Amube “Babombe-moyo Kubantu Boonse”
Amube “Babombe-moyo Kubantu Boonse”
“Kobayeezya kuti . . . babe batontozi akuba babombe-moyo kubantu boonse.”—TITO 3:1, 2.
1. Ino nkaambo nzi ncocitali cuuba-uba lyoonse ikubomba?
IMWAAPOSTOLO Paulo wakalemba kuti: “Amwiiye ndime, mbubonya mbuli ambebo mbundaiya Kristo.” (1 Ba-Korinto 11:1) Babelesi ba Leza boonse balasoleka canguzu kutobela lulayo oolu. Ikwaamba masimpe eeci tacili cuuba-uba pe, nkaambo twakakona ciimo cibi cabazyali besu bakusaanguna cakuliyanda alimwi abube buteendelani acikozyanyo ca Kristo. (Ba-Roma 3:23; 7:21-25) Pele, caboola kumakani aakubomba, toonse tulakonzya kuzwidilila ikuti naa twasolekesya. Pele ikulibesya nguzu zyesu tolikke takuzulide pe. Ino ncinzi acimwi ciyandika?
2. Ino mbuti mbotukonzya kuba “babombe-moyo kubantu boonse”?
2 Ikubomba kwabuna Leza ncibeela camicelo yamuuya uusalala. Mbotuyaabutobela nguzu zya Leza zibeleka, imicelo yawo inooyaabulibonya mulindiswe. Ikuti twacita oobo, notuyookonzya kuba “babombe-moyo” kubantu boonse. (Tito 3:2) Atubone mbuli mbotukonzya kwiiya cikozyanyo ca Jesu ikutegwa aabo mbotuyanzana limwi bakonzye ‘kukatalukwa.’—Matayo 11:29; Ba-Galatiya 5:22, 23.
Mumukwasyi
3. Ino mbukkale nzi bwamumukwasyi ibutondezya muuya wanyika?
3 Imukwasyi ncibeela cimwi ikubomba mmokuyandika kapati. Imbunga iitegwa World Health Organization yeezyeezya kuti ilunya mumukwasyi njentenda iiyoosya kapati mubuumi bwamukaintu kwiinda ntenda yamumugwagwa kubikkilizya abulwazi bwantuntumaanzi. Mucikozyanyo mu London ku England, akati kamilandu yalunya iilipootwa, 25 pasenti njamumukwasyi. Ziindi zinji, basilikani balajana bantu ibatondezya mbuli mbobalimvwide kwiinda ‘mukukalala akubelesya matusi.’ Ciinda kubija ncakuti, banabukwetene bamwi “nduti-luti akunyema” bwaba mbobuumi, calo canyonganya cilongwe cabo. Ikulilemeka ooku kutondezya “muuya wa[nyika]” mubi kapati, walo uutayandiki mumikwasyi ya Banakristo.—Baefeso 4:31, Ci; 1 Ba-Korinto 2:12.
4. Ino mbubotu nzi bukonzya kuboola mumukwasyi akaambo kakubomba?
4 Ikutegwa tulikwabilile kumicito yamunyika, tuyandika muuya wa Leza. “Kufwumbwa Muuya wa Mwami nkuubede kuli lwaangunuko.” (2 Bakolinti 3:17, Ci) Luyando, luse, kulyeendelezya akukkazyika moyo zilayumya lukamantano lwabanabukwetene batalondokede. (Ba-Efeso 5:33) Ikubomba moyo kuleta luumuno mumukwasyi ikwiinda bukkale bwakuzwangana ibuli mukunyonganya mikwasyi minji sunu. Imuntu ncaamba cilayandika kapati, pele mbwacaamba bulatondezya mbwalimvwide mumoyo. Izintu zimukatazyide alimwi anzyalibilika izyaambwa cakubomba zilacesya kuzwangana. Mwami musongo Solomoni wakalemba kuti: “Kuvuwa kabotu kulalesya bukali, pele majwi mabi alabusya inkondo.”—Tusimpi 15:1.
5. Ino kubomba inga kwagwasya buti amunzi uujisi bantu baunka kuzikombelo ziindene-indene?
5 Ikubomba kulayandika kapati amunzi uujisi bantu baunka kuzikombelo ziindene-indene. Kubomba amilimo iicitwa caluse, kulakonzya kusandula baabo bakazya kutegwa baboole kuli Jehova. Petro wakabalaya bamakaintu Banakristo kuti: “Amulibombye kubalumi banu nobeni, kuti kwanooli bamwi bataswiililisyi kumakani, basanduke nkaambo kanyendelo zyabakazi babo, kuti tabaambilwi zintu, kukulangilila inyendelo zyanu zisalala nzimweendela cakuyoowa. Kulisakatizya kwanu kutabi kwaatala, kwakupesa masusu akusama ingolida akusamisya masini, akube kwamukati kamoyo, nkokuti lulisakatizyo lwamoyo mubombe mutontozi, uuyandika loko mumeso aa-Leza.”—1 Petro 3:1-4.
6. Ino mbuti kubomba mbokukonzya kuyumya cilongwe akati kabazyali abana?
6 Icilongwe akati kabazyali abana cilakonzya kunyongana ikapati ikuti naa kakutakwe uumuyanda Jehova. Pele mumikwasyi ya Banakristo yoonse, ikubomba kulayandika kapati. Paulo wakalaya bamawisi kuti: “Mutanookalalili akunyemya bana banu cabuyo, pele amubalele mukubaiisya akubalailila munzila ya Mwami.” (Baefeso 6:4, Ci) Ikuti naa kubomba kakutondezyegwa mumukwasyi, icilongwe akati kabazyali abana cilayuma. Dean, umwi wabana bali bosanwe mboobu mbwabayeeya bawisi: “Bataata bakali babombe moyo. Tandiyeeyede naa kuli notwakazwangana, nociba ciindi nindakacili mukubusi. Bakali babombe kufwumbwa ciindi nobacimidwe. Ziindi zimwi bakali kundisubula kwiinda mukundijalila muŋanda yangu yakoona naa kundikasya zintu zimwi zindakali kuyandisya, pele kunyina notwakali kuzwangana. Tiibakali Bataata buyo pe, kumwi bakali beenzuma buya, alimwi tiitwakali kuyanda kubatyompya.” Masimpe, kubomba kulagwasya mukuyumya cilongwe akati kabazyali abana.
Mumulimo Wesu
7, 8. Ino nkaambo nzi kuba babombe mumulimo wamumuunda ncokuyandika kapati?
7 Icibeela acimwi kubomba mmokuyandika kapati mmuumulimo wamumuunda. Mbotuyaacaambila bantu makani mabotu aa Bwami, tulaswaanganya bantu ibajisi bube bwiindene-indene. Ibamwi balautambula kabotu mulumbe wabulangizi ngotubatolela. Ibamwi akaambo katwaambo tumwi tabauzumini pe. Eeci nceciindi ibube oobu nobugwasya kapati mukuzuzikizya mulimo ngotupedwe wakuba bakamboni mane kusikila kumagolelo aanyika.—Incito 1:8; 2 Timoteo 4:5.
8 Mwaapostolo Petro wakalemba kuti: “Amulemeke Kristo mumyoyo yanu kuti ngo-Mwami. Amube balibambide lyoonse, kuti mubapandulwide boonse bamubuzya makani aalusyomo lumukalilide, pele amuvuwe amoyo mutete akuyoowa Leza.” (1 Petro 3:15) Akaambo kakuti tulisinizyide kuti Kristo Ncecikozyanyo cesu, tulatondezya kubomba abulemu notukambaukila baabo ibaambaula calunya kulindiswe. Ikulilemeka munzila iili boobu kuletela mpindu zitaliboteli.
9, 10. Amuluule cakacitika icitondezya mbuli mbokuyandika kapati kubomba mumulimo wamumuunda.
9 Keith wakacaala mukati ciindi mukaintu wakwe naakaunka kukulanga muntu wakali kukonkomona. Naakajana kuti uukonkomona ngumwi wa Bakamboni ba Jehova, cabukali wakatamikizya Bakamboni kuti mbantu basilunya kubana. Imukwesu tanaakanyongana pe. Mujwi libombede, wakavwiila kuti: “Cabija kapati kuti mbomubayeeyela oobo. Sena inga ndamupanduluda Bakamboni ba Jehova ncobasyoma?” Keith wakaliswiilide nzyobakali kubandika, eelyo wakaboola akumutanda mukwesu ooyu.
10 Kumane, banabukwetene aaba bakausa kapati nkaambo mweenzu wabo tiibakamulanganya pe. Ikubomba kwakwe kwakabakopa. Bakagambwa kapati ikuti mukwesu ooyu wakapilukila alimwi nokwakainda mvwiki, eelyo Keith amukaintu wakwe bakamuzumizya kuti apandulule nzyasyoma kuzwa mu Magwalo. Kumbele bakazyi kwaamba kuti: “Kwamyaka yobilo, twakali kuswiilila Bakamboni nzyobakali kwaamba.” Bakazumina kwiiya Bbaibbele, eelyo kumbele boonse bobilo bakabbapatizyigwa ikutondezya kulyaaba kwabo kuli Jehova. Elo kaka Kamboni ooyo wakaswaya Keith amukaintu wakwe kusaanguna wakazwidilila! Kumbele Kamboni ooyo wakabaswaanganya banabukwetene aaba akujana kuti lino bakali banyina bakumuuya. Ikubomba kulagwasya.
11. Ino mbuti kubomba mbokukonzya kugwasya muntu ikuzumina kasimpe?
11 Izyakacitikila Harold naakali sikalumamba zyakapa kuti abije moyo akudooneka ikuti naa Leza nkwali. Imapenzi akavwula kapati nokwakacitika ntenda yamumugwagwa yakacitika akaambo kanamutekenya wakakoledwe calo cakapa kuti Harold alemane. Bakamboni ba Jehova nobakamuswaya, Harold wakabaambila kuti batakamuswayi kabili. Pele, buzuba bumwi Kamboni uutegwa Bill wakaunka kukuswaya muntu wakatondezya luyandisisyo wakali kukkala amulyango watatu kuzwa ali Harold. Kakunyina kuzyiba, Bill wakakonkomona aŋanda ya Harold. Harold naakaboola kuzoomujaluda kumwi keenzya nkoli, Bill wakalilekelela cakufwambaana kwiinda mukupandulula kuti wali kuyanda kuswaya ŋanda iimbi. Ino Harold wakacita buti? Bill kunyina ncaakazyi ikuti Harold wakaswiilila akweebelela makani acipekupeku akatondezya Bakamboni kababeleka antoomwe ikuyaka Ŋanda ya Bwami akwiimanizya mukaindi kasyoonto buyo. Akaambo kakukondwa kapati naakabona bantu banji kababeleka calukamantano, cakapa kuti acince akutalika kubayanda Bakamboni. Ikulibombya kwa Bill naakali kulilekelela kwakamunjila Harold, eelyo wakazumina kuswaigwa a Bakamboni. Wakatalika kwiiya Bbaibbele akuyaambele kapati, eelyo wakaba mubelesi wa Jehova uubbapatizyidwe.
Mumbungano
12. Ino mbukkale buli buti aabo ibali mumbungano ya Banakristo mbobeelede kweeleba?
12 Icibeela catatu ikubomba mmokuyandika kapati mmuumbungano ya Banakristo. Ikuzwangana kulidumide munyika. Kukazyanya akuzwangana mbobukkale bwabantu balanga buumi ikutali munzila yakumuuya. Ziindi zimwi, ibukkale oobu bwakunyika bulakonzya kunjila mumbungano ya Bunakristo akulibonya kwiinda mukuzwangana. Ibakwesu bajisi mikuli balausa kapati nobabamba twaambo tuli boobu. Pele, ikuyanda Jehova alimwi abanyina kulabakulwaizya ikusoleka kugwasya baabo ibalubizya kuti beempwe akucinca mizeezo yabo.—Ba-Galatiya 5:25, 26.
13, 14. Ino ncinzi cikonzya kutobela akaambo “[ka]kujokolola camoyo mubombe akweenzya baabo bakazya makani”?
13 Mumwaanda wamyaka wakusaanguna, Paulo amweenzinyina Timoteo bakajana buyumuyumu kubantu bamwi mumbungano. Paulo wakacenjezya Timoteo kuti weelede kubacenjelela ibakwesu ibakozyanya ‘amitiba iitakwe bulemu.’ Wakati: “Muna-Mwami teelede kulwana pe, uleelede kuba mutete-moyo kubantu boonse, uulibambilide kufundisya, akubosya moyo. Uleelede kujokolola camoyo mubombe akweenzya baabo bakazya makani.” Ikuti naa twazumanana kuba babombe nociba ciindi notwakazyigwa, aabo ibatukazya ziindi zinji balaliyeeya kumakani ngobaamba. Akaambo kaboobo, kweelana mbuli Paulo mbwazumanana kulemba, Jehova ulakonzya “[kubapa] lweempo lwakuziba lusinizyo.” (2 Timoteo 2:20, 21, 24, 25) Amubone kuti ulakuswaanganya kujokolola moyo alimwi akubomba.
14 Paulo wakali kuzicita nzyaakali kukambauka. Ciindi naakali kwaamba “baapostolo bapati cakwiinda” ibakali mumbungano ya Banakristo, wakakulwaizya bakwesu kuti: ‘Ndamukumbila mebo ndemwini kukubomba akuluzyalo lwa Kristo. Ndime Paulo, oyo uubombede kubusyu bwanu ciindi ncendiwo pele ndaamba kaanzambwene ciindi nenditako.’ (2 Ba-Korinto 10:1; 11:5) Masimpe Paulo wakamwiiya Kristo. Amubone kuti wakabalomba ibakwesu aaba ‘mukubomba’ kwa Kristo. Aboobo tanaakayanda kubadyaaminina naa kucita kamikami pe. Cakutadooneka, ilulayo lwakwe lwakabakkomanisya aabo ibakali mumbungano ibakalibambide kucinca. Wakagwasya kuti alimwi batalike kumvwana akutalisya luumuno alukamantano mumbungano. Sena eeyi taili nzila njotweelede kusoleka kutobela toonse? Ikapati baalu beelede kubamba zintu mbuli bwakacita Kristo alimwi a Paulo.
15. Ino nkaambo nzi kubomba ncokuyandika kapati ciindi cakupa lulayo?
15 Imukuli wakugwasya bantu bamwi tauyandiki buyo ciindi nokutakwe luumuno alukamantano mumbungano. Icilongwe nocitananyongana, ibakwesu beelede kupedwa limwi busolozi munzila yaluyando. Paulo wakakulwaizya kuti: “Bakwesu, kuti muntu wajanwa uli mukubisya, nywebo nomuli basimuuya muleelede kumuboozya.” Munzila nzi? “Muleelede kuba amyoyo iibombede, ikuti umwi aumwi akati kanu uleelede kulilanga mwini, nkaambo inga ulatepaulwa alakwe.” (Ba-Galatiya 6:1) Ikuba “amyoyo iibombede” lyoonse tacili cuuba-uba pe, ikapati nkaambo Banakristo boonse kubikkilizya abaalumi basalidwe abalo balabisya. Pele ikubomba nkokukonzya kubagwasya aabo ibabisya ikutegwa bacince.
16, 17. Ino ncinzi cikonzya kugwasya ikutegwa lulayo lutakakwi?
16 Ibbala lya Cigiliki lisanduludwe kuti ‘kuboozya’ lilakonzya kwaamba kululamika naa kuzyibikka kabotu zifwuwa zityokede, icintu cicisa kapati. Musilisi uucibwene kululamika cifwuwa catyoka ulaamba bubotu bwanzila iibelesyegwa. Ikusitikila kwakwe kulaumbulizya. Imajwi masyoonto ngaamba katana talika mulimo alakonzya kumutontozya uutyokede. Mubwenya buyo, ikululamikwa kumuuya kulakonzya kucisa kapati. Pele kubomba kuyoopa kuti azumine, eelyo akuba balongwe babotu, calo ciyoogwasya yooyo wabisya kuti acince mizeezo yakwe akupiluka. Nokuba kuti kumatalikilo lulayo lulakonzya kukakwa, ikubomba kwayooyo uulupa kuyoogwasya kumana twaambo tukonzya kupa kuti umwi akake kutobela lulayo lwamu Magwalo.—Tusimpi 25:15.
17 Ciindi nomugwasya bamwi kuti bacince mizeezo, kuli kuyoowa kuti ambweni lulayo lulakonzya kuboneka mbuli kuti nkusampaula umwi. Mulembi umwi wakacaamba boobu: “Notupa bamwi lulayo kuli ntenda yakukonzya kutalika kubasungilizya, aboobo ikuba amoyo mutete kulayandika kapati.” Ikubomba ikuboola akaambo kakulibombya kulakonzya kugwasya Munakristo uupa lulayo ikutatobela cilengwa eeci.
“Kubantu Boonse”
18, 19. (a) Ino nkaambo nzi ncocikonzya kubayumina Banakristo ikuba babombe ciindi nobacita zintu abeendelezi bamunyika? (b) Ino ncinzi cikonzya kugwasya Banakristo ikuba babombe kubeendelezi, alimwi ino ncinzi cikonzya kutobela?
18 Icibeela cimwi bamwi cibakatazya ikuba babombe nciindi nobacita zintu abeendelezi bamunyika. Masimpe, ibamwi bali mubweendelezi nzyobacita zilatondezya kuti mbaasilunya alimwi tababikkili maano kubantunyina. (Mukambausi 4:1; 8:9) Nokuba boobo, ikuyanda Jehova kuyootugwasya kuzyiba bweendelezi bwakwe bupati, eelyo akulibombya bweelede kubeendelezi ibali mumfwulumende. (Ba-Roma 13:1, 4; 1 Timoteo 2:1, 2) Nociba ciindi aabo ibali muzyuuno zyaatala nobasola kutukasya kukomba Jehova, tulajana nzila zimbi zyakukonzya kupa cipaizyo cesu cakulumba.—Ba-Hebrayo 13:15.
19 Kunyina bukkale ibukonzya kutupa kuba basilunya pe. Tulasoleka ikuba amizeezo mibotu, pele kunyina notuyooubya-ubya njiisyo ziluleme. Kwiinda munzila njiyonya eeyi, ibakwesu bazwidilila mumulimo wabo muzisi zili 234. Tutobela lulayo lwa Paulo lwakuti: “Kabanga kabalitesya kubabetesi akubami, kabacita coonse ncobaambilwa kulimbabo, akucita cintu ciluzi coonse. Batanoosampaula muntu pe, batabi bandwane, pele ababe batontozi, akuba babombe-moyo kubantu boonse.”—Tito 3:1, 2.
20. Ino mbulumbu nzi mbobayoopegwa aabo babombede?
20 Zilongezyo zinji zilabalindila boonse ibabombe. Jesu wakaamba kuti: “Bali acoolwe abo balibombya, nkaambo bazoovuba nyika.” (Matayo 5:5) Kubanyina Jesu bananike, ikubomba lyoonse cibapa kuti kabakkomenyi akuba acoolwe cakuyoolela mu Bwami buyoolela anyika. Pele ikujatikizya “inkamu impati” ya “mbelele zimwi,” balazumanana kuba babombe akulangila buumi mu Paradaiso aano anyika. (Ciyubunuzyo 7:9; Johane 10:16; Intembauzyo 37:11) Elo kaka bulangizi oobu mbubotu! Aboobo tutalubi Paulo ncaakayeezya Banakristo baku Efeso ikuti: “Lino mebo, ndemwaange nkaambo kamakani aa-Mwami, ndamukombelezya kuti inzila njimweendelamo ibote cakweelela bwiite mbumwakaitilwa. Amweende cakulibombya acakulitola ansi.”—Ba-Efeso 4:1, 2.
Ikwiinduluka
• Ino nzilongezyo nzi ziboola akaambo kakubomba
• mumukwasyi?
• mumulimo wamumuunda?
• mumbungano?
• Ino nzilongezyo nzi zisyomezyedwe baabo ibabombe myoyo?
[Mibuzyo yaciiyo]
[Cifwanikiso icili apeeji 25]
Ikubomba kulayandika kapati amunzi uujisi bantu baunka kuzikombelo ziindene-indene
[Cifwanikiso icili apeeji 25]
Kubomba kulayumya lukamantano mumukwasyi
[Cifwanikiso icili apeeji 27]
Amwiingule cakubomba acabulemu
[Cifwanikiso icili apeeji 28]
Ikubomba kwasikupa lulayo kulakonzya kugwasya yooyo wabisya