Ikupa Zintu Zinji Kwiinda Nzyomujisi

“MULAKONZYA kundaamba kuti ndime sikulombelela; pele kunyina buya ambondilimvwa pe. Ndilombelela mali aa Jesu.” Aayo majwi akaambwaa mubelesi wacikombelo ca Protestanti walo utondezya kuzwangana kuliko akati kabakombi akaambo kakubula muzeezo ngobakonzya kubelesya kutegwa bajane mali aakubelesya. Kulibonya kuti mbunga yabukombi ikonzya buyo kuzwidilila lilikke noyijana mali manji. Babelesi beelede kuvwozyegwa, zikombelo zyeelede kuyakwa akubambululwa alimwi amali alayandika kumulimo wabukambausi. Ino mbuti mali aayandika kumilimo eeyi mbwaakonzya kujanwa?

Muzikombelo zinji, mali alakonzya kujanwa kwiinda mukupa cimanyakkumi. Imukambausi wazina lya Norman Robertson wakaamba kuti: “Cimanyakkumi nenzila Leza njabelesya mukugwasyilizya bwami Bwakwe anyika. Ibubambe bwa Leza bwakweendelezya mali bwapa kuti cikonzyeke kuti Makani Mabotu akambaukwe.” Kasinizyide kubayeezya basikumutobela kujatikizya mukuli ngobajisi wakupa, mukambausi ooyu ukankaizya kuti: ‘Ikupa cimanyakkumi tacili cintu cicitwa akaambo kakuti mulakonzya kucita oobo. Eeci citondezya kuti tulaitobela milawo. Ikwaalilwa kupa cimanyakkumi ncitondezyo caantangalala cakutyola milawo ya Leza. Ncimwi buyo akubba mali munzila yabumpelenge.’—Tithing—God’s Financial Plan.

Cakutadooneka, mulazumina kuti kupa ceelede kuba cibeela cabukombi bwa Bunakristo. Nokuba boobo, sena kupa mali kwakusungilizyigwa buya ciindi aciindi kulamunyonganya antela kumucima? Haazibwene mulwiiyo lwabukombi wakucisi ca Brazil wazina lya Inácio Strieder wakaamba kuti zikombelo zibelesya cimanyakkumi kuba nzila “yakumanizya mapenzi ngobajisi mumbunga zyabo,” alimwi micito iili boobo wiibona kuti “taili yamumulawo pe, njalunya alimwi itondezya kuleya kuzwa kubukombi.” Kweelanaa mbwazibona zintu, icacitika ncakuti “bantu batabeleki, bamukabafwu, bantu bakkala mumasena mobali banji kapati alimwi abamwi buyo, bayeeya kuti Leza wakabalekelezya. Alimwi balimvwa kuti basungilizyigwa buya ikupa zintu zinji kapati ‘kumukambausi’ kakuli mikwasyi yabo yoona anzala.”

Aboobo mulakonzya kulibuzya kuti: ‘Sena zikombelo izisungilizya bantu kupa cimanyakkumi zili mukwaatobela kabotu Magwalo? Ambweni zikombelo zimwi zili mukukonga butanga kuti bayoosubulwaa Leza kuti kabatabbadali mali. Sena Leza uyanda kuti swebo katupa zintu zinji kwiinda nzyotujisi?’