Ibakubusi Bakayanda Kasimpe
Ibakubusi Bakayanda Kasimpe
IMYAKA yiinda ku 2,400 yainda, sintembauzyo muna Hebrayo umwi wakabuzya kuti: “Ino mukubusi asalazye buti inzila yakwe?” (Intembauzyo 119:9) Imubuzyo ooyu uciyandika asunu akaambo kakuti, bakubusi balacitikilwa mapenzi manji kapati munyika. Imicito yabwaamu yapa kuti ibakubusi banji babe muntenda yakutambukilwa bulwazi bwasikalileke (AIDS), mbwaanga ibatandila kucisela cabaabo ibatambukilwa bulwazi oobu butalibijili mbabaabo bajisi myaka iili akati ka 15 kusikila ku 24. Akwalo kubelesya misamu iikola kuletela mapenzi manji mane akujaya bamwi kabacili bakubusi. Inyimbo zyamasampu; imabbasikopo aatondezya kulwana abwaamu, izilangililwa acipekupeku amumavidiyo; alimwi azyeezyo zilangililwa aamincini yakkompyuta iitondezya zifwanikiso amakani aabalwa aabusya muzeezo wakoonana zilabanyonyoona kapati bakubusi. Aboobo, imubuzyo wakabuzyigwaa sintembauzyo balaubikkila maanu kapati bazyali alimwi abakubusi mazubaabo.
Kujatikizya mubuzyo ngwaakabuzya, sintembauzyo nguwenya wakapa bwiinguzi oobu: “Ulaibamba mbubonya mbuli ijwi lyako.” Masimpe, Ijwi lya Leza Bbaibbele lilijisi malailile aagwasya kubakubusi, alimwi kwiinda mukulitobela ibakubusi banji bakonzya kuzwidilila mubuumi. (Intembauzyo 119:105) Atulange-lange zitondezyo zimwi zyabakubusi ibayanda Leza alimwi ibakanzide kuzumanana kabali bayumu munzila yakumuuya munyika eeyi mwalo ikuyandisya kulikondelezya alimwi alubono mokuvwulide.
Balalumba Kapati Akaambo Kabusolozi Bwabazyali
Jacob Emmanuel wakabeleka kali mukambausi waciindi coonse mumulimo wabupainiya katanaunka kuyoobelekela kuofesi lyamutabi lya Bakamboni ba Jehova ku Mexico. Ulalumba kapati nayeeya mbwaakakulwaizyigwa kubaa luyando lwakubelekela Leza: “Ibazyali bangu mbebakandigwasya kapati nokuba kuti abamwi bakwesu ibasimide munzila yakumuuya mbondakali kuyanzana limwi abalo bakabeleka kapati. Bazyali bangu alimwi abakwesu basimide munzila yakumuuya bakandikulwaizya kuyandisisya mulimo wabukambausi. Kabotu-kabotu bakandeenzya munzila iiluleme; kunyina nondakalimvwa kuti bakali kundisungilizya buya pe.”
David, iwabeleka kwamyaka minji lino mumulimo waciindi coonse, ulayeeya mbocakali kumukondelezya kapati ibazyali bakwe nobakatalika kubeleka kabali bapainiya baalubazu iciindi walo alimwi amunyina nobakacili bana baniini. Eelyo bawisi nobakafwa, banyina bakazumanana kubeleka kabali bapainiya baalubazu. Bakali kuulanganya mukwasyi wabo alimwi akukambauka makani mabotu. David waamba kuti: “Kunyina nobakandisungilizya buya kuba mupainiya pe, pele twakali kukkomana kapati kubeleka mulimo wabupainiya mumukwasyi cakuti kuyanzana alimwi amuuya wakaliko zyakandikulwaizya kuba mupainiya.” Kaamba kujatikizya mbobuyandika busolozi bubotu bwabazyali alimwi akubikkila maano, David waamba kuti: “Iciindi camasiku, bamaama bakali kutubalila lyoonse twaambo tuzwa mubbuku lyakuti, Kucokera ku Paradaiso Wotaika Kumka ku Paradaiso Wopezedwanso. * Inzila njobakali kwaaluula makani kulindiswe yakatugwasya kuyandisya kwiiya zintu zyakumuuya.”
Ikwiiyandisya Miswaangano
Ibakubusi bamwi tabaiyandi miswaangano ya Bunakristo. Balajanika akaambo kakuti bazyali babo balabatolelezya. Nokuba boobo, ikuti bazumanana kujanika
kumiswaangano, mukuya kwaciindi balakonzya kwiiyandisya miswaangano. Amulange-lange kujatikizya Alfredo, iwakatalika mulimo waciindi coonse naakali aamyaka iili 11. Ulazumina kwaamba kuti naakali aamyaka iili yosanwe, wakatalika kunoolovwa kumiswaangano akaambo kakuti yakali kumupa koona, pele bazyali bakwe tiibakali kumuzumizya koona ciindi camiswaangano. Waamba kuti: “Mbweekali kuyaabukomena, bucebuce ndakatalika kwiiyandisya miswaangano, ikapati eelyo nondakaiya kubala alimwi akulemba akaambo kakuti aciindi eeco ndakatalika kwiingula kwiinda mukubelesya majwi aangu.”Imusimbi uujisi myaka iili 17 wazina lya Cintia, ooyo uubeleka kali mupainiya waciindi coonse, ulaamba mbuli balongwe babotu mbobakamugwasilizya kapati kuyandisisya mulimo wa Leza. Imusimbi ooyu waamba kuti: “Ikubaa cilongwe cibotu abakwesu alimwi akujanika lyoonse kumiswaangano kwandigwasya ikutalimvwa kusweekelwa beenzuma bakunyika alimwi amilimo iidumide kubakubusi mbuli kuunka kunkosaadi. Ikuswiilila kubwiinguzi bupegwa alimwi azyakuluula kumiswaangano kwakandipa kuyandisisya kupa Jehova zyoonse nzyondakajisi alimwi ndilimvwa kuti cintu ncondijisi iciinda kubota ali zyoonse mbukubusi bwangu. Aboobo ndakayeeya kucibelesya coolwe eeci mumulimo wakwe.”
Nokuba boobo, musimbi ooyu ulazumina kaamba kuti: “Iciindi cimwi kanditana bbapatizyigwa, cakali kunduubila kulovwa kumiswaangano akupa kaambo kakubeja kakuti ndakali kuyanda kucita milimo iimwi yakucikolo iicitilwa kumunzi. Ndakali kulovwa kumiswaangano minji alimwi eeci cakatalika kundipilusya munsi munzila yakumuuya. Ndakatalika kuyanzana amusankwa iwatakali kwiiya Bbaibbele. Kwiinda mukugwasyigwaa Jehova, ndakabululamika bukkale bwangu muciindi ceelede.”
Ikulisalila
Pablo, mukubusi aumbi uubelekela Jehova mumulimo waciindi coonse, nabuzyigwa ncabona kuti cilayandika kapati kukuba aluyando lwakasimpe kajanika mu Jwi lya Leza, wiingula kuti: “Ndiyeeya kuti kuli zintu zyobile: kubaa ciiyo cako omwini lyoonse alimwi akuba musungu mumulimo wabukambausi. Ndilabalumba kapati bazyali bangu akaambo kakundiyiisya kasimpe ka Jehova alimwi ndilimvwa kuti kunyina cintu cibotu kapati ncobakali kukonzya kundipa kwiinda ceeci. Nokuba boobo, ndeelede kusinizya ndemwini ikaambo kandipa kuti ndimuyande Jehova. Akaambo kaceeci, kulayandika kapati kuzyiba ‘busasa alimwi abulamfwu’ bwakasimpe kamu Bbaibbele. Eeyi njenzila ilikke motukonzya kulimvwa kubaa luyandisisyo lwa Jwi lya Jehova, lyalo lipa kuti ‘mulilo uyakisye’ mulindiswe wakukanana kuli bamwi kujatikizya ndilyo. Busungu buli boobo kumulimo wakukambauka buya kupa kuti kulumba nkotujisi kujatikizya kasimpe kuzumanane.”—Ba-Efeso 3:18; Jeremiya 20:9.
Jacob Emmanuel, iwaambwa musyule oomu awalo ulaamba mbociyandika kapati kulisalila omwini kubelekela Jehova. Waamba kuti bazyali bakwe kunyina nobakali kumusungilizya kuti abbapatizyigwe pe. “Ndisyoma kuti eeyi yali nzila mbotu akaambo kakuti ndalibonena mpindu zyajanika. Mucikozyanyo, ibakubusi bamwi ibakali balongwe bangu bakasala kubbapatizyigwa aciindi comwe. Nokuba kuti eeci cakali cibotu, ndakabona kuti bamwi bakabweza ntaamu eeyi akaambo kakubona buyo beenzinyina, aboobo kakutanainda ciindi cilamfwu, busungu bwabo kumilimo ya Bwami bwakali kuyaabumana. Pele mebo bazyali
bangu kunyina nobakandisungilizya kuti ndilyaabe kuli Jehova. Ndakalisalila buya ndemwini.”Imulimo Ngoijisi Mbungano
Bakubusi bamwi bakaiya kasimpe kaamba Jwi lya Leza kakunyina kugwasyigwa abazyali babo. Masimpe, tacili cuuba-uba muciimo cili boobu kwiiya kucita ciluleme alimwi akuzumanana munzila eeyi.
Noé ulayeeya mbwaakagwasyigwa kapati akasimpe. Kuzwa kubwana, wakali muntu uunyema-nyema alimwi uuyandisya kulwana. Naakatalika kwiiya Bbaibbele kajisi myaka yakuzyalwa iili 14, bube bwakwe bwakatalika kucinca, calo cakapa kuti bazyali bakwe ibatakali kuliyandisya Bbaibbele aciindi eeco bakkomane kapati. Noé mbwaakali kuyaabuya ambele munzila yakumuuya, ibuumi bwakwe wakali kuyanda kububelesya kapati mumulimo wa Leza. Kwaciindi ecino, ubeleka mumulimo waciindi coonse.
Mbubwenya buyo a Alejandro wakatalika kukayandisya kasimpe ka Bunakristo naakali mwana musyoonto nokuba kuti bazyali bakwe kunyina nobakali kukabikkila maano. Ikutondezya mbwakayandisya kasimpe, mboobu mbwaamba: “Ndakakomenena mumukwasyi iwakali kunjila cikombelo ca Katolika. Pele ndakatalika kusulaika kaambo kakuti mfwulumende yeelede kweendelezya lubono lwacisi loonse akuti bantu baleelene kunyina muvwubi naa mucete, alimwi cikombelo kunyina nocakali kwiingula mibuzyo yakali kundinyonganya kuzwa kubwana. Imbunga ya Jehova yakandigwasya kujana luzibo lwa Leza. Camasimpe, eeci cakandifwutula akaambo kakuti nondatakaiya Bbaibbele, ambweni nindakalinjizya mubwaamu, mubudakwi naa kubelesya misamu iikola. Ambweni nondakalinjizya mukabunga kabazangi akutebula zintu zibyaabi.”
Ino mbuti mukubusi mbwakonzya kuzumanana kuyandaula kasimpe alimwi akukajatisya kakunyina kugwasyigwa abazyali bakwe? Cakutadooneka, ibaalu alimwi abamwi mumbungano bajisi lubazu luyandika kapati. Noé ulayeeya ategwa: “Kunyina buzuba nondakalimvwa kuti ndilisiidwe, mbwaanga Jehova wali andime lyoonse. Alimwi ndakagwasyigwa kapati abakwesu banji alimwi abacizi basiluyando aaba lino munzila yakumuuya bali mbabamatata, mbaamamama alimwi mbakwesu.” Kwaciindi cino ubelekela ku Beteli alimwi ubelesya ciindi cakwe mumulimo wa Leza. Kunze lyaboobo, Alejandro uluula kuti: “Icintu cimwi ncondiyoozumanana kulumba ncakuti, ndakagwasyigwa kwiinda mukuba mumbungano oomo mwakali kabunga kabaalu bakali kundibikkila maano kapati munzila yaluyando. Ndilalumba kapati akaambo kakuti nondakatalika kwiiya Bbaibbele kandili aamyaka iili 16, ikutakkalikana kwamizeezo kudumide kubakubusi andime kwakandijatikizya. Pele, mikwasyi mumbungano kunyina noyakandilekelezya pe. Lyoonse ndakali kujana muntu iwakali kundisamausya alimwi akwaabana andime ncajisi, ikutali buyo ŋanda yakwe alimwi azilyo pele amakani oonse aali kumoyo wakwe.” Alejandro wali kubeleka mumulimo waciindi coonse kwamyaka yiinda ku 13 lino.
Bamwi bantu bayeeya kuti makani aabukombi ngabantu bapati buyo. Nokuba boobo, ibakubusi banji bakaiya kasimpe kajanika mu Bbaibbele nobakali bana basyoonto alimwi bakatalika kumuyanda Jehova alimwi bazumanana kusyomeka kulinguwe. Kubakubusi aaba, alabeleka majwi aa Davida aalembedwe kubbuku lya Intembauzyo 110:3 aamba kuti: “Bantu bako balabungana camoyo woonse azilundu zisalala mubuzuba bwalumamba lwako. Balombe bako bali mbuli ma[do]si aalume luboneka cifumofumo.”
Bakubusi beelede kusolekesya, kubaa makanze aakwiiya kasimpe alimwi akukakatila kuli nkaako. Elo cilakkomanisya kaka ikubona kuti ibanji bali mukukakatila kumbunga ya Jehova, ikujanika kumiswaangano lyoonse alimwi akusungwaala kwiiya Bbaibbele. Kwiinda mukucita boobu, bacikonzya kubaa luyando lwini-lwini lwa Jwi lya Leza alimwi amulimo wakwe!—Intembauzyo 119:15, 16.
Bupanduluzi buyungizidwe
^ munc. 6 Lyakamwaigwaa Bakamboni ba Jehova mu 1958; lino talicisimbwi pe.