“Amulangile”
“Amulangile”
“Mbundamwaambila nywebo, mbubonya mbundaambila boonse. Ndati, Amulangile.”—MARKO 13:37.
1, 2. (a) Ino nciiyo nzi mwaalumi umwi ncaakayiya kujatikizya kukwabilila zintu zyakwe? (b) Kuzwa kucikozyanyo ca Jesu camubbi, ino ncinzi ncotwiiya kumakani aakulangila?
JUAN wakali kuyobweda muŋanda zintu zyakwe ziyandisi zyaakali kuyandisya. Wakali kuziyobweda mujungusi lyabulo, ibusena mbwaakali kuyeeya kuti mbobubotu kapati kuyobweda. Nokuba boobo, buzuba bumwi masiku, walo alimwi amukaintu wakwe kabalede, mubbi wakanjila kuzyuli. Kuboneka kuti mubbi wakalizi mpaakali kukonzya kuzijana zintu eezi. Wakazigwisya kabotu-kabotu zintu eezi ziyandisi mujungusi lyabulo alimwi akubweza mali Juan ngaakasiide mucibikkilo cakali mumbali lyatafwule lyakali kumbali lyabulo. Mafwumofwumo, Juan wakazyiba kuti wabbidwa. Lyoonse unooyeeya kaambyo kacisizya moyo nkaakayiya kakuti: Muntu woona kunyina nakonzya kulindila zintu zyakwe pe.
2 Ncimwi buyo amunzila yakumuuya. Tatukonzyi kukwabilila bulangizi alimwi alusyomo lwesu ikuti naa twatalika koona kumuuya. Aboobo Paulo wakakulwaizya kuti: “Tutanooni mbuli bantu bamwi, atukalinde, tube bapakamani.” (1 Ba-Tesalonika 5:6) Ikutegwa atondezye mbuli mbociyandika kulangila, Jesu wakabelesya cikozyanyo camubbi. Wakapandulula zintu zyakali kuzyooba zitondezyo zyakuboola kwakwe kuti Azoobeteke, mpoonya wakacenjezya kuti: “Nkaambo kaako amulangile, nkaambo tamuzi buzuba mbwazoosika mwami wanu. Mulasinizya kuti mwiniŋanda naakaakuzi ciindi ncati sike mubbi, naakali kulindila, naatakazumina kuti iŋanda yakwe itululwe. Mbubonya obo anywebo amulibambe, nkaambo kuciindi ncimutezi nciconya ncazoosika Mwana a-Muntu.” (Matayo 24:42-44) Mubbi taambi pe ibuzuba mbwaboola kuzyikubba. Ulasika nokunyina naba omwe uumuyeeyela. Mbubwenya buyo, Jesu wakaamba kuti mamanino aabweende oobu bwazintu bubyaabi ayooboola ‘aciindi ncotutayeeyeli pe.’
“Amulangile, Mukakatile Mulusyomo.”
3. Ino mbuti mbociyandika caboola kumakani akulangila kweelana acikozyanyo Jesu ncaakabelesya cabazike ibakali kulindila simalelo wabo walo wakali kulangilwa kujoka kubwiinga ciindi cili coonse?
3 Mumajwi aali mu Makani Mabotu aakalembwa a Luka, Jesu wakakozyanyisya Banakristo kubazike bakali kulangila simalelo wabo wakali kupiluka kuzwa kubwiinga. Bakeelede kuti kabalangila kutegwa asika abajane kabalanga, kabalibambilide kumutambula. Mbubwenya buyo Jesu wakaamba kuti: “Mwana a-Muntu uyoosika kuciindi ncomutezi.” (Luka 12:40) Ibamwi bamubelekela Jehova kwamyaka minji balakonzya kutalika kusumpya-sumpya mazuba kweelana aciindi ecino ncotupona. Balakonzya kutalika kuyeeya kuti mamanino acili kulamfwu kapati. Pele kuyeeya kuli boobo kulakonzya kupa kuti tutabikkili maanu kuzintu zyakumuuya akutalika kukanza kuyandaula lubono lunji izintu zinyonganya izikonzya kutupa kutalika kufwukula kumuuya.—Luka 8:14; 21:34, 35.
4. Ino ncisinizyo nzi iciyootukulwaizya kuzumanana kulangila, alimwi ino mbuti Jesu mbwaakacitondezya eeci?
4 Tulakonzya kwiiya ciiyo acimbi kuzwa kucikozyanyo ca Jesu. Nokuba kuti bazike tiibakazyi ciindi simalelo wabo naakeelede kusika, pele bakalibuzyi ibusiku oobo mbwaakali kuboola. Nicakaba cintu ciyumu kulangila masiku oonse aayo ikuti nibakaba amuzeezo wakuti simalelo walo ulakonzya kusika kufwumbwa busiku. Pele bakalizi imasiku ngaakali kulangilwa kusika, eeco cakeelede kubayumya-yumya kuzumanana kulangila. Mbubwenya buyo, ibusinsimi bwamu Bbaibbele bulaamba cakusalazya ikuti tupona muciindi cakumamanino; pele tabutwaambili ibuzuba naa woola lyamamanino kuligama buya pe. (Matayo 24:36) Ilusyomo ndotujisi ndwakuti mamanino alaboola lulatugwasya kuti tuzumanane kulangila, pele ikuti naa katusinizyide kuti buzuba bwa Jehova masimpe bulaafwaafwi, tunoojisi camba cakuzumanana kulangila.—Zefaniya 1:14.
5. Ino ncinzi ncotukonzya kucita akaambo kakukulwaizya kwa Paulo kwakuti “amulangile”?
5 Paulo naakalembela bana Korinto wakabakulwaizya kuti: “Amulangile, mukakatile mulusyomo.” (1 Ba-Korinto 16:13) Inzya, kulangila kuliswaangenyi akwiima cakutazungaana mulusyomo lwa Bunakristo. Ino mbuti mbotukonzya kuzumanana kulangila? Nkwiinda mukubaa luzibo lwini-lwini mu Jwi lya Leza. (2 Timoteo 3:14, 15) Ikubaa cilengwa cibotu cakuliyiisya Bbaibbele tobeni alimwi akujanika lyoonse kumiswaangano kulakonzya kugwasya mukuyumya lusyomo lwesu. Ikuyeeya buzuba bwa Jehova lyoonse, ncibeela ciyandika kapati mulusyomo lwesu. Ikwiinduluka-induluka cakusinizya kuzwa mu Magwalo citondezya kuti tupona muciindi camamanino alimwi abweende oobu bwazintu bubyaabi, buyootugwasya kubikkila maano kumakani aakasimpe aajatikizya mamanino aaboola. * Alimwi cilagwasya kubikkila maano kuzintu izili mukucitika munyika zyalo izizuzikizya businsimi bwamu Bbaibbele. Mukwesu umwi waku Germany wakalemba kuti: “Lyoonse nondiswiilila makani acipekupeku—kuli nkondo, mizuzumo yanyika, lunya alimwi akubisyigwa kwanyika yoonse, zyoonse eezyi zinditondezya mbwaali afwaafwi mamanino.”
6. Ino mbuti Jesu mbwaakatondezya mbuli mbotukonzya kuleka kubikkila maano kukupakamana mazuba mbwaayaabuya?
6 Kubbuku lya Marko caandaano 13, tulajana cibalo acimbi cijatikizya kukulwaizya Jesu nkwaakakulwaizya batobeli bakwe kwakuti beelede kulangila. Kweelana acaandaano eeci, Jesu wakakozyanyisya bukkale bwabo kuli sikulindila amulyango uulindila kusika kwasimalelo wakwe uupiluka kuzwa kucisi cili kulamfwu. Sikulindila amulyango kunyina naakazi woola simalelo wakwe ndyaakeelede kupiluka. Pele wakeelede kuzumanana kulangila. Jesu wakaamba ziindi zili zyone zyakulangila simalelo naakali kulangilwa kusika. Ciindi camamanino cakali kutalika a 3 koloko wamasiku kusikila cifwumofwumo zuba nolipola. Aciindi eeci cakulangila, sikulindila amulyango inga limwi ŋonzi zyamutola. Aboobo kuluulwa kuti, basikalumamba aciindi eeci nokwalondelela kuca, nceciindi cibotu nobakonzya kulwana basinkondonyina nkaambo inga taakwe ancobazi pe. Mbubwenya buyo, aciindi eeci cakubucedo munzila yakumuuya, ibantu batuzungulukide nobali muŋonzi kapati, cilakonzya kutukatazya kapati kulangila. (Ba-Roma 13:11, 12) Aboobo mucikozyanyo cakwe, Jesu wakainduluka kukulwaizya kuti: “Amucenjele, kamulindila . . . [A]boobo, amulangile . . . Mbundamwaambila nywebo, mbubonya mbundaambila boonse. Ndati, Amulangile.”—Marko 13:32-37.
7. Ino nintenda nzi iiliko, alimwi akaambo kantenda eeyi, ino nkukulwaizya kuli buti nkotujana notubala lyoonse kuzwa mu Bbaibbele?
7 Jesu wakakulwaizya kulangila kwaziindi zinji mumulimo wakwe alimwi anaakabusyigwa. Mubwini, kanjikanji Imagwalo naamba zyamamanino aabweende oobu bwazintu bubyaabi, ikucenjezya kwakuti kamulangila naa amulangile kulajanika. * (Luka 12:38, 40; Ciyubunuzyo 3:2; 16:14-16) Cakutadooneka, ikuti muntu koona munzila yakumuuya ulabaa ntenda mpati kapati. Toonse tuyandika kucenjezyegwa munzila iili boobo.—1 Ba-Korinto 10:12; 1 Ba-Tesalonika 5:2, 6.
Baapostolo Botatwe Ibatakalangila
8. Ino mbuti mbobakacita baapostolo botatwe kukulomba kwa Jesu kwakuti balindile anguwe mumuunda wa Getesemane?
8 Ikulangila tacaambi buyo kubaa mizeezo mibotu pe, kweelana ambotutiibone mucikozyanyo ca Petro, Jakobo alimwi Johane. Aaba baalumi botatwe balo bakalisimide kumuuya bakamutobela Jesu cakusyomeka alimwi bakali kumuyandisya kapati. Nokuba boobo, masiku aabuzuba bwa Nisani 14, 33 C. E, bakaalilwa kulangila. Nobakazwa muŋanda yamujulu mwalo mobakali kucitila Pasika naa Pobwe Lyakwiindilila, ibaapostolo aaba botatwe bakaunka a Jesu kumuunda wa Getesemane. Okuya Jesu wakabaambila kuti: “Moyo wangu wausa buusu bwalufu. Amusyaale ano, tulindile anywebo.” (Matayo 26:35-38) Jesu wakapaila camoyo woonse kuli Bausyi ziindi zyotatwe, alimwi muziindi eezi zyotatwe naakali kupiluka wakali kubajana balilede.—Matayo 26:40, 43, 45.
9. Ino kuboneka kuti ncinzi cakapa kuti baapostolo aaba batalike koona?
9 Nkaambo nzi baalumi aaba basyomeka ncobakamutyompya Jesu masiku aayo? Kaambo kapati nkakuti bakalilemede citaambiki. Kwakasiide kaindi, alimwi kuboneka kuti ciindi cakaliindide kale akaandabwe kamasiku, aboobo “meso aabo akalilemede” akaambo kaŋonzi. (Matayo 26:43) Pele Jesu wakati: “Amulangile akukomba, kuti mutanjili mukusunkwa. Moyo wazumina pele nyama njiibula inguzu.”—Matayo 26:41.
10, 11. (a) Nokuba kuti wakalilemede kapati, ino ncinzi cakamugwasya Jesu kuzumanana kulangila mumuunda wa Getesemane? (b) Ino ncinzi ncotukonzya kwiiya kuzwa kuli ceeco cakacitikila baapostolo botatwe ciindi Jesu naakabalomba kuti balangile?
10 Kakunyina akudooneka, awalo Jesu wakalikatede masiku aabuzuba oobu butalubiki. Pele muciindi cakuti awone, ciindi eeci camamanino ncaakaangulukide wakacibelesya kukupaila. Mazuba masyoonto buyo aakaindide, wakakulwaizyide batobeli bakwe kuti kabakomba, naakati: “Pele amulinde lyoonse, mukombe, kuti mukakonzye kuyokoka kuzintu zyoonse ezi iziyoocitika, akwiima kumbele lya-Mwana a-Muntu.” (Luka 21:36; Ba-Efeso 6:18) Ikuti naa twatobela lulayo lwa Jesu alimwi acikozyanyo cakwe cibotu caboola kumakani aakupaila, ikukomba camoyo woonse kuli Jehova kuyootugwasya kuzumanana kulangila munzila yakumuuya.
11 Jesu wakalizi nokuba kuti basikwiiya bakwe tiibakazyi ciindi eeci, ikuti mukaindi kasyoonto buyo ulajatwa akujaigwa. Masukusyo aakwe ayoomanina acisamu cakupenzyezya. Jesu wakali bacenjezyede kale baapostolo bakwe kujatikizya zintu eezi, pele kunyina nobakamumvwinsya cini ncaakali kupandulula. Aboobo bakatalika koona walo naakali kulangila kumwi kapaila. (Marko 14:27-31; Luka 22:15-18) Mbubwenya mbuli bwakali baapostolo, imibili yesu yanyama tiijisi nguzu, alimwi kucili zintu azimbi nzyotutaningazyiba. Nokuba boobo, ikuti naa twaleka kubikkila maano muciindi cino ncotupona, tulakonzya kutalika koona kumuuya. Ccita buyo kuti lyoonse katupakamene, notunga twakonzya kuzumanana kulangila.
Ibube Botatwe Ibuyandika Kapati
12. Ino mbube nzi botatwe Paulo mbwaakaswaanganya ibukonzya kutugwasya kuba bantu bapakamene?
12 Ino mbuti mbotukonzya kuzumanana akubona kuti ciindi camana? Twabona kale mbuli mupailo mbouyandika alimwi ambokuyandika kuzumanana kuyeeya buzuba bwa Jehova. Kuyungizya waawo, Paulo ulaamba bube botatwe mbotuyandika kuba ambubo. Ulaamba: “Swebo mbotuli besikati atube bapakamani, tulisamike kucamba cikwabilizyo calusyomo aluyando, alimwi olo lufutuko ndotulangila lube ingoani yesu.” (1 Ba-Tesalonika 5:8) Atulange-lange mubufwaafwi mboluyandika lusyomo, bulangizi alimwi aluyando mukutugwasya kuti tuzumanane kulangila munzila yakumuuya.
13. Ino mmulimo nzi lusyomo ngolujisi mukutugwasya kupakamana?
13 Tweelede kuba alusyomo lutazungaani lwakuti Jehova nkwali ncobeni alimwi “nguupa [bulumbu] kulibaabo bamuyandaula.” (Ba-Hebrayo 11:6) Imatalikilo aakuzuzikizyigwa kwabusinsimi bwa Jesu bwamumwaanda wamyaka wakusaanguna ibujatikizya mamanino, alaluyumya lusyomo lwesu mukuzuzikizyigwa kapati kucitika kuciindi cesu. Alimwi lusyomo lwesu lulatugwasya kuzumanana kulangila buzuba bwa Jehova, katusinizyide kuti ‘icilengano cabusinsimi ciyooboola ncobeni, tacikamuki pe.’—Habakuku 2:3.
14. Ino mbuti mbobuyandika bulangizi ikuti naa katuyanda kuti tuzumanane kulindila?
14 Ibulangizi bwesu businizyide buli mbuli ‘musemu wabuumi’ walo uutupa kuti tuliyumye mumakatazyo nokuba kuti tweelede kulindila mukuzuzikizyigwa kumwi kwazisyomezyo zya Leza. (Ba-Hebrayo 6:18, 19) Mucizyi wazina lya Margaret umwi wabananike uulaamyaka yakuzyalwa iibalilwa kuma 90 walo wakabbapatizyigwa myaka iili 70 yainda, wakazumina kwaamba kuti: “Ciindi mulumaangu naakafwa akaambo kabulwazi bulya mubili bwakkansa mu 1963, ndakatalika kuyeeya kuti inga cabota ikuti mamanino afwambaana kuboola. Pele lino ndabona kuti ndakali kuyanda buyo kuti ndipengulukwe. Kunyina ancotwakazi aciindi eeco ikuti naa mulimo uyoosika kuli munyika yoonse mboizulwa. Nociba ciindi cino, kucili masena manji mwalo mulimo muucitalikwa buya. Aboobo ndili kkomenyi kujana kuti Jehova ulikkazikide moyo.” Mwaapostolo Paulo utucenjezya kuti: “Lukakatilo ndolupa bukkale butambulika kuli Leza, eelyo bukkale oobu mbobutupa lulangilo. Lulangilo oolu lulatuyumya.”—Baloma 5:3-5, Ci.
15. Ino mbuti luyando mbolutukulwaizya nokuba kuti cilakonzya kuboneka mbuli kuti twalindila kwaciindi cilamfwu?
15 Iluyando lwa Bunakristo mbube buyandika kapati nkaambo mbobube butukulwaizya muzintu zyoonse nzyotucita. Tulamubelekela Jehova nkaambo kakuti tulamuyanda nokuba kuti ulaaciindi cakwe mwini. Ikuyanda basimukoboma kutukulwaizya kuti katukambauka makani mabotu aa Bwami kufwumbwa naa Leza uyanda kuti tucite oobo kwaciindi cilamfwu buti, alimwi tatuzyi naa tweelede kujokelela ziindi zinji buti kumaanda aayo ngamunya. Mbubwenya mbuli Paulo mbwaakalemba kuti, “alabedelela aya otatwe, lusyomo abulangilizi aluyandisyo, pele akati kayaaya cipati nduyandisyo.” (1 Ba-Korinto 13:13) Luyando lulatugwasya kuliyumya alimwi akuzumanana kulangila. “[Luyando] lulijisi bulangilizi lyoonse akuba acamba kumapenzi oonse. Luyandisyo talweeli.”—1 Ba-Korinto 13:7, 8.
“Jatisya Eco Ncojisi”
16. Muciindi cakutolwaala, ino nciimo nzi ncotweelede kubaancico?
16 Tupona muziindi zikatazya mwalo zintu zicitika munyika lyoonse mozituyeezya kuti tuli mucibeela camamanino mumazuba aakumamanino. (2 Timoteo 3:1-5) Ecino tacili ciindi cakutolwaala pe, pele ‘ncakujatisya ceeco ncotujisi.’ (Ciyubunuzyo 3:11) Kwiinda ‘mukusitikila mukukomba’ alimwi akuba alusyomo, bulangizi alimwi aluyando, tuyoojanika katulibambilide musunko waakutusikila. (1 Petro 4:7) Zinji nzyotujisi zyakucita mumulimo wa Mwami. Ikujata bubi mumilimo yakukomba Leza kuyootugwasya kuzumanana kulangila.—2 Petro 3:11.
17. (a) Ino nkaambo nzi ziindi zimwi zityompya ncozitatulesyi kuba basungu? (Amubone kabbokesi kali apeeji 31.) (b) Ino mbuti mbotukonzya kumwiiya Jehova, alimwi ino nzilongezyo nzi zilindila baabo bamwiiya?
17 Jeremiya wakalemba kuti: “Jehova ncecaabilo cangu, . . . nkabela ngonguwe ngonsyoma. Jehova mubotu kuliyooyo uumulangila, kumuntu uumuyandaula. Ncibotu kuti muntu aumune akulindila lufutuko lwa-Jehova.” (Malilo 3:24-26) Tobamwi twalindila buyo kwaciindi cisyoonto. Ibamwi balindila kwamyaka minji ikutegwa babone lufwutuko lwa Jehova. Elo kaka ciindi eeci ncisyoonto ikuti twaceelanya aciindi citamani cili kumbele! (2 Ba-Korinto 4:16-18) Eelyo notucilindila ciindi ceelede ca Jehova, tulakonzya kujana bube buyandika kapati bwa Bunakristo alimwi akugwasya bamwi kuti abalo bagwasyigwe akukkazika moyo kwa Jehova, eelyo akujana kasimpe. Aboobo toonse atuzumanane kulangila. Lino atumwiiye Jehova alimwi akukkazika moyo kwakwe akumulumba akaambo kabulangizi mbwatupede. Eelyo mbotuya buzumanana kupakamana, atujatisye bulangizi bwabuumi butamani. Aboobo, zisyomezyo eezi zyabusinsimi ziyoozuzikizyigwa kulindiswe: “[Jehova] ulakusumpula kuti ukone nyika, nkabela uyoobona lunyonyooko lwabasizibi.”—Intembauzyo 37:34.
Bupanduluzi buyungizidwe
^ munc. 5 Cilakonzya kutugwasya kwiinduluka twaambo tusinizya itutondezya kuti tupona ‘mumazuba aakumamanino ituli cisambomwi’ itujanika apeeji 6 kusikila ku 7 mu Ngazi Yamulindizi yamu February 1, 2000.—2 Timoteo 3:1.
^ munc. 7 Naakali kwaamba kujatikizya cciti lya Cigiliki lisanduludwe kuti “kulangila naa kulanga,” mulembi wabbuku lipandulula mabala wazina lya W. E. Vine wakapandulula kuti mubwini lyaamba ‘kutanda ŋonzi’ alimwi “talyaambi buyo kulanga pe, pele lyaamba kulangila kucitwa abaabo balindila cintu cimwi.”
Ino Inga Mwaingula Buti?
• Ino mbuti mbotukonzya kusinizya ncobeni kuti mamanino aabweende oobu bwazintu bubyaabi alaafwaafwi?
• Ino ncinzi cikonzya kuyiigwa mucikozyanyo ca Petro, Jakobo alimwi a Johane?
• Ino mbube nzi botatwe ibukonzya kutupa kuti tuzumanane kupakamana munzila yakumuuya?
• Ino nkaambo nzi eeci ncocili ciindi ‘cakujatisya ceeco ncotujisi kale’?
[Mibuzyo yaciiyo]
Kabbokesi/[Cifwanikiso icili apeeji 31]
“Uli Acoolwe Uulindila.”—Daniele 12:12
Amweezyezye kuti mulindizi wabona mbuli kuti kuli mubbi uyanda kubba mubusena mbwalindila. Kwasiya buyo, mulindizi ulatalika kuswiililisya kukusokosya kwalo kukonzya kumuzibya kuti mubbi wasika. Ciindi coonse ulaswiililisya alimwi akulangisya. Ncuuba-uba ikubona mbuli mbwakonzya kucengwa amulangu uuzibya kuti kwasika babbi uutateedwe kabotu, ikuunga kwamuwo muzisamu naa akaaze walimba cintu cimwi.—Luka 12:39, 40.
Icintu cikozyenyi aceeci cilakonzya kucitika kuli baabo ‘balindila kuyubununwa kwa Mwami wesu Jesu Kristo.’ (1 Ba-Korinto 1:7) Baapostolo bakali kuyeeya kuti Jesu ‘ulabupilusya Bwami kubana Israyeli’ mbwaakabusyilwa buyo. (Incito 1:6) Nikwakainda myaka iili mbwiibede, Banakristo baku Tesalonika bakayeezyegwa buya kuti ikuboola kwa Jesu kwakacili kumbele. (2 Ba-Tesalonika 2:3, 8) Nokuba boobo, ikulangila kutazuzikizyigwi kujatikizya buzuba bwa Jehova kunyina nokwakapa kuti aabo batobeli ba Jesu baleke kutobela nzila iisololela kubuumi.—Matayo 7:13.
Imazubaano, ikutyompwa akaambo kakumuka kwamamanino abweende bwazintu oobu takweelede kutupa kuleka kulangila pe. Mulindizi uupakamenyi ulakonzya kucengwa amulangu uulila aciindi citeelede, pele weelede kuzumanana kulangila. Kayi ngomulimo wakwe. Alimwi ncimwi buyo aku Banakristo.
[Zifwanikiso izili apeeji 29]
Imiswaangano, mupailo alimwi acilengwa cibotu cakuliyiisya tobeni zilatugwasya kuzumanana kulangila