Ino Nkuli Kukonzya Kujanika Luumbulizyo Lwini-lwini?
Ino Nkuli Kukonzya Kujanika Luumbulizyo Lwini-lwini?
“Leza Wisi wa-Mwami wesu Jesu Kristo . . . Nguwe uutuumbulizya mumapenzi esu oonse.”—2 BA-KORINTO 1:3, 4.
1. Ino mbukkale buli buti ibukonzya kupa kuti bantu bayande luumbulizyo?
IMALWAZI aatamani alakonzya kupa muntu kulimvwa kuti kunyina cakwe mubuumi pe. Kuzuzuma kwanyika, iguwo alimwi anzala zipa kuti bantu babe bacete. Inkondo ilakonzya kujaya bamukwasyi, kunyonyoona maanda naa kupa kuti bantu baayinde maanda kutegwa bafwutuke. Ikutalulama kulakonzya kupa kuti bantu balimvwe kuti kunyina nkobakonzya kujana luumbulizyo. Ibantu basikilwa zintu zili boobo balaluyandisya kapati luumbulizyo. Ino nkuli nkolukonzya kujanika?
2. Ino nkaambo nzi luumbulizyo Jehova ndwapa ncoluli lwaalubazu?
2 Ibantu alimwi ambunga zimwi balasola kupa luumbulizyo. Imajwi aali kabotu alalumbwa kapati. Ikugwasya kwiinda mukupa zintu ziyandika kulagwasya kwakaindi kasyoonto. Pele Jehova alikke, Leza wakasimpe ulakonzya kuzibamba zintu zyoonse zyakanyonyooka alimwi akupa lugwasyo iluyandika kapati ikutegwa mapenzi aali boobo amaninelyo. Kujatikizya nguwe, Ibbaibbele lyaamba kuti: “Alumbwe Leza Wisi wa-Mwami wesu Jesu Kristo, Taateesu siluzyalo, Leza siluumbulizyo loonse. Nguwe uutuumbulizya mumapenzi esu oonse, kuti tukakonzye kuumbulizya boonse bapengede kuluumbulizyo olo ndulonya ndutuumbulizizigwa tubeni kuli-Leza.” (2 Ba-Korinto 1:3, 4) Ino Jehova utuumbulizya buti?
Kulanganya Zintu Zileta Mapenzi
3. Ino mbuti luumbulizyo lwa Leza mbolulanganya ntalisyo yamapenzi aabantu?
3 Bantu boonse baanyika tabalondokede akaambo kacibi cakacita Adamu, alimwi eeci ncicakaleta mapenzi manji aajazya. (Ba-Roma 5:12) Ibukkale buli mukubija kapati akaambo kakuti Saatani Diabolosi ‘ngomweendelezi wanyika yoonse.’ (Johane 12:31; 1 Johane 5:19) Jehova tanaakausa buyo akaambo kabukkale butakkomanisyi mbubajisi bantu. Wakatuma Mwanaakwe simuzyalwa alikke, ikuti abe cinunuzyo cakufwutuzya bantu alimwi Wakatwaambila kuti tulakonzya kuzwa mumapenzi aletwa acibi ca Adamu, ikuti naa katusyoma mu Mwanaakwe. (Johane 3:16; 1 Johane 4:10) Alimwi Leza wakasinsima kuti Jesu Kristo iwakapegwa nguzu kujulu aansi, uyoonyonyoona Saatani abweende bwazintu oobu bubi boonse.—Matayo 28:18; 1 Johane 3:8; Ciyubunuzyo 6:2; 20:10.
4. (a) Ino ncinzi Jehova ncaapa ikutegwa ayumye lusyomo lwesu muzisyomezyo zyakwe zyakutukatalusya? (b) Ino mbuti Jehova mbwatugwasya kuzyiba nokuyoosika kukatalusyigwa?
4 Ikutegwa ayumye lusyomo ndotujisi muzisyomezyo zyakwe, Leza wapa bumboni bunji bwakuti kufwumbwa ncaasinsima cilazuzikizyigwa. (Joshua 23:14) Mu Bbaibbele, wakabikkilizya amakani aazintu nzyaakali kucita mukuvwuna babelesi bakwe mumapenzi ngobatakali kukonzya kulivwuna. (Kulonga 14:4-31; 2 Bami 18:13–19:37) Alimwi kwiinda muli Jesu Kristo, Jehova wakatondezya ikuti makanze aakwe alabikkilizya akuponya bantu “malwazi oonse,” nokuba kubusya bafwu buya. (Matayo 9:35; 11:3-6) Ino eezi zyoonse ziyoocitika lili? Ikwiingula mubuzyo ooyu, Ibbaibbele lilijisi bupanduluzi bwamazuba aamamanino aabweende oobu bwazintu, ibuyootobelwa ajulu alimwi anyika mpya ya Leza. Ibupanduluzi bwa Jesu bulikozyenyi amazubaano ngotupona.—Matayo 24:3-14; 2 Timoteo 3:1-5.
Luumbulizyo Kubantu Bali Mumapenzi
5. Naakali kupa luumbulizyo kuba Israyeli bansiku, ino nkuunzi Jehova nkwaakabaambila kuti babikkile maano?
5 Kwiinda munzila Jehova mbwaakeendelezya ba Israyeli bansiku, tulaiya mbuli mbwaakabaumbulizya muziindi zyamapenzi. Leza wakabayeezya mbwabede. Eeci cakayumya lusyomo lwabo muzisyomezyo zyakwe. Jehova wakabelesya basinsimi bakwe kuti batondezye caantangalala lwiindano luliko akati ka Leza wakasimpe uupona, alimwi amituni yalo iitakonzyi kuligwasya naa kugwasya baikomba. (Isaya 41:10; 46:1; Jeremiya 10:2-15) Naakaambila Isaya kuti, “Amuumuzye, amuumuzye bantu bangu,” Jehova wakakulwaizya basinsimi kuti babelesye zikozyanyo abupanduluzi bwamilimo Yakwe yakulenga ikuti bakankaizye bupati bwa Jehova kali ngo Leza wakasimpe.—Isaya 40:1-31.
6. Ino nzitondezyo nzi Jehova nzyaakali kupa ziindi zimwi ikutondezya kufwutulwa nokuyoocitika?
6 Ziindi zimwi, Jehova wakapa luumbulizyo kwiinda mukucigama buya ciindi, cilaafwaafwi naa kulamfwu ibantu bakwe nobayoofwutulwa. Kufwutulwa ku Egepita nikwakalondelela, wakabaambila bana Israyeli bakadyaaminidwe kuti: “Nciletela Farao aba-Egepita cuumo comwe. Camana buyo eco, uyoomuleka kuti mupole okuno.” (Kulonga 11:1) Imasi otatwe naakamvwana kuti alwane Juda mubweendelezi bwa Mwami Josafati, Jehova wakabaambila kuti uyoonjililila “junza.” (2 Makani 20:1-4, 14-17) Cikozyano caciindi cili kulamfwu ncakufwutulwa kwabo kuzwa ku Babuloni kwakalembwa a Isaya kakucili myaka iitandila ku 200, alimwi amakani aambi akabikkilizyigwa kwiinda muli Jeremiya kakucili myaka iitandila kumwaanda kuti bafwutulwe. Elo kaka businsimi oobu bwakabakulwaizya babelesi ba Leza ikufwutulwa ooku nokwakaswena!—Isaya 44:26–45:3; Jeremiya 25:11-14.
7. Ino ncinzi cakabikkilizyidwe muzisyomezyo zyakufwutula, alimwi ino mbuti eeci mbocakabajatikizya bantu basyomeka bamu Israyeli?
7 Cilayandika kubikkila maano kubona kuti izisyomezyo zyakaumbulizya bantu ba Leza ziindi zinji zyakalijisi makani aakali kwaamba zya Mesiya. (Isaya 53:1-12) Imazyalani mbwaakali kuyaabutobelana, imakani aaya akali kubapa bulangizi bantu basyomeka ciindi nobakali kusikilwa masukusyo. Kuli Luka 2:25 tubala kuti: “Wakalimo mu-Jerusalemu mwaalumi uwali kutegwa Simeoni, wali muntu uululeme, uwali kusyoma Leza akulangila kutontozegwa kwa-Israyeli [naa kuumbulizyigwa; nkokuti ikusika kwa Mesiya]. Muuya Uusalala wakali kulinguwe.” Simeoni wakalizyi zyabulangizi bwa Mesiya ibwakali mu Magwalo, eelyo kuzuzikizyigwa kwambubo ncecakali cintu cipati mubuumi bwakwe. Tanaakazyi mbobwakali kukonzya kuzuzikizyigwa alimwi walo kunyina naakali kuyeeya kuti uyoolubona lufwutuko oolo kacipona, pele wakakkomana naakabona Yooyo iwakali kuyoobelesyegwa a Leza ‘mukufwutula.’—Luka 2:30.
Iluumbulizyo Lupegwa Kwiinda Muli Kristo
8. Ino mbuti lugwasyo ndwaakapa Jesu mbolwakaindene azyibakali kuyeeya bantu banji kuti nzyobakali kuyandika?
8 Jesu Kristo naakali kubeleka mulimo wakwe waanyika, tanaakali kupa lyoonse lugwasyo bantu ndobakali kuyeeya kuti ndobayandika. Ibamwi bakali kulombozya kusika kwa Mesiya iwakali kukonzya kubavwuna kukudyaaminina kwabana Roma. Pele Jesu kunyina naakali kukulwaizya kuzanga pe; eelyo wakabaambila ‘kupa zintu zya Kaisara kuli Kaisara.’ (Matayo 22:21) Imakanze aa Leza tanaakali aakwaangulula buyo bantu kuzwa kukudyaamininwa abweendelezi bwamapolitikisi pe. Ibantu bakali kuyanda kubikka Jesu kuti abe mwami, pele wakaamba kuti wakali kuyanda “kwaaba buumi bwakwe, bube cinunuzyo cabanji.” (Matayo 20:28; Johane 6:15) Iciindi cakubikkwa kuti abe mwami tiicakainingasika, alimwi wakeelede kuzumizyigwa a Jehova ikutali abantu ibakapengede.
9. (a) Ino mmulumbe nzi waluumbulizyo Jesu ngwaakaambilizya? (b) Ino mbuti Jesu mbwaakatondezya mulumbe mbowakali kubagwasya bantu kumapenzi ngobakajisi umwi aumwi? (c) Ino mulimo wa Jesu wakabikka ntalisyo yanzi?
9 Iluumbulizyo Jesu ndwaakaleta lwakali mu “Makani Mabotu aa-Bwami bwa-Leza.” Ooyu ngomulumbe Jesu ngwaakaambilizya kufwumbwa nkwaakaya. (Luka 4:43) Wakakankaizya mbuli mulumbe mbowakeelede kubagwasya kumapenzi aakali kubasikila bantu abuzuba, kwiinda mukutondezya ncayoocita walo mbwali Muleli Mesiya. Wakapa kuyeeya kupya kubantu bakali kupenga kwiinda mukupa kuti batalike kubona alimwi akwaambaula (Matayo 12:22; Marko 10:51, 52), kuponya bakalemenyi (Marko 2:3-12), kusalazya bana Israyelinyina kuzwa kumalwazi aanyonyoona kapati (Luka 5:12, 13) alimwi akubaponya kumalwazi aambi aakatazyide kapati. (Marko 5:25-29) Wakabakatalusya kapati banamikwasyi ibakauside kwiinda mukubusya bana babo kuzwa kulufwu. (Luka 7:11-15; 8:49-56) Wakatondezya nguzu nzyaakajisi zyakweendelezya guwo alimwi akupa zyakulya kumakamu-makamu aabantu. (Marko 4:37-41; 8:2-9) Alimwi Jesu wakabayiisya njiisyo zyabukkale izyakali kukonzya kubagwasya kumana mapenzi aabo munzila mbotu alimwi akuba abulangizi bukkomanisya bwamuleli uululeme mubweendelezi bwa Mesiya. Aboobo, Jesu mbwaakali kuyaabubeleka mulimo wakwe, tanaakaumbulizya buyo baabo ibakasyoma nzyaakali kwaamba pe, pele wakacita ntalisyo yakukulwaizya baabo ibakali kuyoopona zyuulu zyamyaka zyobilo kumbele.
10. Ino ncinzi cikonzyeka akaambo kacipaizyo ca Jesu?
10 Noyakainda myaka iinda ku 60 kuzwa ciindi Jesu naakaaba buumi bwakwe kacili cipaizyo alimwi kabukide kale kubuumi bwakujulu, mwaapostolo Johane wakasololelwa amuuya kulemba kuti: “Nobana bangu, ndamulembela aya makani kuti mutabisyi. Na muntu ulabisya, tulijisi sikutwaambilila kuli-Taata, ngu-Jesu Kristo mululami. Walo ngomulungo wazibi zyesu, alimwi teensi kulindiswe akulike, pele kuzibi zyanyika yoonse.” (1 Johane 2:1, 2) Akaambo kampindu yacipaizyo ca Jesu muntu uulondokede, tulaumbulizyigwa kapati. Tulizyi kuti tulakonzya kulekelelwa zibi, ikuba amanjezyeezya aasalala, cilongwe cibotu a Leza alimwi abulangizi bwabuumi butamani.—Johane 14:6; Ba-Roma 6:23; Ba-Hebrayo 9:24-28; 1 Petro 3:21.
Imuuya Uusalala Mbouli Sikuumbulizya
11. Ino mbubambe nzi abumbi bwakuumbulizya Jesu mbwaakasyomezya katanafwa?
11 Kali abaapostolo bakwe mangolezya aamamanino katanafwa lufwu lwacipaizyo, Jesu wakaamba bubambe abumwi bwakubaumbulizya Wisi wakujulu mbwaakabambide. Jesu wakati: “Ndiyookumbila Taata, uyoomupa Mugwasyi [sikuumbulizya; mu Cigiliki, pa·raʹkle·tos] umbi kuti akale anywebo lyoonse. Ngonguwe Muuya wabwini.” Jesu wakabasyomezya kuti: “Mugwasyi, Muuya Uusalala, . . . uyoomwiisya zintu zyoonse, uyoomuyeezya zyoonse nzendakamwaambila.” (Johane 14:16, 17, 26) Ino mbuti muuya uusalala mbowakabaumbulizya?
12. Ino mbuti mulimo wamuuya uusalala mukugwasya basikwiiya ba Jesu kuyeeya zintu mbowakaleta luumbulizyo kubantu banji?
12 Ibaapostolo bakayiisyigwa kapati a Jesu. Tiibakali kulangilwa kuluba zyakacitika, pele sena bakali kukonzya kuziyeeya nzyaakaambide? Sena malailile aayandika kapati akeelede kulubwa akaambo kakutalondoka kwabo mukuyeeya? Jesu wakabasyomezya kuti muuya uusalala wakali kukonzya ‘kubayeezya zyoonse nzyaakabaambilide.’ Aboobo, nokwakainda myaka iisika kulusele kuzwa ciindi Jesu naakafwa, Matayo wakakonzya kulemba Makani Mabotu aakusaanguna, mwalo mwaakalemba Mulumbe waa Cilundu wa Jesu, zikozyanyo zyakwe zinji zya Bwami alimwi amakani aakwe amwi ngaakaamba zyacitondezyo cakuboola kwakwe. Nokwakainda myaka iili 50 kuzwa ciindi eeco, mwaapostolo Johane wakakonzya kulemba makani aakacitika ncobeni aajisi twaambo tupati-pati tujatikizya mazuba masyoonto aakumamanino aabuumi bwa Jesu bwaanyika. Elo kaka alakulwaizya makani aaya aakasololelwa amuuya kusikila sunu!
13. Ino mbuti muuya uusalala mbowakabeleka mbuli mwiiyi ku Banakristo bakusaanguna?
13 Muciindi cakubayeezya buyo zintu, imuuya uusalala wakabayiisya basikwiiya akubasololela mukumvwisya makanze aa Leza. Jesu naakacili abasikwiiya bakwe, wakabaambila zintu nzyobatakali kukonzya kumvwisya kabotu. Nokuba boobo kumbele, kwiinda mukusololelwa amuuya uusalala, Johane, Petro, Jakobo, Juda alimwi a Paulo bakapandulula kuyaambele kwamakanze aa Leza. Nkokuti muuya uusalala wakabeleka mbuli mwiiyi, ikubapa cisyomezyo ciyandika kapati cizwa kuli Leza.
14. Ino mbuti muuya uusalala mbowakagwasya bantu ba Jehova?
14 Icipego camuuya alimwi cakagwasya kusalazya makani ikuti Leza wakatalika kuyanda mbungano ya Bunakristo, ikutali bana Israyeli bakumubili. (Ba-Hebrayo 2:4) Imucelo wamuuya ooyo mubuumi bwabantu alimwi cakali cintu cipati kapati mukuzyibya baabo ibakali basikwiiya ba Jesu bancobeni. (Johane 13:35; Ba-Galatiya 5:22-24) Alimwi imuuya wakabayumya basimbungano ikuti babe bakamboni basicamba.—Incito 4:31.
Ilugwasyo Lwakapegwa Muciindi Camapenzi Mapati
15. (a) Ino mapenzi nzi akasikila Banakristo kaindi alimwi asunu? (b) Ino nkaambo nzi aabo ibakulwaizya beenzinyina abalo ncobakonzya kuyanda kukulwaizyigwa?
15 Boonse ibalyaabide kuli Jehova alimwi ibasyomeka kulinguwe balapenzyegwa munzila imwi. (2 Timoteo 3:12) Nokuba boobo, Banakristo banji baliyumya mumapenzi mapati kapati. Mumazuba eesu aano, ibamwi bapenzyegwa ankamu zyabantu alimwi akubabikka muzilabba, muntolongo alimwi amunkambi zyacibbalo muteeleli kukkala bantu. Imfwulumende zyatalika kuciindilizya buya kuba basikupenzya naa kuzumizya bantu basilunya kucita mbobayanda kakunyina kubasubula. Ikuyungizya waawo, Banakristo basikilwa penzi lyakutapona kabotu pe, naa mapenzi aakatazya aamumukwasyi. Alimwi imapenzi alabasikila Banakristo basimide balo ibali mukugwasya basyominyina ikumana mapenzi aakatazya. Ikuti casika waawo, ooyo uukulwaizya mweenzinyina awalo ulakonzya kuyandika kukulwaizya.
16. Ino mbuti Davida mbwaakagwasyigwa ciindi naakali mumapenzi?
16 Imwami Saulo naakali kutandila Davida kuti amujaye, Davida wakasyoma Leza kuti amugwasye naakalomba kuti: “O Leza, swiilila cikombyo cangu, . . . ndayubila mucenzule camababa aako.” (Intembauzyo 54:2, 4; 57:1) Sena Davida wakagwasyigwa? Inzya. Muciindi eeco, Jehova wakabelesya musinsimi Gadi amupaizi Abiyatara kuti amusololele Davida alimwi wakabelesya Jonatani imwana wa Saulo ikuti amuyumye-yumye. (1 Samuele 22:1, 5; 23:9-13, 16-18) Alimwi Jehova wakazumizya ba Filisti kuti bailwane nyika eeyo, calo cakapa kuti Saulo acileke kumutobela.—1 Samuele 23:27, 28.
17. Ino nkuli Jesu nkwaakajana lugwasyo ciindi naakali mumapenzi mapati?
17 Jesu Kristo wakali mumapenzi mapati ibuumi bwakwe bwaanyika nobwakalondelela kumana. Wakalizyi kabotu-kabotu kuti kulilemeka kwakwe kwakali kulangilwa kulijatikizya izina lya Wisi wakujulu alimwi abulangizi bwakumbele bwabantunsi boonse. Wakapaila cakusinizya “mbwaakali mumapenzi mapati.” Leza wakabona kuti Jesu wagwasyigwa eeco ncaakali kulomba muciindi eeco cikatazya.—Luka 22:41-44.
18. Ino nduumbulizyo nzi Leza ndwaakapa ku Banakristo bakusaanguna ibakali kupenzyegwa kapati?
18 Ibanakristo bakapenzyegwa ceetezya noyakabambwa mbungano mumwaanda wamyaka wakusaanguna cakunga boonse buyo kunze lyabaapostolo, bakamwaika kuzwa mu Jerusalemu. Baalumi abamakaintu bakali kukwelwa buya kuzwa mumaanda aabo. Ino nduumbulizyo nzi Leza ndwaakapa? Ncisyomezyo kuzwa mu Jwi lyakwe cakuti bakalijisi “lubono lumbi lubotu lutamani,” icikono cancobeni cakujulu a Kristo. (Ba-Hebrayo 10:34; Ba-Efeso 1:18-20) Mbobakali kuyaabuzumanana kukambauka, bakabona kuti citondezyo cakuti muuya wa Leza wakali alimbabo alimwi azyakali kubacitikila zyakapa kaambo akambi kakukkomanina.—Matayo 5:11, 12; Incito 8:1-40.
19. Nokuba kuti Paulo wakapenzyegwa ceetezya, ino mbuti mbwaakalimvwa kuluumbulizyo Leza ndwapa?
19 Nokwakainda ciindi, Saulo (Paulo) walo iwakali kupenzya kapati, wakapenzyegwa awalo nkaambo wakazooba Munakristo. Kunsumbu ya Kupro, kwakali muŋanga umwi wakasola kusinkilila mulimo wa Paulo kwiinda mukubelesya masalamuzi aakunyonganya. Ku Galatiya, Paulo wakapwaigwa mabwe mane wayuminina. (Incito 13:8-10; 14:19) Ku Makedoniya wakaumwa amisako. (Incito 16:22, 23) Naakamana kunyonganyizigwa ankamu yabantu ku Efeso, wakalemba kuti: “Twakalemenwa loko, inguzu zyesu zyakati gole, nkabela twakaliswawide nibuba buumi bwesu. Ncobeni mumyoyo yesu twakali kuyeeya kuti ncikosolo calufu.” (2 Ba-Korinto 1:8, 9) Pele mulugwalo ndomunya oolu, Paulo wakalemba majwi aayo aawumbulizya aazubuludwe mumuncali wa 2 mucibalo eeci.—2 Ba-Korinto 1:3, 4.
20. Ino ncinzi ncotuyoolanga-langa mucibalo citobela?
20 Ino mbuti mbomukonzya kutola lubazu mukwaabila luumbulizyo luli boobo? Kuli bantu banji mazubaano ibaluyanda ciindi nobasikilwa mause, kufwumbwa naa nkaambo kamanyongwe aacitikila bantu banji naa mapenzi aabasikila. Mucibalo citobela, tulabandika mbuli mbotukonzya kubaumbulizya.
Sena Muciyeeyede?
• Ino nkaambo nzi luumbulizyo luzwa kuli Leza ncoluyandika kapati?
• Ino nduumbulizyo nzi lupegwa kwiinda muli Kristo?
• Ino mbuti muuya uusalala mbookaba mbuli sikuumbulizya?
• Amupe zikozyanyo zyakuumbulizya zyakapegwa a Leza babelesi bakwe nobakali mumapenzi mapati.
[Mibuzyo yaciiyo]
[Zifwanikiso izili apeeji 23]
Ibbaibbele litondezya kuti Jehova wakabaumbulizya bantu bakwe kwiinda mukubavwuna
[Zifwanikiso izili apeeji 24]
Jesu wakabaumbulizya bantu kwiinda mukubayiisya, kubaponya alimwi akubusya bafwide
[Cifwanikiso icili apeeji 26]
Jesu wakatambula lugwasyo kuzwa kujulu