Amulibombye Akusyomeka Kubweendelezi Bwa Leza

“Jehova ngumubetesi wesu, Jehova ngusimilao wesu, Jehova ngumwami wesu, ngonguwe uuti katufutule.”—ISAYA 33:22.

1. Ino ntwaambo nzi twakapa kuti bana Israyeli bansiku baindane amisyobo iimbi?

MUMWAKA wa 1513 B.C.E., imusyobo wabana Israyeli wakatalisyigwa. Ciindi eeco, tiiwakajisi munzi mupati, inyika yawo alimwi tiiwakajisi mwami uulibonya ameso pe. Ibantu bawo bakali baabo ibakazwide mubuzike. Nokuba boobo, musyobo ooyu mupya wakali waalubazu munzila aimwi. Jehova Leza ngowakali mubetesi wabo uutalibonyi, Similawo alimwi ngowakali Mwami. (Kulonga 19:5, 6; Isaya 33:22) Kunyina musyobo uumbi wakali boobo pe!

2. Ino mmubuzyo nzi uubuka kujatikizya mbuli bana Israyeli mbobakali kweendelezyegwa, alimwi ino nkaambo nzi ibwiinguzi oobu ncobuyandika kapati kulindiswe?

² Mbwaanga Jehova ngu Leza weendelezya kabotu zintu alimwi ngusiluumuno, tulakonzya kulangila kuti kufwumbwa musyobo ngwalela weelede kuti kaukamantenyi kabotu. (1 Ba-Korinto 14:33) Masimpe, oobu mbocakabede kubana Israyeli. Pele, ino mbuti imbunga yaanyika iilibonya ameso mboikonzya kweendelezyegwa a Leza uutalibonyi? Cilakonzya kutugwasya ikulanga-langa mbuli Jehova mbwaakali kuweendelezya musyobo ooyu wansiku, katubikkilide maano kuti tubone mbuli mbokukubikka aantangalala kulibombya alimwi akusyomeka kwabo kubweendelezi bwa Leza.

Mbobakali Kweendelezyegwa Bana Israyeli Bansiku

3. Ino mbubambe nzi bugwasya Jehova mbwaakacita bwakweendelezya bantu bakwe?

³ Nokuba kuti Jehova ngowakali Mwami wabana Israyeli uutalibonyi ameso, wakalisalide baalumi bantusi basyomeka kuti kabamwiiminina. Kwakali basololi, basilutwe alimwi abaalumi abamwi ibakali basikupa lulayo alimwi ababetesi. (Kulonga 18:25, 26; Deuteronomo 1:15) Nokuba boobo, tatweelede kwiinda kuyeeya kuti kufwumbwa kakunyina kusololelwa a Leza, aabo baalumi bakali kukonzya kubeteka twaambo cabupampu alimwi akutumvwisya kakunyina kulubizya pe. Bakali bantu batalondokede alimwi tiibakali kukonzya kuzyiba izili mumyoyo yabakombinyina pe. Nokuba boobo, ibabetesi ibakali kuyoowa Leza bakali kukonzya kubalaya basyominyina munzila iigwasya nkaambo lulayo lwakali kujanika mu Mulawo wa Jehova.—Deuteronomo 19:15; Intembauzyo 119:97-100.

4. Ino mmicito ili buti babetesi bana Israyeli basyomeka njibakeelede kuleka, alimwi nkaambo nzi?

⁴ Nokuba boobo, kubeteka wakali mukuli mupati iwiinda akuzyiba buyo Mulawo. Akaambo kakutalondoka, aaba baalu bakeelede kupakamana kutegwa bakonzye kuleka micito imwi yabuzangi mbuli kuliyanda, kusalaula alimwi abulyatu zyalo zyakali kukonzya kunyonganya kubeteka kwabo. Musa wakabaambila kuti: “Tamweelede kusalaula mukubeteka kwanu; muleelede kuswiilila makani aabantu boonse buyo, nebaba bapati nebaba baniini; alimwi mutayoowi bantu, nkaambo milimo yakubeteka njiya-Leza.” Masimpe, babetesi bana Israyeli bakali kubetekela Leza. Elo kaka bakalijisi mulimo uutalikomeneni!—Deuteronomo 1:16, 17.

5. Kunze lyabubambe bwababetesi, ino mbubambe nzi abumwi Jehova mbwaakacita bwakulanganya bantu bakwe?

⁵ Jehova wakacita bubambe abumwi bwakulanganya bantu bakwe munzila yakumuuya. Nociba ciindi kabatanasika mu Nyika Yakasyomezyegwa, wakabalailila kuti bayake tente lyakubunganina, nkokuti ibusena bujanika bukombi bwakasimpe. Alimwi wakacita bubambe bwabapaizi kutegwa kabayiisya Mulawo, ikutuula zipaizyo zyabanyama alimwi akuumpa tununkilizyo ciindi camafwumina alimwi akumazuba. Leza wakabikka  Aroni mupati wa Musa kuti abe ngomupaizi mupati alimwi akusala bana ba Aroni basankwa kuti kababagwasyilizya bausyi mumulimo wabo.—Kulonga 28:1; Myeelwe 3:10; 2 Makani 13:10, 11.

6, 7. (a) Ino bapaizi alimwi aba Levi ibatakali bapaizi bakaliswaangenyi buti? (b) Ino nciiyo nzi ncotukonzya kwiiya twalanga mbuli milimo iindene-indene iba Levi njobakali kucita? (Ba-Kolose 3:23)

⁶ Ikulanganya ziyandika zyakumuuya zyabantu bali tuulunzuma ituli mbotubede, wakali mukuli mupati kapati alimwi mweelwe wabapaizi ciindi eeco wakali musyoonto buyo. Aboobo, ibubambe bwakuti kabagwasyilizyigwa abamwi bamusyobo waba Levi bwakacitwa. Jehova wakaambila Musa kuti: “Pa ba-Levi mumaanza aa-Aroni amumaanza aabana bakwe. Balapedwa limwi mumaanza aakwe kunze lyabana ba-Israyeli.”—Myeelwe 3:9, 39.

⁷ Ba Levi bakaleendelezyedwe kabotu. Bakalaabanisyidwe mumikwasyi yotatwe, nkokuti luzubo lwa Gerisoni, lwa Kohati alimwi alwa Merari, imukwasyi umwi aumwi wakalipedwe mulimo wakucita. (Myeelwe 3:14-17, 23-37) Imilimo imwi yakali kulibonya kuti ilayandika kapati kwiinda imwi, pele yoonse yakali kuyandika kapati. Imulimo wakapedwe kuba Levi baluzubo lwa Kohati wakali kubikkilizya kubelekela afwaafwi kapati abbokesi lyacizuminano lisetekene alimwi akubotezya tente lyakubunganina. Nokuba boobo, muna Levi woonse kufwumbwa naa wakali waluzubo lwa Kohati naa pe, wakalijisi coolwe kapati. (Myeelwe 1:51, 53) Cilausisya ikujana kuti bamwi tiibakaukkomanina mulimo ngobakapedwe pe. Muciindi cakulibombya kubweendelezi bwa Leza, tiibakakkomana pe, eelyo bakatalika kulisumpula akulombozya zyuuno zisumpukide alimwi akuba amunyono. Muna Levi wazina lya Kora wakali akati kabaabo.

“S[en]a Mulayandaula Abwalo Bupaizi?”

8. (a) Ino Kora wakali ni? (b) Ino ncinzi ciboneka kuti ncicakapa Kora kuti bupaizi atalike kububona munzila yabuntu?

⁸ Kora tanaakali silutwe waluzubo lwaziinga zyaba Levi pe alimwi tanaakali silutwe mumukwasyi wa Kohati pe. (Myeelwe 3:30, 32) Nokuba boobo, wakali silutwe uulemekwa kapati mu Israyeli. Imilimo ya Kora ilakonzya kuti yakali yakubelekela antoomwe a Aroni alimwi abana bakwe. (Myeelwe 4:18, 19) Naakalibonena kutalondoka kwabaalumi aaba, Kora weelede kuti wakayeeya kuti: ‘Bapaizi aaba masimpe tabalondokede, ino kandilibombya kuli mbabo! Taciningalampa ciindi kuzwa leliya Aroni naakabumba moombe wangolida. Ikukomba moombe ooyo kwakapa kuti bantu besu batalike kukomba mituni. Lino Aroni imunyina Musa ngumupaizi mupati! Elo kuli kusalaulana kaka! Mbuti kujatikizya bana ba Aroni ba Nadabu alimwi Abihu? Masimpe tiibakali kucilemeka coolwe cakubeleka mulimo ngobakapedwe, aboobo Jehova wakabajaya.’ * (Kulonga 32:1-5; Levitiko 10:1, 2) Kufwumbwa naa mizeezo ya Kora yakali buti, cilasalala kuti bubambe bwabupaizi wakatalika kubona munzila yabuntu. Eeci cakapa kuti azangile Musa, Aroni alimwi a Jehova buya kumugama.—1 Samuele 15:23; Jakobo 1:14, 15.

9, 10. Ino Kora alimwi abazanginyina bakamutamikizya nzi Musa, alimwi nkaambo nzi ncobatakeelede kucitila boobu?

⁹ Mbwaanga Kora wakali muntu uuyunga  kapati, cakali cintu cuuba-uba ikoongelezya bantu bamwi kuti bazumine nzyaamba. Walo kubikkilizya a Datani alimwi a Abiramu, bakoongelezya bantu ibali 250 ibakazumina mizeezo yabo—boonse bakali basilutwe bambungano. Boonse bakasika kuli Musa a Aroni akwaamba kuti: “Bantu boonse buyo balasalala, alimwi Jehova mpali kati kabo. Nkaambonzi mwalipa bwami kwiinda imbungano yoonse yabantu ba-Jehova?”—Myeelwe 16:1-3.

¹⁰ Akaambo katwaambo ntobakazyi kale, bazangi aaba tiibakeelede kutongooka bweendelezi bwa Musa pe. Kakutanainda ciindi cilamfwu, Aroni alimwi a Miriamu abalo bakalicitide mbubwenya oobo. Abalo bakayeeyede mbuli bwakayeeya Kora. Kweelana abbuku lya Myeelwe 12:1, 2, bakabuzya kuti: “Sa Jehova ulaamba kumulomo wa Musa alike? Sa taambi kumilomo yesu aswebo?” Jehova wakali kuswiilila. Wakalailila Musa, Aroni alimwi a Miriamu kuti babungane kumulyango watente lyakuswaanganina kutegwa Atondezye musololi ngwasalide. Jehova wakaamba boobu cakusalazya: “Na kuli musinsimi akati kanu, mebo nde-Jehova ndalibonya kulinguwe mucilengano, ndaambaula awe muciloto. Pele embo obo mbabede mulanda wangu Musa uusyomeka muzintu zyoonse zyamuŋanda yangu.” Kumamanino, Jehova wakacita kuti Miriamu abe acinsenda kwakaindi kasyoonto buyo.—Myeelwe 12:4-7, 10.

11. Ino mbuti Musa mbwaakatweendelezya twaambo mumakani aajatikizya Kora?

¹¹ Kora alimwi abaabo mbaakali limwi beelede kuti bakalaazi makani aaya kabotu-kabotu. Aboobo ibuzangi bwabo tiibwakaleelede pe. Nokuba boobo, Musa wakasoleka kubandika ambabo cakukkazika moyo. Wakabakulwaizya kuti beelede kulumba kapati akaambo kazyoolwe zyabo kwiinda mukwaamba kuti: “Sa ncintu ciniini buyo Leza wa-Israyeli ncaakacita kukumwaandaanya abantu boonse ba-Israyeli akukumuswenya kufwaafwi kulinguwe?” Peepe, tiicakali “cintu ciniini” pe. Ba Levi bakajisi kale mulimo mupati. Ino ncinzi acimwi ncobakacili kulombozya? Imajwi aa Musa aatobela alayubununa mizeezo yakali mumyoyo yabo naakati: “Sa mulayandaula abwalo bupaizi?” * (Myeelwe 12:3; 16:9, 10) Pele, ino mbuti Jehova mbwaakacita kumakani aaya aakuzangila bweendelezi bwa Leza?

Mubetesi wa Israyeli Wanjililila Makani

12. Ino cilongwe cabana Israyeli a Leza icizumanana cakayeeme anzi?

¹² Ciindi Jehova naakapa Mulawo kubana Israyeli wakabaambila kuti, ikuti naa baswiilila, bakali kuzooba “musyobo uusalalisya” alimwi imusyobo wakali kulangilwa kuzumanana kusalala ikuti naa babuzumina bubambe bwa Jehova. (Kulonga 19:5, 6) Lino mbwaanga kuzanga kwakabuka kwakali kuyaambele, mubetesi wa Israyeli alimwi Similawo wakeelede kunjililila mumakani! Musa wakaambila Kora kuti: “Amuboneke kubusyu bwa-Jehova ankamu yako yoonse junza, yebo abalo a-Aroni. Lino muleelede kubweza umwi aumwi citentelo cakwe, mubike tununkilizyo mulinzizyo; nyoonse mulete umwi aumwi citentelo cakwe kubusyu bwa-Jehova, zitentelo zili myanda yobile amakumi osanwe; ayebo a-Aroni mulete  umwi aumwi citentelo cakwe.”—Myeelwe 16:16, 17.

13. (a) Ino nkaambo nzi ncokwakali kulisumpula kubazangi aaba ikuumpa tununkilizyo kumbele lya Jehova? (b) Ino mbuti Jehova mbwaakabacita bazangi aaba?

¹³ Kweelana a Mulawo wa Leza, bapaizi balikke mbabakeelede kutuula tununkilizyo. Imuzeezo ooyu wakuti ba Levi ibatali bapaizi batuule tununkilizyo kuli Jehova, wakeelede kubayoosya bazangi aaba. (Kulonga 30:7; Myeelwe 4:16) Pele Kora alimwi abeenzyinyina kunyina nobakayoowa pe! Ibuzuba bwakatobela, Kora “wakayobolola imbungano yoonse [ikuti bakazyanye a Musa alimwi a Aroni] kumulyango watente.” Cibalo citwaambila kuti: “Lino Jehova wakaambila Musa a-Aroni kuti, Amulyaanzaanye kumbungano eyi, [kutegwa ndibaumpe] lino lino.” Pele Musa alimwi a Aroni bakakombelela kuti bantu aaba batanyonyoonwi pe. Jehova wakakuzumina kukombelela ooko. Pele Kora alimwi ankamu yakwe, “kwakazwa mulilo kuli-Jehova, wasyukutya [naa kuumpa] abo bantu bali myanda yobile amakumi osanwe ibakali kutenta tununkilizyo.”—Myeelwe 16:19-22, 35. *

14. Ino nkaambo nzi Jehova ncaakabwezela ntaamo kulwana mbungano yabana Israyeli?

¹⁴ Icigambya ncakuti, bana Israyeli ibakalibonena ameso mbuli Jehova mbwaakabacita bazangi aaba kunyina nobakayiya ciiyo pe. “Lino buce, imbungano yoonse yaba-Israyeli yakatongaukila Musa a-Aroni, bati, Mwajaya bantu ba-Jehova.” Bana Israyeli bakali kuvwuninina bazangi! Mane limwi kukkazika moyo kwa Jehova kwakamana. Lino kwakanyina pe muntu naba omwe wakali kukonzya kukombeleda bantu kuli Leza naba Musa naa Aroni. Jehova wakaleta mapenzi kuti abapenzye aabo ibatakali kuswiilila, “nkabela bantu ibakafwa mulunyonyooko olo bakali zyuulu zili ikumi azine amyanda iili musanu aibili, kutabala abo ibakafwa mumakani aa-Kora.”—Myeelwe 16:41-49.

15. (a) Ino ntwaambo nzi twakeelede kupa kuti bana Israyeli batawayiwayi kuzumina busolozi bwa Musa alimwi a Aroni? (b) Ino cibalo eeci camuyiisya nzi kujatikizya Jehova?

¹⁵ Ibantu aaba nibakayeeya kabotu tiibakali kulangilwa kufwa pe. Bakeelede kukkala ansi akutuyeeyesya twaambo ooto. Nibakalibuzya mibuzyo iili mbuli yeeyi: ‘Ino mbabani bakabikka buumi bwabo muntenda kwiinda mukulisungula kuyookanana a Farao? Ino mbaani bakaamba kuti bana Israyeli beelede kuzwa mubuzike? Nguni wakaitwa kuti atante Mulundu wa Horebu, ibana Israyeli nobakazwa mubuzike kutegwa akaambaule amungelo wa Leza cakaanzambwene?’ Masimpe, makani aajatikizya Musa alimwi a Aroni aazyibidwe kabotu akatondezya mbuli mbobakali kusyomeka kuli Jehova alimwi ambuli mbobakali kubayanda bantu. (Kulonga 10:28; 19:24; 24:12-15) Jehova kunyina naakakukkomanina kujaya bazangi aaba pe. Nokuba boobo, nicakalibonya buya antangalala kuti bantu bakali kulangilwa kuzumanana kuzanga, wakabweza ntaamo yeelede. (Ezekieli 33:11) Makani aaya woonse alayandika kapati kulindiswe sunu. Nkaambo nzi?

Ikuzyiba Nzila Yeelede Mazubaano

16. (a) Ino ncitondezyo nzi cakali kukonzya kugwasya ba Juda bamumwaanda wamyaka wakusaanguna kusyoma kuti Jesu ngowakali mwiiminizi wa Jehova? (b) Ino nkaambo nzi Jehova ncaakabacincila bapaizi bana Levi, alimwi ino wakabikka bani?

¹⁶ Mazubaano, kuli “musyobo” mupya uulaa Jehova kuti Ngomubetesi uutalibonyi, Similawo alimwi Imwami. (Matayo 21:43) “Musyobo” ooyu wakatalisyigwa mumwaanda wamyaka  wakusaanguna C.E. Aciindi eeco, itente lyakubunganina lyakuciindi ca Musa lyakanjililwa busena atempele mbotu kapati yakali mu Jerusalemu, iba Levi nkobakacili kubelekela. (Luka 1:5, 8, 9) Nokuba boobo, mu 29 C.E. itempele aimbi, iyakumuuya yakaba, Jesu Kristo kali Mupaizi Mupati. (Ba-Hebrayo 9:9, 11) Imubuzyo uujatikizya bweendelezi bwa Leza alimwi wakabuka. Ino nguni Jehova ngwaakali kukonzya kubelesya kutegwa asololele “musyobo” wakwe mupya? Jesu ngowakalitondezya kuti ulasyomeka mumbazu zyoonse kuli Leza. Wakali kubayanda bantu. Alimwi wakacita zitondezyo zinji alimwi azigambyo. Nokuba boobo, mbubwenya ibwakali bamasyaanyinakulu batakali kunyoneka, bunji bwaba Levi bakamukaka Jesu. (Matayo 26:63-68; Incito 4:5, 6, 18; 5:17) Kumane boobo, mucibaka cabupaizi bwaba Levi, Jehova wakabikka bambi—ibapaizi bami. Ibapaizi bami bazumanana kubeleka kusikila sunu.

17. (a) Ino ninkamu nzi iibamba bapaizi bami sunu? (b) Ino mbuti Jehova mbwababelesya bapaizi bami?

¹⁷ Ino mbaani ibali munkamu yabapaizi bami sunu? Imwaapostolo Petro ulaingula mubuzyo ooyu mulugwalo lwakwe lwakusaanguna lwakasololelwa amuuya. Petro wakalemba boobu kunkamu yabananike iibabamba mubili wa Kristo: “Nywebo muli musyobo musale, bapaizi bami, cisi cisalala, bantu bavubidwe kuli-Leza kuti mukatondezye milimo iitembaulika yayooyo uwakamwiita kuzwa mumudima akumunjizya mumumuni wakwe uugambya.” (1 Petro 2:9) Kwiinda mumajwi aaya, cilasalala kuti nkamu yoonse yabananike iitobela mikondo ya Jesu njiibamba nkamu “[ya]bapaizi bami” Petro alimwi mbaakaita kuti “cisi cisalala.” Balabeleka mububambe Jehova mbwabelesya ikupa bantu bakwe malailile alimwi abusolozi bwakumuuya.—Matayo 24:45-47.

18. Ino baalu basalidwe baswaangenyi buti abapaizi bami?

¹⁸ Ibaiminina bapaizi bami mbaalu basalidwe, balo ibajisi mikuli mumbungano zyabantu ba Jehova munyika yoonse. Ibaalumi aaba tuleelede kubalemeka alimwi akubakulwaizya camoyo woonse, kufwumbwa naa mbananike naa pe. Nkaambo nzi? Nkaambo kakuti kwiinda mumuuya wakwe uusalala, Jehova wakasala baalu aaba kutegwa babelekele mumasena aabo. (Ba-Hebrayo 13:7, 17) Ino cili buti oobo?

19. Ino mmuunzila nzi ibaalu mbobasalwa amuuya uusalala?

¹⁹ Ibaalu aaba balatondezya zyeelelo izili mu Jwi lya Leza, ilyakalembwa kwiinda mumuuya uusalala wa Leza. (1 Timoteo 3:1-7; Tito 1:5-9) Aboobo, ikusalwa kwabo kulakonzya kwaambwa kuti kwakacitwa amuuya uusalala. (Incito 20:28) Ibaalu beelede kuti kabalizyi kabotu-kabotu Jwi lya Leza. Mbubwenya mbuli Mubetesi wabo Mupati iwakabasala, ibaalu beelede kusula cintu cili  coonse cili mbuli kusalaula mukubeteka kwabo.—Deuteronomo 10:17, 18.

20. Ino ncinzi ncomulumba kapati kubaalu babeleka canguzu?

²⁰ Muciindi cakunyonganya bweendelezi bwabo, tulabalumba kapati ibaalu besu ibabeleka canguzu. Ikusyomeka kwabo mumulimo kwamakumi-makumi aamyaka kanjikanji kulayumya lusyomo lwesu. Cakusyomeka balalibambila alimwi akweendelezya miswaangano yambungano, ikubeleka andiswe mumulimo wakukambauka “makani mabotu aa-Bwami,” alimwi akutulaya kwiinda mukubelesya Magwalo ciindi notweelede. (Matayo 24:14; Ba-Hebrayo 10:23, 25; 1 Petro 5:2) Balatuswaya ciindi notuciswa alimwi akutuumbulizya ciindi notuli mukulila. Cakusyomeka alimwi cakutaliyanda balagwasyilizya mumilimo ya Bwami. Imuuya wa Jehova uli alimbabo; ulabazumizya kucita oobo.—Ba-Galatiya 5:22, 23.

21. Ino ncinzi ibaalu ncobeelede kubikkila maano, alimwi nkaambo nzi?

²¹ Pele, ibaalu aaba tabalondokede pe. Akaambo kakuti balizyi kuti balalezya mumbazu zimwi, tabasoli kucita kamikami kubutanga pe, bwalo buli “ncikono ca Leza.” Muciindi cakucita boobo, balibona kuti ‘mbaasimilimonyina ibaleta lukkomano kuli babunyina.’ (1 Petro 5:3, NW; 2 Ba-Korinto 1:24) Ibaalu balibombya alimwi ibabeleka canguzu balamuyanda Jehova alimwi balizyi kuti mbobayaabumwiiya, mbungano iiyoogwasyigwa kapati. Kabakayeeyede kaambo aaka, lyoonse balasoleka kuyandaula bube bwa Leza mbuli luyando, lweetelelo alimwi akukkazika moyo.

22. Ino mbuti kwiinduluka cibalo cijatikizya Kora mbocayumya lusyomo lwanu mumbunga ya Jehova ilibonya ameso?

²² Elo kaka tulikkomenyi ikubaa Jehova kali ngo Muleli wesu uutalibonyi, Jesu Kristo kali ngo Mupaizi Mupati, ibapaizi bami kabali mbabamayi besu alimwi Banakristo basyomeka kabali basikutulaya! Nokuba kuti kunyina imbunga yeendelezyegwa abantu balya maila iikonzya kulondoka, tulakkomana nkaambo tulakonzya kubelekela Leza antoomwe abasyomima basyomeka, balo cakukondwa ibalibombya kubweendelezi bwa Leza!

Bupanduluzi buyungizidwe

Ino Ncinzi Ncomwaiya?

• Ino mbubambe nzi Jehova mbwaakacita ikulanganya ziyandika zyabana Israyeli?

• Ino nkaambo nzi kuzanga kwa Kora kuli Musa alimwi a Aroni ncokwatakeelede?

• Ino ncinzi ncotukonzya kwiiya swebo twalanga mbuli Jehova mbwaakabacita bazangi?

• Ino mbuti mbotukonzya kutondezya kuti tulalumba kububambe Jehova mbwabikkide mazubaano?

[Mibuzyo yaciiyo]

[Cifwanikiso icili apeeji 23]

Sena mulimo uuli woonse ngomupedwe kuli Jehova muubona kuti ncoolwe cipati?

[Cifwanikiso icili apeeji 24]

“Nkaambonzi mwalipa bwami kwiinda imbungano yoonse yabantu ba-Jehova?”

[Cifwanikiso icili apeeji 26]

Ibaalu basalidwe baiminina bapaizi bami