‘Uli Mwanakazi Uuli Kabotu’

Majwi aaya aakulumbaizya akaambwa kumwanakazi mwana-mwana muna Moabu. Wakali mukamufwu wazina lya Rute, mukamwana kuli Naomi imukaintu muna Israyeli. Wakali kukkala mu Israyeli imyaaka iili 3000 yainda, iciindi babetesi nobakali kweendelezya, Rute wakabaa mpuwo mbotu akaambo kakulilemeka kabotu. (Rute 3:11) Ino mbuti mbwaakalijanina mpuwo mbotu eeyi? Mbaani bakonzya kugwasyigwa kucitondezyo cakwe?

Rute tanaakali muntu wakali kulya “cilyo cabutolo,” wakali kubeleka kwamawoola manji alimwi cabunkutwe mumulimo wakuvwulula mumyuunda. Akaambo kabunkutwe bwakwe, ibantu bakatalika kumulumbaizya. Noliba leelyo mulimo wakwe nowakaubizyigwa, wakazumanana kubeleka canguzu, kabeleka kwiindilizya aciindi cakukotoka. Aboobo bwakamweelela kapati bupanduluzi bwamu Bbaibbele bwamwanakazi uutembaulika, mubotu alimwi musungu.—Tusimpi 31:10-31; Rute 2:7, 15-17.

Izintu zyakapa kuti Rute abe aampuwo mbotu kubuleya bwakali bube bwakumuuya mbwaakajisi bwakulibombya, muuya wakulyaaba alimwi aluyando lwakwe. Ikusiya bazyali bakwe alimwi anyika yokwabo, kakutakwe abulangizi pe bwakuti uyoojana kuliiba mulukwatano, Rute wakakakatila kuli Naomi. Alimwi Rute wakatondezya luyando lwakubelekela Jehova, Leza wabanyinazyala. Ikukankaizya mbwaakali kuyandika kapati, makani aamu Magwalo aamba kuti wakali ‘mubotu kuli Naomi kwiinda bana balombe bali musanu ababili.’—Rute 1:16, 17; 2:11, 12; 4:15.

Nokuba kuti mpuwo mbotu njaakajisi Rute yakali akati kabantu mbocakali kukkala limwi, icipati kwiinda waawo ncakuti Leza wakabukkomanina kapati bube bwakwe alimwi wakapegwa coolwe citaliboteli kapati cakuba bakaapanyina Jesu Kristo. (Matayo 1:5; 1 Petro 3:4) Taciliboteli kaka cikozyanyo ca Rute kutali buyo ku Banakristo banakazi, pele akulibaabo boonse balyaamba kuti bakomba Jehova!