Ino Lusyomo Lwanu Nduyumu Buti?
Ino Lusyomo Lwanu Nduyumu Buti?
“Muliimvwi nubeni mulusyomo.”—2 BA-KORINTO 1:24.
1, 2. Ino nkaambo nzi ncotweelede ikuba alusyomo, alimwi ino mbuti mbolukonzya kuyuma?
BABELESI ba Jehova balizyi kuti beelede kuba bantu bajisi lusyomo. Mubwini, ‘nciyumu kumuntu uutakwe lusyomo kumukkomanisya Leza.’ (Ba-Hebrayo 11:6) Aboobo cilayandika kapati kupailila muuya uusalala alimwi akuti tube alusyomo, lwalo luli ncibeela camicelo ciyandika kapati. (Luka 11:13; Ba-Galatiya 5:22, 23) Ikwiiya lusyomo lwabasyomima akwalo kulakonzya kuyumya bube oobu mulindiswe.—2 Timoteo 1:5; Ba-Hebrayo 13:7.
2 Ilusyomo lwesu lulakonzya kuyuma ikuti naa twazumanana kutobela nzila ya Jwi lya Leza iibambilidwe Banakristo boonse. Ilusyomo lwanu lulakonzya kuyungizyigwa kwiinda mukubala Bbaibbele abuzuba alimwi akuliyiisya Magwalo cakusinizya kwiinda mukubelesya mabbuku aapegwa a “mubanzi musongo uusyomeka.” (Luka 12:42-44, Ci; Joshua 1:7, 8) Tulakulwaizyanya mulusyomo umwi aumwi kwiinda mukujanika lyoonse kumiswaangano ya Bunakristo, miswaangano yabbazu naa yaalubazu alimwi ayacooko. (Ba-Roma 1:11, 12; Ba-Hebrayo 10:24, 25) Alimwi ilusyomo lwesu lulayuma ciindi notwaambaula abantu bamwi mumulimo.—Intembauzyo 145:10-13; Ba-Roma 10:11-15.
3. Kujatikizya lusyomo, ino ndugwasyo nzi ndotukonzya kujana kuzwa kubaalu Banakristo basiluyando?
3 Ibaalu Banakristo basiluyando balatugwasya kuyumya lusyomo lwesu kwiinda mukutupa lulayo lwamu Magwalo alimwi akutukulwaizya. Bajisi muuya uuli mbuli wamwaapostolo Paulo walo wakaambila bana Korinto kuti: “Tulagwasyanya anywebo kuti mube akukondwa, nkaambo muliimvwi nubeni mulusyomo.” (2 Ba-Korinto 1:23, 24) Busanduluzi oobu mu Cizuminano Cipya bulembedwe kuti: “Kwaamba zyalusyomo lwanu, mulisimide ncobeni. Ncotuyanda nkugwasyanya andinywe kuti mukondwe.” Imululami ulapona akaambo kalusyomo ndwajisi. Pele, kunyina uumbi uukonzya kutubeda aalusyomo naa kutupa kuba basilusyomo. Mumakani aaya, ‘tweelede kuyumuna mukuli wesu.’—Ba-Galatiya 3:11; 6:5.
4. Ino mbuti zibalo zyamu Magwalo zyaamba babelesi ba Leza basyomeka mbozikonzya kutugwasya kuyumya lusyomo lwesu?
4 Imagwalo alijisi zibalo zyaamba bantu bakajisi lusyomo. Tulakonzya kuti katuzizyi zintu zipati nzyobakacita, pele sena tulizyi mbobakali kutondezya lusyomo abuzuba, ambweni mubuumi bwabo boonse? Ikuyeeya mbuli mbobakatondezya bube oobu mubukkale bukozyenyi abwamazubaano, kulakonzya kutugwasya kuyumya lusyomo lwesu.
Ilusyomo Lulatukulwaizya
5. Ino ncitondezyo nzi ciliko camu Magwalo icitondezya kuti lusyomo lulatukulwaizya ikutegwa twaambilizye jwi lya Leza cabusicamba?
5 Ilusyomo lulatukulwaizya kwaambilizya jwi lya Leza cabusicamba. Enoki wakasinsima cabusicamba kujatikizya lubeta lwa Leza. Wakati: “Amubone! Jehova waboola abasalali bakwe abali myaanda yamyaanda. Weza kukubeteka boonse, akubapa mulandu boonse basikasampusampu, nkaambo kamasampu oonse ngobakasampaula amajwi mayumu oonse ngobakaamba aanguwe basizibi basikasampusampu.” (Juda 14, 15) Basinkondonyina a Enoki batakombi Leza bakali kuyanda kumujaya nobakamvwa majwi aayo. Pele wakaamba cabusungu akaambo kalusyomo ndwaakajisi, eelyo Leza “wakamutola” kwiinda mukumulazika mulufwu, kulibonya kuti tanaakali kuyanda kuti apenzyegwe ciindi katanafwa. (Matalikilo 5:24; Ba-Hebrayo 11:5) Tatucitikilwi maleele aali boobo pe, pele Jehova ulayiingula mipailo yesu ikutegwa tucikonzye kwaambilizya jwi lyakwe calusyomo alimwi acabusicamba.—Incito 4:24-31.
6. Ino mbuti lusyomo alimwi abusicamba Nowa mbwaakapegwa a Leza mbobwakamugwasya?
6 Akaambo kalusyomo, Nowa ‘wakabeza bwato bwakufwutusizya mukwasyi wakwe.’ (Ba-Hebrayo 11:7; Matalikilo 6:13-22) Alimwi Nowa wakali “mukambausi wabululami” walo cabusungu wakaambilizya kucenjezya kwa Leza kubantu mbaakali kupona limwi. (2 Petro 2:5) Kweelede kuti bakali kumuseka akaambo kamulumbe ngwaakajisi uujatikizya Kupaya kwameenda, mbubwenya mbuli bamwi mbobaseka ciindi notwaamba cisinizyo camu Magwalo cakuti bweende oobu bwazintu bubyaabi bulaafwaafwi kunyonyoonwa. (2 Petro 3:3-12) Nokuba boobo, mbubwenya mbuli bwakali Enoki alimwi a Nowa, tulakonzya kubatolela mulumbe ooyu bantu akaambo kalusyomo alimwi abusicamba mbwatupa Leza.
Ilusyomo Lulatugwasya Kuba Bantu Bakkazika Moyo
7. Ino mbuti Abrahamu alimwi abeenzinyina mbobakatondezya lusyomo alimwi akukkazika moyo?
7 Tweelede kuba alusyomo alimwi akukkazika moyo, ikapati ciindi notulindila mamanino aabweende bwazintu oobu bubyaabi. Umwi wabaabo ‘ibalindila kuyootambula zisyomezyo akaambo kalusyomo alimwi akukkazika moyo kwakwe’ ngu Abrahamu wansiku walo wakali muntu uuyoowa Leza. (Ba-Hebrayo 6:11, 12) Akaambo kalusyomo lwakwe, wakausiya munzi wa Uri abubotu bwanguwo boonse, eelyo wakaunka kuyookkala munyika yeenzu njaakasyomezyegwa a Leza. Izaka alimwi a Jakobo bakali basikukona cisyomezyo ncicona eeco. Nokuba boobo, “boonse aba bakafwida mulusyomo. Tabakalina kutambula zeezyo izyakasyomezegwa.” Kwiinda mulusyomo, ‘bakali kulangila cisi cimbi ciinda kubota, eeci ncisi cakujulu.’ Aboobo, Leza “wakababambila kale munzi.” (Ba-Hebrayo 11:8-16) Inzya, Abrahamu, Izaka alimwi a Jakobo kubikkilizya abamakaintu babo ibayoowa Leza, bakabulindila Bwami bwakujulu cakukkazika moyo, mwalo mobayookkala baakubusyigwa anyika.
8. Ino ncinzi ncobatakabona ba Abrahamu, Izaka alimwi a Jakobo nokuba kuti bakakkazika moyo alimwi akuba alusyomo?
8 Abrahamu, Izaka alimwi a Jakobo kunyina nobakaleka kusyomeka pe. Inyika Yakasyomezyegwa kunyina nobakayeendelezya pe, alimwi kunyina nobakaibona misyobo yoonse kiilongezyegwa kwiinda mulunyungu lwa Abrahamu. (Matalikilo 15:5-7; 22:15-18) Nokuba kuti ‘imunzi wakayakwa a Leza,’ kunyina nobakaubona mane limwi kwakainda myaanda yamyaka iili mbwiibede, ibaalumi aaba bakazumanana kusyomeka alimwi akukkazika moyo mubuumi bwabo boonse. Andiswe tweelede kucita mbubwenya oobo nkaambo Bwami bwabu Mesiya lino nkobuli ncobeni kujulu.—Intembauzyo 42:5, 11; 43:5.
Ilusyomo Lutupa Ikuba Amakanze Meni-Meni
9. Ino lusyomo lujisi mulimo nzi kumakanze ngotujisi?
9 Ibantu bansiku basyomeka kunyina nobakatobela buumi buusisya bwabana Kanana, nkaambo bakalijisi makanze meni-meni. Mbubwenya buyo, ilusyomo lulatupa kuti tube amakanze aakumuuya alo aakonzya kutupa kuti tukake kutobela bweende bwanyika yeendelezyegwa amubi, Saatani Diabolosi.—1 Johane 2:15-17; 5:19.
10. Ino mbuti mbotuzyiba kuti Josefa wakajisi makanze meni-meni muciindi cakuyandisya kuba ampuwo munyika?
10 Kwiinda mukusololelwa a Leza, imwanaa Jakobo wazina lya Josefa wakabeleka ku Egepita kali mweendelezi wazyakulya, pele aaya tanaakali ngamakanze aakwe pe aakuti abe muntu mupati munyika eeyi. Naakasisya myaka yakuzyalwa iili 110, Josefa wakaambila ibanyina kajisi lusyomo mukuzuzikizyigwa kwazisyomezyo zya Jehova kuti: “Mebo ndaamba kufwa, pele Leza ncobeni unoomuswaya akumupozya munyika ino kuti muye kunyika eyo njaakakonkezya kuli-Abrahamu akuli-Izaka akuli-Jakobo.” Josefa wakalomba kuti akazikkilwe munyika yakasyomezyegwa. Eelyo naakafwa, mubili wakwe wakabambwa kuti utaboli, aboobo wakabikkwa mubbokesi akubambwa mu Egepita. Pele bana Israyeli nobakalonzyegwa kuzwa mubuzike ku Egepita, imusinsimi Musa wakabwezelezya amafwuwa aa Josefa kuti akazikkwe mu Nyika Yakasyomezyegwa. (Matalikilo 50:22-26; Kulonga 13:19) Ilusyomo iluli mbuli lwa Josefa lweelede kutukulwaizya ikuba amakanze meni-meni muciindi cakuyandisya kuba ampuwo munyika.—1 Ba-Korinto 7:29-31.
11. Ino mbuti Musa mbwaakatondezya kuti wakalijisi makanze aakumuuya?
11 Musa ‘wakasala kupenzyegwa antoomwe abantu ba Leza muciindi cakubotelwa amisalo iimana buyo’ alimwi akuba muntu uuyiide kapati iwamuciinga cabwami camu Egepita. (Ba-Hebrayo 11:23-26; Incito 7:20-22) Eeci cakamwiimya bukkale bubotu bwakunyika ambweni akutazikkilwa mubbokesi lyakabambidwe kabotu kunamaumbwe aaku Egepita aajisi mpuwo kapati. Pele, sena bulemu oobu bwakali kukonzya kweelana acoolwe cakuba “muntu wa-Leza,” simwiima aakati wacizuminano ca Mulawo, musinsimi wa Jehova alimwi akuba mulembi wa Bbaibbele? (Ezara 3:2) Sena kusumpulwa ncecintu ncomulombozya munyika eeyi, alimwi sena lusyomo lwamupa kuti mube amakanze aakumuuya meni-meni?
Ilusyomo Luletela Buumi Bujisi Mpindu naa Buyandika
12. Ino lusyomo lwakamuletela nzi Rahabu mubuumi bwakwe?
12 Ilusyomo talupi buyo makanze aakumuuya pe, pele alimwi lulapa buumi bujisi mpindu. Kweelede kuti Rahabu waku Jeriko buumi bwakwe tiibwakajisi mpindu kapati iciindi naakali simamambi. Elo kaka buumi bwakwe bwakacinca ciindi naakaba alusyomo! Wakategwa ‘mululami akaambo kamilimo njaakacita mibotu yakusamausya batumwa bana Israyeli akubapilusya kunzila imbi,’ ikutegwa bayube basinkondonyina bana Kanana. (Jakobo 2:24-26) Rahabu naakazyiba kuti Jehova ngo Leza wakasimpe, wakasyoma alimwi wakabuleka bukkale bwakwe butaanzi bwabusimamambi. (Joshua 2:9-11; Ba-Hebrayo 11:30, 31) Wakakwatwa kumubelesi wa Jehova, ikutali kumuna Kanana uutasyomi pe. (Deuteronomo 7:3, 4; 1 Ba-Korinto 7:39) Rahabu wakaba acoolwe cipati cakuba umwi wabamakaapanyina Mesiya. (1 Makani 2:3-15; Rute 4:20-22; Matayo 1:5, 6) Mbubwenya mbuli bantu bamwi bakaleka buumi bwabo bwakutalilemeka, uyootambula bulumbu abumwi ibwakubusyigwa kuzwa kulufwu munyika yaparadaiso.
13. Ino mbuti Davida mbwaakabisya a Bateseba, pele ino nciimo nzi ncaakatondezya?
13 Naakaleka kupona buumi bwabusimamambi, Rahabu weelede kuti wakazumanana kutobela nzila yabululami. Nokuba boobo, ibamwi ibakalyaabide kuli Leza kwaciindi cili mbucibede, bakacita zibi zitaambiki. Mwami Davida wakacita bumambi a Bateseba, wakamujazya mulumaakwe, eelyo akumukwata Bateseba. (2 Samuele 11:1-27) Davida wakeempwa kauside kapati akukombelezya Jehova kuti: “Utandinyanzyi Muuya wako Uusalala.” Davida kunyina naakanyangwa muuya wa Leza pe. Wakalijisi lusyomo muli Jehova lwakuti muluse lwakwe takausampauli “moyo uupengede” akaambo kacibi. (Intembauzyo 51:11, 17; 103:10-14) Akaambo kalusyomo lwabo, Davida alimwi a Bateseba bakajana bulumbu bwakuba mumazyalani aa Mesiya mwaakali kulangilwa kuzyalilwa.—1 Makani 3:5; Matayo 1:6, 16; Luka 3:23, 31.
Ilusyomo Lwakayumizyigwa Kwiinda Mulugwasyo lwa Leza
14. Ino nzitondezyo nzi Gideoni nzyaakatambula, alimwi ino mbuti cibalo eeci mbocikonzya kulujatikizya lusyomo lwesu?
14 Nokuba kuti tulijisi lusyomo, ziindi zimwi tuyandika kugwasyigwa kwiinda mucitondezyo cakusinizya kwa Leza. Oobo mbucakacitika ku Mubetesi Gideoni, umwi wabaabo balo ‘bakazunda masi kwiinda mulusyomo lwabo.’ (Ba-Hebrayo 11:32, 33) Ciindi bana Midyani alimwi abeenzinyina nobakalwana Israyeli, muuya wa Leza wakamusikila Gideoni. Kayanda kuti asinizye ncobeni kuti Jehova wakalaanguwe, wakayeeya kuti asole kwiinda mukubelesya boya bwambelele bwalo mbwaakabikka acuumino camaila masiku woonse. Ciindi cakusaanguna, mume wakaba buyo kuboya, pele ansi akali ayumu nta. Muciindi cabili, ansi mpaakali mume pele kuboya taku mume wakaliko. Akaambo kakuyumizyigwa acisinizyo eeci, Gideoni wakabweza ntaamo calusyomo, eelyo wakabazunda basinkondonyina babana Israyeli. (Babetesi 6:33-40; 7:19-25) Ikuti katuyandaula cisinizyo ciindi notuyanda kusala cintu, tacipandululi kuti tunyina lusyomo pe. Ciindi notuvwuntauzya mu Bbaibbele alimwi amumabbuku aa Bunakristo alimwi akupailila kuti tusololelwe amuuya uusalala notusala zintu, citondezya kuti tulijisi lusyomo.—Ba-Roma 8:26, 27.
15. Ino mbuti mbotukonzya kugwasyigwa kwiinda mukuyeeya lusyomo lwa Baraki?
15 Ilusyomo lwa Mubetesi Baraki lwakayumizyigwa akaambo kacisinizyo cikulwaizya. Musinsimi mukaintu Debora wakamukulwaizya kuti ajane nzila yakukonzya kwaangununa bana Israyeli kuzwa kukudyaamininwa a Mwami Jabini muna Kanana. Akaambo kalusyomo alimwi acisinizyo cakuti Leza wakali kumuyumya-yumya, Baraki wakasololela baalumi ibali 10,000 ibatakajisi zilwanyo zyeelede, eelyo bakaizunda mpi mpati ya Jabini yakali kusololelwa a Sisera. Ikuzunda ooku kwakasekelelwa kwiinda mulwiimbo lukondelezya lwa Debora alimwi a Baraki. (Babetesi 4:1–5:31) Debora wakakulwaizya Baraki kuti acite mbuli kuti ngomusololeli wa Israyeli uusalidwe a Leza, alimwi wakali umwi wababelesi ba Jehova balo kwiinda mulusyomo ‘bakamwaya makamu aabazwamasi.’ (Ba-Hebrayo 11:34) Ikuyeeya kujatikizya mbuli Leza mbwaakagwasya Baraki akaambo kakucita zintu calusyomo kulakonzya kutupa kuti tubweze ntaamo ikuti naa tulawayawaya caboola kumakani aakuzuzikizya mulimo umwi uukatazya iwa Jehova.
Ilusyomo Luletela Luumuno
16. Ino ncikozyanyo nzi cibotu Abrahamu ncaakatondezya caluumuno kuli Loti iciindi nobakali kubamba twaambo?
16 Mbubwenya lusyomo mbolutugwasya kuzuzikizya milimo imwi iikatazya kapati mumulimo wa Leza, mbubwenya buyo lulaletela luumuno. Imudaala Abrahamu wakalekela mwana wamunyina uutegwa Loti kuti asale cibeela cibotu cakweembezyezya matanga aakwe aazivwubwa ciindi beembezi nobakazwangana, eelyo kwaandaana ooku kwakayandika. (Matalikilo 13:7-12) Kweelede kuti Abrahamu wakapaila calusyomo kuti Leza amugwasye mukumanizya mapenzi aaya. Muciindi cakubikka zintu mubusena butaanzi nzyaakali kuyanda, wakatweendelezya twaambo caluumuno. Ikuti naa twazwangana amukwesu Munakristo, tuleelede kupaila cakusyomeka alimwi ‘akuyandaula luumuno,’ mumizeezo katujisi cikozyanyo ca Abrahamu caluyando.—1 Petro 3:10-12.
17. Ino nkaambo nzi ncotukonzya kwaamba kuti kuboneka mbuli kuti imazwanga akajisi Paulo, Barnaba alimwi a Marko akamanizyigwa caluumuno?
17 Amuyeeye buyo mbocili cibotu kubelesya njiisyo zya Bunakristo cakusyomeka mbokukonzya kutugwasya kubamba luumuno. Ciindi Paulo naakali kuyanda kutalika lweendo lwabili lwabumisyinali, Barnaba wakauzumina muzeezo wakuti bakaswaye mbungano zili ku Kupro alimwi aku Asia Minor. Nokuba boobo, Barnaba wakali kuyanda kuti beende amweeninyina Marko. Paulo wakakaka nkaambo Marko wakalibasiide nobakali ku Pamfuliya. Akaambo “[ka]kukazyanya kupati” ooku, kwakapa kuti baandaane. Barnaba wakeenda a Marko ku Kupro, eelyo Paulo wakeenda a Sila, “[b]aandulula mu-Suriya aku-Kilikiya, uya buyumya mbungano ezyo.” (Incito 15:36-41) Nokwakainda ciindi, kuboneka kuti makani aaya akazoomana nkaambo Marko wakazikuba antoomwe a Paulo ku Roma alimwi ooyu mwaapostolo wakazoomulumbaizya kapati Marko. (Ba-Kolose 4:10; Filimona 23, 24) Paulo naakali muntolongo ku Roma mwaka wa 65 C.E. nowakalondelela, wakaambila Timoteo kuti: “Muletelele Marko, muze awe, nkaambo ulandigwasya mumulimo wa-Leza.” (2 Timoteo 4:11) Kuboneka kuti cilongwe cakwe a Barnaba alimwi a Marko cakali ncecintu ncaakali kupailila calusyomo Paulo, eelyo cakapa kuti kube kukkalikila kwalo ikwakasangene a “luumuno lwa-Leza.”—Ba-Filipi 4:6, 7.
18. Ino ncinzi cakacitika kuli Euodiya alimwi a Suntuke?
18 Akaambo kakuti tatulondokede, “toonse tulalubya muziyanza zinji.” (Jakobo 3:2) Kwakaba buyumuyumu akati kabamakaintu bobilo Banakristo. Kujatikizya mbabo, Paulo wakalemba kuti: “Ndamukumbila Euodiya, alakwe Suntuke ndamukumbila, kuti babe aluyanzano lomwe mu-Mwami. . . . Ubagwasye aba banakazi, nkaambo twakali kulwa abo munkondo ya-Makani Mabotu.” (Ba-Filipi 4:1-3) Kuboneka kuti aaba bamakaintu bayoowa Leza bakaamana mapenzi aabo munzila yaluumuno kwiinda mukubelesya lulayo lulembedwe kubbuku lya Matayo 5:23, 24. Ikubelesya njiisyo zyamu Magwalo cakusyomeka kulakonzya kugwasya kapati mukuleta luumuno mazubaano.
Ilusyomo Lutupa Kuliyumya
19. Ino mbukkale buli buti bukatazya bwalo bwatakakonzya kunyonganya lusyomo lwa Izaka alimwi a Rebeka?
19 Tulakonzya kuliyumya mumapenzi kuti katujisi lusyomo. Ambweni tulakonzya kukatazyigwa akaambo kakuti umwi wamumukwasyi waleka kuswiilila Leza kwiinda mukukwatana amuntu uutasyomi. (1 Ba-Korinto 7:39) Izaka alimwi a Rebeka bakapenga mumoyo akaambo kakuti mwanaabo Esau wakakwata mukaintu uutayoowi Leza. Bamakaintu bakwe iba Hiti “bakakataazya myoyo ya-Izaka a-Rebeka” cakunga Rebeka wakaamba kuti: “Bandikataazya bana basimbi ba-Heti. Na Jakobo wakwata umwi wabana basimbi ba-Heti bali mbuli aba, umwi wabana basimbi bakookuno, buumi bwangu buyooba amilimonzi kulindime?” (Matalikilo 26:34, 35; 27:46) Pele, ibukkale oobu bukatazya kunyina nobwakanyonganya lusyomo lwa Izaka alimwi a Rebeka pe. Atuzumanane kuba alusyomo luyumu ciindi notwaba mubukkale bukatazya.
20. Ino ncikozyanyo nzi cijatikizya lusyomo ncotuzyi icaamba zya Naomi alimwi a Rute?
20 Mukamufwu uucembeede wazina lya Naomi wakali muna Judaya alimwi wakalizyi kuti bamakaintu bamwi mu Judaya bakali kukonzya kuzyala bana basankwa ibakali kuzooba bama syaanyinakulu Mesiya. Akaambo kakuti bana bakwe basankwa bakafwa kabanyina bana alimwi walo wakaliindide kale aciimo cakukonzya kuzyala, imuzeezo wakuti mukwasyi wakwe wakali kukonzya kuba muzyalani lya Mesiya cakali cintu citayeeyelwi kulinguwe. Pele, mukamwana wakafwidwa mulumi wakakwatwa kuli Boazi uucembeede iwakamuzyalila mwana musankwa, eelyo wakaba umwi wabamakaapanyina Jesu naa Mesiya! (Matalikilo 49:10, 33; Rute 1:3-5; 4:13-22; Matayo 1:1, 5) Ilusyomo lwa Naomi alimwi a Rute lwakaazunda mapenzi akubaletela kukondwa. Tuyookondwa kapati andiswe ikuti naa twazumanana ikuba alusyomo ciindi notwasikilwa mapenzi.
21. Ino ncinzi lusyomo ncolukonzya kutugwasya, alimwi ino tweelede kukanza kucita nzi?
21 Nokuba kuti tatuzyi cikonzya kutucitikila juunza, kwiinda mulusyomo tulakonzya kuzwidilila mukumana mapenzi aali woonse. Ilusyomo lutupa kuti tube bantu basungu alimwi bakkazika moyo. Lulapa kuti tube aamakanze meni-meni alimwi akupona buumi bujisi mpindu. Ilusyomo lulakonzya kugwasya kapati mucilongwe cesu abeenzuma alimwi lulapa kuti tukonzye kwaazunda mapenzi. Aboobo atube baabo ‘batakapiluki cifwuteesule akufwa pe, pele atube baabo ibajisi lusyomo iluyootufwutusya.’ (Ba-Hebrayo 10:39) Kwiinda munguzu zya Leza wesu siluyando Jehova alimwi abulemu bwakwe, atuzumanane kuba alusyomo luyumu.
Ino Inga Mwaingula Buti?
• Ino ncisinizyo nzi camu Magwalo citondezya kuti lusyomo lulakonzya kutupa kuba basungu?
• Ino nkaambo nzi ncotukonzya kwaambila kuti lusyomo lulakonzya kutupa kupona buumi bujisi mpindu?
• Ino mbuti lusyomo mboluletela luumuno?
• Ino ncisinizyo nzi ciliko icitondezya kuti lusyomo lulakonzya kutupa kuti tuliyumye mumapenzi?
[Mibuzyo yaciiyo]
[Zifwanikiso izili apeeji 12]
Ilusyomo lwakapa kuti Nowa alimwi a Enoki babe abusungu bwakwaambilizya milumbe ya Jehova
[Zifwanikiso izili apeeji 13]
Ilusyomo luli mbuli lwa Musa lulatukulwaizya kuba amakanze aakumuuya
[Zifwanikiso izili apeeji 14]
Ikusyomezyegwa a Leza kwakayumya lusyomo lwa Baraki, Debora alimwi a Gideoni