‘Anditobele Lyoonse’
‘Anditobele Lyoonse’
“Nciconya eco ncimwakaitilwa, nkaambo Kristo alakwe wakamucisilwa, wakamusiila cibonesyo, kuti mukatobele mumikondo yakwe.”—1 PETRO 2:21.
1, 2. Ino nkaambo nzi cikozyanyo cakulondoka kwa Jesu mukuyiisya ncocitasumpukide kapati cakuti inga tatukonzyi kuciiya?
JESU KRISTO ngo Mwiiyi mupati kwiinda bamayi boonse bakapona anyika. Kunze lyaboobo, wakalilondokede alimwi kunyina naakacita zibi ciindi coonse ncaakapona kali muntunsi. (1 Petro 2:22) Nokuba boobo, sena eeci caamba kuti icikozyanyo ca Jesu cabwiiyi cilisumpukide kapati cakuti swebo tobantu batalondokede inga tatukonzyi kuciiya? Peepe.
2 Ikweelana ambotwakabona mucibalo cainda, intalisyo yakuyiisya kwa Jesu lwakali luyando. Iluyando ncintu cimwi umwi aumwi wesu ncakonzya kuyandaula. Kanjikanji Ijwi lya Leza litukulwaizya kuyaambele mukutondezya bamwi luyando. (Ba-Filipi 1:9; Ba-Kolose 3:14) Jehova talangili zintu izilenge zyakwe nzyozitakonzyi kucita pe. Mubwini, mbwaanga “Leza nduluyando” alimwi wakatulenga mucikozyanyo cakwe, tulakonzya kwaamba kuti wakatubamba katuli bantu ibakonzya kutondezya luyando. (1 Johane 4:8; Matalikilo 1:27) Aboobo, ciindi notubala majwi aamwaapostolo Petro aalembedwe mulugwalo lwamutwe wacibalo, tulakonzya kwiingula cakusinizya kuti inga twazwidilila. Tulakonzya kwiitobela mikondo ya Kristo cakutaleya. Mubwini tulakonzya kuswiilila malailile aa Jesu aakuti: ‘Kamunditobela lyoonse.’ (Luka 9:23) Atubone mbuli mbotukonzya kwiiya luyando Kristo ndwaakatondezya, ikusaanguna kubwini mbwaakali kuyiisya, eelyo akubantu mbaakali kuyiisya.
Kubuyandisya Bwini Mbotwiiya
3. Ino nkaambo nzi bamwi ncocibayumina kwiiya, pele ino nkukulwaizya kuli buti kujanika kubbuku lya Tusimpi 2:1-5?
3 Ikutegwa tubuyandisye bwini mbotuyiisya bamwi, tweelede kuyandisya kubwiiya bwini oobo aswebo. Mazubaano, ikuyandisya kwiiya kwamusyobo ooyu tacili cintu cuuba-uba pe. Itwaambo mbuli kutayiya kabotu cikolo alimwi aziyanza zibi zyakukomena anzizyo zipa kuti bantu kabatakuyandi kwiiya amokwiinda moonse. Nokuba boobo, cilayandika kapati ikwiiya kuzwa kuli Jehova. Ibbuku lya Tusimpi 2:1-5 lyaamba kuti: “Mwanaangu, na watambula majwi aangu, akubamba kabotu malailile aangu, na wacenjeka kutwi kwako kubusongo, akubika moyo wako kukumvwisya makani, na walilila kumvwa, akoongolola kuti ube amaanu, na wabuyandaula mbuli insiliva, akubulangaula mbuli zintu ziyandika zisisidwe, ncobeni uyoomvwa kuyoowa Jehova, akujana luzibo lwa-Leza.”
4. Ino “kubika” moyo caamba nzi, alimwi ino nkuzilanga buti zintu kukonzya kutugwasya kutegwa tucite boobo?
4 Amubone kuti kuzwa mukapango 1 kusikila ku 4, cakwiinduluka-induluka tukulwaizyigwa ‘kuzumanana kuyandaula’ alimwi ‘akulangaula,’ kutali buyo ‘kutambula’ naa ‘kubamba kabotu’ pe. Ino ncinzi cikonzya kutukulwaizya ikucita boobu? Amubone mabala aakuti “kubika moyo wako kukumvwisya makani.” Buvwuntauzyi bumwi bwaamba kuti, kukulwaizya ooku “takuli kukulwaizya buyo bantu kuti babikkile maano pe; ibantu balaililwa kuti beelede kuba amizeezo imwi, nkokuti yakukonzya kulisungula kuzumina zili mukuyiisyigwa.” Pele, ino ncinzi cikonzya kupa kuti tuzumine alimwi akulisungula kwiiya zeezyo Jehova nzyali mukuyiisya? Mbotuzibona zintu bulakonzya kugwasya. “Luzibo lwa-Leza” tweelede kulubona mbuli “nsiliva” alimwi mbuli “zintu ziyandisi zisisidwe.”
5, 6. (a) Ino ncinzi cikonzya kucitika mukuya kwaciindi, alimwi ino mbuti mbotukonzya kucita ikutegwa eeci citacitiki? (b) Ino nkaambo nzi ncotweelede kuzumanana kuyungizya zintu ziyandisi zyaluzibo ndotwakajana mu Bbaibbele?
5 Tacili cintu ciyumu ikuzilanga munzila iili boobo zintu pe. Mucikozyanyo, “luzibo lwa-Leza” ndomwakaiya lulabikkilizya abwini bwamakanze aa Jehova aakuti bantu basyomeka bayoopona kukabe kutamani mu Paradaiso anyika. (Intembauzyo 37:28, 29) Ciindi nomwakaiya bwini buli boobo, kakunyina akudooneka mwakabubona kuba cintu ciyandika ncobeni, iluzibo lwakamuletela bulangizi alimwi alukkomano lunji mumizeezo amumoyo. Ino mbuti mazubaano? Sena kulumba kwanu kujatikizya cintu eeci ciyandisi kapati kuyaabubunda naa kunyongana akaambo kakuti avwula mazuba? Lino amusole kucita zintu zyobilo. Cakusaanguna, amukubukulusye kulumba kwanu, nkokuti ikwiibaluka lyoonse ikaambo ncomweelede kubikkila maano kubwini boonse Jehova mbwayiisya, kubikkilizya abwini mbomwakaiya myaka minji yainda.
6 Cabili, amuzumanane kuyungizya luzibo ndomujisi. Alimwi ikuti naa musya ibbwe liyandisi, kunyina nomukonzya kwiide kulibweza buyo akuti weela mulewu, mpoonya akutalika kweenda moyo kuukkede pe. Sena inga tamusyi alimwi akubona naa aciliko aambi? Ijwi lya Leza lilizwide pamu amabwe mayandisi aabwini. Kufwumbwa naa ali ongaye ngomwakajana kale, mulakonzya kujana aambi. (Ba-Roma 11:33) Ciindi nomwaiya cibeela cimwi cabwini, mulakonzya kulibuzya kuti: ‘Ino bwini oobu mbuyandisi buti? Sena bulandipa busongo ncobeni kujatikizya bube bwa Jehova naa makanze aakwe? Sena bulapa busolozi bugwasya ibukonzya kundigwasya kutobela mikondo ya Jesu?’ Ikukkalaansi akuyeeya mibuzyo iili boobo kuyoomugwasya kuyungizya luyando kubwini Jehova mbwali mukumuyiisya.
Kutondezya Luyando Kubwini Mbotuyiisya
7, 8. Ino ninzila nzi zimwi mbotukonzya kutondezya bamwi kuti tulabuyanda bwini mbotwakaiya kuzwa mu Bbaibbele? Amupe cikozyanyo.
7 Ino mbuti mbotukonzya kutondezya kuti tulabuyanda bwini mbotwakaiya kuzwa mu Jwi lya Leza ciindi notuyiisya bamwi? Kwiinda mukutobela cikozyanyo ca Jesu, tusyoma Bbaibbele notukambauka alimwi anotuyiisya. Myaka misyoonto buyo yainda, bantu ba Leza munyika yoonse bakakulwaizyigwa kubelesya Bbaibbele mumulimo wabo wakubuleya. Ciindi nomubelesya muzeezo ooyu, amusoleke kujana nzila mbomukonzya kupa kuti mwiniŋanda abone kuti nywebo kumugama mulacilemeka eeco ncomuli mukumwaambila kuzwa mu Bbaibbele.—Matayo 13:52.
8 Mucikozyanyo, mwaka wamana nozyakamana kunyonyoona zigwebenga mudolopo lya New York, mucizi umwi Munakristo wakali kubandika abantu mbaakali kuyaanya mumulimo wakwe imajwi aali mubbuku lya Intembauzyo 46:1, 11. Kusaanguna wakali kubabuzya bantu mbuli mbobakali kulimvwa naakamana kucitika manyongwe aayo. Wakali kuswiilisisya bwiinguzi bwabo akuzuminizya, eelyo wakali kubuzya kuti: “Sena inga ndamubalila lugwalo ilwaanduumbulizya kapati muciindi eeci cikatazya?” Basyoonto buyo mbebakali kukaka alimwi makani manji aakondelezya akabandikwa. Ciindi naakali kwaambaula abaabo bacili bana-bana, kanjikanji mucizi ooyu wakali kubaambila kuti: “Lino yakkwana myaka iili 50 kandiyiisya Bbaibbele. Kunyina nondakasikilwa penzi noliba lyomwe ibbuku eeli ndyolyakaalilwa kumana.” Kwiinda mukusikila bantu cakusinizya alimwi cabusungu, tulabatondezya kuti tulazilemeka alimwi akuziyanda nzyotwakaiya kuzwa mu Jwi lya Leza.—Intembauzyo 119:97, 105.
9, 10. Ino nkaambo nzi ncokuyandika kubelesya Bbaibbele notwiingula mibuzyo iijatikizya lusyomo lwesu?
9 Ciindi bantu nobatubuzya kujatikizya nzyotusyoma, eeci nceciindi cibotu ncotweelede kubatondezya kuti tulaliyanda Jwi lya Leza. Akaambo kakuti tutobela cikozyanyo ca Jesu, ibwiinguzi bwesu tabuzwi buyo mumizeezo yesu pe. (Tusimpi 3:5, 6) Muciindi caboobo, notwiingula mibuzyo tubelesya Bbaibbele. Sena mulayoowa kuti ambweni umwi inga wamubuzya mubuzyo ngomutalangili kwiingula? Amulange-lange zintu zyobilo nzyomukonzya kucita kutegwa mumane penzi eeli.
10 Amulibambile kabotu-kabotu. Imwaapostolo Petro wakalemba kuti: “Amulemeke Kristo mumyoyo yanu kuti ngo-Mwami. Amube balibambide lyoonse, kuti mubapandulwide boonse bamubuzya makani aalusyomo lumukalilide, pele amuvuwe amoyo mutete akuyoowa Leza.” (1 Petro 3:15) Sena mulilibambilide kukwabilila lusyomo lwanu? Mucikozyanyo, ikuti umwi kayanda kuzyiba kaambo ncomutatoleli lubazu muzilengwa naa mumicito imwi iitali yamumagwalo, tamweelede kwaamba buyo kuti “cikombelo ncondinjila cilakasya kucita boobo” pe. Ibwiinguzi buli boobo bulakonzya kutondezya kuti bantu bamwi mbabamusalila cakucita, aboobo inga mweelela kuba mukabunga kamaseseke kabyaabi. Cilakonzya kugwasya kwaamba kuti, “Jwi lya Leza, Ibbaibbele lilakasya kucita boobu” naa kuti “cilamunyemya Leza ngondikomba.” Eelyo akupandulula bweelede ikaambo ncocimunyemya Leza.—Ba-Roma 12:1.
11. Ino ncibelesyo nzi cikonzya kutugwasya kutegwa tulibambile kwiingula mibuzyo iijatikizya bwini ibuli mu Jwi lya Leza?
11 Ikuti naa kwajanika kuti tamulibambide, sena inga tamukonzyi kujana ciindi icili mbocibede kwiiya zili mubbuku lya Kukambitsirana za m’Malemba ikuti naa nkolili mumulaka wanu? * Amusale mitwe misyoonto buyo iiboneka kuti inga yabuka mumuunda alimwi kamutuyeeya twaambo tumwi twamu Magwalo. Ibbuku lya Kukambitsirana alimwi a Bbaibbele zyeelede kuti kamuzijisi. Tamweelede kweenkeenka kuzibelesya zintu eezi zyobilo pe, kwiinda mukwaamba kuti mulijisi bbuku lyakuvwuntauzya ndomuyanda kubelesya kujana bwiinguzi bwa Bbaibbele.
12. Ino mbuti mbotukonzya kwiingula ikuti katutabuzyi bwiinguzi kumubuzyo wa Bbaibbele wabuzyigwa?
12 Tamweelede kwiide kulibilika kufwumbwa cintu pe. Kunyina muntu uutalondokede uujisi bwiinguzi boonse pe. Aboobo ciindi nomwabuzyigwa mubuzyo uujatikizya Bbaibbele ngomutakonzyi kwiingula, mulakonzya kwiingula kuti: “Ndalumba kumubuzyo ooyo. Pele kwaamba masimpe, tandizi bwiinguzi bwanguwo pe, pele ndili masimpe kuti Ibbaibbele inga lyawiingula. Ndili muntu uyandisya kuvwuntauzya kuzwa mu Bbaibbele, aboobo ndiyoovwuntauzya, eelyo ndizoopiluka abwiinguzi.” Kwaamba cakusalazya alimwi akulibombya munzila iili boobu kulakonzya kupa kuti mubandi ukakonzye kuzumanana.—Tusimpi 11:2.
Kuyanda Bantu Mbotuyiisya
13. Ino nkaambo nzi ncotweelede kubalanga munzila mbotu lyoonse aabo mbotukambaukila?
13 Jesu wakatondezya luyando kubantu mbaakali kuyiisya. Ino mbuti mbotukonzya kumwiiya mumakani aaya? Tatweelede kuba basigama kubantu mbotukkede limwi pe. Masimpe kuti “nkondo yabuzuba bupati bwa-Leza Singuzuzyoonse” iyaabuswena alimwi bantu banji bayoonyonyoonwa. (Ciyubunuzyo 16:14; Jeremiya 25:33) Pele tatuzi baya kufwutuka alimwi abaya kufwa. Ilubeta oolu luli kumbele, ndulwa Jehova alimwi a Jesu Kristo ngwasalide. Kusikila limwi lubeta lukainde, bantu boonse tubabona kuba baabo balangilwa kuba babelesi ba Jehova.—Matayo 19:24-26; 25:31-33; Incito 17:31.
14. (a) Ino mbuti mbotukonzya kulilingula kutegwa tubone naa tulaalweetelelo kubantu? (b) Ino mmuunzila nzi zigwasya mbotukonzya kutondezya lweetelelo alimwi akuti tulabayanda bantu abamwi?
14 Mbubwenya mbuli bwakali Jesu, eelyo andiswe tulasola kubeetelela bantu. Tulakonzya kulibuzya kuti: ‘Sena ndilabeetelela bantu ibakeenwa abantu bampelenge alimwi akweenwa abukombi bwanyika, imapolitikisi alimwi azintu zijatikizya makwebo? Ikuti naa batondezya kuti mulumbe ngotubaambila tabauyandi, sena ndilateelela kaambo ncobacitila boobo? Sena ndilayeeya kuti mebo lwangu naa bantu bamwi buyo lino ibabelekela Jehova cakusyomeka mbobakali kulimvwa mbubwenya oobu? Sena bukambausi bwangu ndabucita bweelede? Antela, sena bantu aaba ndibabona kuti mbantu batakonzyi kucinca?’ (Ciyubunuzyo 12:9) Ikuti bantu babona ncobeni mbotubeetelela, balalangilwa kuuzumina mulumbe wesu. (1 Petro 3:8) Ilweetelelo alimwi lulakonzya kutukulwaizya kutondezya luyando kubantu mbotuyaanya mumulimo wesu. Tulakonzya kwiilemba mibuzyo yabo alimwi azintu nzyobabikkila maano kapati. Notwapilukila tulakonzya kubatondezya kuti twakali kwaayeeya makani ngobakaamba notwakabaswaide. Ikuti naa baliyandide kuzyiba zinji kwaciindi eeco, amubaambile kuti mulilibambilide kubagwasya.
15. Ino nkaambo nzi ncotweelede kuyandaula zintu bantu nzyobacita kabotu, alimwi ino mbuti mbotukonzya kucita boobo?
15 Mbubwenya mbuli bwakacita Jesu, tulabikkila maano kubona zintu nzyobacita kabotu. Ambweni muzyali uuli alikke uli mukusola kukomezya bana bakwe munzila mbotu. Ambweni mmwaalumi uusola-sola kujana zintu mukwasyi wakwe nzyuuyanda. Imucembele watondezya luyandisyo mumakani aakumuuya. Sena tulazibona zintu zili boobo mubantu mbotuyaanya mumulimo alimwi akubalumbaizya? Kwiinda mukucita boobu, tulakonzya kujalula nzila yakuti tukonzye kuzyibana alimwi cilakonzya kutuubila-ubila kucita bukamboni bujatikizya Bwami.—Incito 26:2, 3.
Kulibombya Kulayandika Mukutondezya Luyando
16. Ino nkaambo nzi ncotweelede kuba amoyo mutete alimwi akubalemeka aabo mbotukambaukila?
16 Ikuyanda bantu mbotuyiisya kuyootukulwaizya kutobela kucenjezya kwa Bbaibbele kugwasya kwakuti: “Luzibo lulatukumusya, pele luyandano lulayaka.” (1 Ba-Korinto 8:1) Jesu wakalijisi luzibo lunji kapati, pele kunyina naakali kulitukumuna pe. Aboobo ciindi nomwaambila bamwi kujatikizya lusyomo lwanu, tamweelede kwaambaula cakukazyanya buya naa kulitondezya kuti muli basongo kwiinda mbabo. Imbaakani yesu nja kwaamba makani aakonzya kunjila bantu mumoyo alimwi akukwelelezya bantu kubwini mbotuyandisya. (Ba-Kolose 4:6) Amuyeeye kuti, iciindi Petro naakali kulaya Banakristo kuti beelede kuba bantu balibambide kukwabilila bwini, wakayeezya alimwi kuti tweelede kucita oobo “amoyo mutete akuyoowa Leza.” (1 Petro 3:15) Ikuti naa katujisi moyo mutete alimwi akulemeka, tulalangilwa kukwelelezya bantu kuli Leza ngotukomba.
17, 18. (a) Ino mbuti mbotukonzya kucita ciindi bamwi nobatukazya kujatikizya kweelela kwesu kuba babelesi? (b) Ino nkaambo nzi ikuzyiba milaka yansiku yakali kubelesyegwa kulemba Bbaibbele ncokutayandiki kapati kuli basikwiiya Bbaibbele?
17 Takuyandiki kukkomanisya bantu kwiinda muluzibo ndotujisi naa lwiiyo pe. Ikuti naa mucilawo canu kuli bantu batayandi kuswiilila kumuntu uutakwe naakasika kucikolo cipati ca university naa uutajisi cuuno cili coonse, iciimo cili boobu taceelede kumutyompya pe. Jesu kunyina naakabikkila maano kuli baabo bakali kwaamba kuti kunyina naakaiya muzikolo zisumpukide zyamumazuba aayo; naa kutobela mizeezo yakadumide yakusola kukkomanisya bantu kwiinda mulwiiyo luli mbolubede.—Johane 7:15.
18 Ikulibombya alimwi aluyando nzyezintu ziyandika kapati kubabelesi Banakristo kutali kubona aumwi mpaakataana mulwiiyo lwakumubili pe. Sikuyiisya Mupati Jehova nguutupa kuti tweelele mumulimo. (2 Ba-Korinto 3:5, 6) Kufwumbwa naa bamafwundisi ba Kristendomu baamba nzi, tatuyandiki kwiiya mulaka wakaindi wakabelesyegwa kulemba Bbaibbele kutegwa tube bamayi ba Jwi lya Leza pe. Jehova wakalailila kuti Bbaibbele lilembwe munzila njolikonzya kumvwika, mumabala alimvwisya cakunga muntu woonse ulakonzya kubumvwisya ibwini buyandika kapati. Ibwini oobu bulacaala mbobubede kufwumba bwasandululwa mumyaanda-myaanda yamilaka. Aboobo, ikuzyiba milaka yansiku nokuba kuti ziindi zimwi kulagwasya, takuyandiki kapati pe. Kunze lyaboobo, kulisumpula akaambo kakuzyiba milaka minji kulakonzya kupa kuti muntu umwi anyonganye bube buyandika kapati ku Banakristo bakasimpe—ikuba bantu bakonzya kuyiisyigwa.—1 Timoteo 6:4.
19. Ino mmuunzila nzi mulimo wesu wa Bunakristo mbouli kubelekela bamwi?
19 Kakunyina akudooneka, imulimo wesu wa Bunakristo mmulimo uuyanda bantu balibombya. Lyoonse tulilibambilide kukazyigwa, kutalemekwa nokuba kupenzyegwa buya. (Johane 15:20) Pele, tucita mulimo uuyandika kapati ciindi notubeleka mulimo wesu cakusyomeka. Ikuti naa twazumanana kubelekela bamwi cakulibombya mumulimo ooyu, tuli mukucita mbuli Jesu Kristo mbwaakatondezya luyando kubantu bamwi. Amubone kaambo aaka: Ikuti naa twabakambaukila bantu ibali cuulu batusulide naa batukazya kutegwa tujane buyo naba omwe uuli mbuli mbelele, sena inga tatwaambi kuti twapengela aakaliko? Mbombubo buya! Aboobo kwiinda mukuzumanana mumulimo, tuli mukubelekela bantu ibali mbuli mbelele cakusyomeka aabo mbotuciyandika kusikila. Kakunyina akudooneka, Jehova alimwi a Jesu bayoobona kuti ibantu banji bayandika kapati bajanika alimwi akugwasyigwa mamanino kaatanasika.—Hagai 2:7.
20. Ino ninzila nzi zimwi mbotukonzya kuyiisya kwiinda mucikozyanyo?
20 Ikuyiisya kwiinda mukubelesya zikozyanyo ninzila ayimbi yakutondezya kulisungula kubelekela bamwi. Mucikozyanyo, tuyanda kuyiisya bantu kuti kubelekela Jehova ‘Leza uukondwa’ nenzila mbotu kwiinda alimwi iikkazika moyo mubuumi bwamuntu. (1 Timoteo 1:11) Ciindi basimukoboma, mbotwiiya limwi alimwi ambotubeleka limwi nobalanga mbuli mbotulilemeka alimwi ambotubeendelezya, sena balabona kuti tulikkomenyi alimwi akukkalwa moyo? Mbubwenya buyo, tulabayiisya basikwiiya Bbaibbele ikuti imbungano ya Banakristo mbobusena bujanika luyando munyika eeyi yalunya alimwi iiyoosya kapati. Sena mbotwiiya limwi Bbaibbele balabona kuti tulabayanda boonse ibali mumbungano alimwi tulasoleka canguzu kutegwa luumuno luzumanane akati kesu?—1 Petro 4:8.
21, 22. (a) Ino kulilingula kujatikizya mulimo wesu kulakonzya kupa kuti tujane coolwe cakucita nzi? (b) Ino ncinzi ciyoobandikwa muzibalo zitobela?
21 Ziindi zimwi ciimo cakulisungula kumulimo wesu cilakonzya kutukulwaizya kulilingula ciindi aciindi. Ikucita boobo cakusinizya kulakonzya kupa kuti tubone naa tulakonzya kuba baabo ibakonzya kuyungizya mulimo wesu kwiinda mukutalika mulimo waciindi coonse naa kuya kubelekela kubusena bubulide. Ibantu bamwi balisalila kwiiya mulaka wakunze aacisi kutegwa babelekele baabo ibayaabuvwula mucilawo ncobakkede. Ikuti naa bubambe oobu nkobuli, amububikkile maano kapati kwiinda mukubupailila. Ikubelekela bamwi kuletela lukkomano kapati, kukkalwa moyo alimwi akuliiba mumizeezo.—Mukambausi 5:12.
22 Mumbazu zyoonse, atuzumanane kwiiya Jesu Kristo kwiinda mukuyumya luyando lwesu kubwini mbotuli mukuyiisya alimwi akubantu mbotuyiisya. Ikukomezya alimwi akutondezya luyando mumbazu eezi zyobile kuyootugwasya kubamba ntalisyo mbotu yakuba mwiiyi uuli mbuli Kristo. Pele, ino mbuti mbotukonzya kubamba ntalisyo eeyo? Izibalo zitobela ziyoobandika nzila zimwi zigaminina zyakuyiisya Jesu nzyaakabelesya.
Bupanduluzi buyungizidwe
^ munc. 11 Lyakalembwa a Bakamboni ba Jehova.
Ino Inga Mwaingula Buti?
• Ino ncisyomezyo cili buti ncotujisi cakuti cikozyanyo ca Jesu cakuyiisya tacisumpukide kapati cakuti inga twaalilwa kuciiya?
• Ino mbuti mbotukonzya kutondezya kuti tulabuyanda bwini mbotwakaiya kuzwa mu Bbaibbele?
• Ino nkaambo nzi ncotweelede kuzumanana kuba bantu babombe ciindi notwajana luzibo lunji?
• Ino ninzila nzi zimwi mbotukonzya kutondezya luyando kubantu mbotuyiisya?
[Mibuzyo yaciiyo]
[Zifwanikiso izili apeeji 12]
Amulibambile kabotu-kabotu
[Zifwanikiso izili apeeji 13]
Ikuti kamuluyandisya “luzibo lwa-Leza,” mulakonzya kulibelesya kapati Bbaibbele
[Cifwanikiso icili apeeji 14]
Tulatondezya luyando kubantu kwiinda mukubaambila makani mabotu