Ino Nkaambo nzi Ncotweelede Kucitila Mulalilo wa Mwami?

“Mebo ndakatambula ku-Mwami ayo makani ngindakamusiila.”—1 BA-KORINTO 11:23.

1, 2. Ino ncinzi Jesu ncaakacita mangolezya mubuzuba bwa Pobwe lya Pasika mu 33 C.E.?

IMWANAA Jehova simuzyalwa alikke wakaliko. Wakali antoomwe abaalumi ibali 11 balo ‘ibakamwiiminina mumapenzi.’ (Luka 22:28) Mwakali muli Bwane mangolezya mu March 31, 33 C.E., alimwi kuboneka kuti kujulu kwakali kulibonya kabotu mu Jerusalemu akaambo kamwezi wakali kubala. Jesu Kristo abaapostolo bakwe bakamana kusekelela Pobwe lya Pasika. Judasi Iskariote sikwaaba wakatandwa, pele aaba bamwi bakeelede kucaala. Nkaambo nzi? Nkaambo kakuti kwakali cintu cimwi cipati Jesu ncaakali kuyanda kuti acite. Ino cakali cintu nzi?

² Mbwaanga mulembi wa Makani Mabotu Matayo wakaliko, atumuleke atuluude. Wakalemba kuti: “Jesu wakabweza mukamu, walumba, wakomona, waabila basikwiiya, waamba wati, Amubweze, mulye, nkaambo ngooyu mubili wangu. Alimwi wakabweza kanywido, walumba, wabaabila, waamba wati, Amunywide mulinkako nyoonse, nkaambo mboobu bulowa bwangu bwamulongo butililwa bantu banji kuti balekelelwe milandu yabo.” (Matayo 26:26-28) Sena pobwe eeli lyeelede kucitwa buyo ciindi comwe? Ino ndipati buti? Sena lilijisi mulimo asunu kulindiswe?

“Kamucita Obo”

3. Ino nkaambo nzi Jesu ncaakacita masiku mu Nisani 14, 33 C.E. ncocili cintu cipati?

³ Jesu Kristo ncaakacita masiku aamu Nisani 14, 33 C.E. tiicakali cintu cakeelede kucitwa buyo ciindi kacipona anyika pe. Mwaapostolo Paulo wakaamba zyamakani aaya naakalembela Banakristo bananike ibaku Korinto, kwalo bubambe oobu Jesu mbwaakatalisya nkobwakacili kucitwa kakwiindide myaka iili 20. Nokuba kuti Paulo tanaakali a Jesu alimwi abaapostolo ibali 11 mu 33 C. E, kweelede kuti baapostolo bamwi bakamuzyibya cakacitika ciindi eeco. Kunze lyaboobo,  cakutadooneka Paulo wakasinizya mbazu zyacilengwa eeci kwiinda mucilengano cakasololelwa amuuya. Paulo wakaamba kuti: “Mebo ndakatambula ku-Mwami ayo makani ngindakamusiila, kuti Mwami Jesu, kumasiku ayo ngaonya ngaakaabwa, wakabweza mukamu, elyo naakamana kulumba, wakuukomona, wakati, Oyu ngumubili wangu ngumukomwedwa; kamucita obo kuti cibe ciibalusyo candime. Mbubonya obo, mulalilo umane buyo, wakabweza cinywido, wati, Eci cinywido ngumulongo mupya uuli mubulowa bwangu, kamucita obo, ciindi kufumbwa ncimunywa, kuti cibe ciibalusyo candime.”—1 Ba-Korinto 11:23-25.

4. Ino nkaambo nzi Banakristo ncobeelede kucita Mulalilo wa Mwami?

⁴ Imulembi wa Makani Mabotu Luka wakasinizya kuti Jesu wakalailila kuti: “Amukacite obo kuti mukandiyeeye.” (Luka 22:19) Imajwi aaya mu Bbaibbele lya Cizuminano Cipya alembedwe kuti: “Kamucita eeci mukuyeeya ndime.” Alimwi icilengwa eeci ziindi zinji ciitwa kuti Ciibalusyo calufwu lwa Kristo. Paulo walo wakaciita kuti Mulalilo wa Mwami, izina liceelede nkaambo cakatalisyigwa ciindi camangolezya nokulalilwa. (1 Ba-Korinto 11:20) Banakristo balailidwe kuti kabacita Mulalilo wa Mwami. Pele, ino cilengwa eeci cakatalisyilwa nzi?

Ncocakatalisyilwa

5, 6. (a) Ino nkaambo nzi kamwi kakapa kuti Jesu atalisye Ciibalusyo? (b) Amupe kaambo akamwi kakapa kuti Mulalilo wa Mwami utalisyigwe.

⁵ Ikaambo kamwi Ciibalusyo ncocakatalisyilwa kalabikkilizya amakanze aakapa kuti Jesu afwe. Wakafwa kali sikusalazya bweendelezi bwa Wisi wakujulu. Aboobo Kristo wakatondezya cakusalazya kuti Diabolosi Saatani walo wakatamikizya bantu kuti balamubelekela Leza akaambo kakuyanda kupegwa zintu, mmubeji. (Jobu 2:1-5) Ilufwu ndwaakafwa Jesu kasyomekede lwakatondezya kuti makani aaya ngakubeja, eelyo wakamukkomanisya Jehova.—Tusimpi 27:11.

⁶ Ikaambo akambi kakapa kuti Mulalilo wa Mwami utalisyigwe nkakutuyeezya kuti kwiinda mulufwu lwa Jesu uulondokede alimwi uutajisi zibi, ‘wakapa buumi bwakwe kutegwa cibe cinunuzyo cabanji.’ (Matayo 20:28) Ciindi muntu wakusaanguna naakabisizya Leza, wakabunyonganya buumi bulondokede alimwi azintu zyoonse nzyakali kulangilwa. Nokuba boobo, Jesu wakaamba kuti: “Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” (Johane 3:16) Ee, “cakuvola cazibi ndufu, pele caabilo ca-Leza mbuumi butamani bwamuli-Kristo Jesu Mwami wesu.” (Ba-Roma 6:23) Ikucita Mulalilo wa Mwami cituyeezya luyando lwini-lwini lwakatondezyegwa a Jehova alimwi a Mwanaakwe iluswaangenyi alufwu lwacipaizyo ca Jesu. Elo kaka tuleelede kulumba kuluyando oolo!

Ino Ceelede Kucitwa Lili?

7. Ino mbuti Banakristo bananike mbobalya Ciibalusyo “ciindi coonse”?

⁷ Paulo wakaamba boobo kujatikizya Mulalilo wa Mwami: “Ciindi coonse kufumbwa ncimulya mukamu oyu akunywa cinywido eci munooyootondezya lufu lwa-Mwami mane do akasike.” (1 Ba-Korinto 11:26) Umwi aumwi wa Banakristo bananike ulalya zitondezyo lya Ciibalusyo kusikila kulufwu lwakwe. Aboobo, kuli Jehova Leza akunyika cakwiinduluka-induluka balaambilizya kujatikizya lusyomo lwabo mububambe bwa Leza bwacipaizyo cacinunuzyo ca Jesu.

8. Ino nkamu yabananike yakeelede kucita Mulalilo wa Mwami kusikila lili?

⁸ Ino ndilili nkamu ya Banakristo bananike noyeelede kucileka kucita Ciibalusyo calufwu lwa Kristo? Paulo wakaamba kuti kusikila “akasike,” icipandulula kuti ikucita ciibalusyo ooku kuyoozumanana kusikila limwi Jesu akasike akubatambula batobeli bakwe bananike kujulu kwiinda mububuke “kukuboola” kwakwe. (1 Ba-Tesalonika 4:14-17) Eeci cileendelana amajwi aa Jesu ngaakaambila baapostolo bakwe ibali 11 aakuti: “Na ndainka kuyoomubambila busena ndiyooboola alimwi, nzoomutolelele, kuti oko nkwembede anywebo mukabe nkuko.”—Johane 14:3.

9. Ino majwi aa Jesu aalembedwe kuli Marko 14:25 apandulula nzi?

⁹ Ciindi Jesu naakatalisya Ciibalusyo, wakaamba kujatikizya nkomeki yakajisi waini alimwi akwaambila baapostolo bakwe basyomeka kuti: “Nsicinywi limbi mucelo wamusaansa mane do kubuzuba obo mbwenti kanywe mupya  mu-Bwami bwa-Leza.” (Marko 14:25) Mbwaanga Jesu tanoonywi waini wini-wini kujulu, kweelede kuti wakali kuyeeya lukkomano ziindi zimwi lwiimininwa awaini. (Intembauzyo 104:15; Mukambausi 10:19) Ikuba antoomwe mu Bwami abasikumutobela cakali cintu cikkomanisya ncobakali kulombozya kapati.—Ba-Roma 8:23; 2 Ba-Korinto 5:2.

10. Ino Ciibalusyo ceelede kucitwa ziindi zyongaye?

¹⁰ Sena lufwu lwa Jesu lweelede kwiibalukwa amwezi, ansondo naa abuzuba buya? Peepe. Jesu wakacita Mulalilo, eelyo wakajaigwa mubuzuba bwapobwe lya Pasika, lyalo lyakali kucitwa kacili “ciibalusyo” cakulubulwa kwabana Israyeli kuzwa mubuzike ku Egepita mu 1513 B.C.E. (Kulonga 12:14) Ipobwe lya Pasika lyakali kucitwa komwe amwaka, mubuzuba bwa 14 bwamwezi waci Juda wa Nisani. (Kulonga 12:1-6; Levitiko 23:5) Eeci citondezya kuti lufwu lwa Jesu lweelede kwiibalukwa mbubwenya mbuli bwakali kucitwa Pobwe lya Pasika amwaka ikutali amwezi, ansondo naa abuzuba pe.

11, 12. Ino makani aansiku aamba nzi kujatikizya makani aakucita Ciibalusyo mumazuba aakaindi?

¹¹ Aboobo cileelede ikucita Ciibalusyo amwaka mubuzuba bwa Nisani 14. Ibbuku limwi lyakaamba kuti: “Banakristo baku Asia Minor bakali kwiitwa kuti ba Quartodecimans [naa basibuzuba bwa 14] akaambo kacilengwa cabo cakusekelela pascha [Mulalilo wa Mwami] lyoonse mubuzuba bwa Nisani 14 . . . Ibuzuba oobu bulakonzya kukkwana muli Bwasanu naa buzuba bumbi buyo mumvwiki.”—The New Schaff-Herzog Encyclopedia of Religious Knowledge, Volume IV apeeji 44.

¹² Naakali kwaamba cakali kucitwa mumwaanda wabili C.E., sikuluula makani aansiku wazina lya J. L. von Mosheim wakaamba kuti basibuzuba bwa 14 bakali kucita Ciibalusyo mubuzuba bwa Nisani 14 nkaambo “cikozyanyo ca Kristo bakacibona kuti cilijisi nguzu zyamulawo.” Sikuluula makani aansiku aumbi waamba kuti: “Ikubelesya buzuba bwa 14 kwakali kucitwa abasizikombelo baku Asia kwakaleelene akooko kwakali kucitwa acikombelo caku Jerusalemu. Mumwaanda wamyaka wabili, zikombelo eezi mubuzuba bwa Pascha mu Nisani 14 zyakali kwiibaluka kunununwa kwazyo akaambo kalufwu lwa Kristo.”—Studia Patristica, Volume V, 1962 apeeji 8.

Icinkwa Ncociiminina

13. Ino ncinkwa cili buti Jesu ncaakabelesya ciindi naakatalisya Mulalilo wa Mwami?

¹³ Jesu naakatalisya Ciibalusyo, “wakabweza [cinkwa], walumba, wakomona, wabaabila [baapostolo].” (Marko 14:22) Icinkwa ncaakabelesya ciindi eeco cakalikozyenyi aceeco cakabelesyegwa lya Pobwe lya Pasika. (Kulonga 13:6-10) Mbwaanga tiicakajisi bumena naa yisiti, cakalipapalede alimwi cakali kukonzya kukomoka. Aboobo cakakomonwa ikutegwa caabilwe kabotu. Jesu naakabamba cinkwa camaleele ikutegwa bantu ibali zyuulu izili mbuzibede balye, acalo cinkwa eeci cakali mbuli makololo nkaambo wakacikomoona ikutegwa caabilwe bantu. (Matayo 14:19; 15:36) Aboobo cilasalala ikuti ikukomoona cinkwa lya Ciibalusyo tacili cilengwa cabukombi buya pe.

14. (a) Ino nkaambo nzi ncoceelela kutabikka bumena kucinkwa cibelesyegwa lya Ciibalusyo? (b) Ino ncinkwa cili buti cikonzya kujanika naa kubambwa ikutegwa cibelesyegwe lya Mulalilo wa Mwami?

¹⁴ Jesu wakaamba boobu kujatikizya cinkwa ncaakabelesya ciindi naakatalisya Ciibalusyo: “Oyu ngumubili wangu ngumukomwedwa.” (1 Ba-Korinto 11:24; Marko 14:22) Cakeelela kapati nkaambo cinkwa eeci tiicakajisi bumena. Nkaambo nzi? Nkaambo kakuti bumena bulakonzya kwiiminina bubi naa cibi. (1 Ba-Korinto 5:6-8) Icinkwa ciiminina mubili wa Jesu uulondokede alimwi uutajisi zibi, walo cakweelela wakaabwa kutegwa ube cipaizyo cacinunuzyo. (Ba-Hebrayo 7:26; 10:5-10) Bakamboni ba Jehova balaayeeya makani aaya, eelyo batobela cikozyanyo cakasiya Jesu kwiinda mukubelesya cinkwa citajisi bumena nobacita  Ciibalusyo. Ziindi zimwi cinkwa cabana Juda icitajisi budodoodo bumbi mbuli hanyisi naa mayi cilabelesyegwa. Pele cinkwa citajisi bumena cilakonzya kubambwa abusu busyoonto buyo bwakubambya cinkwa luzutu (kuti cakonzyeka busu bwabbusumili) kwiinda mukubukanda ameenda. Ibusu bukandidwe bweelede kupapalisyigwa kapati, eelyo akububikka mumpani iijisi mafwuta aakujisya masyoonto buyo kusikila limwi cayuma nta.

Waini Ncowiiminina

15. Ino ncinzi cakali munkomeki ciindi Kristo naakatalisya Ciibalusyo calufwu lwakwe?

¹⁵ Jesu naakamana kubaabila cinkwa citajisi bumena, wakabweza nkomeki “walumba, wabaabila [baapostolo], elyo bakanywa boonse.” Eelyo Jesu wakapandulula kuti: “Mboobu bulowa bwangu bwamulongo mupya, mbubatikilwa banji.” (Marko 14:23, 24) Ino ncinzi cakali munkomeki? Kwakali waini uupapide, ikutali musinza wamucelo uubambya waini uutapapide pe. Ciindi Magwalo naamba waini, taapandululi musinza wamucelo uubambya waini uutapapide pe. Mucikozyanyo, Jesu wakati, waini uupapide nguukonzya ‘kubbosyola nkomo yakaindi,’ ikutali musinza buyo uutapapide. Alimwi basinkondonyina Kristo bakali kumwaamba kuti wakali “mukolwi.” Makani aaya inga aba akulipangila buyo nikwali kuti waini ooyu waambwa wakali musinza buyo uutapapide wamucelo uubambya waini. (Matayo 9:17; 11:19) Waini wakali kunyugwa lya Pobwe lya Pasika, alimwi Kristo wakabelesya waini ciindi naakatalisya Ciibalusyo calufwu lwakwe.

16, 17. Ino musyobo nzi wawaini weelede kubelesyegwa lya Ciibalusyo, alimwi ino nkaambo nzi?

¹⁶ Waini uusalala nguweelede kubelesyegwa kweelana acakali munkomeki ncocakali kwiiminina, nkokuti bulowa bwa Jesu bwakatika. Walo wakaamba kuti: “Mboobu bulowa bwangu bwamulongo mupya, mbubatikilwa banji.” Alimwi mwaapostolo Petro wakalemba kuti: “Mulizi [Ibanakristo bananike] kuti teensi zintu zikulumpala, mbuli insiliva niiba ingolida, nzimwakanunuzigwa kukweenda kwanu kwabuyo nkumwakasiilwa kumauso, pe, mwakanunuzigwa abulowa buyandisi mbuli bwamwana[a]mbelele uutajisi akampenda nanka kabala, nkokuti bulowa bwa-Kristo.”—1 Petro 1:18, 19.

¹⁷ Imusinza wamucelo uubambya waini uusalala ngonguwe Jesu ngwaakabelesya ciindi naakatalisya Ciibalusyo. Nokuba boobo, misyobo imwi yawaini yamazubaano tiizumizigwi pe nkaambo kakuti ilivweledwe azintu zimwi mbuli makoko alimwi abudodoodo bumwi. Ibulowa bwa Jesu bwakali kweelela ikuba cinunuzyo, kunyina cimbi cakali kuyandika kusanganya kuli mbubo pe. Aboobo imisyobo eeyi yawaini mbuli port, sherry alimwi a vermouth tayeeleli kubelesyegwa pe. Waini uuli munkomeki iibelesyegwa lya Ciibalusyo weelede kuti kuusalala alimwi uutavweledwe cintu pe. Imusyobo wawaini uusalala uubambwa amucelo uubambya waini uutavweledwe cintu mbuli waini ngomukonzya kulibambila ulakonzya kubelesyegwa alimwi awaini uusalala uutegwa burgundy alimwi a claret.

18. Ino nkaambo nzi Jesu ncaatakacita maleele kucinkwa akuwaini wakabelesyegwa lya Ciibalusyo?

¹⁸ Ciindi Jesu naakatalisya mulalilo ooyu, kunyina naakacita maleele aakucinca zitondezyo kuti zibe nyama yakwe ncobeni naa bulowa bwini pe. Ikulya nyama yamuntu alimwi akunywa bulowa ooko inga kwaba kuba madyabantu, ikusotoka mulawo wa Leza. (Matalikilo 9:3, 4; Levitiko 17:10) Jesu wakaliijisi nyama alimwi abulowa bwakwe boonse mangolezya aayo. Imubili wakwe wakapegwa kauli cipaizyo cilondokede alimwi bulowa bakwe bwakatilwa masyikati mubuzuba  oobo bwamu Nisani 14. Aboobo, cinkwa awaini zibelesyegwa lya Ciibalusyo nzyitondezyo buyo ziiminina nyama ya Kristo alimwi abulowa. *

Ciibalusyo Icilyo Cilidwa Antoomwe

19. Ino nkaambo nzi ncocikonzya kuyandika kubelesya mitiba minji alimwi ankomeki zinji ciindi nokucitwa Mulalilo wa Mwami?

¹⁹ Jesu naakatalisya Ciibalusyo, wakaambila baapostolo bakwe basyomeka kuti banywide munkomeki yomwe. Makani Mabotu aakalembwa a Matayo aamba kuti: “[Jesu] wakabweza kanywido, walumba, wabaabila, waamba wati, Amunywide mulinkako nyoonse.” (Matayo 26:27) Ikubelesya nkomeki yomwe kunyina nocakakatazya pe, nkaambo ciindi eeco ibakali kunywa bakali buyo 11 alimwi cilasalala kuti boonse bakali atafwule lyomwe, eelyo cakabaubila kwiinzyanya nkomeki. Mwaka uuno, tuulunzuma ituli mbotubede tuyoobungana kuti tucite Mulalilo wa Mwami mumbungano zya Bakamboni ba Jehova ziinda ku 94,000 munyika yoonse. Inkomeki yomwe buyo inga tiiyabelesyegwa kabotu kubantu banji boobu ibanooliko mangolezya aayo ku Ciibalusyo. Pele kubelesya nkomeki yiiminina bulowa bwa Jesu kulazumanana kutobelwa mumbungano kwiinda mukubelesya nkomeki zinji ikutegwa bape aabo bajanika muciindi ceelede. Mbubwenya buyo, mitiba minji ilakonzya kubelesyegwa kunyamuda cinkwa. Magwalo kunyina mpaatondezya kuti inkomeki eeyi yeelede kuti kiibambidwe caalubazu buya pe. Pele, inkomeki alimwi amutiba zyeelede kuti kazitondezya bulemu bwaciindi eeco. Takuyandiki kuzuzya nkomeki kusikila aatala cakunga waini ulakonzya kutika-tika ciindi nowiizyigwa mubantu.

20, 21. Ino nkaambo nzi ncotukonzya kwaamba kuti Ciibalusyo ncilyo cilidwa antoomwe?

²⁰ Nokuba kuti mitiba yakunyamuda cinkwa alimwi ankomeki zyawaini nzinji, Ciibalusyo ncilyo cicitilwa antoomwe. Mu Israyeli yansiku, mwaalumi wakali kukonzya kusanga munyama kucilyo cilidwa antoomwe walo ngwaakali kuleta kucikombelo ca Leza kwalo nkwaakali kujailwa. Cibeela cimwi canyama cakali kuumpwa acipaililo, cimwi cakali kupegwa kumupaizi weendelezya, cimwi cakali cabapaizi bana ba Aroni antoomwe ayooyo wasanga kubikkilizya amukwasyi wakwe kuti balye antoomwe. (Levitiko 3:1-16; 7:28-36) Acalo ciibalusyo ncilyo cicitilwa antoomwe nkaambo ncakwaabana buya.

²¹ Jehova ulijatikizyidwe mucilyo eeci cilidwa antoomwe mbwaanga ngonguwe Wakatalisya bubambe oobu. Jesu ncecipaizyo kakuli Banakristo bananike balalya alimwi akunywa zitondezyo kabali basikukona. Ikulida atafwule lya Jehova citondezya kuti aabo balya balikkede caluumuno anguwe. Cakweelela Paulo wakalemba kuti: “Sa kanywido kakulumba nkotulumba takeensi kaluswanaano lwabulowa bwa-Kristo? Awalo mukamu nguutukomona sa taweensi waluswanaano lwamubili wa-Kristo? Nkaambo tuli mukamu omwe, tuli mubili omwe, nituli banjibanji, ikuti toonse tulaabilwa kumukamu omwe.”—1 Ba-Korinto 10:16, 17.

22. Ino mmibuzyo nzi iijatikizya Ciibalusyo iiciyandika kulanga-langa?

²² Mulalilo wa Mwami ncecilengwa cabukombi icicitwa amwaka a Bakamboni ba Jehova. Eeci cileelela nkaambo Jesu wakalailila basikumutobela kuti: “Amukacite obo kuti mukandiyeeye.” Ilya Ciibalusyo tuyeeya lufwu lwa Jesu, ilufwu lusumpula bweendelezi bwa Jehova. Kweelana ambuli mbotwabona, notucita mulalilo ooyu, cinkwa ciiminina cipaizyo camubili wabuntu wa Kristo, eelyo waini wiiminina bulowa bwakwe bwakatilwa. Pele basyoonto buyo mbabalya zitondezyo nkokuti cinkwa alimwi awaini. Ino nkaambo nzi ncocili boobu? Sena Ciibalusyo cilijisi mpindu kutuulunzuma twabantu tutalyi? Ee buya, ino Mulalilo wa Mwami ujisi mpindu nzi kulindinywe?

Bupanduluzi buyungizidwe

Ino Inga Mwaingula Buti?

• Ino nkaambo nzi Jesu ncaakatalisyila Mulalilo wa Mwami?

• Ino Ciibalusyo ceelede kucitwa ziindi zyongaye?

• Ino cinkwa citakwe bumena cibelesyegwa lya Ciibalusyo ciiminina nzi?

• Ino waini uubelesyegwa lya Ciibalusyo wiiminina nzi?

[Mibuzyo yaciiyo]

[Cifwanikiso icili apeeji 11]

Jesu wakatalisya Mulalilo wa Mwami