Mulakonzya Kwiiya Kufwumbwa Kamuli Bapati Kale
Mulakonzya Kwiiya Kufwumbwa Kamuli Bapati Kale
KSENIYA wakazyalwa mumwaka wa 1897. Wakalijisi bana basimbi botatwe amusankwa omwe, bazyukulu bali 15 alimwi abazyukululwa ibali 25. Mubuumi bwakwe boonse, wakali kucita zintu bazyali bakwe nzyobakamuyiisya. Nikuba kuti mucembele ooyu wakali ku Moscow kali muzangalisi akaambo kakuccija nkondo kucisi cakwabo ca Abkhaz Republic cilaakati-kati ka Lwizi lwa Lusiya alimwi a Caucasus, wakali nkomenyi mubuumi bwakwe ikapati akaambo kazyintu zyaakaiya kubazyali bakwe.
Mumwaka wa 1993, imwanaakwe musimbi wazina lya Meri wakazyikuba umwi wa Bakamboni ba Jehova. Meri wakatalika kubaambila banyina ba Kseniya kujatikizya Jehova Leza alimwi a Bbaibbele, pele tiibaayanda kumuswiilila. Kseniya wakali kumwaambila mwanaakwe lyoonse kuti, “Mebo ndilicembeede kale alimwi tandikonzyi kwiiya zintu zipya aciimo cino.”
Nikuba boobo, mwanaakwe musimbi Meri; amuka muzyukulu wakwe Londa; alimwi abazyukululwa bobilo ba Nana alimwi a Zaza boonse ibakali kale Bakamboni ba Jehova, bakazumanana kubaambila kujatikizya Bbaibbele. Bumwi buzuba ciindi camangolezya mumwaka wa 1999, bakababalila lugwalo ba Kseniya lwalo lwakabanjila mumoyo. Cakali cibalo cakajisi majwi aa Jesu aawumbulizya ngaakaamba kubaapostolo bakwe kujatikizya makani aakutalisya Mulalilo wa Mwami. (Luka 22:19, 20) Lino kabajisi myaka yakuzyalwa iili 102, ba Kseniya bakazumina kwiiya Bbaibbele mangolezya ngeena aayo.
Ba Kseniya bakati: “Ndapona myaka iili 102, lino ndamvwisya buumi ncobwaamba. Lino ndabona kuti taku cintu ciyandika kapati kwiinda kubelekela Jehova Leza wesu mubotu alimwi siluyando. Ndicili abuumi buli kabotu. Ndilakonzya kubala kakunyina kubelesya magilazi alimwi ndicicikonzya kwiinzya abamukwasyi bweelede.”
Mu November 5, 2000 ba Kseniya bakabbapatizyigwa. Bakati: “Lino ndaaba buumi bwangu kuli Jehova akumubelekela caluyando. Ndilaabila mamagazini alimwi amatulakiti kandikkede acitisyini camabbaasi cili afwiifwi aŋanda yangu. Bamukowa wangu balandiswaya, eelyo cakutangala ndilabaambila kasimpe kujatikizya Jehova.”
Ba Kseniya balabulindila buzuba oobo ciindi ‘lukanda lwabo noluya kuba lupya kwiinda lwamwana muvwanda alimwi nguzu zyabo zyabukubusi noziya kujokela mulimbabo.’ (Jobu 33:25) Ikuti mucembele uli boobu kacicikonzya kwiiya akubona buumi mbuli ncobwaamba kuzwa mu Bbaibbele, ino mbuti nywebo?