Ikupa Kukkomanisya

GENIVAL ukkala kucisi ca Brazil, wakali kulanganya mukaintu wakwe alimwi abana kwiinda mumali masyoonto ngaakali kuvwola kumulimo ngwaakali kubeleka wabumalonda acibbadela. Nokuba kuti ibukkale mbwaakali kupona bwakali buyumu, Genival wakali kubikkila maano kukupa cimanyakkumi. Mboobu mbwaibalukwa kumwi kalijata-jata mwida mbuli kuti muntu uufwide nzala: “Zimwi ziindi mukwasyi wangu wakali kukkalaa nzala, pele ndakali kuyanda kupa Leza zintu ziinda kubota, kufwumbwa naa kwakali kuyandika kuliimya kuli buti.”

Naakaleka kubeleka mulimo wakwe, Genival wakazumanana kupa cimanyakkumi. Imukambausi wakamukulwaizya kusunka Leza kwiinda mukusanga mali manji kapati. Ooyu musololi wacikombelo wakamusyomezya kuti ncobeni Leza wakali kuyoomulongezya kapati. Aboobo Genival wakayeeya kusambala ŋanda yakwe akupa mali ngaakali kuyoojana kucikombelo.

Tali Genival alikke ubikkilide maano kapati kumakani aakupa. Ikupa cimanyakkumi wakaba mulimo buya kubantu banji bacete akaambo kakuti zikombelo zyabo zibayiisya kuti kucita boobo ncintu ciyandika mu Bbaibbele. Sena masimpe aayo?

Mulawo Alimwi Akupa Cimanyakkumi

Imulawo wakupa cimanyakkumi wakali cibeela ca Mulawo Jehova Leza ngwaakapa misyobo iili 12 ya Israyeli yansiku myaka iinda ku 3,500 yainda. Mulawo ooyu wakalailila kuti, zipanzi zyakkumi zyamuunda, micelo yamisamu alimwi azyabutanga zyakeelede kupegwa kumusyobo waba Levi kuti zibagwasye mumilimo yabo njobakali kubeleka atempele.—Levitiko 27:30, 32; Myeelwe 18:21, 24.

Jehova wakabasyomezya bana Israyeli kuti Mulawo ‘tiiwakali kuyooba muyumu kulimbabo pe.’ (Ciibalusyo 30:11, BT) Kufwumbwa buyo kuti bazumanana kutobela milawo ya Jehova cakusyomeka alimwi akupa cimanyakkumi, bakali kuyoobaa cisyomezyo cakwe cabutebuzi bubotu kweelanaa mbwaakabasyomezyede. Alimwi kutegwa kabalibambide nokwaba kuceya kwazintu, kwakabikkidwe ambali cimanyakkumi icakali kucitwa lyoonse mwaka amwaka. Ikanjikanji zintu eezi zyakali kusangwa zyakali kubelesyegwa eelyo musyobo wabana Israyeli nobakali kubungana kumapobwe aabukombi. Aboobo ‘beenzu, bamucaala alimwi abamukabafwu’ bakali kukonzya kulya akukkuta.—Deuteronomo 14:28, 29; 28:1, 2, 11-14.

Kunyina cisubulo cigaminide mu Mulawo cakeelede kupegwa akaambo kakwaalilwa kupa cimanyakkumi, pele muna Israyeli umwi aumwi wakajisi mukuli wakugwasyilizya bukombi bwakasimpe munzila eeyi. Masimpe, Jehova wakabapa mulandu bana Israyeli bakuciindi ca Malaki aabo batakali kupa cimanyakkumi kati, ‘bakali kumubbida zipanzi zyakkumi alimwi azituuzyo.’ (Malaki 3:8) Sena mulandu nguwenya ooyu ulakonzya kupegwa ku Banakristo aabo batapi cimanyakkumi?

Atulange-lange kaambo aaka. Milawo yamucisi cimwi tiibeleki kumasi aambi. Mucikozyanyo, mulawo uuzumizya banamutekenya kweendela kulumwensyi lwamugwagwa mucisi ca Britain taubeleki pe mucisi ca France. Mbobonya buyo, mulawo wakupa cimanyakkumi wakali cibeela cacizuminano akati ka Leza amusyobo wa Israyeli. (Kulonga 19:3-8; Intembauzyo 147:19, 20) Mbana Israyeli balikke ibakeelede kuutobela mulawo ooyo.

Kuyungizya waawo, nokuba kuti masimpe kuti Leza tacinci, zintu nzyayanda zimwi ziindi zilakonzya kucinca. (Malaki 3:6) Ibbaibbele lilasalazya kuti lufwu lwa Jesu lwacipaizyo mu 33 C.E. ‘lwakamwaya’ naa ‘kulobya’ Mulawo kubikkilizyaa ‘milawo yakusanga cimanyakkumi.’—Bakolose 2:13, 14, Ci; Ba-Efeso 2:13-15; Ba-Hebrayo 7:5, 18.

Ikupa Nkobacita Banakristo

Nokuba boobo, zyakusanga ziyandika zyakacili kuyandika kugwasyilizya bukombi bwakasimpe. Jesu wakalailide basikwiiya bakwe kuti babe  ‘bakamboni mane kusikila kumamanino aanyika.’ (Incito 1:8) Mbowakali kuyaabuvwula mweelwe wabasyomi, abalo bamayi Banakristo alimwi abalangizi bakali kuyandika kuti kabaswaya akuyumya-yumya mbungano. Zimwi ziindi kwakali kuyandika kulanganya bamukabafwu, bamucaala alimwi abantu bamwi ibakali kuyandika lugwasyo. Ino Banakristo bamumwaanda wakusaanguna bakacikonzya buti kujana zyakusanga zyakali kuyandika?

Mumwaka wa 55 C.E., Banakristo Bamasi ibakali mu Europe alimwi a Asia Minor bakalombwa kuti bagwasye mbungano iyakali mumapenzi mu Judaya. Mumagwalo akwe ngaakalembela mbungano yaku Korinto, imwaapostolo Paulo ulapandulula mbuli “milumbo yakugwasya basalali” mboyakeendelezyegwa. (1 Ba-Korinto 16:1) Ambweni alakonzya kumugambya ncaayubununa majwi aa Paulo kujatikizya kupa nkobacita Banakristo.

Imwaapostolo Paulo kunyina naakabasungilizya pe bakombinyina kuti bape zyakusanga. Pele, Banakristo ku Makedoniya aabo ibakali ‘mumapenzi mapati’ alimwi bakali “bacete kapati” bakeelede ‘kumukumbila camoyo woonse kuti bazumizyigwe kubaa caabilo camilimo eeyi yakugwasya basalali.’—2 Bakolinti 8:1-4, Ci.

Ee, Paulo wakakulwaizya Banakristo bavwubi mu Korinto kuti baiye ibanyina baabi baku Makedoniya. Nokuba boobo, buvwuntauzyi bumwi bwakaamba kuti kunyina ‘naakabasungilizya buya pe, pele muciindi caboobo wakasala kubalomba, kupa muzeezo, kubakulwaizya antela kubakombelezya. Bana Korinto nobatakalimvwa kwaanguluka alimwi akutangala ikuti nobakasungilizyigwa buya kupa. Paulo wakalizyi kuti muntu “uupa calumwemwe nguuyandwa kwa-Leza,” ikutali ooyo uupa “cakunyonosya moyo nanka cakusinikizigwa.”—2 Ba-Korinto 9:7.

Akaambo kalusyomo luyumu, luzibo alimwi aluyando lwini-lwini ndobakajisi ku Banakristonyina, kwakabakulwaizya bana Korinto kuti bape cakuliyandila.—2 Ba-Korinto 8:7, 8.

“Mbuli Mbwayanda Mumoyo Wakwe”

Muciindi cakubikka mweelwe uugaminide, Paulo wakaamba buyo kuti ‘mubuzuba butaanzi bwamvwiki, lyoonse umwi aumwi wanu uleelede kuti aliyobwede cintu mbuli mbwajisi.’ (1 Bakolinti 16:2, Ci) Kwiinda mukulibambila alimwi akubikka ambali zintu lyoonse, bana Korinto kunyina nobakali kuyoolimvwa kuti basinikizyigwa buya antela kukatazyigwa kumakani aakupa ciindi Paulo naakali kuyoobaswaya. Munakristo umwi aumwi wakeelede kulisalila mwini mweelwe ngwaakeelede kupa, nkokuti ooyo ‘ngwaayanda mumoyo wakwe.’—2 Ba-Korinto 9:5, 7.

Ikutegwa babe abutebuzi bubotu, bana Korinto bakeelede kubyala camoyo woonse. Kunyina nobakalaililwa ikupa zintu zinji kwiinda nzyobajisi pe. Paulo wakabasyomezya kuti: ‘Takweensi kwaamba kuti nywebo mulemenwe pe.’ Zyakusanga zyakali ‘kutambulika ikapati kuti muntu wasungwaala kupa kweelanaa buvwubi mbwajisi, ikutali kupa ncatajisi pe.’ (2 Korinto 8:12, 13; 9:6) Mboobo mwaapostolo mbwaakacenjezya mulugwalo ndwaakalemba kumbele: “Na muntu tabambi . . . bamuŋanda yakwe, wati oyo ulisowede lusyomo lwakwe, ulaindilila akuliyooyo uutazumin[i].” (1 Timoteo 5:8) Paulo tanaakakukulwaizya ikupa ooko ikwakali kusotoka njiisyo eeyi.

 Cilalibonya kabotu-kabotu kuti Paulo wakeendelezya mulimo wakupa “milumbo yakugwasya basalali” aabo bakabulide. Kunyina mu Magwalo mpotubala kuti Paulo antela baapostolo bamwi bakeendelezya mulimo wakupa zyakusanga naa kutambula cimanyakkumi kutegwa bagwasyilizye milimo yabo. (Incito 3:6) Lyoonse wakali kkomene kapati kutambula zipego eezyo mbungano nzyoyakali kumutumina, Paulo tanaakali kuyanda kubikka ‘mukuli muyumu’ kubanyina.—1 Ba-Tesalonika 2:9; Ba-Filipi 4:15-18.

Ikupa Cakuliyandila Mazubaano

Cilisalede kuti mumwaanda wamyaka wakusaanguna, basikumutobela Kristo bakali kupa cakuliyandila ikutali cimanyakkumi. Nokuba boobo, mulakonzya kweezyeezya naa eeyi icili nzila iibeleka kabotu yakugwasyilizya bukambausi bwamakani mabotu alimwi akulanganya Banakristo ibayandika lugwasyo.

Amulange-lange kaambo aaka katobela. Mu 1879 ibeendelezi ibakali kumwaya magazini eeyi bakaamba caantangalala kuti kunyina nobakali “kuyoolombelela naa kukombelezya bantu kuti babagwasyilizye.” Sena kwaamba boobu kwakabapilusya munsi Bakamboni ba Jehova mukumwaya kasimpe kamu Bbaibbele?

Mazubaano, Bakamboni balamwaya ma Bbaibbele, mabbuku aa Bunakristo alimwi amabbuku aambi mumasi aali 235. Ngazi Yamulindizi, yalo iili nimagazini iyiisya Bbaibbele, kumatalikilo yakali kusimbwa mwezi amwezi imakkopi aali 6,000 mumwaambo omwe. Mazubaano magazini eeyi ilamwaigwa ziindi zyobile amwezi alimwi makkopi aayinda ku 24,000,000 alasimbwa mumyaambo iili 146. Ikutegwa buuyendelezye kabotu mulimo wabo wakuyiisya Bbaibbele munyika yoonse, Bakamboni bakayaka naa kuula maanda aamitabi mumasi aali 110. Kuyungizya waawo, bakayaka zyuulu zili mbozibede zyamaanda ngobacitila miswaangano misyoonto alimwi amipati oomo mobakonzya kubunganina bantu bajisi luyandisisyo lwakutambula malailile aayungizidwe aamu Bbaibbele.

Nokuba kuti kulanganya zintu bantu nzyobayandika munzila yakumuuya ncintu ciyandika kapati, Bakamboni ba Jehova balazibikkila maano zintu zyakumubili nzyobayandika basyominyina.  Iciindi banyina bakumuuya nobali mumapenzi akaambo kankondo, mizuzumo yanyika, ciyumayuma, alimwi aguwo, balafwambaana kugwasya kwiinda mukupa zintu ziyandika mbuli misamu, cakulya, zyakusama alimwi azimwi-zimwi buyo. Mali aayandika kuula zintu eezyi azwa kuzyakusanga zipegwaa Munakristo umwi aumwi alimwi akumbungano.

Kunze yakuba nzila mbotu, kusanga cakuliyandila kulabalemununa bacete mbuli Genival iwaambwa musyule. Mukubaa coolwe, Genival katana uzya ŋanda yakwe wakaswayigwaa Maria umwi wababelesi baciindi coonse wa Bakamboni ba Jehova. Genival ulayeeya kuti: “Mubandi ooyo wakagwasya mukwasyi wangu kumapenzi aatayandiki aakali kuboola.”

Genival wakabona kuti mulimo wa Leza tawuyeeme aakupa cimanyakkumi pe. Mubwini, Magwalo atondezya kuti kupa cimanyakkumi takuciyandiki pe. Wakaiya kuti Banakristo balalongezyegwa kapati eelyo nobapa camoyo woonse akuti tabasinikizyigwi buya kupa zintu nzyobajisi.

Ikupa cakuliyandila kwamuletela kukkomana kwini-kwini Genival. Mboobu mbwapandulula: “Ndilakonzya kupa 10 pasenti naa pe, pele ndilikkomene amali ngondisanga alimwi ndili masimpe kuti awalo Jehova ulikkomene.”

Kabbokesi/[Zifwanikiso izili apeeji 6]

Sena Bama Fwala ba Cikombelo Cakusaanguna Bakali Kuyiisya Kujatikizya Cimanyakkumi?

“Ibantu bavwubide akati kesu balabagwasyilizya bacete . . . Aabo bavwubide alimwi balisungwide, balapa bweelede kweelana aumwi mbwalimvwa mumoyo wakwe.”—The First Apology, Justin Martyr, c. 150 C.E.

“Ncamasimpe kuti bama Juda bakali kupa cimanyakkumi cazintu zyabo kuli Leza, pele Banakristo balabikka ambali zintu zyabo zyoonse kumulimo wa Leza, . . . mbubwenya mbuli mukamufwu mucete mbwaakacita walo iwakabikka zintu nzyaakajisi zyoonse muciyobwedo ca Leza.”—Against Heresies, Irenaeus, c. 180 C.E.

“Nokuba kuti tulijisi ciyobwedo camali, imali aali mumo taali akuula lufwutuko pe, mbuli yaayo acikombelo cibikkide mali buya aumwi ngaelede kusanga. Ciindi comwe amwezi, umwi aumwi ulakonzya kusanga mali masyoonto muciyobwedo; pele lilikke buyo ikuti kayanda alimwi kakonzya kucita boobo: nkaambo kunyina uusungilizyigwa buya pe; zyoonse zyeelede kucitwa cakulisungula.”—Apology, Tertullian, c. 197 C.E.

“Mbobakali kuyaabuvwula bantu mu Cikombelo alimwi ambunga zisiyene-siyene nozyakatalisyigwa kubamba milawo iyakali kukonzya kubagwasya basololi bazikombelo mukubapa mali. Injiisyo yakupa cimanyakkumi yakabwezyegwa mu Mulawo wa Musa . . . Imulawo wini wakusaanguna wakabambwa akaambo kaceeci, aboobo ulibonya kuti ulajanika mulugwalo lwabama bbishopo bakabungana mudolopo ilili mucisi ca France mu 567 alimwi amumabbuku akali ku Muswaangano wakacitikila mudolopo lya Macon mu 585.”—The Catholic Encyclopedia.

[Kulumba]

Coin, top left: Pictorial Archive (Near Eastern History) Est.

[Cifwanikiso icili apeeji 5]

Ikusanga cakuliyandila kupa kukkomana

[Cifwanikiso icili apeeji 7]

Zyakusanga zipegwa cakuliyandila zilagwasya mukuba amali aayandika kumulimo wabukambausi, kugwasya nokwacitika ntenda, alimwi akuyaka masena aakukombela