Ino Mulalilo Wa Mwami Ncinzi?

INO Mulalilo wa Mwami ncinzi, alimwi ino caamba nzi kubantu bapona mazubaano? Ima Encyclopedias alimwi amabbuku aapandulula mabala ayoomwaambila kuti, Mulalilo wa Mwami alimwi wiitwa kuti Mulalilo wa Mwami Wamamanino, icakulya Jesu Kristo ncaakalya abaapostolo bakwe mangolezya katanafwa lufwu lwacipaizyo. Mbwaanga cakali cilalilo camamanino kuli Jesu abasikumutobela basyomeka, cileelela kwaambwa kuti Mulalilo wa Mwami Wamamanino mbubonya bantu bamwi mbobaamba. Alimwi mbwaanga cilengwa eeci cakatalisyigwa a Mwami Jesu Kristo kumugama, izina lyakuti Mulalilo wa Mwami lileelela.

Mumyaka yoonse yainda, bantu banji bali kwaaba buumi bwabo kabayeeya kuti nenzila ilumbaizyigwa ikutondezya busungu bwabo. Ilufwu luli boobu lwakabagwasya bantu bamwi kwaciindi cili mbocibede. Kwiinda mukweelanya ilufwu oolu ilukonzya kulumbaizyigwa, ilufwu lwa Jesu Kristo kunyina nolukonzya kweelana alufwu oolo pe. Mukuyungizya, ikuzwa kaindi kunyina muntu wakafwa mubukkale bwabantu bwamapenzi amanyongwe wakabajatikizya kapati bantu munyika yoonse. Ino nkaambo nzi?

Ikutegwa twiingule mubuzyo ooyu alimwi akumugwasya kutegwa mubone ncowaamba Mulalilo wa Mwami, tumulomba kuti mubale cibalo citobela.