Jehova Nguumubamba Lyoonse
Jehova Nguumubamba Lyoonse
“Amutole makatazyo aanu oonse [kuli Leza] nkaambo nguumubamba lyoonse.”—1 PITA 5:7, Ci.
1. Ino mmuunzila nzi Jehova alimwi a Saatani mobaindene kapati?
JEHOVA alimwi a Saatani baliindene kapati. Imuntu uutalika kuyanda Jehova nkokuti tabacilyatani pe a Diabolosi. Ilwiindano oolu lulaambwa mubuvwuntauzi bumwi. Kujatikizya milimo ya Saatani iilembedwe mubbuku lya Bbaibbele lya Jobu, ibbuku lya Encyclopædia Britannica (1970) lyaamba kuti: ‘Mulimo wa Saatani ngwakweendeenda munyika ikuyandaula bantu bakutamikizya naa kucita milimo mibyaabi; aboobo mulimo wakwe uliindene kapati awa “meso aa Mwami,” alo aalanga-langa munyika yoonse kutegwa ayumye zintu zibotu zyoonse (II Chron. xvi, 9). Saatani takkomani pe nabona bantu bataliyandi alimwi Leza ulamuzumizya kuti abasunke kusikila buyo waawo mpazumizyidwe. Elo kaka kuli lwiindano aawa!—Jobu 1:6-12; 2:1-7.
2, 3. (a) Ino mbuti bupanduluzi bwabbala lyakuti “Diabolosi” mbolyeelela kweelanaa cakacitikila Jobu? (b) Ino mbuti Ibbaibbele mbolitondezya kuti Saatani wazumanana kutamikizya babelesi ba Jehova ibali anyika?
2 Ibbala lya Cigiliki lyakuti Diabolosi lyaamba “sikutamikizya” naa “sikubejelezya.” Ibbuku lya Jobu liyubununa kuti Saatani wakatamikizya mubelesi wa Jehova uusyomeka kuti ulamubelekela Leza akaambo kakuyanda kuti agwasyigwe kwiinda mukwaamba kuti: “Taakwe kaambo sena Jobu nkalemekela Leza?” (Jobu 1:9) Icibalo mubbuku lya Jobu citondezya kuti, nokuba kuti wakasikilwa masunko manji alimwi amasukusyo, Jobu wakazumanana kuswenena kuli Jehova. (Jobu 10:9, 12; 12:9, 10; 19:25; 27:5; 28:28) Naakamana masunko aakwe, wakaamba boobu kuli Leza: “Ndakalimvwide amatwi buyo anduwe, pele lino meso aangu abona.”—Jobu 42:5.
3 Sena Saatani wakacileka kutamikizya babelesi ba Leza basyomeka kuzwa mumazuba aa Jobu? Peepe. Muciindi cino cakumamanino, ibbuku lya Ciyubunuzyo litondezya kuti Saatani wazumanana kubatamikizya banyina Jesu bananike alimwi ulacita oobu akubeenzinyina basyomeka. (2 Timoteo 3:12; Ciyubunuzyo 12:10, 17) Aboobo, icintu ciyandika kapati ncotweelede kucita mbotuli Banakristo bakasimpe nkulibombya kuli Leza uutubamba Jehova, akumubelekela caluyando ikutegwa tusinizye kuti nzyaamba Saatani nzyakubeja. Ikuti twacita oobo, tuyoowukkomanisya moyo wa Jehova.—Tusimpi 27:11.
Jehova Ulalanga-Langa Nzila Njakonzya Kutugwasyila
4, 5. (a) Ikwiindana amakanze aa Saatani, ino ncinzi Jehova ncalangaula munyika? (b) Ikuti katuyanda kuti Jehova atukkomanine, ino ncinzi ncotuyandika kucita?
4 Diabolosi uleendeenda munyika kuyandaula baabo mbatiitamikizye alimwi akubanyonganya. (Jobu 1:7, 9; 1 Petro 5:8) Ikwiindana amakanze aakwe Saatani, Jehova walo uyandaula kugwasya baabo bayanda kuyumizyigwa anguwe. Musinsimi Hanani wakaambila Mwami Asa kuti: “Nkaambo Jehova, meso aakwe alalanga-langa moonse munyika, kuti aliyumye kukugwasya abo balulama mumoyo kumeso aakwe.” (2 Makani 16:9) Elo kaka kuli kwiindana kupati akati ka Saatani uuyanda kunyonyoona bantu alimwi a Jehova uubalanganya munzila yaluyando!
5 Jehova talangauli milandu mulindiswe naa kubona mpotulezya pe. Sintembauzyo wakalemba kuti: “O Jehova, nowakabika moyo wako kuzibi zyesu, ngwani wakali kunoopona, O Mwami?” (Intembauzyo 130:3) Ibwiinguzi buluzi mbwakuti, kunyina pe. (Mukambausi 7:20) Ikuti naa twaswenena kuli Jehova amoyo wesu woonse, imeso aakwe anooli alindiswe alimwi takatusinganyi pe, pele uyoobona mbotusoleka alimwi uyakuyiingula mipailo yesu netulomba lugwasyo alimwi akulekelelwa. Mwaapostolo Petro wakalemba kuti: “Meso aa-Jehova ali kubaluleme, amatwi aakwe alijukide kukukomba kwabo, pele busyu bwa-Jehova mbukali kulibacita zibi.”—1 Petro 3:12.
6. Ino mbuti cintu cakacitikila Davida mbocituumbulizya alimwi ambocitucenjezya?
6 Davida wakali muntu uutalondokede alimwi wakacita zibi zipati. (2 Samuele 12:7-9) Pele wakalipa amoyo wakwe woonse kuli Jehova alimwi akuswenena kulinguwe kwiinda mukupaila cakusinizya. (Intembauzyo 51:1-12) Nokuba kuti Davida wakeelede kusikilwa mapenzi aayo aakaboola akaambo kacibi cakwe, Jehova wakaumvwa mupailo wakwe alimwi wakamulekelela. (2 Samuele 12:10-14) Makani aaya aleelede kutuumbulizya alimwi akutucenjezya. Cilaumbulizya ikuzyiba kuti Jehova ulilisungude kutulekelela zibi zyesu ikuti naa tweempwa ncobeni, pele cilayandika kuyeeyesya kuti izibi kanjikanji zilaleta mapenzi mapati kapati. (Ba-Galatiya 6:7-9) Tweelede kucita mbuli mbotukonzya kutegwa tucitantamuke kufwumbwa cintu citamukkomanisyi Jehova, ikuti katuyanda kuti tubambe cilongwe anguwe.—Intembauzyo 97:10.
Jehova Ulabaswenya Kulinguwe Bantu Bakwe
7. Ino mbantu bali buti Jehova mbalanga-langa, alimwi ino mbuti mbwabakwelela kulinguwe?
7 Davida wakalemba boobu muntembauzyo yakwe imwi: “Jehova ulisumpukide, nekubaboobo ulibabwene [balibombya], pele basikamikami ulibezi nibacili kule.” (Intembauzyo 138:6) Mbubwenya buyo, intembauzyo imbi yaamba kuti: “Ngwani uuli mbuli Jehova Leza wesu, uukala kujulu kulamfu, u[langa-langa] kuti abone zintu zyakujulu azyaansi? Ulabusya [bacete] kuzwa kulusuko.” (Intembauzyo 113:5-7) Inzya, Mulengi wesu singuzuzyoonse wakujulu aansi ulalanga-langa anyika alimwi meso akwe alabona balibombya alimwi abacete, ibantu “balila akutongela nkaambo kazisesemyo zyoonse zicitwa.” (Ezekieli 9:4) Ulabakwela kulinguwe bantu bali boobu kwiinda mukubelesya Mwanaakwe. Jesu wakaamba boobu naakacili anyika: “Takukwe muntu uukonzya kuza kulindime Taata uwakandituma atamukwela, . . . Takukwe muntu uukonzya kuza kulindime Taata atamuzumizya.”—Johane 6:44, 65.
8, 9. (a) Ino nkaambo nzi toonse ncotweelede kuunka kuli Jesu? (b) Ino nkaambo nzi makani aajatikizya bubambe bwacinunuzyo ncaali mapati?
8 Bantu boonse beelede kuunka kuli Jesu alimwi akusyoma mucipaizyo cacinunuzyo nkaambo bakazyalwa kabali basizibi alimwi ibazandukide kuli Leza. (Johane 3:36) Beelede kuyanzana a Leza alimwi. (2 Ba-Korinto 5:20) Leza kunyina naakalindila kuti bantu batalike mbabo kulikombya kulinguwe ikutegwa acite bubambe bwakuti bakonzye kuba aluumuno anguwe alimwi. Mwaapostolo Paulo wakalemba kuti: “Leza, walo ulatondezya luyandisyo lwakwe kulindiswe boobo, nkaambo nitwakacili basizibi Kristo wakatufwida. . . . Nkaambo kuti kuciindi ncitwakali basinkondonyina twakayanzanisigwa kuli-Leza kulufu lwamwanaakwe, elyo kuciindi ecino ncituyanzanisisidwe kale tulainda kufutulwa kubuumi bwakwe.”—Ba-Roma 5:8, 10.
9 Imwaapostolo Johane wakasinizya kasimpe aaka kayandika kapati kakuti Leza uyanda kuti bamvwane alimwi abantu naakalemba kuti: “Luyando lwa-Leza lwamulindiswe lwakaboneka boobu, nkaambo Leza wakatuma Mwanaakwe simuzyalwa-alike munyika, kuti tujane buumi kumaanza aakwe. Olu nduyando ncobeni. Teensi kwaamba kuti swebo twakayanda Leza, pe, pele walo nguwakatuyanda swebo akutuma Mwanaakwe kuti azoobe mulungo wazibi zyesu.” (1 Johane 4:9, 10) Iwakaatalika makani ngu Leza mwini ikutali muntu pe. Sena tamukonzyi kuswenena kuli Leza ooyo wakatondezya luyando kubantu batakali buyo ‘basizibi’ pele ibakali ‘basinkondonyina’?—Johane 3:16.
Tweelede Kumuyandaula Jehova
10, 11. (a) Ino ncinzi ncotweelede kucita ikutegwa tumuyandaule Jehova? (b) Ino mbuti mbotweelede kububona bweende bwazintu bwa Saatani?
10 Pele Jehova tatusungilizyi buya kuti tuunke kulinguwe pe. Tweelede ‘kumuyandaula Leza, kuti kukumwaampasya ambweni tulamujana, nokubaboobo tali kule kuluumwi umwi wesu.’ (Incito 17:27) Tweelede kuti katuzi ikuti kulibombya kuli Jehova kuleelede. Sikwiiya Jakobo wakalemba kuti: “Amulibombye kuli-Leza. Amumukazye Saatani, uyoomucija. Amuswenenene kuli-Leza, elyo alakwe ulamuswenenena. Amusanzye maanza aanu, anywebo nobasizibi. Amulisalazye kumyoyo, nywebo nobasimyoyo-yobile.” (Jakobo 4:7, 8) Tatweelede kuwayawaya pe kumulwana Saatani canguzu katuli kulubazu lwa Jehova.
11 Eeci caamba kubutantamuka bweende bwazintu bubi oobu bwa Saatani. Alimwi Jakobo wakalemba kuti: “Sa tamuzi kuti kutangana buzwalani anyika, nkokulwana a-Leza? Eno kufumbwa muntu uulisalila kuba muzwalani wanyika walicita sinkondonyina a-Leza.” (Jakobo 4:4) Pele, ikuti katuyanda kuti tube balongwe ba Jehova, tweelede kuzyibila limwi kuti nyika ya Saatani iyootusula.—Johane 15:19; 1 Johane 3:13.
12. (a) Ino mmajwi nzi aawumbulizya Davida ngaakalemba? (b) Ino nkucenjezya kuli buti Jehova nkwaakapa kwiinda mumusinsimi Azariya?
12 Ciindi nyika ya Saatani niisola kutukazya munzila imwi, icipati ncotweelede ikucita nkupaila ikulomba kuti Jehova atugwasye. Ikutegwa atuumbulizye, Davida walo iwakalibonena buya kwaziindi zinji mbuli janza lya Jehova mbolivwuna, wakalemba kuti: “Jehova uli kufwaafwi kuliboonse bamwiita, boonse bamwiita calusinizyo. Bamuyoowa, ulabacitila mbobayanda; ulaswiilila cililo cabo akubafutula. Jehova ulabamba boonse bamuyandisya, pele basizibi boonse ulabanyonyoona.” (Intembauzyo 145:18-20) Intembauzyo eeyi itondezya kuti Jehova ulakonzya kutuvwuna ciindi umwi kumugama naasunkwa alimwi uyoobavwuna bantu boonse ciindi ‘camapenzi aayo mapati.’ (Ciyubunuzyo 7:14) Jehova unoolaandiswe ikuti naa katuyanda kukkala anguwe. Musinsimi Azariya kwiinda mukusololelwa ‘amuuya uusalala wa Leza,’ wakakaamba kaambo keni-keni nkotweelede kubona kuti kalagwasya mumbazu zyoonse naakati: “Jehova uli anywe na muli awe. Na mwamuyandaula, ulajanwa kulindinywe, pele na mwamulekelezya alakwe ulamulekelezya inywe.”—2 Makani 15:1, 2.
Tuleelede Kusyoma Kuti Jehova Nkwali Ncobeni
13. Ino mbuti mbotukonzya kutondezya kuti tulasyoma kuti Jehova nkwali ncobeni?
13 Mwaapostolo Paulo wakalemba boobu kujatikizya Musa, “wakalibilamine mbuli sikubona yooyo uutabonwa.” (Ba-Hebrayo 11:27) Pele mubwini, kunyina Musa naakamubona buya Jehova pe. (Kulonga 33:20) Pele walo wakali kusyoma kuti Jehova nkwali ncobeni mbuli kuti wakali Mubwene. Mbubwenya buyo, masukusyo aakwe naakamana, meso aalusyomo aa Jobu akamubona kabotu-kabotu Jehova kali Leza uukonzya kulekela babelesi bakwe basyomeka kusikilwa masukusyo, pele kunyina nabalekelezyelalyo pe. (Jobu 42:5) Enoki alimwi a Nowa bakaambwa kuti bakali “kweenda a-Leza.” Bakacita oobu kwiinda mukucita zintu zikonzya kumukkomanisya Leza alimwi bakamuswiilila. (Matalikilo 5:22-24; 6:9, 22; Ba-Hebrayo 11:5, 7) Ikuti naa masimpe tulasyoma kuti Jehova nkwali mbuli bwakacita Enoki, Nowa, Jobu alimwi a Musa, ‘tuyoomuzyibya’ munzila zyesu zyoonse, eelyo “uyooenzya myeendelo [yesu].”—Tusimpi 3:5, 6.
14. Ino “kukakatila” kuli Jehova cipandulula nzi?
14 Musa wakabalaya bana Israyeli ciindi nobakalondelela kunjila mu Nyika Yakasyomezyegwa ategwa: “Jehova Leza wanu ngomweelede kutobela, ngomweelede kuyoowa; milazyo yakwe muleelede kwiibamba, ijwi lyakwe muleelede kulilemeka; muleelede kumumanina milimo akukakatila kulinguwe.” (Deuteronomo 13:4) Bakeelede kumutobela Jehova, kumuyoowa, kumuswiilila alimwi akukakatila kulinguwe. Ikujatikizya bbala eeli lisanduludwe kuti “kukakatila” aawa, sikwiiya Bbaibbele umwi waamba kuti “mu Cihebrayo litondezya cilongwe ciyumu kapati.” Sintembauzyo wakaamba kuti: “Lumvwano lwa-Jehova ndulwabo bamuyoowa.” (Intembauzyo 25:14) Icilongwe ciyumu boobu a Jehova andiswe inga twabaancico ikuti naa tulasyoma kuti nkwali ncobeni alimwi akuti tulamuyanda cakunga tulayoowa kumubisizya munzila iili yoonse.—Intembauzyo 19:9-14.
Sena Mulizi Kuti Jehova Ulamubamba?
15, 16. (a) Ino mbuti bbuku lya Intembauzyo 34 mbolitondezya kuti Jehova ulatubamba? (b) Ino ncinzi ncotweelede kucita ikuti naa catuyumina ikwiibaluka zintu zibotu Jehova nzyatucitila?
15 Inzila imwi yabucenjezu ya Saatani njakusola kutulubya kwaamba kuti Leza wesu Jehova lyoonse ulababamba babelesi bakwe basyomeka. Mwami wa Israyeli Davida wakalizi kabotu-kabotu kujatikizya janza lya Jehova likwabilila nociba ciindi naakali mupenzi lipati. Ciindi bukkale nobwakamupa kuti alicengeezye kuba mbuli muntu uusondokede kumbele lya Akisi Mwami waku Gati, wakaanza lwiimbo, intembauzyo mbotu kapati iijisi majwi aamwi aakuti: “Amulemeke Jehova antoomwe ambebo, atusumpule izina lyakwe toonse. Ndakayandaula Jehova, nkabela wakandivwiila, wandivuna kukuyoowa kwangu koonse. Baangelo ba-Jehova balibazyungulukide bamuyoowa, kuti babavune. Amulabile, mubone kuti Jehova mubotu. Uli acoolwe kufwumba muntu uuyubila mulinguwe. Jehova uli afwaafwi kubawizukide mumoyo, ulafutula batete myuuya. Mapenzi aamululami manji loko, pele Jehova ulamuvuna kuli oonse buyo.”—Intembauzyo 34:3, 4, 7, 8, 18, 19; 1 Samuele 21:10-15.
16 Sena mwasyoma kuti Jehova ulijisi nguzu zyakukonzya kuvwuna? Sena mulizi kuti bangelo balakwabilila? Sena nywebo kumugama kuli nomwakalabilide kuti mubone kuti Jehova mubotu? Ino ndilili nomwakaayeeya makani aaya mumoyo wanu aakuti Jehova mmubotu kulindinywe? Amusole kwiibaluka. Sena akali aŋanda yamamanino ciindi nomwakali mumulimo nomwakalimvwa kuti inga tamucikonzyi kuzumanana? Ambweni ndileelyo nomwakajisi mubandi mubotu amwiniŋanda. Sena mwakayeeya kumulumba Jehova akaambo kakumupa nguzu azimbi nzyomwakali kuyandika alimwi akumulongezya? (2 Ba-Korinto 4:7) Kulubazu lumwi, cilakonzya kumuyumina ikuyeeya zintu zimwi zibotu kuzyigama buya Jehova nzyaakamucitila. Mweelede kuyeeya nzyaakamucitila nsondo yamana, mwezi wakamana, mwaka wamana naa kwiinda waawo buya. Ikuti naa mbozibede zintu oobu, sena inga tamukonzyi kusolekesya kubamba cilongwe a Jehova alimwi akusola kubona mbuli mbwamusololela? Imwaapostolo Petro wakakulwaizya Banakristo kuti: “Amulibombye kuli Leza singuzu, . . . Amutole makatazyo aanu oonse kulinguwe nkaambo nguumubamba lyoonse.” (1 Pita 5:6, 7, Ci) Camasimpe, muyoogambwa ikuzyiba nzila zinji mbwamubamba Leza.—Intembauzyo 73:28.
Amuzumanane Kumuyandaula Jehova
17. Ino ncinzi ciyandika ikutegwa tuzumanane kumuyandaula Jehova?
17 Ikubamba cilongwe a Jehova ceelede kuba cintu cizumanana buya. Jesu wakapaila boobu kuli Bawisi: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3) Tweelede kusolekesya lyoonse ikutegwa tujane luzibo lwa Jehova alimwi a Mwanaakwe. Tweelede kugwasyigwa amupailo alimwi amuuya uusalala ikutegwa twaamvwisye “makani malamfu aabulondo bwa-Leza.” (1 Ba-Korinto 2:10; Luka 11:13) Alimwi tuyandika kusololelwaa “muzike musyomesi uucenjede” kutegwa asanine mizeezo yesu acakulya cakumuuya cipegwa “kuciindi ceelede.” (Matayo 24:45) Kwiinda munzila eeyi, Jehova watulaya kuti tweelede kulibala Jwi lyakwe abuzuba, kujanika kumiswaangano ya Bunakristo lyoonse alimwi akutola lubazu camoyo woonse mukukambauka “Makani Mabotu aa-Bwami.” (Matayo 24:14) Kwiinda mukucita boobu, tuyoozumanana kumuyandaula Leza uutubamba Jehova.
18, 19. (a) Ino ncinzi ncotweelede kukanza kucita? (b) Ino tuyoolongezyegwa munzila nzi ikuti naa twamulwana Diabolosi canguzu alimwi akuzumanana kuyandaula Jehova?
18 Saatani uli mukusola mbuli mbwakonzya ikupa kuti bantu ba Jehova bapenzyegwe, bakazyigwe alimwi akuyungwa munzila zyiindene-indene. Ulasola kunyonganya luumuno lwesu alimwi akunyonyoona cilongwe cesu citaliboteli a Leza. Tayandi kuti tuzumanane mumulimo wesu wakuyandaula babombe myoyo kutegwa tubagwasye ikuba kulubazu lwa Jehova mumakani aajatikizya bweendelezi bwakwe bwakoonse-koonse. Pele tweelede kuzumanana kusyomeka kuli Jehova, katusyomede kuti ulakonzya kutuvwuna kuzwa kumubi. Kwiinda mukuzumina kuti Jwi lya Leza litusololele alimwi akuba bantu bapakamenyi mumbunga yakwe iilibonya ameso, tunooli masimpe kuti lyoonse unoolibambilide kutugwasya.—Isaya 41:8-13.
19 Aboobo, toonse atumulwane Diabolosi canguzu alimwi akweeleba bucenjezu bwakwe, kumwi katuyandaula Leza wesu mubotu Jehova walo uutakaalilwi ‘kutuyumya.’ (1 Petro 5:8-11) Kwiinda mukucita boobo, ‘tuyooliyobola muluyando lwa Leza cakulangilila lweetelelo lwa Mwami wesu Jesu Kristo lusololela kubuumi butamani.’—Juda 21.
Ino Inga Mwaingula Buti?
• Ino bbala lyakuti “Diabolosi” lipandulula nzi, alimwi ino mbuti Diabolosi mbweelelwa abupanduluzi oobu?
• Ino mmuunzila nzi Jehova mwaindene a Diabolosi kujatikizya Mbwalanga-langa bantu ibali munyika?
• Ino nkaambo nzi muntu nceelede kuzumina cinunuzyo ciindi nasikila Jehova?
• Ino “kukakatila” kuli Jehova caamba nzi, alimwi ino mbuti mbotunga twazumanana kumuyandaula?
[Mibuzyo yaciiyo]
[Cifwanikiso icili apeeji 15]
Nokuba kuti wakasikilwa masukusyo, Jobu wakazooteelela kuti Jehova wakamubamba
[Zifwanikiso izili apeeji 16, 17]
Ikubala Bbaibbele abuzuba, kujanika kumiswaangano ya Bunakristo lyoonse alimwi akutola lubazu cabusungu mumulimo wakukambauka kutuyeezya mbuli Jehova mbwatubamba