Luumbulizyo Muziindi Zyamapenzi

IMAKANI aaluulwa muli sikapepele mazubaano taawumbulizyi pe. Imwaalumi umwi wakalemba kuti: “Izintu zicitika mazubaano zilatyompya kapati cakuti kanjikanji inga tulatolwaala ikuswiilila makani aabalwa acipekupeku aciindi ca 18:00 hrs.” Inyika izwide nkondo, micito yazyigwebenga, mapenzi, milandu alimwi amalwazi—izintu zibyaabi izitadoonekwi buya kuti ziyoomucitikila umwi aumwi wandiswe ikuti kazitana kutucitikila kale.

Cakululama, Ibbaibbele lyakabusinsima bukkale oobu. Naakali kupandulula mbocinoobede ciindi cesu, Jesu wakati kunooli nkondo zitalikomeneni, malwazi, inzala alimwi amizuzumo yanyika. (Luka 21:10, 11) Mbubwenya buyo, awalo mwaapostolo Paulo wakalemba kujatikizya “ziindi zikataazya,” eelyo bantu nobanooli basikanyetunyetu, basimuyanda mali alimwi batayandi bubotu. Iciindi eeco wakacaamba kuti “mazuba aakumamanino.”—2 Timoteo 3:1-5.

Aboobo ikujatikizya bukkale bwamunyika, makani aaluulwa kuli mbwaaswaangene aceeco ncolyakasinsima Bbaibbele. Pele makani aaluulwa kujatikizya bukkale bwamunyika alimwi abupanduluzi bupedwe mu Bbaibbele nkokukozyanya kuliko kulikke. Ibbaibbele lilapa makani amwi aataambwi pe muli sikapepele. Kwiinda mu Jwi lya Leza lyakasololelwaa muuya wakwe uusalala, tulakonzya kukateelela kaambo ncobwiindilide bubi alimwi ancotukonzya kulangila kumbele.

 Mbwabubona Bubi Leza

Ibbaibbele lilapandulula mbwaabona Leza mapenzi aaliko mazubaano. Nokuba kuti wakalizyi kuti kwakali kuzyooba mapenzi aaya, kunyina naakazumizya kuti azumanane kukabe kutamani. Imwaapostolo Johane wakalemba kuti: “Leza nduluyando.” (1 Johane 4:8) Jehova ulabalanganya kapati bantu alimwi ulabusulaika bubi boonse. Ee, tulakonzya kulomba luumbulizyo kuli Leza, mbwaanga mmubotu, ngusilubomba, ulijisi nguzu alimwi ulayandisya kugwisya bubi boonse anyika. Sintembauzyo wakalemba kuti: “[Mwami ngwabikkide kujulu Leza] ulavuna bacete nibakwiila, abalo bapengede abaabo babula mugwasyi. Bacete abatengwana ulabafwida luzyalo; buumi bwabacete ulabufutula. Ulanununa buumi bwabo kulupenzyo: Bulowa bwabo bulayandika mumeso aakwe.”—Intembauzyo 72:12-14.

Sena mulabeetelela aabo ibapenga? Ambweni mulacita oobo. Ikweetelela mbube Jehova mbwaakatulenga aambubo, mbwaanga twakalengwa mucinkozya cakwe. (Matalikilo 1:26, 27) Aboobo, tulakonzya kusyoma kuti Jehova takulangi buyo pe kupenga kwabantu kakunyina kweetela. Jesu iwakamuzyi kabotu Jehova kwiinda muntu uumbi, wakayiisya kuti Jehova ulatubikkila maanu kapati swebo tobantu alimwi ulaalubomba kapati.—Matayo 10:29, 31.

Zintu nzyalengede zilikke zilatondezya kuti Leza ulabalanganya bantu. Jesu wakati Leza “ulapasuzya izuba lyakwe kubabi akubabotu, ulawisizya boonse imvula yakwe, baluleme abataluleme.” (Matayo 5:45) Kubantu bamumunzi wa Lustro, imwaapostolo Paulo wakati: “[Leza] takalekede kulilungulula walo, mbwaakacita kabotu akumupa imvula eziindi zyazilyo izizwa kujulu, wazuzya myoyo yanu kulya akubotelwa.”—Incito 14:17.

Ino Nguni Uupa Kuti Kakuli Bubi?

Cilayandika ikuzyiba kuti alimwi Paulo wakaambila bantu baku Lustro kuti: “Kuciindi cakamana [Leza] wakaleka masi oonse kuti aende muziyanza zyao.” Aboobo imasi naa ibantu—mbebapa kuti kakuli mapenzi manji. Leza tayelede kutongookwa pe.—Incito 14:16.

Ino nkaambo nzi Jehova ncalekelede zintu zibyaabi kuti kazicitika? Sena kuli ncaya kucita kujatikizya zintu eezi? Ibwiinguzi kumibuzyo eeyi bujanwa buyo mu Jwi lya Leza. Cili boobo akaambo kakuti ibwiinguzi bujatikizya muntu wamuuya uumbi alimwi akaambo nkaakatalisya mubusena bwamuuya butalibonyi.

[Zifwanikiso izili apeeji 4]

Ibantunsi balijisi lweetelelo. Sena Leza walo tabikkili maanu alimwi akweetezyegwa bantu nobapenga?

 [Nkotwakajana cifwanikiso icili apeeji 2]

COVER: Tank: UN PHOTO 158181/J. Isaac; earthquake: San Hong R-C Picture Company

Nkotwakajana cifwanikiso icili apeeji 3]

Aatala kulumwensyi, Croatia: UN PHOTO 159208/S. Whitehouse; mwana uufwide nzala: UN PHOTO 146150 CAKAFWOTOLWAA O. MONSEN