Mbotukonzya Kuubikkila Maano Mulimo

MUNYIKA eeyi bantu mobabikkila maano kapati kumakani aamakwebo, imuli kuzundana kapati alimwi mobajisi bubi kupanga zintu zinji, ibantu banji tacibakkomanisyi pe kubeleka abuzuba. Nokuba boobo, tweelede kubotelwa amulimo wesu. Ino nkaambo nzi? Nkaambo kakuti twakalengwa mucinkonzya ca Leza, alimwi Leza ulaukkomanina mulimo wakwe. Mucikozyanyo, naakalanga zintu nzyaakalenga kumamanino ‘aamazuba’ aali cisambomwi, naa ciindi cilamfwu, ibbuku lya Matalikilo 1:31 lyaamba kuti “Leza naakabona zintu zyoonse nzyaakacita, wakabona kuti zyoonse zyabota loko.”

Akaambo kakuti Jehova ulakuyandisya kubeleka, nkakaambo kamwi kamupa kuti ayiitwe kuti ngu ‘Leza uukondwa.’ (1 Timoteo 1:11) Aboobo sena taali masimpe kuti mbotuya buzumanana kumwiiya tulaba bantu bakkomene? Ikujatikizya makani aaya, Solomoni Mwami wa Israyeli yansiku iwakali muyaki alimwi iwakacibwene kumutwe kubamba zintu, wakalemba kuti: “Cipo ca-Leza nceeci: kuti muntu alye akunywa akukondwa mumilimo yakwe yoonse.”—Mukambausi 3:13.

Mbwaanga zintu zili mukucinca abuzuba mumasena aabelekelwa, eeci cilakonzya kuba cintu cikatazya kapati. Pele Jehova Leza ulabalongezya kapati aabo ibatobela busolozi bwakwe bwaluyando. (Intembauzyo 119:99, 100) Bantu ibali boobo mbabelesi bayandika alimwi ibasyomeka, aboobo tabalangilwi pe kutandwa milimo. Kuyungizya waawo, baiya kuzyiba buumi mbobubede alimwi amulimo wabo munzila yakumuuya ikutali yakumubili. Eeci cilabagwasya kusala bweelede mubuumi bwabo boonse alimwi akubona kuti lukkomano lwabo akuliiba taziyeeme amilimo yabo yakumubili iitasyomeki. (Matayo 6:31-33; 1 Ba-Korinto 2:14, 15) Alimwi cilabagwasya kuubeleka munzila mbotu mulimo.

Amubeleke Munzila Iikomanisya Leza

Bamwi bantu babikkide maano kapati kumilimo yabo cakunga kunyina cintu cimbi ncobakonzya kubikka ambele. Ibamwi nobali amilimo, balombozya buyo kufwambaana kukotoka akuunka kuŋanda. Ino mbuti mbotweelede kuubona mulimo? Ibbaibbele liingula kuti: “Inkankamanza yomwe iili aluumuno nimbotu kwiinda maanza obile aazwide milimo iikataazya iitakutyi moyo.” (Mukambausi 4:6) Imasimpe ngakuti, kuciindilizya kubeleka akutola ciindi cilamfwu tacigwasyi nkaambo kuletela buyo mapenzi mukuzuzikizya makanze alo ‘aatakkutyi moyo.’ Ino nkaambo nzi ncocili boobo? Nkaambo kakuti tulakonzya kunyonganya zintu eezyo ziyandika ikutegwa katuli bantu bakkomene kapati: mbuli ikuyanzana mumukwasyi alimwi abeenzuma, kuyuma kumuuya, kupona kabotu kakunyina kuciswa-ciswa, alimwi nokuba koongola buya. (1 Timoteo 6:9, 10) Icintu ciyandika kapati nkuzulila azintu zisyoonto zyakumubili nzyotujisi alimwi katuli muluumuno muciindi cakujata bubi amilimo minji iityompwa.

Nokuba kuti Bbaibbele likulwaizya kuzilanga munzila mbotu eezyo zintu, taku nolikulwaizya butolo. (Tusimpi 20:4) Butolo bulabuzya bulemu. Icintu ciinda kubija ncakuti bunyonyoona cilongwe cesu a Leza. Ibbaibbele lilaamba caantangalala kuti muntu uukaka kubeleka teelede kupegwa cakulya pe. (2 Ba-Tesalonika 3:10) Muciindi caboobo, weelede kucinca nzila zyakwe akutalika kubeleka canguzu calo cikonzya kupa kuti ajane nzyayanda alimwi akugwasya baabo mbalela. Kwiinda mukubeleka canguzu ulakonzya kubagwasya aabo bapengede ncobeni, alimwi eeci ncecilengwa Ijwi lya Leza ncolikulwaizya.—Tusimpi 21:25, 26; Ba-Efeso 4:28.

Kuyiisigwa Kutalikila Kubwana Kubikkila Maano Kumulimo

Kubikkila maano kumulimo takubooli buyo kulikke pe; pele kulayiigwa muntu nacili mwana. Aboobo, Ibbaibbele likulwaizya bazyali kuti: “Iyisya mwana aende munzila iielede, lino akomena takooyooleya mulinjiyo.” (Tusimpi 22:6) Kunze lyakupa cikozyanyo cibotu kabali babelesi, bazyali  basongo batalika kuyiisya bana babo kwiinda mukubapa milimo yaaŋanda yeendelana aciimo cabo. Nokuba kuti bana balakonzya kabatayandi kubeleka milimo iimwi, kumbele bayoobona kuti abalo mbantu bayandika mumukwasyi ikapati eelyo banyina alimwi abawisi nobabalumbaizya kumilimo mibotu njobabeleka. Icintu cuusisya ncakuti, bamwi bazyali balabacitila bana babo milimo yoonse, ambweni akaambo kakuyeeya kuti kucita boobo nkutondezya luzyalo. Bazyali bali boobu beelede kulanga bbuku lya Tusimpi 29:21, mu The Bible in Tonga lyamu 1996, mpoliti: “Kuti muntu walendekezya mubelesi [naa mwana] wakwe mukumupa zyoonse nzyayanda kumamanino uyoomunyanga kufumbwa ncajisi.”

Ibazyali basiluyando alimwi balabikkila maano kubana babo kwiinda mukulanga-langa nzyobacita kucikolo akubakulwaizya kuti baiye alimwi akubeleka canguzu nobali kucikolo. Eeci ciyoobagwasya kapati bana baakutalika kubeleka milimo yakumubili.

Amucenjele Ciindi Nomusala Mulimo

Nokuba kuti Bbaibbele talitwaambili mulimo ngotweelede kuyandaula, lilatupa busolozi bubotu kutegwa ikuyaambele kwesu kwakumuuya, mulimo wesu kuli Leza alimwi azintu zimwi ziyandika kapati zitanyonganyizyigwi. Mucikozyanyo, imwaapostolo Paulo wakalemba kuti: “Ciindi ncifwiifwi. Kuzwa sunu abo . . . babelesya zintu zyaansi batapangiki moyo kukubelesya nzizyo. Nkaambo ziyanza zyaansi ano zili muk[ucinc]a.” (1 Ba-Korinto 7:29-31) Kunyina cintu cinooliko lyoonse naa citakacinci mubweende bwazintu oobu. Ikubelesya ciindi cesu coonse alimwi anguzu kumulimo, ceelene buyo akuyobola mali ngotwakabelekela kusikila twaleka milimo muŋanda iiyakidwe mubusena budumide ikupaya meenda. Elo kaka inga kwaba kufwubaala kucita boobo!

Ima Bbaibbele aamwi asandulula kaambo kakuti “batapangiki moyo kukubelesya nzizyo” kuti “batabikkili maano kapati kulinzizyo.” (The Jerusalem Bible; Today’s English Version) Bantu basongo tabalubi kuti ciindi cacaala mubweende oobu bubyaabi “ncifwiifwi” kapati akuti ‘kubikkila maano kulimbubo,’ cakutadooneka kuyoopa buyo kutyompwa alimwi akuusa.—1 Johane 2:15-17.

‘Leza Takooyoomulekelezya Pe’

Jehova ulizyi nzyotuyanda kwiinda mbotuzyi swebo. Alimwi ulizyi ciindi cacaala kutegwa azuzikizye makanze aakwe. Aboobo ulatuyeezya kuti: “Buumi bwanu butabi bwakuyanda mali, pe, mutabi basyaacivulemwaangu, nkaambo Leza wakati, Nsikwe nenti kamulekelezye nokuba kuyoomuleka buyo pe, pe.” (Ba-Hebrayo 13:5) Elo kaka alaumbulizya makani aaya! Ikwiiya Leza mbwabalanganya bantu bakwe, Jesu wakabelesya ciindi cinji mu Mulumbe wakwe waa Cilundu uudumide ikuyiisya basikwiiya bakwe inzila mbotu mbobeelede kuubona mulimo alimwi azintu zyakumubili.—Matayo 6:19-33.

Bakamboni ba Jehova balasolekesya kuzitobela njiisyo eezyo. Mucikozyanyo, iciindi Sikulemba mulimo naakalomba Kamboni iwakali kubeleka mulimo wamagesi kuti kazumanana kubeleka lyoonse cakkwana ciindi cakukotoka, imubelesi ooyu wakaakaka makani aaya. Ino nkaambo nzi ncaakakakila? Nkaambo kakuti tanaakali kuyanda kuti mulimo wakwe wakumubili unyonganye ciindi ncaakali kuba amukwasyi wakwe alimwi akucita zintu zyakumuuya. Mbwaanga wakali mubelesi mubotu alimwi uusyomeka, sikumulemba milimo wakacizumina ncaakaamba. Masimpe, talili lyoonse  zintu nozikonzya kucitika munzila eeyo, alimwi muntu umwi ulakonzya kuyandaula buyo mulimo uumbi kutegwa azumanane kuba abukkale bubotu. Nokuba boobo, aabo basyoma cakumanina muli Jehova ikanjikanji bajana kuti ibukkale bwabo bubotu alimwi akubikkila maano kumulimo kupa kuti bayandwe kapati abasikubalemba milimo.—Tusimpi 3:5, 6.

Iciindi Noiya Kukkomanisya Milimo Yoonse

Mubweende bwazintu oobu bubyaabi, kunyina naayoomana mapenzi alimwi akumana-mana kwamilimo. Mubwini, zintu zilalangilwa kubija nyika mboiya bwiindila kubija alimwi aalo makwebo alakonzya kuyaansi naa kuwa. Pele bukkale oobu bunooliko kwaciindi buyo cisyoonto. Lino-lino cilasika ciindi nokutakabi muntu uubula mulimo. Kuyungizya waawo, milimo yoonse inookkomanisya alimwi inakujisi mpindu. Ino mbuti eeci mbocinga cakonzyeka? Ino kucinca kuli boobu kuya kuboola munzila nzi?

Ikwiinda mumusinsimi Isaya, Jehova wakaambilizya ciindi cili boobo. Jehova wakaamba kuti: “Ndalenga ijulu ipya anyika impya. Ezyo zyakusaanguna tazikooyooibalukwa limbi nikuba kuyeeyegwa.” (Isaya 65:17) Wakali kwaamba mfwulumende yakwe mpya, imunooli bantu baluleme ncobeni.—Daniele 2:44.

Kujatikizya mbobayoopona bantu alimwi amulimo mbouyakuba, ibusinsimi bulazumanana kwaamba kuti: “Bayooyaka maanda akukala mulingao, bayoobyala myuunda yamisaansa akulya micelo yayo. Maanda ngebayaka taakooyookalwa umbi, amicelo njibabyala tiikooyooligwa umbi pe, nkaambo mazuba aabantu bangu ayooba mbuli mazuba aamusamu, abantu mbensalide bayoongozya milimo yamaanza aabo. Tabakooyoobeleka cabuyo nikuba kubelekela mapenzi, nkaambo bayooba bana bacoolwe ca-Jehova, alunyungu lwabo mbubonya.”—Isaya 65:21-23.

Elo kaka takulikomeneni kucinca kuyooba munyika mpya eeyo Leza njabambide! Sena mulayanda kuyoopona munyika eeyo, oomo imutakooyooba ‘kubelekela cabuyo’ pele momuya kukkomana cakumaninina “amicelo” yamaanza aanu? Pele amubone aabo ibayootola lubazu muzilongezyo eezyo: ‘Mbana bacoolwe ca Jehova.’ Mulakonzya kuba umwi wabaabo ‘balaa coolwe’ kwiinda mukwiiya zya Jehova alimwi akucita zintu nzyayanda. Jesu wakaamba kuti: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3) Bakamboni ba Jehova bayookkomana kumugwasya kujana Luzibo lusololela kubuumi kwiinda mukuba abubambe bwaciiyo ca Jwi lya Leza, Ibbaibbele.

Kabbokesi kali apeeji 4]

“BAKAMBONI MBABANTU MBOBAYANDISYA KUNJIZYA MILIMO”

Ibbaibbele lyaamba kuti: “Kufumbwa cintu ncimucita, milimo yanu ibe yamoyo woonse, ibe mbuli milimo iicitilwa Mwami, itabi yakubelekela bantu buyo pe.” (Ba-Kolose 3:23) Masimpe ngakuti, muntu weendelezyegwa anjiisyo mbotu eeyi amulimo wakwe, unooli mubelesi uuyandwa kapati. Akaambo nkakona aako, imulembi wazina lya J. J. Luna mubbuku lyakwe litegwa How to be Invisible (Mbomunga Mwabukwabilila Bube Bwanu), ulailila basikulemba milimo ibayanda babelesi kuti kabayandaula bantu basungweede munkamu zimwi zyabukombi, alimwi wakayaambele kwaamba kuti: “Imasimpe ngakuti kanjikanji tusala kunjizya Bakamboni ba [Jehova].” Akati katwaambo tumwi ntwapa, kuli kaambo kakuti balizyibidwe akaambo kakusyomeka kwabo alimwi eeci cipa kuti ‘Bakamboni babe bantu mbobayandisisya kunjizya’ mumilimo iisiyene-siyene.

[Zifwanikiso izili apeeji 5]

Kuulanga bweelede mulimo zintu zyakumuuya alimwi azyakulikondelezya kuletela lukkomano