Jehova Takailubi Milimo Yanu Nobakubusi!
Jehova Takailubi Milimo Yanu Nobakubusi!
“Leza tali sikampenda, takonzya kuluba milimo yanu akuyanda nkomwatondezya nkaambo kezina lyakwe, mbomwakabelekela basalala, asunu mucibabelekela.”—BA-HEBRAYO 6:10.
1. Ino mbuti bbuku lyamu Bbaibbele lya Ba-Hebrayo a Malaki mbolitondezya kuti Jehova ulalumba kumulimo ngomucita?
SENA kuli nomwakacitila mweenzinyoko cintu cibotu pele kakunyina naakamulumba? Cilacisizya moyo kapati ikuti mwagwasya muntu pele tanaabikkila maano naa kwiide kuciluba buyo ncomwamucitila. Nokuba boobo, eeci ciliindene kapati anotubelekela Jehova camoyo woonse. Ibbaibbele lyaamba kuti: “Leza tali sikampenda, takonzya kuluba milimo yanu akuyanda nkomwatondezya nkaambo kezina lyakwe, mbomwakabelekela basalala, asunu mucibabelekela.” (Ba-Hebrayo 6:10) Amuyeeye eeci ncocaamba. Ikuti naa Jehova waluba milimo njomwakacita alimwi anjomucizumanana kucita, inga tanaacita bululami. Elo kaka ngu Leza uulumba!—Malaki 3:10.
2. Ino ncinzi cipa kuti kubelekela Jehova cibe cintu caalubazu?
2 Mulijisi coolwe cakukomba akubelekela Leza uulumba. Mbwaanga kuli buyo basyominyoko ibabalilwa kutuulunzuma tuli cisambomwi kweelana abantu ibali munyika ibabalilwa ku 6,000,000,000, nkokuti coolwe ncomujisi ncaalubazu. Kunze lyaboobo, ikuswiilila alimwi akucita zyaambwa mumulumbe wamakani mabotu ncitondezyo cakuti Jehova ulamuyanda cakumugama buya. Kayi Jesu wakati: “Takukwe muntu uukonzya kuza kulindime Taata uwakandituma atamukwela.” (Johane 6:44) Ee, Jehova ulagwasya umwi aumwi ikuti agwasyigwe ampindu yacipaizyo ca Kristo.
Ikulumba Coolwe Caalubazu Ncomujisi
3. Ino mbuti bana ba Kora mbobakatondezya kulumba kucoolwe cakubelekela Jehova?
3 Mbubwenya mbokwabandikwa mucibalo cakasaanguna, mulaa coolwe caalubazu icakukkomanisya Jehova. (Tusimpi 27:11) Eeci tamweelede kucuubya-ubya pe. Muntembauzyo imwi yakasololelwa amuuya, ibana ba Kora bakatondezya mbubakalumba coolwe ncobakajisi icakubelekela Jehova. Tubala kuti: “Buzuba bomwe buyo bwamucikalilo cako mbubotu kwiinda mazuba aali cuulu aakumbi. Cilandibotela kuba mulindizi wamulyango muŋanda ya-Leza wangu, kwiinda kukala muzilao zyabasizibi.”—Intembauzyo 84:10.
4. (a) Ino ncinzi cikonzya kupa kuti bamwi ikukomba Jehova bakubone mbuli buzike? (b) Ino mbuti Jehova mbwatondezya kuti ulilibambilide kulangilila alimwi akupa bulumbu kubabelesi bakwe?
4 Sena andinywe mbomulimvwa oobu kucoolwe canu cakubelekela Uso wanu wakujulu? Ee, ziindi zimwi ikukomba Jehova kuboneka mbuli kuti kumubikka mubuzike. Masimpe kuti ikupona kweendelana anjiisyo zyamu Bbaibbele kuyandika kulyaaba. Pele, kufwumbwa Jehova ncayanda kuti mucite cigwasya ndinywe. (Intembauzyo 1:1-3) Kunze lyaboobo, Jehova ulabona mbomusoleka alimwi ulamulumba akaambo kakusyomeka kwanu. Ee, Paulo wakalemba kuti Jehova “nguupa cilumbo kulibaabo bamuyandaula.” (Ba-Hebrayo 11:6) Jehova uli mukuyandaula nzila mbwakonzya kucita boobu. Musinsimi umwi mululami mu Israyeli yansiku wakaamba kuti: “Nkaambo Jehova, meso aakwe alalanga-langa moonse munyika, kuti aliyumye kukugwasya abo balulama mumoyo kumeso aakwe.”—2 Makani 16:9.
5. (a) Ino ninzila nzi imwi mbotu kapati mbomukonzya kutondezya kuti mulamuyanda Jehova amoyo wanu woonse? (b) Ino nkaambo nzi ncocikonzya kukatazya ikwaambila bantu zyalusyomo lwanu?
5 Inzila imwi mbotu kapati mbomukonzya kutondezya ikuti mulamuyanda Jehova amoyo wanu woonse nkwiinda mukwaambila bamwi zyanguwe. Sena kuli nomwakajanide ciindi cakukambauka zyalusyomo lwanu kuli basicikolonyoko bamwi? Ikusaanguna, ikucita boobu cilakonzya kuba cintu cityompya alimwi imuzeezo ooyu ulakonzya kuyoosya asyoonto. Mulakonzya kulibuzya kuti: ‘Ino kuti bandiseke?’ Ino kuti batalike kuyeeya kuti bukombi bwangu mbweenzu?’ Jesu wakazuminizya kuti tabali boonse ibayooswiilila mulumbe wa Bwami pe. (Johane 15:20) Pele eeci tacipandululi kuti munoopona buumi bwakufwubaazyigwa akucimwa kubantu. Muciindi caboobo, Bakamboni bakubusi ibanji babajana bantu baswiilila alimwi balalemekwa kapati abeenzinyina akaambo kakuzumanana kuzintu nzyobasyoma.
‘Jehova Uyoomugwasya’
6, 7. (a) Ino mbuti musimbi umwi ulaa myaka iili 17 mbwaakakonzya kukambaukila basicikolonyina? (b) Ino ncinzi ncomwaiya kuli ceeco cakacitikila Jennifer?
6 Pele ino mbuti mbomukonzya kuba basicamba ikutegwa mwaambe zyalusyomo lwanu? Sena tamukonzyi kukanza kuba muntu uusyomeka alimwi uugaminina kwaamba bantu nobabuzya zyabukombi bwanu? Amulange-lange cakatikila Jennifer uujisi myaka iili 17. Uluula kuti: “Cakali ciindi cakususula kucikolo. Ibasimbi mbotwakakkede limwi atafule bakali kubandika zyazikombelo, eelyo umwi wabasimbi aaba wakabuzya cikombelo cangu.” Sena Jennifer wakawayawaya kwiingula? Ulazuminizya kuti “inzya, nkaambo tiindakazyi cakali kukonzya kutobela.” Aboobo, ino ncinzi Jennifer ncaakacita? Ulazumanana ategwa, “ndakabaambila basimbi aaba ikuti ndakali umwi wa Bakamboni ba Jehova. Nindakaamba boobu bakalibonya kugambwa. Cakutadooneka, bakali kuyeeya kuti Bakamboni ba Jehova mbantu batazyibidwe kapati. Eeci cakapa kuti bandibuzye mibuzyo, eelyo ndakakonzya kusalazya twaambo tumwi tunyongenyi ntobakajisi. Nociba ciindi kuzwa buzuba oobo, basimbi bamwi bakali kuboola ciindi aciindi amibuzyo.”
7 Sena Jennifer wakausa akaambo kakuti wakajana ciindi cakuti aambe nzyasyoma? Peepe. Waamba kuti: “Ndakakkomana kapati akaambo kamakani aaya notwakamanizya kususula. Mazubaano basimbi aaba balibazyi kabotu Bakamboni ba Jehova.” Ilulayo lwa Jennifer lutakatazyi ndwakuti: “Ikuti naa camukatazya kukambauka kuli basicikolonyoko naa bamayi, amupaile cakufwambaana. Jehova uyoomugwasya. Muyookkomana akaambo kakuti mwacibelesya kabotu ciindi kwiinda mukukambauka.”—1 Petro 3:15.
8. (a) Ino mbuti mupailo mbowakamugwasya Nehemiya ciindi naakali mubukkale mbwaatakali kuyeeyela? (b) Ino mmuubukkale buli buti kucikolo mmomweelede kupaila mubufwaafwi alimwi cakaumuumu kuli Jehova?
8 Amubone kuti Jennifer waamba ‘kupaila cakufwambaana’ kuli Jehova, nokwajanika ciindi cakupa bumboni kujatikizya lusyomo lwanu. Mbwaakacita Nehemiya iwakali kupa zyakunywa ku Mwami Aritasasta waku Persia, ciindi naakanjila mubukkale mbwaatakali kuyeeyela. Nehemiya wakalibonya kuti ulityompedwe akaambo kabukkale bubyaabi bwaba Juda mbwaakamvwa alimwi anaakazyiba kuti bwaanda alimwi amilyango ya Jerusalemu zyakalipwaidwe. Imwami wakabona kuti Nehemiya takkomanyi pe, eelyo wakamubuzya cakalubide. Nehemiya katanaingula wakapailila busolozi. Eelyo cabusicamba wakalomba kuti azumizigwe kuunka ku Jerusalemu kuti akagwasyilizye kuyaka munzi iwakanyonyoodwe. Aritasasta wakamuzumizya Nehemiya. (Nehemiya 2:1-8) Ino ncinzi ncomukonzya kwiiya? Ikuti naa mulayoowa nokwajanika ciindi cakupa bumboni bujatikizya lusyomo lwanu, tamweelede kuleka kupaila cakaumuumu pe. Petro wakalemba kuti: “Makataazyo aanu oonse amwaasowele [kuli Jehova], nkaambo nguumu[bamba] lyoonse.”—1 Petro 5:7; Intembauzyo 55:22.
‘Ibalibambilide Kupanduluda Boonse Ibabuzya Makani’
9. Ino mbuti Leah ulaa myaka iili 13 mbwaakakonzya kwaabila mabbuku aa Achichepere Akufunsa aali 23?
9 Amubone cakacitika acimbi. Leah ulaa myaka iili 13 wakali kubala bbuku lya Mafunso Achichepere Akufunsa—Mayankho Amene Amathandiza * kucikolo aciindi cakususula. Uluula kuti: “Ibamwi bakali kundilangilila, aboobo mukaindi kasyoonto ibanji bakaboola akuzyikwiima kusyule kabalangila nkukona. Bakatalika kubuzya ncolyakali kupandulula bbuku.” Kusikila kumazuba, basimbi bone bakaunka kuli Leah ikuti balombe bbuku lya Achichepere Akufunsa. Mukaindi kasyoonto, basimbi aaba bakatalika kulilanga-langa bbuku eeli abeenzinyina, eelyo abalo bakaboola kuti bapegwe. Munsondo zisyoonto buyo, Leah wakaabila mabbuku aa Achichepere Akufunsa aali 23 kuli basicikolonyina akubeenzinyina. Sena kumatalikilo cakali cuuba-uba kuli Leah kupandulula ibamwi nobakabuzya kujatikizya ncolyakali kwaamba bbuku ndyaakali kubala? Peepe. Leah ulazumina ategwa: “Kumatalikilo ndakaba abukandu. Pele ndakapaila alimwi ndakalizyi kuti Jehova wakali andime.”
10, 11. Ino mbuti musimbi muna Israyeli mbwaakagwasya mupati wabasikalumba muna Aramu ikuzyiba Jehova, alimwi ino nkucinca kuli buti nkwaakacita naakapona?
10 Cakacitikila Leah cilakonzya kumuyeezya bukkale bwakasikila musimbi muna Israyeli iwakali mubuzike ku Aramu. Mupati wabasikalumba Naamani waku Aramu wakali sicinsenda. Ambweni mukaintu wakwe ngowakatalika mubandi wakapa kuti musimbi ooyu aambe zyalusyomo lwakwe. Musimbi ooyu wakati: “Nicakabota mwami wangu naaka[unka] kumusinsimi uuli ku-Samariya, nkaambo naakamuponya cinsenda cakwe.”—2 Bami 5:1-3.
11 Ibusicamba bwamusimbi ooyu bwakapa kuti Naamani azyibe kuti “taakwe Leza munyika yoonse cita mucisi ca-Israyeli.” Alimwi wakakanza kuti “nsikooyoocita limbi zipaizyo niziba zituuzyo kumizimu imbi cita kuli-Jehova luzutu.” (2 Bami 5:15, 17) Masimpe Jehova wakamulongezya musimbi ooyu akaambo kabusicamba. Ulakonzya kucita oobu alimwi mbwayoocita akubakubusi basunu. Oobu Leah mbwaakalongezyegwa. Nokwakainda ciindi, bamwi babasicikolonyina bakaboola akumwaambila kuti ibbuku lya Achichepere Akufunsa lyakabagwasya kapati mukulilemeka kwabo. Leah ulati: “Ndakakkomana kapati nkaambo ndakazyiba kuti ndakali kugwasya bamwi kwiiya zya Jehova akubagwasya kucinca bukkale bwabo.”
12. Ino mbuti mbomukonzya kuyumizyigwa ikutegwa mukwabilile lusyomo lwanu?
12 Mulakonzya kucitikilwa zintu zikozyenyi azyakacitikila Jennifer a Leah. Amutobele lulayo lwa Petro iwakalemba kuti, mbomuli Banakristo lyoonse mweelede kuba “balibambide lyoonse, kuti mubapandulwide boonse bamubuzya makani aalusyomo lumukalilide, pele amuvuwe amoyo mutete akuyoowa Leza.” (1 Petro 3:15) Ino inga mwacicita buti? Mulakonzya kucita oobo kwiinda mukucita mbobakacita Banakristo bamumwaanda wamyaka wakusaanguna ibakapaila kuli Jehova kuti abagwasye kukambauka “cabusicamba.” (Milimo 4:29, Ci) Eelyo amube basicamba nomwaambila bantu zintu nzyomusyoma. Mulakonzya kugambwa kuzintu zikonzya kutobela. Kunze lyaboobo, muyoomukkomanisya Jehova.
Imavidiyo alimwi Amilimo Yakucikolo
13. Ino nciindi nzi bakubusi bamwi ncobakabelesya ikutegwa bape bumboni? (Amubone tubbokesi apeeji 14 a 15.)
13 Ibakubusi banji babapanduluda basicikolonyina naa bamayi kwiinda mukubelesya mavidiyo. Ziindi zimwi milimo njobapegwa kuti bacite kucikolo balaibelesya kutegwa batembaule Jehova. Mucikozyanyo, bana basankwa Bakamboni ba Jehova bobilo ibalaa myaka iili 15 bakapegwa mulimo wakucita mukkilasi nobakali kwiiya makani aansiku aanyika, bakaambilwa kuti balembe makani aacikombelo cimwi. Bana aaba bobilo bakamvwana kuti balembe makani aacikombelo ca Bakamboni ba Jehova kwiinda mukulemba makani aali mubbuku ilya Jehovah’s Witnesses—Proclaimers of God’s Kingdom. * Alimwi bakapa lipooti amulomompande kwamaminiti osanwe. Kumane boobo, ibayi alimwi abasicikolo bakalijisi mibuzyo minji kapati cakunga basankwa aaba bakaima kumbele kwamaminiti aali 20 aambi. Kwamvwiki izili mbozibede mbocakali kwiiya limwi bakazumanana kubabuzya mibuzyo kujatikizya Bakamboni ba Jehova.
14, 15. (a) Ino nkaambo nzi kuyoowa muntu ncokali kakole? (b) Ino nkaambo nzi ncomweelede kukkalwa moyo nomwaambila bantu nzyomusyoma?
14 Kweelana azyakacitika nzyotwamvwa, izilongezyo zinji zilakonzya kujanika kwiinda mukwaambila bantu nzyomusyoma mbomuli Bakamboni ba Jehova. Ikuyoowa bantu kutanyonganyi coolwe ncomujisi abubotu bwakugwasya bantu kuzyiba Jehova. Ibbaibbele lyaamba kuti: “Kuyoowa muntu kulateya kakole, pele uusyoma Jehova ulakala kabotu.”—Tusimpi 29:25.
15 Kamuyeeya kuti, mbomuli bakubusi Banakristo mulijisi cintu beenzinyoko ncobayandika kapati, nkokuti ibuumi bubotu mazubaano acisyomezyo cabuumi butamani kumbele. (1 Timoteo 4:8) Icigambya ncakuti ku United States nkomukonzya kuyeeya kuti bantu banji tababikkili maano naa babikkila maano kuzintu zyakumubili, ikubuzya-buzya kwakatondezya kuti cisela cabakubusi balabikkila maano kapati kubukombi, eelyo ibasyoonto buyo bakaamba kuti ikusyoma mubukombi “ncecintu ciinda kubagwasya” mubuumi bwabo. Kuboneka kuti zintu mbozibede oobu mumasena manji aanyika. Aboobo kuboneka kuti beenzinyoko kucikolo balayanda kuswiilila ncomukonzya kwaamba kujatikizya Bbaibbele.
Amubambe Cilongwe a Jehova Kamucili Bakubusi
16. Kunze lyakwaambila bantu kujatikizya Jehova, ino ncinzi cibikkilizyidwe mukukkomanisya Jehova?
16 Pele, ikukkomanisya Jehova takuli buyo kwaambila bantu kujatikizya nguwe pe. Alimwi mweelede kulilemeka mbwayanda. Mwaapostolo Johane wakalemba kuti: “Oku nkokuyanda Leza, kuti twabamba milazyo yakwe, alimwi milazyo yakwe tiili miyumu.” (1 Johane 5:3) Muyoocisinizya eeci ikuti naa mwabamba cilongwe a Jehova. Ino inga mwacibamba buti?
17. Ino mbuti mbomukonzya kubamba cilongwe a Jehova?
17 Amujane ciindi cakubala Bbaibbele alimwi amabbuku aamba zya Bbaibbele. Mbomuyaabuzyiba zinji kujatikizya Jehova, ciyoomuubila kumuswiilila akwaambila bantu zyanguwe. Jesu wakati: “Muntu mubotu ulagwisya zintu zibotu muciyobwedo cibotu camoyo wakwe, . . . nkaambo mulomo wakwe uamba [zili] kumoyo.” (Luka 6:45) Aboobo amubikke zintu zibotu mumoyo wanu. Sena inga tamukonzyi kulibikkila mbaakani kumakani aaya? Ambweni mulakonzya kuyaambele mbomulibambila miswaangano yambungano mumvwiki eeyi iiboola. Imbaakani yabili ilakonzya kuba yakutola lubazu kwiinda mukupa bwiinguzi bufwaafwi pele ibuzwa ansi aamoyo. Pele alimwi cilayandika kapati ikucita zintu nzyomwiiya.—Ba-Filipi 4:9.
18. Nokuba kuti mulapenzyegwa, ino ncinzi cikonzya kumukkazika moyo?
18 Izilongezyo iziboola akaambo kakubelekela Jehova tazimani pe. Masimpe, ziindi zimwi mulakonzya kukazyigwa naa kufwubaazyigwa akaambo kakuti muli Bakamboni ba Jehova. Pele amuyeeye Musa. Ibbaibbele lyaamba kuti, “wakali kulangila bulumbu bwakacili kuyooboola kumbele.” (Bahibulu 11:24-26, Ci) Andinywe mulakonzya kukkalwa moyo kuti Jehova uyoomupa bulumbu akaambo kakusoleka kwanu ikwiiya akwaambila bantu zyanguwe. Masimpe, “takonzyi kuluba milimo njomwakacita, aluyando ndomwakatondezya nkaambo kazina lyakwe.”—Bahibulu 6:10, Ci.
Bupanduluzi buyungizidwe
^ munc. 9 Lyakamwaigwa a Bakamboni ba Jehova.
^ munc. 13 Lyakamwaigwa a Bakamboni ba Jehova.
Sena Muciyeeyede?
• Nkaambo nzi ncomukonzya kusinizya kuti Jehova ulaubikkila maano mulimo wanu?
• Ino ninzila nzi zyakukambauka kucikolo izyazwidilila kuli bamwi?
• Ino mbuti mbomukonzya kuyumizyigwa ikutegwa mukambauke kuli baabo mbomwiiya limwi?
• Ino mbuti mbomukonzya kubamba cilongwe a Jehova?
[Mibuzyo yaciiyo]
Kabbokesi/[Zifwanikiso izili apeeji 14]
Ibana Abalo Balamutembaula Jehova
Ibana batanakkwanisya myaka iili 13 abalo bacikonzya kupa bumboni kucikolo. Amubone zyakacitika eezi.
Amber uulaamyaka iili kkumi iwiiya mugiledi 5, wakali kubala bbuku lyaamba zyaba Nazi mbobakapenzya ba Juda mu Nkondo Yanyika Yabili. Amber wakayeeya kuti abaletele bayi bakwe iteepu yavidiyo yakuti Purple Triangles. Ibayi bakagambwa nibakazyiba kuti abalo Bakamboni ba Jehova bakapenzyegwa mubweendelezi bwa Nazi. Ibayi bakatondezya kkilasi yoonse vidiyo eeyo.
Alexa uujisi myaka iili lusele wakalemba lugwalo kuli mbocakali kwiiya limwi mukkilasi ikupandulula ncaatakali kusekeleda Kkilisimasi. Ibayi bakwe bakakondwa kapati, eelyo bakamwaambila kuti abalile kkilasi yoonse cakupozya abasicikolo ibakali mumakkilasi aambi obilo. Kumamanino alugwalo wakati: “Ndakayiisyigwa kuti ndileelede kubalemeka aabo ibasyoma zintu nzyetasyomi, alimwi ndamulumba nkaambo mulakulemeka kusala kwangu kwakutasekelela Kkilisimasi.”
Kakwiindide buyo ciindi cisyoonto kuzwa ciindi naakanjila mugiledi 1, Eric naakaunka kucikolo wakabwezelezya Ibbuku Lyangu Lyamakani Aa-Bbaibbele akulomba kuti atondezye mbaiya limwi mukkilasi. Ibayi bakwe bakaamba kuti, “ndilijisi muzeezo uumbi mubotu. Sena inga tokonzyi kubabalila kaano beenzinyoko?” Eric wakacita oobo. Naakamana kucita boobo, wakabaambila kuti aabo bayanda bbuku lili boobu inga batambika. Ibali 18 bakacita oobo kubikkilizya abayi. Eric wakazyiba kuti lino wajana cilawo cakukambaukila caalubazu.
Whitney uulaamyaka iili fwuka ulalumba akaambo kabroshuwa yakuti Bakamboni ba Jehova Kumakani Aalwiiyo. * Uluula kuti “bamaama bakali kubapa bamayi bangu ibroshuwa eeyi amwaka, pele mwaka uuno ndakacita oobo ndemwini. Ndilalumba kapati akaambo kabroshuwa eeyi, bayi bangu bakandisala kuti ndibe yooyo uutambula zipego akaambo kakulilemeka kabotu.”
Bupanduluzi buyungizidwe
^ munc. 56 Imabbuku woonse aambwa akalembwa a Bakamboni ba Jehova.
Kabbokesi/[Zifwanikiso izili apeeji 15]
Ibukkale Bamwi Mbobabelesya Ikwaamba zya Lusyomo Lwabo
Ciindi nobatumwa kulemba lipooti yacikolo naa mulimo umwi, ibamwi basala mutwe utiisololele kukupa bumboni
Ibunji bwabakubusi babapa bamayi babo vidiyo naa ibbuku lijisi makani aali mukubandikwa mucikolo
Ibakubusi bamwi nobabala Bbaibbele naa bbuku lyaamba zyamu Bbaibbele aciindi cakulyookezya kusyoonto, ibakubusi bamwi bayanda kubuzya balabasikila
[Cifwanikiso icili apeeji 12]
Aabo ibajisi luzibo balakonzya kugwasya mukuyiisya bakubusi kuti babelekele Jehova