Mibuzyo Yabasikubala

Ikuti muntu umwi walisina naa kulijaya, sena cilizumizyidwe kumubelesi Munakristo kukanana makani aadilwe?

Umwi aumwi mubelesi Munakristo weelede kulisalila kubelesya manjezeezyaakwe aasalala kuli Leza naa ulakonzya kukanana makani aadilwe aamuntu uulibonya kuti wakalijaya buya. Iciindi nasala ncayelede kucita, weelede kulanga-langa mibuzyo eeyi iitobela: Ino Jehova ukulanga buti kulijaya? Sena ncobeni lufwu lwakacitika kwiinda mukulijaya buya? Sena kwakali kusondoka naa kunyongana kwamizeezo kwakamupa kuti alijaye? Ino bantu bakulanga buti kulijaya kubusena ooko?

Mbotuli Banakristo, tulabikkila maano mbuli Jehova mbwakubona kulijaya. Buumi bwamuntu ncintu ciyandisi kapati alimwi icisetekene kuli Jehova. (Matalikilo 9:5; Intembauzyo 36:9) Aboobo imuntu kulijaya mwini alimwi acaali ncintu citamukkomanisyi Leza. (Kulonga 20:13; 1 Johane 3:15) Sena kaambo aako nkakakasya kukanana makani aadilwe lyamuntu wakalijaya buya?

Amulange-lange kaambo kaamba Mwami wa Israyeli Saulo. Naakabona kuti takoofwutuka munkondo yamamanino aba Filisti, muciindi cakulekela basinkondonyina kuti bamupenzye calunya, “Saulo wakabweza ipanga, wawida alindilyo.” Iciindi ba Filisti nobakajana mutumba wakwe, bakaukankamina kubulambo bwamunzi wa Betisani. Bantu baku Jabezi Gileadi nobakamvwa nzyobakacita ba Filisti, bakaubweza mutumba alimwi akuutenta. Mpoona bakabweza zifwuwa zyakwe akuzizikka. Alimwi bakaliimya kulya kwamazuba aali ciloba, icilengwa cadilwe cakaliko akati kabana Israyeli. (1 Samuele 31:4, 8-13; Matalikilo 50:10) Iciindi Davida munanike wa Jehova naakamvwa nzyobakacita bantu baku Jabezi Gileadi, wakaamba kuti: “Jehova amupe coolwe, mbuli mbumwakacitila Saulo mwami wanu obu buuya bwakumuzika. Jehova amucitile cabuuya acalusinizyo.” (2 Samuele 2:5, 6) Ibbaibbele kunyina mpolitondezya pe kuti bantu baku Jabezi Gileadi bakasinganizyigwa akaambo kakucita ceeco cikonzya kwaambwa kuti ncilengwa cadilwe ku Mwami Saulo. Amweezyanisye makani aayo alimwi ayaayo abaabo batakazikkwa akaambo kazibi zyabo. (Jeremiya 25:32, 33) Imubelesi Munakristo ulakonzya kucilanga-langa cibalo cijatikizya Saulo nasala naa ulakonzya kukanana makani aadilwe lyamuntu wakalijaya.

Alimwi mubelesi ulakonzya kulanga-langa ncaakananinwa makani aadilwe. Ikwiimpana abantu aabo basyoma mukutafwika kwabuumi, Bakamboni ba Jehova tabeendelezyi madilwe kabajisi muzeezo uulubide wakwaambilizya kuti muntu ufwide waya kunyika iimbi. Muciindi cakugwasya muntu uufwide, ikaambo kapati ncaakananinwa makani aadilwe nkuumbulizya basikufwidwa alimwi akupa bumboni kubantu bajanika kujatikizya ciimo ncobabede bantu bafwide. (Mukambausi 9:5, 10; 2 Ba-Korinto 1:3-5) Ikaambo kambi kapati ncaakananinwa makani aadilwe, nkugwasya bantu boonse bajanika kuti bayeeyesye mbobuli bufwaafwi buumi. (Mukambausi 7:2) Sena makanze aaya ayoozuzikizyigwa kwiinda mukukanana makani aadilwe kumuntu wakalijaya?

Masimpe, ibamwi balakonzya kulimvwa kuti muntu ooyo wakalijaya acaali, kazyi kabotu-kabotu kuti wakali kucita cinyonyoono kuli Jehova. Pele sena lyoonse cilakonzyeka kusinizya makani aali boobu? Sena ncintu cakacitika buyo mbuli mukulaba kwaliso? Bamwi ibasola kulijaya balacinca mizeezo, eelyo kunyina nobazumanana kucita boobo pe. Imuntu takonzyi kweempwa pe amana kulijaya akaambo kakubweza ntaamu eeyo.

Ikaambo kambi kapati kabajatikizya bantu banji balijaya nkakusondoka alimwi akunyonganizyigwa mumizeezo. Mubwini ibantu aaba mbabalangilwa kulijaya. Kweelanaa akumvwuntauzya kwakacitwa imweelwe uusika ku 90 pasenti wabantu aabo balijaya  inga kabajisi mapenzi mbuli kusondoka, kunyongana mumizeezo naa penzi lyakuzibila kubelesya misamu iikola. Sena Jehova uyoolekelela muntu uuli muciimo cili boobo? Tatukonzyi kuzyiba pe naa sikulijaya wakacita cinyonyoono citakonzyi kulekelelwa kuli Jehova. Mubelesi Munakristo ulakonzya kulanga-langa bukkale alimwi abuumi mbwaakali kupona sikufwa kujatikizya makani aakuciswa, nalanga-langa kuti naa ulakonzya kuyookanana makani aadilwe lyamuntu wakalijaya buya.

Alimwi kuli kaambo komwe keelede kulangwa-langwa: Ino mbuti bantu bamucilawo nkomubede mbobakulanga kulijaya alimwi alufwu lwamuntu? Ikaambo aaka kalayandika kapati kwaambisya kubaalu, ibabikkila maano kumpuwo yambungano nyenzi ya Bakamboni ba Jehova. Kweelanaa mbuli bantu banji mbobakulanga kulijaya kubusena oobo alimwi ikapati kujatikizya kaambo aaka nkaakalijayila, ibaalu balakonzya kusala kutagwasyilizya kudilwe lili boobo caantangalala naa kutazumizya makani aadilwe kubeda mu Ŋanda ya Bwami.

Pele, ikuti mubelesi Munakristo walombwa kuba sicuuno aadilwe lyeendelezyegwa bantu bambi, ulakonzya kulisalila kucita boobo, pele kutali kwiiminina mbungano pe. Ikuti wasala kucita boobo, weelede kucenjela kutaamba cigaminide kujatikizya bubuke naa ciyoocitika kumuntu ooyo wakalijaya. Kufwumbwa bulangizi buliko kumuntu uufwide buli mumaanza aa Jehova alimwi taakwe naba omwe uukonzya kwaamba naa sikufwa uyoobusyigwa naa pe. Mumakani aakwe, imubelesi ulakonzya kukanana ikasimpe kamu Bbaibbele kajatikizya lufwu alimwi akuumbulizya basikufwidwa.