Ikubomba Mbube Buyandika Kapati ku Banakristo
Ikubomba Mbube Buyandika Kapati ku Banakristo
“Amulisamike . . . lubombo.”—BA-KOLOSE 3:12.
1. Ino ncinzi cipa kuti kubomba kabuli bube buyandika kapati?
IMUNTU mubombe tulakonzya kumwaamba kuti ngomuntu mubotu kukkala limwi. Nokuba boobo, Mwami musongo Solomoni wakaamba kuti: “Lulimi lutete lulabombya zifuwa.” (Tusimpi 25:15) Kubomba mbube buyandika kapati ibujisi kubotelwa alimwi anguzu.
2, 3. Ino kubomba alimwi amuuya uusalala ziswaangenyi buti, alimwi ino ncinzi ncotutiilange-lange mucibalo eeci?
2 Mwaapostolo Paulo wakakubikkilizya kubomba mumulongo wa “micelo ya-Muuya,” iijanika kulugwalo lwa Ba-Galatiya 5:22, 23. Ibbala lya Cigiliki lisanduludwe kuti “lubombo” muzibeela zimwi zya Bbaibbele lisanduludwe kuti ‘kubomba moyo.’ Kaambo nkakuti cilakatazya kapati ikujana bbala lyeelana abbala eeli lya Cigiliki mumisyobo minji, nkaambo bbala eeli talyaambi buyo kubomba kwamuntu kuboneka ameso pe, pele nkubomba kwamumoyo kubikkilizya aluzyalo ndwajisi; ikutali mbuli mbwalilemeka pe, pele mbwabede mumizeezo alimwi amumoyo.
3 Ikutegwa tumvwisye kapati ncocipandulula alimwi ambokuyandika kubomba, atulange-lange zikozyanyo zili mu Bbaibbele zyone. (Ba-Roma 15:4) Ikulanga-langa zikozyanyo eezi takukatuyiisyi buyo ncokwaamba kubomba pe, pele kuyootuyiisya ambotukonzya kuba babombede mubukkale bwesu boonse.
“Uuyandika Loko Mumeso aa-Leza”
4. Ino mbuti mbotukonzya kuzyiba kuti Jehova ulakubikkila maano kapati kubomba?
4 Mbwaanga kubomba ncibeela camicelo yamuuya wa Leza, cileelela kukubona kuti kuliswaangenyi kapati abube bwa Leza butaliboteli. Mwaapostolo Petro wakalemba kuti: “Moyo mubombe mutontozi, u[la]yandika loko mumeso aa-Leza.” (1 Petro 3:4) Ee, kubomba mbube butondezyegwa a Jehova, aboobo ulakubikkila maano kapati. Masimpe, kaambo aaka kukagama kalabakulwaizya babelesi ba Leza ikuba bantu babombe. Pele ino mbuti Leza Singuzuzyoonse mububumbo boonse mbwatondezya kubomba?
5. Akaambo kakubomba kwa Jehova, ino mbulangizi nzi mbotujisi?
5 Ciindi ba Adamu a Eva nibakasotoka mulawo uulimvwisya wakuti tabeelede kulya mucelo wakuzyiba bubotu abubi, bakacita caali. (Matalikilo 2:16, 17) Ikutaswiilila ooku kwakaleta cibi, lufwu alimwi akumana cilongwe cabo kuli Leza akubana mbobakali kuyoozyala. (Ba-Roma 5:12) Nokuba kuti Jehova wakalijisi kaambo kakkwenyi kakubabeteka boobo, kunyina naakayeeya kuti bantu boonse tabaciyandiki kabili alimwi tabakonzyi kunununwa pe. (Intembauzyo 130:3) Muciindi caboobo, kwiinda muluzyalo lwakwe alimwi akulisungula kakunyina kuyanda zintu zimwi kubantu, Jehova wakatondezya kubomba kwiinda mukupa nzila yakuti bantu basizibi bakonzye kupilukila kulinguwe kutegwa abakkomanine. Inzya, kwiinda mucipego cacinunuzyo cacipaizyo ca Mwanaakwe Jesu Kristo, Jehova wakapa kuti cikonzyeke kusika kucuuno cakwe cisumpukide kakunyina kuyoowa.—Ba-Roma 6:23; Ba-Hebrayo 4:14-16; 1 Johane 4:9, 10, 18.
6. Ino mbuti kubomba mbokwakalibonya munzila Leza mbwaakeendelezya Kaini?
6 Kakucili ciindi cilamfwu kuti Jesu aboole anyika, kubomba kwa Jehova kwakalibonya ciindi bana ba Adamu, Kaini a Abelo nobakapa zipaizyo kuli Leza. Jehova naakabona myoyo yabo mboyakabede, wakacikaka cituuzyo ca Kaini, pele ‘wakabotelwa’ a Abelo alimwi acituuzyo cakwe. Akaambo kakuti Leza wakakondwa a Abelo uusyomeka alimwi acipaizyo cakwe, eeci cakamukalazya Kaini. Ibbaibbele lyaamba kuti: “Kaini wakakalala loko, abusyu bwakwe bwakasyulungana.” Ino Jehova wakacita buti? Sena wakabijilwa akaambo kamoyo wa Kaini? Peepe. Cakubomba wakamubuzya Kaini ikaambo kakamupa kukalala. Mane Jehova wakamwaambila Kaini ncaakeelede kucita ikutegwa ‘citambulwe cipaizyo’ cakwe. (Matalikilo 4:3-7) Masimpe, Jehova ulatondezya bube bwakubomba munzila iilondokede.—Kulonga 34:6.
Ikubomba Kulakwelelezya Alimwi Akukatalusya
7, 8. (a) Ino mbuti mbotukonzya kukumvwisya kubomba kwa Jehova? (b) Ino majwi aalembedwe kubbuku lya Matayo 11:27-29 ayubununa nzi kujatikizya Jehova alimwi a Jesu?
7 Inzila imwi iinda kubota mbotukonzya kumvwisya bube bubotu bwa Jehova nkwiinda mukwiiya buumi alimwi amulimo wa Jesu Kristo. (Johane 1:18; 14:6-9) Naakali mu Galilaya mumwaka wabili kakambauka, Jesu wakacita milimo mipati mu Korazini, Betsaida, Kapernauma amumasena ali aafwaafwi-fwaafwi. Pele bantu banji bakali kulisumpula, kutabikkila maano alimwi akutasyoma. Ino Jesu wakacita buti? Nokuba kuti wakabayeezya cakusinizya icakali kukonzya kutobela akaambo kakutasyomeka kwabo, wakabafwida luzyalo aabo babombe ibantu buyo ibakali aakati kabo akaambo kaciimo cabo cakumuuya.—Matayo 9:35, 36; 11:20-24.
8 Jesu mbwaakazoocita wakatondezya kuti ‘wakalimuzyi Wisi,’ eelyo wakamwiiya. Jesu wakabatamba bantu buyo kati: “Amuboole kulindime nyoonse nomukatede nomulemenwa, ndime enti kamulemunune. Amulikulike ijokwe lyangu, mwiiye kwangu, nkaambo ndilibombede, ndi mutete moyo, lino mulakatulukwa mumyoyo yanu.” Elo kaka majwi aaya akabaumbulizya akubakatalusya aabo ibakalemedwe alimwi akudyaamininwa! Andiswe alatuumbulizya akutukatalusya mazubaano. Ikuti naa katuli babombe ncobeni, tuyooba akati kabaabo ‘Mwana mbayooyubunuda’ Bawisi.—Matayo 11:27-29.
9. Ino mbube nzi buswaangenyi akubomba, alimwi ino mbuti Jesu mbwali cikozyanyo cibotu mumakani aaya?
9 Ikubomba kuliswaangenyi kapati akulibombya, nkokuti ikuba “mutete moyo.” Kubbazu limwi, kulisumpula kulakonzya kupa kuti muntu atalike kulibikka akalo kansimbi alimwi ziindi zinji kupa kuti bamwi kabeendelezya calunya. (Tusimpi 16:18, 19) Jesu wakali kulibombya mumulimo wakwe woonse waanyika. Nociba ciindi Jesu naakanjila mu Jerusalemu kakuceede buyo mazuba aali cisambomwi kuti ajayigwe alimwi nokuba kuti wakatambulwa camaanza obilo kali Mwami waba Juda, wakaindana kapati abaleli banyika. Wakazuzikizya businsimi bwa Zekariya bujatikizya Mesiya bwakuti: “Langa! ngooyu mwami wako uuboola kulinduwe. Ulibombede! Ulitantide ambongolo, ulitantide amwana wambongolo.” (Matayo 21:5; Zekariya 9:9) Musinsimi uusyomeka Daniele wakabona cilengano Jehova kali mukupa nguzu zyabweendelezi ku Mwanaakwe. Pele mubusinsimi bwakusaanguna wakamupandulula Jesu kuti wakali “muntu uubombede.” Masimpe, kubomba alimwi akulibombya ziliswaangenyi kapati.—Daniele 4:17; 7:13, 14.
10. Ino nkaambo nzi kubomba kwa Banakristo ncokutapandululi kubula nguzu?
10 Ikubomba Jehova a Jesu nkobakatondezya kulatugwasya kutegwa tubambe cilongwe ambabo. (Jakobo 4:8) Pele, kubomba tacipandululi kuti muntu tajisi nguzu buya pe. Nkaambo Jehova Leza singuzuzyoonse ulijisi nguzu kapati. Ibukali bwakwe bulabuka kuli baabo ibataluleme. (Isaya 30:27; 40:26) Awalo Jesu wakayuminina kumakanze aakwe aakuti takapiluki musyule pe, kufwumbwa Diabolosi Saatani amupenzye buti. Tanaakazumizya makwebo aateelede aakali kucitwa abeendelezi babukombi bamumazuba aayo. (Matayo 4:1-11; 21:12, 13; Johane 2:13-17) Pele, wakazumanana kubabombela basikwiiya bakwe ciindi nobakali kulubizya alimwi tanaakali kucimwa akaambo kakukompama kwabo. (Matayo 20:20-28) Sikwiiya Bbaibbele umwi, ikubomba wakakupandulula boobu: “Ibube oobu bwakubomba mbuyumu mbuli bbwe luuma.” Aboobo atutondezye bube oobu ibuli mbuli bwa Kristo ibwakubomba.
Musa Ngowakali Muntu Wiinda Kubomba Moyo Mumazuba Ngaakali Kupona
11, 12. Kweelana mbwaakakomezyegwa Musa, ino ncinzi cakapa kuti abe muntu wiinda kubomba?
11 Icikozyanyo catatu ncotutiilange-lange ncica Musa. Ibbaibbele limupandulula kuti wakali “mubombemoyo kwiinda bantu boonse baansi.” (Myeelwe 12:3) Ibupanduluzi oobu bwakalembwa kwiinda mubusolozi bwamuuya wa Leza. Ikubomba kwa Musa kwakamupa kuti akonzye kuzumina busolozi bwa Jehova.
12 Ikukomena kwa Musa kwakaliindene kapati akwabamwi. Jehova wakabona kuti wakwabililwa mwana ooyu musankwa wabazyali bana Hebrayo basyomeka muciindi eeco cakukatazyigwa akujaya. Musa wakakomena mumaanza aabanyina, balo ibakamuyiisya kabotu-kabotu kujatikizya Leza mwini-mwini Jehova. Kumane Musa wakatolwa kumunzi uumbi wakaindenyi kapati ankwaakakomenena. Umwi Munakristo wakafwida makani aa Leza uutegwa Stefano wakaluula kuti: “Musa wakaiisigwa busongo boonse bwa-Egepita, wakaba anguzu kumajwi akumilimo yakwe.” (Incito 7:22) Ilusyomo lwakwe lwakalibonya ciindi naakabona mbuli bazike ba Farao mbobakali kucitila banyina cakutalulama. Akaambo kakuti wakajaya muna Egepita iwakali kuuma mu Hebrayo, Musa wakaccija kuzwa ku Egepita akuunka kunyika ya Midyani.—Kulonga 1:15, 16; 2:1-15; Ba-Hebrayo 11:24, 25.
13. Ino kukkala kwamyaka iili 40 ku Midyani kwakapa kuti Musa abe muntu uuli buti?
13 Musa naakakkwanya myaka iili 40, wakali kulilela munkanda. Ku Midyani, wakaswaanganya bana basimbi ba Reueli ibali ciloba, eelyo wakabagwasya kuteka meenda aakunywisya tanga pati lyambelele zyabawisi. Nibakajokela kumunzi, basimbi aaba bakaluula cakukkomana kuli Reueli kuti, “muntu mu-Egepita” wakabavwuna kubeembezi. Naakaitwa a Reueli, Musa wakazumina kukkala amukwasyi ooyu. Imapenzi ngaakajana kunyina naakapa kuti abijilwe kapati pe; nokuba kumulesya kucinca buumi bwakwe kubweenzu. Ikulombozya kucita kuyanda kwa Jehova kunyina nokwakaya aansi pe. Mumyaka iili 40 kali mweembezi wambelele zya Reueli, wakakwata Zipora akuzyala bana. Musa wakayaambele mubube bwakapa kuti apandululwe boobu. Ee, kwiinda mukuliyumya mubukkale bwamapenzi, Musa wakaba muntu mubombe.—Kulonga 2:16-22; Incito 7:29, 30.
14. Amupandulule ciindi cimwi Musa kasololela bana Israyeli naakatondezya kubomba.
14 Jehova naakamusala kuti abe musolozi wacisi ca Israyeli, ibube bwa Musa bwakubomba bwakazumanana kulibonya. Mukubusi umwi wakaambila Musa kuti, Elidadi alimwi a Medadi bakali kusinsima kunkambi, nokuba kuti tiibakaliko ciindi Jehova naakatila muuya wakwe abaalumi bapati ibali 70 ibakeelede kunoogwasya Musa. Joshua wakati: “O simalelaangu Musa, ubakasye.” Musa wakavwiila ajwi libombe kuti, “Sa wabafwida ibbivwe nkaambo kangu? Necakabota, bantu boonse ba-Jehova nebali basinsimi, Jehova naabika muuya wakwe mulimbabo.” (Myeelwe 11:26-29) Kubomba kwakamugwasya kuliyumya mubukkale oobo bukatazyide.
15. Nokuba kuti Musa tanaakalondokede, ino nkaambo nzi ncotweelede kutobela cikozyanyo cakwe?
15 Ciindi cimwi kubomba kwa Musa kwakaboneka mbuli kuti kwamana. Ku Meriba, munsi-munsi a Kadesi, tanaakamulemeka Jehova Sikucita Maleele. (Myeelwe 20:1, 9-13) Nokuba kuti Musa tanaakalondokede, ilusyomo lwakwe lutazungaani lwakamugwasya mubuumi bwakwe alimwi ikubomba nkwaakatondezya kulatubotela andiswe mazubaano.—Ba-Hebrayo 11:23-28.
Ilunya Alimwi Akubomba
16, 17. Ino nkucenjezya kuli buti nkotujana mucibalo cijatikizya Nabala alimwi a Abigayeli?
16 Icikozyanyo cakucenjezya nciceeco cakacitika mumazuba aakali kupona Davida, naakazwaa kufwa musinsimi wa Leza Samuele. Cijatikizya banabukwetene, nkokuti Nabala alimwi amukaintu wakwe Abigayeli. Elo kaka bantu aaba bobilo bakaliindenyi! Abigayeli wakali “musongo,” pele mulumaakwe wakali “si[lunya], ayalo milimo yakwe yakali mibi.” Nabala wakakaka kubapa zyakulya nzyobakalomba baalumi ba Davida, balo ibakagwasya kutanda babbi ibakali kuyanda kubba matanga aa Nabala. Davida wakanyema kapati, eelyo walo abaalumi bakwe bakabweza mapanga akuunka kuyoolwana Nabala.—1 Samuele 25:2-13.
17 Abigayeli naakamvwa makani aakacitika, cakufwambaana wakabamba zinkwa, waini, nyama alimwi azisankata zyamusaansa zyaampidwe, azibunge zyankuyu zyaampidwe akumutolela Davida. Wakamukombelezya kuti: “O mwami, mulandu ube wangu. Ndemulanda wako ngambe kumatwi aako. Swiilila majwi aangu ndemulanda wako.” Moyo wa Davida wakabomba akaambo kamajwi Abigayeli ngaakaamba cakubomba. Naakaswiilila bupanduluzi bwa Abigayeli, Davida wakati: “Alumbwe Jehova Leza wa-Israyeli! Nguwe wakutuma sunu kuzoondicinga. Bulumbwe busongo bwako, ayebo omwini ulumbwe, nkaambo nduwe wandikasya sunu kutila bulowa.” (1 Samuele 25:18, 24, 32, 33) Ilunya lwa Nabala lwakamujazya. Ibube bubotu bwa Abigayeli bwakapa kuti ajane lukkomano kwiinda mukukwatwa kuli Davida. Ikubomba kwakwe ncikozyanyo cibotu kuli baabo boonse ibabelekela Jehova mazubaano.—1 Samuele 25:36-42.
Amube Babombe
18, 19. (a) Ino nkucinca kuli buti kucitika ikuti naa twaba babombe? (b) Ino ncinzi cikonzya kutugwasya kulilingula munzila yeelede?
18 Aboobo, kubomba kulayandika kapati. Takuli buyo kuba amoyo mutete pe, mbube bukondelezya bwabukkale bwamuntu ibukatalusya bamwi. Ambweni kaindi twakalijisi cilengwa cakuvwenyuka buya kwaambaula alimwi akucita zintu calunya. Nokuba boobo, notwakaiya kasimpe kuzwa mu Bbaibbele, twakacinca akuba bantu babotu. Paulo wakakwaamba kucinca ooku naakakulwaizya Banakristonyina kuti: “Amulisamike moyo waluzyalo, buuya, lulifwiinsyo, lubombo, abusicamba.” (Ba-Kolose 3:12) Ikucinca ooku Bbaibbele likukozyanyisya akucinca kwamunyama wamusyokwe uuluma, mbuli umpe, siluwe, syuumbwa, suntwe ankombola ikuba mbuli munyama uuvwubwa uutayoosyi mbuli mwanaa mbelele, wampongo, moombe aŋombe. (Isaya 11:6-9; 65:25) Aboobo kucinca kuli boobo nkupati cakunga balangilila balagambwa kapati. Nokuba boobo, kucinca ooku tukwaamba kuti kulacitika akaambo kamuuya wa Leza uubeleka, nkaambo kubomba kulibikkilizyidwe mumicelo yawo iizibidwe kapati.
19 Sena eeci caamba kuti, ikuti naa twacinca munzila iili boobu akulyaaba kuli Jehova, tatuciyandiki kubeleka canguzu ikutegwa tube babombe moyo? Peepe. Mucikozyanyo, zisani zipya ziyandika kuzibamba kabotu ikutegwa lyoonse kazisalala akuboneka kabotu. Ikubala Jwi lya Leza akuzinzibala kuyeeya zikozyanyo zili mukati kulatugwasya kulilanga munzila mpya alimwi akubaa makanze mabotu. Ino cimbonimboni ca Jwi lya Leza lyakasololelwa amuuya citondezya nzi kujatikizya ndinywe?—Jakobo 1:23-25.
20. Ino mbuti mbotukonzya kuzwidilila mukutondezya kubomba?
20 Akaambo kakuti bantu bajisi bube bwiindene-indene, ibukkale bwabo abwalo buliindene. Babelesi bamwi ba Leza cilabaubila-ubila kulitondezya kubomba kwiinda bamwi. Nokuba boobo, Banakristo boonse beelede kubaa micelo yamuuya wa Leza, kubikkilizya akubomba. Paulo caluyando wakamukulwaizya Timoteo kuti: “Kogamine kutobela bululami, akukomba, alusyomo, aluyandano, alukakatilo, alulibombyo.” (1 Timoteo 6:11) Ibbala lyakuti “kogamine” litondezya kuti kulayandika kubeleka canguzu. Ibbala eeli mu Bbaibbele lya Cizuminano Cipya lisanduludwe kuti “kosoleka.” Ikuti naa katusolekesya kuzinzibala kuyeeya zikozyanyo izili mu Jwi lya Leza, zinooliko lyoonse mumizeezo yesu mbubwenya mbuli cintu cibikkidwe mumubili. Zinoomweendelezya akumusololela.—Jakobo 1:21.
21. (a) Ino nkaambo nzi ncotweelede kusolekesya kuba babombe? (b) Ino ncinzi iciyoobandikwa mucibalo citobela?
21 Mbotulilemeka kuli bamwi kulatondezya mbotubombede. Siciiya Jakobo wakabuzya kuti: “Nguni muntu musongo akati kanu? Nguni uuli amaanu? Atondezye mbwiibede milimo yakwe kukweenda kabotu, alimwi abe amoyo mubombe wabusongo.” (Jakobo 3:13) Ino mbuti mbotukonzya kutondezya bube bwa Bunakristo oobu amunzi, mumulimo wa Bunakristo alimwi amumbungano? Icibalo citobela cilapa busolozi bugwasya kapati.
Ikwiinduluka
• Ino ncinzi ncomwaiya kujatikizya kubomba kuzwa kucikozyanyo ca
• Jehova?
• Jesu?
• Musa?
• Abigayeli?
• Ino nkaambo nzi ncotweelede kusoleka ikuba babombe?
[Mibuzyo yaciiyo]
[Cifwanikiso icili apeeji 20]
Ino nkaambo nzi Jehova ncaakacikkomanina cituuzyo ca Abelo?
[Cifwanikiso icili apeeji 21]
Jesu wakatondezya kuti kubomba alimwi akulibombya zyeendelaamwi
[Cifwanikiso icili apeeji 22]
Musa wakasiya cikozyanyo cibotu cakubomba