Mibuzyo Yabasikubala

Sena ncamaano ku Munakristo wakasimpe kujanika kudilwe naa kubwiinga bucitilwa muŋanda yacikombelo?

Notutola lubazu muzintu zicitika mubukombi bwakubeja takumukkomanisyi pe Jehova, aboobo tatweelede kucita oobo pe. (2 Ba-Korinto 6:14-17; Ciyubunuzyo 18:4) Dilwe lyacikombelo ndidilwe libikkilizya mulumbe uukulwaizya mizeezo iitali yamumagwalo mbuli kutafwa kwabuumi alimwi akupegwa bulumbu bwakuya kujulu bwabantu boonse baluleme. Cilakonzya kubikkilizya azilengwa zimwi mbuli cakucita citondezyo caciingano alimwi akupaila caantoomwe abapaizi naa bafwala. Mipailo alimwi azimwi buyo zicitwa muzikombelo iziteendelani anjiisyo zya Bbaibbele zilakonzya kuba zimwi zyazeezyo zibelesyegwa zicitwa ciindi cabwiinga bucitilwa mucikombelo. Cilakonzya kumuyumina Munakristo kuliyumya nali akati kabantu ibali boobo bacita zilengwa zyacikombelo zyakubeja, aboobo ulakonzya kubasangana. Elo inga kwaba kufwubaala kaka ikuti muntu walinjizya muzintu zili boobu!

Ino mbuti ikuti Munakristo wayanda kuti ajanike kudilwe naa kubwiinga bucitilwa muŋanda yacikombelo? Mucikozyanyo, mucizyi Munakristo ulakonzya kutambwa amunyokwabo uutasyomi kuti baunke anguwe ooko. Sena inga wamuccilila kuti akabe buyo sikulangilila? Akaambo kakumupa bulemu munyokwabo, imukaintu ulakonzya kuunka anguwe, pele teelede kutola lubazu muziyanza zili zyoonse zyabukombi. Kulubazu lumwi, mucizyi ooyu inga wasala kucaala kayeeya kuti ciya kumukopa akaambo kazintu zyikonzya kucitwa, nkaambo ambweni zilakonzya kumupa kutyola njiisyo zyabunaleza. Weelede kulisalila mwini. Masimpe inga wayanda kuti akkalikane mumizeezo akuba aamanjezyeezya aasalala.—1 Timoteo 1:19.

Kunze lyaboobo, inga cainda kubota ikuti mukaintu wamupanduluda munyokwabo kuti akaambo kamanjezyeezya, takonzyi kutola lubazu muziyanza zyabukombi bumbi naa kwiimba nikuba kukotamika mutwe wakwe ciindi camupailo. Kwiinda mbuli mbwapandulula mukaintu, munyokwabo inga wabona kuti, ikujanika kwamukaintu wakwe kubusena oobo kuyoomusampuzya buyo walo wamutamba. Ulakonzya kusala kuti aunke buyo alikke akaambo kaluyando ndwajisi kumukaintu wakwe, bulemu mbwajisi kuli zeezyo nzyasyoma, naa ambweni akaambo kakuti tayandi kuti akasampuke. Ikuti munyokwabo wazumanana kuti aunke anguwe, nkokuti inga waunka, pele kali buyo sikulangilila.

Icintu ncotutayelede kwiile kuyabaizya buyo cijatikizya mbuli mbocikonzya kubanyonganya basyomima ikuti naa twajanika kumuswaangano mucikombelo. Sena inga kwaba kwaanyonganya manjezyeezya aabantu bamwi? Sena ikukaka kutola lubazu muzintu zijatikizya mituni inga kwatyopya bamwi? Mwaapostolo Paulo wakakulwaizya kuti: “Musalulule zintu ziinda kubota, mube bantu benibeni batakwe mulandu mane kusikila kubuzuba bwa-Kristo.”—Ba-Filipi 1:10.

Ikuti eeci kacijatikizya wamukowa, nkokuti inga kwaba kukatazyigwa kapati abamumukwasyi. Kufwumbwa naa cili buti, Munakristo weelede kutulanga-langa kabotu-kabotu twaambo toonse tujatikizyidwe. Zimwi ziindi inga muntu waamba kuti taku mbocibede naa taku twaambo tukonzya kubuka akaambo kakujanika buyo kudilwe naa kulangilila bwiinga bucitilwa mucikombelo. Nokuba boobo, bamwi balakonzya kujatikizyigwa akaambo kakujanika ooko, manjezyeezya aabo alalangilwa kunyonganizyigwa. Kufwumbwa naa bukkale buli buti, Munakristo weelede kubona kwaamba kuti kusala nkwaacita takweelede kunyonganya manjezyeezya aakwe kuli Leza alimwi akubantu mbocikomba limwi.