Amube Bantu Baswiilila Imamanino Mbwaayaabuswena

“[Silo] ngonguwe bantu ngobayooswiilila.”—MATALIKILO 49:10.

1. (a) Ino kuswiilila Jehova mumazuba aansiku kanjikanji cakali kupandulula nzi? (b) Ino mbusinsimi nzi Jakobo mbwaakaamba bujatikizya kuswiilila?

KUSWIILILA Jehova kanjikanji kulabikkilizya akuswiilila baiminizi bakwe. Akati kabaaba kuli bangelo, baalumi bansiku, babetesi, bapaizi, basinsimi alimwi abami. Izyuuno zyabami mu Israyeli mane zyakali kwiitwa kuti cuuno cabwami bwa Jehova. (1 Makani 29:23) Nokuba boobo, cilausisya kujana kuti bami ba Israyeli banji tiibakamuswiilila Leza, aboobo bakaliletela mapenzi mapati alimwi abantu mbobakali kulela. Pele Jehova kunyina naakabasiya buyo bantu bakwe basyomeka kabanyina bulangizi pe; wakabaumbulizya kwiinda mukubasyomezya kuti uyooleta Mwami uutakwe lweeno, ooyo walo baluleme ngobayooswiilila. (Isaya 9:6, 7) Sisinku Jakobo kalaafwaafwi kufwa wakasinsima kujatikizya mwami ooyu wakumbele, wakati: “Inkoli yabwami ti[i]koyoomana muli-Juda, nuuba musako wabwami waakati kazituta zyakwe, mane [Silo] akasike, ngonguwe bantu ngobayooswiilila.”—Matalikilo 49:10.

2. Ino bbala yakuti “Silo” lipandulula nzi, alimwi ino bwami bwakwe buyoolela bani?

² “Silo” ndibbala lya Cihebrayo lyaamba  kuti “Mukamwini.” Silo nguweelede kulela, mbubwenya mbuli mbokutondezyedwe ankoli alimwi anguzu zyakulailila mbozitondezyedwe amusako wabwami. Kunze lyaboobo, ibwami bwakwe tabukeendelezyi buyo bana ba Jakobo balikke pe, pele a “bantu” boonse. Makani aaya aleendelana acisyomezyo ca Jehova kuli Abrahamu cakuti: “Basilunyungu bako bayoovuba mulyango wabasinkondonyina. Mulunyungu lwako zisi zyoonse zyaansi moziyoojana coolwe.” (Matalikilo 22:17, 18) Jehova wakalutondezya “lunyungu” oolu ngulwakali kwiiminina mu 29 C.E., ciindi naakananika Jesu waku Nazareta amuuya uusalala.—Luka 3:21-23, 34; Ba-Galatiya 3:16.

Ibwami bwa Jesu Bwakusaanguna

3. Ino mbwami nzi Jesu mbwaakapegwa ciindi naakaunka kujulu?

³ Ciindi Jesu naakaunka kujulu, tanaakabweza nkoli yabwami mpoonya-mpoonya mukweendelezya bantu baanyika pe. (Intembauzyo 110:1) Nokuba boobo, wakapegwa “Bwami” bwakajisi bantu bamuswiilila. Mwaapostolo Paulo wakabwaamba bwami oobo naakalemba kuti: “[Leza wakafwutula Banakristo bananike] kuzwa kunguzu zyamudima akutunjizya mu-Bwami bwa-Mwanaakwe uuyandwa.” (Ba-Kolose 1:13) Ikufwutuka ooku kwakatalika lya Pentekoste mu 33 C.E., iciindi muuya uusalala nowakatilwa abatobeli ba Jesu basyomeka.—Incito 2:1-4; 1 Petro 2:9.

4. Ino mmuunzila nzi basikwiiya ba Jesu bakusaanguna mbobakatondezya kuswiilila, alimwi ino mbuti Jesu mbwaakakaita kabunga aaka?

⁴ Kabali “bangambela ba-Kristo,” basikwiiya bananike cakulibombya bakatalika kubunganya bamwi ikutegwa babe “banyinzinyina” mubwami bwakumuuya. (2 Ba-Korinto 5:20; Baefeso 2:19, Ci; Incito 1:8) Kunze lyaboobo, aaba bakeelede kuzumanana kuba “alukamantano lwamoyo omwe alwamiyeeyo yomwe” kutegwa bazuminwe a Mwami wabo Jesu Kristo. (1 Ba-Korinto 1:10) Ikabunga aaka nkakakabamba ciinga ca “muzike musyomesi uucenjede” naa mubanzi musongo uusyomeka.—Matayo 24:45; Luka 12:42.

Bakalongezyegwa Akaambo Kakuswiilila “Mubanzi” wa Leza

5. Kuzwa kaindi, ino mbuti Jehova mbwaali kuyiisya bantu bakwe?

⁵ Lyoonse Jehova wali kubapa bamayi ibantu bakwe. Mucikozyanyo, iba Juda nobakapiluka kuzwa ku Babuloni, Ezara alimwi abaalumi bamwi banji ibeelela tiibakabalila buyo bantu Mulawo wa Leza pe, pele ‘bakaupandulula’ mulawo ooyo kutegwa ‘bantu bamvwisye’ Jwi lya Leza.—Nehemiya 8:8.

6, 7. Ino mbuti ciinga camuzike mbocapa cakulya cakumuuya aciindi ceelede kwiinda mu Kabunga Keendelezya, alimwi ino nkaambo nzi kulibombya kuciinga camuzike ncokweelela?

⁶ Ciindi makani aajatikizya kupalulwa naakabuka mumwaanda wamyaka wakusaanguna mu 49 C.E., ikabunga keendelezya kaciinga camuzike kakuciindi eeco kakaalanga-langa  makani aayo kwiinda mukwaapailila, eelyo bakaakosola munzila yeendelanaa Magwalo. Ciindi nobakaambilizya mbobakaakosola makani kwiinda mukulemba lugwalo, imbungano zyakaaswiilila malailile aayo akujana zilongezyo zinji kuzwa kuli Leza. (Incito 15:6-15, 22-29; 16:4, 5) Mbubwenya buyo, kumazubaano muzike musyomesi alimwi a Kabunga kakwe Keendelezya baasalazya makani mapati mbuli aakutatola lubazu mutwaambo twacisi kwa Banakristo, kusetekana kwabulowa, ikutabelesya misamu iikola alimwi akutafweba tombwe. (Isaya 2:4; Incito 21:25; 2 Ba-Korinto 7:1) Jehova wakabapa bulumbu bantu bakwe akaambo kakuswiilila Jwi lyakwe alimwi amuzike musyomesi.

⁷ Kwiinda mukulibombya kuciinga camuzike, bantu ba Leza batondezya kuti balalibombya akuli Simalelo, Jesu Kristo. Ikulibombya kuli boobu kulayandika kapati mazubaano nkaambo bweendelezi bwa Jesu mbupati, kweelana ambuli mbokwakasinsimwa a Jakobo kalaafwaafwi kufwa.

Silo Waba ngo Muleli Wanyika Weelede

8. Ino mbuti alimwi ndilili bweendelezi bwa Kristo nobwakakomena?

⁸ Ibusinsimi bwa Jakobo bwakasinsima kuti Silo “bantu boonse ngobayooswiilila.” Cilasalala kuti bweendelezi bwa Kristo tabukeendelezyi buyo bana Israyeli bakumuuya pe. Ino buyoobikkilizya bani? Ibbuku lya Ciyubunuzyo 11:15 liingula kuti: “Bwami bwaansi bwaba bwa-Mwami wesu abwa-Kristo wakwe, nkabela uyooendelezya lyoonse mane kukabe kutamani.” Ibbaibbele liyubununa kuti, Jesu wakatambula bweendelezi oobo kumamanino ‘kwamyaka ili musanu aibili’ yabusinsimi—“ciindi cabamasi” mu 1914. * (Daniele 4:16, 17; Luka 21:24) Mumwaka ooyu, Kristo ‘wakaba’ mu Bwami bwakwe bwabu Mesiya ibutalibonyi ameso alimwi iciindi cakwe cakasika cakuti ‘abe mweendelezi akati kabasinkondonyina.’—Matayo 24:3; Intembauzyo 110:2.

9. Ino ncinzi Jesu ncaakacita ciindi naakapegwa Bwami, alimwi ino mbuti bantu mbobajatikizyigwa ikapati basikwiiya bakwe?

⁹ Icintu cakusaanguna Jesu ncaakacita naakamana kupegwa bwami cakali ‘cakumuwisya ansi’ ooyo wiinda boonse kutaswiilila—Saatani kubikkilizya amadaimona aakwe. Kuzwa ciindi eeco, imyuuya eeyi mibi yaleta manyongwe aataambiki kubantu, kunze lyaboobo ileta bukkale bukonzya kupa kuti kuswiilila Jehova cibe cintu cikatazya kapati. (Ciyubunuzyo 12:7-12; 2 Timoteo 3:1-5) Mubwini, bantu mbayandisya kapati kulwana Saatani, balabikkilizya abananike ba Jehova “babamba milazyo ya-Leza akujata bumboni bwa-Jesu Kristo” alimwi abeenzinyina ‘iba mbelele zimwi.’—Ciyubunuzyo 12:17; Johane 10:16.

10. Ino nkuzuzikizyigwa kwabusinsimi nzi bwamu Bbaibbele kusinizya kuti Saatani takazwidilili kulwana Banakristo bakasimpe?

¹⁰ Nokuba boobo, Saatani takazwidilili pe, nkaambo oobu ‘mbuzuba bwa Mwami’ alimwi kunyina cikonzya kumusinkila Jesu kuti ‘amanizye kuzunda kwakwe.’ (Ciyubunuzyo 1:10; 6:2) Mucikozyanyo, uyoobona kuti iba Israyeli bakumuuya ibali 144,000 boonse bazulila. Alimwi uyookwabilila “inkamu impati yabantu batabaliki kumuntu naba omwe, bazwa kuzisi zyoonse  akumisyobo yoonse akumikowa yoonse akumyaambo yoonse.” (Ciyubunuzyo 7:1-4, 9, 14-16) Nokuba boobo, mukwiindana abeenzinyina bananike, balo aaba bayooba balelwa ba Jesu bamuswiilila ibakkala anyika. (Daniele 7:13, 14) Ikujanika kwabo anyika mbumboni kale buzwide butondezya kuti Silo masimpe Uleendelezya mu “Bwami bwaansi.”—Ciyubunuzyo 11:15.

Ecino Nceciindi ‘Cakuswiilila Makani Mabotu’

11, 12. (a) Ino mbaani balikke ibatiikafwutuke kumamanino aabweende bwazintu oobu buliko? (b) Ino mbube nzi ibujanika muli baabo bajisi “muuya waansi”?

¹¹ Boonse aabo ibayanda buumi butamani beelede kwiiya kuswiilila nkaambo Bbaibbele cakusalazya lyaamba kuti, “kulibaabo abatamuzi Leza akutaswiilila Makani Mabotu aa-Mwami wesu Jesu” tabakafwutuki mubuzuba bwa Leza bwakunyonyoona. (2 Ba-Tesalonika 1:8) Nokuba boobo, ibukkale bwasunu bubyaabi alimwi amuuya wabuzangi wakukazya milawo alimwi anjiisyo zyamu Bbaibbele zipa kuti kuswiilila makani mabotu cibe cintu cikatazya.

¹² Imuuya ooyu wakuzangila Leza Ibbaibbele lyupandulula kuti “muuya waansi.” (1 Ba-Korinto 2:12) Imwaapostolo Paulo naakali kupandulula mbuli mboubajatikizya bantu, wakabalembela boobu Banakristo bamumwaanda wamyaka wakusanguna ku Efeso: “Ciindi eeco bweende bwanu bwakalikozyenye abwabantunsi. Mwakali kutobela mweendelezi wabwami waluuwo, uuli muuya mubi uubeleka mubantu bataswiilili Leza. Mbubonya aswebo mbotwakabede, alimwi twakali kutobela zisusi zyabuumi bwabuntunsi. Twakali kucita ziyanda mibili amizeezo yesu. Aboobo mubuzyalwe bwesu twakeelede bukali bwa Leza mbubuli bamwi boonse.”—Baefeso 2:2, 3, Ci.

13. Ino mbuti Banakristo mbobakonzya kukazya muuya waansi, alimwi ino nimpindu nzi zigwasya nzyobayoojana?

¹³ Cilakkomanisya kujana kuti Banakristo baku Efeso kunyina nobakazumanana kuba bazike munzila yakumuuya eeyo yakutaswiilila. Muciindi caboobo, bakaba bana ba Leza baswiilila kwiinda mukulibombya kumuuya wakwe, eelyo bakazyala micelo minji alimwi mibotu yamuuya ooyo. (Ba-Galatiya 5:22, 23) Mbubwenya buyo asunu, muuya wa Leza—ninguzu ziinda zyoonse kujulu aansi, uli mukugwasya tuulunzuma twabantu ikuswiilila Jehova ikutegwa babe ‘akulindila kumaninide mane do kumamanino.’—Ba-Hebrayo 6:11; Zekariya 4:6.

14. Ino mbuti Jesu mbwaakasinsimuna Banakristo ibapona mumazuba aamamanino kujatikizya zintu zigaminide izyakali kuyoosunka kuswiilila kwabo?

¹⁴ Alimwi kamuyeeya kuti tuli mukugwasyilizyigwaa Silo uujisi nguzu kapati, alimwi walo antoomwe a Bausyi tabakazumizyi sinkondoma, daimona naa mmuntu ikusunka kuswiilila kwesu kusikila aciimo mpotutakonzyi kuliyumya. (1 Ba-Korinto 10:13) Mubwini, Jesu wakapandulula mapenzi manji cakwaagama buya ngotuyoosikilwa mumazuba aaya aamamanino, ikutegwa tugwasyigwe munkondo yesu yakulwana nkondo yakumuuya. Wakacita oobu kwiinda mukubelesya magwalo aali ciloba, aayo ngaakapa mucilengaano kumwaapostolo Johane. (Ciyubunuzyo 1:10, 11) Kwaamba masimpe, akalijisi lulayo luyandika kapati ku Banakristo bakuciindi eeco, pele kwaambisya akali kwaamba “kubuzuba bwa-Mwami” bwalo ibwakatalika mu 1914. Elo cileelela kaka ikwiibikkila maanu milumbe eeyi! *

Kamubikkila Maano, Kamulilemeka Alimwi Mutayandisyi Buvwubi

15. Ino nkaambo nzi ncotweelede kulimamela kupenzi lyakanyonganya mbungano yaku Efeso, alimwi ino mbuti mbotukonzya kucita boobo? (2 Petro 1:5-8)

¹⁵ Ilugwalo lwa Jesu lwakusaanguna lwakalembelwa mbungano yabana Efeso. Naakamana kubalumbaizya akaambo kalukakatilo lwambungano, Jesu wakaamba kuti: “Pele mulandu umwi ngunjisi kulindu[ny]we ngooyu, wakuti [m]wakaleka luyando lwa[nu] lwakusaanguna.” (Ciyubunuzyo 2:1-4) Mazubaano, Banakristo bamwi ibakali basungu mbubwenya luyando lwini-lwini ndobakajisi kaindi kuli Leza lwamana. Ikucita boobu kulakonzya kupa kuti cilongwe muntu ncajisi a Leza ciyaansi kapati, aboobo eeci ciyandika kubikkila maano kapati. Ino mbuti iluyando luli boobu mbolukonzya kubukulusyigwa alimwi? Nkwiinda mukwiiya Bbaibbele lyoonse,  kujanika kumiswaangano, ikupaila alimwi akuzinzibala kuyeeya. (1 Johane 5:3) Masimpe, eeci ciyandika ‘kusungwaalila camoyo woonse’ nkaambo cilagwasya kapati. (2 Petro 1:5-8) Ikuti nomwalilingula mumbazu zyoonse mwajana kuti luyando lwanu luyaabumana, amuzibambulule zintu cakufwambaana kwiinda mukutobela kukulwaizya kwa Jesu kwakuti: ‘Amuyeeye zintu zyakamupa kuwa, mweempwe akucita milimo yanu yakusaanguna.’—Ciyubunuzyo 2:5.

16. Ino nintenda nzi zyakuyungwa munzila yakumuuya izyakaliko mumbungano yaku Pergamo alimwi ayaku Tuataira, alimwi ino nkaambo nzi majwi ngaakabaambila Jesu ncaayelela mazubaano?

¹⁶ Ibanakristo baku Pergamo alimwi Tuataira bakalumbaizyigwa akaambo kalusyomo, lukakatilo alimwi abusungu bwabo. (Ciyubunuzyo 2:12, 13, 18, 19) Pele, bakayungwa abantu ibakali kutondezya muuya mubi wa Balamu alimwi Jezebeli balo kwiinda mukutalilemeka mumakani aakoonana alimwi amukukomba Baala, bakapa kuti bana Israyeli bansiku beenwe. (Myeelwe 31:16; 1 Bami 16:30, 31; Ciyubunuzyo 2:14, 16, 20-23) Ino mbuti kujatikizya ciindi cesu cino ‘mubuzuba bwa Mwami’? Sena kuyungwa kubi kukozyenyi akooku kulalibonya? Inzya, ikutalilemeka ncecintu ciinda kupa kuti bantu ba Leza banji kabagusyigwa mumbungano. Aboobo cilayandika kaka kutantamuka bantu boonse ibali mumbungano alimwi abakunze ibatalilemeki kabotu bakonzya kutuyunga! (1 Ba-Korinto 5:9-11; 15:33) Alimwi aabo ibayanda kuti bakabe balelwa ba Silo tabeelede kulikondelezya munzila iteendelani azyeelelo zisumpukide, kweebelela naa kubala zintu ziletela muzeezo wakoonana zisimbidwe naa zili a Internet.—Amosi 5:15; Matayo 5:28, 29.

17. Ino Jesu mbwaakali kucibona ciimo cakumuuya cabaabo ibakali mu Sarde alimwi a Laodikeya bwakaindene buti abukkale bwabo?

¹⁷ Imbungano yaku Sarde kunyina noyakalumbaizyigwa naaceya pe, kunze buyo lyabantu basyoonto. Yakajisi buyo “zina” naa yakali kulibonya buyo kuti ilapona, pele tiiyakali kubikkila maano muzintu zyakumuuya, aboobo kuli Jesu ‘yakalifwide.’ Ikulibombya kwabo kumakani mabotu kwakali kwakwiinzya buyo mulawo. Elo kaka yakatongookwa! (Ciyubunuzyo 3:1-3) Ayalo mbungano yaku Laodikeya yakali muciimo cikozyenyi aceeci. Yakali kulidunda akaambo kalubono kwiinda mukwaamba kuti “Ndi muvubi,” pele kuli Kristo ‘yakalipengede, isampaukide, iceteede, yoofweede alimwi iili acinswe.’—Ciyubunuzyo 3:14-17.

18. Ino mbuti muntu mbwakonzya kutantamuka bukkale bwakujoka munsi mumeso aa Leza?

¹⁸ Mazubaano, Banakristo bakali kusyomeka abalo batalika kuba cilengwa cakutaswiilila. Ambweni bakalekela muuya waansi kuti ubalesye  kupakamana mubuumi bwabo cakunga batalika kujoka munsi munzila yakumuuya kumakani aajatikizya kwiiya Bbaibbele, kupaila, kujanika kumiswaangano ya Bunakristo alimwi amumulimo. (2 Petro 3:3, 4, 11, 12) Elo cilayandika kaka ikuti bantu bali boobo baswiilile Kristo kwiinda mukuyobola lubono lwakumuuya, ‘ikuula kuli Kristo ingolida iyakasunkwa mumulilo’! (Ciyubunuzyo 3:18) Ilubono ncobeni iluli boobu lulabikkilizyaa ‘milimo mibotu, kufwamba kupa akwaabilana abeenzinyina.’ Kwiinda mukuyobola zintu eezi zyakumuuya, ‘tulaliyobweda intalisyo imbotu yaciindi ciciza, kuti tujatisye buumi bwini-bwini.’—1 Timoteo 6:17-19.

Bakalumbaizyigwa Akaambo Kakuswiilila

19. Ino mbuti Jesu mbwaakabalumbaizya alimwi akubakulwaizya Banakristo baku Smurna alimwi abaku Filadelfia?

¹⁹ Imbungano yaku Smurna alimwi ayaku Filadelfia zyakaba cikozyanyo cibotu kumakani aakuswiilila, nkaambo Jesu kunyina naakabasinsa mulugwalo ndwaakabalembela. Kujatikizya baabo ibakali ku Smurna wakati: “Ndizi mapenzi aako mbwaabede, abucete bwako (nekubaboobo uli muvubi).” (Ciyubunuzyo 2:9) Elo kaka bakaliindenyi abaabo ibaku Laodikeya ibakali kulidunda akaambo kabuvwubi bwakunyika kakuli mubwini bwakali kubacetaazya buya! Pele, Diabolosi tanaakali kukondwa ikubona muntu uusyomeka alimwi uuswiilila Kristo pe. Aboobo Jesu wakacenjezya kuti: “Mutayoowi zintu ezyo nzimuti penzegwe. Amubone, Diabolosi ulawaala bamwi banu muntolongo, kuti mukasunkwe, elyo muyooba mumapenzi mazuba aali ikumi. Kosyomeka mane do kusikila kulufu, lino njookupa musini wabuumi.” (Ciyubunuzyo 2:10) Mbubwenya buyo, Jesu wakalumbaizya baabo ibaku Filadelfia kuti: “Wakajatisya makani aangu [naa wakandiswiilila], alimwi tokwe nokalitama izina lyangu. Njoofwambaana kuboola. Jatisya eco ncojisi, kuti kutabi muntu naba omwe uuti kunyanzye musini wako.”—Ciyubunuzyo 3:8, 11.

20. Ino mbuti tuulunzuma twabantu sunu mbobaswiilila jwi lya Jesu, alimwi ino balacita oobu kabali mubukkale buli buti?

²⁰ ‘Mubuzuba bwa Mwami’ kutalikila mu 1914, bamucaala basyomeka alimwi abeenzinyina ibambelele zimwi lino babalilwa kutuulunzuma tuli mbotubede, bazumanana kuswiilila jwi lya Jesu kwiinda mukutola lubazu mumulimo cabusungu alimwi akuzumanana kusyomeka. Ibamwi bapenzyegwa akaambo kakuswiilila Kristo, nokuba kwaangwa buya akutolwa muzilabba zyakupenzyezya, mbubwenya mbuli mbobakacitwa banyina bamumwaanda wamyaka wakusaanguna. Ibamwi bazumanana kuswiilila jwi lya Jesu kwiinda mukuzumanana ikubaa ‘liso lyabuuya,’ nokuba kuti lubono lunji alimwi abulyatu zili bazungulukide. (Matayo 6:22, 23) Ee, mumbazu zyoonse Banakristo bakasimpe akaambo kakuswiilila kwabo balazumanana kukkomanisya moyo wa Jehova.—Tusimpi 27:11.

21. (a) Ino mmukuli nzi wakumuuya iciinga camuzike ngociyoozumanana kuzuzikizya? (b) Ino mbuti mbotukonzya kutondezya kuti tulayandisya kuswiilila Silo?

²¹ Mbotuyaabuswena kumapenzi mapati, “muzike musyomesi uucenjede” kunyina nayeeya zyakuleka kuswiilila Simalelo wakwe Kristo pe. Eeci cilabikkilizyaa kubamba cakulya cakumuuya aciindi ceelede camukwasyi wa Leza. Aboobo, atuzumanane kulumba mbunga yeendelezyegwa a Jehova alimwi azintu nzyoipa. Kwiinda mukucita boobu, tunootondezya kulibombya kwesu kuli Silo, walo uuyoopa bulumbu bwabuumi butamani kubalelwa bakwe boonse bamuswiilila.—Matayo 24:45-47; 25:40; Johane 5:22-24.

Bupanduluzi buyungizidwe

Sena Muciyeeyede?

• Ino mmulimo nzi Jesu ngwaakali kuzoocita kweelana ambwaakasinsima Jakobo wakalaafwaafwi kufwa?

• Ino mbuti mbotukonzya kuzumina kuti Jesu ngo Silo, alimwi ino muuya uuli buti ngotweelede kweeleba?

• Ino ndulayo nzi lugwasya mazubaano ilujanika mumagwalo aakalembelwa mbungano zili ciloba zili mu Ciyubunuzyo?

• Ino mmuunzila nzi mbotukonzya kwiiya baabo ibakali mumbungano yansiku yaku Smurna alimwi ayaku Filadelfia?

[Mibuzyo yaciiyo]

[Zifwanikiso izili apeeji 28]

Jehova ulabalongezya bantu bakwe ibaswiilila “mubanzi” uusyomeka

[Cifwanikiso icili apeeji 29]

Ikuyunga kwa Saatani kupa kuti kuswiilila Leza cibe cintu cikatazya kapati

[Zifwanikiso izili apeeji 31]

Icilongwe ciyumu a Jehova ciyootugwasya kuti tube bantu bamuswiilila