Sena Mulasyoma Kuti Kristo Ngumusololi Wesu?
Sena Mulasyoma Kuti Kristo Ngumusololi Wesu?
“Alimwi mutaitwi kuti basololi, nkaambo mujisi musololi omwe, walo uuli ngo [Kristo].”—MATEYO 23:10, Ci.
1. Ino nguni alikke buyo uli ngo Musololi wa Banakristo bakasimpe?
MWAKALI muli Bwabili mu Nisani 11. Kwakaceede buyo mazuba otatwe kuti Jesu Kristo ajayigwe. Oolu ndulwakali lweendo lwamamanino lwakuswaya kutempele. Buzuba oobu, Jesu wakayiisya makani aayandika kapati kunkamu yabantu bakabungene kubusena ooko alimwi abasikwiiya bakwe. Wakaamba kuti: “Pele nywebo mutaitwi kuti mwiiyi pe, nkaambo mulijisi mwiiyi omwe, nkabela nywebo nyoonse muli babunyina. Alimwi mutaiti muntu naba omwe ansi ano kuti Taata, nkambo mulijisi Uso omwe, ooyo uuli kujulu. Alimwi mutaitwi kuti basololi, nkaambo mujisi musololi omwe, walo uuli ngo [Kristo].” (Mateyo 23:8-10, Ci) Cilasalala kuti Jesu Kristo ngo Musololi wa Banakristo bakasimpe.
2, 3. Ino kuswiilila Jehova alimwi akuzumina Musololi ngwaakasala inga kwatugwasya buti mubuumi bwesu?
2 Elo kaka busololi bwa Jesu bulagwasya mubuumi bwesu ikuti naa twabuzumina! Kasinsima kujatikizya kuboola kwa Musololi ooyu, Jehova Leza wakaamba boobu kwiinda mumusinsimi Isaya: “Nyoonse nimufwa nyota, amuboole kumaanzi. Alakwe oyo uubula mali aze. Amuboole, muule, mulye. Amuboole, muule waini amalili. Zyoonse tazyuulwi mali, tazijisi muulo pe. . . . Amuswiililisye majwi aangu, mulye cilyo cibotu, myoyo yanu ikondwe kukusaninwa zintu zilweela. . . . Ngonguwe ngundabika kuti abe kamboni kumisyobo yabantu, musolozi asilutwe kubantu.”—Isaya 55:1-4.
3 Isaya wakabelesya zintu zyamingwele zijanika-janika mbuli maanzi, mukupa alimwi awaini—kazibelesya mumaambilambali kwaamba mbuli mbotugwasyigwa ikuti naa twaswiilila Jehova alimwi akutobela Musololi alimwi a Silutwe ngwatupede. Tulalimvwa kukatalukwa kapati. Cili mbuli kuti twanywa meenda aatontola siko nokupya kapati. Inyota yesu yakasimpe alimwi aya bululami ilamana. Mbubwenya mbuli mukupa mbuuyumya bana alimwi akubagwasya kuti bakomene, ‘imukupa wajwi’ ulatuyumya alimwi ulagwasya mukukomezya cilongwe cesu munzila yakumuuya a Leza. (1 Petro 2:1-3) Nguni uukonzya kukazya kuti waini tuupi muntu kuti akkomane ciindi capobwe? Mbubwenya buyo, ikukomba Leza wakasimpe alimwi akutobela Musolozi ngwaakasala kuyoopa kuti buumi bube ‘bwakusekelela.’ (Deuteronomo 16:15) Aboobo cilayandika kuti toonse—ibana alimwi abapati, baalumi alimwi abamakaintu batondezye kuti balasyoma kuti Kristo ngomusololi wesu. Pele, ino mbuti mbotukonzya kutondezya mubuumi bwesu kuti Mesiya ngo Musololi wesu?
Nobakubusi—Amuzumanane ‘Kukomena Mubusongo’
4. (a) Ino ncinzi cakacitika ciindi Jesu kajisi myaka yakuzyalwa iili 12 naakaswaya ku Jerusalemu lya Pasika? (b) Ino mbuti Jesu mbwaakayiisyidwe kabotu kajisi buyo myaka yakuzyalwa iili 12?
4 Amulange-lange cikozyanyo Musololi wesu ncaakatondezya kubana-bana. Nokuba kuti tatuzyibidwe twaambo tunji tujatikizya Jesu naakacili mwana, icakacitika comwe ciyubununa zinji. Ciindi Jesu naakajisi myaka yakuzyalwa iili 12, bazyali bakwe bakamutoleezya mulweendo lwabo ndobakali kweenda amwaka kuya ku Jerusalemu ku Pasika. Muciindi ncimunya eeci, wakoongwa amubandi wamu Magwalo, eelyo bamukwasyi wakwe bakamusiya kakunyina kuzyiba. Nokwakainda mazuba aali otatwe, ibazyali bakwe ba Josefa alimwi a Mariya bakanyongana kapati, pele nibakapilukila bakazyi kumujana mutempele “ulikede akati kabaiyi, ulabaswiilila akubabuzya.” Kunze lyaboobo, “boonse abakamuswiilila bakayoowa kukuziba kwakwe akukuvuwa kwakwe.” Amubone buyo aawa kuti wakajisi buyo myaaka zyakuzyalwa iili 12, pele Jesu tanaakali kubuzya buyo mibuzyo iijatikizya zintu zyakumuuya iipa kukkala ansi akuyeeya pe, pele alimwi wakali kupa bwiinguzi cabusongo! Kakunyina kudooneka, wakagwasyigwa akuyiisya kwabazyali bakwe.—Luka 2:41-50.
5. Ino mbuti bakubusi mbobakonzya kulilanga-langa akubona mbuli mbobacibona ciiyo ca Bbaibbele camukwasyi?
5 Ambweni mucili bakubusi. Ikuti naa bazyali banu kabali babelesi ba Leza balyaabide, kweelede kuti kuli pulogilamu yaciiyo ca Bbaibbele camukwasyi muŋanda yanu. Ino mucibona buti ciiyo camukwasyi? Sena tamukonzyi kuyeeya kujatikizya mibuzyo mbuli yakuti: ‘Sena bubambe oobu bwaciiyo camukwasyi ndilabubikkila maano camoyo woonse? Sena tuleendelana ambubo kwiinda mukutacita zintu zimwi zikonzya kubunyonganya bubambe oobu?’ (Ba-Filipi 3:16) Sena ndilatola lubazu bweelede muciiyo? Ikuti kwayandika, sena ndilabuzya mibuzyo kujatikizya ciiyo eeco alimwi akupa bwiinguzi kumakani aabandikwa mbwaakonzya kubelesyegwa? Mbondiyaabuya ambele, sena ndilasoleka kuyandisya ‘zilyo ziyumu zyabantu bakakomena?’—Ba-Hebrayo 5:13, 14.
6, 7. Ino pulogilamu yakubala Bbaibbele abuzuba iyandika buti kubakubusi?
6 Ipulogilamu yakubala Bbaibbele abuzuba ayalo ilayandika kapati. Sintembauzyo wakaimba kuti: “Ngusicoolwe uuteendi mululayo lwababi, . . . Pele ulakondelelwa Mulao wa-Jehova, amulao wakwe ulauyeeya lyoonse masiku asikati.” (Intembauzyo 1:1, 2) Joshua iwakanjila mubusena bwa Musa, wakali ‘kubikka mizeezo yakwe lyoonse kubbuku lyamulawo isikati amasiku.’ Eeci cakapa kuti acite zintu camaanu alimwi akuzwidilila mukubeleka milimo njaakapegwaa Leza. (Joshua 1:8) Musololi wesu Jesu Kristo wakaamba kuti: “Kulilembedwe kuti, Teensi insima ilike njaaponena muntu, ulaponena amajwi oonse aazwa kumulomo wa-Leza.” (Matayo 4:4) Ikuti katuyanda cakulya cakumubili abuzuba, elo kaka kuyandisya cakulya cakumuuya kulainda kuyandika lyoonse!
7 Naakazyiba nzyaakali kuyandika munzila yakumuuya, Nicole ulaamyaka yakuzyalwa iili 13 wakatalika kubala Bbaibbele abuzuba. * Naakakkwanya myaka yakuzyalwa iili 16, musimbi ooyu wakalilimanide kale kulibala Bbaibbele lyoonse, lino wakali akati-kati kwiinduluka buya alimwi. Nzila njaakali kubelesya ninguba-uba. Waamba kuti: “Ndilabona kuti ndabala caandaano comwe abuzuba.” Ino kubala Bbaibbele abuzuba kwamugwasya buti? Wiingula kuti: “Ikuyungwa kucita zintu zibi mazubaano kulidumide kapati. Abuzuba ndilayungwa kucikolo amumbazu zimbi buyo kwalo kupa kuti kube buyumuyumu mulusyomo lwangu. Ikubala Bbaibbele abuzuba kulandigwasya kufwambaana kuyeeya ncolilailila alimwi anjiisyo zili mu Bbaibbele zalo zindikulwaizya kukaka kuyungwa kuli boobu. Akaambo kakucita boobu, ndilimvwa kuti ndili afwaafwi a Jehova alimwi a Jesu.”
8. Ino Jesu wakajisi cilengwa nzi kutempele, alimwi ino mbuti bakubusi mbobamwiiya?
8 Jesu wakajisi cilengwa cakuswiilila alimwi akutola lubazu mukubala Magwalo mucikombelo. (Luka 4:16; Incito 15:21) Elo cilagwasya kaka kubakubusi kutobela cikozyanyo eeci kwiinda mukujanika lyoonse kumiswaangano ya Banakristo kwalo Bbaibbele nkolibalwa alimwi akuyiigwa! Ikulumba miswaangano iili boobo, Richard uujisi myaka yakuzyalwa iili 14 waamba kuti: “Miswaangano ilayandika kapati kulindime. Kumiswaangano lyoonse ndilayeezyegwa cintu cibotu alimwi acibi, ikulilemeka kabotu alimwi akutalilemeka, cintu ceendelana amilimo ya Kristo alimwi aciteendelani. Tandilindili kuti ccita buya mane candicitikila cintu cibi nkokuya ndileke pe.” Ee, “Bukamboni bwa-Jehova bulasyomeka, bulasongwaazya batezi.” (Intembauzyo 19:7) Nicole awalo wakakaamba kaambo nkakona aaka ikakujanika kumiswaangano yoonse yaambungano ansondo. Alimwi ulamana mawoola obilo naa otatwe kulibambila miswaangano.—Ba-Efeso 5:15, 16.
9. Ino mbuti bakubusi mbobakonzya kuzumanana ‘kukomena mubusongo’?
9 Myaka yabukubusi njemyaka mibotu yakujana ‘luzibo lwini-lwini lwa Leza alimwi alwa Jesu Kristo ngwaakatuma.’ (Johane 17:3) Ambweni mulibazyi buya ibakubusi ibamana ciindi cili mbocibede kubala mabbuku ajisi makani naa zintu zisesya, kulangilila cipekupeku, zisobano zyaavidiyo naa kulingaula mu Internet. Tamweelede kwiiya bana aaba pe nkaambo mulijisi kale cikozyanyo cilondokede ca Musololi wesu. Kacili mulombe buyo, wakakondwa kwiiya kujatikizya Jehova. Ino ncinzi cakatobela? Akaambo kakuyanda zintu zyakumuuya, “Jesu wakakomena mubusongo aciimo.” (Luka 2:52) Andinywe mulakonzya kuba boobo.
‘Kulibombya Kuli Umwi Amweenzinyina’
10. Ino ncinzi ciyoogwasya mukwasyi kuti ube busena bujanika luumuno alimwi alukkomano?
10 Iŋanda ilakonzya kuba busena bubotu bwaluumuno alimwi bulakonzya kuba busena bwakukazyanya akulwanina lyoonse. (Tusimpi 21:19; 26:21) Ikuzumina busolozi bwa Kristo kulagwasya mukuleta luumuno alimwi alukkomano mumukwasyi. Cikozyanyo ca Jesu mubwini cilatondezya mbuli mukwasyi mboweelede kumvwana. Imagwalo aamba kuti: “A[mulibombye] umwi aumwi kumweenzinyina cakulemeka Kristo. Nubanakazi, amulibombye kubalumi banu mbuli mbumulibombya kuli-Leza. Nkaambo mulumi ngumutwe wamukakwe, mbubonya mbuli Kristo mbwali mutwe wambungano, alimwi ngumuvuni wamubili. . . . Nobalumi, amuyande banakazi banu, mbuli Kristo mbwaakayanda imbungano akulyaaba nkaambo kanjiyo.” (Ba-Efeso 5:21-25) Kumbungano yaku Kolose, mwaapostolo Paulo wakaamba kuti: “Banike amuswiilile bazyali banu mumakani oonse, nkaambo kucita obo nkokubotezya Mwami.”—Ba-Kolose 3:18-20.
11. Ino mbuti mwaalumi mbwakonzya kutondezya kuti ulabusyoma busolozi bwa Kristo?
11 Ikutobela lulayo oolu cipandulula kuti mwaalumi nguweelede kusololela mumukwasyi, imukaintu wakwe kamugwasyilizya cakusyomeka, ibana kabamvwida bazyali babo. Nokuba boobo, busilutwe bwamwaalumi bulakonzya kuleta lukkomano ikuti naa kabweendelezyegwa kabotu. Mwaalumi musongo ulaiya mbweelede kucita busilutwe bwakwe kwiinda mukwiiya Mutwe wakwe walo uli ngo Musololi wakwe Jesu Kristo. (1 Ba-Korinto 11:3) Nokuba kuti Jesu wakazooba “simutwe wazintu zyoonse kumbungano,” wakaboola anyika ‘kutali kuzyoobelekelwa, pele wakaboola kuti abeleke.’ (Ba-Efeso 1:22; Matayo 20:28) Mbubwenya buyo, mwaalumi Munakristo weelede kucita busilutwe bwakwe kutali munzila yakuliyanda pe, pele kwiinda mukulanganya zintu ziyanda mukaintu abana bakwe—nkokuti mukwasyi woonse. (1 Ba-Korinto 13:4, 5) Ulasola kwiiya bube bwa Leza walo uuli ngomutwe wa Jesu Kristo. Mbubwenya bwakali Jesu, mubombe alimwi ulaa moyo mutete. (Matayo 11:28-30) Imajwi aali mbuli aakuti, “undijatile” naa kuti “uliluzi” taamuyumini kwaamba pe ciindi naalubizya. Icitondezyo cakwe cibotu cipa kuti mukaintu aubilwe-ubilwe kali “sikugwasya uumweelede” alimwi kali ‘mweenzinyina’ imwaalumi uuli boobo, uuyiiya kulinguwe alimwi ngocibeleka limwi.—Matalikilo 2:20; Malaki 2:14.
12. Ino ncinzi cikonzya kugwasya mukaintu kuzumina njiisyo yabusilutwe?
12 Mukaintu weelede kulibombya kumwaalumi wakwe. Nokuba boobo, ikuti naa wayungwa amuuya wanyika, eeci cilakonzya kutalika kunyonganya mbuli mbwaibona njiisyo yabusilutwe, eelyo inga watalika kuyeeya kuti muzeezo wabusilutwe tuubeleki kulinguwe. Imagwalo aawa taatondezyi kuti mwaalumi weelede kudyaaminina mukaintu wakwe pe, pele aamba kuti bamakaintu beelede kulibombya kubaalumi babo. (Ba-Efeso 5:24) Alimwi Bbaibbele lyaamba kuti mwaalumi naa wisi nguweelede kuyumuna mukuli wamukwasyi, eelyo kuti naa lulayo oolu lwatobelwa, cilakonzya kuleta luumuno alimwi akweendelana mumukwasyi.—Ba-Filipi 2:5.
13. Ino ncikozyanyo nzi cakulibombya Jesu ncaakatondezya kubana?
13 Ibana beelede kulibombya kubazyali babo. Kujatikizya makani aaya, Jesu wakatondezya cikozyanyo cibotu. Kumamanino kwamakani aakacitika kutempele Jesu naakajisi myaka yakuzyalwa iili 12 ciindi naakacaala musyule kwamazuba otatwe, “wakeenda abo, [bazyali bakwe], waboola ku-Nazareta, wababombela.” (Luka 2:51) Ikulibombya kwabana mumukwasyi kupa kuti kube luumuno alimwi akweendelana mumukwasyi. Ikuti boonse mumukwasyi kabalibombya kubusolozi bwa Kristo, mukwasyi ooyo unookkomenyi.
14, 15. Ino ncinzi cikonzya kutugwasya kuzwidilila ciindi notwasikilwa bukkale bukatazya aŋanda? Amupe cikozyanyo.
14 Kufwumbwa ciindi bukkale bukatazya nobwabuka muŋanda, icikonzya kugwasya kapati nkwiiya Jesu alimwi akuzumina busolozi bwakwe. Mucikozyanyo, mukwesu Jerry a Lana bakalikwetene kwamyaka iili 35, pele mukubusi muzyaanyina ooyu wakabaletela buyumuyumu boonse bobilo mbubatakali kuyeeyela. Mukwesu Jerry upandulula kuti: “Ndakalizyi kuti ikuba mutwe ukonzya kuzwidilila, ndakeelede kubelesya njiisyo zyamu Bbaibbele zyakapa kuti mikwasyi imwi izwidilile. Pele ndakazyoobona kuti ndakeelede kubelesya njiisyo eezyi cabusongo alimwi abupampu.” Ooyu mwana musimbi muzyaanyina wakabona mbuli kuti Jerry wakali kumusinkila kuli banyina, aboobo wakamusula kapati. Jerry wakali kuyandika kubelesya bupampu kutegwa abone mbuli bukkale oobu mbobwakabede kweelana amwana musimbi ooyu ncaakaamba alimwi ancaakacita. Ino wakacita nzi mubukkale buli boobu? Jerry wiingula kuti: “Twakazuminana a Lana kuti kwaciindi cili mbocibede walo weleede kuzumanana kulaya mwana ooyu, kutegwa mebo ndibikkile maano kumakani aakusola kubamba cilongwe amwana ooyu. Nokwakainda ciindi, muzeezo ooyu wakabeleka kabotu.”
15 Ikuti kwaba bukkale bukatazya aŋanda, tweelede kubelesye bupampu kutegwa tuzyibe cipa kuti banamukwasyi kabaambaula alimwi akucita zintu munzila iili boobo. Alimwi tuyandika busongo kutegwa tubelesye kabotu njiisyo zya Leza. Mucikozyanyo, Jesu wakabelesya bupampu kutegwa azyibe cakapa kuti mukaintu iwakajisi penzi lyakalobola amwaampe, eelyo wakamulanganya kabotu cabusongo alimwi caluzyalo. (Levitiko 15:25-27; Marko 5:30-34) Busongo alimwi abupampu mbobukkale bwa Musololi wesu. (Tusimpi 8:12) Tulakkomana ikuti naa tulacita mbubwenya mbuli mbwakonzya kucita walo.
‘Amuzumanane Kusaanguna Kuyandaula Bwami’
16. Ino ncinzi ceelede kuba cintu cipati mubuumi bwesu, alimwi ino mbuti Jesu mbwaakacitondezya eeci kwiinda mucikozyanyo cakwe?
16 Jesu wakacisalazya icakali kuyandika kapati mubuumi bwabaabo ibakazumina busolozi bwakwe. Wakati: ‘Amuzumanane kusaanguna kuyandaula Bwami bwa Leza abululami bwakwe.’ (Matayo 6:33) Aboobo kwiinda mucikozyanyo cakwe, wakatutondezya mbotukonzya kucita boobo. Kumamanino kwamazuba aali 40 akuliimya akuyeeyesya alimwi akupaila akatobelwa alubbapatizyo lwakwe, Jesu wakasunkwa. Diabolosi Saatani wakamusyomezya kumupa “zisi zyoonse zyanyika.” Amuyeeyele buyo mbuli buumi Jesu mbwaakali kuzyoopona naakazumina cisyomezyo ca Diabolosi! Nokuba boobo, Kristo wakabikkila buyo mizeezo kukucita kuyanda kwa Wisi. Alimwi wakazyiba kuti ibuumi munyika ya Saatani bwakali bufwaafwi kapati. Wakacikaka cipego ca Diabolosi akwaamba kuti: “Kulilembedwe kuti, nguwe Jehova Leza wako ngoelede kukomba, nguwenya alike ngoelede kumanina milimo.” Nikwakainda kaindi kaniini buyo, Jesu “wakatalika kukambauka, wakati, Amweempwe, nkaambo Bwami bwakujulu buli afwiifwi.” (Matayo 4:2, 8-10, 17) Mubuumi bwakwe boonse bwaanyika, Kristo wakali mwaambilizi waciindi coonse wa Bwami bwa Leza.
17. Ino mbuti mbotukonzya kutondezya kuti zintu zya Bwami tuzibikkide ambele mubuumi bwesu?
17 Tweelede kwiiya Musololi wesu alimwi akutazumizya Saatani kutweena kwiinda mukuba ambaakani zyakuyandisya milimo iivwolwa mali manji. (Marko 1:17-21) Elo kaka inga kwaba kufwubaala ikuti twacegwa mutukole twakubikka zintu zyamunyika mubusena bwakusaanguna akubikka zintu zya Bwami mubusena bwabili! Jesu wakatupa mulimo wakukambauka Bwami alimwi akugwasya bantu kuba basikwiiya. (Matayo 24:14; 28:19, 20) Masimpe, tulakonzya katujisi mukwasyi alimwi amikuli iimwi iyandika kulanganya, pele sena tatukonzyi kubelesya ciindi camangolezya alimwi akumamanino aansondo kunyamuna mukuli wesu wa Bunakristo wakukambauka alimwi akuyiisya? Elo cilakulwaizya kaka kujana kuti mumwaka wamulimo wa 2001, ibantu basika ku 780,000 bakacikonzya kubeleka kabali babelesi baciindi coonse naa kuti bapainiya!
18. Ino ncinzi citugwasya kujana lukkomano mumulimo?
18 Cibalo ca Makani Mabotu, Jesu cimupandulula kuti wakali sikucita makani alimwi wakali muntu uufwida luzyalo. Naakabona mbuli zintu zyakumuuya nzyobakali kuyanda aabo mbaakali limwi, wakabafwida luzyalo alimwi wakalisungula kuti abagwasye. (Marko 6:31-34) Mulimo wesu ulakkomanisya ciindi notutola lubazu akaambo kakuyanda bantu akulombozya kubagwasya. Pele ino mbuti mbotukonzya kuba akulombozya kuli boobo? Mulombwana umwi wazina lya Jayson wakaamba kuti: “Kandicili mukubusi, tiindakali kuukkomanina kapati mulimo pe.” Ino ncinzi cakamugwasya kutegwa atalike kuuyanda mulimo? Jayson ulaingula ategwa: “Mumukwasyi wesu, ibuzuba bwa Mujibelo mafwumofwumo lyoonse cakali ciindi cakuunka mumulimo wamumuunda. Eeci cakandigwasya nkaambo kuunka lyoonse mumulimo, kwakapa kuti ndibone bubotu bwakali kujanika, eelyo ndakatalika kuukkomanina mulimo.” Andiswe mbubwenya tweelede kutola lubazu lyoonse mumulimo cabunkutwe.
19. Ino makanzeesu ayelede kuba akucita nzi kubusolozi bwa Kristo?
19 Masimpe cilakatalusya alimwi akupa bulumbu ikuzumina busolozi bwa Kristo. Ciindi notucita boobo, myaka yabukubusi nceciindi cibotu cakuyaambele mukujana luzubo alimwi abusongo. Buumi bwamumukwasyi bulaba busena bwaluumuno, bwalukkomano alimwi amulimo ncecintu cikonzya kuleta lukkomano alimwi akukkazika moyo. Aboobo, atusinizye kwiinda mukutondezya zintu nzyotucita mubuumi bwesu bwabuzuba abazuba alimwi amuzintu nzyotusala kucita kuti tulasyoma mubusolozi bwa Kristo. (Ba-Kolose 3:23, 24) Nokuba boobo, Jesu Kristo alimwi wapa busolozi abumwi mucibeela acimbi—imbungano ya Bunakristo. Icibalo citobela cilapandulula mbuli mbotukonzya kugwasyigwa kwiinda mububambe oobu.
Bupanduluzi buyungizidwe
^ munc. 7 Mazina amwi acincigwa.
Sena Muciyeeyede?
• Ino mbuti kutobela Musololi wakasalwa a Leza mbokukonzya kutugwasya?
• Ino mbuti bakubusi mbobakonzya kutondezya kuti balayanda kutobela busolozi bwa Jesu?
• Ino ncinzi busolozi bwa Kristo ncobukonzya kuletela mukwasyi uulibombya kuli mbubo?
• Ino mbuti mulimo wesu mboukonzya kutondezya kuti busolozi bwa Kristo tulabusyoma?
[Mibuzyo yaciiyo]
[Zifwanikiso izili apeeji 10]
Myaka yabukubusi nceciindi cibotu cakujana luzibo lwa Leza alwa Musololi wesu uusalidwe
[Cifwanikiso icili apeeji 11]
Kulibombya kubusolozi bwa Kristo kuletela lukkomano mumukwasyi
[Zifwanikiso izili apeeji 13]
Jesu wakasaanguna kuyandaula Bwami. Sena mbumucita andinywe oobo?