Amuzumanane Kubelekela Jehova Amoyo Uukkede

“Moyo wangu [ulikkede], O Leza; moyo wangu [ulikkede].”—INTEMBAUZYO 57:7.

1. Nkaambo nzi ncotukonzya kusinizya mbuli bwakacita Davida?

JEHOVA ulakonzya kutugwasya kukkalikana mulusyomo lwa Bunakristo kutegwa tukakatile kulinguwe katuli babelesi bakwe balyaabide. (Ba-Roma 14:4) Aboobo, tulakonzya kusinizya mbuli bwakacita sintembauzyo Davida walo wakakulwaizyigwa kwiimba kuti: “Moyo wangu [ulikkede], O Leza.” (Intembauzyo 108:1) Ikuti naa moyo wesu ulikkede, tuyookulwaizyigwa kupona kweelana akulyaaba kwesu kuli Leza. Kwiinda mukulangila busolozi alimwi anguzu kuzwa kulinguwe, tulakonzya kuba bantu bazyandamenyi, bakanzide alimwi basinizyide katuli basilusyomo, ‘ibabikkide myoyo yabo lyoonse kumilimo ya Mwami.’—1 Ba-Korinto 15:58.

2, 3. Ino lulayo lwa Paulo lulembedwe mulugwalo lwa 1 Ba-Korinto 16:13 lutondezya nzi?

² Ikukulwaizya kwakacitwa kubatobeli ba Jesu bamumazuba aansiku baku Korinto, pele asunu kucibeleka ku Banakristo basunu, imwaapostolo Paulo wakaamba kuti: “Amu[cenje]le, mukakatile mulusyomo. Amube baalumi benibeni, muyume.” (1 Ba-Korinto 16:13) Mu Cigiliki malailile aaya woonse aambwa mumabala abelesyegwa kwaamba cintu cacitika aciindi eeco, aboobo akulwaizya kuzumanana kucita cintu. Ino lulayo oolu lutondezya nzi?

³ Tulakonzya ‘kucenjela’ munzila yakumuuya kwiinda mukukazya Diabolosi alimwi akuzumanana kuswenena kuli Leza. (Jakobo 4:7, 8) Ikusyoma Jehova kupa kuti tuzumanane kukamantana alimwi ‘akwiima cakutazungaana mulusyomo lwa Bunakristo.’ Swebo, kubikkilizya abamakaintu banji ibali akati kesu balazumanana ‘ikuba mbuli baalumi beni-beni’ kwiinda mukubelekela Leza cabusungu kabali basikwaambilizya Bwami. (Intembauzyo 68:11) Tulakonzya ‘kuyuma’ kwiinda mukuzumanana kulanga kuli Taateesu wakujulu kuti atupe nguzu zyakubelesya kucita kuyanda kwakwe.—Ba-Filipi 4:13.

4. Ino ncinzi cakatusololela kusikila kulubbapatizyo kutegwa tube Banakristo?

 ⁴ Twakatondezya kuti twazumina kasimpe ciindi notwakalyaaba cakumaniina kuli Jehova alimwi akutondezya kulyaaba kwesu kwiinda mukubbizyigwa mumeenda. Pele ino ncinzi cakatusololela kusikila kukubbapatizyigwa? Cakusaanguna, twakajana luzibo lwini-lwini lwa Jwi lya Leza. (Johane 17:3) Eeci cakayumya lusyomo akutukulwaizya kuti tweempwe, ikutondezya kuusa kumicito yesu mibi njotwakacita musyule. (Incito 3:19; Ba-Hebrayo 11:6) Icakatobela twakasanduka, nkaambo twakaileka milimo yesu mibi kutegwa tutalike kupona buumi bweendelana akuyanda kwa Leza. (Ba-Roma 12:2; Ba-Efeso 4:23, 24) Ikucita boobu kwakatobelwa amupailo wakulyaaba camoyo woonse kuli Jehova. (Matayo 16:24; 1 Petro 2:21) Twakalomba ikuba amanjezeezya aasalala kuli Leza, eelyo twakabbapatizyigwa ikutondezya kulyaaba kwesu kulinguwe. (1 Petro 3:21) Ikuyeeya ntaamo eezyi, kuyootugwasya kuzumanana kuyandisya kusolekesya ikupona kweelana akulyaaba kwesu alimwi akuzumanana kubelekela Jehova amoyo uukkede.

Amuzumanane Kuyandaula Luzibo Lwini-Lwini

5. Ino nkaambo nzi ncotweelede kuzumanaa kujana luzibo lwamu Magwalo?

⁵ Ikutegwa tupone kweelana akulyaaba kwesu kuli Leza, tweelede kuzumanana kujana luzibo lwamu Magwalo luyumya lusyomo. Elo kaka cakali kukkomanisya ikujana cakulya cakumuuya ciindi notwakakazyiba kasimpe ka Leza ciindi cakusaanguna! (Matayo 24:45-47) “Zilyo” eezyo, zyakali kunona kapati alimwi zyakatupa busani munzila yakumuuya. Lino cilayandika kapati kuzumanaa kulya cakulya cijisi busani cakumuuya kutegwa tuzumanane ikuba amoyo uukkede mbotuli babelesi ba Jehova ibalyaabide.

6. Ino mbuti mbokuboneka kuti mbomwakagwasyigwa kapati kutegwa mutalike kulumba kasimpe ka Bbaibbele camoyo woonse?

⁶ Kuyandika kusolekesya kutegwa tujane luzibo lwamu Magwalo alumbi. Cili mbuli kuyandaula lubono lusisidwe—icintu ciyandika kuzwida nkasaalo buya kutegwa cijanike. Elo kaka cilagwasya kujana “luzibo lwa-Leza”! (Tusimpi 2:1-6) Ciindi sikwaambilizya Bwami naakali kwiiya Bbaibbele andinywe, ambweni wakabelesya bbuku lya Luzibo Lutola Kubuumi Butamani. Kweelede kuti mwakabelesya ciindi cili mbocibede ikutegwa mumanizye cibalo cimwi acimwi, antela ziindi ziinda aali comwe buya. Mwakagwasyigwa ciindi magwalo naakali kubalwa alimwi akubandikwa. Ikuti naa kaambo tiimwakakamvwisya, kakali kupandululwa. Ngomwakali kwiiya limwi Bbaibbele wakali kulibambila kabotu, kupailila muuya wa Leza alimwi akumugwasya kutegwa mutalike kulumba kasimpe camoyo woonse.

7. Ino ncinzi icipa kuti muntu ayelele kuyiisya bantu bamwi kasimpe ka Leza?

⁷ Ikusoleka ooku kwakali kweelela kapati nkaambo Paulo wakalemba kuti: “Oyo uuiya uleelede kwaabilana zintu zibotu zyoonse ayooyo uumwiisya.” (Ba-Galatiya 6:6) Aawa cibalo camu Cigiliki citondezya kuti njiisyo zya Jwi lya Leza zyakanjila mumizeezo alimwi amumoyo wamuntu ooyo ‘wiiya.’ Ikuyiisyigwa munzila iili boobo kupa kuti mweelele ikuba sikuyiisya bamwi. (Incito 18:25) Ikutegwa muzumanane kupona mbuli muntu uulyaabide, mweelede kubamba buumi bwanu bwakumuuya alimwi akutazungaana kwiinda  mukuzumanana kwiiya Jwi lya Leza.—1 Timoteo 4:13; Tito 1:13; 2:2.

Amuyeeye Ciindi Nimwakeempwa Alimwi Akusanduka

8. Ino inga cakonzyeka buti kuzumanana azyeelelo zyabunaleza?

⁸ Sena mucikuyeeyede kukatalukwa nkomwakaba ankuko ciindi nomwakaiya kasimpe, nomwakeempwa alimwi akuziba kuti Leza wamulekelela kwiinda mulusyomo lwanu lwamu cipaizyo ca Jesu cacinunuzyo? (Intembauzyo 32:1-5; Ba-Roma 5:8; 1 Petro 3:18) Masimpe kuti tamulombozyi kujokela kubuumi bwakucita zibi pe. (2 Petro 2:20-22) Cintu cimwi cikonzya kumugwasya kuzumanana akulilemeka munzila yabunaleza akupona kweelana akulyaaba kwanu alimwi akuzumanana kubelekela Jehova cakusyomeka, nkupaila lyoonse kuli Jehova.—2 Petro 3:11, 12.

9. Mbwaanga twakaileka milimo mibyaabi, ino ninzila nzi njotweelede kutobela?

⁹ Mbwaanga mwakasanduka akwiileka milimo mibi, amuzumanane kuyandaula lugwasyo lwa Leza kwiinda mukukkazika moyo wanu lyoonse. Kaindi mwakali kweendela mumugwagwa uutaluzi, pele mbwaanga mwakalanga amaapu iiluzi, mwakatalika kweendela mumugwagwa weelede. Mutaleyi kuzwa mumugwagwa ooyu lino pe. Lyoonse kamusyoma mubusolozi bwa Leza alimwi kamukanzide kuba mumugwagwa usololela kubuumi.—Isaya 30:20, 21; Matayo 7:13, 14.

Mutalubi Ncokwaamba Kulyaaba Alimwi Akubbapatizigwa Kwanu

10. Ino twaambo nzi totweelede kuyeeya lyoonse tujatikizya kulyaaba kwesu kuli Leza?

¹⁰ Tamweelede kuluba kuti mwakalyaaba kuli Jehova mumupailo, kamuzyi kuti munakubeleka mulimo cakusyomeka kukabe kutamani. (Juda 20, 21) Ikulyaaba caamba kubikkwa alubazu naa kwaandanyizyigwa akaambo kamakanze aasetekene. (Levitiko 15:31; 22:2) Ikulyaaba kwenu tiicakali cizuminano cakaindi kasyoonto buyo ncimwakapangana abantu balya maila pe. Kwakali kulyaaba kwaciindi coonse ku Mwami Wakujulu Aansi alimwi akupona kweelana akulyaaba ooko kuyandika kusyomeka kuli Leza mubuumi boonse. Inzya, kufwumbwa naa ‘tucipona nokuba kufwa, tuli ba Jehova.’ (Ba-Roma 14:7, 8) Ilukkomano lwesu luyeeme akulibombya kukuyanda kwakwe alimwi akuzumanana kumubelekela amoyo uukkede.

11. Ino nkaambo nzi ncomweelede kuyeeya lubbapatizyo lwanu alimwi amboluyandika kapati?

¹¹ Lyoonse kamuyeeya lubbapatizyo lwanu kacili citondezyo cakulyaaba kwanu kuli Leza camoyo woonse. Tiimwakasungilizyigwa buya kuti mubbapatizyigwe pe, mwakalisalila buya mulikke. Sena lino mulikanzide kutondezya kuyanda kwanu kweelana akuyanda kwa Leza mubuumi bwanu boonse? Mwakalomba kuba amanjezeezya mabotu kuli Leza, mpoonya mwakabbapatizyigwa ikutondezya kulyaaba kwanu kulinguwe. Amuzumanane amanjezyeezya aayo kupona kweelana akulyaaba kwanu, eelyo muyootambula zilongezyo zya Jehova.—Tusimpi 10:22.

Iluyandisisyo Lwanu Lulayandika Kapati

12, 13. Ino mbuti kuyanda kwesu mbokuswaangenyi akulyaaba kwesu alimwi akubbapatizyigwa?

¹² Masimpe, ikulyaaba alimwi akubbapatizyigwa kwaleta zilongezyo zinji kapati kutuulunzuma twabantu munyika yoonse mbwiizulwa. Ciindi notutondezya kulyaaba kwesu kuli Leza kwiinda mukubbapatizyigwa mumeenda, milimo yesu yakaindi mibi ilafwa, pele luyando lwesu talufwi pe. Katuli basyomi bayiisyidwe kabotu, twakazumanana akuyanda kwesu kwiinda mukulyaaba kuli Leza mumupailo kumane boobo twakabbapatizyigwa. Ikulyaaba akubbapatizyigwa kuyanda kuti tuzyibe kuyanda kwa Leza alimwi akulisalila kukucita. (Ba-Efeso 5:17) Aboobo ikucita boobo inga twayiya Jesu walo wakacita kuyanda kwakwe ciindi naakaleka mulimo wakwe wakubeza akulyaaba alimwi akulipa lwakwe  cakumaniina mukucita kuyanda kwa Taateesu wakujulu.—Intembauzyo 40:7, 8; Johane 6:38-40.

¹³ Jehova Leza wakaambide kuti Mwanaakwe wakali ‘kuzoolondoka kwiinda mukupenga.’ Aboobo Jesu wakatondezya kuyanda kwakwe cakusyomeka kutegwa aliyumye mumapenzi aakamusikila. Ikutegwa acikonzye kucita boobo, wakapa “zilombyo akukumbila cakoongolola amisozi kuli Leza. . . . Eelyo nkaambo kakuti Jesu wakalitesya akulipa, Leza wakamuswiilila.” (Bahibulu 2:10, 18; 5:7, 8, Ci) Ikuti naa twatondezya kuyoowa Leza cakumaniina kuli boobu, andiswe mbubwenya ‘tuyooswiililwa’ alimwi tuyooba masimpe kuti Jehova uyootupa kuba bantu bakkalikenyi katuli Bakamboni bakwe ibalyaabide.—Isaya 43:10.

Mulakonzya Kuzumanana Kukkazika Moyo

14. Ino nkaambo nzi ncotweelede kubala Bbaibbele abuzuba?

¹⁴ Ino ncinzi cikonzya kumugwasya kuzumanana kukkazika moyo akupona kweelana akulyaaba kwanu kuli Leza? Ikutegwa muzumanane kujana luzibo luyungizyidwe lwa Jwi lya Leza, muleelede kubala Bbaibbele abuzuba. Eeci ncecintu “muzike musyomesi uucenjede” lyoonse ncatukulwaizya  kucita. Ilulayo luli boobu lulapegwa nkaambo ikupona kweelana akulyaaba kwesu kuyanda kuti tuzumanane kweenda mukasimpe ka Leza. Ikuti mbunga ya Jehova yalemba njiisyo zyakubeja, ilulayo lwakubala Bbaibbele inga tiilwapegwa pe kuli Bakamboni ba Jehova alimwi akulibaabo mbobakambaukila.

15. (a) Ino ncinzi ciyandika kulanga-langa ciindi notusala zyakucita? (b) Ino nkaambo nzi ncotukonzya kwaamba kuti mulimo wakumubili utobela buya kumulimo wa Bunakristo?

¹⁵ Ciindi nomusala zintu zyakucita, lyoonse mweelede kulanga-langa mbuli zintu nzyomwasala mbozikonzya kukunyonganya kuzuzikizya kulyaaba kwenu kuli Jehova. Eeci cilakonzya kujatikizya mulimo wanu wakumubili. Sena muli mukusola kuti umugwasye kuyaambele mubukombi bwakasimpe? Nokuba kuti bunji bwabasikunjizya milimo bajana kuti Banakristo balyaabide balasyomeka alimwi mbankutwe, pele alimwi balabona kuti Bakamboni ba Jehova tabali bantu bayandisya zintu zyanyika alimwi akuti tabali bantu ibajisi bukkale bwakuzundana abamwi mumasena akuyandisya kujana mpindu pe. Eeci cili boobu akaambo kakuti mbaakani ya Bakamboni taili yakujana lubono, mpuwo, kweendelezya alimwi anguzu pe. Kulibaabo ibapona kweelana akulyaaba kwabo, icintu cipati kuli mbabo nkucita kuyanda kwa Leza. Imulimo wakumubili uubagwasya kujana zintu ziyandika ngwakuyungizya buyo kauli mubusena bwabili kuzintu ziyandika kapati. Mbubwenya mbuli ibwakali mwaapostolo Paulo, imulimo wabo mupati, mmulimo wa Bunakristo. (Incito 18:3, 4; 2 Ba-Tesalonika 3:7, 8; 1 Timoteo 5:8) Sena zintu zya Bwami mulazibikka mubusena bwakusaanguna mubuumi bwanu?—Matayo 6:25-33.

16. Ino ncinzi ncotukonzya kucita ikuti naa kulibilika kuyanda kupa kuti tutaponi kweelana akulyaaba kwesu kuli Leza?

¹⁶ Ibamwi bakali kulangilwa kuzundwa akulibilika nobatakaninga kwiiya kasimpe. Elo kaka bakakkomana mumoyo akulumba alimwi akuyanda Leza ciindi nobakajana bulangizi bwa Bwami! Ikuyeeyesya kujatikizya lugwasyo ndobakajana kuzwa ciindi eeco, kulakonzya kubagwasya kupona kweelana akulyaaba kwabo kuli Jehova. Kulubazu lumwi, ino mbuti ikuti naa kulibilika akaambo kamapenzi kwatalika kuboneka mbuli kuti kuyanda kunyonganya “nkani ya-Leza,” mbubwenya mbuli mamvwa mbwaakonzya kupa kuti munsonje utakomeni kabotu kusikila kukusima? (Luka 8:7, 11, 14; Matayo 13:22; Marko 4:18, 19) Ikuti mwabona kuti cintu cili boobo catalika kucitika kulindinywe naa kumukwasyi wanu, amwaabikke makani aaya mumaanza aa Jehova akupailila kuti akamugwasye ikuba aluyando alimwi akuba bantu balumba. Ikuti makani aanu woonse mwaabikka mumaanza aakwe, uyoomuyumya alimwi akumupa nguzu kutegwa muzumanane kumubelekela cakukkomana amoyo uukkede.—Intembauzyo 55:22; Ba-Filipi 4:6, 7; Ciyubunuzyo 2:4.

17. Ino mbuti mbocikonzyeka kuliyumya mumasunko?

¹⁷ Kamuzumanana kupaila kuli Jehova Leza lyoonse mbubwenya mbuli mbomwakali kupaila ciindi nomwakali kulyaaba. (Intembauzyo 65:2) Ciindi nomwasunkwa kucita cintu cibi antela nomwasikilwa musunko mupati, amuyandaule busolozi bwa Leza alimwi alugwasyo lwakwe kutegwa mulutobele. Amuyeeye mbuli mboluyandika lusyomo, nkaambo sikwiiya Jakobo wakalemba kuti: “Na nkwali akati kanu uubula busongo, akumbile kuli-Leza, uubaabila boonse cabuuya acakutatongauka, nkabela ulabupegwa. Pele akumbile cakusyoma, atalimbululi akaniini, nkaambo uulimbulula ulikozyene amankwisita aalwizi aaululuka akutontwa amuuwo. Muntu uuli boobo atayeeyi kupegwa cintu ku-Mwami, pe, nkaambo ulijisi myoyo yobile, ulapilauka mukweenda kwakwe koonse.” (Jakobo 1:5-8) Ikuti naa musunko waboneka kuti uyanda kumuzunda, tweelede kwaasyoma makani aakuti: “Taakwe lutepauzyo lumusikila cita mbuli matepauzyo ngibajana bantu lyoonse, alimwi Leza wasyomeka, ikuti takoozoozumina kuti mutepaulwe kwiinda inguzu zyanu, pele antoomwe alutepauzyo ulacita cipolelo, kuti mukabe alukolelo.”—1 Ba-Korinto 10:13.

18. Ino ncinzi ncotukonzya kucita ikuti naa cibi cipati ncotwakacita cakusisikizya catalika kutola aansi makanze eesu aakupona kweelana akulyaaba kwesu kuli Jehova?

¹⁸ Ino mbuti ikuti manjezeezya aanu ali mukumukatazya akaambo kacibi ncomwakacita cakusisikizya alimwi akutola aansi ikupona kwanu cakweelana akulyaaba kwanu kuli Leza? Ikuti naa mweempwa, mulakonzya kujana luumbulizyo  mukuziba kuti Jehova ‘takasampauli moyo uupengede akweempwa.’ (Intembauzyo 51:17) Amuyandaule lugwasyo kuzwa kubaalu Banakristo, kamuzyi kuti mbwaanga abalo bayiya Jehova, tabakakuubyi-ubyi kulombozya kwanu kupilusya cilongwe canu a Taateesu wakujulu. (Intembauzyo 103:10-14; Jakobo 5:13-15) Mpoonya anguzu zipya zyakumuuya alimwi amoyo uukkede, muyookonzya kululamika nzila zyanu kutegwa mweendele mumo akupa kuti cuubaube kupona kweelana akulyaaba kwanu kuli Leza.—Ba-Hebrayo 12:12, 13.

Amuzumanane Kubeleka Amoyo Uukkede

19, 20. Ino nkaambo nzi ncociyandika kuzumanana kupona kweelanaa kulyaaba kwesu?

¹⁹ Mumazuba aano aakatazya, tweelede kusolekesya kupona kweelana akulyaaba kwesu akuzumanana kubelekela Leza amoyo uukkede. Jesu wakati: “Oyo uuliyumya kusikila kumamanino uzoofutuka.” (Matayo 24:13) Mbwaamba tupona “kumazuba aakumamanino,” mamanino alakonzya kusika kufwumbwa ciindi. (2 Timoteo 3:1) Kunze lyaboobo, kunyina wesu uuzyi kuti tunoocili bazumi cifwumo. (Jakobo 4:13, 14) Aboobo cilayandika kapati kaka ikuzumanana kupona kweelana akulyaaba kwesu!

²⁰ Mwaapostolo Petro wakaakankaizya makani aaya mulugwalo lwakwe lwabili. Wakatondezya kuti mbubwenya mbuli bantu batali banaleza mbobakanyikila Muzambangulwe, ayalo nyika yacikozyanyo naa ciinga cabantu babyaabi mbobayoonyonyoonwa ‘mubuzuba bwa Jehova.’ Aboobo, Petro wakaankamana ulaamba: “Nywebo muleelede kuba bantu bali buti mukweenda munzila iisalala amukulemeka Leza”! Alimwi wakakulwaizya kuti: “Nomuyandwa, mbomweezi kale aya, amukalicenjezye kuti mutalengwawidwi kulweeno lwabataka akujatuluzigwa kukujatila kwanu.” (2 Petro 3:5-17) Elo kaka cilausisya ikuti muntu uubbapatizyidwe waleya alimwi akunyonyooka akaambo kakwaalilwa kukkazika moyo!

21, 22. Ino mbuti majwi aali ku Intembauzyo 57:7 mbwaalibonya kuba masimpe kuzintu zyakacitikila Davida alimwi a Banakristo bakasimpe?

²¹ Ikukanza kwanu kupona kweelana akulyaaba kwanu kuli Leza kulakonzya kuyumizyigwa ikuti kamubuyeeya buzuba mbomwakabbapatizyigwa alimwi akuyandaula lugwasyo kutegwa nzyomwaamba anzyomucita kazikkomanisya moyo wakwe. (Tusimpi 27:11) Jehova kunyina natyompya bantu bakwe pe, aboobo tweelede kusyomeka kulinguwe. (Intembauzyo 94:14) Wakatondezya luse alimwi alweetelelo kwiinda mukunyonganya mizeezo yabasinkondonyina Davida alimwi akumuvwuna. Akaambo kakulumba zintu eezyi nzyaakacitilwa, Davida wakaambilizya kujatikizya kwiima kwakwe cakutazungaana alimwi aluyando lwakwe kuli yooyo Wakamuvwuna. Kakkomenyi kapati, wakaimba kuti: “Moyo wangu [ulikkede], O Leza; Moyo wangu [ulikkede]. Njooimba akutembaula.”—Intembauzyo 57:7.

²² Mbubwenya mbuli Davida, Banakristo bakasimpe kunyina nobatyompwa mukukomba Leza pe. Myoyo yabo kiikkede, balangila kuvwunwa alimwi akukwabililwaa Jehova, walo ngobaimbila nyimbo zyakutembaula. Ikuti moyo wanu kuukkede, lyoonse unoosyoma muli Leza alimwi kwiinda mulugwasyo lwakwe muyookonzya kuzuzikizya kulyaaba kwanu. Masimpe, mulakonzya kuba mbuli muntu “uululeme” walo sintembauzyo ngwaakaimba kuti: “Tayoowi makani mabi pe; moyo wakwe uliimvwi nji, nkaambo ulasyoma Jehova. Moyo wakwe ulikede, takonzyi kuyoowa.” (Intembauzyo 112:6, 7) Kwiinda mukuba alusyomo muli Leza, mulakonzya kupona kweelana akulyaaba kwanu akuzumanana kubelekela Jehova amoyo uukkede.

Sena Muciyeeyede?

• Ino nkaambo nzi ncotweelede kuzumanana kujana luzibo lwini-lwini lwa Bbaibbele?

• Ino nkaambo nzi ncotweelede kuyeeya kweempwa alimwi akusanduka nkotwakacita?

• Ino ikuyeeya kulyaaba alimwi akubbapatizyigwa kwesu inga kwatugwasya buti?

• Ino ncinzi cikonzya kutugwasya kuzumanana kubelekela Jehova amoyo uukkede?

[Mibuzyo yaciiyo]

[Cifwanikiso icili apeeji 28]

Sena muli mukubamba buumi bwanu bwakumuuya kwiinda mukubala Jwi lya Leza abuzuba?

[Zifwanikiso izili apeeji 28]

Ikucita mulimo wa Bunakristo kuba ngomupati kulatugwasya kuzumanana kubelekela Jehova amoyo uukkede