“Kamuyandana Mulilwanu”
“Kamuyandana Mulilwanu”
“Kuti naa kamuyandana mulilwanu, bantu bayoomuziba kuti muli basikwiiya bangu.”—JONI 13:35, Ci.
1. Ino mbube nzi Jesu mbwaakakankaizya kakuceede ciindi cisyoonto kuti ajayigwe?
“NOBANA baniini.” (Johane 13:33) Jesu wakabandika abaapostolo bakwe mangolezya aayo katanafwa kwiinda mukubelesya majwi aayo aaluyando. Kunyina aambi aalembedwe boobu muzibalo zya Makani Mabotu ikuti kuli ciindi Jesu naakabelesyede majwi aaluzyalo aali mbuli yaaya. Nokuba boobo, mubuzuba oobu bwaalubazu Jesu wakakonzya kwaabelesya majwi aaya aaluyando ikutegwa atondezye luyando ndwaakajisi kubatobeli bakwe. Masiku aayo, Jesu wakakanana kujatikizya luyando ziindi zibalilwa ku 30. Ino nkaambo nzi ncaakabukankaizya boobo ibube oobu?
2. Ino nkaambo nzi kutondezya luyando ncociyandika kapati ku Banakristo?
2 Jesu wakapandulula ikaambo luyando ncoluyandika kapati. Wakaamba kuti: “Kuti naa kamuyandana mulilwanu, bantu bayoomuziba kuti muli basikwiiya bangu.” (Joni 13:35; 15:12, 17, Ci) Ikuba sikutobela wa Kristo kulabikkilizya akuba aluyando lwabunyina. Banakristo bakasimpe balazyibwa akaambo kaluyando ndobatondezya kubantu, ikutali kwiinda mukusama naa kucita zilengwa zimwi zyaalubazu. Iluyando oolu ndobatondezya, ncecabili kuzintu zyotatwe ziyandika kuli sikwiiya wa Kristo izyaambidwe kumatalikilo kwacibalo cakasaanguna. Ino ncinzi cikonzya kutugwasya kutegwa tuzumanane kutondezya bube oobu buyandika kapati?
‘Kamuciya Buvwuzya Luyando’
3. Ino ndulayo luli buti lujatikizya luyando mwaapostolo Paulo ndwaakapa?
3 Mbubwenya mbuli mbocakabede kubatobeli ba Kristo bamumwaanda wamyaka wakusaanguna, asunu lulalibonya luyando oolu kubatobeli ba Kristo beni-beni. Mwaapostolo Paulo wakabalembela boobu Banakristo bamumwaanda wamyaka wakusaanguna: “Nseelede kulikataazya kumulembela makani aaluyandano lwabunyina, nkaambo nywebo nobeni muliiyi[isyi]dwe kuli-Leza kuti muyandane, nkabela ncobeni muli aluyando kulibabunyina boonse.” Eelyo Paulo wakayungizya kuti: “Kamuciya buv[wuzya luyando].” (1 Ba-Tesalonika 3:12; 4:9, 10) Andiswe tuleelede kulubikkila maano lulayo lwa Paulo alimwi akusolekesya ‘kuvwuzya’ luyando kuli umwi aumwi wesu.
4. Kweelana abwakaamba Paulo alimwi a Jesu, ino mbaani mbotweelede kubikkila maano kapati?
4 Mulugwalo ndomunya oolu lwakasololelwa amuuya, Paulo wakakulwaizya basyominyina kuti ‘babaumbulizye batyompedwe’ alimwi ‘akugwasya bakompeme.’ (1 Ba-Tesalonika 5:14) Ciindi cimwi, wakabayeezya Banakristo kuti aabo ‘basimide mulusyomo baleelede kweengelela baabo batanasima.’ (Baloma 15:1, Ci) Awalo Jesu wakapa malailile kujatikizya makani aakugwasya baabo batasimide. Jesu naakamana kusinsima kuti masiku aayo ngayoojatwa Petro uyoomukaka, Jesu wakaambila Petro kuti: “Waakupilukila kulindime, ukayumye beenzinyoko.” Nkaambo nzi ncaakaambila boobo? Nkaambo kakuti abalo bakali kuyoomuccija Jesu, eelyo bakali kuyandika kugwasya. (Luka 22:32, Ci; Johane 21:15-17) Aboobo, Jwi lya Leza litukulwaizya kuba aluyando kuli baabo bakompeme kumuuya alimwi ambweni abaabo bataciyanzani ambungano ya Banakristo. (Ba-Hebrayo 12:12) Ino nkaambo nzi ncotweelede kucitila boobo? Zikozyanyo zyobilo zilimvwisya kapati Jesu nzyaakaamba zilapa bwiinguzi.
Imbelele Alimwi Asheleni Zyakasweekede
5, 6. (a) Ino nzikozyanyo nzi zyobilo Jesu nzyaakaluula? (b) Ino zikozyanyo eezyi ziyubununa nzi kujatikizya Jehova?
5 Ikutegwa ayiisye baabo bakali kumuswiilila mbuli Jehova mbwababona aabo ibakaleya, Jesu wakaluula zikozyanyo zyobilo mubufwaafwi. Cimwi cakali camweembezi. Jesu wakati: “Ino nguuli muntu akati kanu uujisi mbelele izili mwaanda, nkabela kusweeke yomwe kulinzizyo, sena inga takoozisia musokwe izili makumi aali musanu mwaane amusanu muzine, ainke kuyoolangaula iyakasweeka mane akiibone? Aakwiibona, uliibika aziwezo zyakwe akubotelwa. Asika kumunzi ulaita beenzinyina ambobayakide abo, ateeti kulimbabo, Amubotelwe amebo nkaambo ndiibona mbelele yangu iyali kusweekede. Ndamwaambila kuti, Mbubonya obo akujulu kunooli kubotelwa nkaambo kaumwi mucitazibi uwasanduka, kwiinda baluleme abali makumi aali musanu mwaane amusanu mubane abatabuli kusanduka.”—Luka 15:4-7.
6 Cikozyanyo cabili cakali camukaintu umwi. Jesu wakati: “Mukaintu nguuli uujisi masheleni aali kumi, asweekelwa lyomwe, sena takootomeka lambe, akukulisye moonse muŋanda, akalangaulisye, mane alibone? Alibona ulaita beenzinyina ambobayakide abo ateeti, Kamubotelwa amebo nkaambo ndalijana isheleni lyangu ilyali kusweekede. Mbubonya obo ndamwaambila kuti nkokuli kubotelwa kubaangelo ba-Leza nkaambo kaumwi mucitazibi uwasanduka.”—Luka 15:8-10.
7. Ino nziiyo nzi zyobilo nzyotukonzya kwiiya mucikozyanyo cambelele alimwi asheleni lyakasweekede?
7 Ino ncinzi ncotukonzya kwiiya kuzikozyanyo eezyi? Zitutondezya mbuli (1) mbotweelede kulimvwa kuli baabo bakompeme alimwi (2) ancotweelede kucita ikutegwa tubagwasye. Lino atulange-lange twaambo ootu.
Cisweekede Pele Ciyandika Kapati
8. (a) Ino mweembezi alimwi amukaintu bakalimvwa buti kuzintu nzyobakasweekelwa? (b) Ino mbobakalimvwa butondezya nzi kujatikizya mbuli mbobakali kuzibona zintu zyabo zyakasweekede?
8 Muzikozyanyo eezyi zyobilo, kuli cintu cakasweekede, pele amubone mbuli balaazyo mbobakalimvwa. Mweembezi kunyina naakalibuzya akwaamba kuti: ‘Ino ndipengele nzi kuyandaula mbelele yomwe buyo kakuli zili 99 nkozili? Nzinji zyemunya eezyi kufwumbwa eeyi kaitako, tacikwe makani.’ Imukaintu kunyina naakaamba kuti: ‘Kandipenga asheleni lyomwe buyo! Ngamunya aaya aali fwuka mmanji.’ Muciindi caboobo, mweembezi wakaiyandaula mbelele yakasweekede mbuli kuti njaakajisi ilikke. Imukaintu naakasweekelwa sheleni lyakwe wakalimvwa mbuli kuti kunyina ancaakasyaalilwa. Muzikozyanyo zyobilo, cintu cakasweeka cakali cintu ciyandika kapati mumizeezo yaulaaco. Ino eeci citondezya nzi?
9. Ino ncinzi citondezyegwa mukubikkila maano kwamweembezi alimwi amukaintu?
9 Amubone mbuli Jesu mbwaakaamba kumamanino aazikozyanyo zyobilo, ategwa: “Mbubonya obo akujulu kunooli kubotelwa nkaambo kaumwi mucitazibi uwasanduka” alimwi “Mbubonya obo ndamwaambila kuti nkokuli kubotelwa kubaangelo ba-Leza nkaambo kaumwi mucitazibi uwasanduka.” Aboobo, ikubikkila maano kwamweembezi alimwi amukaintu kulatondezya munzila imwi mbuli Jehova alimwi azilenge zyakwe zili kujulu mbozilimvwa. Mbubwenya mbuli ceeco cakasweekede mbocakacili kuyandika kumweembezi alimwi akumukaintu, abalo aabo ibataciyanzani abantu ba Leza baciyandika kapati mumeso aa Jehova. (Jeremiya 31:3) Ibantu bali boobo balakonzya kuti kabakompeme kumuuya, pele tabazangide buya pe. Nokuba kuti balakonzya kabakompeme, balakonzya kuti munzila imwi bacibamba Jehova nzyayanda. (Intembauzyo 119:176; Incito 15:29) Aboobo, mbubwenya mbuli mbwaakacita kaindi, Jehova ulamuka ‘kubatandilalyo kulinguwe.’—2 Bami 13:23.
10, 11. (a) Ino tuyanda kuti katubabona buti aabo ibataciyanzani ambungano? (b) Kweelana azikozyanyo zyobilo zya Jesu, ino mbuti mbotukonzya kubabikkila maano?
10 Mubwenya mbuli Jehova alimwi a Jesu, andiswe tulibikkilide maano kapati kuli baabo bakompeme ibatajaniki mumiswaangano ya Banakristo. (Ezekieli 34:16; Luka 19:10) Imuntu uukompeme kumuuya tumubona mbuli mbelele iisweekede ikutali kumubona kuti takukwe mbwanga wagwasyigwa. Tatuyeeyi kuti: ‘Katwiide kulipenzya amuntu omwe buyo uukompeme? Zintu zyeenda buyo kabotu mumbungano kufwumbwa katako.’ Muciindi caboobo, aabo ibataciyanzani ambungano pele ibaciyanda kupilukila tubabona mbuli Jehova mbwababona ikuti balayandika kapati.
11 Pele ino mbuti mbotutondezya kuti tulababikkila maano? Zikozyanyo zyobilo zya Jesu zitondezya kuti tulakonzya kucita oobo kwiinda (1) mukutaanguna mukubweza ntaamo, (2) mukuba bantu babombe, eelyo (3) akusinizya. Lino atutulange-lange twaambo ootu kamwi akamwi.
Amubweze Ntaamo Kutaanguna
12. Ino majwi aakuti ‘waunka kukulangaula iyasweeka’ atwaambila nzi kujatikizya mbwaakalimvwide mweembezi?
12 Mucikozyanyo cakutaanguna muzikozyanyo zyobilo eezyi, Jesu waamba kuti mweembezi ‘uyoounka kuyoolangaula mbelele iisweekede.’ Mweembezi wabweza ntaamo kwiinda mukuunka kukuyandaula mbelele iisweekede. Ibuyumuyumu, ntenda alimwi amusinzo, kunyina nozyamulesya kucita boobo pe. Aboobo, mweembezi wazumanana kuyandaula ‘mane wiibona.’—Luka 15:4.
13. Ino mbuti baalumi basyomeka bamumazuba aansiku mbobakabacitila aabo bakakompeme, alimwi ino mbuti mbotukonzya kwiiya zikozyanyo zili boobo zyamu Bbaibbele?
13 Mbubwenya buyo, ikugwasya muntu uuyandika kukulwaizya ziindi zinji kuyandika kuti uujisi nguzu abweze nguwe ntaamo. Baalumi bansiku basyomeka bakakamvwisya kaambo aaka. Mucikozyanyo, ciindi Jonatani mwanaa Mwami Saulo naakamvwa kuti mweenzinyina Davida wakali kuyandika kukulwaizya, “wakanyamuka, wainka kuli-Davida oko kucisaka akumuyumyayumya muli-Leza.” (1 Samuele 23:15, 16) Nokwakainda myaanda yamyaka iili mbwiibede, Mweendelezi Nehemiya naakabona kuti ibanyina ba Juda batalika kutyompwa, awalo ‘wakanyampuka cakufwambaana’ akuyoobayumya-yumya kuti ‘babikke mizeezo yabo kuli Jehova.’ (Nehemiya 4:14) Andiswe mazubaano tuyandika ‘kunyamuka’ akubweza ntaamo yakuyumya-yumya baabo bakompeme. Pele ino mbabani ibeelede kucita boobo mumbungano?
14. Ino nguni mumbungano ya Banakristo weelede kugwasya baabo bakompeme?
14 Ikapati baalu Banakristo mbabajisi mukuli ‘wakuyumya maboko mateteete akupa nguzu mazwi aakankama alimwi akwaambila baabo bakankama mumoyo kuti, amuyume alimwi mutayoowi.’ (Isaya 35:3, 4; 1 Petro 5:1, 2) Nokuba boobo, amubone kuti lulayo lwa Paulo lwakuti ‘amubayumye-yumye batyompedwe’ alimwi alwakuti ‘amubagwasye bakompeme’ tiilwakapegwa buyo kubaalu pe. Pele, majwi aa Paulo akali kwaambilwa “bambungano yaku Tesalonika.” (1 Batesalonika 1:1; 5:14, Ci) Aboobo, ikugwasya baabo bakompeme mmulimo wa Banakristo boonse. Mbubwenya mbuli mweembezi wamucikozyanyo, Munakristo umwi aumwi weelede kukulwaizyigwa ‘kuunka kukulangaula uusweekede.’ Pele eeci cilakonzya kucitwa munzila iigwasya ikuti naa kwaba kubelekela aamwi abaalu. Sena mulakonzya kubweza ntaamo ikutegwa mukonzye kugwasya uukompeme mumbungano yanu?
Amube Babombe
15. Ino nkaambo nzi kakapa kuti mweembezi acite boobu?
15 Ino ncinzi mweembezi ncaacita ciindi naayijana mbelele yasweekede? “Uliibika aziwezo zyakwe.” (Luka 15:5) Elo kaka makani aaya alayasa kumoyo! Imbelele yali kwiide kwiingaila masyikati amasiku aali mbwaabede mucilawo ncoitazyibilide, ambweni abasyuumbwa bali kwiitobela. (Jobu 38:39, 40) Kakunyina kudooneka, imbelele eeyi ilakonzya kuti kiitajisi nguzu akaambo kakuba mubusena bunyina cakulya. Taikonzyi kulivwuna kumakatazyo ngiikonzya kujana munzila noijokela kubutanga. Aboobo mweembezi wooka, wiibweza kabotu-kabotu wiinyamuna akwiinda anjiyo mumakatazyo aali kukonzya kwiisikila eelyo wiitola kubutanga. Ino mbuti mbotukonzya kubikkila maano mbuli bwakacita mweembezi ooyu?
16. Ino nkaambo nzi ncotweelede kutondezya luse ndwaakatondezya mweembezi kumbelele yakasweekede?
16 Imuntu uutayanzani ambungano ulakonzya kubula nguzu munzila yakumuuya. Mbubwenya mbuli mbelele iitali munsi amweembezi, imuntu ooyo ulakonzya kaide kwiingaila munyika eeyi iyoosya kapati. Ikuti naa takwabilidwe abutanga, nkokuti mbungano ya Banakristo, ulakonzya kucaala antangalala kuli Diabolosi walo ‘weendeenda mbuli syuumbwa wabutambo uuya buyandaula ngwatiilume.’ (1 Petro 5:8) Kunze lyaboobo, ulakonzya kubula nguzu akaambo kakubula cakulya cakumuuya. Aboobo, alikke tajisi nguzu zyakukonzya kuzunda makatazyo ngakonzya kuswaanganya ciindi eeco nali mukupilukila kumbungano. Aboobo, tweelede kooka munzila yacikozyanyo, kumunyamuna kabotu-kabotu eelyo akumutola kumbungano. (Ba-Galatiya 6:2) Ino mbuti mbotukonzya kucizuzikizya eeci?
17. Ino mbuti mbotukonzya kwiiya mwaapostolo Paulo ciindi notuswaya muntu uukompeme?
17 Mwaapostolo Paulo wakaamba kuti: “Nguni muteteete [naa uukompeme] ime nketali mutete anguwe?” (2 Bakolinti 11:29, Ci; 1 Ba-Korinto 9:22) Paulo wakali kubeetelela kapati bantu kubikkilizya abaabo bakakompeme. Andiswe tweelede kubeetelela aabo bakompeme. Ciindi nomuswaya Munakristo uukompeme kumuuya, muleelede kumwaambila kuti ulayandika kapati mumeso aa Jehova alimwi akuti Bakamboninyina balimuzimbide kapati. (1 Ba-Tesalonika 2:17) Amumuzyibye kuti balilibambilide kumugwasya alimwi balilisungude ikuba “munyina wazyalilwa mapenzi.” (Tusimpi 17:17; Intembauzyo 34:18) Ikwaambaula calubomba kulakonzya kumunyamuna kabotu-kabotu kusikila limwi wacikonzya kupiluka kubutanga. Ino ncinzi acimbi ncotweelede kucita? Icikozyanyo camukaintu alimwi asheleni lyakasweekede cilakonzya kutugwasya.
Amusinizye
18. (a) Ino nkaambo nzi imukaintu waambwa mucikozyanyo ncaatatyompwa? (b) Ino nkusoleka cakusinizya kuli buti mukaintu nkwaacita, alimwi ino ncinzi ncaajana?
18 Imukaintu wasweekelwa sheleni ulizyi kabotu-kabotu kuti cilakatazya kapati kulijana, pele ulasyoma kuti inga walijana. Nikwali kuti sheleni lyalokela mucoonde naa mulwizi lujisi mankanda, naacilekelalyo kuyandaula kayeeya kuti talikonzyi kuboneka pe. Nokuba boobo, akaambo kakuzyiba kuti sheleni lyeelede kuti nkolili muŋanda momunya alimwi ulakonzya kulibona, watalika kuyandaula kabotu-kabotu kasinizyide. (Luka 15:8) Cakutaanguna wayasya lambe ikutegwa muŋanda mube mumuni. Eelyo watalika kukukula kalindila kuti amvwe kulila kwasheleni kuti ngwele. Amane boobo, watalika kulangaula alambe mumasena imuli mudima mane limwi wabona kuŋaima kwasheleni lyansiliva. Imukaintu wacijana ncaali kuyandaula akaambo kakusolekesya.
19. Ino nziiyo nzi nzyotukonzya kwiiya kujatikizya kugwasya bakompeme kwiinda muzintu nzyaakacita mukaintu mucikozyanyo casheleni lyakasweekede?
19 Mbubwenya mbuli makani aaya aali mucikozyanyo mbwaatuyeezya, imukuli wamu Magwalo wakugwasya Banakristo bakompeme tauli mulimo uukonzya kutwaalila pe. Alimwi tulizyi kuti kucita boobu kuyandika kusolekesya kapati. Kayi mwaapostolo Paulo wakaamba boobu kubaalu baku Efeso: “Muleelede kugwasya abatajisi nguzu.” (Incito 20:35a) Kamuyeeya kwaamba kuti imukaintu naajana mali tanaali buyo kwiide kulangaula awa awaalya naa kwiide kuvwundumuka buyo ayeeya. Wazwidilila nkaambo wabelesya nzila mbotu yakuyandaula kusikila limwi ‘walibona.’ Mbubwenya buyo, ciindi notusola kupilusya muntu uukompeme munzila yakumuuya, nzila njotubelesya yeelede kuba yakusinizya alimwi katujisi makanze mabotu. Ino ncinzi ncotukonzya kucita?
20. Ino ncinzi cikonzya kucitwa ikutegwa tugwasye bakompeme?
20 Ino mbuti mbotukonzya kugwasya uukompeme kuyaka lusyomo lwakwe alimwi akuti atalike kulumba? Ikuliyiisya Bbaibbele kwiinda mukubelesya bbuku limwi lya Bunakristo kulakonzya kuti kacili ncecintu ciyandika kapati. Inzya, kusololela ciiyo ca Bbaibbele kumuntu uukompeme kulakonzya kutupa ciindi cakuti tumugwasye kwiinda mukucita boobo lyoonse alimwi cakulomya. Kuboneka kuti mulangizi wamulimo nguweelede kujana muntu uukonzya kugwasya. Ulakonzya kupa muzeezo kujatikizya makani aakonzya kuyiigwa alimwi abbuku likonzya kugwasya kapati. Mbubwenya mbuli mukaintu uuli mucikozyanyo mbwaakabelesya zibelesyo zyeelede ikutegwa azwidilile mumulimo wakwe, andiswe sunu tulijisi zibelesyo zikonzya kutugwasya ikutegwa tuzwidilile ikunyamuna mukuli ngotwakapegwa a Leza wakugwasya baabo bakompeme. Zibelesyo zyesu zipya naa mabbuku eesu mapya ayoogwasya kapati mumulimo ooyu. Kuli bbuku lyakuti, Amukombe Leza Mwini-Mwini Uuli Alikke alimwi alyakuti Amubaa Cilongwe a Jehova. *
21. Ino mbuti kugwasya baabo bakompeme ncokuletela zilongezyo kuli boonse?
21 Ikugwasya baabo bakompeme kulakonzya kubaletela cilongezyo bantu boonse. Ooyo uugwasyigwa ulakondwa akaambo kakukamantana alimwi abeenzinyina beni-beni. Moyo wesu ulakonzya kukondwa kapati akaambo kakupa nkotucita. (Luka 15:6, 9; Incito 20:35a) Imbungano yoonse ilakonzya kuti kaikkomenyi kapati ikuti naa umwi aumwi katondezya luyando kumweenzinyina. Kunze lyaboobo, bulemu bulaunka ku Beembezi besu ibalanganya kabotu, Jehova alimwi a Jesu, ikulombozya kugwasya bakompeme kwabo nokutondezyegwa ababelesi babo baanyika. (Intembauzyo 72:12-14; Matayo 11:28-30; 1 Ba-Korinto 11:1; Ba-Efeso 5:1) Elo kaka tulijisi twaambo tubotu tutupa kuzumanana ‘kuba aluyando kuli umwi aumwi’ wesu!
Bupanduluzi buyungizidwe
^ munc. 20 Akamwaigwa a Bakamboni ba Jehova.
Sena Inga Mwapandulula?
• Ino nkaambo nzi kutondezya luyando ncokuyandika kuli umwi aumwi wesu?
• Ino nkaambo nzi ncotweelede kutondezya luyando kuli baabo bakompeme?
• Ino nziiyo nzi nzyotwiiya kucikozyanyo cambelele alimwi acasheleni zisweekede?
• Ino nintaamo nzi nzyotukonzya kubweza ikutegwa tugwasye muntu uukompeme?
[Mibuzyo yaciiyo]
[Zifwanikiso izili apeeji 24, 25]
Notugwasya baabo bakompeme, tulabweza ntaamo kutaanguna, tuli babombe alimwi tulasinizya
[Cifwanikiso icili apeeji 24, 25]
Ikugwasya baabo bakompeme kuletela zilongezyo kuli boonse