Kristo Ulaisololela Mbungano Yakwe

“Amulange, ndaba anywe mazuba oonse nikuba kusikila kumamanino aaciindi.”—MATAYO 28:20.

1, 2. (a) Ciindi naakali kupa malailile kuli basikwiiya bakwe, ino ncinzi Jesu wakabusyigwa kuzwa kulufwu ncaakasyomezya basikumutobela? (b) Ino mbuti Jesu mbwaakali kusololela mbungano ya Banakristo yakusaanguna?

KATANAUNKA kujulu, Jesu Kristo Musololi wesu wakabusyigwa kuzwa kulufwu, wakalibonya kuli basikwiiya bakwe akubaambila kuti: “Ndapegwa bwami boonse nibuba bwakujulu nibuba bwaansi. Nkaambo kaako kamuya mukabaiisye bantu bamisyobo yoonse, akubabapatizya muzina lya-Taata alya-Mwana alya-Muuya Uusalala, alimwi amubaiisye kuti bajatisye makani oonse ngendakamulailila. Amulange, ndaba anywe mazuba oonse nikuba kusikila kumamanino aaciindi.”—Matayo 23:10; 28:18-20.

² Jesu tanaakapa buyo basikwiiya bakwe mulimo wakufwutula iwakugwasya bantu kuba basikwiiya pe, pele alimwi wakasyomezya kuti unooli ambabo. Makani aajatikizya Banakristo bakusaanguna kweelana ambokulembedwe mu Bbaibbele kubbuku lya Incito, lilatondezya caantangalala kuti Kristo wakali kubelesya bweendelezi oobu mbwaakapegwa kusololela mbungano eeyi yakazwa akutalisyigwa. Wakatumina “Mugwasyi” ngwaakasyomezyede—imuuya uusalala kutegwa ubayumye basikumutobela alimwi akubasololela muzintu nzyobakali kusola kucita. (Johane 16:7; Incito 2:4, 33; 13:2-4; 16:6-10) Jesu wakabusyigwa kuzwa kulufwu wakabelesya bangelo kutegwa babayumye-yumye basikwiiya bakwe. (Incito 5:19; 8:26; 10:3-8, 22; 12:7-11; 27:23, 24; 1 Petro 3:22)  Kunze lyaboobo, Musololi wesu wakacita bubambe bwakusololela mbungano kwiinda mukubikka baalumi beelela kuti babeleke mukabunga keendelezya.—Incito 1:20, 24-26; 6:1-6; 8:5, 14-17.

3. Ino ntwaambo nzi tutiibandikwe mucibalo eeci?

³ Pele ino mbuti kujatikizya ciindi cesu cino, “[ca]kumamanino aaciindi”? Ino mbuti Jesu Kristo mbwasololela mbungano ya Banakristo sunu? Alimwi ino mbuti mbotukonzya kutondezya kuti tulabuzumina busolozi bwakwe?

Mwami Ulijisi Muzike Musyomesi

4. (a) Ino mbaani ibali mukabunga “[ka]muzike musyomesi uucenjede”? (b) Ino ncinzi Mwami ncaakabikka mumaanza aamuzike kuti acilanganye?

⁴ Ciindi naakali kusinsima kujatikizya citondezyo cakuba kwakwe mubwami, Jesu wakaamba kuti: “Nguni muzike musyomesi uucenjede ngwaakakazika mwami wakwe kuti abe mwami wabo basiŋanda bakwe, abaabile zilyo zyabo kuciindi ceelede. Uli acoolwe muzike oyo, mwami wakwe asika, ngwazoojana ulacita obo. Ncobeni ndamwaambila kuti uzoomukazika kuti abe mupati wazintu zyoonse nzyajisi.” (Matayo 24:45-47) “Mwami” waambwa aawa Musololi wesu Jesu Kristo alimwi wakasala “muzike musyomesi uucenjede”—ikabunga ka Banakristo bananike kali anyika ikalanganya zintu zyoonse zyaanyika.

5, 6. (a) Mucilengaano ncaakabona mwaapostolo Johane, ino “zibikilo zyamalampi zyangolida zili musanu azibili” alimwi “anyenyeezi zili musanu azibili” ziiminina nzi? (b) Ino ikuba “[kwa]nyenyeezi zili musanu azibili” kujanza lyalulyo lya Jesu kutondezya nzi?

⁵ Ibbaibbele kubbuku lya Ciyubunuzyo litondezya kuti muzike musyomesi uucenjede uleendelezyegwa cacigamininaa Jesu Kristo. Mucilengaano “[ca]buzuba bwa-Mwami,” mwaapostolo Johane wakabona “zibikilo zyamalampi zyangolida zili musanu azibili, alimwi akati kazibikilo ezyo ndakabona umwi uuli mbuli Mwana a-Muntu” walo “wakalijisi inyenyeezi zili musanu azibili.” Naakali kupanduluda Johane kujatikizya cilengaano eeci, Jesu wakati: “Makani aasisidwe aanyenyeezi zili musanu azibili nziwakabona mujanza lyangu lyalulyo, azibikilo zyamalampi zili musanu azibili. Inyenyeezi zili musanu azibili mbobaangelo bambungano zili musanu azibili.”—Ciyubunuzyo 1:1, 10-20.

⁶ “Zibikilo zyamalampi zili musanu azibili” zitondezya mbungano zya Banakristo bakasimpe izili ‘mubuzuba bwa Mwami’ bwakatalika mu 1914. Pele ino mbuti kujatikizya “nyenyeezi zili musanu azibili”? Kumatalikilo zyakali kwiiminina bananike basalidwe, ibalangizi bananike bamumbungano zyamumwaanda wamyaka wakusaanguna. * Ibalangizi bakali kujanza lyalulyo lya Jesu—nkokuti nguwakali kubasololela. Inzya, Jesu Kristo wakali kubasololela boonse aabo ibakali munkamu eeyo. Nokuba boobo, sunu balangizi bananike mweelwe wabo musyoonto kapati. Ino mbuti Kristo mbwacikonzya kusololela mbungano ziinda ku 93,000 zya Bakamboni ba Jehova nyika yoonse mbwiizulwa?

7. (a) Ino mbuti Jesu mbwali mukubelesya Kabunga Keendelezya kusololela mbungano nyika yoonse mbwiizulwa? (b) Ino nkaambo nzi ncotukonzya kwaamba kuti balangizi Banakristo balasalwa amuuya uusalala?

⁷ Mbubwenya mbuli mbocakabede mumwaanda wamyaka wakusaanguna, kakamu  kabaalumi balangizi beelela ibakazwa akati kabananike balabeleka kabali mu Kabunga Keendelezya, ikwiiminina muzike musyomesi uucenjede. Musololi wesu ubelesya Kabunga Keendelezya kusala baalumi beelela—kufwumbwa naa mbananike naa pe—ikuti babe baalu mumbungano zili mumasena oomo mobakkala. Kujatikizya makani aaya, muuya uusalala Jehova ngwaakazumizya Jesu kuti aubelesye ulijisi mulimo mupati. (Incito 2:32, 33) Cakusaanguna, aaba balangizi beelede kusika azyeelelo ziyandika izili mu Jwi lya Leza lyakasololelwa amuuya uusalala. (1 Timoteo 3:1-7; Tito 1:5-9; 2 Petro 1:20, 21) Kulumbaizya alimwi akusala kulacitwa kumamanino aamupailo alimwi kulasololelwa amuuya uusalala. Kunze lyaboobo, muntu wasalwa ulapa citondezyo kwiinda mukutondezya micelo yamuuya. (Ba-Galatiya 5:22, 23) Aboobo lulayo lwa Paulo luleelela akwalo kubaalu kufwumbwa naa mbananike naa pe ilwakuti: “Amujatisye, lwanu nobeni, abutanga boonse mbuumubika Muuya Uusalala.” (Incito 20:28) Baalumi aaba basalidwe balatambula busolozi kuzwa ku Kabunga Keendelezya alimwi cakulisungula balayeembela kabotu mbungano. Kwiinda munzila eeyi, Kristo uli akati kesu lino alimwi uli mukusololela mbungano.

8. Ino mbuti Kristo mbwabelesya bangelo kusololela basikumutobela?

⁸ Alimwi Jesu ulabelesya bangelo kusololela basikumutobela sunu. Kweelana acikozyanyo camaila alimwi ansaku, kutebula kuyoocitwa “kumamanino aaciindi.” Ino Mwami uyoobelesya bani mukutebula? Kristo wakaamba kuti: “Batebuzi mbibaangelo.” Wakayungizya kuti: “Mwana a-Muntu uzootuma baangelo bakwe kuti bazoobunge zintu zyoonse zyamu-Bwami bwakwe zilebya, abalo bacita ziteelede.” (Matayo 13:37-41) Kunze lyaboobo, mbubwenya mbuli mungelo mbwaakasololela Filipo kutegwa ajane muzibe waku Etiopiya, asunu nkozili zitondezyo zyakuti Kristo ulabelesya bangelo kusololela mumulimo wa Banakristo bakasimpe kujana baabo bajisi myoyo mibombe.—Incito 8:26, 27; Ciyubunuzyo 14:6.

9. (a) Ino Kristo ubelesya nzi nasololela mbungano ya Banakristo sunu? (b) Ino mubuzyo nzi ngotweelede kulanga-langa ikuti katuyanda kugwasyigwa abusolozi bwa Kristo?

 ⁹ Elo cilaumbulizya kaka ikuzyiba kuti Jesu Kristo ulabasololela basikwiiya bakwe sunu kwiinda mu Kabunga Keendelezya, mumuuya uusalala alimwi akubelesya bangelo! Nokuba kuti bakombi bamwi ba Jehova inga baandaana kwaciindi cisyoonto a Kabunga Keendelezya akaambo kakupenzyegwa naa twaambo tumwi tukozyenyi, Kristo ulakonzya kuzumanana kusololela kwiinda mukubelesya muuya uusalala alimwi akukulwaizyigwa abangelo. Nokuba boobo, tulakonzya kugwasyigwa abusolozi bwakwe ikuti naa tulabuzumina. Ino mbuti mbotukonzya kutondezya kuti tulabuzumina busolozi bwa Kristo?

“Kamubaswiililisya . . . Mulitesye”

10. Ino mbuti mbotukonzya kutondezya kuti tulababikkila maano baalu basalidwe mumbungano?

¹⁰ Musololi wesu wapa “zipego kubantu” mumbungano—“bamwi babe bakambausi, bamwi babe beembezi, bamwi babe bamayi.” (Baefeso 4:8, 11, 12, Ci) Mbotukkala ambabo alimwi ambotubacitila zintu kulatondezya kapati ikuti naa tulabuzumina busolozi bwa Kristo. Cilayandika kapati ‘ikuba amoyo uulumba’ kubaalumi aaba beelela munzila yakumuuya Kristo mbaakapa. (Ba-Kolose 3:15) Alimwi tweelede kubalemeka. Mwaapostolo Paulo wakalemba kuti: “Baalu abo beendelezya kabotu, abaindilile kulemekwa.” (1 Timoteo 5:17) Ino mbuti mbotukonzya kulumba alimwi akulemeka bapati nkokuti baalu naa balangizi ibali mumbungano? Paulo wiingula kuti: “Kamubaswiililisya baalu banu, mulitesye kulimbabo.” (Ba-Hebrayo 13:17) Inzya, tweelede kubaswiilila alimwi akulitesya kulimbabo alimwi akuzumina zintu nzyobaamba.

11. Nkaambo nzi ikulemeka baalu ncokuli nzila mbotu yakupona kweelana alubbapatizyo lwesu?

¹¹ Musololi wesu ulilondokede. Pele baalumi mbatupede kabali zipego balo tabalondokede pe. Aboobo ziindi zimwi balakonzya kulubizya. Pele cilayandika kapati ikuzumanana kusyomeka kububambe bwa Kristo. Mubwini, ikupona kweelana akulyaaba kwesu alimwi alubbapatizyo caamba ikuziba bweendelezi alimwi abaabo bakasalwa amuuya ibali mumbungano alimwi akulibombya cakulisungula kulimbubo. Ikubbapatizyigwa kwesu ‘muzina lyamuuya uusalala,’ nkutondezya caantangalala ikuti tuluuzyi muuya uusalala akuzuminizya kuti tuluuzyi mulimo nguujisi mumakanze aa Jehova. (Matayo 28:19) Ikubbapatizyigwa ooku caamba kuti tulazumina kubelekela aamwi amuuya alimwi akutacita zintu zikonzya kupa kuti kuutabeleki kabotu akati kabasikutobela ba Kristo. Mbwaanga muuya uusalala ulijisi mulimo mupati mukulumbaizya alimwi amukusala baalu, sena inga twaamba kuti tulasyomeka kukulyaaba kwesu ikuti katwaalilwa kweendelana abubambe bwakubikka baalu mumbungano?

12. Ino nzikozyanyo nzi Juda nzyapede zitondezya kutalemeka bweendelezi, alimwi ino zituyiisya nzi?

¹² Imagwalo alijisi zikozyanyo ziyiisya mbuli kulibombya mbokuyandika kapati. Kaamba baabo baamba cakusampaula baalumi basalidwe mumbungano, sikwiiya Juda wakaamba zikozyanyo zyotatwe zyakucenjezya naakati: “Maawe kulimbabo, nkaambo kakuti baleenda munzila ya-Kaini, balitakaanya kumulandu wa-Balamu cakuyandaula lubono, nkabela bafwa mukukazyanya kwa-Kor[a].” (Juda 11) Kaini wakaunduluzya lulayo lwa Jehova lwaluyando, eelyo wakalisalila kutobela nzila yabujayi alimwi yalusulo. (Matalikilo 4:4-8) Nokuba kuti wakacenjezyegwaa Leza cakwiinduluka-induluka, Balamu wakasola kusinganya bantu ba Leza kutegwa apegwe mali. (Myeelwe 22:5-28, 32-34; Deuteronomo 23:5) Kora wakalijisi mukuli wakwe mubotu mu Israyeli, pele kunyina naakakkutila pe. Wakatalika kuzangila mubelesi wa Leza Musa, muntu wiinda kubomba anyika. (Myeelwe 12:3; 16:1-3, 32, 33) Mapenzi akabasikila ba Kaini, Balamu alimwi Kora. Elo kaka zikonzyanyo eezyi zilatuyiisya kuti tweelede kuswiilila lulayo lwabaabo Jehova mbapede mukuli alimwi akubalemeka!

13. Ino nimpindu nzi musinsimi Isaya nzyaakasinsima nzyobakonzya kujana aabo balibombya kububambe bwakubikka baalu?

¹³ Ino nguni uutayandi kugwasyigwa abubambe bwabulangizi bwakatalisyigwaa Musololi wesu mumbungano zya Banakristo? Musinsimi Isaya wakasinsima kujatikizya lugwasyo lukonzya kujanika mubeendelezi naakati: “Amubone!  Kuyooba mwami uuendelezya mubululami abasilutwe babeteka cakululama. Umwi aumwi uyooba mbuli macijilo aakulivuna kumuuwo aciyubilo cakucijila ciindi cakuwidwa imvula yamuyoba. Uyooba mbuli tulongalonga twamaanzi munkanda injumu, mbuli cenzule campangala impati munyika iikataazya.” (Isaya 32:1, 2) Mwaalu umwi aumwi weelede kuba mbuli ‘maccijilo’ aakuyubila. Nokuba kuti kulibombya kubweendelezi nciyumu kulindiswe, atupailile kuba bantu balibombya akulitesya kubeendelezi bakabikkwaa Leza ibali mumbungano zyesu.

Ibaalu Mbubalibombya Kubusolozi bwa Kristo

14, 15. Ino mbuti aabo basololela mumbungano mbobatondezya kuti balalibombya kubusolozi bwa Kristo?

¹⁴ Munakristo woonse—ikapati baalu beelede kutobela busolozi bwa Kristo. Ibalangizi naa kuti baalu balijisi bweendelezi ibuli mbobubede mumbungano. Pele tabasoli kuba ‘abwami kulusyomo lwabasyominyina’ kwiinda mukweendelezya buumi bwabo pe. (2 Ba-Korinto 1:24) Ibaalu balatobela majwi aa Jesu aakuti: “Mulizi kuti baami babamasi babacitila kami-kami, abalo bapati babo babeendelezya. Pele kulindinywe takuli boobo pe.” (Matayo 20:25-27) Ibaalu nobayumuna mukuli wabo, balasoleka kubelekela bamwi camoyo omwe.

¹⁵ Banakristo bakulwaizyigwa kuti: “Kamubayeeya basolozi banu . . . Kamuyeeya mbobakali kukala balo, elyo kamwiilizya [naa kutobela] lusyomo lwabo.” (Ba-Hebrayo 13:7) Tacaambi kuti ibaalu baleelede kuyiigwa nkaambo mbasololi pe. Jesu wakaamba kuti: “Mujisi musololi omwe, walo uuli ngo [Kristo].” (Mateyo 23:10, Ci) Ilusyomo lwabaalu ndolweelede kuyiigwa nkaambo bayiya Musololi wesu wini Kristo. (1 Ba-Korinto 11:1) Amulange-lange nzila zimwi mbuli baalu mbobasola kuba mbuli Kristo kwiinda mucilongwe cabo ncobajisi abantu bamwi mumbungano.

16. Nokuba kuti wakalijisi bweendelezi, ino mbuti Jesu mbwaakabalanganya basikumutobela?

¹⁶ Nokuba kuti Jesu wakali sumpukide ikwiinda bantu batalondokede boonse alimwi wakalipedwe bweendelezi kuzwa kuli ba Wisi, tanaakali kuciindilizya naakali kulanganya basikwiiya bakwe pe. Kwiina naakali kunyonganya baswiilizi bakwe kwiinda mukutondezya luzibo ndwaakajisi cakulisumpula pe. Jesu wakatondezya kuti wakali kubikkila maano alimwi wakali siluzyalo kuli basikumutobela alimwi wakali kuzilanganya zintu nzyobakali kuyandika bantu. (Matayo 15:32; 26:40, 41; Marko 6:31) Kunyina naakali kulangila zintu basikwiiya bakwe nzyobatakali kukonzya kupa pe alimwi kwiina naakali kubapa mikuli njibatakonzyi kunyamuna. (Johane 16:12) Jesu wakali ‘bombede alimwi wakali mutete moyo.’ Aboobo, tacigambyi kumvwa kuti wakali muntu uukatalusya.—Matayo 11:28-30.

17. Ino mbuti baalu mbobabutondenzya bube bwa Kristo bwakutaciindilizya muzintu nzyobacitila bamwi mumbungano?

¹⁷ Ikuti naa Musololi Kristo tanaakali kuciindilizya, elo kaka aabo basololela mumbungano tabeelede kuciindilizya abalo! Ee, balicenjede kutegwa batabubelesyi buteelede bweendelezi mbubapedwe. Alimwi ‘tabalisongwaazyi’ kutegwa bakkomanisye bantu bamwi. (1 Ba-Korinto 2:1, 2) Muciindi caboobo, beelede kusoleka kwaamba majwi aakasimpe kamu Magwalo munzila nguba-uba alimwi cakusinizya. Alimwi baalu balasola kuba bantu bataciindilizyi muzintu nzyobayanda kuti bantu bamwi bacite alimwi akubikkila maano kuzintu nzyobayandika. (Ba-Filipi 4:5) Akaambo kakuti balizyi kuti boonse balijisi mpobagolela, caluyando balalanga-langa banyina mpobagolela akubeendelezya kabotu. (1 Petro 4:8) Sena ibaalu balibombya alimwi batete moyo tabakatalusyi? Masimpe balakatalusya.

18. Ino ncinzi baalu ncobakonzya kwiiya kuzwa kuli Jesu mbwaakalanganya bana?

 ¹⁸ Jesu wakali muntu ngubakali kukonzya kusikila bantu, nobaba bacete buya boonse. Amulange-lange mbuli mbwaakacita ciindi basikwiiya bakwe nobakabwentela bantu aabo “bakamuletela twana.” Jesu wakati: “Amuleke twana, tuze kulindime, mutatukasyi pe.” Eelyo “wakatubukata, watulongezya akutubikila maanza aakwe.” (Marko 10:13-16) Jesu wakali kusangalizya alimwi wakali siluse, aboobo bantu bamwi bakakwelelezyegwa kulinguwe. Bantu tiibakali kumuyoowa Jesu pe. Nibaba bana bakali kulimvwa kwaanguluka kulinguwe. Ibaalu abalo balatambula bantu alimwi ikuti naa kabatondezya kuti balasangalizya alimwi akuba basiluzyalo, bantu bamwi kubikkilizya abana balalimvwa kwaanguluka.

19. Ino ikubaa “miyeeyo ya-Kristo” kubikkilizya nzi, alimwi ino kuyandika kusoleka kuli buti?

¹⁹ Ibaalu balakonzya kumwiiya Jesu Kristo ikuti naa balimuzyi kabotu-kabotu. Paulo wakabuzya kuti: “Nguni uubwene miyeeyo ya-Jehova, [kuti akonzye kumulailila]?” Alimwi wakayungizya kuti: “Pele swebo tulijisi miyeeyo ya-Kristo.” (1 Ba-Korinto 2:16) Ikuba amizeezo ya Kristo caamba kuzyiba mbwayeeya alimwi abube bwakwe, kutegwa tuzyibe walo mbwakonzya kucita mubukkale bukozyenyi. Amuyeeye buyo kujatikizya makani aakuzyiba Musololi wesu kabotu-kabotu! Masimpe, eeci ciyandika kubikkila kapati maano kuzibalo zya Makani Mabotu alimwi lyoonse akuyeeya akumvwisya kujatikizya buumi alimwi acikozyanyo ca Jesu. Ciindi baalu nobasoleka kutobela busolozi bwa Kristo kusikila mpobakonzya, aabo ibali mumbungano balilibambilide kwiiya lusyomo lwabo. Alimwi ibaalu balakkalwa moyo kubona bamwi kabatobela ntaamo zyamu Musololi cakukondwa.

Amuzumanane Kusololelwaa Kristo

20, 21. Mbotulangila kunjila munyika mpya yakasyomezyegwa, ino ncinzi ncotweelede kukanza kucita?

²⁰ Cilayandika kapati kuti toonse tuzumanane kusololelwaa Kristo. Mbotuyaabuswena kumamanino abweende oobu bwazintu bubyaabi, ciimo ncotubede cilakonzya kukozyanyisyigwa acabana Israyeli nobakali mu Cibanda ca Moabu mumwaka wa 1473 B.C.E. Bakali amunyinza eeni aa Nyika Yakasyomezyegwa, eelyo kwiinda mumusinsimi Musa, Leza wakaambilizya kuti: “Nduwe [Joshua] ooyoonjizya bantu aba munyika Jehova njaakakonkezya kupa bamawisaabo.” (Deuteronomo 31:7, 8) Joshua ngowakali musololi wakasalidwe. Ikutegwa banjile mu Nyika Yakasyomezyegwa, bana Israyeli bakeelede kulibombya kubweendelezi bwa Joshua.

²¹ Kujatikizya ndiswe, Ibbaibbele litwaambila kuti: “Mujisi musololi omwe, walo uuli ngo [Kristo].” Kristo alikke nguuyootunjizya munyika mpya yakasyomezyegwa mwalo imuli bululami. (2 Petro 3:13) Aboobo, atukanze kulibombya kubusolozi mumbazu zyoonse zyabuumi bwesu.

Bupanduluzi buyungizidwe

Sena Inga Mwayeeya?

• Ino mbuti Kristo mbwaakali kusololela mbungano yakusaanguna?

• Ino mbuti Kristo mbwasololela mbungano yakwe sunu?

• Ino nkaambo nzi ncotweelede kulibombya kulibaabo basololela mumbungano?

• Ino mbuti baalu mbobatondezya kuti Kristo ngo Musololi wabo?

[Mibuzyo yaciiyo]

[Cifwanikiso icili apeeji 15]

Kristo uli mukusololela mbungano yakwe alimwi abalangizi ulibajisi mujanza lyakwe lyalulyo

[Cifwanikiso icili apeeji 16]

“Kamubaswiililisya baalu banu, mulitesye kulimbabo”

[Cifwanikiso icili apeeji 19]

Jesu wakali kusangalizya alimwi bantu bakali kukonzya kumusikila cakwaanguluka. Baalu Banakristo beelede kusoleka kwiiya nguwe