Mibuzyo Yabasikubala

Sena zikonke zicitwa kuli Leza zilabeleka lyoonse?

Mu Bbaibbele, cikonke ncisyomezyo cicitwa cakusinizya kuli Leza kuti mulakonzya kumucitila cimwi cintu, kumupa cakusanga, kumubelekela mulimo antela kubweza mukuli umwi naa kuliimya cintu cimwi icili buyo kabotu. Ibbaibbele lilijisi zibalo zyaamba zikonke zyakayeeme akucita cimwi cintu akaambo kakuti zyakali kubikkilizya kuzumina kutobela nzila imwi iipedwe ikuti naa Leza wasaanguna kucita cimwi cintu. Mucikozyanyo, Hana banyina Samuele musinsimi ‘bakakonkezya kuti, O Jehova wamakamu-makamu, kuti kobona cakubona mafwabi aamwanakazi mulanda wako kukundiibaluka akutaluba mulanda wako akundipa ndemulanda wako mwana mulombe ambebo njoomupa Jehova mazuba oonse aabuumi bwakwe, nkabela mutwe wakwe tuukoozoogelwa alunyoolo lyoonse pe.’ (1 Samuele 1:11) Alimwi Bbaibbele lipandulula kuti, izikonke nzyakuliyandila buya. Ino zibeleka buti izikonke zicitwa kuli Leza?

Mwami Solomoni wa Israyeli yansiku wakaamba kuti: “Na wakonkezya Leza cikonke, utamuki kucizuzikizya.” Alimwi ulayungizya kuti: “Zuzikizya ncowakakonkezya. Ncibotu kutakonka kwiinda kutazuzikizya cikonke cako.” (Mukambausi 5:4, 5) Mulawo ngobakapegwa bana Israyeli kwiinda muli Musa waamba kuti: “Na wakonkezya Jehova Leza wako cikonke, utamuki kucizuzikizya, nkaambo ncobeni Jehova Leza wako ulaciyandaula, aboobo mulaba cibi mulinduwe.” (Deuteronomo 23:21) Masimpe, ikukonkezya kuli Leza nkaambo kapati. Muntu uleelede kubaa twaambo tubotu ncayelede kukonkela alimwi ooyo uli mukucita boobo weelede kasinizyide kuti ulakonzya kucizuzikizya kufwumbwa ncaasyomezya mucikonke eeco. Ikuti naa katacikonzyi kucizuzikizya, cili kabotu kutakonkezya. Pele, ino kuti naa cikonke cacitwa kale, sena zikonke zyoonse zyeelede kuzuzikizyigwa?

Ino kuti naa muntu wakonkezya kuti uyoocita cimwi cintu kumbele pele caboneka kuti taceendelani akuyanda kwa Leza? Ino kuti naa cikonke eeco munzila imwi ciliswaangene akucita bwaamu kubukombi bwakasimpe? (Deuteronomo 23:18) Cilisalede kuti cikonke cili boobo taceelede kuzuzikizyigwa pe. Kuyungizya waawo, mu Mulawo wa Musa, cikonke cakali kucitwa amukaintu cakali kukonzya kucincwa abawisi naa mulumaakwe.—Myeelwe 30:3-15.

Alimwi amweezyeezye kujatikizya muntu wakakonka kuli Leza kuti uyanda kuzumanana katakwati naa kukwatwa, pele lino wajana kuti nciyumu kuzumanana muciimo cili boobo. Cikonke cakwe camupa kulimvwa kuti kuzumanana kuli ncico kulakonzya kumubikka muntenda yakusotoka zyeelelo zya Leza kujatikizya kulilemeka. Sena uleelede kuzumanana kusoleka kucizuzikizya cikonke cakwe? Sena tacikooyinda kubota kuti ataciti bwaamu kwiinda mukutazuzikizya cikonke cakwe? Ikuti naa caba boobo, alombe luse lwa Leza kuti amulekelele. Uleelede kulisalila mwini ncayelede kucita mukaambo aaka. Kunyina muntu uumbi uukonzya kumusalila pe.

Ino mbuti kuti naa umwi muntu wakonka mponya kumbele wabona kuti wakabinda kapati kucita boobo? Sena uleelede kuzumanana kuzuzikizya cikonke? Tiicakali cuuba-uba pe kuli Jefita kuzuzikizya cikonke ncaakacita kuli Leza, pele wakacita oobo camoyo woonse. (Babetesi 11:30-40) Ikwaalilwa kuzuzikizya cikonke kulakonzya  kupa kuti Leza ‘akalale’ alimwi akunyonganya milimo muntu umwi njaakacita. (Mukambausi 5:6) Ikuubya-ubya kaambo kajatikizya kuzuzikizya cikonke kulakonzya kupa kuti cilongwe a Leza cimane.

Jesu Kristo wakaamba kuti: ‘Kwaamba kwanu akube iiyi naa peepe, nkaambo zyoonse ziyungizyigwa waawa zizwa kumubi.’ (Matayo 5:37) Munakristo teelede buyo kubikkila maano kukuzuzikizya zikonke kuli Leza pe, pele weelede kutondezya kuti ulasyomeka muzintu zyoonse nzyaamba kuli Leza alimwi akubantu. Ino mbuti ikuti naa kali mubukkale bukatazya akaambo kakucita cizuminano amuntu umwi icakali kulibonya kuti cili kabotu, pele kwiinda mukucibikkila maano calibonya kuti tacili kabotu? Munakristo tayelede kwaaubya-ubya makani aaya pe. Pele akaambo kakubandika, mweenzinyina ulakonzya kusala kumwaangulula kucikonke ncobakaangide.—Intembauzyo 15:4; Tusimpi 6:2, 3.

Caboola kumakani aazikonke alimwi azintu zimwi, ino ncinzi ncotweelede kubikkila maano? Lyoonse tweelede kusoleka kubamba cilongwe cibotu a Jehova Leza.

[Zifwanikiso izili apeeji 30, 31]

Hana kunyina naakawayawaya pe kuzuzikizya cikonke cakwe

[Zifwanikiso izili apeeji 30, 31]

Jefita cakulisungula wakacizuzikizya cikonke cakwe