Iciiyo Cesu Citugwasya Kuti Tube Bamayi Beni-beni
Iciiyo Cesu Citugwasya Kuti Tube Bamayi Beni-beni
“Sungwaala kuzintu ezi, ulitakate kulinzizyo amoyo wako woonse, kuti bantu boonse babone mboya bukomena mumilimo yako. Alimwi kolibonena omwini akufundisya kwako.”—1 TIMOTEO 4:15, 16.
1. Ino ncinzi ciyandika kapati kujatikizya ciindi alimwi aciiyo cesu ncotucita?
IBBAIBBELE kubbuku lya Mukambausi 3:1 lyaamba kuti: “Zintu zyoonse zilijisi ciindi cazyo.” Acalo ciiyo cesu ncotucita tobeni ceelede kuti kacijisi ciindi caco. Ibanji cilabakatazya kapati ikuyeeya zintu zyakumuuya ikuti naa bacita oobo aciindi ncibatalibambide naa kuti kabali abusena ibutali kabotu. Mucikozyanyo, ikuti naa mbumwakotokela buyo kumulimo muyumu ngumwali kubeleka, bamupa cakulya cibotu kapati calo ncimwali kulangila, eelyo kamukkede acuuno canu citeteete ncimuyanda kapati kumwi kamulangilila cipekupeku, sena inga mwajana ciindi cakwiiya? Peepe. Ino inga mwacita buti? Cilagwasya kujana ciindi alimwi akusala busena nkotweelede kukkalila akuliyiisya tobeni ikutegwa tukonzye kujana mpindu iili kabotu kuzwa kukwiiya kwesu.
2. Ino nciindi nzi cili kabotu kucita ciiyo cesu tobeni?
2 Ibanji bajana kuti iciindi cibotu cakuliyiisya nciindi camafwumofwumo, lyalo mizeezo yabo niicikkalikenyi. Ibamwi ciindi camasikati cakulyookezya balacibelesya ikuliyiisya beni kwakaindi kasyoonto. Amubone mbuli ciindi cakucita milimo yakumuuya iiyandika kapati mbocakaambwa muzikozyanyo zitobela. Davida Mwami wa Israyeli yansiku wakalemba kuti: “Mvwe luzyalo lwako ci[fwumofwumo], nkaambo ndisyoma nduwe. Undizibye inzila njinjeelede kweenda, nkaambo kulinduwe nkombikide moyo wangu.” (Intembauzyo 143:8) Musinsimi Isaya wakalumba munzila njiyonya eeyi ciindi naakaamba kuti: “Mwami Jehova wandipa lulimi lwabaiyide, kuti nzibe kwaamba majwi aakugwasya bakateede. Ulandibusya [cifwumofwumo cimwi acimwi], ulabusya matwi aangu kuti nswiilile mbubaswiilila basikwiiya.” Ikaambo aawa nkakuti, tuleelede kwiiya akwaambaula a Jehova ciindi mizeezo yesu niicikkalikenyi kufwumbwa naa nciindi nzi.—Isaya 50:4, 5; Intembauzyo 5:3; 88:13.
3. Ino mbubambe nzi buyandika ikutegwa kuliyiisya kwesu kube ampindu?
3 Ikaambo akamwi ikayandika ikuti ciiyo cesu cibe ampindu nkakuti tatweelede kukkala acuuno cakuzyeelela naa acuuno citeteete pe. Eeci tacikonzyi kupa kuti tupakamane pe. Imizeezo yesu yeelede kuti kiibateme ciindi notuliyiisya, aboobo ikukkala acuuno citeteete takukonzyi kutugwasya kapati pe. Alimwi icikonzya kugwasya nomuliyiisya alimwi akuzinzibala kuyeeya kuyandika kuti kakutakwe zintu zisabila-sabila munsi lyanu. Ikusola kuliyiisya kumwi sikapepele kalila, cipekupeku kaciyasyidwe naa bana kabasabila takukonzyi kutupa kubikkila maano alimwi tatukonzyi kujana mpindu pe. Ciindi Jesu naakayanda kuzinzibala kuyeeya, wakaunka kubusena butakwe zisabila. Alimwi wakaamba kujatikizya mbociyandika kujana busena busisikide eelyo naakali kuyanda kupaila.—Matayo 6:6; 14:13; Marko 6:30-32.
Iciiyo Cesu Icikonzya Kutugwasya Kwiingula
4, 5. Ino mmuunzila nzi kabroshuwa ka Ncayanda mbokagwasya kapati?
4 Iciiyo cesu ncetucita tobeni cilakonzya kukkazika moyo ikuti naa tubelesya zibelesyo zimwi zya Bbaibbele ikutegwa tuumvwisye kabotu mutwe wamakani, ikapati kuti naa tulacita oobo ikutegwa twiingule mibuzyo yamuntu umwi. (1 Timoteo 1:4; 2 Timoteo 2:23) Kumatalikilo bapya banji bayiya kabroshuwa kakuti, Ncinzi Leza Ncayanda Kulindiswe?, * kalo ikajanika mumilaka iili 261. Nkabbuku katakatazyi kapati, pele kagaminina alimwi kajisi buyo makani aamu Bbaibbele. Kalabagwasya babali kufwambaana kumvwisya Leza nzyayanda mubukombi bwakasimpe. Nokuba boobo, mbokali kabroshuwa, kunyina busena bwakulembela makani manji aakwiiya kujatikizya mutwe umwi aumwi. Ikuti ngomwiiya limwi Bbaibbele wabuzya mibuzyo iiyandika kapati iijatikizya mitwe imwi ya Bbaibbele iili mukubandikwa, ino mbuti mbomukonzya kumugwasya ikutegwa ajane makani aambi aamu Bbaibbele aakonzya kwiingula mibuzyo eeyo?
5 Kuli baabo ibajisi Watchtower Library a CD-ROM mumulaka wabo, ncuuba-uba ikujana makani manji aazwa mumabbuku aambi akkompyuta. Ino mbuti kujatikizya baabo ibatajisi cibelesyo eeci? Lino atulange-lange mitwe yobilo yalo iili mubroshuwa ya Ncayanda ikutegwa tubone mbuli mbotukonzya kumvwisya kapati alimwi akukonzya kwiingula cakumaniizya—ikapati ikuti naa muntu wabuzya mibuzyo mbuli yakuti, Ino Leza nguni, alimwi awakuti ino Jesu wakali muntu uuli buti?—Kulonga 5:2; Luka 9:18-20; 1 Petro 3:15.
Ino Leza Nguni?
6, 7. (a) Ino mmubuzyo nzi uubuka kujatikizya Leza? (b) Ino wakasotoka nzi musololi umwi wacikombelo mukuyiisya kwakwe?
6 Ciiyo 2 mukabroshuwa ka Ncayanda ilaingula mubuzyo uuyandika kapati wakuti: Ino Leza Nguni? Eeyi ninjiisyo iiyandika kapati nkaambo muntu takonzyi kukomba Leza wakasimpe ikuti naa tamuzyi alimwi naa uulamudooneka ikuti nkwali. (Ba-Roma 1:19, 20; Ba-Hebrayo 11:6) Pele bantu banji bajisi mizeezo minji kujatikizya mbwabede Leza. (1 Ba-Korinto 8:4-6) Syaabusongo umwi aumwi wabukombi ulijisi bwiinguzi bwakwe kumubuzyo uujatikizya Leza. Muzikombelo zinji zya Kristendomu, Leza bamwaamba kuti Mbutatu. Imusololi umwi uuzyibidwe kapati waku U.S. wakali kuyiisya makani amutwe wakuti “Sena Mulimuzi Leza?,” pele kunyina naakasola nociba ciindi comwe buyo ikubanda naa kuganta zina lya Leza mukuyiisya kwakwe, nokuba kuti wakazubulula mu Magwalo aa Cihebrayo ziindi zinji. Wakacita oobu nkaambo wakali kubala kuzwa mubusanduluzi bwa Bbaibbele ibukonzya kupa bupanduluzi munzila zyobilo ibwaamba “Mwami” uutazyibidwe kabotu muciindi cakwaamba kuti Jehova naa Yahweh.
7 Ikaambo kapati kakamwiinda musololi ooyu ciindi naakabala bbuku lya Jeremiya 31:33, 34, (BT) kuti: “Taakwe uuciyooiisya mweenzinyina. Taakwe uuciyooiisya munyina kuti azibe Mwami Leza [mu Cihebrayo, azibe Jehova]. Boonse bayondiziba lwabo beni, mwana amupati. Mbwaamba Mwami Leza [mu Cihebrayo, Jehova].” Ibusanduluzi mbwaakabelesya tabujisi zina lya Leza limupa kwiindana lyakuti Jehova.—Intembauzyo 103:1, 2.
8. Ino ncinzi citondezya mbuli mbokuyandika kubelesya zina lya Leza?
8 Intembauzyo 8:9 ilatondezya ikaambo ikubelesya zina lya Jehova ncocili cintu ciyandika kapati noiti: “O Jehova Mwami wesu, izina lyako lilatembaulika munyika yoonse!” Amukozyanyisye a The Bible in Tonga lyamu 1996 lijisi majwi aakuti: “O Mwami Simalelo wesu, akaka zina lyako ndipati akati kabantu bamisyobo yoonse yaansi.” Pele, mbubwenya mbuli mbokwaambwa mucibalo citaanzi, tulakonzya kujana “luzibo lwa-Leza” ikuti naa Ijwi lyakwe twalizumizya kuti litumunikile munzila yakumuuya. Pele, ino ncibelesyo nzi cikonzya kutugwasya kwiiya Bbaibbele alimwi akwiingula mibuzyo iijatikizya mbuli mboliyandika zina lya Leza?—Tusimpi 2:1-6.
9. (a) Ino ndibbuku nzi likonzya kutugwasya kupandulula mbociyandika kubelesya zina lya Leza? (b) Ino mbuti basanduluzi banji mbobakaalilwa kulemeka zina lya Leza?
9 Tulakonzya kulanga mukabroshuwa kakuti, Dzina La Mulungu Limene Lidzakhala Kosatha, lyakasandululwa mumilaka iili 69. * Mutwe wakuti “Dzina la Mulungu—Tanthauzo ndi Matchulidwe Ake” (mapeeji 6-11) ulatondezya cakusalazya Mabala One aazina lya Leza aamu Cihebrayo ziindi izitandila ku 7,000 mumagwalo aa Cihebrayo aansiku. Pele, basololi alimwi abasanduluzi bacikombelo caba Juda alimwi Kristendomu bakalisotoka acaali mubusanduluzi bwabo bunji bwa Bbaibbele. * Ino mbuti mbobakonzya kwaamba kuti balimuzi Leza akuti balijisi cilongwe cibotu anguwe ikuti kabakaka kumwiita azina lyakwe limugeme? Izina lyakwe lini-lini lilagwasya kumvwisya makanze aakwe mbwaabede alimwi akumuzyiba kuti nguni. Kunze lyaboobo, ino inga wabaa mulimo nzi mupailo wacikozyanyo wa Jesu wakuti, “Taateesu ooli kujulu, alilemekwe izina lyako” ikuti naa zina lya Leza kalitabelesyegwi?—Matayo 6:9; Johane 5:43; 17:6.
Ino Jesu Kristo Nguni?
10. Ino mbuti mbotukonzya kuzyiba buumi boonse alimwi amulimo wa Jesu?
10 Iciiyo 3 mukabroshuwa ka Ncayanda cijisi mutwe wakuti, “Ino Jesu Kristo Nguni?” Mumincali iili buyo cisambomwi, ciiyo eeci cilapa bupandulizi mubufwaafwi bujatikizya Jesu, nkwaakazwida alimwi akaambo kakapa kuti aboole anyika. Nokuba boobo, ikuti kamuyanda zibalo zipandulula kabotu buumi bwakwe boonse, zibalo zya Makani Mabotu zilakonzya kumugwasya kabotu-kabotu alimwi abbuku lyakuti, Muntu Mupati Kwiinda Iwakaponede ilijanika mumilaka iili 111.* Ibbuku eeli lilapa makani aakali kucitika cakutobelana ciindi aciindi mubuumi bwa Kristo alimwi anjiisyo zyakwe ikuzwa mumabbuku aa Makani Mabotu aali one. Izibalo izili 133 zilapandulula buumi bwa Jesu alimwi amulimo wakwe. Ikuti kamuyanda nzila iimbi yabupanduluzi, mulakonzya kubona bbuku lya Insight, Volyumu 2 amutwe wakuti, “Jesus Christ.”
11. (a) Ino ncinzi cipa kuti Bakamboni ba Jehova kabaindenyi azikombelo zimwi mbobamusyoma Jesu? (b) Ino nzyibalo nzi zyamu Bbaibbele izitaizumini njiisyo ya Butatu, alimwi ino ndibbuku nzi iligwasya mumakani aaya?
11 Mu Kristendomu, ikaambo kapati kapa kukazyanya kaimvwi ali Jesu ikuti naa “Mwanaa Leza” akuti naa “Ngu Leza Mwana.” Munzila imwi, ikaambo kaimvwi ali ceeco Catechism of the Catholic Church (Njiisyo ya Cikombelo ca Cikatolika) ncoyiita kuti “maseseke aalusyomo lwa Bunakristo” naa kuti Butatu. Mukwiindana azikombelo zya Kristendomu, Bakamboni ba Jehova basyoma kuti Jesu wakalengwa a Leza, pele tali Leza pe. Imakani aabandika mutwe ooyu alajanika mukabroshuwa kakuti, Kodi Muyenera Kukhulupirira Utatu? ilisanduludwe mumilaka iili 95. * Akati kamagwalo aabelesyedwe mukabroshuwa aaka kukazya njiisyo ya Butatu ngaaya, Marko 13:32; 1 Ba-Korinto 15:24, 28.
12. Ino mmubuzyo nzi aumwi ngotuciyandika kubikkila maano?
12 Imakani aabandikwa kale aajatikizya Leza alimwi a Jesu Kristo atondezya nzila nzyotukonzya kubelesya notucita ciiyo cesu tobeni, ikulibambila kugwasya bantu ibatazi kasimpe kamu Bbaibbele ikutegwa bakonzye kujana luzibo lwini-lwini. (Johane 17:3) Pele, ino mbuti kujatikizya baabo ibali kuyanzana ambungano ya Banakristo kwamyaka minji? Mbwaanga balijisi luzibo lunji lwa Bbaibbele, sena baciyandika kubikkila maano kapati kuciiyo cabo beni ca Jwi lya Jehova?
Nkaambo nzi Ncotweelede ‘Kulibamba Kabotu’?
13. Ino nkuyeeya kuli buti kulubide bamwi nkobakonzya kubaa nkuko kujatikizya ciiyo cesu tobeni?
13 Bantu bamwi ibali mumbungano kwamyaka minji balakonzya kubaa cilengwa cakulibesya buyo kuluzibo lwa Bbaibbele ndobakaiya mumyaka eeyo yakusaanguna nobakaba Bakamboni ba Jehova. Ncuuba-uba kuyeeya kuti: “Tandeelede kulisina buya kubala mbuli bucita bapya pe. Kayi Bbaibbele ndakalibala lyoonse ziindi zinji kubikkilizya amabbuku aamba zyamu Bbaibbele kwamyaka iili mbwiibede.” Ikuyeeya kuli boobo kukozyenyi buyo akwaamba kuti: “Tandeelede kubikkila maano kuzyakulya pe, kayi zyakulya nzyindakalya nzinji kapati kuzwa kaindi.” Tulizi kuti mubili uyanda busani bubotu lyoonse kuzwa kuzyakulya zibotu alimwi zijikidwe kabotu ikutegwa kuuli kabotu alimwi akunyangaana. Elo kaka cilayandika kapati kuzumanana kubikkila maano kubukkale bwesu bwakumuuya alimwi akuba bayumu!—Ba-Hebrayo 5:12-14.
14. Ino nkaambo nzi ncotweelede kulibamba kabotu?
14 Aboobo, toonse kufwumbwa naa twali kulibala Bbaibbele kwaciindi cilamfwu naa pe, tuleelede kutobela lulayo lwa Paulo ndwaakapa Timoteo walo wakali kale mulangizi uucibwene naa uusimide munzila yakumuuya lwakuti: “Ulibambe kabotu lwako anjiisyo nzyoiisya. Koujisi utaleki pe, nkaambo wacita oobo, inga ulalifutula omwini, abaabo bakuswiilila.” (1 Timoti 4:15, 16, Ci) Ino nkaambo nzi ncotweelede kulubikkila maano lulayo lwa Paulo? Kamuyeeya kuti Paulo alimwi wakaamba kuti tuli mukulwanaa “bucenjezu bwa Saatani” alimwi “amyuuya mibi minji-minji yamujulu.” Alimwi mwaapostolo Petro wakacenjezya kuti Diabolosi ‘uyandaula ngwati lume,’ aboobo ooyo “ngwati lume” ulakonzya kuba umwi wesu. Ikutapakamana kulakonzya kuba kulibikka antangalala mubusena mbwawezela.—Baefeso 6:11, 12, Ci; 1 Petro 5:8.
15. Ino ncikwabilizyo nzi cakumuuya ncotujisi, alimwi ino mbuti mbotukozya kucibamba?
15 Aboobo, ino ncinzi citukwabilide? Mwaapostolo Paulo utuyeezya kuti: “Amu[sam]e zilwanyo zyoonse zya-Leza, kuti mukakonzye kulwisya mubuzuba bubi, elyo yamana buyo inkondo yoonse muzooima nji.” (Ba-Efeso 6:13) Izilwanyo eezyo zyakumuuya zilazumanana kubeleka kabotu kuti naa kazibambwa-bambwa lyoonse, ikutali kulibesya mbuli mbozyakabede kumatalikilo pe. Aboobo, icilwanyo cini-cini cizwa kuli Leza cilabikkilizya aluzibo lupya luzwa mu Jwi lya Leza. Eeci citondezya mbociyandika kapati ikubaa luzibo kweelana ambokayubunudwe a Jehova kwiinda mu Jwi lyakwe alimwi akwiinda muciinga camuzike musyomesi uucenjede. Iciiyo cesu tobeni ca Bbaibbele cicitwa lyoonse alimwi amabbuku aamba zyamu Bbaibbele alayandika kapati ikutegwa tubambe zilwanyo zyesu zyakumuuya.—Matayo 24:45-47; Ba-Efeso 6:14, 15.
16. Ino ncinzi ncotukonzya kucita ikutegwa tubone masimpe kuti ‘intobo yesu mpati yalusyomo’ icili muciimo cibotu?
16 Paulo wakaamba kujatikizya cibeela ‘cipati cazilwanyo zyakulikwabilizya,’ calo ncotukonzya kulikwabilizya ikutegwa tukwabe mivwi ya Saatani yakutamikizya alimwi anjiisyo zyabuzangi. (Ba-Efeso 6:16) Aboobo cilayandika ikulingula mbuli lusyomo lwesu mboluli luyumu alimwi anzyotweelede kucita ikutegwa luzumanane kuyuma. Mucikozyanyo, mulakonzya kulibuzya kuti: ‘Ino mbuti mbondilibambila ciiyo ca Bbaibbele kwiinda mukubelesya Ngazi Yamulindizi? Sena ndaliyiisya kabotu ikutegwa ‘tubusyanye-busyanye mukuyandana akucita milimo mibotu kwiinda mukupa bwiinguzi mbundakalibambila kabotu ciindi camuswaangano? Sena ndilajalula Bbaibbele lyangu akubala magwalo aatazubuludwe alo aatondezyedwe buyo? Sena ndilabakulwaizya bamwi mukutola lubazu mumiswaangano cabusungu?’ Icakulya cesu cakumuuya ncabantu bapati, aboobo kucilya kabotu-kabotu kulayandika ikutegwa tugwasyigwe.—Ba-Hebrayo 5:14; 10:24.
17. (a) Ino nzintu nzi zibyaabi Saatani nzyabelesya ikutegwa anyonyoone buumi bwesu bwakumuuya? (b) Ino ncinzi cikonzya kusilika busaki bwa Saatani?
17 Saatani ulikuzi kabotu kukompama kwabantu batalondokede alimwi abucenjezu bwakwe tabulibonyi. Inzila zimwi nzyabelesya mukuyunga kwakwe kubyaabi nkwiinda mukucita kuti zintu ziletela muzeezo wakoonana kazijanika acipekupeku, a Internet, mumavidiyo alimwi amumabbuku. Banakristo bamwi babuzumizya busaki naa buyoka bwa Saatani kuti bubabelesye, eelyo balayimikwa kucita mikuli iimwi mumbungano nokuba kunjila muntenda mpati buya. (Ba-Efeso 4:17-19) Ino ncinzi icikonzya kusilika busaki bwa Saatani munzila yakumuuya? Tatweelede kuubya-ubya ciiyo cesu cicitwa lyoonse ca Bbaibbele, imiswaangano ya Bunakristo alimwi azilwanyo zyoonse zya Leza. Zintu eezi zyoonse zilakonzya kupa kuti tukonzye kwiindanya cintu cibotu kucibi alimwi akusula cintu Leza ncasulide.—Intembauzyo 97:10; Ba-Roma 12:9.
18. Ino mbuti “panga lya-Muuya” mbolikonzya kutugwasya munkondo yesu yakumuuya?
18 Ikuti twazumanana kubaa ciyanza cakuliyiisya Bbaibbele, tuyookwabililwa akubaa luzibo lwini-lwini lwa Jwi lya Leza alimwi tuyoozwidilila mukulwana kwiinda mukubelesya “panga lya-Muuya, nkukuti ijwi lya-Leza.” Ijwi lya Leza “lilabosya kwiinda iceba ilijisi mabemba obile, lilayasa mane kukwanzaanya buumi amuuya, aalo maswaanganino aazifuwa amooma, alimwi lilabeteka kuyeeya akuyanda kwamoyo.” (Ba-Efeso 6:17; Ba-Hebrayo 4:12) Ikuti twacizyiba kabotu ikubelesya “panga” eelo, nkokuti ciindi twaakusikilwa musunko tatukacengwi acintu cikonzya kulibonya kuti cili kabotu buyo, nociba ceeco cikonzya kutukondelezya buya, eelyo tuyoozyiba kuti nkakole kamubi kalo ikakonzya kutujaya kuti twacegwa. Iciyobodo cesu caluzibo alimwi ambotulimvwa Bbaibbele, ciyootugwasya kukaka kucita cintu cibyaabi, eelyo tuyoocita cibotu. Aboobo toonse tweelede kulibuzya kuti: ‘Sena panga lyangu lilabosya naa lilifwumpide? Sena cilandikatazya kuyeeya magwalo aamu Bbaibbele aakonzya kundiyumya nondilwana?’ Atuzumanane aciyanza cibotu cakuliyiisya Bbaibbele, eelyo tuyoomukazya Diabolosi.—Ba-Efeso 4:22-24.
19. Ino nimpindu nzi njotukonzya kujana ikuti naa twalisungula kucita ciiyo cesu tobeni?
19 Paulo wakalemba kuti: “Magwalo aya oonse akazwa kuli-Leza, alikondede kukufundisya akukulaya, akukuolola akukupandulula makani aabululami, kuti muna-Leza alibambe, azulile kukumana milimo mibotu yoonse.” Ikuti naa twaabikka mumoyo majwi Paulo ngaakaambila Timoteo, buumi bwesu bwakumuuya buyooyuma nta alimwi tuyooba bantu bacibwene kabotu mumulimo wesu. Ibaalu alimwi abakutausi basimide kumuuya balagwasya kapati mumbungano alimwi toonse tulakonzya kuba bantu bali alusyomo luyumu.—2 Timoteo 3:16, 17; Matayo 7:24-27.
Bupanduluzi buyungizidwe
^ munc. 4 Kanjikanji, imuntu uutondezya luyandisyo uuciiya mukabroshuwa ka Ncayanda amaniizya ulakonzya kutalika bbuku lya Luzibo Lutola Kubuumi Butamani, woonse obilo akamwaigwaa Bakamboni ba Jehova. Imizeezo iipedwe mubbuku oomu ilakonzya kugwasya ikutegwa kutabi zintu zimusinkila kukuyaambele munzila yakumuuya.
^ munc. 9 Lyakamwaigwaa Bakamboni ba Jehova. Aabo ibajisi bbuku lya Insight on the Scriptures mumulaka wabo, balakonzya kulanga mu Volyumu 2 amutwe wakuti, “Jehovah.”
^ munc. 9 Ibusanduluzi bunji bwabana Spain alimwi abana Catalonia bulatondezya kabotu mwaakabede Mabala One aazina lya Leza mu Cihebrayo kwiinda mukubelesya “Yavé,” “Yahveh,” “Jahvè” alimwi a “Jehová.”
^ munc. 11 Lyakamwaigwaa Bakamboni ba Jehova.
Sena Muciyeeyede?
• Ino mbukkale buli buti ibukonzya kupa kuti ciiyo cesu ncotucita tobeni citugwasye?
• Ino nkulubizya kuli buti basanduluzi banji ba Bbaibbele nkobacita kujatikizya zina lya Leza?
• Ino mmagwalo nzi aamu Bbaibbele ngomukonzya kubelesya ikutegwa mukonzye kululamika njiisyo ya Butatu?
• Nokuba kuti kwainda myaka minji kuzwa ciindi notwakaba Banakristo bakasimpe, ino ncinzi ncotweelede kucita ikutegwa tulikwabilile kubucenjezu bwa Saatani?
[Mibuzyo yaciiyo]
[Zifwanikiso izili apeeji 25]
Ikutegwa muzwidilile kucita ciiyo canu, mweelede kucicita aciindi ceelede alimwi mubusena butakwe zinyonganya zinji
[Zifwanikiso izili apeeji 29]
Sena “panga” lyanu lilabosya naa lilifwumpide?