Ikutulangisya Kabotu Twaano Tumwi Tujatikizya Lufwu

AMULIZYE

Ikutulangisya Kabotu Twaano Tumwi Tujatikizya Lufwu

IKUZYILA lyansiku, muntu wali kukatazyigwa alimwi akuyoowa mukuyeeya kujatikizya bulangizi butazyibidwe kabotu bwalufwu. Icatobela akaambo kaceeci, ikuyoowa lufwu kwakulwaizyigwa amizeezo yazikombelo zyakubeja iisangenyi aziyanza zyabo zidumide kapati alimwi alusyomo lwamuntu umwi aumwi. Ipenzi likonzya kuba ndyakuti, ikuti muntu kaluyoowa lufwu, takonzyi kunookkomana pe alimwi lusyomo ndwajisi lwancotuponena lunooyaabuceya.

Zikombelo zidumide nzyezipegwa mulandu mupati akaambo kakwaamba twaano twakulengelezya ntobaccilila bantu kujatikizya lufwu. Kwiinda mukutulanga-langa twaano ootu tumwi kweelanaa kasimpe kamu Bbaibbele, amubone naa eezyo nzyomusyoma kujatikizya lufwu zilakonzya kupandululwa kabotu-kabotu.

Kaano 1: Lufwu ncilengwa buya camamanino aabuumi.

Ibbuku lyakuti Death—The Final Stage of Growth lyaamba kuti: “Lufwu . . . ncibeela cipati kapati mubuumi bwesu.” Majwi aali mbuli bwayaaya atondezya lusyomo bantu ndobajisi lwakuti lufwu tacili cintu ceenzu pe, pele ninzila imwi yacilengwaleza yamamanino aazintu zyoonse zipona. Aboobo, lusyomo luli boobu lupa kuti bantu banji kabaile kuzuminizya mizeezo yabasyaabusongo yakuti buumi bunyina mpindu alimwi akujana nzila zili zyoonse zyakulijaya.

Pele sena mmasimpe kuti lufwu ninzila yacilengwaleza yamamanino aabuumi? Bamwi basikuvwuntauzya tabaasyomi makani aaya. Mucikozyanyo, umwi waba haabusongo wazina lya Calvin Harvey sikwiiya mbwacembaala muntu naakali kubuzyigwa-buzyigwa wakaamba kuti, tasyomi kuti muntu “wakabikkilidwa limwi ciindi cakufwa.” William Clark haabupampu mumakani aambuli mboulikwabilila kumalwazi mubili wakaamba kuti: “Lufwu tacili cibeela cabuumi citakonzyi kwaandaanizyigwa pe.” Aumwi haabupampu wakucikolo citegwa California Institute of Technology wazina lya Seymour Benzer kayeeya kapati waamba kuti “kucembaala kulakonzya kupandululwa kabotu kuti mbweende bwazintu mbotukonzya kulangila kucinca ikutali bubikkilidwe limwi mbuli nkoloko.”

Iciindi basayaansi nobalanga-langa mubili wamuntu mboupangidwe, balalamwa. Balabona kuti muntu wakalengwa azintu zyikonzya kumupa kuti kapona kwamyaka yiinda ku 70 naa 80 njotukonzya kupona lino. Mucikozyanyo, basayaansi babona kuti bongo bwamuntu bulijisi nguzu zipati zyakuyeeya naa kwiibaluka zintu. Haabupampu umwi wakeezyeezya kuti bongo bwesu bulakonzya kuyeeya makani “aakonzya kuvwuzya mabbuku aali tuulunzuma tuli makumi obilo aali mumalaibbulali ainda kukomena munyika.” Basayaansi bamwi bayiide zyabweende bwansinga basyoma kuti mumazuba aabuumi bwamuntu, imuntu ubelesya buyo 1/100 ya 1 pasenti (.0001) yanguzu zyabongo (ikabeela kasyoonto kapati). Cileelela kubuzya kuti, ‘Ino nkaambo nzi ncotujisi bongo bulaa nguzu zinji kapati boobu kakuli tubelesya buyo kabeela kaniini loko kabongo mubuumi bwesu?

Alimwi amubone buyo mbobalimvwa bantu ikuti umwi wafwa! Kubanamunji, ikufwidwa mukaintu, munyokwabo naa mwana ncecintu ciinda kubanyonganya mubuumi bwabo boonse. Ikanjikanji kufwidwa muyandwa kulabakopanya kapati bantu cakuti ikukopana ooko kulazumanana kwaciindi cilamfwu kuzwa ciindi lyafwa muyandwa wabo. Nebaba baabo baamba kuti kufwa cilengwa buya, cilabayumina kuzumina muzeezo ooyu wakuti, baakufwa ayakuba ngamamanino aazintu zyoonse. Ibbuku lyakuti British Medical Journal lyakaamba kuti “muzeezo uudumide kapati ngwakuti, bantu boonse bayanda kupona kwaciindi cilamfwu.”

Ikweelana ambobalubona lufwu bantu banji, inguzu zigambya zyakwiibaluka akwiiya zintunzyobajisi, alimwi akulombozya kupona kukabe kutamani nkobazyalwaa nkuko, sena eeci tacitondezyi kuti muntu wakalengelwa kuti kapona kukabe kutamani? Masimpe, Leza kunyina naakalenga bantu kuti kabafwa pe, pele wakabalenga abulangizi bwakuti kabapona kukabe kutamani. Amubone eeco Leza ncaakabikkila bantu bakutaanguna kuti mbokwakali kuyooba kumpela naakati: “Amuzyalisye, muvule, muzuzye nyika akwiibombya. Amweendelezye inswi zyamulwizi abayuni bakujulu abanyama boonse baputauka ansi.” (Matalikilo 1:28) Elo kaka takuliboteli kumbele ooku kutamani!

Kaano 2: Leza ulajaya bantu kutegwa bakakkale limwi.

Imutumbu umwi wamyaka yakuzyalwa iili 27 iwakali kufwumba bulamfu akulangilwa kusiya bana botatwe, wakaambila siite umwi wacikombelo caba Katolika kuti: “Utanjili akundaambila kuti oolu nduyando lwa Leza . . . Cilandisulula kaka ikumvwa muntu uumbi kandaambila makani aali boobo.” Nokuba boobo, bunji bwazikombelo mboziyiisya oobu kujatikizya lufwu. Zyaamba ikuti Leza ulabweza bantu kutegwa kabakkala limwi.

Sena mmasimpe kuti Mulengi ngusilunya boobo uukonzya kutujaya kazyi kuti eeci citupa kuusa? Nee, ikutali Leza ngotubala mu Bbaibbele. Ikweelana abbuku lya 1 Johane 4:8, “Leza nduluyando.” Amukalangisye kaambo aaka, aawa takaambi kuti Leza ulijisi luyando naa kuti Leza ngusiluyando, pele kaambo nkakuti Leza nduluyando. Leza ulabayanda bantu munzila iimaninide, eelyo zyoonse nzyacita zyeendelezyegwa aluyando, nkaambo walo ndoluyando. Ooyu tali Leza uujaya bantu kutegwa kabakkala limwi.

Cikombelo cakubeja cabanyonganya bantu banji kukatikizya nkobabede alimwi aciimo ncobajisi bantu bafwide. Kujulu, kuhelo, purigatoriyo (kusubudwa myuuya yabafwu babisya), kubusena kutazyibidwe kabotu—imasena aaya alimwi aambi aataambwa waawa nzyezintu zibalibilisya alimwi mane akubayoosya bantu. Kulubazu lumwi, Ibbaibbele lilatwaambila kuti bafwide tabazyi cintu cili coonse, bali muciimo mbuli caamuntu uuli muŋonzi. (Mukambausi 9:5, 10; Johane 11:11-14) Aboobo, tatweelede kukopana mumizeezo kuyeeya ceeco cicitika ciindi notwafwa, mbweena buyo mbotutakonzyi kupenga kuyeeya ciindi notubona muntu uuli muŋonzi. Jesu wakaamba kujatikizya ciindi “boonse abali muzyuumbwe” nobakali “[ku]yoozwa” akuba aabuumi bubukulusidwe muparadaiso anyika.—Johane 5:28, 29; Luka 23:43.

Kaano 3: Leza ulabweza bana baniini kutegwa bakabe bangelo.

Elisabeth Kübler-Ross iwakaiya bukkale bwabantu baciswa malwazi aajaya wakapa lusyomo ludumide kapati akati kabantu basizikombelo. Kapandulula cini cakacitika, mukaintu ooyu wakati “taali maano ikwaambila mwana musyoonto wafwidwa munyina kuti Leza ulabayanda bana basankwa citaambiki cakuti wakatola Johnny kujulu.” Makani aamusyobo ooyu ngakubejelezya Leza alimwi taatondezyi bube bwa Leza bwini-bwini alimwi ambwayendelezya zintu. Musilisi Kübler-Ross wakazumanana kubandika kuti: “Ooyu mwana musimbi naakakomena akuba mukaintu, tanaakaleka kumunyemena Leza pe, calo cakapa kuti abe mbuli muntu uugaukide iciindi naakafwidwa mwanaakwe musankwa nokwainda makumi aamyaka aali otatwe.”

Ino Leza ncinzi cinga camupa kuti abweze mwana ooyu kutegwa abe aamungelo uumbi mbuli kuti walo nguumuyanda mwana alikke ikwiinda bazyali bakwe? Ikuti naa mmasimpe kwaamba kuti Leza nguubabweza bana, sena eeco tacikonzyi kutondezya kuti Mulengi ooyu tabayandi bantu alimwi mulyatu? Ikwiindana amuzeezo ooyu, Bbaibbele lyaamba kuti: “Luyando luzwa kuli Leza.” (1 Joni 4:7, Ci) Sena masimpe kuti Leza siluyando inga wapa kuti muntu afwe kakuli bantu balya maila taku nobacikkomanina eeco?

Aboobo, ino nkaambo nzi bana ncobafwida? Bwiinguzi bumwi bujanwa mu Bbaibbele bulilembedwe kubbuku lya Mukambausi 9:11 kuti: “Boonse buyo balasikilwa ziindi zyalufu azyamapenzi [cakutayeeyelwa, NW].” Alimwi bbuku lya Intembauzyo 51:5 litwaambila kuti toonse tatulondekede, tuli basizibi kuzwa ciindi notwakamitwa, ciccilila kumuntu woonse ndufwu lukonzya kucitika kufwumbwa ciindi akaambo kazintu zinji. Muziindi zimwi mwana ulakonzya kufwa katana zyalwa, cipa kusowa. Zimwi ziindi, bana balafwa akaambo kabukkale bubyaabi mobalinjizya naa kwiinda muntenda. Leza tajisi mulandu kumfwu eezyi.

Kaano 4: Bantu bamwi balapenzyegwa ciindi nobafwide.

Ibunji bwazikombelo ziyiisya kuti, basizibi baya kuwaalwa mubbibi lyamulilo lyahelo akupenzyegwa kukabe kutamani. Sena kuyiisya kuli boobu nkwamaano alimwi sena nkwamu Magwalo? Imyaka muntu njapona isika buyo ku 70 naa 80. Nikuba kuti muntu wali kucita zibi zipati mubuumi bwakwe boonse, sena masimpe inga kaciluzi kusubula muntu ooyo mane kukabe kutamani? Nee. Eeco inga tacibi camaano kusubula muntu kukabe kutamani akaambo kazibi nzyaakacita mubuumi bwakwe bufwiifwi mbwaakapona.

Leza alikke nguukonzya kuyubununa cicitika ciindi bantu nobafwa, alimwi ulacita oobo mu Jwi lyakwe lilembedwe, Ibbaibbele. Mboobu Bbaibbele mbolyaamba: “[Banyama] balafwa, abalo [bantu] balafwa mbubonya. Boonse balijisi muuya omwe. . . . Boonse balaya kubusena bomwe. Bakazwa kubulongo, alimwi balapiluka kubulongo.” (Mukambausi 3:19, 20) Aawa taku mpowaambwa mulilo wahelo pe. Ibantu nobafwa, balajokela kubulongo—kuciimo cakutabawo.

Ikutegwa muntu asubulwe kabotu, muntu weelede kuti kali muumi naa kazyi cicitika. Sena bafwide balizyi citola busena? Ibbaibbele alimwi lilatupa bwiinguzi noliti: “Nkaambo baumi balizi kuti balafwa, pele bafwide tabezi cintu niciba comwe; tabacijisi impindu, tabaciyeeyegwi limbi.” (Mukambausi 9:5) Ncintu ciyumu kubantu bafwide ‘batazyi cintu niciba comwe’ ikumvwa kucisa.

Kaano 5: Lufwu ngamamanino aabuumi bwesu boonse.

Iciindi notufwa inga tulaleka kupona, pele aaya makani taali ngamamanino aabulangizi bwabuumi bwesu. Imwaalumi uusyomeka Jobu wakalizyi kuti buzuba bumwi wakali kukonzya kuya mucuumbwe naa mukabanda, iciindi naakali kunoofwa. Pele amuswiilile mbwaamba mumupailo wakwe kuli Leza: “Nicali cibotu kuti kondisisa mucuumbwe mane kunyema kwako kukainde, pele utalubi ciindi cakundiyeeya. Kuti naa muntu wafwa, sena uyoopona alimwi? . . . Waakundiita, njooingula.”—Jobo 14:13-15, BT.

Jobu wakali kusyoma kuti, ikuti naa wasyomeka kusikila kulufwu, Leza wakali kukonzya kumuyeeya alimwi akumubusya muciindi ceelede. Oolu ndolusyomo ndobakajisi boonse babelesi ba Leza bakuciindi cansiku. Jesu kumugama wakaamba cakusinizya kujatikizya bulangizi oobu alimwi wakatondezya kuti Leza wakali kuyoomubelesya mukubusya bafwide. Mboobu majwi aa Kristo mbwaatusyomezya naati: “Ciindi ciyoosika ncobati kamvwe ijwi lyakwe [Jesu] boonse abali muzyuumbwe, bayoozwa mpoonya, abo abakacita kabotu bayoobusigwa kubuumi, abaabo abakacita bubi bayoobusigwa kukubetekwa.”—Johane 5:28, 29.

Kwacaala buyo kaindi kaniini, Leza uya kugusya bubi akutalisya nyika mpya kayeendelezyegwa abulelo bwakujulu. (Intembauzyo 37:10, 11; Daniele 2:44; Ciyubunuzyo 16:14, 16) Ciyakuccilila ncakuti, nyika yoonse iyakuba paradaiso iinikukkedwe abantu bakomba Leza. Mu Bbaibbele tubala kuti: “Ndakamvwa ijwi ipati lizwa kucuuno cabwami, lyakati, Amubone, bukalo bwa-Leza mpobuli akati kabantu, uzookala akati kabo. Bazooba bantu bakwe, alakwe Leza mwini uzookala kulimbabo, azoobe Leza wabo. Nkabela uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.”—Cuyubunuzyo 21:3, 4.

Takukabi Kuyoowa

Ikuba aaluzibo lwabulangizi bwabubuke alimwi aluzibo lwa Yooyo uupa buumi, cilakonzya kumuumbulizya. Jesu wakasyomezya kuti: “Muyooziba bwini, abwalo bwini, buyoo[mwaangulula].” (Johane 8:32) Eeco cilabikkilizya akutulubula kukuyoowa lufwu. Jehova alikke nguukonzya kupa kuti muntu aleke kucembala alimwi akufwa akutupa buumi butamani. Sena inga mwazisyoma nzyasyomezya Leza? Inzya, mulakonzya kucita oobo, nkaambo Ijwi lya Leza lyoonse lyaamba zyamasimpe. (Isaya 55:11) Tumukulwaizya kuti mwiiye makanze aa Leza ngajisi kubantu. Bakamboni ba Jehova balilibambilide kumugwasya.

Majwi aakwelelezya sikubala aali apeeji 6]

Ikuyoowa lufwu kulakonzya kupa kuti muntu katakkomani mubuumi bwakwe

Ccaati iili apeeji 7]

TWAANO TUDUMIDE INO NCINZI MAGWALO NCAAMBA?

KUJATIKIZYA LUFWU

● Lufwu ncilengwa buya Matalikilo 1:28; 2:17; Ba-Roma 5:12

camamanino aabuumi

● Leza ulajaya bantu kutegwa Jobu 34:15;

bakakkale limwi Intembauzyo 37:11, 29; 115:16

● Leza ulabweza bana baniini Intembauzyo 51:5; 104:1, 4;

kutegwa bakabe bangelo Ba-Hebrayo 1:7, 14

● Bantu bamwi balapenzyegwa Intembauzo 146:4;