Nobakubusi Sena Muyaambele Kumuuya?

HIDEO nakali kupandulula mbwakali kulimvwa ciindi naakacili kucikolo cabbeziki wakati: “Nokuba kuti ndakali kujanika kumiswangano ya Banakristo tiindakajisi luyandisisyo lwakubelekela Jehova. Lyoonse ndakali kulibona kuba waatala kapati abeenzuma mbindakali kwiiya limwi kandeenda mumugwagwa akasimbi kangu. Ncindakali kuyanda kucita cini tiindakacizyi kabotu alimwi tiindakajisi makanze aakuyaambele kumuuya.” Mbubwenya mbuli Hideo, bakubusi banji tabajisi mbaakani yakuyaambele kumuuya.

Ikuti koli mwana ndiza ulakkomana ciindi nojatikizigwa muzisobano naa nocita cintu cimwi ncoyandisya kapati. Pele caboola kuzintu zyakumuuya inga kotazibikkili maano pe. Sena cilakonzyeka kuzibikkila maano zintu zyakumuuya? Atubone cilembedwe ku intembauzyo: “Mulao wa-Jehova ulilondokede, ulabusya muuya; Bukamboni bwa-Jehova bulasyomeka, bulasongwaazya batezi. . . . Milumbe ya-Jehova ilasalala, ilamunikila meso. (Intembauzyo 19:7, 8) Ijwi lya Leza lilakonzya ‘kusongwaazya utazi’ ikubeleka kabotu, ‘akumunikila meso aakwe.’ Ee, inga wazikkomanina zintu zyakumuuya. Ino ncinzi ncoyandika kucita? Ino inga watalikila kuli?

Kamuba Aluyandisisyo Lwakubelekela Leza

Cakusaanguna weelede kuba aluyandisisyo. Kamuyeeya Mwami Josiya waku Juda naakacili mwana. Ciindi bbuku lya Milawo nilyakajanwa mutempele, Josiya wakalibala, naakamana zyakamunjila mumoyo zyakabala. Amane, “Josiya wakagwisya zisesemyo zyoonse muzisi zyoonse zyabana ba-Israyeli.” (2 Makani 34:14-21,33) Ijwi lya Leza ndyaakabala Josiya lyakamupa kuti azumanane kutola bukombi bwakasimpe ambele.

Andinywe mulakonzya kuba aluyandisisyo lwakubelekela Jehova kuti naa kamubala Bbaibbele alimwi akuzinzibala kuyeeya nzimubala. Eeci ncicakamukulwaizya Hideo. Wakatalika kuyanzana amupainiya mudaala, uuli mumulimo waciindi coonse wa Bakamboni ba Jehova. Mupainiya wakali munkutwe mukubala Bbaibbele alimwi wakali kuzibelesya nzyaakali kubala mubuumi bwakwe. Hideo wakakulwaizigwa amupainiya amane awalo wakaba aluyandisisyo lwakubelekela Leza alimwi abantu. Luyandisisyo lwakwe lwazintu zyakumuuya lwakapa kuti buumi bwakwe bube ampindu.

Ikubala Bbaibbele abuzuba kulakonzya kubakulwaizya  bana basyoonto. Takahiro wakati: “Lyoonse nindakali kuunka kukoona, kuti naa ndayeeya kuti tiindabala Bbaibbele ndakali kubuka kubala. Akaambo kakucita boobu, ndakalimvwa kuti Jehova wakali kundisololela. Ikubala Bbaibbele lyoonse kwakandigwasya kapati ikuyaambele kumuuya. Akaambo kakuba aluyandisisyo lwakubelekela Jehova, mbundakamanizyila buyo kusecondali ndakatalika kubeleka mulimo wabupainiya waciindi coonse. Ndilaukkomanina kapati mulimo ooyu.”

Kunze kwakubala Bbaibbele, ino ncinzi cimbi cikonzya kukugwasya kuba aluyandisisyo lwakutembaula Jehova? Tomohiro wakayiisigwa abanyina kasimpe kamu Bbaibbele. Wakati: “Kuzwa ciindi nindakalibala cakukkazyika moyo bbuku eeli lya Life Does Have a Purpose kandili amyaka iili 19, ndakabona luyando ndwajisi Jehova alimwi acinunuzyo cacituuzyo ca Jesu. Iluyandisisyo luli boobo lwakandikulwaizya kapati kubelekela Jehova.” (2 Ba-Korinto 5:14, 15) Mbuli Tomohiro, bakubusi banji bakulwaizigwa ikuba abubambe bwakuyaambele kumuuya kwiinda mukuba aciiyo ca Bbaibbele cicitwa lyoonse.

Nokuba boobo, ino kuti luyando oolu lwakubelekela Jehova kalutako? Sena kuli uukonzya kukugwasya? Mwaapostolo Paulo wakalemba kuti: “Nkaambo ngu-Leza uubeleka mumyoyo yanu . . . akumupa inguzu zyoonse nzimubula niziba zyakukanza niziba zyakucita.” (Ba-Filipi 2:13) Ikuti naa mwapaila kuli Jehova kutegwa amugwasye, uya kucita oobo kwiinda mukumupa muuya uusalala walo uutakamupi buyo nguzu “zyakukanza” pele a “zyakucita.” Eeci ciya kupa kuti muuya uusalala wa Leza ukamugwasye kuba aluyando lwakucita kabotu mumulimo wa Jehova alimwi muyoogwasigwa kuyaambele kumuuya. Amusoleke mbuli mbomukonzya ikusyoma munguzu zya Jehova alimwi akuliyumya mukucita oobo.

Amulibikkile Mbaakani

Mwalibambila kubelekela Jehova, amucite kuti imbaakani yanu imupe kuti mucikonzye kuyaambele kumuuya. Mana, Munakristo musimbi wakati: “Ikubikka mbaakani kwakandigwasya kapati. Muciindi cakujokela munsi, ndakazumanana kuyaambele kandili sicamba. Ambaakani yangu mumizeezo, ndakazumanana kupaila kutegwa Jehova andigwasye alimwi akuyaambele kutegwa kutabi cindinyonganya.”

Mweelede kulibikkila mbaakani njomukonzya kuzuzikizya. Ikubala caandano camu Bbaibbele abuzuba ilakonzya kuba mbaakani mbotu. Mulakonzya akuba abubambe bwakuvwutauzya. Ikutegwa tucipandulule eeci ancotubelesya mu Cingisi, ndiza inga mwaba aciiyo caamba bube bwa Jehova cili akatwe kakuti “Qualities by Name” ikali ansi amutwe wakuti “Jehova” mu Watch Tower Publications Index. Kuli tutwe tuli 40 ntomukonzya kujana, ikuvwutauzya kwanu kuyoomupa kuba acilongwe a Jehova alimwi akumubelekela. Imwi mbaakani iiyandika njakwiingula nociba ciindi comwe kumuswaangano wa Bunakristo ciindi nekuyandika kucita oobo, alimwi kumuswaangano umwi aumwi mweelede kumuziba kabotu omwe muntu mumbungano, alimwi mutalekeli kuti buzuba bwiinde kakunyina kupaila kuli Jehova akwaambila bamwi zyanguwe.

Ikuti kamutanalembya Mucikolo Camulimo Weendelezegwa a Leza, inga mwacita kuti ibe mbaakani yanu. Sena mulaunka mumulimo wamumuunda? Ikuti naa tamuunki ndiza inga mwaba ambaakani yakuba sikumwaya uutabbapatizidwe. Ikuti naa cilongwe canu a Jehova cili kabotu, nkokuti intaamu iitobela ilakonzya kuba yakulyaaba kulinguwe. Bakubusi banji balasoleka canguzu ikuzitobela zibakaiya  kwiinda mukuba ambaakani yakubeleka mulimo waciindi coonse. Nokuba kuti cili kabotu kuba ambaakani mubuumi, mweelede kucenjela kutegwa mutabi amuuya wakuzundana. Muyakuukkomanina mulimo wanu kuti kamutalikozyanisyi aabamwi.—Ba-Galatiya 5:26; 6:4.

Ambweni mulaakulimvwa kuti tamucizyi kabotu alimwi mujana buyumu-yumu mukusala mbaakani iili kabotu. Ikuti kakuli boobo, amutobele kulaya kwa Bbaibbele kwakuti: “Cenjeka kutwi kwako, ukaswiilile majwi aabasongo.” (Tusimpi 22:17) Amubelekele antoomwe abazyali banu naa a Banakristo basimide. Abalo bazyali alimwi abamwi buyo, bayandika kubagwasya alimwi akubakulwaizya bana aaba. Ikusinikizya bana kuzuzikizya mbaakani nzyobabikkilwa abamwi tacikonzyi kubakkomanisya alimwi takugwasyi. Eeci ncicakacitika kumusimbi umwi wakati: “Ibazyali bangu bakandibikkila mbaakani zinji mbuli yakulembya Mucikolo Camulimo Weendelezegwa a Leza, kutola lubazu mumulimo wamumuunda, kubbapatizigwa alimwi akuba mupainiya. Ndakabeleka canguzu kutegwa ndicite kabotu muli comwe. Nindakazuzikizya mbaakani yomwe, ibazyali bangu muciindi cakundilumbaizya bakandipa mbaakani iimbi. Akaambo kaceeco, lyoonse ndakali kulimvwa kuti ndisinikizigwa buya kuzuzukizya mbaakani eezi. Aboobo ndakalema alimwi ndakabona kuti taku ncindakali kubelekela.” Ino ncinzi cakalubila? Imbaakani zyoonse zyakali buyo kabotu. Pele tanaakali kuziyanda akaambo kakuti wakabikkilwa buya. Ikutegwa muzwidilile mweelede kulibikkila mbaakani molikke.

Kamuyeeya mbwaakacita Jesu Kristo. Ciindi nakaboola aanyika wakalizi kuti Jehova, Bausyi kuli ncibakali kulangila kulinguwe. Ikucita kuyanda kwa Jehova tiiyakali buyo mbaakani ya Jesu pele wakali mulimo ngwaakayandisya kuzuzikizya. Ino Jesu wakaubona buti mulimo ooyu? Wakati: “Icakulya cangu nkucita luyando lwayooyo uwakandituma, akulondola milimo yakwe.” (Johane 4:34) Jesu, wakaukomanina mulimo wa Jehova alimwi wakali kupona mbubwenya mbubakali kuyeeya Bausyi. Cakali mbuli cakulya kuli Jesu—wakali kuuyanda mulimo ooyu alimwi wakakkutila akaambo kakuti wakaumaninzya mulimo ngwaakali kulangilwa. (Ba-Hebrayo 10:5-10) Andinywe inga kamuuyanda mulimo ooyu ikuti naa mwazitobela nzibamukulwaizya bazyali kuti mucite.

Mutaleki Kucita Kabotu

Ikuti kamuli ambaakani imwi mweelede kubeleka canguzu kutegwa mwiizuzikizye. Ba-Galatiya 6:9 yaamba kuti: “Lino tutalengaani mukucita kabotu, nkaambo kuciindi ceelede tulatebula, twatafunuka.” Mutalisyomi. Inga kamuya kunjila mumapenzi alimwi ambweni inga tamucizuzikizyi ncomuyanda kucita. Pele Bbaibbele litusyomezya kuti: “Umizibye munzila zyako zyoonse, nkabela uyooenzya myeendelo yako.” (Tusimpi 3:6) Jehova uyakumugwasya kuti mukaizuzikizye mbaakani yanu yakumuuya mbomuyaabubeleka canguzu.

Ikuti mwaba aluyandisisyo lwakubelekela Jehova alimwi akubweza ntaamu yakumuuya muya kupa kuti ‘bantu boonse bakabone kuyaambele kwanu.’ (1 Timoteo 4:15) Mwacita mulimo wa Leza, muyooba ampindu mubuumi bwanu.

[Cifwanikiso icili apeeji 31]

Ikubala Bbaibbele alimwi akuzinzibala kuyeeya nzimwabala, ciyakumukulwaizya kubelekela Jehova

[Cifwanikiso icili apeeji 32]

Jesu wakakuzuzikizya kuyanda kwa Bausyi