Syoma Jehova Amoyo Wako Woonse
Syoma Jehova Amoyo Wako Woonse
“Boonse bazi izina lyako balakusyoma.”—INTEMBAUZYO 9:10.
1, 2. Ino nzintu nzi zyabuyo bantu nzyobasyoma kuti inga zyabakwabilila?
MAZUBAANO, izintu zinji kuti zyatalika kunyonganya bukkale bwesu, cili kabotu kujana nzila yakulikwabilila. Ibamwi bayeeya kuti ikuba amali manji kulakonzya kuyoobakwabilila kumbele, pele masimpe ngakuti mali tacili ciyubilo cisyomwa pe. Ibbaibbele lyaamba kuti: “Uusyoma buvubi bwakwe ulawa.” (Tusimpi 11:28) Ibamwi basyoma basololi bantunsi, pele nobaba basololi bali kabotu abalo balalubizya. Eelyo boonse balafwa. Aboobo cabusongo Ibbaibbele lyaamba kuti: “Mutasyomi bami, na muntu waansi uutagwasyi.” (Intembauzyo 146:3) Imajwi aaya aakasololelwa amuuya alimwi alatucenjezya kumakani aakutalisyoma tobeni. Andiswe tuli buyo ‘bantu baansi.’
2 Imusinsimi Isaya wakabona kuti basololi bacisi ca Israyeli ibakali kupona mumazuba aakwe bakajisi mulandu nkaambo bakali kusyoma ‘maccijilo aabo aatwaambo twakubeja.’ (Isaya 28:15-17) Nobakali kuyandaula lukwabililo, bakapangana zizuminano amasi aakabazungulukide. Zipangano eezi tiizyakali kusyomwa pe, nkaambo zyakali zyakubeja. Mbubwenya buyo, mazubaano bunji bwabasololi bazikombelo balabamba zipangano abasololi bamapolitikisi. Izipangano eezyo azyalo ziyooba “zyakubeja.” (Ciyubunuzyo 17:16, 17) Kunyina noziyooleta lukwabililo luya koomoonga pe.
Icikozyanyo Cibotu ca Joshua Alimwi a Kalebe
3, 4. Ino mmakani nzi aayindene aakaletwa a Joshua a Kalebe alimwi abasikutwela bambi ibali kkumi kuzwa ku Nyika Yakasyomezyegwa?
3 Ino nkuli nkotukonzya kujana lukwabililo? Tulakonzya kulujana ooko Joshua alimwi a Kalebe nkobakalujana mumazuba aa Musa. Bana Israyeli mbubakalubudwa buyo kuzwa ku Egepita, icisi eeci cakalibambila kunjila mu Kanana, Inyika Yakasyomezyegwa. Ibaalumi bali 12 bakatumwa kuti bakatwele nyika. Nokwakainda mazuba aali 40, baalumi aaba bakapiluka kuti bazikuluule ncobakajana. Baalumi bobilo buyo, nkokuti Joshua alimwi a Kalebe mbebakaluula makani mabotu aakuti bana Israyeli balakonzya kuzwidilila kunjila mu Kanana. Aaba bamwi bakazumina kuti nyika yakali mbotu, pele bakati: “Bantu bakede munyika mbayumu, aminzi iili amabaya, alimwi mipati. . . . Tatukonzyi kuyoolwisya bantu abo, pe, nkaambo mbayumu kwiinda ndiswe.”—Myeelwe 13:27, 28, 31.
4 Bana Israyeli bakaamvwida makani ngobakaamba basikutwela bali kkumi akutalika kuyoowa, mane bakatalika kutongooka Musa. Kumane, Joshua alimwi a Kalebe cabusicamba bakaamba kuti: “Nyika eyo njitwakaakutwela ninyika imbotu loko. Na Jehova twamubotela, ulatunjizya munyika eyo akwiipa ndiswe, nyika iikunka malili abuci. Pele mutapapili Jehova, alimwi mutayoowi bantu banyika eyo.” (Myeelwe 14:6-9) Nokuba boobo, bana Israyeli kunyina nobakaswiilila pe. Akaambo kakucita boobu, tiibakazumizyigwa kunjila mu Nyika Yakasyomezyegwa ciindi eeco.
5. Ino nkaambo nzi Joshua alimwi a Kalebe ncobakaluula makani mabotu?
5 Ino nkaambo nzi kakapa kuti Joshua alimwi a Kalebe baluule makani mabotu kakuli aaba basikutwela bamwi bakaamba makani mabyaabi? Boonse basikutwela ibali 12 bakababona bantu baminzi eeyo kuti mbayumu alimwi acisi eeco cakalikkalikenyi. Aaba basikutwela ibali kkumi bakaliluleme ikwaamba kuti bana Israyeli tiibakali bayumu cakuti inga babazunda bantu aabo. Abalo ba Joshua alimwi a Kalebe bakalizyi oobo. Nokuba boobo, basikutwela ibali kkumi zintu bakazilanga munzila yabuntu. Joshua alimwi a Kalebe bakasyoma Jehova. Bakalibonena milimo yakwe yanguzu ku Egepita, ku Lwizi Lusalala alimwi amunselelo lya Mulundu wa Sinai. Akaambo kamakani aaya, nokwakainda makumi aamyaka aali mbwaabede, milimo iili boobu yakapa kuti Rahabu waku Jeriko alinjizye muntenda akaambo kakuyanda kukwabilila bantu ba Jehova. (Joshua 2:1-24; 6:22-25) Joshua alimwi a Kalebe ibakalibonena ameso milimo ya Jehova, bakalijisi lusyomo lwakuti Leza ulazumanana kulwanina bantu bakwe. Nokwakainda myaka iili 40, ncobakali kusyoma cakazuzikizyigwa ciindi zyalani lipya lyabana Israyeli ilyakali kusololelwa a Joshua nolyakeenda mu Kanana akwiizunda nyika eeyo.
Ncotweelede Kusyomena Muli Jehova Cakumaninina
6. Ino nkaambo nzi Banakristo sunu ncobali mukusunkwa, alimwi ino nguni ngobakonzya kusyoma?
6 ‘Muziindi eezi zikatazya,’ mbubwenya mbuli bwakali bana Israyeli, tuli mukulwana abasinkondoma batwiinda nguzu. (2 Timoteo 3:1) Tulasunkwa akutalilemeka, kumuuya alimwi ziindi zimwi akumubili buya. Swebo tolikke kunyina notukonzya kwiizunda misunko eeyo pe, nkaambo tiizwi kumuntu wabuyo-buyo pe, pele izwa kuli Diabolosi Saatani. (Ba-Efeso 6:12; 1 Johane 5:19) Ino nkuli nkotukonzya kujana lugwasyo? Mwaalumi uusyomeka wansiku wakapaila boobu kuli Jehova: “Boonse bazi izina lyako balakusyoma.” (Intembauzyo 9:10) Ikuti naa tumuzyi masimpe Jehova alimwi akumvwisya zina lyakwe ncoliiminina, tuyoomusyoma mbubwenya ba Joshua alimwi a Kalebe mbobakacita.—Johane 17:3.
7, 8. (a) Ino mbuti zilenge mbozitupa twaambo twakusyomena Jehova? (b) Ino twaambo nzi Ibbaibbele ntolipa tukonzya kutupa kusyoma Jehova?
7 Ino nkaambo nzi ncotweelede kusyoma muli Jehova? Joshua alimwi a Kalebe bakacita oobo munzila imwi nkaambo bakabona mbuli mbwaakatondezya nguzu zyakwe. Andiswe tulazibona nguzu zyakwe. Mucikozyanyo, amulange-lange milimo ya Jehova yakulenga iibikkilizya ajulu anyika alimwi atuulunzuma tuli mbotubede twamilalabungu. Inguzu zipati Jehova nzyeendelezya zitondezya kuti masimpe Ngusinguzuzyoonse. Notuyeeya zilenge zigambya kapati, tulakonzya kwaazuminizya makani Jobu ngaakaamba kujatikizya Jehova aakuti: “Nguni uukonzya kumukasya, ngwani uuzooamba kulinguwe kuti, Ucitanzi?” (Jobu 9:12) Masimpe, ikuti naa Jehova kali kulubazu lwesu, kunyina ngotweelede kuyoowa kujulu alimwi aanyika.—Ba-Roma 8:31.
8 Alimwi amulange-lange Ijwi lya Jehova, Ibbaibbele. Aaka kasensa kabusongo butamani ibwa Leza kalakonzya kutugwasya kuzunda micito iitaluzi akupona buumi bumukkomanisya Jehova. (Ba-Hebrayo 4:12) Tulakonzya kulizyiba zina lya Jehova alimwi akubona ncolyaamba kwiinda mu Bbaibbele. (Kulonga 3:14) Tulizyi kuti Jehova ulakonzya kuba kufwumbwa mbwayanda, mbuli Wisi siluyando, Mubetesi mululami naa kuba Silumamba uuzunda ikutegwa azuzikizye makanze aakwe. Alimwi tulabona mbuli jwi lyakwe mbolizuzikizyigwa. Mbotuyaabwiiya Jwi lya Leza, tulakonzya kwaamba mbuli bwakaamba sintembauzyo kuti: “Ndasyoma ijwi lyako.”—Intembauzyo 119:42; Isaya 40:8.
9. Ino mbuti cinunuzyo alimwi abubuke bwa Jesu mboziyumya lusyomo lwesu muli Jehova?
9 Icinunuzyo nkaambo akamwi ikakonzya kutupa kusyoma muli Jehova. (Matayo 20:28) Elo cilakkomanisya kaka ikuti Leza wakatuma Mwanaakwe ikuti azootufwide ikutegwa cibe cinunuzyo cesu! Alimwi cinunuzyo cilijisi nguzu kapati. Cilamanizya zibi zyoonse zyabantu beempwa akupilukila kuli Jehova camoyo woonse. (Johane 3:16; Ba-Hebrayo 6:10; 1 Johane 4:16, 19) Cibeela cimwi cijatikizyidwe mukubbadala cinunuzyo kwakali kubuka kwa Jesu. Maleele aaya akasinizyigwa amyaanda-myaanda yabakamboni iili mbwiibede, ikaambo akamwi ikapa kuti tusyome muli Jehova. Eeci ncisinizyo cakuti bulangizi bwesu buyoozwidilila.—Incito 17:31; Ba-Roma 5:5; 1 Ba-Korinto 15:3-8.
10. Ino ntwaambo nzi tutugeme tutupa kusyoma muli Jehova?
10 Ootu ntotwaambo tumwi buyo tutondezya ikaambo ncotukonzya alimwi ncotweelede kusyoma Jehova cakumaninina. Nkotucili atumbi alimwi tumwi tulamugama umwi aumwi wesu. Mucikozyanyo, ziindi zinji tulasikilwa bukkale bukatazya mubuumi bwesu. Mbotuyaabusoleka kuyandaula busolozi bwa Jehova ikutegwa tumane bukkale oobo, tulabona mbuli mbotugwasyigwa abusolozi oobo. (Jakobo 1:5-8) Mbotuyaabusyoma Jehova mubuumi bwabuzuba abuzuba akubona mbuli mbotugwasyigwa, ilusyomo lwesu mulinguwe lulayuma nta.
Davida Wakasyoma Muli Jehova
11. Ino mbukkale buli buti bwatakalesya Davida kusyoma muli Jehova?
11 Davida wamu Israyeli yansiku ngumwi wabaabo bakasyoma muli Jehova. Davida wakakongwa kapati a Mwami Saulo walo wakali kuyanda kumujaya alimwi abasikalumamba ba Filisti ibakali kuyanda kuzunda bana Israyeli. Pele, wakafwutuka alimwi akuzunda. Nkaambo nzi? Davida lwakwe ulapandulula ategwa: “Jehova ngumumuni wangu alufutuko lwangu. Ino ngwani ngwenjoowa? Jehova ninguzu zyabuumi bwangu. Ngwani ngwencija?” (Intembauzyo 27:1) Andiswe tuyoozwidilila ikuti naa katusyoma muli Jehova.
12, 13. Ino mbuti Davida mbwaakatondezya kuti tuleelede kusyoma muli Jehova nokuba kuti basikukazya balabelesya milaka yabo mbuli zilwanyo zyakutulwanya?
12 Ciindi cimwi Davida wakapaila kuti: “Swiilila ijwi lyangu, O Leza, mukukulilila kwangu; bamba buumi bwangu kuti ntayoowi basinkondoma. Ndiyubika kubuvwiyi bwabasizibi, akulupyopyongano lwabaabo bacita bubi, [balakwenga milaka yabo] mbuli mapanga, bafusa majwi aalula mbuli mivwi, kuti bafuse baluleme mumayubilo aabo.” (Intembauzyo 64:1-4) Tatuzyi masimpe cakapa kuti Davida alembe majwi aaya. Pele tulizyi kuti mazubaano basikukazya mbubwenya buyo ‘balakwenga milaka yabo’ kababelesya majwi aabo mbuli zilwanyo. ‘Balafwusa’ ku Banakristo baluleme majwi aakumulomo naa aalembedwe ibufwuswa “mivwi” ikutegwa banyonyoone mpuwo yesu. Ikuti naa twasyoma muli Jehova cakutazungaana, ino cinzi cikonzya kutobela?
13 Davida ulazumanana kwaamba ategwa: ‘Leza uyoobafwusa mivwi yakwe, nkabela uyooboongomokela kubayasa. Milaka yabo beni iyoobalebya. . . . Baluleme basekelele Jehova akuyuba mulinguwe.’ (Intembauzyo 64:7-10) Nokuba kuti basinkondoma balakwenga milaka yabo kulindiswe, kumamanino ‘milaka yabo beni iyoobalebya.’ Jehova uyoozisandula zintu, ikutegwa aabo basyoma mulinguwe bakonzye kukondwa.
Lusyomo lwa Hezekiya Lwakagwasya
14. (a) Ino muubukkale buli buti ibukatazya kapati Hezekiya mwaakatondezya kusyoma muli Jehova? (b) Ino mbuti Hezekiya mbwaakatondezya kuti tanaakasyoma makani aakubeja aakaambwa amuna Asuri?
14 Mwami Hezekiya awalo lusyomo lwakwe muli Jehova lwakagwasya. Hezekiya naakali kulela, basikalumamba basinguzu bana Asuri bakakanza kunyonyoona munzi wa Jerusalemu. Basikalumamba aabo bakazundide kale zisi zimwi zinji. Aminzi yoonse ya Juda yakazundidwe kale. Ciindi eeco kwakaceede buyo munzi wa Jerusalemu. Sanakeribu wakalidunda ikuti ulakonzya kuuzunda awalo munzi ooyo. Kwiinda mukubelesya Rabisake, wakaamba masimpe kuti ikusyoma Egepita tacigwasyi pe. Nokuba boobo alimwi wakati: “Leza wako ngosyoma atakweeni cakwaamba kuti, Jerusalemu tokooyooabwa mumaanza aamwami wa-Asuri.” (Isaya 37:10) Nokuba boobo, Hezekiya wakalizyi kuti Jehova tali silweeno pe. Aboobo wakapaila kuti: “O Jehova Leza wesu, utuvune kumaanza [a Asuri], kuti zisi zyoonse zyaansi zizibe kuti nduwe Jehova olike.” (Isaya 37:20) Jehova wakaumvwa mupailo wa Hezekiya. Buzuba bomwe buyo masiku, imungelo wakajaya basikalumamba bana Asuri ibali 185,000. Jerusalemu wakavwunwa, eelyo Sanakeribu wakazwa munyika ya Juda. Boonse aabo ibakamvwa makani aaya bakazyiba bupati bwa Jehova.
15. Ino ncinzi cilikke cikonzya kutugwasya kulibambila bukkale bukatazya buli boonse mbotukonzya kusikilwa munyika eeyi iicinca-cinca buyo?
15 Mazubaano mbubwenya mbuli Hezekiya, tuli munkondo. Inkondo yesu njakumuuya. Nokuba boobo, mbotuli basikalumamba bakumuuya tweelede kujana nzila mbotukonzya kufwutuka. Tweelede kulibambilidalyo ikulwanwa ikutegwa tukonzye kuzunda. (Ba-Efeso 6:11, 12, 17) Munyika eeyi izintu mozyicinca-cinca, ibukkale bulakonzya kucinca mukaindi kasyoonto buyo. Nkondo yamucisi momunya ilakonzya kubuka kaitayeeyelwi. Izisi zyali kuzumizya bukombi boonse kuzwa kaindi zilakonzya kutalika kukasya. Ccita kuti twalibambila kwiinda mukuba alusyomo lutazungaani muli Jehova mbuli bwakacita Hezekiya, notukonzya kulibambila kulwana cintu cili coonse cikonzya kucitika.
Ino Kusyoma Muli Jehova Caamba Nzi?
16, 17. Ino mbuti mbotutondezya kuti tulasyoma muli Jehova?
16 Ikusyoma muli Jehova takuli kwaamulomo buyo pe. Kulabikkilizya amoyo alimwi amumilimo iicitwa. Ikuti naa katusyoma muli Jehova, nkokuti tuyoosyoma cakumaninina mu Jwi lyakwe, Ibbaibbele. Tunoolibala abuzuba, kuzinzibala kuyeeya zili mumo alimwi akusololelwa andilyo mubuumi bwesu. (Intembauzyo 119:105) Ikusyoma Jehova alimwi kulabikkilizya akusyoma nguzu zyamuuya uusalala. Kwiinda mukugwasyigwa amuuya uusalala, tulakonzya kuzyala micelo iikkomanisya Jehova alimwi tulakonzya kuzunda ziyanza zibyaabi izikatazya kapati. (1 Ba-Korinto 6:11; Ba-Galatiya 5:22-24) Aboobo akaambo kanguzu zyamuuya uusalala, banji bacikonzya kucileka kufweba naa kubelesya misamu iikola. Ibamwi bacileka kupona buumi bwakutalilemeka. Ee, ikuti naa katusyoma muli Jehova, tulakonzya kubweza ntaamu kwiinda munguzu zyakwe ikutali zyesu pe.—Ba-Efeso 3:14-18.
17 Kunze lyaboobo, ikusyoma muli Jehova caamba kusyoma baabo mbasyoma walo. Mucikozyanyo, Jehova wakacita bubambe bwakuti “muzike musyomesi uucenjede” ayendelezye makani aajatikizya zya Bwami anyika. (Matayo 24:45-47) Tatusoli kulicitila zintu tolikke, nokuba kutabikkila maano kumuzike uusyomeka, nkaambo tulabusyoma bubambe bwa Jehova. Alimwi, kweelana amwaapostolo Paulo, ibaalu babeleka mumbungano zya Banakristo bakasalwa amuuya uusalala. (Incito 20:28) Kwiinda mukubelekelaamwi abubambe bwabaalu mumbungano alimwi tutondezya kuti tulasyoma muli Jehova.—Ba-Hebrayo 13:17.
Amutobele Cikozyanyo ca Paulo
18. Ino mbuti Banakristo sunu mbobatobela cikozyanyo ca Paulo, pele ino nkuunzi nkobasyomede?
18 Mwaapostolo Paulo wakajana buyumuyumu kapati mumulimo wakwe, mbubwenya mbuli ndiswe. Mumazuba aayo, Bunakristo bwakali kwaambwa mbotutabede kubeendelezi, eelyo ziindi zimwi wakasoleka kululamika twaambo twakubeja ooto ikutegwa mulimo wakukambauka kaucitwa mumulawo. (Incito 28:19-22; Ba-Filipi 1:7) Mazubaano Banakristo balatobela cikozyanyo cakwe. Ikuti cakonzyeka, tulabagwasya bantu kuti bazyibe mulimo wesu kwiinda mukubelesya nzila iikonzyeka. Tulasoleka kupandulula alimwi akusinizya makani mabotu munzila yeelede. Nokuba boobo, tatusyomi cakumaniina mukusoleka ooko pe, nkaambo tatuyeeyi kuti kuzwidilila kwesu kuyeeme akuzwidilila mumilandu kunkuta alimwi akuyandwa abuleya. Muciindi caboobo, tusyoma muli Jehova. Tulayeeya mbuli mbwaakakulwaizya bana Israyeli bansiku kuti: “Mukutontolelwa amulusyomo momuti jane inguzu.”—Isaya 30:15.
19. Ciindi nobapenzyegwa, ino mbuti bakwesu mbobagwasyigwa akaambo kakusyoma muli Jehova?
19 Ziindi zimwi mumazuba eesu, imulimo wabukambausi wakalikasyidwe ku Eastern alimwi aku Western Europe, muzibeela zimwi zya Asia alimwi amu Afulika kubikkilizya amuzisi zimwi izili mu South America alimwi aku North America. Sena eeci cipandulula kuti ikusyoma muli Jehova tiikwakali kugwasya? Peepe. Nokuba kuti ziindi zimwi ulazumizya kuti tupenzyegwe akaambo kamakanze aakwe, Jehova caluyando wabayumya aabo ibaliyumya nobapenzyegwa. Ciindi nobali mukupenzyegwa, Banakristo banji baba ampuwo yakusyomeka alimwi akusyoma muli Leza.
20. Nokuba kuti tulakonzya kugwasyigwa akaambo kakuzyibwa mumulawo, ino nimbazu nzi nzyotutakaubyi-ubyi?
20 Kubbazu limwi, muzisi zimwi tulizyibidwe mumulawo alimwi ziindi zimwi balatulumbaizya muzibelesyo zyakumwaila makani kubuleya. Tulalumba kapati kumakani aaya alimwi tulizyi kuti ikuzyibwa mumulawo ooku kuzuzikizya makanze aa Jehova. Kwiinda mukuzuminwa anguwe, tulalubelesya lwaanguluko lwesu ikutali mukusumpula bukkale bwesu, pele mukubelekela Jehova kubuleya mane kusikila mpotugolela. Nokuba boobo, tatukaubyi-ubyi kutatola lubazu kwesu mutwaambo twacisi, kuyaansi mumulimo wesu wakukambauka naa kulengaana munzila imwi mukubelekela Jehova ikutegwa tuyandwe abeendelezi. Tuli balelwa ba Bwami bwabu Mesiya alimwi tuli kulubazu lwabweendelezi bwa Jehova. Ibulangizi bwesu tabuli bwamubweende oobu pe, pele mbwamunyika mpya mwalo Bwami bwakujulu bwabu Mesiya mbobuyoolela buyo bulikke anyika eeyi. Imabbomba, azilwanyo zyakufwusa buya naa zyamanyukkiliya kunyina noziyookonzya kunyonyoona mfwulumende iili kujulu. Mfwulumende eeyo tiizundiki alimwi iyoozuzikizya makanze aa Jehova.—Daniele 2:44; Ba-Hebrayo 12:28; Ciyubunuzyo 6:2.
21. Ino ninzila nzi njotukanzide kutobela?
21 Paulo waamba kuti: “Swebo endiswe tuyoopiluka cifuteesule akufwa pe, ndiswe baabo abajisi kusyoma kuyoofutusya myuuya yesu.” (Ba-Hebrayo 10:39) Aboobo, toonse atubelekele Jehova kusikila kumamanino. Tulijisi kaambo katupa kuba alusyomo muli Jehova mazubaano alimwi kusikila kutamani.—Intembauzyo 37:3; 125:1.
Ino Mwaiya Nzi?
• Ino nkaambo nzi Joshua alimwi a Kalebe ncobakaluula makani mabotu?
• Ino ntwaambo nzi tumwi tutupa kuti tusyome muli Jehova cakumaninina?
• Ino kusyoma Jehova ncaamba nzi?
• Ino tweelede kuba amakanze aali buti akaambo kakusyoma muli Jehova?
[Mibuzyo yaciiyo]
[Cifwanikiso icili apeeji 28]
Ino nkaambo nzi Joshua alimwi a Kalebe ncobakaluula makani mabotu?
[Zifwanikiso izili apeeji 29]
Izilenge zilatupa kaambo kapati ikakusyomena Jehova
[Kulumba]
Izikozyanyo zyoonse zyotatwe zyakazwa zyakazumizyigwa aba: Anglo-Australian Observatory, photograph by David Malin
[Cifwanikiso icili apeeji 31]
Ikusyoma muli Jehova caamba kusyoma baabo mbasyoma