“Alakwe Ulamuswenenena”

“[Leza] tali kule kuluumwi umwi wesu.”—INCITO 17:27.

1, 2. (a) Ciindi notulanga kujulu akubona nyenyezi zinji, ino mmubuzyo nzi ngotukonzya kubuzya kujatikizya Mulengi? (b) Ino mbuti Ibbaibbele mbolitusyomezya kuti bantu balayandika kapati kuli Jehova?

SENA kuli nomwakalungumene kale kujulu ciindi camasiku kakutakwe makumbi akubona nyenyezi zinji akujata keebo kanu akaambo kakugambwa? Ikuvwula kwanyenyezi alimwi akukomena kwamulenga-lenga kulayoosya kapati. Inyika nkagoto buyo kasyoonto mububumbo oobu bupati bwakujulu aansi. Sena eeci caamba kuti Mulengi ngo “Mupatikampatila atala anyika yoonse”? Sena ulisumpukide kapati cakuti takonzyi kubikkila maano kubantu naa kuti uli kulamfwu kapati alimwi takonzyi kuyandaulwa ikutegwa azyibwe?—Intembauzyo 83:18.

² Ibbaibbele lisyomenzya kuti bantu balayandika kapati kuli Jehova. Mubwini, Ijwi lya Leza litukulwaizya kuti tumuyandaule nolyaamba kuti: “Tali kule kuluumwi umwi wesu.” (Incito 17:27; 1 Makani 28:9) Inzya, ikuti naa twabweza ntaamo kutegwa tuswenene kuli Leza, uyootutambula. Munzila nzi? Imajwi aali mulugwalo lwamwaka wa 2003 lulapa bwiinguzi bwakuti: “Alakwe ulamuswenenena.” (Jakobo 4:8) Lino atulange-lange zilongezyo zimwi zitaliboteli Jehova nzyapa kuli baabo ibali afwaafwi anguwe.

Icipego Caumwi Aumwi Kuzwa Kuli Jehova

3. Ino ncipego nzi Jehova ncapa kuli baabo ibaswenenena kulinguwe?

³ Cakusaanguna, Jehova wababambila cipego cibotu babelesi bakwe. Nguzu , lubono alimwi alwiiyo loonse zikonzya kujanwa munyika eeyi mbyaabi tazikonzyi kusika acipego eeci pe. Ncipego caumwi aumwi calo Jehova ncapa buyo kuli baabo ibali afwaafwi anguwe. Ino ncipego nzi eeco? Ijwi lya Leza lilaingula kuti: “Na . . . [w]oongolola kuti ube amaanu, Na wabuyandaula mbuli insiliva, akubulangaula mbuli zintu ziyandika zisisidwe, ncobeni uyoomvwa kuyoowa Jehova, akujana luzibo lwa-Leza. Nkaambo Jehova ulaabila busongo.” (Tusimpi 2:3-6) Amukayeeyele buyo kaambo aaka kakuti bantu batalondokede balakonzya kujana “luzibo lwa-Leza”! Icipego eeco, nkokuti luzibo lwa Leza lujanika mu Jwi lyakwe lulakonzya kukozyanyisyigwaa “zintu ziyandika zisisidwe.” Nkaambo nzi?

4, 5. Ino nkaambo nzi “luzibo lwa-Leza” ncolukonzya kukozyanyisyigwa ‘kuzintu ziyandika zisisidwe’? Amupe cikozyanyo.

 ⁴ Ikaambo kapati nkakuti, luzibo lwa Leza lulayandika kapati. Ibulumbu bumwi bupati kapati mbulangizi bwakuyoopona buumi butamani. (Johane 17:3) Pele luzibo oolu lulapa kuti buumi bwesu kabuli bubotu nociba ciindi ecino. Mucikozyanyo, akaambo kakuliyiisya kabotu tobeni Jwi lya Leza, tulakonzya kuzyiba bwiinguzi kumibuzyo mipati iili mbuli wakuti: Ino Leza nguni zina lyakwe? (Intembauzyo 83:18) Mubwini, ino bantu bafwide bali muciimo cili buti? (Mukambausi 9:5, 10) Ino Leza ujisi makanze nzi kujatikizya nyika alimwi abantu? (Isaya 45:18) Twazyiba kuti ikutegwa tukkale kabotu tweelede kubelesya lulayo lwamu Bbaibbele lupa busongo. (Isaya 30:20, 21; 48:17, 18) Aboobo, tulijisi busolozi bubotu ibukonzya kutugwasya kulwana nzyotulibilika mubuumi alimwi akupona munzila iikonzya kuleta lukkomano. Kwiinda waawo, ikuliyiisya Jwi lya Leza kwapa kuti tuzyibe bube bwa Jehova butaliboteli alimwi akuswenena kulinguwe. Ino ncinzi cikonzya kuyandika kwiinda akuba acilongwe cibotu a Jehova iciyeeme a “luzibo lwa-Leza”?

⁵ Kuli kaambo akambi ikapa kuti luzibo lwa Leza lukonzye kukozyanyisyigwaa “zintu ziyandika zisisidwe.” Mbubwenya mbuli mbolukatazya kujana lubono munyika iino, ncimwi buyo alwalo luzibo oolu talujaniki-janiki pe munyika eeyi. Ibantu ibali munyika bali 6,000,000,000, kakuli ibakombi ba Jehova bali buyo 6,000,000, munzila imwi inga twaamba kuti muntu omwe akati kabantu ibali 1,000 ngookajana “luzibo lwa-Leza.” Ikutondezya kujatikizya mbuli coolwe eeci cakuzyiba kasimpe kajanika mu Jwi lya Leza mbocikatazyide, amulange-lange buyo mubuzyo omwe wamu Bbaibbele wakuti: Ino ncinzi cicitika bantu nobafwa? Tulizi kwiinda mu Magwalo kuti buumi bulafwa, nkokuti muntu kumugama buya alimwi akuti bafwide tabazi cintu nociba comwe. (Ezekieli 18:4) Pele, ilusyomo ndobasyoma lwakubeja lwakuti kuli cintu cimwi icili mumuntu icizumanana kupona muntu afwa lulimwaikide kaka muzikombelo zinji. Eeci ncibeela cipati kapati mubukombi bwa Kristendomu. Alimwi lulajanika mucikombelo caba Bbuda, ba Hindu, ba Jaini, ba Juda, ba Mozilemu, ba Shinto, ba Siki alimwi aba Tao. Amuyeeye buyo kuti tuulunzuma twabantu ituli mbutubede tuli mukweenwa anjiisyo eeyi yakubeja!

6, 7. (a) Ino mbaani balikke ibakonzya kujana “luzibo lwa-Leza”? (b) Ino ncikozyanyo nzi icitondezya kuti Jehova watupa luzibo lwamakani ngobatakonzyi kumvwisya “basimaanu alimwi abacenjede”?

⁶ Ino nkaambo nzi bantu banji ncobataningajana “luzibo lwa-Leza”? Nkaambo kunyina uukonzya kumvwisya kasimpe kali mu Jwi lya Leza ikuti naa Walo tanaamugwasya pe. Kamuyeeya kuti iluzibo oolu ncecipego. Jehova ulupa buyo baabo ibalisungude kuluyandaula mu Jwi lyakwe cakusinizya alimwi acakulibombya. Ibantu bali boobo tababi buyo “basongo kumeso aabantu” pe. (1 Ba-Korinto 1:26) Ibunji bwabo balakonzya kwiitwa kuti “mbantu buyo abatakaiya” twabeelanya kuzyeelelo zyakunyika. (Incito 4:13) Pele, eeci cinyina makani pe. Jehova ulatulongezyaa “luzibo lwa-Leza” akaambo kabube mbwajana mumoyo wesu.

⁷ Amulange-lange cikozyanyo eeci. Basikwiiya Bbaibbele ibamu Kristendomu baamba makani manji aajatikizya Bbaibbele. Makani aali boobo alakonzya kupandulula makani aansiku, mabala aa Cihebrayo alimwi aa Cigiliki ncaapandulula alimwi amakani aambi buyo. Akaambo kakwiiya kuli boobu, sena aaba basikwiiya balujana “luzibo lwa-Leza”? Kwiinda mu Bwami bwakwe bwakujulu, sena balaumvwisya kabotu mutwe wa Bbaibbele alimwi akulemekwa kwabweendelezi bwa Jehova? Sena balizi kuti Jehova Leza tali cibeela ca Butatu? Swebo tulaamvwisya kabotu makani aaya. Nkaambo nzi? Nkaambo kakuti Jehova watupa  luzibo lujatikizya makani aakasimpe kakumuuya ibanji “basimaanu abacenjede” ngobatakonzyi kumvwisya. (Matayo 11:25) Elo kaka Jehova ulabapa bulumbu aabo baswenena kulinguwe!

“Jehova Ulaba[ba]mba Boonse Bamuyandisya”

8, 9. (a) Ino mbuti Davida mbwaakapandulula cilongezyo acimbi cabaabo baswenena kuli Jehova? (b) Ino nkaambo nzi Banakristo bakasimpe ncobayandika kukwabililwa a Leza?

⁸ Aabo ibaswenena kuli Jehova balijisi cilongezyo acimbi, nkokuti kukwabililwa a Leza. Sintembauzyo Davida walo wakasikilwa makatazyo manji wakalemba kuti: “Jehova uli kufwaafwi kuliboonse bamwiita, boonse bamwiita calusinizyo. Bamuyoowa, ulabacitila mbobayanda; ulaswiilila [kulila kw]abo akubafutula. Jehova ulabamba boonse bamuyandisya.” (Intembauzyo 145:18-20) Inzya, Jehova uli afwaafwi abaabo bamuyanda alimwi ulafwambaana kumvwa ciindi nobalomba kugwasyigwa.

⁹ Ino nkaambo nzi ncotuyandika kukwabililwa a Leza? Kunze lyakupenzyegwa akaambo kazintu zicitika ‘muziindi eezi zikatazya,’ Banakristo bakasimpe mbayandisya kapati Sinkondonyina mupati wa Jehova, Saatani Diabolosi. (2 Timoteo 3:1) Ooyu sinkondoma sibucenjezu ukanzide kuti ‘atulume.’ (1 Petro 5:8) Saatani ulatupenzya, ulatuyunga alimwi akutusunka. Alimwi ulalanga moyo wamuntu mbuubede alimwi ancayeeya aciindi aawo amana ulakonzya kubona ngwakonzya kunyonganya. Kuli ncayandisya kapati kuti acite, ooku kucesya lusyomo lwesu ikutegwa buumi bwesu bwakumuuya bubule mpindu. (Ciyubunuzyo 12:12, 17) Mbwaanga ooyu sinkondoma ngotulwana limwi muntu uujisi nguzu kapati, sena tacikulwaizyi ikuzyiba kuti “Jehova ulaba[ba]mba boonse bamuyandisya”?

10. (a) Ino Jehova ubakwabilila munzila nzi bantu bakwe? (b) Ino ndukwabililo nzi luyandika kapati, alimwi nkaambo nzi?

¹⁰ Aboobo, ino mbuti Jehova mbwakwabilila bantu bakwe? Icisyomezyo Cakwe cijatikizya kukwabilila tacaambi kuti tatukoonoosikilwa mapenzi mubweende oobu bwazintu bubyaabi; ambweni kuti weelede kucita maleele buya kukwabilila ndiswe. Pele, Jehova ulapa lukwabililo lwakumubili kubantu bakwe boonse. Alimwi buya kunyina nakonzya kulekela Diabolosi kuti abanyonyoone boonse bakombi bakasimpe anyika pe. (2 Petro 2:9) Kunze lyaboobo, Jehova ulatukwabilila munzila yakumuuya. Ulatupa nzyotuyandika ikutegwa tukonzye kuliyumya mumasukusyo alimwi akubambilila cilongwe cesu anguwe. Ilukwabililo lwakumuuya ndolukwabililo luyandika kapati. Nkaambo nzi? Nkaambo kakuti icilongwe cesu a Jehova ciyandika kuti kacicizumanana, kunyina cintu cikonzya kutulobya pe, noluba lufwu buya.—Matayo 10:28.

11. Ino mbubambe nzi Jehova mbwaacita ikutegwa acingilile bantu bakwe munzila yakumuuya?

¹¹ Jehova wacita bubambe ibuli mbobubede ikutegwa abakwabilile munzila yakumuuya aabo ibaswenena kulinguwe. Kwiinda mukubelesya Jwi lyakwe Ibbaibbele, ulatupa busongo ikutegwa tucikonzye kuliyumya mumasukusyo aasiyene-siyene. (Jakobo 1:2-5) Ikubelesya lulayo lujanika mu Magwalo alwalo ndukwabililo. Kunze lyaboobo, Jehova ulapa “Muuya Uusalala [kuli baabo] abakumbila kulinguwe.” (Luka 11:13) Imuuya ooyu nguwiinda nguzu kujulu aansi, aboobo ulakonzya kutugwasya kulwana sukusyo naa musunko woonse uukonzya kutusikila. Kwiinda muli Kristo, Jehova wapa “zipego kubantu.” (Baefeso 4:8, Ci.) Baalumi aaba baleelela  munzila yakumuuya, balasola kutondezya lweetelelo mukugwasya bakombinyina mbubwenya mbuli Jehova mbwatondezya camoyo woonse.—Jakobo 5:14, 15.

12, 13. (a) Ino mbuti Jehova mbwatupa cakulya cakumuuya aciindi ceelede? (b) Ino mulimvwa buti kuzintu Jehova nzyapa izituyaka munzila yamuuya?

¹² Jehova ulatupa cintu acimbi ikutegwa atukwabilile, eeci cakulya cakumuuya cipegwa aciindi ceelede. (Matayo 24:45) Kwiinda mumabbuku aasimbidwe, kubikkilizyaa mamagazini aa Ngazi Yamulindizi alimwi a Galamukani!, miswaangano yambungano, yabbazu ayaalubazu alimwi ayacooko, Jehova ulatupa nzyotuyandika aciindi eeci notuziyanda. Sena mulakonzya kuyeeya ciindi nomwakamvwa kaambo kamwi kumuswaangano wa Banakristo, wabbazu, waalubazu antela wacooko kakamuyasa kumoyo akumuyumya naa kumukatalusya? Sena kuli ciindi nomwakabala cibalo cimwi kuzwa mumamagazini aambwa mucibalo, eelyo akulimvwa kuti, Cibalo eeco cakalembelwa ndinywe buya?

¹³ Ikutyompwa nenzila imwi Saatani njabelesya kapati alimwi kunyina uukozya kukweeleba pe. Ulizi kabotu-kabotu kuti, ikuti naa muntu wazumanana kulimvwa kuti wawizuka, ulakonzya kumana nguzu, nokuba kulibikka antangalala. (Tusimpi 24:10) Tuyandika kugwasyigwa kapati akaambo kakuti ciindi notutyompwa nceciindi Saatani natukatazya kapati. Imamagazini aa Ngazi Yamulindizi alimwi a Galamukani ziindi zimwi alijisi zibalo izitugwasya kulwana penzi eeli lyakutyompwa. Ikujatikizya cimwi cazibalo zili boobo, mucizyi umwi Munakristo wakalemba kuti: “Ndilacibala cibalo ziindi zinji alimwi misozi ilakunka. Ndilaibikka afwaafwi abulo bwangu ikutegwa kandiibala kufwumbwa ciindi nondityompedwe. Kwiinda muzibalo zili boobu, ndimvwa mbuli kuti janza lya Jehova likwabilila lilandifwukatila.” * Sena tatumulumbi Jehova akaambo kakutupa cakulya cakumuuya aciindi ceelede? Kamuyeeya kuti bubambe oobu Jehova mbwapa kutegwa tupone kabotu munzila yakumuuya ncitondezyo cakuti ulaafwaafwi andiswe alimwi ulatucingilila.

Nzila Yakusikila kuli ‘Sikuswiilila Mipailo’

14, 15. (a) Ino ncilongezyo nzi cigaminina Jehova ncaapa kuli baabo ibali afwaafwi anguwe? (b) Ino nkaambo nzi kuzumizyigwa kumusikila Jehova mumupailo ncocili coolwe citalikomeneni?

¹⁴ Sena mulizyi kuti ibantu bapegwa cuuno caatala alimwi abatalika kweendelezya, ikanjikanji balacileka kusikika abaabo mbobeendelezya? Ino mbuti walo Jehova Leza? Sena mmuntu uutabikkili maano bantu nzyobaamba? Peepe. Imupailo ncimwi cazipego Jehova nzyapa kuli baabo ibali afwaafwi anguwe. Ikuzumizyigwa kusikila ‘sikuswiilila mipailo’ masimpe ncoolwe icitalikomeneni. (Intembauzyo 65:2) Nkaambo nzi?

¹⁵ Mucikozyanyo: Imweendelezi mupati wakkampani ulijisi milimo minji kapati. Ulasala makani ngakonzya kulanganya walo alimwi ayaayo ngakonzya kupa bambi kuti baalanganye. Mbubwenya buyo, Muleli wakujulu aansi ulijisi nguzu zyakusala makani ngakonzya kujatikizyigwa walo alimwi ayaayo ngakonzya kupa bamwi kuti baalanganye. Amulange-lange kujatikizya zyoonse Jehova nzyaakabikka mumaanza aa Mwanaakwe uuyandwa Jesu.  Imwana wakapegwa “bwami bwakubeteka.” (Johane 5:27) Ibangelo “balibikidwe kunsi lyakwe.” (1 Petro 3:22) Imuuya uusalala wa Jehova uujisi nguzu kapati wakapegwa kuli Jesu ikutegwa aubelesye mukusololela basikwiiya bakwe anyika. (Johane 15:26; 16:7) Aboobo Jesu wakaamba kuti: “Ndapegwa bwami boonse nibuba bwakujulu nibuba bwaansi.” (Matayo 28:18) Pele, caboola kumakani aamipailo yesu, Jehova wakasala kuti ajatikizyigwe lwakwe kumugama. Nkakaambo kaako Ibbaibbele ncolitulailila kuti katugamika mipailo yesu kuli Jehova, katucita oobo kwiinda muzina lya Jesu.—Intembauzyo 69:13; Johane 14:6, 13.

16. Ino nkaambo nzi ncotukonzya kuba masimpe kuti Jehova ulaiswiilila mipailo yesu?

¹⁶ Sena masimpe kuti Jehova ulaiswiilila mipailo yesu? Nikwali kuti mmuntu uutabikkili maano, naatali kutukulwaizya ‘kukomba lyoonse’ naa kutwaambila kubikka mapenzi eesu alimwi anzyotulibilika mumaanza aakwe. (Baloma 12:12, Ci; Intembauzyo 55:22; 1 Petro 5:7) Babelesi basyomeka bakali kupona muciindi nilyakali kulembwa Bbaibbele bakalijisi lusyomo lwakuti Jehova ulaswiilila mupailo. (1 Johane 5:14) Nkakaambo kaako, sintembauzyo Davida wakaamba kuti: ‘Jehova uyooswiilila ijwi lyangu.’ (Intembauzyo 55:17) Andiswe mbubwenya tulijisi kaambo katupa kusyoma kuti Jehova ulaafwaafwi alimwi akuti ulilibambilide kumvwa zili mumyoyo yesu.

Jehova Ulabapa Bulumbu Babelesi Bakwe

17, 18. (a) Ino Jehova ulimvwa buti kujatikizya milimo iicitwa cakusyomeka abantu bakwe mbaakalenga basongo? (b) Amupandulule mbuli bbuku lya Tusimpi 19:17 mbolitondezya kuti milimo yesu njotucitila bamwi caluse taili yabuyo kuli Jehova.

¹⁷ Ibusena Jehova mbwajisi kali Mweendelezi Wakujulu Aansi tabunyonganyizyigwi pe azintu bantu nzyobakonzya kucita alimwi azeezyo nzyobatakonzyi kucita. Pele, Jehova ngu Leza uulumba. Ulabikkila maano mane buya akukkomanina mulimo uucitwa cakusyomeka abantu bakwe mbaakalenga basongo. (Intembauzyo 147:11) Aboobo, oolu ndolugwasyo alumwi aabo ibali afwaafwi a Jehova ndobajana, ulabapa bulumbu babelesi bakwe.—Ba-Hebrayo 11:6.

¹⁸ Ibbaibbele lilatondezya kabotu-kabotu kuti Jehova ulabikkila maano kumilimo yabakombi bakwe njobacita. Mucikozyanyo, tubala kuti: “Uufwida bacete luzyalo ulakolotya Jehova; ulamupa  bulumbu bweelede milimo yakwe.” (Tusimpi 19:17) Ikulanganya caluzyalo Jehova nkwacita kubantu bacete kwakatondezyegwa mu Mulawo wa Musa. (Kulonga 23:3; Levitiko 14:21; 19:15) Ino Jehova ulimvwa buti ciindi notwiiya luse lwakwe kwiinda mukubeendelezya kabotu bantu bacete? Ciindi notupa bacete katutalangili kupegwa cintu cimwi, Jehova eeci ucibona mbuli kuti ncikwelete kuli Nguwe. Jehova ulasyomezya kuyoocibbadala cikwelete eeci munzila yaluzyalo alimwi uyakutulongezya. (Tusimpi 10:22; Matayo 6:3, 4; Luka 14:12-14) Inzya, ikuti twamweetelela mukombima uubulide, Jehova ulakkomana. Elo tulakkomana kaka notuzyiba kuti milimo njotucitila bamwi taili yabuyo kuli Taateesu wakujulu!—Matayo 5:7.

19. (a) Ino nkaambo nzi ncotukonzya kusinizya kuti Jehova ulalumba kumulimo ngotucita wakukambauka alimwi akugwasya bamwi kuba basikwiiya? (b) Ino mbuti Jehova mbwapa bulumbu kumilimo iicitwa yakugwasyilizya Bwami bakwe?

¹⁹ Jehova ulalumba ikapati kumilimo njotucita ya Bwami bakwe. Ciindi notuswenena kuli Jehova, tulakonzya kusinizya kuti tulacita oobo ikuti naa katubelesya ciindi cesu, nguzu alimwi alubono lwesu mukutola lubazu mbuli mbotukonzya mumulimo wa Bwami wakukambauka alimwi akugwasya bamwi kuba basikwiiya. (Matayo 28:19, 20) Ziindi zimwi tulakonzya kulimvwa kuti nzyotucita nzisyoonto kapati. Ikutalondoka kwesu kulakonzya kupa kuti tutalike kudooneka ikuti naa Jehova ulakukkomanina kusoleka kwesu. (1 Johane 3:19, 20) Pele Jehova ulacikkomanina cipego cili coonse kufwumbwa naa nziniini buti, ikuti naa capegwa amoyo woonse caluyando. (Marko 12:41-44) Ibbaibbele litusyomezya kuti: “Leza tali sikampenda, takonzya kuluba milimo yanu akuyanda nkomwaatondezya nkaambo kezina lyakwe.” (Ba-Hebrayo 6:10) Masimpe, Jehova ulayeeya alimwi akupa bulumbu kufwumbwa kalimo ikacitwa mukugwasyilizya Bwami bakwe. Kunze lyazilongezyo zyakumuuya ziliko suno, tulakonzya kulangila kuyookkomana abuumi munyika mpya iiboola, mwalo Jehova mmwayoovwungulula janza lyakwe akuzuzikizya kulombozya kwabaabo ibaswenena kulinguwe.—Intembauzyo 145:16; 2 Petro 3:13.

20. Mumwaka woonse wa 2003, ino mbuti mbotukonzya kuzumanana kuyeeya majwi aali mulugwalo lwamwaka, alimwi ino ncinzi iciyootobela?

²⁰ Mumwaka wa 2003 woonse, atulibuzye tobeni ikuti naa tuli mukusoleka kuzumanana canguzu ikuswenena kuli Taateesu wakujulu. Ikuti naa tulacita oobo, tulakonzya kuba masimpe kuti uyootwiingula kweelana ambwaakasyomezya. Kayi ‘Leza tabeji.’ (Tito 1:2) Ikuti naa mwaswenena kulinguwe, awalo ulaswena kulindinywe. (Jakobo 4:8) Ino ncinzi cikonzya kutobela? Tuyoolongezyegwa kapati lino alimwi tulakonzya kubaa bulangizi bwakunooswenena kuli Jehova lyoonse mane kukabe kutamani.

Bupanduluzi buyungizidwe

Sena Muciyeeyede?

• Ino ncipego nzi Jehova ncapa kuli baabo baswenena kulinguwe?

• Ino mbubambe nzi Jehova mbwaacita ikutegwa akwabilile bantu bakwe munzila yakumuuya?

• Ino nkaambo nzi icoolwe cakukonzya kupaila kuli Jehova ncocili caalubazu?

• Mbuti Ibbaibbele mbolitondezya kuti Jehova ulalumba kumulimo uucitwa cakusyomeka abantu bakwe mbaakalenga basongo?

[Mibuzyo yaciiyo]

[Cifwanikiso icili apeeji 15]

Jehova watulongezya kukamvwisya kasimpe kakumuuya

[Zifwanikiso izili apeeji 16, 17]

Jehova ulapa lukwabililo munzila yakumuuya

[Cifwanikiso icili apeeji 18]

Jehova ulaafwaafwi alimwi ulilibambilide kumvwa mipailo yesu yoonse