Basimukoboma Ibali Kabotu Balagwasya Kapati

“Mweenzinyoko [naa simukobonyoko, NW] uuli [a]fwaafwi mubotu kwiinda munyoko uuli kule.”—Tusimpi 27:10.

SIKWIIYA umwi wamumwaanda wamyaka wakusaanguna C.E. wakabuzya Jesu kuti: ‘Ino munamuzyeesu naa simukoboma nguni?’ Mukwiingula, Jesu tanaakamwaambila cacigaminina muntu weelede kuba simukobonyina pe, pele wakamwaambila cintu cipa kuti muntu abe simukoboma mwini-mwini. Cakutadooneka, mweelede kuti mulicizyi kabotu cikozyanyo ca Jesu. Ibanji cikozyanyo eeci bacizyi kuti ncikozyanyo camu Samariya siluzyalo alimwi cililembedwe mu Makani Mabotu aa Luka. Mboobu Jesu mbwaakaluula caano eeci:

“Umwi muntu wakali kukunkulika kuzwa ku-Jerusalemu kuya ku-Jeriko, nkabela wakawida mubafumpi, bakamusamununa, bamuumisya, bamusia uli mulufu. Kwakaba buyo kuti mupaizi umwi wakakunkulika enzila eyo, naakamubona wakamwiinda ambali. Mbubonya obo amu-Levi, naakasika nkuko akumubona, wakainda ambali. Anu mu-Samariya umwi uwakali kuya bweenda wakasika kulinguwe, naakamubona wakamufwida luzyalo, wakaswena, wazyaanga zicisa zyakwe, wazitila mafuta awaini, nkokuya wamutantika ambongolo yakwe, wamutola kuŋanda yabeenzu, wamubamba. Nobwakaca naakayeeya kweenda wakagwisya masheleni obile, wapa simeenzaakwe wati kulinguwe, Mubambe kabotu, eno kufumbwa ngoti sowe kwiinda aya, ndaboola ndilakubweedezezya. Ino yebo uyeeya buti, kulooyo uwakawida mubafumpi nguni uwakaba munamuzyaabo, kulibaabo botatwe?”—Luka 10:29-36.

Kulibonya kuti sikwiiya wakamvwisya ncocakali kwaamba cikozyanyo eeci. Kakunyina akusowa ciindi, wakamwiingula munzila iiluzi akwaamba muntu iwakali simukobonyina kumwaalumi iwakaumwa naakati: “Kai nguwenya oyo uwakamufwida luzyalo.” Mpoonya Jesu wakamwaambila kuti: “Koya ayebo ucite mbubonya.” (Luka 10:37) Elo taciliboteli kaka cikozyanyo eeci cipandulula ncocaamba kuba simukobonyina mwini-mwini! Alimwi cikozyanyo ca Jesu cilakonzya kutukulwaizya kulibuzya kuti: ‘Ino ndili muntu uli buti kuli basimukoboma? Sena ndeendelezyegwaa musyobo wangu naa cisi nkondizwa mukusala baabo beelede kuba basimukoboma? Sena twaambo ootu tupa kuti nditabi muntu waangulukide kugwasya kufwumbwa muntuma ngondabona kali mumapenzi? Sena ndilasolekesya kuba simukoboma uli kabotu?’

Mpaali Ayeelede Kutalikila?

Ikuti naa twabona kuti kuli mpotweelede kubambulula mukaambo aaka, tweelede kutalikila mumizeezo yesu. Ncotweelede kubikkila maanu kapati ncakuba bantu bali kabotu kuli basimukoboma. Alimwi eeci cilakonzya kupa kuti tube abasimukoboma ibali kabotu. Imyaka iitandila ku 2,000 yainda, Jesu wakakakankaizya kaambo aaka kajatikizya bukkale bwabantu mu Mulumbe wakwe waa Cilundu uudumide. Wakaamba kuti: “Zintu zyoonse zili buti nzimuyanda kuti bantu bamucitile, anywebo amubacitile nzizyonya.” (Matayo 7:12) Ikweendelezya bamwi munzila yabulemu alimwi yaluzyalo kulabakulwaizya kutegwa anywebo bamweendelezye munzila njimunya.

Mucibalo cakuti “Ikuyanda Basimukobonyoko,” cakazwa mumagazini iitegwa The Nation Since 1865, simubweza twaambo alimwi uubeleka kali mulembi wazina lya Lise Funderburg wakabandauka tuntu tusyoonto-syoonto itukonzya kucitwa ikukulwaizya lukamantano abasimukoboma. Mwanakazi ooyu wakalemba kuti: “Ndiyanda kuti . . . kakuli kuyanzana akati kabantu mutuntu tusyoonto-syoonto ntobakonzya kucitilana caluyando basimukobonyina. Mbuli kutolelana miteende kuŋanda, kulanganya bana ciindi bazyali babo nobatako alimwi akubaulila zimwi zintu kucintoolo. Ndiyanda kuti cilongwe eeci cizumanane munyika eeyi mwalo ikwaandaana mokuyaabwiindilila buya, ibantu muzilawo mobatakamantene alimwi mutakwe lukwabililo akaambo kakuyoowa alimwi amilandu.” Mpoonya mwanakazi ooyu ulazumanana kwaamba kuti: “Kuli mpomweelede kutalikila. Alimwi ayelede kuba ali simukobonyoko ngomubambene limwi kukkala.”

Alimwi magazini iitegwa Canadian Geographic yakapa kaambo kamwi kayandika ikakonzya kutugwasya kubalanga munzila mbotu basimukoboma. Imulembi wazina lya Marni Jackson wakaamba kuti: “Mbubwenya mbuli banamukwasyi, basimukoboma mbantu mbomutakonzyi kulisalila buya lyoonse mubuumi bwanu. Kucita cilongwe ambabo kuyandika kubaa bupampu, bulemu alimwi alubomba.”

 Basimukoboma Ibali Kabotu—Mbaabi Balisungwide

Masimpe, ibunji bwesu tulakonzya kulimvwa kuba bantu bataangulukide kusikila basimukoboma. Cilakonzya kubonekaanga cili buyo kabotu kubatantamuka. Nokuba boobo, Ibbaibbele lyaamba kuti “kupa kuli coolwe kwiinda kupegwa.” (Incito 20:35) Aboobo, imuntu uucizyi kabotu kukkala abasimukobonyina ulasolekesya kubazyiba kabotu bantu mbakkede limwi. Nokuba kuti katajisi muzeezo buya wakupangana cilongwe ambabo, ulasolekesya kwaambauzyanya ambabo majwi masyoonto buyo ciindi aciindi, ambweni kwiinda mukusaanguna kumwetamweta kulimbabo naa ikutambika kwaanza.

Mbuli mbokwapandululwa atalaawa, ‘tuntu tusyoonto-syoonto buyo’ bantu ntobacitilana abasimukobonyina tulayandika kapati mukutalisya alimwi akuzumanana kubaa cilongwe cibotu abasimukoboma. Aboobo cilagwasya kapati kuyeeyela limwi majwi aaluzyalo ngomukonzya kubelesya kuli basimukobonyoko, cili boobo akaambo kakuti kucita boobo kanjikanji kutolaambele muuya wakubelekela antoomwe alimwi akulemekana. Kunze lyaboobo, kwiinda mukucita boobo, tuyootobela lulayo lwamu Bbaibbele lwakuti: “Utakasyi lugwasyo kubantu balweelede, na ulakonzya kucita.”—Tusimpi 3:27; Jakobo 2:14-17.

Basimukoboma Ibali Kabotu—Balalumba Kapati

Nocali cibotu kapati nokwali kutegwa bantu boonse balalumba kapati eelyo nobagwasyigwa alimwi akupegwa zipego. Pele mukubula coolwe, eeci talili lyoonse nocili boobo pe. Ikugwasyigwa kapati alimwi azipego zibotu zipegwa zilatambulwa kakunyina kutondezya kuti muntu ooyu wakkomana kupegwa cintu eeci cakuti ooyu wapa ulakonzya kuyeeya kuti, ‘Kwamana kunyina nondiya kwiindulula alimwi kumupa cintu pe!’ Ziindi zimwi, nokuba kuti mulakonzya kusoleka kapati kubaanzya basimukobonyoko munzila yabulongwe, balakonzya kumwiingula munzila iitondezya kutabikkila maano.

Pele ibunji bwaziindi, takuli kuti simukobonyoko talumbi buya pe, nokuba kuti ulakonzya kulibonya munzila eeyo. Ambweni nkwaakazwa tabazibide kucita boobo, aboobo cilakonzya kumupa kuwayawaya naa kutaanguluka alimwi akumupa kulilemeka munzila iitondezya kutabikkila maano akulibonya munzila iitali yabulongwe. Kunze lyaboobo, munyika eeyi mwalo bantu mobatalumbi, bamwi balakonzya kubudooneka bulongwe bwanu naa kumuyeeyela kuti kuli makanze aamwi ngomujisi. Mweelede kubakkazyika moyo kutegwa batamuyeeyeli zimbi. Aboobo, kuba balongwe babo kulakonzya kutola ciindi alimwi kulayandika kukkazyika moyo. Nokuba boobo, kulibaabo baiya kuba baabi alimwi ibatambula zintu cakulumba, bayootola ambele luumuno alimwi alukkomano kuli basimukobonyina.

Nokwacitika Penzi

Simukoboma uuli kabotu ulakozya kutugwasya kapati ciindi nokwacitika ntenda. Muciindi camapenzi, imuuya wini-wini ngobajisi basimukoboma ulatondezyegwa. Kuli zyakuluula zinji zijatikizya milimo bantu njobacitila basimukobonyina cakutaliyanda muziindi zili boobu. Kulibonya kuti mapenzi alabakamantanya bantu abasimukobonyina mukubelekela antoomwe kakunyina kusungilizyigwa buya alimwi akukulwaizyigwa kugwasyanya. Nobaba baabo batamvwani abeenzyinyina kanjikanji balabelekela antoomwe abamwi.

Mucikozyanyo, ipepa lyamakani litegwa The New York Times lyakaamba kuti, iciindi nokwakacitika muzuzumo wanyika mucisi ca Turkey mu 1999, aabo bakali basinkondonyina kuzwa kaindi bakabelekela antoomwe calukamantano. Imulembi muna Giliki wazina lya Anna Stergiou wakalemba boobu mumuteende waku Athens: “Kwamyaka minji twakayiisyidwe kusulaika bantu bakucisi ca Turkey. Pele mapenzi aabo aatalivwulili taatukondelezyi pe. Twakabijilwa kapati cakuti twakalila mbuli kuti kusulana kwakaliko kwaciindi cilamfwu kwakamana notwakabona bana bavwanda bafwide.” Nokwakaambilizyigwa kuti mulimo wamana, inkamu zyabasikuvwuna bantu izyabana Giliki bakakaka kuuleka mulimo ooyu wakuyandaula baabo bakacili kupona bakavwumbilidwe.

Ikutola lubazu mumulimo wakuvwuna bantu eelyo nokwacitika ntenda, masimpe mulimo uuyandika kapati alimwi uuyanda kulyaaba ikugwasya basimukoboma. Nokuba boobo, ikuvwuna simukoboma kwiinda mukumucenjezya kaatana kucitika mapenzi kulakonzya kwaambwa kuti nduyando. Mukubula coolwe, makani aakaindi atondezya kuti aabo bacenjezya basimukobonyina kujatikizya mapenzi aaboola kanjikanji kunyina nobatambulwa kabotu pe, akaambo kakuti iciindi nobacenjezyegwa inga mapenzi aaya taana citika pe. Aabo basikucenjezya kanjikanji tabasyomwi pe. Kulibaabo basola kugwasya bantu banyina ncobazyi kujatikizya ntenda iilangilwa kucitika bayandika kuliyumya kapati alimwi akulyaaba.

Imulimo Mupati Uukonzya Kucitwa Kuli Basimukoboma

Sunu, kuli cintu cipati cilangilwa kubacitikila bantu eeco ciinda amapenzi aaletwaa zilengwaleza.  Ooyu mmulimo wakasinsimwa ngwayoocita Leza Singunzuzyoonse wakugwisya milandu munyika, bubi alimwi amapenzi oonse. (Ciyubunuzyo 16:16; 21:3, 4) Eeci cintu ciyandika kapati ciya kucitika ncobeni! Bakamboni ba Jehova baliyandide kapati kwaambila bantu banji luzibo ndobayandika kutegwa bakafwutuke. Nkakaambo kaako ncobazumanana kutola lubazu mumulimo wabo wabukambausi uuzyibidwe kapati munyika yoonse. (Matayo 24:14) Balacita oobu cakulisungula akaambo kaluyando ndobajisi kuli Leza alimwi akuli basimukobonyina.

Aboobo, lusalululo naa kubijilwa kutamulesyi kubaswiilila Bakamboni nobaboola amulyango wanu naa nobamusikila kufwumbwa kubusena nkomukonzya kuba. Basola kuba basimukobonyoko babotu. Aboobo, amuzumine nobamulomba kwiiya Bbaibbele andinywe. Mulakonzya kwiiya mbuli Jwi lya Leza mbolitusyomezya kuti bukkale bwakupona antoomwe muluumuno abasimukoboma buli afwaafwi kubako. Kuciindi eeco, takukooyooba kulangana musyobo, bukombi naa kwaandaana akati kabantu eezyo zinyonganya bukkale bubotu oobo ibunji bwesu mbotulombozya.

[Zifwanikiso izili apeeji 5]

Cili kabotu kucitila basimukobonyoko milimo yaluzyalo

[Kulumba]

Globe: Mountain High Maps® Copyright © 1997 Digital Wisdom, Inc.