditoleezya munyendo zyabo zyakupilukila naa kuziiyo zyabo zya Bbaibbele. Mbwaanga tiindakali kukonzya kunyamuna cibbeeke camabbuku, sikumwaya wakali kubikka mabbuku aangu mucibbeeke cakwe notwakali kuunka mumulimo wakukambauka.”

¹⁷ Amubone mbuli baalu bamumbungano alimwi abasyominyina mbobakagwasya bacizi aaba bobilo kuliyumya kumalwazi aabo aali mbuli bumvwa. Bakacita zintu zigwasya, calubomba kutegwa bazuzikizye ziyandika zyakumuuya, kumubili alimwi akumizeezo. Sena eeci tacimukulwaizyi kuti mugwasye bakwesu alimwi bacizi ibajisi mapenzi? Nywebo nobana andinywe inga mwabagwasya aabo ibajisi bumvwa mumibili yabo ibali mumbungano.—Tusimpi 20:29.

18. Ino nkukulwaizya kuli buti nkotukonzya kujana muzibalo zyaamba buumi bwabantu bamwi zimwaigwa mumamagazini aa Ngazi Yamulindizi alimwi a Galamukani!?

¹⁸ Imamagazini aa Ngazi Yamulindizi alimwi  a Galamukani! amwaya makani aamba buumi bwa Bakamboni aabo balo ibakalwana alimwi bacilwana amapenzi mubuumi. Mbomuyaabubala zibalo zili boobo, muyoobona kuti bunji bwabanyoko alimwi abacizi kuzunguluka nyika yoonse baliyumya mupenzi lyakubula mali, kufwidwa bayandwa mumanyongwe alimwi amuziindi zyankondo. Bamwi baciswa malwazi aapa kulemana. Ibantu banji tabakonzyi kucita zintu zimwi zyuuba-uba mubuumi zyalo ibantu bapona kabotu nzyobakonzya kucita. Imalwazi aabo apa kuti ube musunko mupati ikapati ciindi naatakonzyi kubapa kuti kabatola lubazu mumilimo ya Banakristo mbuli mbobayanda. Elo kaka balalumba kulugwasyo banyina alimwi abacizi ndobapa nobaba bana naa bapati!

Kuliyumya Kuletela Lukkomano

19. Nkaambo nzi Paulo ncaakakonzya kukkomana nokuba kuti wakajisi masukusyo alimwi akukompama ikuli mbuli bumvwa?

¹⁹ Paulo wakakkomana naakabona mbuli Leza mbwaakamukulwaizya. Wakaamba kuti: “Ndalikankaizizya makompami aangu cakukondwa, kuti inguzu zya-Kristo zindipopele. Kaako makompami azyuumo amapakasyo amapenzi amamanikizi, ezi zyoonse buyo ndazibotelwa nkaambo ka-Kristo, ikuti ciindi ncinkompeme nciconya ncindi singuzu.” (2 Ba-Korinto 12:9, 10) Akaambo kazintu zyakamucitikila, Paulo wakaamba boobu: “Teensi kwaamba kuti mbulide cintu, pe, nkaambo ndicibwene kulibamba kabotu kufumbwa kubusena nkumbede. Ndikuzi kulifwiinsya, ndikuzi kulivubya. Koonse koonse amuziyanza zyoonse ndiiyide kupona kabotu, nimuba mukukuta nimuba mukufwa inzala, nimuba mukulivubya nimuba mukulitengwaanya. Zintu zyoonse buyo ndazikonzya nkaambo kanguzu nzimpedwe kuli-Kristo.”—Ba-Filipi 4:11-13.

20, 21. (a) Ino nkaambo nzi ncotukonzya kujana lukkomano kwiinda mukuzinzibala kuyeeya ‘zintu zitabonwi’? (b) Ino zimwi ‘zyazintu zitabonwi’ nzyomulangila kuyoobona munyika ya Paradaiso zili buti?

²⁰ Aboobo, kwiinda mukuliyumya mubumvwa bwacikozyanyo ibuli mumubili wesu, tulakonzya kujana lukkomano lunji kwiinda mukutondezya bantu boonse kuti nguzu zya Jehova zilalondoka mukukompama kwesu. Paulo wakalemba kuti: “Nsikonzyi kutyompokelwa. . . pele buntu bwesu bwamukati buya bulengululwa mazuba oonse. Nkaambo mapenzi esu maubauba aakaindi kaniini alainda kutucitila bulemu bupati loko butamani, ikuti meso esu [taalabili] . . . zitabonwa, nkaambo zintu . . . zitabonwa nzeziteeli.”—2 Ba-Korinto 4:16-18.

²¹ Ibunji bwabantu ba Jehova sunu balangila kuyoopona mu Paradaiso yakwe alimwi akuyookkomana azilongezyo nzyaakasyomezya. Izilongezyo zili boobo zilakonzya kwaambwa kuti ‘zitabonwi’ kulindiswe sunu. Nokuba boobo, ciindi eeco ciyaabuswena afwaafwi cakuti tukalibonene buya ameso zilongezyo eezyo, ee, akukkomana anzyizyo kukabe kutamani. Cimwi cazilongezyo eezyo ciyooba kukatalukwa kwakutalangila kupona buumi bujisi mapenzi aali mbuli bumvwa! Mwanaa Leza ‘uyoojaya milimo ya-Saatani’ alimwi ‘akumwaya ooyo uujisi nguzu zyalufwu, nkokuti Saatani.’—1 Johane 3:8; Ba-Hebrayo 2:14.

22. Ino ncinzi ncotweelede kusyoma alimwi akukanza kucita?

²² Aboobo kufwumbwa naa mbumvwa ibuli buti butuyaside sunu, atuzumanane kubulwana. Mbubwenya mbuli Paulo, tuyoojana nguzu zyakukonzya kucita boobo kwiinda muli Jehova, walo uutupa inguzu cabuuya. Twaakukkala munyika ya Paradaiso, tuyoomulongezya Jehova Leza abuzuba akaambo kamilimo yakwe njaakatucitila.—Intembauzyo 103:2.

Bupanduluzi buyungizidwe

Ino Inga Mwaingula Buti?

• Nkaambo nzi alimwi mbuti Diabolosi mbwasoleka kumana lusyomo lwa Banakristo bakasimpe?

• Ino mbuti nguzu zya Jehova ‘mbozilondoka mubukompami’?

• Ino mbuti baalu alimwi abamwi mbobakakonzya kukulwaizya baabo ibali mumapenzi?

[Mibuzyo yaciiyo]

[Cifwanikiso icili apeeji 13]

Ziindi zyotatwe Paulo wakapaila kuli Leza kutegwa amugusye bumvwa mumubili wakwe