Toonse Tulayanda Kulumbaizyigwa

BWAKALI buzuba mbwaakakkomene kapati musimbi umwi. Nokuba kuti wakali kuyandika kululamikwa ziindi zimwi, ibuzuba oobo wakalilemeka kabotu. Nokuba boobo, ibuzuba oobo masiku banyina nobakamana kumulazyika abulo musimbi ooyo, bakamvwa nkwalila musyule. Nobakamubuzya ncaakanyongene, kumwi kafwekula amisozi kaikunka kumeso wakaamba kuti: “Sena tiindalilemeka kabotu sunu?”

Imubuzyo ooyo wakabakatazya kapati banyina. Lyoonse bakali kufwambaana kumululamika mwana ooyu. Pele buzuba oobo, nokuba kuti bakabona kuti wakasoleka kapati kulilemeka, kunyina nobakamulumbaizya naaceya pe.

Teensyi buyo bana basimbi basyoonto ibayandika kulumbaizyigwa akusyomezyegwa. Toonse tulayanda kulumbaizyigwa mbubwenya buyo mbotuyandika kulaigwa alimwi akululamikwa.

Ino tulimvwa buti eelyo muntu umwi natulumbaizya? Sena eeco tacitukkomanisyi buzuba boonse? Ee, tulimvwa kuti kuli muntu wabona zintu zibotu nzyotwacita, imuntu uutubikkila maanu. Citusyomezya kuti ncotwacita calikweelede, alimwi citukulwaizya kuyoobeleka canguzu alimwi kumbele. Aboobo tacigambyi pe kuti citupa kuyanda kubaa cilongwe amuntu wajana ciindi cakutwaambila cintu cikulwaizya akutulumbaizya.—Tusimpi 15:23.

Jesu Kristo wakalicizyi mbociyandika kulumbaizya bamwi. Mukaano kakwe kajatikizya matalenta, simalelo (wiiminina Jesu lwakwe) wakamulumbaizya kapati muzike uusyomeka umwi aumwi kwiinda mukwaamba kuti: “Wabotya, nomuzike mubotu musyomesi”! Elo kaka cilakkazika moyo eeco! Nokuba kuti tiibakeelene kuzintu nzyobakali kukonzya kucita ambobakapindauka, bakalumbaizyigwa munzila yomwe.—Matayo 25:19-23.

Aboobo katubayeeya banyina bamusimbi ibaambwa atalaawa. Tatweelede kulindila kuti mane bamwi balile buya notuya kubalumbaizya. Muciindi caboobo, tulakonzya kwiicita kuba mbaakani buya ikujana ciindi cakulumbaizya bamwi. Mmasimpe, tulijisi kaambo kayandika ncotweelede kubalumbaizya bamwi ciindi coonse.