‘Amujatisye Majwi Aangu’

“Mwajatisya majwi aangu, ncobeni m[ul]aba basikwiiya bangu.”—JOHANE 8:31.

1. (a) Ciindi Jesu naakapilukila kujulu, ino ncinzi ncaakasiya anyika? (b) Ino mmibuzyo nzi njotutiilange-lange?

CIINDI Jesu Kristo Sikutalisya Bunakristo naakapilukila kujulu, kunyina naakasiya mabbuku ngaakalemba lwakwe mwini naa kubumba zibumbwa nokuba kusiya lubono. Wakabasiya basikwiiya alimwi azintu zimwi zyakali kuyandika ikutegwa muntu abe sikwiiya wakwe. Mubwini, mu Makani Mabotu aakalembwa a Johane, tujana kuti Jesu wakaamba zintu zyotatwe iziyandika kapati kuti acite kufwumbwa ooyo uuyanda kuba sikwiiya wakwe. Ino zintu nzi eezi ziyandika? Ino ncinzi ciyandika ikutegwa tukonzye kuzicita? Alimwi ino mbuti swebo kutugama mbotukonzya kusinizya kuti tuleelela kuba basikwiiya ba Kristo sunu? *

2. Kweelana ambokulembedwe mu Makani Mabotu aakalembwa a Johane, ino ncintu nzi iciyandika kapati muntu nceelede kucita ikuti kayanda kuba sikwiiya?

² Kakuciceede myezi iili cisambomwi kuti Jesu ajaigwe, wakaunka ku Jerusalemu ikuyookambaukila makamu aabantu aakabungenyi kusekelela Pobwe Lyazilawo. Ipobwe nolyakasika aakati-kati, bantu “banjibanji bankamu bakamusyoma.” Jesu wakazumanana kukambauka cakunga buzuba bwamamanino aapobwe, bantu “banjibanji bakamusyoma.” (Johane 7:10, 14, 31, 37; 8:30) Muciindi eeco, Jesu wakabikkila maano kubasyomi bapya alimwi wakaamba icintu iciyandika kapati kumuntu uuyanda kuba sikwiiya kweelana ambuli mbwaakalemba mwaapostolo Johane kuti: “Mwajatisya majwi aangu, ncobeni m[ula]ba basikwiiya bangu.”—Johane 8:31.

3. Ino mbube nzi buyandika ‘mukujatisya jwi lya Jesu’?

³ Kwiinda mukubelesya majwi aayo, Jesu tanaakali kupandulula kuti basyomi bapya tiibakajisi lusyomo lweelede. Muciindi caboobo, wakali kwaamba kuti bakalijisi coolwe cakuba basikwiiya bakwe beni-beni ikuti naa balijatisya ijwi lyakwe alimwi akuliyumya. Bakalitambude kale jwi lyakwe, pele lino bakeelede kulijatisya. (Johane 4:34; Ba-Hebrayo 3:14) Masimpe, ikuliyumya Jesu wakakubona kuti mbube buyandika kapati kuli basikwiiya bakwe, cakunga mumubandi wakwe wamamanino abasikwiiya bakwe kweelana ambokulembedwe mu Makani Mabotu aakalembwa a Johane, Jesu wakaamba ziindi zyobilo kuti: ‘Ndiccilile.’ (Johane 21:19, 22) Ibunji bwa Banakristo bansiku bakacita mbubwenya oobo. (2 Johane 4) Ino ninzi cakabagwasya kutegwa baliyumye?

4. Ino ncinzi cakapa kuti Banakristo bakusaanguna bacikonzye kuliyumya?

⁴ Imwaapostolo Johane wakali sikwiiya wa Kristo, wakasyomeka kwamyaka iili 70 wakakaamba kaambo kayandika kapati. Wakabakulwaizya Banakristo basyomeka kwiinda mukwaamba kuti: “Muli bayumu, ijwi lya-Leza lilimukalilide mukati, alimwi mwakazunda mubi.” Basikwiiya ba Kristo bakaliyumya mujwi lya Leza akaambo kakuti jwi lya Leza lyakakkalilila muli mbabo. Alimwi bakali kulibikkila maano kapati. (1 Johane 2:14, 24) Mbubwenya buyo asunu, ikutegwa ‘tuliyumye kusikila kumamanino,’ tweelede kubona kwaamba  kuti jwi lya Leza lyakkalilila mulindiswe. (Matayo 24:13) Ino mbuti mbotukonzya kucita boobo? Icikozyanyo Jesu ncaakaluula cilawiingula mubuzyo ooyu.

‘Kuswiilila Makani’

5. (a) Ino nkwiindana kwabulongo kuli buti Jesu nkwaakaamba mucikozyanyo cakwe? (b) Ino mbuto abulongo ziiminina nzi mucikozyanyo ca Jesu?

⁵ Jesu wakaamba cikozyanyo casikuminzya mbuto calo cilembedwe mu Makani Mabotu aakalembwa a Matayo, Marko alimwi a Luka. (Matayo 13:1-9, 18-23; Marko 4:1-9, 14-20; Luka 8:4-8, 11-15) Mbomuyaabubala zibalo eezyi, muyoojana kuti kaambo kapati kacikozyanyo katondezya kuti imbuto njiyona yakawida mubulongo bwiindene-indene alimwi azyalo zyakacitika zyakaliindene-indene. Ibulongo bwakusaanguna akawida mbuto bwakali sindamide, ibwabili bwakalimidwe buyo caatala-tala, eelyo bwatatu bwakamenede zisamu zyamamvwa. Ibulongo bwane bwakaliindene abulongo bumbi botatwe nkaambo bwakalilimidwe kabotu alimwi bwakali ‘bubotu.’ Kweelana ambuli Jesu mbwaakapandulula, imbuto mmulumbe wa Bwami uujanika mu Jwi lya Leza, eelyo bulongo bwiiminina myoyo yabantu iindene-indene. Nokuba kuti bantu baimininwa bulongo bwiindene-indene balijisi zintu zimwi zikozyenyi, aabo baimininwa abulongo bubotu balijisi zibeela zimwi zyalo zibaindanya kubulongo butali kabotu.

6. (a) Ino mbuti bulongo bwane mucikozyanyo ca Jesu mbobwiindene abulongo bumwi, alimwi ino eeco caamba nzi? (b) Ino ncinzi ciyandika kapati kutegwa tuliyumye katuli basikwiiya ba Kristo?

⁶ Icibalo cabbuku lya Luka 8:12-15 citondezya kuti mumbazu zyoonse zyone, bantu ‘balamvwa makani.’ Nokuba boobo, aabo bajisi “moyo mubotu uululeme,” ‘tabamvwi’ buyo akuumuna pe. ‘Balaajatisya canguzu akuzyala micelo cakuliyumya.’ Akaambo kakuti bulongo bubotu mbuuba-uba alimwi bwakadibbwa, imiyanda yambuto ilaunka ansi kakunyina penzi, aboobo munsonje ulakomena akuzyala micelo. (Luka 8:8) Mbubwenya buyo, aabo ibajisi moyo mubotu balamvwisya, balabikkila maano alimwi akutambula jwi lya Leza. (Ba-Roma 10:10; 2 Timoteo 2:7) Ijwi lya Leza lilakkalilila muli mbabo. Eelyo balazyala micelo cakuliyumya. Ikulibikkila maano Jwi lya Leza camoyo woonse kulayandika kapati kutegwa tuliyumye katuli basikwiiya ba Kristo. (1 Timoteo 4:15) Pele ino mbuti mbotukonzya kubikkila maano ku Jwi lya Leza camoyo woonse?

Moyo Mboubede Alimwi Akuzinzibala Kuyeeya Cakusitikila

7. Ino mmilimo nzi iswaangenyi kapati amoyo mubotu?

⁷ Amubone mulimo Ibbaibbele ngoliswaanganya cakwiinduluka-induluka akubaa moyo mubotu. “Moyo wamululami ulayeeya kabotu mbweelede kuvuwa.” (Tusimpi 15:28) “Majwi aamulomo wangu amiyeeyo yamumoyo wangu, zyoonse zitambulike kumeso aako, O Jehova.” (Intembauzyo 19:14) “Miyeeyo yamoyo wangu iyooba abuswini.”—Intembauzyo 49:3.

8. (a) Ino ncinzi ncotuteelede kucita ciindi notubala Bbaibbele, pele ncinzi ncotweelede kucita? (b) Ino ndugwasyo nzi ndotujana kwiinda mukuzinzibala kuyeeya notupailila Ijwi lya Leza? (Mubikkilizye akabbokesi kakuti, ‘Ibajisi Mulusinizyo.’)

⁸ Mbubwenya mbuli bwakacita balembi ba Bbaibbele, tweelede kuyeeyesya cakubikkila maano akupailila Ijwi lya Leza alimwi amulimo wakwe. Ciindi notubala Bbaibbele naa mabbuku aamwi aamba zya Bbaibbele, tatweelede kucita mbuli bucita basikuswaya masena aakondelezya pe, balo lyoonse babindide kuzwa mubusena bumwi akuya kuli bumwi kumwi kabaide kufwotola buyo nzyobabona, pele kabatabikkili maano kapati ikulangisya zintu zili mubusena oobo. Muciindi caboobo,  notuliyiisya Bbaibbele tobeni, tweelede kujana ciindi cakwiima akulangisya zintu zibotu eezyo zili mucibalo. * Ciindi notuyeeya ncotwabala, ijwi lya Leza lilaujatikizya moyo wesu. Lilaijatikizya mizeezo yesu alimwi akululamika kuyeeya kwesu. Alimwi lilatukulwaizya kumwaambila Leza mizeezo yesu kwiinda mumupailo. Akaambo kakucita boobu, icilongwe cesu a Jehova ciyooyuma alimwi iluyando lwesu muli Leza luyootupa kuzumanana kutobela Jesu nomuba mubukkale bukatazya. (Matayo 10:22) Aboobo ikuzinzibala kuyeeya zintu Leza nzyaamba kulayandika kapati ikuti katuyanda kuzumanana kusyomeka kusikila kumamanino.—Luka 21:19.

9. Ino mbuti mbotukonzya kusinizya kuti moyo wesu wakuzumina jwi lya Leza ucizumanana?

⁹ Icikozyanyo ca Jesu alimwi citondezya zintu zikonzya kupa kuti imbuto naa jwi lya Leza litayi ambele antela kutakomena kabotu. Aboobo ikutegwa tuzumanane kuba basikwiiya basyomeka, tweelede (1) kuzyiba zintu zikonzya kutusinkilila zyiimininwa abulongo butali kabotu bwaambidwe mucikozyanyo alimwi (2) akubweza ntaamo yakuzitantamuka. Kwiinda mukucita boobo, tuyoobona kuti moyo wesu ulazumanana kuzumina mbuto ya Bwami alimwi akuyaambele kuzyala micelo.

“Munzila”—Ibanyonganyizyigwa

10. Amupandulule bulongo bwakusaanguna buli mucikozyanyo ca Jesu, alimwi ancobwiiminina.

¹⁰ Imbuto yakusaanguna yakawida abulongo buli “munzila,” mwalo ‘moyakalyataukwa abantu.’ (Luka 8:5) Bulongo buli munzila iinda mumuunda bulisindamide kapati akaambo kamaulu aabantu banji bainda lyoonse. (Marko  2:23) Mbubwenya buyo, aabo ibazumizya zintu zyamunyika ziboola akumana kuti zibamanine ciindi cabo alimwi anguzu, balakonzya kunyonganyizyigwa kapati cakunga tabakonzyi kubikkila maano kujwi lya Leza. Balamvwa buya ncolyaamba jwi, pele balaalilwa kuzinzibala kuyeeya mulindilyo. Aboobo moyo wabo tuuzumini ncolyaamba. Kabatanatalika kuliyandisya jwi, ‘Saatani ulasika akubanyanga makani mumyoyo yabo kutegwa batasyomi akufwutulwa.’ (Luka 8:12) Sena cintu cili boobu cilakonzya kulesyegwa?

11. Ino mbuti mbotukonzya kulesya moyo wesu kuti utabi mbuli bulongo busindamide?

¹¹ Kuli zintu zinji ziyandika kapati kucita ikutegwa moyo uleke kuba mbuli bulongo butali kabotu bwamunzila busindamide. Bulongo busindamizyidwe bulakonzya kuba kabotu ikuti bwalimwa alimwi akuyiinzya kumbi nzila eeyo. Mbubwenya buyo, ikujana ciindi cakuliyiisya tobeni alimwi akuzinzibala kuyeeya Jwi lya Leza kulakonzya kupa kuti moyo ubote akuzumina nzyolyaamba. Ikaambo kapati nkakuti, takuyandiki kunyonganyizyigwa kapati azintu zyakumubili abuzuba pe. (Luka 12:13-15) Muciindi caboobo, amubone kwaamba kuti ciindi nkocili lyoonse cakuyeeya ‘zintu ziinda kuyandika’ mubuumi.—Ba-Filipi 1:9-11.

Ikuba “Mumabwe”—Caamba Ikuyoowa

12. Ino nkaambo nzi keni-keni ikapa kuti imunsonje unete mubulongo bwabili bwamucikozyanyo ca Jesu?

¹² Imbuto yawida abulongo bwabili tiiyazumanana kuba atala buyo mbuli bwacita yakusaanguna. Yalo yamena akuba munsonje uukomena. Pele nolyabala zuba, munsonje ooyu waumpwa azuba, eelyo wapusama naa kuneta. Nokuba boobo, amubikkile maano kukaambo aaka kayandika kapati. Ikaambo keni-keni kapa kuti munsonje unete takuli kupya kwazuba buyo pe. Kayi munsonje uuli mubulongo bubotu awalo ulabalilwa zuba, pele kunyina nouneta pe alimwi buya mulumwi nowiinda kukomena kabotu. Ino ncinzi cipa kuti kube kwiindana aawa? Jesu upandulula kuti munsonje ooyu ulaneta ‘akaambo kakutaba mubulongo bunji’ alimwi ‘akubula munsyu naa mudumu.’ (Matayo 13:5, 6; Luka 8:6) ‘Imabwe’ naa luyale lujanika ansi aabulongo busyoonto buyo lulakonzya kupa kuti miyanda yambuto itaunki ansi kutegwa ikakonzye kujana mudumu. Imunsonje ulaneta akaambo kakuti bulongo mbusyoonto kapati.

13. Ino mbantu bali buti ibali mbuli bulongo busyoonto buyo ibuli atala abbwe, alimwi ino nkaambo nzi kabapa kucita mbobacita?

¹³ Icibeela eeci cacikozyanyo ciiminina bantu “baatambula [makani] akubotelwa” alimwi akuba batobeli ba Jesu basungu ‘basyoma buyo mukaindi kaniini.’ (Luka 8:13) Ciindi nobabalwa zuba lyuumpa kapati ‘lijisi mapenzi naa makatazyo,’ balaba bakandu akuleka kukkomana alimwi nguzu zyabo zilamana, eelyo balaleka kumutobela Kristo. (Matayo 13:21) Nokuba boobo, icibapa kuyoowa kapati taali makatazyo pe. Kayi bunji bwabasikwiiya ba Kristo balaliyumya mumapenzi aasiyene-siyene, pele balazumanana kusyomeka. (2 Ba-Korinto 2:4; 7:5) Ikaambo keni-keni ikapa kuti kabayoowa akuleka kutobela kasimpe, nkakuti myoyo yabo iili mbuli bbwe ibapa kuti kabatazinzibali kuyeeya izintu zigwasya alimwi azyakumuuya. Aboobo ikubikkila maano kuli Jehova alimwi akujwi lyakwe nkobajisi takuli kwakusinizya alimwi tabajisi nguzu zyakukonzya kuliyumya kumakatazyo. Ino mbuti mbotukonzya kulesya cintu cili boobu kucitika?

14. Ino nintaamo nzi muntu nzyeelede kubweza ikutegwa alesye moyo wakwe kuba mbuli bulongo busyoonto buli atala abbwe?

¹⁴ Imuntu weelede kubona kwaamba kuti kunyina cisinkilizyo icili mbuli bbwe, kubijilwa kuzumanana, bulyatu naa kulimvwa munzila iitali kabotu. Ikuti naa cisinkilizyo cili boobo nkocili kale mumoyo, inguzu zyajwi lya Leza zilakonzya kucigusya. (Jeremiya 23:29; Ba-Efeso 4:22; Ba-Hebrayo 4:12) Kwamana boobo, ikuzinzibala kuyeeya cakupaila kuyoopa kuti ‘makani azikkwe’ mumoyo wamuntu. (Jakobo 1:21) Eeci ciyoopa kuti muntu ajane nguzu zyakukonzya kuleka kutyompwa  alimwi akuba sicamba uukonzya kuzumanana kusyomeka nokuba kuti kuli masukusyo.

“Mumamvwa”—Mbantu Bajisi Myoyo Yobilo

15. (a) Ino nkaambo nzi bulongo bwatatu bwamucikozyanyo ca Jesu ncobuyandika kubikkila kapati maano? (b) Ino mukuya kwaciindi ncinzi cicitika kubulongo bwatatu, alimwi nkaambo nzi?

¹⁵ Bulongo bwatatu bujisi mamvwa buyandika kubikkila kapati maano nkaambo munzila imwi bulikozyenyi abulongo bubotu. Mbubwenya mbuli bulongo bubotu, imbuto iili mubulongo bujisi mamvwa ilamena akuba munsonje uukomena. Kumatalikilo kunyina lwiindano luliko pe kujatikizya mbuli munsonje mbuukomena mubulongo bwiindene oobu bobilo. Nokuba boobo, mukwiinda kwaciindi, ciindi cilasika munsonje nuutakomeni kabotu. Ikwiindana abulongo bubotu, bulongo oobu bulimenede azisamu zyamamvwa. Imunsonje mbuuyaabukomena mubulongo oobu, ‘ulakomena antoomwe azisamu zyamamvwa.’ Kwaciindi cili mbocibede, munsonje alimwi azisamu zyamamvwa zilatalika kulwanina busani, mumuni alimwi abusena, pele mukuya kwaciindi zisamu zyamamvwa zilauvwumbilila munsonje eelyo ‘akuufwundilizya.’—Luka 8:7.

16. (a) Ino mbantu bali buti ibakozyanya abulongo bujisi zisamu zyamamvwa? (b) Kweelana azibalo zya Makani Mabotu zyotatwe, ino ncinzi ciimininwa amamvwa?—Amubone bupanduluzi buyungizyidwe.

¹⁶ Ino mbantu bali buti ibakozyanya abulongo bujisi zisamu zyamamvwa? Jesu wakapandulula kuti: “Mbabamvwa makani, bazwa awo baya bweenda, bafundilizigwa makataazyo, alubono, amisobano yabuumi, tabazyali micelo.” (Luka 8:14) Mbubwenya mbuli mbuto alimwi azisamu zyamamvwa mbozikomenena aamwi mubulongo, abalo bantu bamwi balasola kuzumina jwi lya Leza alimwi “amisobano yabuumi” aciindi comwe. Ikasimpe kajwi lya Leza kalasyangwa mumoyo wabo, pele kalatalika kunyonganyizyigwa kwiinda mukutajana ciindi akaambo kazintu zyakumubili. Imoyo wabo wacikozyanyo uli muzibeela zyobilo. (Luka 9:57-62) Eeci cibapa kuti kabatajani ciindi cibotu cakuyeeyesya jwi lya Leza munzila iigwasya. Balaalilwa kumvwisya jwi lya Leza mbokweelede, aboobo tababikkili maano kusikila aciimo ciyandika ikutegwa baliyumye. Iluyando lwakumuuya lulaya ansi aasyoonto-syoonto akaambo kakuvwumbililwa azintu zitali zyakumuuya mane limwi ‘bafwundilizyigwa.’ * Elo kaka lufwu lwabaabo batamuyandi Jehova amoyo wabo woonse lulausisya!—Matayo 6:24; 22:37.

17. Ino nkusala kuli buti nkotweelede kucita mubuumi ikutegwa tutafwundilizyigwi azisamu zyamamvwa zyacikozyanyo zyamucikozyanyo ca Jesu?

¹⁷ Akaambo kakubikka zintu zyakumuuya mubusena bwakusaanguna kwiinda zintu zyakumubili, tulakonzya kwaatantamuka macise alimwi amisobano iili munyika eeyi. (Matayo 6:31-33; Luka 21:34-36) Ikubala Bbaibbele alimwi akukkala ansi kuyeeya nzyotwabala tatweelede kukuubya-ubya. Tuyoojana ciindi cakubikkila maano alimwi akuzinzibala kuyeeya ikuti naa bukkale bwesu twabuubya-ubya kusikila mpocikonzyeka. (1 Timoteo 6:6-8) Ibabelesi ba Leza bakacita boobo—bakanonkola zisamu zyamamvwa mubulongo oobo ikutegwa bajane busani, mumuni alimwi abusena bwakuzyalila micelo, eelyo bajana  bulumbu kuli Jehova. Sandra ulaamyaka yakuzyalwa iili 26 wakaamba kuti: “Ciindi nondizinzibala kuyeeya kuzilongezyo nzyondajana mukasimpe, ndijana kuti inyika kunyina ncoikonzya kundipa ceelene azilongezyo eezyo.”—Intembauzyo 84:11.

18. Ino mbuti mbotukonzya kukkalilila mujwi lya Leza alimwi akuliyumya katuli Banakristo?

¹⁸ Cakutadooneka, toonse kubikkilizya abana abapati tuyookkalilila mujwi lya Leza alimwi akuliyumya katuli basikwiiya ba Kristo ikuti naa jwi lya Leza lyakkalilila mulindiswe. Aboobo, atubone kwaamba kuti ibulongo bwacikozyanyo camoyo wesu tabusindamini, tabuli busyoonto atala abbwe alimwi tabuzwi zisamu zyamamvwa, pele mbulongo buuba-uba alimwi bunji. Kwiinda mukucita boobo, tuyookonzya kulimvwisya kapati jwi lya Leza alimwi ‘akuzyala micelo cakuliyumya.’—Luka 8:15.

Bupanduluzi buyungizidwe

Ino Inga Mwaingula Buti?

• Ino nkaambo nzi ncotweelede ‘kukkalilila mujwi lya Jesu’?

• Ino mbuti mbotukonzya kucita kutegwa jwi lya Leza likkalilile mumoyo wesu?

• Ino mbantu bali buti ibaimininwa abulongo bwiindene-indene buli bone mbwakaamba Jesu?

• Ino mbuti mbomukonzya kujana ciindi cakuyeeya jwi lya Leza?

[Mibuzyo yaciiyo]

Kabbokesi/[Cifwanikiso icili apeeji 19]

‘IBAJISI MULUSINIZYO’

IBUNJI bwabasikwiiya ba Kristo bakatalika kaindi balatondezya kuti ‘balijisi mulusinizyo’ mwaka amwaka. (2 Petro 1:12) Ino ncinzi cibagwasya kutegwa baliyumye? Amuswiilile zimwi nzyobaluula.

“Kumamanino aabuzuba bumwi abumwi, ndilabala cibeela cimwi camu Bbaibbele alimwi akupaila. Eelyo ndilakkala ansi kuyeeya kujatikizya cibeela ncindabala.”—Jean, wakabbapatizyigwa mu 1939.

“Ikuzinzibala kuyeeya kujatikizya Jehova, imuntu uusumpukide kapati pele uutuyandisya kulandipa kulimvwa kuti ndilicingilidwe alimwi kulandiyumya kutegwa ndizumanane kusyomeka.”—Patricia wakabbapatizyigwa mu 1946.

“Kwiinda mukuzumanana aziyanza zibotu zyakwiiya Bbaibbele alimwi akumvwisya ‘makani aajisi twaambo tupati-pati twabulondo bwa Leza,’ ndacikonzya kuzumanana kubelekela Jehova.”—1 Ba-Korinto 2:10; Anna wakabbapatizyigwa mu 1939.

“Ndilabala Ibbaibbele alimwi amabbuku aamba zyamu Bbaibbele ikutegwa ndilingule moyo wangu anzyondicita.”—Zelda wakabbapatizyigwa mu 1943.

“Iciindi cibotu ndeelyo nondijana ciindi cakweendeenda akwaambaula kuli Jehova mumupailo alimwi akumwaambila mbuli mbondilimvwide ncobeni.”—Ralph wakabbapatizyigwa mu 1947.

“Ncondisaanguna kucita abuzuba nkulingaula lugwalo lwabuzuba akubala cibalo kuzwa mu Bbaibbele. Ikucita boobo kundipa kuti ndijane cintu cipya cakuyeeya mubuzuba oobo.”—Marie wakabbapatizyigwa mu 1935.

“Cindiyumya-yumya kapati nkubandika kapango kamwi akamwi mubbuku lya Bbaibbele.”—Daniel wakabbapatizyigwa mu 1946.

Ino ndilili nomujana ciindi cakukkala ansi kuyeeya kujatikizya jwi lya Leza?—Daniele 6:10b; Marko 1:35; Incito 10:9.

[Cifwanikiso icili apeeji 22]

Kwiinda mukubikka makani aakumuuya mubusena bwakusaanguna, tulakonzya ‘kuzyala micelo cakuliyumya’