Mibuzyo Yabasikubala

Sena inga kwaba kuvwelana kwabukombi ikuula ŋanda yakabunga kacikombelo cimwi akwiicita kuba Ŋanda ya Bwami?

Bakamboni ba Jehova balakutantamuka kucita makwebo aali boobu azikombelo zimwi. Pele nokuba kuti twayanzana munzila eeyi, kweendelezya makani aamakwebo kuli boobu takuli kuvwelana kwabukombi pe. Kulakonzya kubonwa buyo kuti mmakwebo aakacitwa. Imbungano nyenzi ya Bakamboni ba Jehova taibelekeli antoomwe akabunga kacikombelo cimbi kuti bayake ŋanda yakukombela njobanoobelesya boonse.

Kweelanaa mbwazilanga zintu Jehova, ino ndiilili kuvwelana kwabukombi nokukonzya kucitika? Amulange-lange busolozi mbwaakapa mwaapostolo Paulo: “Mutabi nimusungwa mujoko antoomwe abaabo batali bazumini mbumupambukene abo. Nkaambo bululami bulaswaana buti abusendami? Awalo mumuni ulavwelana buti amudima? Sa Kristo a-Beliyali balakonzya kuzuminana na? Muzumini ulijisi mwaabonzi antoomwe ayooyo uutazumini? Intempele ya-Leza ilijisi makaninzi amituni? . . . Nkaambo kaako amuzwe akati kabo, mupambukane, mbwaamba Jehova. Mutaampi cintu citasalali, nenzoomutambula.” (2 Ba-Korinto 6:14-17) Ino ncinzi Paulo ncaakali kupandulula kwiinda mukubelesya mabala aakuti ‘kuswaangana’ alimwi ‘akuvwelana’?

Cilisalede kuti kuswaangana Paulo nkwaakali kwaamba kujatikizya kukomba alimwi akucitila antoomwe milimo yakumuuya abasikukomba mituni alimwi abantu batasyomi zyotusyoma. Wakabacenjezya bana Korinto kujatikizya ‘kulida atafwule lyabadaimona.’ (1 Ba-Korinto 10:20, 21) Aboobo, ikuvwelana kwabukombi nkooko kujatikizya kuswaangana mukukomba naa kubandika zintu zyakumuuya ambunga yacikombelo cimwi. (Kulonga 20:5; 23:13; 34:12) Eelyo ŋanda yakali kubelesyegwa ambunga yacikombelo noyaulwa, imuzeezo mupati wakucitila boobo ngwakuyanda kujana buyo ŋanda iiyandika kuti ibe Ŋanda ya Bwami. Kaitanatalika kubelesyegwa mbuli Ŋanda ya Bwami, kufwumbwa cintu ciswaangene abukombi bwakubeja ceelede kugusyigwa. Aboobo kusalazya kuli boobu nokwacitwa, ŋanda eeyi ilaabwa kuli Jehova kabuli busena bwakumukombela. Kunyina kuswaangana naa kuvwelana abukombi bwakasimpe alimwi abwakubeja.

Nomubandika makani aajatikizya makwebo aali boobu, tamweelede kunoojanika antoomwe abantu bakucikombelo cimwi kwaciindi cilamfwu alimwi makani aayelede kubandikwa ngamakwebo buyo. Ibacibeela cambungano ya Bunakristo beelede kukuyeeya lyoonse kucenjezya kwa Paulo kujatikizya ‘kutasungwa mujoko antoomwe abaabo batali bazumini.’ Nokuba kuti tatulimvwi kuti tulisumpukide kwiinda baabo batasyomi nzyotusyoma, tweelede kukutantamuka kuyanzana ambabo naa koongelezyegwa abukombi bwabo. *

Ino Magwalo aamba nzi kujatikizya kubbadalila ŋanda yambunga yacikombelo cimwi ikutegwa mbungano ibelesye? Ikubbadalila ŋanda yacikombelo cimbi kupa kuswaangana abacibeela cacikombelo eeco kwaciindi aciindi, icintu calo citeelede kucitwa. Nokuba kubbadalila ŋanda kuti ibelesyegwe kwaciindi buyo comwe, kabunga kabaalu keelede kulanga-langa twaambo ootu tutobela: Sena kunooli mituni naa zitondezyo zyacikombelo mukati antela kunze lyaŋanda? Ino mbuti bantu bamucilawo eeco mbobakonzya kutubona ikuti twabelesya ŋanda eeyi? Sena kuli muntu mumbungano uukonzya kutyompwa ikuti twabelesya ŋanda eeyi? (Matayo 18:6; 1 Ba-Korinto 8:7-13) Baalu beelede kutulanga-langa twaambo ootu akusala bweelede. Manjezeezya aabo alimwi aabaabo bali mumbungano ayelede kubikkilwa maano nokusalwa naa ŋanda ileelede kuulwa alimwi akwiicita kuba Ŋanda ya Bwami.

Bupanduluzi buyungizidwe

[Cifwanikiso icili apeeji 30]

Ŋanda eeyi cakali cikombelo yakaulwa akucitwa kuba Ŋanda ya Bwami